رواية غانيه وليست بغانيه الفصل الخامس بقلم الكاتبه إلهام عبد الرحمن حصريه وجديده على مدونة النجم المتوهج
![]() |
رديت عليه بإيموجي بيعيط قالي مالك في إيه؟ إيه اللي مزعلك قولتله على اللي حصل من أخويا لاقيته بعتلي فويس وبيقولي يا شيخة حرام عليكى وقعتي قلبي أنا قولت في مصيبة ولا حاجة طب على فكرة بقى أنا كنت ناوي اطلب منك ان معتيش تنزلي صور ليكي تاني.
قولتله ليه انت عمرك ما علقتلي على كده بالعكس انت كنت دايما بتمدح في الصور اللي بنزلها قالي أيوه أنا فعلا الصور عجباني جدا وصاحبة الصور كمان وعشان كده مش حابب حد يشوفك غيري بصراحة يا رحمة انتى حلوة أوي وأنا عارف الشباب بيفكروا ازاي وكويس إن أخوكي قالك لأني أنا كده كده كنت همنعك تنزلي أي صور ليكي.
قولتله وأنا مستغربة من كلامه تمنعني؟! تمنعني ازاي وليه؟ قالي يا رحمة بصراحة أنا معجب بيكي ولما كلمتك أول مرة كانت حجة بس عشان اعرف اتكلم معاكي أنا عارف إنك هتقوليلي انك متجوز ومخلف بس والله غصب عني انتي حركتى فيا مشاعر كانت ماتت من زمان احساسك عالي أوي واسلوبك في الكلام بيشدني ليكي بطريقة غريبة وبصراحه انا في مشاكل كثير بيني وبين مراتي وناويين ننفصل بس هي مسألة وقت وخوفت اقولك كده من البدايه ترفضي تتكلمي معايا فضلت ساكته وانا بقرأ رسايله وما ردتش عليه.
لاقيته بيقولي رحمة عشان خاطري اوعي تبعدي عني أنا بجد مقدرش أعيش من غيرك... يومي مبقاش بيعدي من غير ما أكلمك أنا دلوقتي عاوز اسألك سؤال واحد بس عشان خاطري وحياة كل لحظة حلوة بينك وبيني تجاوبينى بصراحة.
قولتله اسأل قالي انتى بتحسي بإيه وانتي بتكلميني اتكسفت أوي ما بقيتش عارفة أرد وأقوله إيه؟
فضل يشجعني ويقولي مش عاوزك تتكسفي مني عاوزك تقولي كل اللي في قلبك صرحي بمشاعرك بدون خوف بس قولي اللي انتى حاساه بكل صدق وصراحة.
لاقيت نفسي بقوله أنا فعلا ببقى مرتاحة وأنا بتكلم معاك كل اللي في قلبي بحكيهولك الكلام اللي ما اقدرش أحكيه مع حد من أهلي انت بس اللي بتعرفه ومش عارفة إيه السبب أو ليه انت بالذات اللي بحب أتكلم معاه.
قالي يعني معنى كلامك إنك بتثقي فيا. قولتله أيوه طبعا لو مكنتش بثق فيك مكنتش كلمتك ابدا ولا حكيتلك بالتفصيل عن حياتي.
قالي طيب ليه انتي دايما في الوقت المحدد بتاعنا بتبقي موجودة ومفيش مرة اتأخرتي تقدري تقوليلي إيه السبب؟ فضلت ساكتة ومش قادرة أقوله فعلا إني معجبة بيه.
لكن هو قال أنا بقى عارف لأنك معجبة بيا زي ما أنا معجب بيكي احساسنا متبادل عشان كده احنا الاتنين بنستنى الميعاد بتاعنا بفارغ الصبر قولتله أنا فعلا ببقى نفسي الوقت يجري عشان أتكلم معاك ويمكن عشان ماليش أصحاب وإخواتي متجوزين وليهم حياتهم قالي لا مش ده السبب بس لو مكنتيش مرتاحة ليا ومعجبة بيا مكنتيش فضلت تكلميني المدة دي كلها ولا أنا غلطان؟
فضلت ساكتة مكسوفة أرد عليه قالي يبقى السكوت علامة الرضا يا جميل قولتله خلاص بقى ما تكسفنيش ضحك وقالي خلاص يا برنسيسة تصدقي أنا نفسي أبوس اخوكي لأن هو السبب في إننا نعترف لبعض.
لما جاب سيرة أخويا حسيت بخوف وسألت نفسي يا ترى أهلي هيتقبلوا وضع زي ده ولا لا؟
أنا دكتورة واخواتي مناصبهم عالية وأهلي ناس محترمين وكمان لسة بنت بنوت ودا واحد متجوز ومخلف وزي ما بيقول هيطلق وهيبقى مسؤول عن أولاده وفي عز تفكيري لاقيته باعتلي بيقولي ساكتة ليه مالك قولتله ابدا مفيش بفكر.
قالي بتفكري في إيه؟ قولتله في اللي احنا قولناه دلوقتي يا ترى أهلي هيوافقوا على جوازنا أنا خايفة أوي إنهم يرفضوا قالي جواز إيه يا رحمة اللي بتقولي عليه دلوقتي انتي ناسية إنى لسة ما طلقتش مراتي احنا دلوقتي نفضل مع بعض نتكلم ونعرف بعض أكتر ونتعود على بعض لحد ما اظبط ظروفي وبعد كده نشوف موضوع الجواز ده ما انكرش اني حسيت بالقلق والخوف من طريقة كلامه لكن طمنت نفسي إنه بيحبني وان غرضه شريف وهيتجوزني، كنت مصدقاه ولاغية عقلي فضلنا كل يوم نتكلم مع بعض وبقى يطلب مني كل يوم أبعتله صورة بحجة إني وحشاه وعاوز يشوفني كنت ببعتها وامسحها على طول وكتير طلب مني يكلمني فيديو كول لكن كنت بخاف وأرفض وبدأت مكالماتنا تتطور كان الأول بيتغزل في شكلي دايما... يعني يقولي شكلك قمر أوي النهاردة... الطقم بتاعك تحفة... لفة الطرحة تجنن لكن دلوقتي بدأ يتكلم في تفاصيل جسمي يعني يقولي عيونك بتسحر وشفايفك جنان شبه الكريز ولا خدودك اللي عاملة زي الفراولة كل شوية يتغزل في حاجة في جسمي وبدأت المصيبة لما كنا بنتكلم في مرة وطلب مني إنه يشوف شعري في الأول رفضت طبعا قولتله ما ينفعش.
قالى دي مجرد صورة انتى خايفة من إيه؟ ولا شعرك شكله وحش وخايفة توريهو لي عرف يستفز انوثتي وعشان كان شعري فعلا ناعم وطويل صورته بس من غير مظهر وشي وبعتهو له ولاقيته بيقولي يخرب بيت جمال شعرك هو في كده وكنت عاوزة تحرميني أتمتع بالجمال ده والله حرام عليكي..
فرحت أوي بكلامه ومع مرور الوقت بدأت طلباته تزيد بمعنى كل مرة يطلب يشوفني بشكل معين يعني مرة يقولي نفسي أشوفك بلبس البيت ممكن تلبسي بيجامة بنص كم كنت أغلب الوقت مترددة لكن كنت بطمن نفسي إني بمسح الصورة بسرعة وإني مش بظهر بوشي.
مرة طلب مني البس عباية واتصور بيها فعلا لبست عباية بيتي مجسمة وخليت شعري مفرود وحطيت ميك اب خفيف والمرة دي اتصورت صورة كاملة بوشي بصراحة كان شكلي في العباية وأنا سايبة شعري يخلي الحجر ينطق وكنت خلاص اتعودت عليه واطمنتله لأنه كان بيمسح المحادثه بيني وبينه أول لما نخلص عشان أبقى مطمنة.
لما شاف صورتي كان رد فعله غير طبيعي بالمرة كأنه شاف ملكة جمال مش بنت عادية وفضل يتغزل في كل حتة في جسمي خلاني أحس إن مفيش حد زيي في الدنيا كلها كان كلامه بالنسبة ليا شبه السحر حسيت اني مسحورة بلعنة كلامه الجميل اللي خلاني مغيبة ونسيت أهلي واتنازلت عن كرامتي ونسيت إن ربنا مطلع علينا وشايفنا كان شيطان نفسي مسيطر عليا كنت بنسى الدنيا وأنا معاه لكن لما يقفل كنت بفضل ألوم نفسي وأأنبها لكن بمجرد ما يكلمني كنت بنسى عهدي مع ربنا وأرجع أعمل كل اللي يطلبه مني ويا ريت الحكاية وقفت على كده لكن حصلت مصيبه أكبر وأكبر وهي إنه بدأ يتجرأ ويطلب يشوف حاجات تانية في جسمي في الأول اتعصبت وكرامتي نقحت عليا أوي ازاي يطلب مني حاجة زي دي هو للدرجة دي شايفني رخيصة اعمل اي حاجة يطلبها مني وفضلت مخاصماه مدة كبيرة لكن في الفترة دي كنت حاسة باكتئاب شديد بسبب الفراغ اللي سابه في حياتي كنت هتجنن ويرجع يكلمني تاني لكن هو كان تقيل لدرجة ما تتوصفش بس بعد فتره رجع واتكلم تاني معايا.
واحدهة واحدة قدر يقنعني إني أنفذ كل طلباته كنت بقرف من نفسي أوي وكتير كنت بعيط لربنا وادعيله يبعدني عن الطريق ده لكن مجرد ما يكلمني كنت أعمل أي حاجة يطلبها بدون تردد طبعا كلكم زعلانين مني دلوقتي وشايفيني واحدة رخيصة بس انا عذراكم لان انا كمان شايفه نفسي كده وكتير كنت بأنب نفسي وأقول يا ريتني سمعت نصايح أمي يا ريتني ما بعدت عن طريق ربنا الطريق اللي كان كله نجاح وبركة أنا بقيت حاسة إني ضايعة ومش عارفه أرجع من طريق الوحل اللي مشيت فيه بكل ثقة اتمنيت حد ياخد بايدي لكن مين اللي هياخد بايدي وأنا أصلاً ما عنديش الجرأة احكي لحد على اللي أنا فيه فكرت اتواصل مع دكتور نفساني لكن خفت من الفضيحة او إنه يستغل اللي انا فيه وابقى دخلت نفسي في مصيبة اكبر وعشان كده قررت إني أبعد نفسي بنفسي بدعي ربنا واقرب منه يساعدني ويتوب عليا من اللي أنا فيه وفعلا حاولت أقلل مكالماتي معاه عشان ما أضعفش قدامه بس برده لما كنت بكلمه كان بيستغل فتره البعد ويحاول يفهمني قد إيه هو مشتاق ليا فكنت بضعف بسبب اسلوبه في الكلام وارجع أعيد الكرة من تاني وهي إني أأنب نفسي لكن ربنا قال في كتابه المجيد «لا اقسم بالنفس اللوامة»
يعني تأنيبي ده مش هيفيدني في حاجة مرت أيام كتير وأنا على الحالة دي مرة أضعف ومرة اتحجج ومرة أبعد وفي يوم جاتلي رسالة وكانت من آخر شخص اتوقعه.......
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق