رواية فارس احلامي الفصل الثالث بقلم مريم اليوسف حصريه وجديده
بفيلا ابو المجد
بعدون قاعدين بتجي رسالة على هاتف ابو المجد بيفتحا بتطلع صورة لقمر .. بوقف على رجليه
ابو المجد : قمر .. قمر هي قمر
قامو كلون وشافو صورة قمر لحالها وهية قاعدة مبين عليها حزينة
ام المجد : ياعمري ياروحي ليكو وين مقعدينا
ابو المجد : طولي بالك رح نتصل بالرقم
نذار : اي عمي دق دق
دقو للرقم طلع خارج التغطية
ابو المجد : كلاب .. كلاب ... شوبدون شوبدن ... عم يعيشونا على اعصابنا
مجد : بابا خلينا نعطي الرقم للشرطة
ابو المجد : هيك رح نعمل بس متأكد انو ما رح يطلع بأيدون شي
ام المجد : تقبري قلبي يابنتي .. مشان الله يا ابو المجد تصرف
ابو المجد : خلص طولي بالك ... رح ترجع رح ترجع
ام المجد : يارب .. يارب
فارس قاعد وصافن فيها
فارس : سبحان الذي خلقك على هالجمال والانوثة والله معو حق ابوكي يخفيكي عن عيون البشر ...
فجأة فاقت قمر مرعوبة واتمسكت بفارس وكانت عرقانة وعم تلهت
قمر : حية .. حية ... فارس حية
فارس : قمر اهدي مافي شي
قمر : بلى ليكا ... ليكا
فارس ابتسم كيف متمسكة فيه : خلص حاجتك جنان هاد كابوس
صارت تتطلع حوليها : عنجد ؟؟
فارس : والله جد ما انا قاعدلك حارس مافي شي
قمر : بسم الله .. بسم الله
فارس : اهدي ولاتفكري
قمر : يا الله تعبت تعبت .. انا عندي فوبيا من الزواحف
فارس : خلص ولا يهمك انا معك ... بس تركيني
اتطلعت على حالا لقت حالا متمسكة فيه بكل قوتا خجلت وتركتو ورجعت لورا
قمر : سوري ما انتبهت
فارس : عادي ولا يهمك بس انتي قويلي قلبك
هزت براسا ورجعت ع مكانا
مرق الانهار وصار ليل
فارس : انا بدي نام تصبحي على خير
هزت براسا وقالت : وانت بخير
ضلت قاعدة مكانا وهية عم تبكي وخايفة كتير وكل شوي تتلفت حوليها ... واتشنجت من الخوف وصارت ترجف وكمان الجو برد .. برم فارس لعندا وهو نايم
قمر صفنت فيه : يا الله ما اجملك يافارس .. ياالله ما احلاك ... شبك قمر شو عم يصير معك ... شو هاد الشعور يلي عم حسو اتجاهو ... ليش كتير مرتاحتلو وكأني بعرفو ... ليش ماكنت بدال نذار .. بس كمان نذار منيح ... بس ياربي هالشعور يلي عم حسو اتجاه فارس شعور غريب اول مرة بحس فيه .. شعور حلو .. مع انو مبارح تعرفت عليه بس في شي بيجذب وبيسحر ... خلص قمر شو هالتفكير حرام عليكي .. استغفر الله العظيم .. استغفر الله العظيم ... ااااااح بررررررد
تمددت ونامت على فرشتا وتغطت وهية عم ترجف
فاقت الصبح وكان بعدو نايم ابتسمت اجت بدا تقوم حست راسا عم يفتل .. ومعدتا عم توجعا
قمر : ياربي شو عم يصير معي
بلشت نفسا تلعي وقامت بسرعة ع الحمام وصارت تستفرغ ..
فاق فارس على صوتا وقام بسرعة لعندا كانت طالعة من الحمام
فارس : قمر شبك
قمر : اخدت برد كتير ليلة مبارح .. وشكلو اثر علي البراد
فارس : سلامتك ليش ماقلتيلي كنت عطيتك حرامي
قمر : لا مامشكلة كمان انت بدك تدفى
فارس : انا مامهم ... تعالي تعالي
نامت وهو غطاها بحرامو وحراما ...
فارس : احسن
هزت راسا وهية عم ترجف اي
بعد شوي قامت بسرعة ع الحمام وماسكة بطنا ..
فارس : ياحرام ياقمر لك الله يلعن الشيطان
طلعت بعد شوي
فارس : شو؟؟
قمر : معدتي ماشية
فارس : شكلك ماخدة بردة قوية
قمر : مابعرف ... اااخ يابطني ..
رجعت قامت بسرعة وحاطة ايدا على تما استفرغت وطلعت
فارس وقف ع الباب وصار يدق
فارس : ياحيوانات ... ياحمير .. جيبو دكتور البنت رح تموت ... محدا رد
رجع لعندا كان وجها اصفر ومبين عليها التعب
فارس : قمر انتي منيحة
قمر : لا .. لا .. ماضل شي بمعدتي ... رح موت يافارس رح موت
فارس : ريتو الموت لقلبي وانتي مايبصبيك شي
قمر اتطلعت عليه وهية مستغربة من لهفتو عليها
قمر : فارس بردانة ...
فارس : والله ماضل شي غطيكي فيه ..
قمر : ااااح برررررددد
مد يدو على راسا كانت كتير سخنانة ..قام وصار يخبط ع الباب بس مافي مجيب .. لانو بجيبولن اكل وبروحو ومافي حدا بيبقى عندون
كان بعدو لابس كنزة شلحا وشلح البروتيل يلي كان لابسو ورجع لبس الكنزة اخد البروتيل القطن بلو بالمي وصار يعملا كمادات وهية كانت غفيانة .. ضل يعملا كمادات لحتى نزلت الحرارة
وفجأة انفتح الشباك يلي بالباب مشان يعطوهن اكل
وقام فارس فورا
فارس : لك البنت رح تموت جيبولا دكتور
ضياء : شبا شو صابا
فارس : اخدت برد ... بسرعة جبيولا دكتور
ذكريا : مافينا نجبلا دكتور ... انا رايح جبلا دوا من الصيدلية
فارس : لك الله يلعنكم ... بسرعة
راحو بسرعة جابو دوا ورجعو
وعطوه دوا لفارس من الشباك اخدن وهو عم يسب ويعيط ويهدد
فيقا وسقاها الدوا ورجعت نامت .. وضل قاعد فوق راسا لحتى لاحظ انها صارت منيحة .. فاقت بعد شوي
فارس بلهفة : انتي بخير صحيتي
قمر : اي حاسي حالي احسن
فارس : الف حمد وشكر الك يارب
قمر : خفت علي
فارس : اكيد خفت عليكي
قمر : ليش
فارس : شو ليش .. خفت عليكي لانو ... خفت عليكي وبس
ابتسمت ورجعت لمكانا
قمر : شكرا
..........................
بعد مرور اسبوع
قمر : فارس قوم فيق
فارس : تركيني ... شو في وراي
قمر : قوم ضجت لحالي
فارس : من ايمت فايقة
قمر : من زمان
فارس : وشو قاعدة عم تعملي من زمان
قمر : عم اتأمل ....
فارس فتح عيونو : شو قلتي
قمر : اااه ولا شي ... بس قوم حاسي حالي رح اختنق قوم احكي معي
قعد فارس : هاه وهي قعدنا
قمر : انا تعبت نفسيتي كتير وبعدين ... لايمت معقول لهلق ماطلبو هالفدية انا رح موت هون ..
فارس : بس انا تعودت
قمر : بشرفك عم تتهاضم هلق معقول عاجبك هالوضع
فارس : بصراحة بالاول ماكان عاجبني بس لما .....
قمر : لما شو كمل ..
فارس : لما ..... لما حبيتك
انصدمت ومعد حكت ومشاعرا كلا تشنجت
فارس قام وقرب منا : اي قمر انا حبيتك ..
قمر : فارس اسكت ما منحقك تحكي هيك
فارس : حقي ونص .. انا حر وبقول يلي بدي اياه
قمر : بس انا ماني حرة .. ومابدي اسمع هاد الحكي
فارس : قمر انا حبيتك .. وانتي كمان حبيتني وانا ملاحظ
قمر : لا انا ماحبيتك وكمان مامن حقي هاد الشي
قام وقعد مقبالا
فارس : من حقك وحقي .. من حقنا نحب وننحب .. قمر انا حبيتك بجنون وانتي كمان انا ملاحظ كيف بتتطلعي علي .. قمر عيونك لحالون عم يحكو انك بتحبيني
قمر : لا انت فهمان غلط .. انا بحب نذار
حط ايدو عل خدا وقال : صرلي اسبوع معك ..وصرت بعرفك كتير منيح .. قمر حاج تكذبي على حالك .. انتي بتحبيني ونذار ما الو اي مكان بقلبك
قمر : فارس ..
حط ايدو على تما وصار يتطلع بعيونا : هشششش ... لاتحكي شي .. قمر بعرف انك بتحبيني وبجنون ومابدي منك اي شي .. يمكن يلي حكيتو ماكان لازم احكيه بس معد فيني خبي اكتر من هيك .. انا اسف واعتبري حالك ماسمعتي شي
قمر : اوكي
....................
بفيلا الباش
ام فارس عم تبكي : ياربي وين راح هالولد .. ياربي... وينك يافارس .. وينك والله ما الك بالعادة تغيب كل هالفترة وماتخبرني
...........
بفيلا ابو المجد
مجد : وبعدين مع هالحالة صرلا اكتر من اسبوع ينقبرو يتصلو ويخلصونا ليش هيك عم ينشفولنا قلبنا
ابو المجد : مابعرف ... مابعرف .. محدا قدر يوصل لشي
مجد :وينو نذار ما اجا
ابو المجد.: صرلو انهارين مابين ... شكلو بدو يغير رأيو
مجد : ساعتها بالناقص منو .... المهم قمر بدنا قمر
رن التلفون
ابو المجد رقم خاص
مجد.: رد بابا رد
ابو المجد : الو .... اي مشان الله طمني عن بنتي .... مستعد اعطيكن يلي بدكم اياه بس تركو بنتي ...... شوووووو عشرة مليون دولار .... لحظة .. لحظة سكرو ولاد الكلب
مجد : شو قالو بابا
ابو المجد : بدون عشرة مليون دولار
مجد : شووووو ... الله لايوفقون .. ماعطوك مجال تحكي اوتتفاوض معون
ابو المجد : شفت بعينك
نزلت ام المجد من على الدرج
ام المجد : سمعت صوت التلفون قلي هدول الخاطفين
ابو المجد : اي هنن
ام مجد : شو قالولك .. مشان الله طمني وريح قلبي
ابو المجد : مابعرف سكرو .. بس قالو بدون ١٠ مليون دولر
ام المجد : اي مشان الله عطيهن المهم ترجع بنتي
ابو المجد ؛ خلص ولا يهمك رح اعمل كلشي بأيدي بس لحتى يرجعو يتصلو
...........................
ببيت صغير بعيد عن المستودع ب٢٠٠ متر قاعدين الخاطفين وعم يتفرجو على فلم .. قام طلع مشد البطل قرب من البطلة وباسا
صفن ضياء بالمشهد وقام فورا
ضياء : لك شو عملنا نحنا
شب : شبك ضياء
ضياء : كيف خلينا هي البنت مع فارس باش .. لك بركي صار بيناتون شي
ذكريا ؛ شو قصدك
ضياء : لك بس مايكون صار بيناتون شي .. تنين لحالون محبوسين بغرفة وحدة لك كيف كنا بهل الغباء
شب : اي والله معك حق
ذكريا : اكيد لونو خبر المعلم كان قلب الدنيا علينا
شب : شو بدنا نعمل هلق
ضياء : رح نطلع البنت ونحبسا لحالا
ذكريا : وين بدنا نحطا مافي مكان
ضياء : بحطا بش غرفة هون بالبيت ..
شب : شو نستو انو فارس قوي واذا فتحتنا الباب اكيد مارح يرحمنا ... وكمان ممنوع نأذيه
صفن ضياء بعدين حكي : المسا لما بكون نايم بنفوت وبناخدا
ذكريا : منيح كتير
ضياء : ناجي خدلون اكل
ناجي : حاضر
...........................
راح ناجي رمالون الاكل وراح
قمر : فارس بشو صافن
فارس : عم فكر بطريقة نهرب فيها
قمر : بنقدر
فارس : اتركيني فكر بطريقة
قمر : مابدك تاكل
فارس اتطلع عليها نظرات حب : اي جاي
هية اتجاهلت نظراتو
قرب وصار ياكل وهو صافن فيها
قمر : فارس ممكن لاتتطلع علي بهي الطريقة
نزل نظرو وحط الاكل من ايدو وقام وقف على الشباك
قمر قامت وقفت وراه
قمر : فارس بترجاك لاتحبني انا ماملكك .. ومامن حقك تحبني
فارس : .......
قمر : يمكن نحنا لانو مع بعضنا بس بكرا لما بنطلع كل واحد رح يرجع لعالمو ورح تنساني
فارس : عمرو يلي حب مابينسى
قمر : ماعندي شي قولو غير الله يصبرك
التفت عليها
فارس : هاد يلي طلع معك .. الله يصبرني
قمر : لكن شو بدك مني
فارس : قمر انتي بتحبيني ماهيك
قمر :....
فارس : ردي .. انتي بتحبيني
قمر : لا
فارس : كذابة
قمر : لا ماني كذابة
فارس : اتطلعي بعيوني وقوليلي مابحبك
نزلت راسا وهية عم تبكي
فارس : اتطلعي فيني هون وقوليلي مابحبك يافارس
قمر : مابقدر ... مابقدر
مسكا من كتافا وصار يهزا : ليش .. قوليها يلا
قمر : بترجاك تركني ... خلص مابقدر
فارس : لانو بتحبيني ... لانك بتحبيني
قمر رافعت راسا وعيونا مليانين دموع : اي اي بحبك .. بحبببك وبموت فيك
فارس ماصدق يلي سمعو سحبا وضما على صدرو
فارس : قوليها مرة تاني
صارت تضربو على صدرو : بحبك ... بحببببك
رفعلا وجها بأديه وصار يتطلع بعيونا
فارس : سامحيني قمر
مالحقت تقولو ليش كان مقرب وحط شفافو على شفافها وباسها...............
دفشتو عنا
قمر : شو عملت ... ليش هيك عملت
فارس : بحبك .. بحبك
قمر : حرام عليك ... حرام عليك .. انا ماني الك
فارس : لأ الي ... عم تفهمي انتي الي
قمر : لا انا ماني الك
فارس : قمر بحبك
قمر : وانا كمان بحبك ... بس ماني الك افهم مانا لبعض
فارس : لما نطلع من هون بروح بخطبك من ابوكي
قمر : شوو نسييت انو انا مخطوبة
فارس : بتتركيه انتي مابتحبيه
قمر : مابقدر بابا مابوافق
فارس : بنتزوج خطيفة
قمر : مستحيل
فارس : ليش ..
قمر : مستحيل حط راس بابا بالارض
فارس : قمر
قمر : فارس بكفي .. حاج لهون بترجاك .. انا معد اتعاطك لحتى نطلع من هون .. ويارتي تفكر تنساني
فارس : الموت اهون علي من نساينك
قمر ماردت وراحت قعدت على فرشتا وضمت رجليها وخبت وجها وصارت تبكي
وهو التفت وووقف على الشباك
..............
المسا وهنن نايمين
فتحو عليهن الباب شوي شوي
ضياء : هشش لا تطالعو صوت
فاتو على روس اصابيعون .. وقربو من قمر واحد مسكا من ايدها والتاني حط ايدو على تما .. فتحت عيونا وهية خايفة وبدا تصراخ بس ماعم تقدر
وصارت تحاول تقاوم بأديها ورجليها .. وفارس كان نايم اتحكمو منا منيح وحملوها واتجوه لعند الباب
وهية عيونا على فارس وعم تبكي وتترجاه يفيق ... فجأة فارس فاق وكان قلبو حاسو وشافون حاملين قمر وطالعين .. ومتل النار قام وركض لعندن بسرعة البرق ومسك ضياء من كتفو وسحبو لورا وضربو بكوس على وجهو ووقع ع الارض والباقي اسرعو مشان يهربو رح بسرعة قف قدامون
فارس : تركوهااا
ناجي : مادخلك .. ذكريا تصرف معو
هجم عليه ذكريا وبسرعة فارس ضربو ووقعو بالارض نزلو قمر ع الارض وواحد مسكا وقرب ناجي وكمان فارس ضربو رجع قام ذكريا وضربو وقام ضياء كمان ضربو وهداك الشب ترك قمر وقرب منو كمان ضربو .. وجمعون بالارض وصار يضربون وطلع كل غضبو و غيرتو عليهم وقمر واقفة على جنب حاطة ايدا على تما وعم تبكي ..
قرب فارس من ناجي ومسكو من شعرو وقال : مين انتو
ناجي : والله عبيد
فارس : مين وراكم
ناجي والله مابعرف .. بس نحنا مهمتنا نخطف
فارس : مين بيعطيكم الاوامر
ناجي : معلم .. معلم ابو اللوز
فارس : اسمووووو ؟؟
ناجي : والله مابعرف
فارس : هدول الاوباش بيعرفو
ناجي : لا ماحدا بيعرف
فارس : بس لو مابدي اهرب كنت سلمتكم بأيدي للشرطة ... بس مافي وقت ... بس اقسم بالله راجعلكم
رجع ضربون برجلو على بطونون مشان مايقومو يلحقوه
مد ايدو لقمر مشان تجي وهية قربت لعندو بسرعة مسكت ايدو وطلعو فورا
والشباب حاولو يقومو بس ماقدرو
طلعو لبرا ..
فارس : اشهد ان لا اله الا الله وان محمد رسول الله
قمر : اشهد ان لا اله الا الله وان محمد رسول الله
فارس : تعالي هديك سيارة ...تعالي بسرعة قبل محدا يجي ... او يخبرو حدا
راحو ركض ركبو بالسيارة ومشو
كانو بقلب بستان و فارس استلم الطريق ومشي عليه بأقصى سرعة
قمر كانت عم تبكي دموع فرح ودموع خوف .. اتطلعت على فارس واتذكرت كيف قتلون كلون وكيف كان شخص تاني .. عنجد كان فارس بكل معنى الكلمة
وصلو للطريق العام ومشي فارس ... اتطلع على قمر لقاها صفنانة فيه ابتسم وركز قدامو وحكي : ليش هيك عم تتطلعي علي معجبة
ماردت واتطلعت قداما
وصل لمكان فيه تجمع سكان وفي سيارات على الطريق
قمر : وين نحنا
فارس : مابعرف .. بس هون امان في ناس
قمر : معد شوفك ماهيك
فارس بعصبية : لاتحكي هيك ... انتي الي عم تفهمي
قمر : هي الحقيقة ليش بدنا ننكر الحقيقة .. كلا يوم يومين وبكون بين اهلي ومع خطيبي ورح بلش بتجهيز عرسي
فارس : قمر انا العريس الوحيد يلي رح يحصل عليكي
قمر : صعب .. صعب
فارس : بخطفك ... والله بخطفك
قمر : مستحيل ... مستحيل .. ابي كل تحريصو لانو اختو هربت مع واحد وهلق اذا بشوفا رح يقتلا بعد ٣٠ سنة ...كيف انا بتنو ومخطوبة كمان
فارس : باخدك وبخبيكي بعيد عن الناس
قمر : قلتلك مابقدر هدول اهلي
فارس: خلينا نأجل حكي بهل الموضوع ... تعالي نسأل حدنا نحنا وين
نزل لعند واحد .. وسألو وين هنن ورجع ع السيارة
فارس : انزلي
قمر : ليش
فارس : شو نسيتي انو هي السيارة الون .. واكيد بكونو عم يلحقونا ... رح نتخبى بمكان ورح اتصل بصديقي انور يجي ياخدنا من هون
........................
ضياء دق للمعلم وقلو انو فارس وقمر هربو ..
.....
المعلم : الو مرحبا ياباشا
مجهول : قول شو عندك
المعلم : اخبار مو حلوة
مجهول : شوفي قول بسرعة
المعلم : بصراحة فارس قدر يهرب
مجهول : شوووو... لك مجنانين كيف بتخلوه يهرب
المعلم : مابس هيك .. كمان هربا لقمر
مجهول : شووووووو ... لك حيوانات بهايم ... كيف هيك كيف بتخلوهم يهربو ... انا عم ادفعلكم مصاري مشان تخلوهم يهربو .... دورو عليهم بكل مكان عم تفهم ...
المعلم : حاضر .. حاضر
مجهول : لحظة قلي كيف فارس هرب قمر
المعلم : قال وهو طالع لمحا بغرفة فتحلا الباب وطالعا
مجهول : اممم ... طيب بسرعة بدورو عليهم وبتجيبوهم عم تفهو ... كل عذابنا راح ع الفاضي .. لك الله يلعنكم ... ليك ولاااه ... بدي قمر .. قمر مهمة في وراها ملايين
المعلم : حاضر ... حاضر بنحاول
................
اتصل فارس برفيقو انور ودلو ع العنوان .. وبعد ساعتين كان انور بالمكان يلي قلو عليه .. كان جاي معو رجال وكانو بسيارتين
نزل انور من السيارة وضمو لفارس
انور : وين كنت شغلت بالي عليك
فارس : كنت مخطوف
انور : شووووو .. كيف هيك .. ومين خطفك
فارس : انا نفسي مابعرف مين خطفني
اتطلع انور على قمر وقال : مين هي
فارس : هي كانت مخطوفة معي .. بتكون بنت ابو المجد
انور : ليش ابو المجد عندو بنات
فارس : ما وقتو حكيك عطيني مفتاح السيارة .. انا وقمر رح نطلع قدامكن وانتو الحقونا
انور : اوك .
ركب فارس وركبت جنبو قمر ومشو ....شغل ع الراديو وكانت طالعة اغنية لوائل جسار (بحبك مش هقول تاني)بحبك مش هقول تانى و عايزك و انت عايزانى
بحبك حب مش عادى مشاعرى من زمان تانى
و روحك ساكنه فى روحى فى قلبك شفت شريانى
دموعك بتجرى فى عيونى و تدبل كل احزاني
مدت ايدا وسكرت الراديو
فارس : ليش سكرتيه
قمر : هيك ماعجبنتي الغناي
فارس :اممممم مع انو بتشه حالتنا
قمر :نحنا مافي شي بيناتنا ولاتوهم حالك على شغلات فاضية
فارس : انتي بتحبيني
قمر : بحبك ومانا لبعض وماكل تنين حبو بعض اخدو بعض
فارس : ليكي ماما ضحت بكلشي مشان البابا
قمر : ليش امك هربت مع ابوك
فارس : اي اهلا كانو صعبين فهربت مع بابا واتزوجو
قمر : واهلا
فارس : مابعرف عنون شي
قمر : ومانا متندمة
فارس : لا مانا متندمة وكانت مع ابي كتير مبسوطة بس اكيد بتشتاق لاهلا
قمر : مابعرف فارس طلاع من راسي
فارس : قمر بحبك بحبك مشان الله ارحميني
قمر : وهو بحبني واذا تركتو بكسرلو قلبو
فارس : ااااااااخ ياربي ااااااااخ
وصل فارس على بيتو وكان بلش يطلع الصبح
قمر : شو هاد وين نحنا
فارس : هاد بيتي انزلي
قمر : نعمممم ... وصلني لعند اهلي
فارس : انزلي قمر لاتعصبيني
قمر : اي ماني نازلة شو الي شغل ببيتك وصلني على بيت اهلي او عطيني تلفون دقلون
فارس : اوووف
نزل وفتحلا الباب وسحبا من ايدا
قمر : تركني تركني تركني سحبا من ايدا وطلع فيها ع البناي وفتح باب شقة رماها لجوا وطلع قفل عليها
قمر: يافارس ... يافاااااارس ... يا فاااااارس طالعني .. طالعني
نزل فارس وراح ع الفيلا لعند امو مشان يتطمن عليها
اذكرو_الله💕💕
تابعووووووني
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
أدخلوا واعملوا متابعة لصفحتي عليها كل الروايات بمنتهي السهوله بدون لينكات من هنا 👇 ❤️ 👇
تعليقات
إرسال تعليق