رواية اربعتاشر 14 بت وشايب الفصل الاول بقلم الكاتب محمد منصور حصريه وجديده على مدونة النجم المتوهج للروايات والمعلومات
![]() |
عارفين فيلم عفريت مراتي بتاع شادية وصلاح ذو الفقار لما كانت تروح تدخل السيما وترجع مقتبسة شخصية البطلة وجننت صلاح ذو الفقار حبة حلوين اهو انا بقي حمودي بعيش نفس الاحداث دي مع ابويا المعلم احمد وشهرته في المجزر والمنطقة فشة. وبابا فشة واسف ان بابا تيجي وراها فشة. المهم بابا فشة كان في فرح من شهر ومرة واحدة. النور قطع بتاع الفرح عمل فيها كهربائي ومسك السلك عريان ومع ان الكهرباء قاطعة لكن سبحان الله اتكهرب خدو وراحو بي علي الكهربائي. والكهربائي طلع مفتاح التست وحطة في ودن ابويا لقي الكهرباء عاليه وقال لنا
المعلم فشة خد كل الراجع بتاع الكهرباء. ودي اخطر من الكهرباء نفسها
حسيت وقتها انا بابا فشة. بقي مشترك كهرباء ينفع استخدمه باور بنك. واشحن بي موبيلي ودة خلاني ازعل شوية لكن معلش دة بابا ولازم اشحنة. قصدي استحملة وبعدها ب 30 يوم. يحصل اللي قلب حياتي نهائي وخلاني ابقي كبير عيلة ومسئول من 14 بت. وشايب. والشايب هنا بابا فشة اة يا حبيبي يا بابا فشة بقي ملبوس وبيتعالج
وقبل ما نبدأ نوحد الله ونصلي علي خير خلق الله سيدنا محمد.
وبسم الله توكلت علي الله وهو رب العرش العظيم
في يوم من الايام رصيدي في الفيزا خلص قومت لبست وانا مخنوق ومتعفرت. وشافتني امي ميسرة وقالت لي
حمودي مودي. صاحي بدري ومكشر لية
حمودي بعصبية
ميسرة انا مش طايق نفسي. علشان اللي بابا فشة دة بيعمله ما يصحش هو انا مش ابنه
ميسرة
عمل اية فشة
حمودي
انا متفق معه كل يوم 1 في الشهر يحط لي في الفيزا 50 الف ج.
ميسرة
حصل
حمردي
لا. ما حصلش صحيت النهاردة وطلبت موبيل اون لاين ووصلت لغاية الدفع الاقي رصيدي صفر جنية. يعني اية صفر جنية. انا حمودي الفيزا بتاعتي تكتب لي صفر جنية
ميسرة
طيب اهدئة وروق وتعالي اشرب معايا اللاتية سوتيا بتاعك
حمودي بعصبية
ميسرة انا مش ناقص. اسمه لاتية بوكية. انا مش عايش لك طول العمر علشان افضل اصلح لك.
وراح حمودي ناحية الباب وميسرة بتقول
طيب رايح فين دلوقتي
حمودي
رايح له المجزر اشوف هو لية ما حطش الفلوس في الفيزا،،،،،،،،،
من جوة المجزر الالي يقعد المعلم فشة قصاد المجزر بتاعه وبيشرب شيشة وكان مدخل الجلبية في الكلسون يقف قدام منه حمودي وكان بيقول بعصبية
البنك بعت لك وقال ان رصيد حمودي خلص ازاي ماتحطش رصيد غيرة. ازاي الفيزا تكتب لي صفر جنية
وقف فشة وبص له وقال بصوت واطي
بس يا نعيم وطي صوتك. مش عايز حد يعرف اني لقيت ابني
حمودي رفع حواجبة وقال
اهلا هي الحاله جت. وطلبت اية معاك المرة دي. جعفر العمدة
فشة حضنة وقال
عارف انا قعد كام حلقة ادور عليك يا سيف.
حمودي
هو انا سيف ولا نعيم
ضربه فشة بالقلم وقال وهو بيضحك
انا الملكة صفصف
حمودي
اي.
فشة
حبيب قلبي
ورحع فشة قعد تاني علي الكرسي وحط الشيشة في بوقه وقال وهو بيبص ل حمودي. وبصوت جعفر العمدة
اللي يتبعتر في الشارع ما يتلمش في البيوت. خد عيالك وامشي يا فتح الله. بدل وعرش ربنا ااقل منك
حمودي
عم الحج. عرش ربنا دة مسلسل تاني
بص له فشة وما ردتش عليه وقام دخل المحل وساب حمودي واقف علي باب المحل مش عارف يعمل اية لكنة طلع موبيلة واتصل برقم الدكتور اللي بيعالج ابوة واسمة عيد. ودة صاحب حمودي الانتيم واول ما رد عيد قال حمودي
انت يا زفت مش قولت لي ان بابا فشة خف وينفع يتفرج علي تيلفزيون عادي
عيد
انا عملت له اخر جلسة اشعة علي البروستاتا. واتاكد انه بقي سليم
حمودي
اية دخل البروستاتا. باللي عند ابويا. هو انا جايب هولك بيتبول لا ارادي
عيد
حمودي انت دكتور علشان اتناقش معاك في الطب
حمودي
عيد انت دكتور علشان اصلا تتكلم في الطب. دة انت خريج تبريد وتجفيف يعني اخرك تصلح تلاجات
عيد
كنت خريج تبريد وتجفيف لكني عملت دعلومة وبقيت دكتور نفسي
حمودي
اهي دعلومة دي لوحديها تدخلك السجن 10 س. مرتاحين.
عيد
حمودي ابقي هات ابوك وتعالي اكشف عليه تاني اشوف اية اللي باظ المرة دي.
حمودي
انا شاكك في سلك الفرامل. او يكون بيسرب فريون
عيد
ابص علية الاول وبعديها نتكلم. مع اني قولت لك من الاول ان لو ربنا بيحبة الكهرباء اللي دخلت جسمة تخرج مع البول
حمودي
هي حصوة يا عيد اقفل الله يقطعك
وقفل حمودي المكالمة وقال
انا غلطان اني وديته ليك
يا عيد الكلب بابا فشة لازم يروح لاحسن دكتور في مصر، ،،،،،،،،،،،
ويحجز حمودي عند دكتور اسمه عادل مرتضي لكن الكشف كان بعد اسبوع. وقرر يستني ورجع شقته علشان يلاقي امه ميسرة قاعدة مع واحدة هو ما يعرفهاش سلم عليهم وقالت ميسرة
دي مرات ابوك زمردة
حمودي
زمردة. ازاي يعني. دة اخر زمردة اعرفها بتاعت امير الانتقام
زمردة رفعت حاجبها وقالت
كدة برضو يا حمودي تتريق علي مرات ابوك دة انا بعد ميسرة ما تموت هكون امك
ميسرة
ياختي بعد الشر عليه ما بلاش بوقك يطرطش اسفلت
زمردة
ما كلنا هنموت يا ميسرة
ميسرة
ان شاء الله انتي اول الكشف وانا في اخر الكشف
حمودي
اهدئي يا ميسرة وعرفيني من امتي في حد من مراتت بابا فشة بيجوا يزرونا
زمردة
حمودي من بعد ابوك ما بقي سطلانه ودماغه ساحت زي الشوكلاتيا اللي برة التلاجة. انت بقيت راجل البيت
حمودي باستغراب
اني بيت
زمردة
بيت ابوك. و14 بت هيكونو في رقبتك
حمودي اتفزع
نعم
زمردة
طول عمرها ميسرة مخبياك مننا وخايفة عليك لتتحسد. اكمنك انت الواد الوحيد اللي عند فشة. بس لو ما قالتش. انا اقول لك اللي انت ما تعرفهوش انت عندك 14 اخت.
حمودي
لا انا اللي اعرفو اغنية كان في واحدة ست عندها 12 بت. انما 14 دي. ورحمة امي ما سمعت عنها
ميسرة بصت له وقالت
ورحمة امي. انا زعلانه منك حمودي مودي
حمودي
مش وقته يا ميسرة
زمردة
اسمع يا حمودي اختك فايزة. جاي لها عريس متعلم ومعه ابتدائية نص سنة.
حمودي
اية نص سنة
زمردة
يعني امتحن اول ترم واتخرج. وطلع الاول
حمودي بسخرية
طلع الاول دة لو طلع الاول يبقي اول ما باب. المدرسة فتح طلع جري. قبل اي حد كدة اصدقك انا
زمردة
ما تتريقش دة كلامه كله علي الواتس اب بيتحط قبل منه علامتين صح
حمودي بسخرية
معقول دة زويل ما عملهاش. دة باين عليه معروف علي الواتس وكلمته مسموعه.
زمردة
اومال
حمودي
زمردة دة حرامي المواعين لو كتب علي الواتس بيتحط قصاد كلامة علمتين صح. اوعي تفتكري ان دة انجاز
زمردة
انت بتكرهه لية
حمودي لطم وقال
انا اعرفه علشان اكرهه
زمردة
ما انت بكرة هتيجي وتتعرف عليه.
حمودي
وانا مالي
زمردة
انت اخوه فايزه الكبير ولازم تيجي. وتقف في جوازتها وتحط ايدك في ايد العريس طاروش السنبلاوي طة
حمودي اتخض من الاسم وقال
طاروش السنبلاوي طه. طه دة اسم غريب اوي.
زمردة
ما تتريقش ل يطلع لك في عيالك
حمردي
هو انت عادي بتجوزو اخواتي لل الجن. اصل ما فيش بني ادم اسمة طاروش
زمردة
حرام تتريق علي طاروش
حمودي
حرام طاروش دة يتجوز ويبقي لي نسل
زمردة وهي بتقف
انا ماليش في الهري والرغي. هستناك بكرة الساعة 8.
حمودي
مش جاي
زمردة
هتيجي دة لو انت عايز الفيزا ترجع تتملي تاني
حمودي
وانت مالك ومال الفيزا
زمردة
انا معايا توكيل رسمي اتصرف في رصيد المعلم فشة واقدر ارجع لك الفيزا مليانه بكذا بلبل
وخرجت زمردة من الشقة. وحمودي بص ل ميسرة وقال
انا بحلم صح.
ميسرة
زمردة واعية وعرفت تلف دماغ ابوك وخلته يعمل لها توكيل رسمي.
حمودي
يعني اية. بقي صباعي تحت درسها
ميسرة
جوز اختك. وخليها تحط لك مصروفك في الفيزا زي ما ابوك كان بيعمل
حمودي
اختي مين. فسيا
ميسرة
ما تبقاش مقرف اسمها فايزا
حمودي
ميسرة مش وقته انا دلوقتي نيجاتف
ميسرة
اقوم اعملك اكسبريس. تشربه
حمودي
ياريت تعملي بتاع اسكندرية اللي ما بيقفش في مراكز
ولطم وهو بيقول
الطم يا ميسرة ،،،،،،،،،،
ومن علي القهوة يقعد حمودي مع عيد صاحبة وحمودي كان بيقول
قولي بقي تعمل اية لو كنت مكاني
عيد
اروح طبعا. دي اختك
حمودي
انا ما عرفهاش ولا اعرف اي واحدة منهم
عيد
اعرفهم ما تبقاش قاطع ارحام
حمودي
اية قاطع ارحام دي.
عيد
يعني جاحد علي اللي منك
حمودي
يا عم انا تافه وحياتي ابسط من كدة. دة لما الرواتر بيفصل بلبس اسود وافضل اعيط. اروح واقف في جوازة
عيد
انت دلوقتي كبير عيلتكم ولازم تشيل المسئولية. استرجل
حمودي
صدق يا عيد انا لما قعد معاك كرهت المشوار دة زي ما انا كرهك. بس اعمل اية لازم اروح
عيد
علشان اختك
حمودي
لية علشان زمردة تملي الفيزا كام بلبل
عيد
بلبل انت الفيزا بتاعتك تبع بنك العش
حمودي بص له وهو قرفان وقال
اوعي وانت قاعد معايا تستخف دمك. يا عيد، انت دمك تقيل ،،،،،،،،،
وتاني يوم وقبل الميعاد بساعة يقف حمودي قدام باب شقة ابوة ويرن الجرس ويتفتح الباب ويلاقي زمردة حطة دماغها جوة كورة كفر مقطوعة اتصدم ورجع لوراء خطوتين وقال
انتي عاملة لية كدة
زمردة
عاملة شعري. كيرفي.
ومسكتة من ايدة وقالت
ادخل شوف اختك اللي مش عايزا تتجوز وطاروش جاي كمان ساعة. طيب والنبي طاروش دة خسارة فيها.
وزقته ودخل البيت ولقي بنات كتير اللي داخلة اوضة وخارجة من اوضة وكل اللي تشوفو تصرخ لانهم بليس البيت وزمردة تقول
متخافوش دة اخوكم حمودي
والخبر نزل علي البنات وكانه خبر عادي وكل واحدة كملت اللي بتعمله فقال حمودي
هو الدرس هيتاخد في اني اوضة
زمردة
ما تتريقش علشان ما يطلعش في عيالك. واستني هنا هبعت لك اختك تكلمها يمكن ترضي تتجوز علشان خاطرك
وقالت زمردة باعلي صوتها
اهو جالك يا فايزة اللي هيكسر رقبتك لتكوني فاكرة ان البيت ملهوش راجل.
ودخلت زمردة اوضة وقفلت علي نفسيها وخرج فشة من اوضة تانية وبص ل حمودي وقال
انا عايز حقي
حمودي
من مين
فشة
من اللي ضربوني في النادي.
حمودي
دة انت اتفرجت علي حضرة المتهم ابي
وطلع فشة ناي وبدأ يعزف وهو بيقول
انت السبب يا با ياللي خليت بيا. ل جبت ل رمان ولا حتي زبل حمام احدف عليه تبان والاسم فتحية والاسم فتحية
وخد فشة بعضة ودخل الاوضة اللي لسة خارج منها وهو عمال يقول
والاسم فتحية.
حمودي بيبص له وهو هيتجنن. وبيقول
ما حدش في المسلسل كان اسمه فتحية جابها منين دي
ورجع بص قدام منه لقي بت طخينة جدا وضخمة وقفه قدام منه اتخض من شكلها وقال
قبل اي حاجة انتي من حقك تتجوزي اللي انتي عايزا انتي قمر واي حد يتمناكي
البت قالت
انت مين
حمودي
انا كلب المعايز خدامك يا هضبة
البت
انت حمودي اللي بيقولو عليه. وجاي علشان الجوازة
حمودي
اة. لكن لو مش عايزا بلاش
البت
ومش عايزا لية انا بحب الجواز تعرف تجوزني اتنين مع بعض
حمودي اتصدم
اتنين
البت
اة احنا صحتي حلوة. وكمان عايزا واحد في الصيف وواحد للشتاء اصلي بزهق بسرعه
حمودي
بس كدة غلط وحرام
برقت له البت. فهو قال
والله العظيم ربنا هو اللي حرم كدة. مش انا
البت
طالما حرام انا معملهوش دة انا بصلي وبصوم رمضان تاكل معايا اندومي
حمودي
شكرا.
ولسة هتمشي البت قال لها حمودي
قبل الاكل انا كنت عايزك توافقي علي العريس اللي جاي علشان ما ضيعيش عليه الكام بلبل اللي وعدتني بيهم زمردة
البت
بلبل. انت لبك حساب في بنك العش
استغرب وقال
هو في بنك اسمة العش بجد
وهنا يسمع صوت زمردة بتقول
نعمه تعالي طلعي الجلاش من الفرن. وادخلي كملي مذاكرة. انتي شهادة اعدادي السنة دي
البت كانت نعمه بصت وراء منها وقالت
هو ما فيش غير نعمه في البيت دة. انا زهقت. يارب اموت وارتاح او اتجوز قبل ما اموت وبعدها اموت عادي
ومشيت نعمه وحمودي قال
كل دي في اعدادي. دي حامل.
وشاف خمس بنات بيشدوا شعر بعض استغرب وقال
دة انا باين عليه وقعت علي وشي
وهنا تقف قدام منه بنت نحيفة جدا وقصيرة حوالي 150 س. وشعرها منكوش قالت وهي متعصبة
نعم عايز اية
حمودي
انتي مين
البنت قالت
فايزا العروسة
حمودي اتصدم وبص لها من فوق وتحت وقال في سرة
ودي تاخد الجواز حقن ولا برشام ،،،،،،،،،،
وحمودي جنانه جاي جاي. ما تستعجلوش.
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق