رواية الليلة_الحمراء الجزء الرابع بقلم مروه أغا حصريه وجديده على مدونة النجم المتوهج
 |
بين موجات الرصاص ركضت بسرعة ماعرفت وين تتخبى اتفشكلت بحجرة كبيرة فيها حديدة حادة وضربت اجرها ضربة قوية انجرحت فيها ووقعت على الأرض وبلشت تصرخ وهي بتشوف الدم بيطلع من اجرها
وفجأة شافت أيد عم تسحبها لتحميها ورا سيارة وهي عم تمشي بصعوبة وتبكي
رفعت راسها لتشوف قدام عيونها مراد عم يحاول يخبيها وراه وهو براقب الوضع وهي بتراقب ملامحو المرعوبة
صرخ مراد بعصبية: ماقلتلك ارجعي على الشركة … هلق شو عملتي بحالك
قعدها على الأرض وهو بحاول يكبس على جرح اجرها
مراد: اضغطي عليه واحبسي الدم
ورجع همسلها بحدة: اوعك تطلعي لبرا رايح شوف الشرطة
همستلو: مراد دير بالك
التفت مصدوم من جملتها وهو من زمان في حدا بقلو يدير بالو على حالو !!
هز راسو من دون ما يجاوب وبعد عنها ومشي بين الحاويات وهو بيتخبى من الرصاص
حمل جوالو واتصل بالريس: الو ياريس الشرطة هون والرصاص معبي الدنيا مابعرف منين عم يجي
الريس عبود: لك شو عم تقول … هلق بحكي مع العقيد لنشوف شو صاير
لما سكر الخط كان صوت الرصاص هدي طالع راسو شوي وهو بحاول يشوف شي شرطي
صرخلو الشرطي وهو حامل سلاحه: رفاع ايديك وامشي باتجاهنا
وبالفعل رفع ايديه ووصل لعند الشرطة
مراد: اهلا والله بالباشاوات خير ان شاء الله ما كانت ضرورية هالحفلة كلها
الشرطي: مين ضرب رصاص
انصدم مراد وهو بقول: والله ماعندي علم انا هون لأمن شحنة قطع السيارات مابعرف شو يلي صار
الشرطي: بس واضح انو في مين عرف بجيتنا وضرب رصاص بدنا نحقق بالموضوع
مراد: خود راحتك وهون في كمرات على طول خط المينا فينا نشوف مين ضرب الرصاص
الشرطي: معي امر بالتفتيش اجتنا اخبارية عم تهربو سلاح
مراد: سلاح !! ماعاذ الله اتفضل شوف
فتحلو اول حاوية قدام عيونو وقلو: شوف كلها قطع سيارات
الشرطي لرجالو: يلا فتشوا كل شي منيح
مراد: خدو راحتكن
التفت ليشوف نرجس قاعدة على الأرض بقرب سيارتو
مراد: خود راحتك انا بس بدي شوف الانسة
مشي لجهتها وشافها بتسعل وبتبخ من بخاخ الربو
قرب منها وهو بيهمس: ارتحتي
سعلت وهي بتهز راسها فتحلها السيارة وهو بقول: اركبي لنروح ع المشفى
حاولت ترخي جسمها على السيارة وتوقف بس ما قدرت
قرب منها ومدلا ايدو وهي بتردد وافقت ومسكتلو ايديه الاثنين ليساعدها
لما ما قدرت توقف قرر هلق يشيلها
حط ايد تحت ظهرها والأيد التانية تحت اجريها وشالها وهي بتصرخ فيه: لك شو عم تعمل نزلنييي
مراد: اقعدي واسكتي هلق بجي بشوفك بس شوف الشرطة
حمل علبة المحارم وهو بقلها : ضلي كابسة على الجرح
من دون مايسمع ولا كلمة منها سكر الباب واتجه لعند الشرطة كانو كملو شغلهن
الشرطي: منعتذر يمكن اخبارية كاذبة
مراد: حصل خير
الشرطي: رح نبقى محاوطين المكان لنشوف كمرات المراقبة ونعرف مين ضرب رصاص باتجاهنا وحاول يعتدي علينا
مراد: شكرا لتعاونكم
بعدما مشيت الشرطة اتأكد من الشحنة كلا ورجع سكر عليها وبعتها بالشاحنة التانية باتجاه مستودع الشركة
ورجع ركب بسيارتو كانت نرجس عم تإن من الوجع وتحاول ماتبكي
سألها مراد بقلق: عم توجعك
نرجس: يمكن انكسرت !!
مراد: لازم يشوفها دكتور فورا اضعظي على الجرح كتير حتى يخف النزيف
ساق السيارة بسرعة وهو بيبعد عن السيارات لحتى يوصلها للمشفى
وهي بقيت عم تضغط على الجرح وتمسح دموعها بايدها التانية
خلال عشر دقايق كانو بالمشفى وقف السيارة ومشي لجهة الباب عندها مدت ايدها وهي بتحاول تطلع برا السيارة نزلت شوي شوي ووقفت على اجر وحدة
وصرخت من الوجع
قرب منها وشالها وهو بيهمس قريب من وجهها: ما تصرخي وتفضحينا عم حاول ساعدك
بلعت ريقها من قربها لوجههو وهي بتتمعن ملامحو وما قدرت تحكي ولا حرف لحتى وصلو لعند الطبيب
مراد: وقعت وانجرحت اجرها وعم توجعها
قرب منها الدكتور وفحصها وهي بتتوجع خيطلها الجرح وضمدلها اياه وعملها وعملها صورة
وهي لساها بتتوجع ساعدوها الممرضات لنزلت وتقعد على كرسي متحرك
دخل مراد وهو بيسال: طمني دكتور
الدكتور لمراد: المدام مافيها شي الحمد لله
التفتو اتنيناتن وعيونن التقت ببعض والدكتور لسا بكمل: مجرد جرح عميق والعظم اتأثر شوي يعني مابيحتاج جبار مجرد رياحة ورح نعطيكي مسكنات لتخفف الوجع وبعدما تطيب الجروح لازم تحطيلها مشد مخصص لهالمكان
مراد: شكرا كتير الك دكتور
بعدما خلصو طلعت على كرسي متحرك لوصلت لسيارتو
اتطلع عليها وكأنو بيسألها بس هي جاوبت لحالها: لا بقدر هلق اركب لحالي بس اسندني
سندها من ايديها لقعدها على الكرسي وبقيت ساكتة وماحكت ولا حرف وكل شوي ترفع عيونها لتتمعن ملامحو الرجولية المغرية وهو بقي ثابت مكانو ما عم يحكي ولا يتحرك بس كانوعم يسوق بهدوء لوصلو لبيتها
قالت نرجس: شكرا الك عذبتك معي
مراد: هاد واجبي بدل يلي صار امبارح
ابتسمت وهي بتقول: يلا مسامح
قرب منها وهو بمد ايدو وبيهمس: هلق صرنا اصدقاء صح؟
هزت راسها وهي بتمد ايدها وبتقول: بس ماترجع تعيدها
ابتسم هو بقول: بقولو ماتاخد صاحب الا من بعد قتلة
سحبت ايدها منو وقالتلو بانزعاج: قتلة شوو هاد يلي ناقص
ضحك بصوت عالي وهو بقول: شبببك عم نمزح
ابتسمت وهي بتتمعنو وهالمرة بطريقة جديدة !!
صفحة وجهو الحنطية المدورة عيونو يلي صارت هلق بلون العسل الفاتح وشعرو الكتسنائي الجعد
(يالطيف شو صرلي)
هيك همست بداخلها وهي بتبعد نظرها عنو وبتنزل من السيارة شوي شوي وبتحاول ماتأذي حالها وهي بتنط على أجر وحدة
سألها: ساعدك؟
جاوبتو: لا هلق بمشي شوي شوي
بقي ناطرها لتقدر تمشي بس لما صرخت بوجع ما قدر يتحمل رجع شالها وهي بتحاول ما تصرخ فيه: لك مراد في اهل الحارة والله ليفضحوني
مراد: يجو يساعدوكي لكن اهل الحارة
طالعا على الدرج وهو بيركض برياحة لان وزنها كان خف الريشة
لما وصل لعند باب بيتها نزلها شوي شوي وهو بحاول ما يرفع راسو لجهتها لان بتكفي ريحة عطرها يلي حاوطته من كل جهة
نزلها عند الباب وهي بتقلو: يعطيك العافية
مراد: بس قلت لامن عليكي تدخلي وتقعدي
نرجس: معلش أنا بعرف شغلي ارتاح انت بتعرف انا بنت عايشة لحالي وقدام الجيران
هز راسو بتفهم وهو بقول: طيب لجبلك عكازة
نرجس: انا عندي وحدي من سنتين كسرت اجري
مراد: واضح مغامراتك كتيرة
ابتسمت وهي بتفكر بمغامراتها الكتيرة مع جمال !!
مراد: ماشي انا برجع بتطمن عليكي
طلع برا البناية بسرعة جبلها الدوا وحطو عند الباب ودق الباب وراح من دون ما تشوفو
فتحت الباب وهي بتمشي على عكازة وشافت الدوا موجود عند مسكة الباب مسكتو وهي بتبتسم وبتسكر الباب وراها وبتحكي مع رفيقتها لتاخد اجازة ولتحكيلها كمان شو صار
*****
طلع مراد وهو بيحكي تلفون: اي يا ريس متل ما خبرتك لو الشرطة جاي قبل بدقايق كانت شافت شحنة السلاح
الريس عبود: مين الو مصلحة يخبر الشرطة ماحدا غيرنا بيعرف بهالموضوع
مراد: مابعرف بس انا شاكك بهاد وليد شو صار معو بالمطار
الريس عبود: روح شوفو انت
مراد: يلا طالع لعندو
خلال دقايق كان موجود بالمطار وعند الشرطة يلي احتجزو وليد
مراد: خير ان شاء الله ليش وقفتوه
الشرطي: للاسف في تهريب سلاح ولازم يتوقف
مراد: بس انت شايف قدامك صناديق السلاح كلها عبارة عن العاب اطفال
الشرطي: ولو كان بيبقى اسمو تهريب انتو دخلتوها بشكل غير قانوني ورح نحجز عليهن
مراد: احجوز عليهن بس خلي الشب يطلع
الشرطي: ماشي بس بوجهكم لعند مقر الفرع لياخدو اقوالكم
مراد: هلق الريس حكى مع العقيد ونحنا رايحين لعندن
الشرطي: هاد الشي ما لازم يتكرر واذا بدكن البضاعة لازم تحكو مع محامي ليمشيلكم الأوراق
مراد: شكرا كتير لتفهمكم
طلع مراد من باب المطار ووليد معو
سألو مراد: شو يلي صار بالظبط؟
وليد: مابعرف فجأة شكو فيي والله فكرت صح السلاح موجود هون او عينة منو منيح الاسلحة كانت بالحاويات ما هون
مراد: أنت برأيك سلاح غالي وتقيل كيف رح يكون هون كلو صار بأمان بس مخطط الريس انو يلهو الشرطة هون عن شحنة الحاويات … يلا امشي عنا شغل أهم
وليد: شو صار؟
مراد: في مين خبر الشرطة عن شحنة السلاح وصار ضرب رصاص بالمينا لازم نعرف مين والا نحنا رح نروح فيها
وليد بقلق: لعمى اذا هالحكي صحيح والله ناجي وعبود مارح يخلونا عايشين
مراد: لهيك عم قلك لازم نتأكد
*****
تاني يوم كانت سارة عندها بالبيت
سارة: وااااو تقولي كنتي بنص فلم اكشن
نرجس: عم قلك قلبي صار بين اجريي
سارة: بس معقول شو طلع جنتلمان هالرجال وبعدين شو صار كملي كملي
نرجس: ولا شي وصلني للبيت وقلتلو يروح
سارة: ولك غبية لوخليتيه يهتم فيكي اكتر شو كنتي خسرتي
نرجس: كنت خسرت سمعتي انا بنت وحيدة وشب داخل لعندي
سارة: معك حق بهاي
رن جرس البيت ركضت سارة فتحت الباب شافت قدامها وليد ورفيقتن بالشغل
وليد: خبرونا انو نرجس تعبانة
سارة: اي والله فوتو
نرجس كانت قاعدة على كنبايتها ومادة اجريها
قرب منها وليد وحطلها بوكيه الورد على اجريها وهو بقلها: الحمد لله على سلامتك
بهدوء جاوبت: الله يسلمك
وليد: قلتلك ترجعي شفتي شو صار معك
نرجس: ماكنت متوقعة هيك يصير لأول مرة بتصير مشكلة بالمينا بس مرقت على خير
وليد: اي الحمد لله مين ساعدك
نرجس بتردد: مراد
بلع ريقو والجو صار متوتر بالقعدة همس بقلبو(لسا كل شي مراد مراد !!)
قطعت سارة التوتر وهي بتسأل: احكيلنا شو صار مين طلع ضارب رصاص
وليد: لقطت الكمرة صورة شب مغطي وجهو ضرب رصاص اول ما أجت الشرطة وبعدين هرب
سارة: لعمى مين بدو يكون عمل هيك شي
وليد: أكيد واحد غيران من نجاحهن
طلع مراد ووقف عند الباب وهو متردد يدق او لا بس قرر يدق لما سمع صوت ضحك جوا البيت
فتحتلو الباب سارة وهي بتكمل ضحك
سارة: اهلين
مراد: نرجس موجودة
شهقت سارة وهي بتقول: اه انت يلي انقذتها
قرب وليد من الباب وهو بيهمس: مراد هاد انت
دخل مراد وهو بحاول يشوف نرجس ليطمن عليها: جيت اتطمن على نرجس
حط كياس الفواكه والشوكولا من ايده عند الباب ودخل وهو بقلها: كيف صرتي
نرجس: الحمد لله احسن
وليد: انتو بتعرفو بعض من قبل يعني فهموني
نرجس: لا بس امبارح ساعدني
وليد بشك: غريبة بيضل يساعدك باليخت وامبارح كمان فيكن تشرحولنا
مراد بحدة: وليد شبك
وليد: لا بس احكو شوفي بيناتكن
نرجس: وليد شو صرلك مجرد زميل وحب يتطمن عليي
وليد: كل الزملا بيتطمنو عليكي !!
مراد: هاي حضرتك هون
عصب وهو بقول: انا غيرك انت
حس مراد وكأنه في شي بيناتن وقف وهو بيستأذن واتطلع عليها قبل ما يطلع وسكر الباب وراه بكلل هدوء
نرجس: وليد ما من حقك تحكي هيك هاي حياتي وانا حرة فيها
وليد: اي ماشي براحتك والحمد لله على سلامتك أنا رايح عندي شغل
طلع وخبط الباب وراه وهالمرة بقوة
سارة: شبهن هدول !!
نرجس: شو بعرفني
التقو اثنيناتن عند باب البناية مراد كان عم يركب بسيارتو … بقيوا واقفين براقبو بعض بعيون بتقدح شرار وبعدين ركب مراد بسيارتو وطار فيها
همس وليد: لازم اعرف شوفي بيناتكن لان اذا في شي لازم انسحب بكرامتي يا أما حارب لاوصل للنهاية
*****
#بقلم_مروةآغا
___ #بعد_عدة_أسابيع ___
بالشركة كان في إجتماع مهم لتحديد يوم لافتتاح الشركة الجديدة
ناجي قاعد على راس الطاولة ونرجس بقربو حاملة الأوراق وبتساعدو ومقابيلو الريس عبود قاعد بيسمعوا وبيتمعن ملامح هالبنت الجمييلة بملامح عربية اصيلة كانت لابسة تياب الشغل طقم كحلي تنورة قصيرة لتحت الركبة وديقة وجاكيت من نفس اللون مطرز دانتيل وتحتو قميص أبيض وعلى رقبتها فولار صغير ناعم
وبقربن جمال وباسل واثنين شباب ليقدرو ينظموا الشغل بين الشركات الثلاثة الخاصين بالاستيراد والتصدرير
نرجس: هاي هي الأوراق اللازمة رح توقعوا عليها كلكن لتكون الشراكة قانونية طبعا بعد قراءة بنود الصفقة وأي خلل رح يعود عليكن بالخسائر
التفت ناجي لعند طالبتو المجتهدة يلي عم تتعلم بسرعة وهو بحييها: شاطرة
هزتلو راسها بفخر وهي بتهمس: تلميذتك
الريس عبود: كيف صرتي ان شاء الله احسن
نرجس: الحمد لله احسن شكرا الكن كلكن كنتو متل اهلي
هلق رفعت راسها لجهة جمال يلي حكاها اتصال واحد بس ليتطمن عليها بالوقت يلي الكل كانو بيحكو معها وبيسألوها عن حالها وهو على اساس اققرب الناس الها !!
رجعت رفعت راسها والتفتت لجهة جمال لان هو استاذها الأول يلي علمها كل شي واتلبكت لما شافت نظرة عيونو ورجعت تكمل امور أوراق الصفقة لحتى بالنهاية تم تحديد يوم الإفتتاح وكان بعد يومين وهي لازم تجهز كل شي بالشركة مع الشباب المنظمين والعمال الجدد يلي رح يستلموا مكاتبهن
طلعوا الكل وتركوا بس ناجي وعبود قاعدين بالمكتب وقبل مايطلع جمال ندهلو عبود: تعال اققعد عاوزك بموضوع
لف وقعد بقربهن وعيون نرجس بتابعهن بترقب
ناجي: نرجس روحي جيبيلنا 3 قهوة
نرجس: بأمرك يابيك
طلعت وسكرت الباب وقلبها بيعمل حق بق لو كان عبود بدو اياها اكيد جمال ما رح يوافق أبداً هو من الأول رافضها تتزوج بس شو رح يكون رأيو لو بدو اياها بالسر !
لف عبود أجر على أجر بعدما شغل سيجار وعطاه لجمال وشغل سيجار وهو بيسالو: هلق نرجس ابوها رفيقك
جمال: أي من زمان وقبل ما يموت وصاني فيها
الريس عبود: كيف يعني وين اهل ابوها وأمها
جمال بتوتر: الصراحة مابعرف هاد رفيقي اتعرفت عليه ببداية شغلي ماكنت بعرف انو متزوج وقبل ما يموت قلي انو في الو بنت بميتم وطلب مني ابعت مصاري ليهتموا فيها وأنا بقيت معها لحتى كبرت … كملتلا تعليمها وشغلتا هون عند ناجي بيك لان بعرفو رح يدير بالو عليها
الريس عبود: والله انو فيك أصل … طيب هالبنت مابدك تجوزها
جمال: أكيد اذا هي وافقت ماعندي مانع
عبود: يعني بفهم انك موافق وعرفان مين العريس
جمال: اكيد عرفان يابيك وخصوصاً انك قلتلي زواج ما شي تاني
عبود: له نحنا مالنا بشغل الحرام
جمال: وأنا رح اسألها قريبا
ناجي: خلص معناها بعد احتفال افتتاح الشركة منفرح فيكن
ابتسم عبود وكمل بجدية: بس طبعا مابدي حدا يوصل أي شي بتعرفو المدام والولاد عصبيين شوي
جمال: له يا بيك سرك ببير
عبود: كنت عرفان انك قد الحمل والشركة الجديدة رح تكون بأيدين أمينة
رجعت نرجس وهي بتقدم القهوة للرجال وعيونها ما شالتهن عن الصينية بس عيون عبود عليها وعيون باقي الرجال كانت على عبود....
#بعد_ساعة من الحديث والضحك المتواصل طلعوا كلن سلم الريس عبود على نرجس وطلع برا الشركة وجمال قرب لعند نرجس وهمسلها قبل ما يطلع من المكتب: كملي شغلك والحقيني ع المكتب عنا حديث مهم
هزت راسها وهي بتأكد يلي بتفكر فيه بس مستحيل توافق لو شو ما صار … مشيت ووقفت عند شباك مكتبها وهي بتراقب السيارات كان الشوفير فاتح الباب للريس عبود ومراد واقف عند الباب بيستناه … بلباسو التقليدي الخاص بالشغل بنطلون جنز أسود وقميص أسود منحوت بعضلاته الكبيرة
بعد ساعتين مرو عليها متل السم كملت شغلها واتوجهت لمكتب جمال الموجود بالطابق يلي تحتو
دقت الباب دقتين وفتحتوا وهي بتقول: أكيد انت مارح توافق انو يصير فيي هيك
جمال: مين حكالك
نرجس: ماني غبية حتى ما اعرف شوفي ورا نظرات عبود
جمال: أي بس هو بدو يتزوجك
نرجس بصدمة: زواااااج؟؟ … كيف هيك
جمال: عجبتيه وبدو يتزوجك وبعتقد بحياتك مارحو تلاقي شخص يقبل يتزوجك
بانكسار قالتلو: معك حق … بس هيك فجأة ما انا قدام عيونو من زمان
جمال: هاد يلي صار وأنا طبعا وافقت بصفتي ولي أمرك لأن هاد الحل الوحيد لتتغير حياتنا 180 درجة
نرجس: هاي صار عندك شركة خاصة فيك شو بدك أكتر من هيك
جمال: بدي شي أكبر بكتير
نرجس: أوعك ياجمال أوعك انا ماعاد بدي هالشغل
جمال: أنت مفكرة أحلامي بس شركة صغيرة الي فيها 10 بالمية بس !! … لا أنا حلمي كل شي فهمانة وانت رح تكوني شريكتي
نرجس: بس أنا مرتاحة هيك بشغلي عند ناجي لاقي حدا غيري يحققلك احلامك
قرب منها وهو معصب: انا ماربيتك وعلمتك لحتى تتكبري عليي فهمانة
نرجس بعصبية: انت ما ربيتني انا ربيت لحالي وعملت نفسي بنفسي
جمال: أنت غبية مفكرة الإهتمام والعز يلي كنتي عايشة فيه بصغرك بالميتم هيك اجا فجأة … كلو من ورايي والمصاري يلي دفعتا عليكي
نرجس بتحدي: وبعتقد أنا رجعتلك كل شي دفعتوا وهلق صار دوري لعيش حياتي متل مابدي
بتحدي قلها: بدك تتزوجيه وغصب عنك
جاوبتو بثقة: ولا بأحلامك وبعدين انا بعرف مين ضرب رصاص بيوم المينا
جمال: مين !؟
نرجس: أكيد أنت وخبرت الشرطة كمان بس ماطلع بأيدك شي
جمال: ذكية كعادتك … بدي يلقطون واخلص منن لان هاي مهمتي مع يلي فوق لاخد محلن بس هلق في حل تاني أفضل انك تكوني قريبة منو وتنفذي كل طلباتي
وقفت لثواني وهي بتفكر بعدين نطقت: ولا تكون انت يلي بعتت ناس يقتلوا عبود؟؟
ابتسم وهو بقلها: لك تربايتي انت
نرجس: بدي افهم منين بتجيب هيك ناس تشتغل تحت ايدك
جمال: كلو بيركض ورا المصاري … وهلق ماعاد الي لزوم لهيك شي انت رح تتكفلي بالمهمة
نرجس: قلتلك ولا بأحلامك أنا خلص تعبت منك ومن تحكمك فيي
قرب منها وهجم عليها وضربها كف خلا تمها ينزف وأيديه يعلموا على خدها … حطت ايدها على تمها وهي بتحاول تثبت وما تنهار
بس هو شدها من شعرها وكمل: وانا قلتلك غصب عنك وإلا والله العظيم بسحب كل شي منك وبخليكي تعيشي بالشارع متل ما اجيتي
نرجس بانكسار: هلق هيك بابا وصاك تعمل فيي
جمال: لسا بتعيدي بالموال بابا وبابا … لك ياغبية لو أبوكي كان معترف فيكي كان سجلك على اسمو وماكان حطك بميتم الله يعلم شو عمل بحياتو لحتى الله بلاه فيكي وبأمك
نرجس: ليش عم تحكي ع امي
جمال بقرف: أكيد الرجال يلي كان بنازع من سنين عانى كتير بحياتو
نرجس: ويمكن تكون أمي ماتت وهو زعل على فراقها
ضحك باستهزاء وهو بيهمس: امك كانت انجس خلق الله
نرجس: بكفي تحكي على أهلي
اتنهد وهو بقول: هلق خلينا بالموضوع العرس رح يكون قريب
نرجس: أنت مافيك ذرة احساس اعتبرني بنتك هيك بتعمل فيها
جاوبها جمال بحدة وصراخ: خرسي انا ماعندي بنت متلك
غرقو عيونها بالدموع وهي بتهمس: بس هالبنت أنت عملتها هيك
جمال: وهالبنت انا كافأتها وعملتها مميزة عن كل البنات وطوال مانك حبابة وبتسمعي الكلمة بعملك يلي بدك اياه وبكون سندك
نرجس: بس أنا تعبت من هالحياة ليش لاتجوز هيك واحد وبعد كام شهر يمل مني ويرميني وانا مطلقة … ما من حقي عيش متلي متل كل هالبنات
جمال: أنت غير كل البنات من لما كنتي صغيرة ذكية وفهلوية لا تكوني غبية ويكون همك وتفكيرك بيت وزوج وولاد
نرجس: ليش بدك اياني عيش طول عمري وحيدة وبالمقابل أنت عندك هالحياة يلي بتقول عنها غبية ومستكتر عليي انك تعرفني عليهن وكأني بنت جاي من الشارع
قرب منها وناولها محرمة وهو بقول: ليش عم نكذب انت منين اجيتي !! … هلق اهدي وروقي يانرجس ليش بتعصبيني … أنت غيير الكل انت الي أنا هيك ربيتك وعلمتك
مرر المحرمة على طرف شعرا ووجها وهو بكمل: ولازم تسمعي الكلمة الزواج لازم يتم ونخلص من عبود ومن بعدها اققدر اوصل لمكان البرنس
نرجس: أنت مفكر مكان البرنس سهل مستحيل اقدر اوصلو
غمزها وهو بقول: بس أنت رح تقدري
سحبت المحرمة منو بعصبية وتركت المكتب كلو
مسحت تمها يلي واضح انو صار ينزف دم ومشيت باتجاه باب الشركة وقبل ما تطلع شافتو قدام عيونها واقف … هي اتفاجأت فيه وهو اتفاجأ فيها
نرجس: شو عم تعمل هون؟
اتلبك شوي لما شاف هيك منظرها مورمة
مراد: لا مافي شي بس بعتني الريس عبود بدو أوراق المناقصة نسي ياخدهم معو
من دون ماتطلّع عليه همست: امشي معي
طلعت قدامه باتجاه مكتبها وركبت بالمصعد الكهربائي وبقيت ناطرتو ليركب وهو بقي عم يتأملها لحتى اتسكر الباب وصارو لحالهن
همسلها بصوت دافي: مين هيك عمل فيكي
بهدوء قالت: مادخلك
مراد: بعرف مادخلني بس وجهك كلو احمر وشفتك مشقوقة أكيد في حدا ضاربك
التفتت عليه لتواجهه وقالتلو بعيون مليانة دموع: قلتلك مادخلك
وانفتح الباب طلعت بسرعة باتجاه مكتبها وهي بتحكي على التلفون: ألو أهلين ناجي بيك بس اجا شب من طرف الريس عبود بدو أوراق المناقصة قال نسيهن … تمام اسفة ع الازعاج
فتحت باب مكتبها بالمفتاح وهو ماشي وراها
مراد: ليش اتصلتي فيه مانك واثقة فيي
نرجس: لا ما واثقة لو بدي اوثق بمين ماكان كنت شفتني مرمية بالشارع
التفتت لعندو وهي بتعطيه الاوراق وبتهمس: الثقة شلتا من قاموسي نهائيا
اخد منها المصنف وقلها: رجعت شفّتك تنزف
اتلبكت وسحبت محرمة من على مكتبها وبلشت تضغط على الجرح ومشيت باتجاه الباب وهي بتقلو: يلا الله معك
مراد: لا تسكتي عن شي فيكي تخبري الشرطة
بصعوبة بلعت ريقها وهي بتحاول تحبس دموعها بلشت تاكل شفايفها بتوتر وهمست: لو سمحت لا تدّخل
هز راسو وهو بيهمس: متل ما بدك
حرقتلو قلبو بمنظرها هاد … غريبة هالبنت ومتناقضة مع الكل بتكون متل اللبوة شرسة وبتهاجم وأحياناً بشوفها متل القطة جبانة
هز راسو بحيرة وطلع برا المكتب ببردو ونزل باتجاه السيارة
أما هي اتجهت للحمامات وقفت قدام المراية وهي بتتمعن منظرها منيح وبتهمس: يالله هيك كنت واقفة قدام هداك الغبي
هلق بلشت تبكي بقوة وماعاد تقدر تسيطر على نفسها … بكيت وبكيت وهي بتحاول تفرغ كلشي جواتها لحتى ترتاح … بعدين أخدت نفس قوي كتير وقفت وغسلت وجهها فردت شعرا لتخفي علام الكف وخبت انتفاخ عيونها ورا نظاراتها ومشيت لتطلع برا الشركة بشموخ وكأنه ما صار شي وكأنها ما بكيت من شوي نهائياً
بس ما حست أبدا لعيون الصقر يلي بتراقبها وهو جوا السيارة كان واقف ناطرها ليعرف شو صار معها ويمكن يساعدها لان حسها بدها مساعدة
بس لما شافها نازلة هيك بشموخ ضحك بطرف شفتو وهو بيهمس: متلن كلن وحدة رخيصة … وانا قال كنت قلقان عليها !!
*****
بعد يومين كان افتتاح الشركة هاليومين قضتهن عم تشغل حالها لتبعد عن راسها اي شي تاني تفكر فيه … حاولت قدر المستطاع تخبي جرح شفتها بس ما قدرت … علام الكف أكيد راح من وجها بس أكيد ما رح يروح أبداً من ذاكرتها … طول الليالي كانت بتحاول تمنع حالها من البكي مشان عيونها ما ينتفخو خصوصا انو بهاليوم افتتاح الشركة الجديدة يلي من زمان بيشتغلو عليها
#تاني_يوم كانت بتتنقل بين منسقين الحفلات وبتشرف على كل شي … بأول طابق في مساحة كبيرة جهزوها لاستقبال الضيوف وباقي الطوابق فيها المكاتب كانت هالشركة منسقة بشكل حديث … المكاتب كلها مفتوحة على بعض بطريقة جديدة وعصرية
كانت لابسة فستان أسود قصير مع انها كانت رح تلبس فستان أحمر مجهزتو للحفلة … بس لا قررت تلبس اسود ما بتعرف ليش يمكن لتبين حزنها لنفسها على يلي بدو يصير بحياتها
قرب منها وليد لما قعدت ترتاح شوي وهو من زمان بحاول مايحتك فيها خصوصا انها ما عم تعطيه ريق حلو
وليد: كيفك اليوم
جاوبته نرجس ببرود: تعبانة من الشغل
وليد: شبها شفتك جارحتيها !؟
نرجس: اي انجرحت
وليد: انا كنت بدي احكي معك موضوع خاص شوي
التفتت عليه وهيي بتتمعنو بصدمة (منين اجت هالجرأة هاي … هلق فطنت !)
هيك كانت بتفكر تقلو بس سكتت
نرجس: اذا ما صار شي اليوم بوعدك بكرا نحكي
وليد: ليش شو بدو يصير اليوم
(يمكن انتحر) هيك جاوبت بقلبها بس رجعت تعلي صوتها وهي بتهمس: ولا شي عن اذنك عندي شغل
حس وليد انها عم تهرب منو كالعادة رغم انو اخد القرار المناسب وأخيراً بس هي لأيمتى رح تبقى هيك عم تبعد عنو !!
على الساعة 8 كان كل شي جاهز والضيوف بلشت توصل مع العمال يلي بيشتغلو بشركات ناجي وعبود والشركة الجديدة
كانت الحفلة كبيرة كتير وفيها كتير شباب وصبايا كان في أغاني وشوية رقص وهي بدل ما تكون سعيدة مع الجميع كانت منزوية على جنب بتراقب لتنتهي الحفلة وينتهي شغلها
قربت سارة منها وهي بتحاول تسحبها لترقص
نرجس: بكفي تعبانة
سارة: لك شو صرلك تعالي حاجة قاعدي لحالك
نرجس: والله تعبانة اتركيني بحالي
سارة: شقدك باردة تعالي اتسلي مابتنعاد هيك سهرات
نرجس بحدة: بكفي تتسلي انت
تركتها سارة مصدومة من تعاملها وبعدت عنها وبلش الشك يدخل لقلبها اتجاه هالبنت فجأة انقلب 180 درجة بهالكام يوم … صايرة كتير عدوانية على غير عادتها
بعد اكتمال الضيوف على الساعة 9 وصلو الرؤساء دخلو ناجي والريس عبود وهي رفعت ايدها لتخبر مختص الموسيقى يجهز الأغنية وركضت بصينية فيها المقص ووقفت بقربهن ليفتتحوا الشركة
قربت الصينية باتجاه ناجي ابتسملها وهو بيمسكو بين ايديها وبخلي عبود يشاركه بالقص … وعلى يمينو كان في جمال وعلى يسار عبود كان واقف باسل وأربعتهم مشاركين بقص الشريط الأحمر وعليت التصفيقات لما انقص الشريط وعليت معو اغنية تانية والكل كان فرحان
اتوجهت مع الرؤساء لطاولة مخصصة الهن ليتابعو هالسهرة الجميلة وعيون عبود مازالت عليها وبتابعها بانتظام … وهي كانت بتحاول تخبي قرفها … وخوفها … ووجعها …
قرب جمال منها وسحبها معو ليطلعوا برا الشركة وهو بيبتسم لرفقاتو
لما وقفو على طرف برا باب الشركة سألتو بلؤم: شو لسا بدك
جمال: شو صرلك ليش هيك وجهك متل الساحرة الشريرة اضحكي شوي
نرجس: نعم !!!! بدك اضحك بعد يلي عملتو حضرتك فيي
جمال: ليش شو صار بتحبي فرجيكي أكتر منو
نرجس: بكفي كرمال الله انا قرفت منك ومن هالحياة
جمال: أي قبل ما تتوكلي ونخلص منك رح تكملي مهمتك
نرجس: شو قصدك؟
جمال: الزواج اليوم رح يكون
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق