رواية عنفوان الحب الفصل الثاني بقلم الكاتبه آيه طه حصريه وجديده

 رواية عنفوان الحب الفصل الثاني بقلم الكاتبه آيه طه حصريه وجديده 

منصور يزوم في وش شروق بعد ما الباب قفل وراه عدنان، عروقه بارزة وصوته مليان غل

منصور: هاااه... بقى كل ديه يطلع منك يابت المركوب، انتي تعرفي الواد ديه منين؟! إنتي وياه بتتلموا فين وبتكلموا بعض إمتى؟! ولا يمكن كنتوا بتقابلوا ورا ضهرنا؟! بتستغفليني يابنت الكلب... 

شروق وهي بتبكي وتهز راسها بسرعة:

شروق: والله ما اعرفه يا عمي، دي أول مره أشوفه النهارده... ما خبراش هو بيقول ايه ولا جاي منين، والله العظيم ما بيني وبينه حاجه!

منصور يمد إيده وكأنه هيلطمها:

منصور:واه واه يا بجحتك تكدبي كمان يا بت؟! ده جاي يقول خطيبتي قدام الخلق كلاتها! ولا يمكن هو مخترع الحكاية داي 

عتمان اللي كان قاعد متكتف فجأة يقوم ويصرخ:

عتمان: خلاص بقى يا أبوي! أنا مش هتجوزها... من الأول وأنا مش رايد الجوازة دي، وانت مصر تغصبني عليها ليه؟! ما تتجوزها انت ولا تجوزها للواد عدنان ولا أي كلب تاني... أنا ماليش صالح بيها!

منصور يلف عليه بصدمة

منصور: انت بتقول ايه يا عتمان؟! بتعلي صوتك على ابوك وبتعارضه انت اتخبلط فى عقلك عاد.... انا قولت انك هتتجوزها يبقى تتجوزها ورجلك فوق رقبتك ومسمعش نفس منكم انتو الاتنين سامعين... 

عتمان وهو واقف بعناد:

عتمان: يووه وبعدهالك يا ابوي ... أنا ابن منصور الغرباوي، وأتجوز واحدة كانت شغالة خدامة في الدار؟! طول عمري مش شايفها غير وهي بتلم الاوض وتمسح البلاط... تيجي دلوقت تقوللي تبقى مرتي؟! دا عيب في حقي قبل ما يكون عيب فيك يا ابوي!

شروق تبص للأرض ودموعها تنزل أكتر، ومنصور يتنفض من الغضب:

منصور: اسكت يا واكل ناسك! دي بنت عمك وبنت أخويا، ومش من حقك تتكلم عنيها بالشكل ديه! وبعدين انت هتتزوجها ومحدش هيدرى غيرنا احنا اهنيه وانت تعيش حياتك وتتجوز اللى انت رايدها بس زواجك من شروق اكيد ومفيش فيه راجعه... 

عتمان بضحكة ساخرية:

عتمان: بنت عمي ولا بنت الخدامة، أنا مش رايدها! وإنت لو رايد تستر عليها زي ما بتقول، خلاص خلى الواد عدنان يشيلها عنك... باين عليه فرحان بيها.

كريمة اللي كانت واقفة على جنب تحاول تدخل:

كريمة: يا منصور كفاية اكديه، البنيه مظلومه وملهاش ذنب... إنت لو رايد تجوزها، جوزها لحد راضي بيها مش حد بيبص لها كإنها حمل تقيل! ليه بتغصب عليهم هما الاتنين على الزواجه دي.... 

منصور يزوم ويقرب من شروق تاني:

منصور: وانا هسيبها تفرح وتضحك اكديه وتقول عدنان بيحبني؟! لاه والله... أنا هعرف إزاي الواد ديه جه لحد اهنيه وعرف تفاصيل البيت، واللي هعرفه هيتحاسب عليه الكل.

عتمان يهز راسه وهو طالع من المندرة:

عتمان: براحتك بقى يا ابوي، بس أنا قلت اللي عندي... وأنا مش داخل الجوازة دي مهما عملت ومهما حوصول.

تاني يوم الصبح بدري، وأصوات الديوك بتعلي. فجأة صوت باب الدوار يتفتح بقوة وخطوات رجل تقيلة تدخل، والكل في المندرة بيرفع راسه.

عدنان، واقف بهيبته، لابس بدلة شيك  وبصة عينه تقطع الخشب.

عدنان: صباح الفل يا جماعة... صباح الخير يا شروق.

شروق، وهي قاعدة على الكرسي في الركن، ترد بصوت واطي:

شروق: صباح الخير يا... يا عدنان بيه.

منصور، اللي كان ماسك كباية الشاي، يحطها على الطبلية بعصبية:

منصور: خير يا بيه... إيه اللي جابك الصبح بدري اكديه مش كان معادنا العشيه تيجي وتطلب البنيه ولا غيرت رايك ولا ايه؟! 

عدنان، من غير ما يبصله، يوجه كلامه لشروق:

عدنان: قومي يا شروق، روحي جهزي شنطتك... هوديكي المدرسة.

شروق تفتح عينيها بصدمة:

شروق: مدرسة؟!

عدنان بابتسامة صغيرة:

عدنان: أيوه يا شروق... المدرسة اللي عمك طلعك منها من غير سبب. من النهارده هترجعي تعليمك... وأنا اللي هوصلك كل يوم. ومحدش يقدر يعترض واصل ولا يمنعك تاني طول ما انا اهنيه.... 

منصور، صوته بيعلى:

منصور:واه واه  إنت بتقول إيه؟! مين اللى سمحلك تتدخل في شؤون بيتي؟! البنيه دي تحت وصايتي وأنا أدرى بمصلحتها. وانت ملكش صالح باللى بيوحصول ليها واصل طول ماهي اهنيه وانا على وش الدنيا...... ماتخليش الاصول تتعداك يابن الناس.. 

عدنان، وهو يلف عليه ببرود:

عدنان: وصاية إيه يا منصور؟! البت قاصر، وطلتعها من التعليم من غير سبب مقنع... ودا مخالف للقانون. أنا ما استأذنتش منك، لأني مش محتاج استأذن لما يكون فيه حق ضايع.

منصور يضرب كفه في الطبلية:

منصور: يا بيه، إنت لازم تخبط على بابنا قبل ما تدخل، مش تيجي طاير على المندرة اكديه كإنك صاحب الدار..... وتؤمر وتتشرط فيه كمان.... متختبرش صبري يا ولد الناس لان صبري ليه حدود بردك.. 

عدنان بابتسامة ساخرة:

عدنان: لما يكون عندي إذن من القانون، مش محتاج إذن منك. وبالمرة... أنا ناوي أعدي كل يوم.وهاخدها بنفسي اوصلها المدرسه واجبها كمان.... اهو عندك علم واحسنلك تتعود على وجودي من اهنيه ورايح لانك هتشوفني كتير يا منصور يا غرباوي.... 

شروق واقفة محتارة، تبص مرة لعدنان ومرة لعمها، ومنصور يصرخ:

منصور: والله يا بيه دا بيت منصور الغرباوي، واللي يدخلوا لازم يكون بإذني، لا قانون ولا غيره والبت داي تحت وصايتي انا.... وانا حر اعلمها ولا معلمهاش محدش يدخل واصل... 

عدنان، صوته بدأ يبقى حاد:

عدنان: وإنت يا منصور، دا مش أول ولا آخر بيت أدخله عشان أرجع الحق لأهله. شروق من النهارده طالبة، وهتكمل تعليمها، وإذا مش عاجبك... نروح القسم ونشوف مين اللي له الكلمة الأخيرة.

منصور، وهو واقف قدامه ووشه محمر:

منصور: يعني أنت واخد قرار لوحدك؟ وجاي تنفذه وكمان بتستخدم سلطتك وحاي لنص داري تهددني كمان يا سيادة وكيل النيابه... 

عدنان يقرب خطوة، وصوته هادي بس مليان تهديد:

عدنان: أيوه... واخده. ومش محتاج أشرحلك ليه، لأنك خابر زين إني لو سيبت الأمور تمشي على كيفك، كان زمان البنت دي ضاعت.

شروق، وهي بصوت مكسور:

شروق: طيب... أنا هجهز.

منصور يزوم فيها:

منصور: لاه يا بت، اقفي مكانك عاد... ومتخلوش برجي من دماغي يطير.... 

عدنان يقطع عليه:

عدنان: مكانها المدرسة... قومى يا شروق، وأنا مستنيكي بره وياريت متتاخريش او مثلا يعني الاقي حد منعك تطلعي وتروحي المدرسة.... 

وعدنان يلف ويخرج بخطوات تقيلة، وسيب وراه منصور بيغلي زي الزيت عالنار.

شروق طلعت من أوضتها بعد ما غيرت هدومها ولبست مريلة المدرسة،ولفت حجابها ، وشنطتها الصغيرة على كتفها.

عدنان واقف بره المندرة، أول ما شافها ابتسم ابتسامة جانبية:

عدنان: ها... اكديه تمام. يلا بينا قبل ما الجرس يضرب. وتتاخري على مدرستك... 

شروق وهي  متوترة:

شروق: بس... يا عدنان بيه، عمي مش هي...

عدنان يقاطعها بثقة:

عدنان: إنتي  ليكي مدرسه، مش ليكي سجن... وسيبي الباقي عليا. ومتقلقيش ولا تخافي من اهنيه ورايح مفيش خوف تاني ولا كسر ولا ضرب.... بوعدك يا شروق

عدنان يفتح باب العربية ويمد إيده علشان تدخل، وهي تركب وهي قلبها بيرقص من الخوف والفرحة في نفس الوقت.

منصور واقف في شباك المندرة، ووشه أحمر من الغيظ، صوته طالع وهو بيكلم نفسه:

منصور: والله ما هسيبها اكديه يا عدنان... إنت فاكر نفسك مين علشان تفوت من بابي كإنك صاحب الدار وتاخد قرارات من ورايا؟!

كريمة، وهي داخلة المندرة، تبصله بخوف:

كريمة: يا منصور، حرام عليك... البنيه مالهاش ذنب، ودي فرصة تكمل تعليمها. انت ليه بس مش رايد ليها الراحه ولا الفرح..... ما بنات عمها بيتعلموا اشمعنه هي.... مالك ومال بتي عاد يا منصور... دي وصيه اخوك حتى... 

منصور يزوم:

منصور: فرصة إيه؟! دا لعب في دماغها... وانا خابر زين النوع ديه من الرجالة، يدخل من باب الشهامة ويطلع من باب المصلحة.

كريمة تهز راسها:

كريمة: مش كل الناس زيك يا منصور. عدنان فعلا داخل من باب الشهامه وهيطلع من باب الستر والكرامة.... 

منصور يضرب كفه في الحيط:

منصور: والله ما هسكتله... أنا هوريه إن منصور الغرباوي مش لعبة في إيد حد.

           ****************

في الطريق، عدنان وهو سايق يبص لشروق:

عدنان: لما تدخلي المدرسة النهارده، ما تطلعيش وراك واصل. أي حد يقولك كلمة أو يلمح، طنشيه... إنتي راجعة اهنيع عشان تتعلمي، مش عشان تردي على الناس.

شروق، بصوت خافت:

شروق: بس يا عدنان بيه... الكلام بيجرح.وبعدين حضرتك عرفني منين وليه بتعمل كل ديه علشاني... 

عدنان، وعينه على الطريق:

عدنان: وأنا موجود علشان محدش يجرحك تاني... سامعة؟ ومع الوقت هتعرفي انا بعرفك من منين وليه بعمل اكديه.... بس المهم دلوك زي ما قولت قبل سابق تركزي على دراستك ومزاكرتك وبس... فاهمه؟! 

توصل المدرسة، عدنان ينزل ويفتح لها الباب قدام الكل، وهي تحاول تمشي بسرعة علشان العيون كلها عليها. هو واقف لحد ما تدخل، وبعدين يركب عربيته ويطلع.

           *******************

منصور في المندرة، جاي له ابن عمه "خلف" وبيسأله:

خلف: مالك يا منصور، وشك متغير اكديه ليه؟ مش خلاص عملت اللي فى دماغك وجوزت البت للواد... 

منصور، بأسنان مقفولة:

منصور: اسكت يا خلف احسن شيطاين الدنيا بتتنط فى وشي دلوق..... ولاه مجوزتش حد الواد عدنان... فاكر نفسه جاي يعلمني أربي ولاد أخويا كيف. خد البت من غير إذني ورجعها المدرسة.وكل حديته وياي تهديد ولوي دراع.... 

خلف يضحك بسخرية:

خلف: واه واه كل ديه يوحصول وانا مدراش بيه...... يبقى لازم نرجع للي اسمه عدنان ديه لحجمه ونعرفه بيتحادتت اكديه ويعمل اكديه مع مين وممكن يعمل فيه ايه ...

منصور  بنظرة فيها مكر:

منصور: ومين قالك اني مش هعمل اكديه وأنا عندي فكرة... هخليه يندم إنه دخل داري من غير إذني.

يتبع 

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

الفصل الاول من هنا

الفصل الثاني من هنا

الفصل الثالث من هنا