رواية تحت أمر الحب الفصل الاول والثاني والثالث والرابع والخامس بقلم شيماء صبحي حصريه وجديده على مدونة النجم المتوهج
 |
بتبدأ قصتنا في مستشفي وبيكون في إجتماع لكل الاطباء الموجودين فيها وبيتكلم مدير المستشفي وبيقول: هيتم ترحيل كل الدكاترة اللي هنا للجيش المصري لان عندهم عجز في الدكاترة خصوصا بعد الهجوم اللي حصل من قبل العدو من خلال قت'ل ثلاثه من الجنود والاستيلاء علي أسلحتهم والمعسكر بتاعهم ...وبما إن المستشفي هنا مفيهاش غير كام مريض فهيتولي أمرهم دكتور واحد منكم وانا مش عايز أي إعتراض علي كلامي بعد إذنكم لان دا مش مجرد إقتراح دا أمر ولازم يتنفذ.؟
كل الدكاتره بصوا للمدير وهزوا راسهم وبعدها المدير بص لدكتوره واقفه بينهم كانت ماسكة موبايلها وبتلعب فيه وقال بغضب:
دكتورة داليدا حضرتك معانا ولا معندكيش وقت!!
داليدا وقفت بإنتباه وهيا بتعين تيلفونها بسرعه وبتقول:
انا أسفة يا دكتور بس حضرتك طول عمرك بتتجاهلني وأنا فكرت إن وجودي مش هيضيف اي حاجة يعني وأكيد حضرتك وبقيت الدكاتره هتعملوا الحاجة الصح؟؟
المدير أخد نفس وهو بيهز راسه وبيبص لبقيت الدكاتره وقال:مهمة الكام مريض اللي هنا الدكتورة داليدا هيا اللي هتتولي أمرهم وأظن ان دي حاجة مش صعبه عليها ولو حضراتكم عندكم أي كلمه حابين تقولوها اتفضلوا..؟
الدكاترة كلهم بصوا لبعض وبعدها هزوا راسهم بالرفض والمدير ابتسم ليهم وطلب منهم يمشوا.!
واول ما مشيوا بص المدير لداليدا اللي كانت بصاله وساكته ولحدما اتأكدت ان زملائها مشيوا قربت هيا من المدير وقالت: دكتور هو حضرتك كلفتني بجد بالمهمة دي!!
الدكتور هز راسة ليها وقال بجدية:أظن يا داليدا إن دي فرصة كويسه ليكي تثبتي انك تنفعي تكوني دكتورة بجد بدل اللعب اللي بتلعبيها طول الوقت دي ..!
داليدا بصت للأرض بإحراج وهزت راسها ليه وقالت:حضرتك عارف يا دكتور ان بعدما بابا مات علي ايدي وانا مش عارفه امسك المشر'ط حتي ؟
الدكتور حط ايديه علي كتفها وقال بحنيه:أنا عارف كل الكلام دا يا داليدا وعلشان كدة بقولك دي فرصتك في انك تحاولي تكسبي ثقتك في نفسك تاني ..إنتي قوية زي باباكي بالظبط وأظن انه لو كان عايش مكنش هيبق مبسوط بالحالة اللي انتي وصلتيلها نهائي؟
داليدا هزت راسها والمدير قال:انا هروح مع الدكاترة علشان عندي مأمورية معاهم وطبعا هتكوني انتي وكام ممرضة بس في المستشفي اتمني يا داليدا لما ارجع الاقي داليدا بتاعت زمان رجعت..!!
داليدا بصت للدكتور وهزت راسها بابتسامه وهو سابها ومشي وفضلت هيا واقفه وبتفكر في كلامة وبعد مرور دقايق علي نفس الحال لقت جرس انذار من مريض فاتجهت ليه بسرعه وهيا قلقانة ليكون حصلة حاجة!!
وفي غرفة المريض كان بيضغط علي الجرس بكل غضب وبيقول..:بقالي ساعه عايز دكتور محدش بيرد ليه!
داليدا قربت منه وهيا بتقول بهدوء:اهدي يا استاذ مسعد وقولي ايه اللي حصل .!
المريض بصلها وهو بيقول بحزن : زهقان يا دكتوره وعايز أخرج أنا واحد حركي ومش متعود علي القعدة دي !!
داليدا قربت منه وهيا مبتسمه وبتقول:يعني يا أستاذ مسعد بالعقل كدا كل حاجه في الحياة محتاجه وقت علشان تتعافي وأكيد الحادثة دي كانت خير لحضرتك وبعدين مش المفروض انك شخص قوي وتقدر تستحمل الفترة دي لحدما تتعافي تماما ::
مسعد اخد نفس عميق وهو بيقول:ثلاث شهور كاملين وانا علي نفس الحال دا وكل ما اتكلم مع الدكتور يقولي لسا بدري علي حالتك لما تتحسن رغم اني شايف اني بقيت أحسن من الأول بكتير !!
داليدا أبتسمت وهيا بتقرب من مسعد وبتمسك إيديه وبتقول:وفيها ايه لما تخرج مش غلط ولا حاجه اتفضل معايا يا أستاذ وانا هخرجك وأوريك أحلي واجمل جنينه في الدنيا !
مسعد ابتسم ليها وقال:بجد يا دكتوره هخرج!
داليدا هزت راسها وهيا بتقرب من الكرسي المتحرك وبتقربه من سرير مسعد وبتقول :ايوا يلا يا بطل وريني قوتك !!
مسعد ابتسم وهو بيرفع الغطا من علي جسمه وبيبص لداليدا وبيحط ايديه علي كتفها وبيقول:أنا أسف يا دكتوره بس هسند عليكي؟
داليدا إبتسمت وهيا بتقول:يا خرابي يا مسعد هو أنا أطول برضوا'
مسعد ضحك علي كلامها وقال:انتي الدكتورة الوحيدة اللي في المستشفي دي بحس انها طيبه اوي ..وعمرك مبترفضي طلب لاي مريض فينا ودايما الابتسامة البشوشه علي وشك!!
داليدا ابتسمت وهيا بتبص في الأرض وبتقول بخجل:ربنا يخليك يا مسعد ومتحرمش أبدا من كلامك الجميل دا '
مسعد ابتسم وهو بيقعد وداليدا بتجيب الغطا علشان تغطي رجله وبعدها مسكت ايد الكرسي
وقالت:أستعد للمغامره العميقة اللي هتشوفها يا أستاذ مسعد !!!
مسعد ابتسم وهوا بيبصلها وداليدا اتحركت ونزلت للجنينه وهيا بتقول:يا سلام علي المنظر الجميل اللي يخطف القلب ..!
مسعد إبتسم وهوا بيبص للورود اللي في كل مكان والنجيلة الخضراء اللي ريحتها مريحة للعصاب ..
داليدا بصت عليه وهيا مبتسمه وبعدها قالت:
عارف يا مسعد اي أجمل حاجة في الحياة دي؟
مسعد بصلها بانتباه وهز راسة ليها وهيا كملت كلامها وقالت:إنك تكون في حالك!!! يعني مكتفي بكل اللي حواليك وراضي عنهم !!
مسعد إبتسم علي كلامها وقال:وعلشان كدة انتي دايما وحيدة ومش بتختلطي بحد !!
داليدا بصتله وابتسمت وهيا بتقول: أنا مش وحيدة يا مسعد انا مكتفية بنفسي وبحياتي وطبعا بشغلي !!
مسعد هز راسة ليها وقال:بس يا دكتورة التجارب حلوه ولذيذة وطبعا من حقك انك تشوفي الحياة من وجهة نظر تانيه وزي مقولتيلي من شوية ان كل ازمة بتحصل محتاجة وقت للتعافي وأظن انك طولتي أوي في فترة التعافي دي يا دكتورة!!
داليدا بصتله بحزن وهيا بتاخد نفسها وبتقول:احنا لازم نرجع للاوضة تاني علشان دا وقت العلاج بتاعك.!
مسعد ابتسم ليها وقال:اتمني انك تكوني أحسن يا دكتورة وتلاقي شخص كويس يغير حياتك للأحسن؟
داليدا ابتسمت ليه ومسكت الكرسي المتحرك واتحركت لداخل المستشفي ..
كانت في ممرضة بتساعد شخص كفيف انه يقعد علي الكرسي لحدما بنته تخلص كشف ..!
داليدا ابتسمت بحب وهيا بتبصلهم وبعدها دخلت هيا ومسعد للاوضة !!
بدأت تحضر الدواء بتاع مسعد وهو كان منتبه ليها ومبتسم '
داليدا قربت منه وهيا بتقول:طبعا انت عارف ان الدواء دا هينيمك مستعد تاخدة..؟
مسعد إبتسم ليها وهز راسه وداليدا بدأت تديله العلاج وبعد دقايق بدأ مسعد يحس بثقل في دماغه وبدأت عينيه تقفل بالتدريج!!
قعدت داليدا علي الكرسي وهيا بتاخد نفس وبتفكر في كلام مسعد ليها عن الوقت الكبير اللي اخدته علشان تتعافي من الازمات اللي مرت بيها فحياتها..!
ابتسمت وهيا بتبصله وبتبص لرجليه المتغطيه وبتفكتر الحادث اللي مر بيه وخسر رجلية الاتنين فيه وقالت: طلعت ازمتك أكبر مني بكتير يا مسعد اتمني ان ربنا يخفف عنك وجع خسارتهم ..
قالت كلامها وهيا بتتنهد لحدما سمعت دوشة كبيرة تحت واصوات صراخ الممرضات !!
قامت داليدا بسرعه وقفلت الباب علي مسعد ونزلت وهيا بتبص لكمية الناس المس'لحين اللي موجودين في المستشفي بصدمة!!
واحد منهم كان ماسك ممرضة وبيقول بغضب:فين الدكاترة اللي هنا؟
الممرضة كان جسمها بيرتعش من الخوف وهيا بتقول: صدقني والله مفيش ولا واحد منهم هنا طلعوا مأموريه تبع الجيش؟؟
الشخص دا اتعصب من كلامها وقرب السلاح أكتر منها وقال:أنا معنديش وقت للكلام الفاضي دا لو الباشا مات هقلب المستشفي دي علي دماغكوا كلكوا!!
الممرضة خافت من كلامه وفضلت تبص حواليها لحدما شافت داليدا واقفه ومصدومة من اللي بيحصل فشاورت عليها وقالت:الدكتورة داليدا هناك!!
الشخص دا بص علي داليدا اللي واقفه علي السلالم ومصدومه ف وجه الس'لاح عليها وقال :انزلي يا دكتورة بسرعه..!
داليدا هزت راسها ونزلت علي السلم بسرعه وقربت من الشخص دا وقالت:لو سمحت اهدأ ونزل الس'لاح المستشفي فيها عيانين كتير وممكن يتأذو بسبب اي تهور !
الشخص هز راسه وبصلها وقال وهو بيشاور علي اتنين من رجالته وهما شايلين شاب وكان غار"ق في دمه وبيقول: أخو الزعيم بتاعنا اتعرض لحادثة بسبب غدر ومحتاج يدخل للعمليات وكمل كلامه بتهديد وقال:لو مات هتحصليه..!
داليدا أول ما سمعت كلامه اتخضت لانها مدخلتش غرفة العمليات من أربع سنين فقالت بصدمة:بس أنا مش بدخل عمليات!!!
الشخص قرب السلاح من الممرضة تاني وقال بتهديد: بقولك لو مات كلكم هتحصلوه!!
الممرضة صرخت بخوف وهيا بتقول :الحقيني يا دكتورة المسدس حقيقي !
داليدا بصت حواليها بتوتر وبصت للشخص اللي شايلينه وقالت بصوت عالي:دخلو المريض للعمليات!
الشخص اللي كان بيهدد الممرضة ابتسم وهو بيبعد س'لاحة وبيقول:حلو الكلام دا يلا يا دكتورة بالتوفيق بس انا لازم اقولك حاجة مهمه !!
داليدا هزت راسها ليه وهو قال بتهديد! الشخص دا لو مات أخوه مش هيرحمك!!
داليدا بصتله بجمود وقالت:انا دكتورة ودا شغلي ولو مات يبق تنتقم من اللي قت'له مش مني!!
داليدا قالت كلامها وهيا بتبص لكل الممرضات اللي واقفين وقالت:بسرعه جهزوه للعمليات وانا هحصلكم!!
الممرضات قربوا بسرعه من الشخص دا وحطوه علي الترولي وداليدا جريت بسرعه علشان تجهز نفسها وبعد مرور عشر دقايق كانت داليدا وبقيت الممرضات في غرفة العمليات!
الممرضة بصت لداليدا اللي وشها احمر من التوتر وقالت:دكتورة احنا حياتنا متوقفه علي حياة الشخص دا ارجوكي انقذينا؟
داليدا بلعت ريقها وهي بتهز راسها وقربت من المشرط ومسكته واول ما قربته من جسم المريض بدأت تنهار وهيا بتقول:مش قادرة سامحوني مش قادرة!!
الممرضة قربت منها وهيا بتقول :انتي قدها يا دكتوره انا عارفة ان والدك مات بسببك بس دا قضاء وقدر وأكيد دا اللي مكتوبله وانتي ملكيش اي ذنب !!
ممرضة تانيه قالت"ارجوكي يا دكتورة حاولي تاني وان اشاء الله هتنجحي !!
داليدا غمضت عينيها وهيا بتاخد نفسها وبتهز راسها ليهم وقربت من المريض تاني وهيا بتقرب المشرط من جسمه غمضت عينيها وبعد مرور ثواني بدأت داليدا توقف النزيف وبمساعدة الممرضات قدرت تسيطر علي الوضع وقدروا ينقذوا الشخص دا ويرجعوا قلبه ينبض من جديد!!!
خارج غرفة العمليات كانوا واقفين الرجالة مستنيين الدكتورة تخرج وقبل ما داليدا تفتح باب غرفة العمليات وطمنهم علي حالة المريض سمعت صوت ضر'ب نار جاي من الخارج.. وقفت داليدا برعب والممرضات قربوا منها وهما بيقولوا بخوف:هو ايه اللي بيحصل برا يا دكتورة!!!
داليدا حطت صوباعها علي بوقها وهيا بتسكتهم وفضلت هيا تسمع اللي بيحصل برا كانت اصوات الضرب اختفت بسرعه و الباب اتفتح عليهم فجأة وكان في شخص واقف وجمبة رجالة م'سلحة كتير ..
داليدا بصتلهم بصدمه وبصت علي الارض شافت كل الرجالة التانية وقعين علي الأرض وميتين!!
الممرضات مسكوا في بعض بخوف وفضلت داليدا واقفه وهيا مصدومه لحدما قرب الشخص دا منها وقال:انقذتي حياته !!!
داليدا بلعت ريقها وهزت راسها وقالت:أيوا هو كويس دلوقت وقلبة رجع ينبض تاني؟؟
الشخص دا بصلها بغضب وقال:مين قالك تعملي كده اتفضلي اقت"يليه ؟
داليدا فتحت عينيها من الصدمة والممرضات مسكوا في هدومها بخوف والشخص دا قرب منها وهو بيقول:لو معملتيش كدة هكون مول'ع فيه وفي المستشفي دي كلها!!
قال جملته بصوت عالي لدرجة ان جسمها اتنفض من مكانه !
فضلت بصاله بصدمه وساكته لحدما الشخص دا وجه سلاحه علي ممرضة من اللي وراها وقال:أظن انك مبتجيش غير بالتهديد!!
الممرضة صرخت وهيا بتقول:الحقيني يا دكتوره ابو'س ايدك!
الشخص دا ضحك بسخريه ورجع بص لداليدا وقال:اي رئيك أبدأ بيها!!
داليدا حركت راسها بالرفض وبصت للشخص دا وقالت:مش هقت"لة ولا هسمحلك تق'تلها انت فاكر نفسك مين يا همجي انت !!
الشخص دا بصلها بصدمه ورجالته رفعوا أسلحتهم عليها ولاكنه رفع ايديه وأمرهم ينزلوا الاسلحه وهو بيقول:طلعتي قطة مخربشه يا دكتورة بس حقك مهوا مفيش واحدة بالجمال دا وتكون جبانة!!
داليدا بصت للممرضات بخوف وغمضت عينيها ودقايق وسمعت صوت هجوم لأشخاص تانية بيقربوا عليهم!!
الشخص دا لف بجسمه واتصدم من كمية الناس اللي موجودة!!
داليدا بصت للممرضات وطلبت منهم يخرجوا بسرعه ويروحوا للمرضي وهيا هتفضل هنا مع المريض دا!!
الممرضات رفضوا يسيبوها وهيا صرخت فيهم وطلبت منهم يتحركوا !!
الممرضات هزوا راسهم ليها وخرجوا وهيا قفلت باب أوضة العمليات عليها وقربت من الشخص دا بخوف وهيا بتبص لملامحه وبتقول:يا تري انت مين علشان تحصل المجزرة دي كلها علشانك!!
قالت كلامها وهيا بتنزل علي رجليها وبتستخبي جمب السرير اللي هوا نايم عليه وهيا بتقول بخوف:
انا بقيت تحت ايد مجرمين يا تري هيعملو فيا ايه!!
قالت كلامها وهيا بتحط ايديها علي عيونها بخوف وبتدعي ان ربنا ينجيها من وسط المجزرة اللي بتحصل برا !!
عدي دقايق وصوت ضرب النار بره بيتبادل لحدما فجأة الاصوات كلها أختفت والباب اتفتح ودخل منه أشخاص ملامحهم مش باينه بسبب الظلام ..وقفت وهيا بتقول برعب:والله ما قت'لته اهو عايش قدامكوا اهو سيبوني عايشة!!!
قالت كلامها وهيا لسا حاطة ايديها علي عينيها لحدما قرب منها شخص وشال ايديها وهو بيقول:كويس انه لسا عايش..
رفعت عينيها بخوف وهيا مستغربة من الشبه الكبير اللي بين الشخص دا والمريض اللي نايم فقالت بصدمة:هو أنا مت ودخلت الجنه ولا ايه!
الشخص دا كانت عيونه مركزه جدا مع عيونها وهيا كانت لسا مصدومه لحدما بصت حواليها ولقت انها لسا في المستشفي فبعدت عن الشخص دا وهيا بتقول:انت تبع مين فيهم اللي عايزينه يعيش والا اللي عايزيني أقت'له!!
الشخص دا هز راسه وقال:لا اللي عايزينه يعيش بس للاسف مش هينفع نسيبك هنا!!
بصتله برعب وهيا بتبلع ريقها وبتقول: لية هتق'تلني!!
الشخص دا هز راسه بالرفض وقال:لا هتجوزك يا دكتورة!!
#الفصل_الثاني
#تحت_أمر_الحب
#الكاتبة_شيماء_صبحي
داليدا رفعت عينيها بصدمه وهيا بتقول:أفندم تتجوزني أنت مين أصلا علشان تقتحم غرفة العمليات علي فكرة اللي بتعملو دا غير قانوني!!
الشخص دا قرب منها وهوا بيقول بجدية:دا أمر مش أقتراح يا دكتورة وأظن ان ليكي الأختيار يا الجواز يا الق'تل..!
داليدا بلعت ريقها وهيا بتقول:ودا كله ليه أنا عملت ايه انا أنقذت اللي شبهك دا من الموت هل دا جزائي اني دخلت غرفة العمليات رغم اني ممنوعه من دخولها ولا بسبب اني مسكت المشرط لاول مرة بعد اربع سنين من الحرمان؟؟؟
الشخص دا بصلها وهو بيمسك ايديها وبيقول:انا ميهمنيش الكلام دا كله انا اللي يهمني فعلا أخويا ولاكن انتي دلوقت حياتك بقت في خطر لأنك أنقذتيه!!
داليدا وقفت وهيا مش مستوعبة اللي بحصل قدامها وقالت:من شويه في واحد هددني انه لو مات هيقت'لني ودلوقت انت بتقولي حياتي في خطر اني انقذته انا المفروض كنت اعمل ايه انقذه ولا أقت'لة!!
الشخص دا هز راسه وقال:الصح انك أنقذتيه علشان لو مكنتيش عملتي كده كنتي هتموتي علي ايدي انا وطبعا انا مكنتش هضرب نار ولاكن ليا طرق كتيرة في الانتقام!؟
داليدا حطت ايديها علي راسها وقالت بدموع:طيب انا لازم اروح ازور مريض حالا لان دا معاد العلاج بتاعه وهرجع لحضرتك تاني!!
الشخص دا هز راسه ليها وداليدا ابتسمت وخرجت من غرفة العمليات ورجالة الشخص دا كانوا هيروحو معاها ولاكن هوا منعهم وسابوها تخرج ..! وأول ما هيا بعدت عنهم بشويه جريت بأقصي سرعه عندها ودخلت مكتبها واخدت شنطتها وخرجت من الباب الخلفي للمستشفي واول ما خرجت برا وقفت تاكسي وركبت فيه بسرعه وهيا بتقوله علي عنوان بيتها
واو لما التاكسي اتحرك الشخص دا ابتسم وهوا بيبص عليها من الشباك ..
رجالته قربوا منه وقالو :الاستاذ رشاد فاق يباشا !!
ابتسم ليهم وهو بيبصلهم وبيقول :انزلوا جهزوا العربيات علشان هننقله للقصر وطبعا فضولي الليله دي كلها الاول وهددوا الممرضات دي لو اتكلموا وقالو اي حاجة من اللي حصلت هنا هعمل فيهم ايه!!
رجالته هزوا راسهم ونزلوا ودخل هوا لغرفة العمليات وشاف أخوه وهو فاتح عينه وبيبصله وبيشاورله يقرب منه!!
قرب منه وهوا مبتسم وبيقول:عامل ايه دلوقت يا رشاد؟؟
رشاد ابتسم وهوا بيشاورله انه بخير واتكلم بتعب وقال:خرجني من هنا!!
هز راسه ليه وقال:هخرجك يا رشاد بس انت لازم تعرف مين السبب في الحادثة دي الأول!
رشاد بصله وهز راسه وهو اتكلم وقال:كمال شريكك بس متقلقش انا خدتلك حقك منه وابق اقراله الفتحه لما تبق كويس!!
رشاد بص لاخوه وهو مصدوم وبيقول :قت'لته ليه!!
وقف بغضب وهو بيبص لأخوه وبيقول بعصبيه:كان جاي يقتلك كان بيهدد الدكتورة اللي انقذتك انها تخلص عليك !
رشاد لف راسه بغضب من اخوه ولاكنه لما افتكر الحادث وقد ايه كان واضح انه متدبر رجع بص لاخوه وقال:متزعلش مني مش قصدي ازعلك بس خرجني من هنا مش طايق المكان دا!!
هز راسه وقال:متقلقش الرجاله تحت بيجهزولك العربية اللي هينقلوك فيها بس انت هتقدر تستحمل الطريق!!
رشاد هز راسه وغمض عينيه وبعد وقت وصلت الرجالة وهما بيقولوا العربيات جاهزه يا باشا ودا الترولي اللي هننقل رشاد باشا عليه!
هز راسه وامرهم ينقلوه وهو هينزل بعدهم ...!
رجالته قربوا من رشاد وشالو كل الاجهزه اللي متعلقه بجسمه وحطوه علي الترولي رشاد كان بيتألم ولاكنه مصدرش أي صوت الرجاله شالوا الترولي وخرجوا من المستشفي وحطوة في العربيه وبعدها اتحركوا للقصر ..!
وفضل الشخص التاني في المستشفي وهو بيبص لكل ركن فيها دخل في اوضة الدكتوره داليدا وكان بيبص علي كل التفاصيل اللي فيها وانتبه لكميه شهادات التقدير بتاعها وشاف قد ايه هيا دكتورة شاطره بس اللي استغربه هوا كلامها لما قالتله انها مدخلتش غرفة العمليات من اربع سنين ،،؟
اول ما قرأ اسمها ابتسم وهو بيقول:داليدا إسمك حلو يا دكتورة!!
قرب من تيلفونها اللي نسيته في الدرج وفتحه ولقي صورة ليها هيا وشخص كبير خمن ان دا يبق ابوها!!
حط تيلفونها في جيبه وخرج من المكتب وهو بيبص للمستشفي ولاحظ كاميرات المراقبة اللي موجودين في كل مكان قرب من مكتب المدير وفتح الباب بسهوله وقدر انه يمسح كل تسجيلات الكاميرات اللي صورت كل اللي حصل ..وبعدما خلص خرج من المستشفي وركب عربيته واتحرك بيها للقصر بتاعه...!!
وفي مكان تاني في منزل بسيط كانت واقفه داليدا وهيا بتقول بصدمة" أكيد مش هيسبوني في حالي الحل الوحيد دلوقت اني اهرب واروح اي مكان بعيد!!
فضلت تفكر في اي حد من قرايبهم الي عايشين في بلاد بعيده فافتكرت جدها اللي قاعد في المنيا ابتسمت داليدا وهيا بتقول" جدي اكيد هو الوحيد اللي هينقذني من كل دا !!
قامت داليدا وهيا بتجهز شنطتها بسرعه وحطت فيها كل المستلزمات اللي هتحتاجها طول فترتها هناك وبعدما خلصت اتحركت بسرعه لخارج الشقه واول ما نزلت لقت تاكسي قدام العماره استغربت وجوده فقالت وهي بتبص للسواق " فاضي!!
صاحب التاكسي هز راسه ليها وقال" هتروحي فين يا انسة!!
داليدا بصتله باستغراب وقالت" محطة القطر!
السواق هز راسه وقرب منها وهو بيقول" كان في زبونه هنا في العماره دي طلبت مني استناها ولحد دلوقت منزلتش اعتقد انها نسيتني!!
داليدا بصتله وارتاحت لما سمعت كلامه فادتله شنطتها وهيا بتاخد نفسها وبتقول" تلاقيها شهد بنت عمي مخلص هيا علي طول كده!!
السواق ابتسم وهو بيقول:ربنا يهدي بناتنا جميعا!!
داليدا ابتسمت وهيا بتديلة الشنطه بتاعها وهوا اخدها وحطها في شنطة العربيه وبعدها ركب واتحركوا!!
وفي قصر عائلة الصاوي دخلت العربيات اللي موجود فيها الرجاله ومعاهم رشاد !!
اول ما وصلوا استقبلهم الخدم وقدروا ينقلوا رشاد لاوضته وبعد دقايق كان وصل الدكتور الخاص بالعائلة وبدأ يركب الاجهزة بجسم رشاد علشان حالته غير مستقره لانه اتعرض للهوا وهوا لسا خارج من عمليه جراحية !!
وبعد وقت وصل عمار وهوا بيركن عربيته وبيستقبله المساعد بتاعه وهو بيقول:عمار باشا احنا اتخلصنا من كل الجثث ورمناهم علي الجبل علشان الموضوع يبان انها كانت خناقه مبينهم !!
عمار هز راسة وقال:رشاد عامل ايه دلوقت!
المساعد رد عليه وقال:الدكتور معاه دلوقت يباشا وبيقول ان حالته لسا مش مستقرة لانه أتعرض للهواء وهوا لسا خارج من عمليه جراحية!!
عمار اتحرك لجوه القصر ودخل بسرعه لأوضة رشاد وهو بيبص للدكتور وبيقول:حالته مش مستقره ازاي يا دكتور!!
الدكتور وقف وهوا بيقرب من عمار وبيقول:ان شاء الله هيكون كويس هوا بس هيكون تحت الرعايه لمدة ٢٤ ساعه ولو حالته متحسنتش هضطر اخدة عندي المستشفي !؟
عمار بص لاخوه بحزن ورجع بص للدكتور وقال:انا عايز ممرضة تكون جمبه وتعرف ميعاد الادويه بتاعته بس اهم حاجه تكون بنت ثقة يا دكتور!!
الدكتور هز راسه وقال:انا حاليا معلقله محلول لما يخلص هيتحسن شويه ومتقلقش انا هتصل بممرضة كويسه تيجي هنا لحضرتك..!
عمار هز راسه وقال:طيب يا دكتور متشكر علي تعبك معانا!
الدكتور ابتسم وهو بيقول:أهم حاجة رشاد بيه يتحسن!
عمار هز راسه وهو بيبص لرشاد وخرج الدكتور علشان يتصل بالممرضة ..
قعد عمار قدام اخوه وهوا بيمسك إيديه وبيقول:حظرتك منه كتير يا رشاد بس طيبتك دي اللي ضيعتك بس من النهارده انت تحت حمايتي واي حد هيتخطي حدوده مش هكتفي بق'تله بس ؟؟؟ قال كلامه وهيا بيرجع بضهرة لورا وبيفتكر الدكتورة اللي شافت كل اللي حصل وعجبة اوي قوتها وهيا بتوقف كمال وبترد عليه بتحدي وبتعرفه انها مش هتأذي حد!!!
بداخل محطة القطر وصلت داليدا وهيا بتبص حواليها بصدمه وهيا مش مستوعبه ان من كام ساعه بس كل حياتها إتغيرت ودلوقت بتهرب!!
افتكرت كلام مسعد ليها لما قال :ربنا يرزقك بشخص يغير حياتك للأحسن؟؟
داليدا همست بغيظ وقالت:منك لله يا مسعد معدتش تدعيلي تاني !!
قربت من الشخص اللي بيقطع التذاكر وقالت:قطر المنيا هيوصل امتي؟
الشخص بصلها وهو بيقول :الساعه ١٢ يا استاذة !!
داليدا بصت في الساعه بتاعها لقت انها ٣العصر اتنهدت بتعب وهيا بتقول :٩ سعات بحالهم ليه كدة بس!!
داليدا خرجت شنطتها وهيا بتطلع الفلوس ولاكن لفت نظرها ان موبايلها مش معاها قالت بصدمة:نسيته في درج المكتب بتاعي!!!
ضربت دماغها بصدمه وهيا بتقول:أكيد هما لسا هناك ولو روحت مش هيسبوني عايشه بعدما هربت!!
الشخص كان بيسمع كلامها وباصصلها باستغراب وبيقول:انتي كويسه يا أستاذه!
داليدا انتبهت ليه وقالت:أيوا كويسه قولتلي بق التذكرة بكام؟؟؟؟
الشخص دا بصلها باستغراب من حالتها وقالها السعر وهيا دفعت الفلوس واخدت التذكرة ومشيت في اتجاه استراحة المحطة وهيا بتدور علي كرسي تقعد عليه لحدما لقت كرسي فاضي جريت عليه بتعب وحطت شنتطها وهيا بتقول:يارب متحصلش اي مفجأة تانية النهاردة انا معدش عندي طاقة!!
عدي ثلاث سعات وداليدا علي نفس الوضع حاضنة شنطتها وبتبص علي الناس التي بتركب القطر والناس اللي بتخرج منه لحدما نامت من التعب وفي الوقت دا قرب شخص كان متابعها من وقت مهيا قعدت وكان ملاحظ الفلوس اللي طلعتها من شويه وعدتها قرب منها وقعد جمبها لمدة نص ساعه وبعدها بدأ يسحب الشنطة من حضنها بالراحة وهيا بسبب نومها التقيل سابت الشنطة بسهوله والشخص دا اول ما القطر بتاعة وصل اخد الشنطة وجري علي القطر وركب ..
وبعد مرور ساعتين صحيت داليدا علي صوت طفل صغير بيعيط جمبها وكانت مامته بتصرخ بصوت عالي علشان يسكت ..
داليدا بصت علي شنتطها واتفجأت إنها مش موجوده بصت للست دي وقالت:لو سمحتي مشفتيش شنتطي !!
الست هزت راسها بلأ وداليدا وقفت وهيا بتبص حواليها بصدمه وقامت وهيا بتسأل الناس اللي موجودين وكلهم بيقولولها انهم لسا واصلين المحطة ومشافوش حاجة .!
خرجت داليدا للشخص اللي بيقطع التذاكر وقالت:لو سمحت انا شنتطي اتسرقت وانا نايمه ومش عارفه مين اللي اخدها ممكن تساعدني!
الشخص بصلها وهز راسه وقال:انتي متأكدة من كلامك دا يا أستاذه!
داليدا هزت راسها وقالت:ايوا اتسرقت في حد استغل اني نايمه وسرق الشنطة لو سمحت شوف الكاميرات الشنطة كان فيها كل فلوسي وحاجتي!!
الشخص دا شاور للامن اللي موجود وطلب منه يراجع للاستاذه دي الكاميرات والأمن طلب من داليدا إنها تروح معاه لمكتبه ويشوفوا الكاميرات!!
داليدا مشيت معاه وهيا مصدومة لان الموقف بايخ جدا واول مرة تتعرض ليه !
الشخص اللي معاها فحص الكاميرا وسالها : اتسرقت امتي يا استاذه ؟
داليدا بصتله باستغراب وقالت مش عارفه بس من وقت منا نمت يعني حوالي الساعه ٦ او ٧ كده يعني!
الامن هز راسه وراجع الكاميرات لحد الوقت اللي كانت الشنطة موجوده معاها وعدي وقت بسيط ولاحظوا الشاب اللي قرب منها وسحب الشنطة وقت وصول القطر وركب فيه!!
داليدا خبطت كف فوق الاخر وهيا بتقول: والله اللي انا بمر بيه مش ناقص سرقة خالص.:
رجل الامن طلع من جيبه ٢٠٠ جنيه وهو بيمد ايديه لداليدا وبيقول:خدي يا بنتي خلي دول معاكي وانا هعرض الفيديو دا للمباحث وانشاء الله هيجيبوا الولد دا بس ممكن تسيبي رقمك او عنوانك واول ما يوصلوا للولد هنتواصل مع حضرتك!
داليدا بصت للفلوس بحزن واخدتها وهيا بتقول:شكرا لحضرتك ورقمي هات اكتبه !!
رجل الآمن ادالها الورقة تكتب رقمها وهيا كتبت رقمها وعنوانها وبعدما خلصت قالت :دا رقمي ودا عنواني واتمني توصلوا للولد دا في اسرع وقت؟
رجل الامن هز راسه وداليدا خرجت من مكتبه وبصت للمحطة بحزن وهيا بتقول:فرصة هربي من هنا فشلت هروح فين واجي منين بس يا ربي!!
خرجت من المحطة ومشيت مسافة كبيره علشان تقدر تركب اي مواصلة وترجع شقتها تاني وبعدما ركبت المواصلة والعربيه اتحركت افتكرت انها ادت رقمها لرجل الامن وتيلفونها مش معاها فضربت راسها بصدمه لتاني مره وهيا بتقول:وطبعا مهما يتصلواعليا محدش هيرد بس هقول ايه علي غبائي !!
وصلت لبيتها بعد طريق طويل واول ما طلعت ووصلت قدام شقتها لقت بوكس موجود قدام الباب قربت منه باستغراب وفتحته ولقت فيه جواب ومكتوب علية : مينفعش تفضلي هنا كتير لازم تبقي في بيتي.!
#الفصل_الثالث
#تحت_أمر_الحب
#الكاتبة_شيماء_صبحي
وصلت لبيتها بعد طريق طويل واول ما طلعت ووصلت قدام شقتها لقت بوكس موجود قدام الباب قربت منه باستغراب وفتحته ولقت فيه جواب ومكتوب علية : مينفعش تفضلي هنا كتير لازم تبقي في بيتي....!
داليدا رمت البوكس علي الأرض بصدمة وهيا بتقول: يا نهار أسود عرفوا مكاني ..عرفوا مكاني أهرب أروح فين دلوقت ؟؟؟
فضلت تدور في هدومها علي مفتاح الشقه ولاكنها ملقتهوش همست بحزن:المفتاح كان في الشنطة الي اتسرقت!!
نزلت علي السلم وهيا بتبص حواليها علشان تتاكد لو في حد بيراقبها و لحدما خرجت برا العماره جريت بسرعه في شارع جانبي وهيا بتاخد نفسها وبتقول:لازم اهدي علشان أعرف أفكر هروح فين في الوقت دا؟؟؟
قعدت داليدا وهيا بتغمض عينيها وبتقول: لقيتها ريتاچ صحبتي ممكن اروحلها واعرفها اني اتسرقت وبقيت في الشارع وهيا أكيد هتخليني عندها..!
وقفت داليدا بعدما قالت الكلام دا لنفسها واول ما مشيت خطوتين وقفت وهيا بتقول بصدمة :بس ريتاچ لسا متجوزة جديد وطبعا مش هينفع اروحلها خالص؟؟
رجعت داليدا تاني وقعدت وهيا بتفكر في اي حد تاني تعرفه لحدما اخدت قرارها ومشيت..!
وبداخل ملهي ليلي مجموعة بنات قعدين مع بعض وبيتكلموا علي شخص واقف قصادهم علي البار !
واحده منهم قالت بسُكر :بس الباشا واضح ان في حد مزعلة النهارده ايه رأيكوا نروح ونفرفشة!!
بنت تانيه ردت عليها بضحكه خبيثة وقالت:بس انتي عارفه انه غشيم واخر مره كنت هموت في ايديه بس حق ربنا هو يستاهل المغامره !!
صاحبتها التانيه ضحكت وهيا بتقف وبتقول:انجزوا يا بنات قبل ما يمشي لان واضح فعلا انه متضايق!!
ضحكوا كلهم وقاموا وقربوا عليه وهما بيتمايلوا علي نغمات الموسيقي وواحده قربت عليه وقالت وهيا بتحط ايديها علي وشه :حازم باشا مالك متضايق ليه !!
الشخص دا بصلها بضيق وقال:مليش مزاج يا ليلي خدي اخواتك دول وامشوا من قدامي !!
ليلي رفعت حاجبها وهيا بتقول:بس انت عارف بنحبك قد ايه ولما لاحظنا انك متضايق جينا علي طول علشان نخرجك من المود ونفرفشك!!
البنات ضحكوا علي كلامها وهو بصلهم بضيق وكسر الكاس اللي كان ماسكه وقال بغضب :قولتلكوا مليش مزاج ؟؟
قال كلامه ومشي وهما فضلوا باصين عليه وبيضحكوا وبعدها ليلي بصتلهم وقالت :ملكوش نصيب في الليله دي يبنات يلا كل واحده تروح تصتادلها عريس وتطلع بيه علي فوق!!
البنات هزوا راسهم ومشيوا من قدامها وليلي فضلت تبص حواليها لحدما شافت شاب كان واضح انه سكران خالص فقربت منه وفضلت تتمايل بجسمها قدامه لحدما الشاب دا قرب منها وهوا بيبص لجس'مها بابتسامه وبيقول'فاضي ولا مشغول زي العادة!
ليلي ضحكت وهيا بتحط ايديها علي رقبته وبتشده عليها وبتقول:حتي لو مشغولة علشان عيونك أفضالك!
الشاب ضحك وبدأ يقرب منها وهيا استسلمت ليه بكل سهولة وسابته يمس'ك جسمها!!
وفي الخارج ركب الشخص دا عربيته وهوا متعصب وساقها وهو بيقول بغضب:صنف واحد وعمركم مهتتغيروا !!
وعند داليدا كانت ماشيه بتعب وهيا مقررة هتروح لواحدة جارتهم كانت سابت العمارة من كام سنه وقاعده حاليا في بيت بنتها بعدما اتجوزت واحد غني وكان البيت دا بعيد شويه عن المكان اللي داليدا عايشة فيه !!
داليدا فضلت ماشيه ساعه متواصلة لحدما قربت من البيت وفي الوقت دا قربت عربية منها وكانت ماشيه علي سرعه عالية !!
داليدا من الصدمة وقفت مكانها والشخص اللي كان سايق العربيه قدر يسيطر عليها ووقفها قبل ما يخبط داليدا بمسافه صغيرة!!
داليدا فتحت عينيها بعدما إستوعبت انها لسا عايشه وبصت للشخص اللي في العربيه دا بغضب وقالت:مش تحاسب يا متهور انت كنت هتموتني!!
خرج الشخص دا من العربيه وهو بيبص للبنت اللي قدامه وبيقول بزعيق وصوت عالي:انا برضوا اللي احاسب والا انتي الي ماشيه سرحانه!!
داليدا اتضايقت من كلامه ومشيت وسابته من غير مترد عليه وقربت من البيوت اللي موجوده وهيا بتقرأ الأسامي اللي موجوده علي البوابه وفضل الشخص دا باصص عليها باستغراب وهو مش مصدق ان فيه بنات بالشكل دا!!
داليدا وقفت قدام بيت وكان مكتوب علي اسمه (فيلا أسر السيناوي) داليدا قرأت الإسم وهيا بتغمض عينيها علشان تتأكد انه يبق نفس الاسم اللي جارتهم قالتلها عليه وبعد كام دقيقه من التفكير هزت راسها وهيا بتقول:ايوا دا نفس الاسم!
الشخص دا قرب منها لما لقاها بتقرب من بيته وقال بغضب:انتي رايحه فين اقفي عندك انتي فكراها زريبة؟؟
داليدا اتعصبت من اسلوبه واتضايقت اكتر لما مسكها من دراعها ، شدت إيديها وبصتله بغضب وقالت:بقولك يا اسمك ايه انت أنا لا فايقالك ولا حتي عايزه اتخانق معاك فا سبني بق في حالي احسن !!
حازم رفع حاجبه باستغراب وقال:أسيبك في حالك !!
داليدا هزت راسها وقبل ما ترن الجرس هوا قرب من الباب وفتحه ودخل وهو بيبصلها وبيقول:أعتقد اني معرفش حد بالشكل دا وأكيد أنتي غلطانه في العنوان!!
قال كلامه وهو بيقفل الباب في وشها وسابها واقفه مصدومه!!
داليدا انتبهت لنفسها وبصت للمكان اللي هيا واقفه فيه وهي بتقول بحزن:هو دا اللي كان ناقص مهيا حياتي خلاص باظت مش هتوقف يعني علي الموقف دا!!
مشيت داليدا وهيا بتبص علي اسامي البيوت تاني لحدما رجعت لنفس البيت وهيا بتقول:أنا متأكدة ان هو دا نفس الاسم !!
رنت الجرس وهيا بتعدل هدومها وعدي ثاني والخادمة فتحت الباب!!
داليدا ابتسمت وهي بتقول:لو سمحتي هيا طنط أمنة او شريهان موجودين !
الخادمه بصت لداليدا باستغراب وقالت:حضرتك تقصدي شريهان هانم مرات أسر بيه؟
داليدا هزت راسها والخادمه ابتسمت وهيا بتقول:
اتفضلي يا انسه ايوا موجودين .
داليدا ابتسمت وهيا بتهز راسها ودخلت للبيت وهي بتبصله بإعجاب لان كان شكله جميل اوي وشبه اللي بيجوا في المسلسلات .
الخدامة ابتسمت لداليدا وقالت:اتفضلي اقعدي هنا وانا هبلغ المدام بوجودك أقولها مين!!
داليدا ابتسمت وهيا بتهز راسها وبتقول:داليدا قوليها كده وهيا هتعرفني.؛
الخادمه هزت راسها بابتسامه و مشيت من قدامها وفضلت داليدا قاعده علي الكرسي وهيا بتبص لكل ركن في البيت وهيا مبهوره بالتصميم بتاعه!
نزل حازم وهوا بيدور علي مفتاح عربيته اللي نساه علي الكرسي واول مشاف داليدا قال باستغراب:انتي دخلتي هنا ازاي !
داليدا بصتله بضيق وشاورت علي الباب وقالت:من هنا أكيد مش من جحر الفار يعني؟
حازم بصلها بغيظ وقال:معرفش ايه الناس قليلة الزوق دي أكيد انتي تبع شريهان نفس الشكل!!
داليدا كانت هترد عليه ولاكنها شافت شريهان نازله من علي السلم وهيا مبتسمه وبتقول:داليدا حبيبتي نورتي البيت ؟؟
داليدا بصتلها بابتسامه ووقفت وهيا بتستقبلها وبتقول: البيت منور بأصحابه!!
شريهان أبتسمت وقالت:عامله ايه وحشتيني اوي!!
داليدا ردت عليها بابتسامه وقالت"وانتي كمان وحشتيني اوي يا شريهان!!
شريهان ابتسمت وهيا بتبص لحازم وبتقول:حازم حمدلله علي السلامه!
حازم هز راسه وابتسم بضيق وشريهان بصت لداليدا وقالت:دا حازم اخو أسر جوزي .
داليدا بصتله وهيا بتهز راسها بضيق من تصرفه معاها من شويه وحازم كان بيبص لداليدا بسخريه وهيا اتضايقت من نظرته ليها فقالت وهي بتبص لشريهان : الظاهر ان جوزك شخص محترم علشان كده أخوه طالع شبهه!
شريهان ابتسمت علي كلامها ولاكن حازم اتضايق و بصلها بغيظ وسابهم ومشي وداليدا بصت لشريهان وهيا بتقول:أنا مش عارفه أجبهالك ازاي يا شريهان بس أنا حاليا بقيت في الشارع ؟؟
شريهان شهقت بخضة وهيا بتقول:ازاي يعني يا داليدا وشقتك راحت فين!
داليدا بصتلها بحزن وقالت:شنطتي اللي كان فيها مفتاح الشقه اتسرقت وانا للاسف بسيب النسخه التانيه جوه وانتي عارفه ان انا مليش حد ومعرفش غيرك انتي وطنط أمنه وعلشان كده جيت علي هنا!!
شريهان ضمت حاجبها بحزن وهيا بتقول:طبعا يا حبيتي انتي تنوري في اي وقت وكويس انك جيتي هنا يا داليدا احنا منعرفش برضوا ايه اللي كان ممكن يحصلك وانتي في الشارع!
داليدا هزت راسها بحزن وشريهان قالت:تعالي معايا يا داليدا هوريكي اوضتك اللي هتقعدي فيها!!
داليدا اتحرجت جدا وقالت:طيب هو انتي مش هتستأذني جوزك الاول !
شريهان ضحكت وهيا بتقول:أسر جوزي لا متقلقيش دا طيب جدا ولو كان هنا كان هيعمل نفس اللي هعملة!
داليدا بصتلها باستغراب وقالت:يعني هوا مش هنا!
شريهان ضحكت وهيا بتهز راسها وبتقول:أسر حبيبي مسافر عنده شغل وهيرجع بعد اسبوع والمفروض ان حازم اخوه كان معاه بس معرفش ايه اللي جابو بدري كده!!
داليدا ابتسمت وهيا بتبصلها وبتقول: متشكرة جدا يا شريهان انا والله مش عارفه أقولك ايه بس انا هبات النهارده بس وهمشي الصبح علي ما اجيب حد يفتحلي الباب!!
شريهان ابتسمت وهيا بتخبط علي ضهر داليدا وبتقول:والله يا داليدا انت هتونسيني انتي عارفه ماما مبتخرجش من اوضتها قد كده وبفضل انا وشي في وش الخدامه طول الوقت !
داليدا ابتسمت ليها وهيا بتقول:طيب هو انتي لسا مجبتش نونو!!
شريهان ابتسمت بحزن وهيا بتقول:جبت بس توفي بعد الولاده بيومين !
داليدا خبطت علي ضهرها وهيا بتقول" انا أسفه مكنتش اعرف والله !
شريهان ابتسمت وهيا بتحط ايديها علي كتف داليدا وبتقول:ولا يهمك يا حبيبتي ..شريهان فتحت باب اوضة من الواضح انها كانت مجهزة لطفل!
شريهان دخلت هيا وداليدا وقالت" تقدري ترتاحي براحتك اعتبري البيت بيتك يا داليدا!!
داليدا حض'نتها وهيا بتقول:شكرا يا شريهان انا والله مش عارفه اقولك ايه!
شريهان ابتسمت وهيا بتقول:شكرا ايه يا هبلة مفيش شكر بين الاخوات!
داليدا ابتسمت وشريهان قالت:هسيبك بق ترتاحي وهطلع انا اشوف ماما اللي نايمه من الصبح دي!
داليدا هزت راسها وابتسمت وشريهان خرجت من الاوضة وهيا بتقفل الباب وراها !!
وفي غرفة حازم كان نايم علي السرير وهو بيقول :مين دي وايه اللي جايبها هنا في الوقت دا!! قال كلامه باستغراب وافتكر رد فعلها لما كان هيخبطها وقد ايه تجاهلته ومردتش تنخانق معاه !
خرج من اوضته وهو مقرر يعرف مين دي وبتعمل ايه هنا!
اول ما خرج من اوضته لاحظ خروج شريهان من الاوضة اللي كانت مخصصة لطفلها اللي مات فقرب منها باستغراب وقال:بس غريبه يعني يا شريهان بتفتحي الاوضة اللي مقفول بقالها سنه!
شريهان ابتسمت وهيا بصاله وبتقول:ولا غريبه ولا حاجة دي داليدا صحبتي هتبات هنا النهارده علشان مفتاح بيتها ضاع وملهاش حد غيرنا !
حازم هز راسه وهوا بيقول:يا حرام صعبت عليا اوي!
شريهان هزت راسها وقالت:بعد ازنك يا حازم رايحه اشوف ماما!
حازم هز راسه وهو بيبص للاوضة وشريهان سابته ومشيت وهو رجع أوضته تاني وقرر يتجاهلها وميفكرش فيها ويفكر هيعمل ايه في خطيبته اللي كدبت عليه وفهمته انها نايمه وطلعت مسافره ومقضياها مع اصحابها!!
وفي قصر الصاوي وصلت الممرضة الي طلبها الدكتور علشان رعاية رشاد بيه!!
واحد من رجالة عمار وقفها وهو بيقول: انتي مين وبتعملي ايه هنا!!
البنت بصت للشخص دا بخوف لانه كان ماسك سلاح فقالت :انا دنيا الممرضة اللي طلبني دكتور هشام؟
الشخص دا بصلها من فوق لتحت وقال: تعالي معايا علشان تقابلي عمار بيه؟
دنيا هزت راسها ومشيت وراه وهيا خايفه لان القصر كله مليان رجاله مسلحين وشكلهم يخوف الشخص دا وقف قدام مكتب كبير وقال بصوته الخشن: ادخلي عمار بيه جوا !
دنيا هزت راسها ودخلت واول ما الحارث قفل الباب جسمها اتنفض وهيا بتبص للشخص اللي قاعد ومركز في اللاب توب اللي قدامه فقالت بصوت خايف:السلام عليكم أنا دنيا الممرضة اللي جايه تبع دكتور هشام!
عمار رفع عينيه وهوا بيبصلها وبيقول:تعالي أقعدي يا دنيا!
دنيا قربت من الكرسي وقعدت وهوا بصلها وقال:فين السي في بتاعك"
دنيا بصتله باستغراب وقالت:انا مش معايا السي في بس معايا بطاقتي الشخصيه !
عمار هز راسه وطلب منها البطاقه وهيا خرجت من شنطتها محفظتها وهيا بتطلع منها البطاقه وعمار كان مركز معاها فقالت بخجل:هيا بس مش راضيه تطلع بس انا هحاول تاني!
عمار مسك المحفطة من ايديها وطلع هوا البطاقه بتاعها واول مشال البطاقه لفت نظره صورة للدكتورة اللي هربت كانت واقفه جمب البنت اللي قاعده قدامه!
عمار خرج الصوره وهو بيبص للبنت اللي قدامه وبيقول:انتي تعرفي البنت دي!
دنيا بصت للصوره وهيا بتهز راسها بخوف وبتقول:أيوا دي دكتورة داليدا أيمن!
عمار هز راسه وهو بيقول:عارفة عنوانها فين!
دنيا بلعت ريقها بتوتر وهيا بصاله وهو كان مركز جدا مع عيونها ..دنيا هزت راسها وقالت:أيوا عارفه عنوانها...
عمار هز راسه ليها وادالها المحفظه وهو بينادي علي الراجل بتاعه اللي واقف برا واول ما الراجل دا دخل عمار بصله وقال:خد الممرضة لغرفة رشاد بيه!
دنيا قامت وبصت للشخص دا بتوتر وهو بصلها وقال باعجاب واضح في عيونه:اتفضلي يا استاذة!!
دنيا هزت راسها ومشيت معاه واول ما دخلت غرفة المريض اللي هتهتم بيه بدات تحضرله الحقنه اللي الدكتور بلغها تديهاله اول ما توصل والشخص دا فضل يبصلها ومبتسم وهيا قربت منه وقالت:لو سمحت مينفعش تفضل هنا علشان المريض بيتأثر بوجود الناس اللي حواليه وممكن دا يضايقه !!
الحارث هز راسه وقال:طيب بس لو احتاجتي اي حاجه انا واقف برا..
دنيا هزت راسها بابتسامه وهو بصلها من فوق لتحت للمرة التانيه وخرج!!
دنيا اول متأكدت انه خرج مسكت تيلفونها بسرعه وطلعت رقم داليدا واتصلت بيها وهيا مقرره تبلغها بسؤال الشخص دا عليها..يتبع بقلمي الكاتبة شيماء صبحي
تقريبا كده دنيا هتحاول تعمل خير ولاكن شكله هيقلب عليها🙂 تتوقعوا عمار هيرد علي دنيا ويطمنها ولا هيقفل السكة في وشها🤔
#الفصل_الرابع
#تحت_أمر_الحب
#الكاتبة_شيماء_صبحي
دنيا اول متأكدت انه خرج مسكت تيلفونها بسرعه وطلعت رقم داليدا واتصلت عليها وهيا مقرره تبلغها بسؤال الشخص دا عليها لان من نظراته حست ان في خطر علي حياتها..
وفي أوضة عمار تيلفون الدكتورة داليدا رن ..
عمار خرج التيلفون من جيبه وهو بيبص للرقم اللي بيتصل بإستغراب لأنه مكنش متسجل فمسك التيلفون وفتح المكالمه وهو مستني اللي بيتصل يتكلم ..اتكلم رجل الآمن اللي في محطة القطر وهو بيقول:السلام عليكم يا بنتي!
عمار بعد التيلفون باستغراب وهو بيبص للرقم تاني وبعدها رجع حط التيلفون علي ودنه وقال:وعليكم السلام مين حضرتك!
رجل الآمن قال بتساؤل :مش دا رقم داليدا أيمن!!
عمار افتكر اسم داليدا فرد عليه وقال:أيوا مين حضرتك!
رجل الآمن ابتسم وهو بيقول:شنطة الاستاذة داليدا اللي اتسرقت من ساعتين هنا في المحطة قدرنا نرجعها تاني ونمسك الولد اللي سرقها ف لو هيا تقدر تجي تاخدها دلوقت من المحطة يبق أحسن ليها قبل ما أمشي !!
عمار هز راسه وقال:محطة ايه دي!!
رجل الأمن قال:سكة حديد مدينة القاهرة
عمار هز راسه وقال:طيب انا هاجي انا اخدها بنفسي دقايق وهكون عندك!!
رجل الامن رد عليه وقال:طيب يا ابني مع السلامه!!
عمار قفل المكالمه وهو بيبص لصورتها وبيقول:كنتي بتهربي ولا إيه يا دكتورة!!
قال كلامه ووقف وهو بياخد مفتاح عربيته وبيخرج من المكتب!!
وعند دنيا كانت بتتصل بداليدا ولاكن الرقم مشغول قفلت التيلفون بقلق وهيا بتقول:يارب تكوني كويسه يا دكتوره !!
رشاد فتح عينيه وهو بيبص للبنت اللي واقفه وبتكلم نفسها فقال بصوت ضعيف:عايز اشرب مايه!!
دنيا إنتبهت ليه وهيا مخضوضه وبتقول:هو حضرتك صاحي!
رشاد بصلها وهز راسه بتعب وهيا قالت:طيب محتاج حاجة!
رشاد هز راسه وقال:عايز أشرب ماية ؟
دنيا هزت راسها وفضلت تبص حواليها علشان تشوف لو في ماية ولاكنها ملقتش فبصت لرشاد وقالت:مفيش مايه هنا وانا معرفش حاجة هنا أجبلك منين!!
رشاد هز راسه وشاورلها بعينه علي درج موجود وهيا لما فهمت قصده راحت عند الدرج ووقتها لقت ازايز كتير شكلها شبه المايه دنيا خرجت واحده منهم وفتحتها وصبت شويه في كوبايه وقربت من رشاد وهيا بتقول:أنا جبتلك الماية اهي!
رشاد هز راسه وطلب منها تساعده وهيا قربت منه بهدوء وبدات تشربه من الكوبايه!
رشاد اول ما شرب رشفه بصلها بصدمه وهو بيقول:جيبالي ويسكي عايزه تموتيني يا غبيه!!
دنيا شهقت بخضه وهيا بتقول:يعني ايه ويسكي مش انت اللي شاورتيلي علي الدرج!!
عمار بصلها بغضب وقال:انا مشاورتلكيش علي حاجه انا كنت ببص عادي بس الظاهر انك بتحبي تشغلي دماغك كتير!!
دنيا خافت منه وشالت ايديها اللي سانداله بيها ضهره وبعدت عنه ورشاد مقدرش يمسك نفسه وجسمه رجع علي السرير واتوجع!!
رشاد بصلها وهيا كانت بصاله وخايفه وكانت لسا ماسكة الكوبايه!!
دنيا كانت هتعيط من الرعب اللي هيا عايشة فيه فقربت منه وقالت بخوف:هو انت ممكن تقتلني علشان شربتك ويسكي!
رشاد بصلها بتعب ولف وشه ومردش عليها وهيا رمت كاس الويسكي بسرعه في باسكت الزباله ورجعت تاني وهيا بتقول:خلاص هدورلك علي ماية بس متقتلنيش!!
رشاد غمض عينيه من التعب وهيا خرجت برا الاوضة وهيا بتقول للحارس اللي واقف برا:لو سمحت المريض محتاج مايه؟
الحارس بصلها بسخريه وقال:مكسوفة تقولي انك عطشانة ولا اية!!
دنيا بصتله باستغراب وقالت:لا والله انا مش عطشانه بس المريض هو اللي طلب مني ماية!
الحارس بصلها بسخريه ودخل وهو بيبص علي رشاد ولقاه نايم فبصلها وقال:واضح ان الباشا كان عطشان اوي!!
دنيا بصت للمريض ولقته نايم فعلا فبصت للحارس بخجل وهو هز راسه ليها وقال:ادخلي وانا هجبلك الماية!
دنيا هزت راسها ودخلت تاني لأوضة رشاد والحارس قفل عليهم الباب ونزل يجيبلها ماية!!
وفي محطة القطر وصل عمار وهوا بيدور علي رجل الآمن اللي اتصل عليه فقرب من واحد كان واقف وشايل شنطة وقال: انا جاي أخد شنطة داليدا!!
رجل الأمن هز راسه وهو بيقول بابتسامة:حضرتك جوزها!
عمار بصله باستغراب وسكت للحظة ورجل الأمن قرب منه الشنطة وقال:شكلها كان تعبان جدا وقتها وعلشان كده انا بلغت الحكومه علي طول وقدروا يمسكوا الولد دا في محطة قريبه من هنا !
عمار هز راسه وهو بياخد الشنطة وبيقول:شكرا لمجهودك الكبير !
عمار طلع مبلغ كبير من جيبه واداهوله وهو بيقول:هيا المدام لما شنتطها اتسرقت سابت رقمها بس!!
رجل الامن بص لعمار بابتسامه وقال:لا يباشا سابت عنوانها كمان!
عمار هز راسه وقال:طيب هات الورقة اللي كتب فيها رقمها وعنوانها !
رجل الامن بصله باستغراب ولاكن لما بص للفلوس اللي اخدها منه طلع الورقة اللي داليدا كانت كاتبه فيها عنوانها ورقم تيلفونها وادهاله!!
عمار بصله وهو بيقول:انا ابق جوزها وطبعا انت كنت هترمي الورقة وانا مش عارف مين ممكن يلاقيها وياخد الرقم او يعرف العنوان!
رجل الأمن هز راسه وقال: حضرتك ونعم الرجوله ربنا يصلح حالكم يباشا!
عمار هز راسه وخرج من المحطة وركب عربيته وهو بيبص لشنطتها باستغراب وهو بيقول:شكلها كانت بتهرب فعلا؟
ركب عربيته واتحرك بيها للقصر لان الوقت إتاخر وأول ما وصل لقي الحراس نامو وفي كام واحد بس اللي صاحين ،عمار دخل لاوضته بتعب وحط شنطة داليدا علي الكرسي وفرد جسمة علي السرير وغمض عينيه بتعب لأن اليوم النهاردة كان طويل ومرهق…
وفي غرفة رشاد دنيا ادتله اخر حقنه وهوا كان نايم فبصتله بنوم وهيا بتقول:طيب أنا هنام فين دلوقت علي الارض مثلا!
قالت كلامها وهيا بتدور علي اي حاجة تفرشها علي الارض فقربت من خزنه كبيرة وضغطت علي زرار موجود فيها ووقتها الباب اتفتح ونزل منه سرير جاهز بالفرشة بتاعته!!
دنيا ابتسمت وهيا بتقول:دا الي بيسموة التقدم التكنولوجي..!
قالت كلامها وهيا بتنام علي السرير ولاكنها اول ما رفعت رجليها من علي الارض السرير اتقفل بسرعه وحبسها جوا الخزانه لانها مضغطتش علي زرار تثبيت السرير..!
فضلت دنيا تصرخ ولاكن الخزانه كانت عازله للصوت فبصت حواليها بخوف لانها بتخاف من الضلمة وفضلت تتخيل حجات مخيفة لحدما فقدت وعيها!!!
في صباح يوم جديد ..صحيت داليدا وهي بتبص حواليها بصدمة وبتقول..:أنا فين!!
فضلت تبص علي الاوضة اللي كلها رسومات أطفال ودباديب موجوده في كل ركن وبتحاول تفتكر المكان لحدما افتكرت انها في بيت شريهان جارتهم!
داليدا قامت من علي السرير بتعب وهيا بتحط ايديها علي دماغها وبتقول:يا تري هرجع الشقه ولا هعمل ايه في حياتي اللي باظت دي!
قربت من الحمام اللي موجود في الأوضة وغسلت وشها وهيا بتفتكر كل حاجة حصلتلها من وقت ما دخلت هيا ومسعد الأوضة لحدما جت هنا البيت دا!!
شريهان كانت قاعده مع مامتها في الصالون وبتعرفها ان داليدا بنت جارتهم موجوده هنا في البيت !
أمنه والدة شريهان اتصدمت وسألتها باستغراب:وهيا داليدا عرفت عنوانك منين!
شريهان هزت راسها وقالت:انا كنت مديالها العنوان علشان لو حبت تزورني ولا حاجة!
أمنة هزت راسها بقلق وقالت:بس هيا مينفعش تفضل هنا كتير يا شريهان انتي ناسيه ان حازم اخو جوزك هنا واحنا عارفين انه مش كويس وممكن بعد الشر يعمل فيها حاجة!!
شريهان غمضت عينيها برفض وقالت:لا يا ماما ايه الكلام اللي بتقوليه دا حازم اتغير عن الاول وبعدين انتي ناسيه انه خاطب!!
أمنه هزت راسها وقالت وهيا بتخبط علي رجل بنتها:انتي ادري يا شريهان بس انا بعرفك الصح من الغلط!!
شريهان هزت راسها وقالت:متقلقيش يا ماما داليدا قايلالي انها هتقعد يوم واحد بس وبعدين مش من الزوق اني اقولها تمشي احنا ولاد أصول برضوا!
أمنة بصت لبنتها وعملت حركة بشافيفها وقالت:والله انتي بت غلبانه ومش عارفه حاجة دي مش بعيد تكون جايه تخطف منك جوزك !
شريهان بصت لأمها بصدمة وقالت:تخطف جوزي ازاي يعني ياماما دي داليدا محترمة وانتي اكتر واحدة عارفه كدة!
أمنه رفعت حاجبها وهيا بتلف وشها وبتبص علي داليدا اللي نازله وبتقول:اهي جت علي السيرة'
شريهان رفعت عينيها وهيا بتبص لداليدا وبتقكر في كلام امها لحدما داليدا قربت منها وقالت بابتسامة:انا متشكرة اوي يا شريهان علي وقفتك معايا وعلشان متقلش عليكوا انا همشي علشان شغلي!
شريهان وقفت وهيا بتبص لامها وبتقول: ايه يا داليدا ايه اللي بتقوليه دا البيت بيتك يا حبيبتي وتنوري علي طول !
داليدا ابتسمت وهيا بتبص لأمنة وبتقول:إزاي حضرتك يا طنط أمنة!
أمنة هزت راسها وهيا بتقول:كويسة يا حبيبتي انتي عاملة ايه!
داليدا ابتسمت وهيا بتقول :انا الحمدلله بخير !!
أمنه بصت لبنتها وبرقتلها وشريهان قالت:ما تستني تفطري معانا يا داليدا !
داليدا ابتسمت وهيا بتهز راسها وبتقول:متحرمش منك يا حبيبتي بس والله انا مستعجله علشان الحق اغير الكالون بالمرة قبل ما اروح الشغل!
شريهان هزت راسها وسلمت عليها وهيا بتقول:خلاص يا حبيبتي اللي تشوفيه اهم حاجه متحرميناش من شوفتك الحلوة دي!!
داليدا ابتسمت وهيا بتقول:حاضر يا حبيبتي !
شريهان إبتسمت وداليدا قربت من أمنة سلمت عليها وبعدها مشيت مع شريهان لحدما خرجت البيت وقالت:مع السلامه يا شريهان مش محتاجة اي حاجة!
شريهان إيتسمت وهيا بتهز راسها وبتقول:سلامتك يا حبيبتي !
داليدا ابتسمت ليها وسابتها ومشيت وبعد ما بعدت عن البيت شريهان دخلت وهيا بتقول لمامتها بحزن:ليه كده يا ماما داليدا بنت محترمة والله انا كنت عايزاها تفضل معانا شويه كمان !
أمنه وقفت وهيا بتقول لبنتها:الي عملتيه دا هو الصح دي غريبه عننا وكفايا اوي اللي احنا عملناه معاها!
شريهان بصت لأمها بحزن وسابتها ودخلت للمطبخ!
وعند داليدا طلعت الفلوس اللي معاهع
ا ولقت انهم ١٥٠ جنيه ابتسمت وهي بتقول:حلوين اوي يا دوبك اجيب فطار وبعدها اروح المحطة واشوف عملو ايه مع الحرامي اللي سرق الشنطة!
قالت كلامها وهيا بتوقف تاكسي علشان يوصلها للمحطة وبعد طريق مش كبير وصلت داليدا للمحطة نزلت من التاكسي بعدما حاسبت السواق وقربت من مطعم صغير و اشترت اكل علشان تفطر لانها مأكلتش حاجة من امبارح !!
بقلمي شيماء صبحي
صاحب المطعم ادالها الاكل وداليدا اخدته ومشيت وهيا بتقرب من كرسي فاضي وقعد عليه وبدات تاكل بجوع لانها بذلت مجهود كبير امبارح من غير اكل !!
فضلت داليدا تبص حواليها وهيا بتفكر هتعمل ايه بعدما بقت في الشارع هل هترجع بيتها ولا هتروح المستشفي بس اللي كان مخوفها هو الشخص الغريب اللي طلب منها الجواز وانه ممكن يظهر في اي وقت!؟؟؟
في قصر الصاوي صحي عمار من النوم علي صوت رنه تيلفونه وكان المتصل المساعد بتاعه!!
عمار فتح المكالمة وهو بيقول بتساؤل:خير يا رضا !!
رضا المساعد بتاعه قال بجدية:عمار بيه حضرتك لازم تيجي الشركة لان الوفد الألماني هيوصل بعد ساعة من دلوقت والآنسة نيلي مش موجودة ولما بعتلها السكرتيرة للبيت لقت انها مش موجوده ولسا حالا بعتالنا رساله انها في شرم الشيخ بتغير جو رغم انها عارفه ان في وفد جاي وهيا اللي هتستقبلهم !!
عمار هز راسه وقال:طيب يا رضا انا هلبس وجايلك بس ابعت ل نيلي رساله ان مخصوم من مرتبها ٤ شهور علشان الاستهتار اللي هيا فيه !
رضا هز راسه بابتسامه وقال:حاضر يا عمار بيه !
عمار قفل المكالمة مع رضا وقام دخل الحمام واخد شاور سريع وبعدما خلص خرج وهوا لافف الفوطة علي وسطه وبينشف شعره !! وهو واقف قدام المراية لفت نظرة شنطة الدكتورة داليدا اللي كانت علي السرير !!
عمار قرب من الشنطة فتحها وهو بيبص للحجات اللي موجودة فيها باستغراب !
داليدا كانت حاطة في الشنطة مقص وسكينه وبكرة خيط وابرة ودِرسين وهدوم داخليه واخر حاجة المحفظة بتاعها!!
عمار ساب الشنطة ودخل غرفة تبديل الملابس ولبس بدلة سودا وبعدها خرج!!
بص علي الشنطة بصه اخيره وقبل ما يخرج سمع صوت حاجة بتقع علي الارض بص علي شنظتها ولفت نظرة المفتاح اللي واقع !!
قرب منه وهو بيمسكه وبيقول:ودا مفتاح ايه بق !!
فضل يبص للمفتاح شويه وبعدها خرج من اوضته واتجه لغرفة رشاد اخوه علشان يطمن عليه قبل ما يمشي!
اول ما دخل لقي رشاد صاحي وكان بيبص حواليه ..عمار قرب منه وهو بيقول بتساؤل:فين الممرضة اللي كانت معاك؟
رشاد بصله باستغراب وقال:مش عارف انا اخر مرة شوفتها امبارح وكانت واقفه مكانك كده !
عمار فضل يبص علي كل ركن في الاوضة باستغراب لحدما سمع صوت جاي من خازنه السرير المخفي!
عمار بص لرشاد وقال:معقوله السرير يكون قفل وهيا نايمة عليه !
رشاد هز راسه وقال:اكيد دي بنت غبيه وتلاقيها كانت نايمة عليه ونسيت تضغط علي زرار التثبيت فقفل واخدها معاه!
عمار استغرب كلامه وقرب من الخزنه وضغط علي زرار الفتح واول ما السرير اتفرد لقي دنيا نايمه عليه وهيا خايفة!
عمار بص لأخوه ورشاد قال:مش بقولك غبيه!
عمار قرب منها وقال:انت يبتعملي ايه هنا!
دنيا انتبهت علي صوته وفتحت عينيها بخوف وقالت:السرير قفل ودخلني جوا هنا!
عمار قرب منها ومسك ايديها وقال:قومي علشان تدي العلاج لرشاد!
دنيا استغربته وقالت:مش هتسألني انا كويسه ولا لأ!
عمار بصلها بغضب وهيا قامت بسرعه وهيا بتقرب من رشاد وبتقول:صباح الخير يا فندم!
رشاد بصلها بسخرية وقال:عايز اشرب!
دنيا بصتله باستغراب وقالت بهمس:هو الرد عيب ولا ايه !!
عمار بص لاخوه وقال:انا خارج يا رشاد واحتمال كبير اتاخر فلو احتاجت اي حاجة معاك دنيا !
رشاد بصله وهز راسه وعمار سابه وخرج ودنيا اول ما لقت عمار خرج قربت من رشاد وقالت بحزن:انت مقولتليش ليه ان السرير دا بيقفل انت مش عارف اني بخاف من الضلمة!
رشاد رفع حاجبة باستغراب وقال:انا لسا شايفك امبارح بس هعرف منين!
دنيا هزت راسها بتفهم وقالت:طيب هو انت فاكر ايه اللي حصل امبارح !!
رشاد هز راسه بالرفض وهيا ابتسمت وهيا بتقول:طيب انا هجهزلك الحقنه علشان ترتاح!
رشاد بصلها بخوف وقال:هرتاح ازاي يعني !
دنيا ضحكت وهيا بتقول:انت فهمت ايه قصدي انا قصدي الحقنه المسكنه هتخفف من الوجع يعني !
رشاد ابتسم علي ضحكتها وهز راسه وهيا قربت من الحقنه وبدات تجهزها!!!
وفي محطة القطر داليدا خلصت اكل وهيا بتبص علي المحطة وبتقول:يارب يكونوا رجعو الشنطة!!
قالت كلامها وهيا بتتحرك في اتجاه سلم المحطة واول ما دخلت قربت من نفس الشخص اللي اشترت منه التذكرة امبارح وقالت:لو سمحت انا اللي شنطتي اتسرقت امبارح ممكن اعرف لقيتوها ولا لسا!
الشخص دا رد عليها وقال:مش عارف يا استاذه روحي لعمي محسن هو اللي يعرف!
داليدا بصت علي الشخص اللي بيشاور عليه وابتسمت لانه نفس الراجل اللي ساعدها امبارح!
داليدا قربت منه بحماس وقالت: السلام عليكم انا داليدا اللي شنطتي اتسرقت امبارح ممكن اعرف لقيتوها ولا لسا!
رجل الامن بصلها باستغراب وقال:وعليكم السلام يا بنتي ..ايوا احنا مسكنا الحرامي وجبناها بس الشنطة جوزك جه واخدها امبارح!!
داليدا اتصدمت من كلامة وهيا بتقول:جوزي مين!
رجل الامن بصلها باستغراب وقال:جوزك يا بنتي هو اللي رد عليا امبارح اما اتصلت عليكي وجه هنا اخد الشنطة وحتي ادالي فلوس كتير اوي !
داليدا بلعت ريقها بخوف وهيا بتقول:ممكن توصفهولي كده علشان اتاكد لو هو او واحد تاني!
رجل الامن ابتسمت وهو بيقول:هو شاب طويل وعريض شويه يعني جسمة رياضي وكان لابس بدلة سودا !!
داليدا قلبها خفق بخوف وهيا بتقول: وعيونه لونها اسود!
رجل الامن هز راسه وقال:تقريبا!
داليدا بصتله بحزن وقالت:هو انا ليه بيحصل معايا كدة!
رجل الامن بصلها باستغراب وقال:ايه اللي بيحصل يبنتي!
داليدا بصتله وهيا بتقول:ولا حاجة شكرا اوي يا عمو!
رجل الامن ابتسم وقال:العفو يا بنتي علي ايه بس انا عايز اقولك ربنا يخليكوا لبعض لان جوزك ونعم الرجولة!
داليدا بصتله باستغراب وقالت:ليه بتقول كدة!
رجل الامن اتكلم وقال :أصله انبارح اخد الورقة اللي انتي سبتيها وقالي انه بيغير عليكي وخايف اني لما ارمي الورقة حد يلقيها ويعرف عنوانك..!
#الفصل_الخامس
#تحت_أمر_الحب
#الكاتبة_شيماء_صبحي
امبارح اخد الورقة اللي انتي سبتيها وقالي انه بيغير عليكي وخايف اني لما ارمي الورقة حد يلقيها ويعرف عنوانك..!
داليدا بصت لرجل الأمن بخضة أكتر وقالت:اخد الورقة !
رجل الآمن هز راسه وهو باصص عليها باستغراب وقال:هو مش جوزك يا بنتي ولا انا اديت الشنطة لحد غريب.
داليدا كانت سرحانه وبتفكر في الكلام اللي قالة رجل الأمن ولاكنها انتبهت لما سمعت كلامة تاني فقالت:لا جوزي انا أسفة اني عطلتك !
الراجل ابتسم وهو بيقول:لا عطلتيني ايه بس دا خير جوزك مغرقني !
داليدا اضايقت من كلمة جوزك فابتسمت ليه وقالت:طيب شكرا اوي يا عمو علي وقفتك جمبي انا لازم امشي انا بق!
رجل الأمن ابتسم وهز راسه وقال:مع ألف سلامة يا بنتي وابقي سلميلي علي الباشا!
داليدا مشيت من قدامة بسرعه وخرجت من المحطة وهيا مرعوبة لان الشخص المجهول دا بق عارف عنها كل حاجة ودلوقت معاه موبايلها وشنطتها اللي فيها حاجتها ومفتاح الشقة!
داليدا وقفت في الشارع وهيا بتفكر هتروح فين !!
و بعد وقت من التفكير قررت انها ترجع شقتها تاني واللي يحصل يحصل لانها مش هتقدر تروح عند حد تاني وتسمع الكلام اللي سمعته من ام شريهان عليها!!
مشيت داليدا وهيا حزينه لانها اول مرة تتعرض لحاجة زي كدة واول مرة تحس بمعني المسؤلية من بعد ما باباها توفي وهيا أصبحت مستهترة وبتتعامل مع اي حاجة ببرود ولاكن موقفها دلوقتي مش محتاج اي استهتار ولازم تنهي اللي بيحصلها دا؟؟
بعد مرور نص ساعة وصلت داليدا قدام العمارة اللي فيها شقتها ..فضلت تفرك في ايديها بتوتر لان الموضوع فعلا مرعب ..قررت انها تطلع شقتها وتحاول تفتح الباب واول ما دخلت العمارة سمعه صوت دوشة جاي من فوق..استغربت جدا وقررت تجري بسرعه وتشوف ايه اللي بيحصل ..
كان في شاب ومامته واقفين قدام شقتها وبينادو عليها بقلق..
داليدا بصت عليهم باستغراب وقربت منهم وهيا بتقول:هو ايه اللي بيحصل هنا!
الشاب دا ومامته بصوا لداليدا بفرحة وقالوا:داليدا انتي كنتي فين كل دا!
داليدا بصتلهم براحة وهيا بتقول:كنت بايته عند واحدة صاحبتي لان مفتاح شقتي ضاع وكان الوقت متاخر فمردتش اقلقكم!
الست قربت منها وقالت:ليه كده يا حبيبتي طيب كنتي رني عليا حتي وانا عينيا ليكي كنت هصحيلك سيد ابني يحللك المشكلة!
داليدا بصت لسيد اللي واقف جمبها وعيونه منزلتش من عليها فقالت بشكر:متحرمش منكم ابدا انا عارفة والله يا ام سيد انك ست جدعه بس انا وقتها دا اللي جه في دماغي بس حصل خير!
ام سيد ابتسمت وقالت:طيب انتي هتعملي اي دلوقت يا بنتي !
داليدا بصتلها باستغراب وقالت:هعمل ايه في ايه!
ام سيد شاورت علي الباب وقالت:هتفتحي الباب ازاي!
داليدا بصت علي الباب بخوف ورجعت بصت لام سيد وقالت:مش عارفة!
سيد كان مركز مع ملامح داليدا وباصصلها بحب ولما لقاها متضايقة انها مش عارفة هتفتح الباب فقال بابتسامة :انا هفتحلك الباب!
ام سيد بصت لابنها باستغراب وقالت:وهتفتحة ازاي يا ذكي وهيا بتقولك المفتاح ضاع!
سيد بص لامه وقال :بالمفك يا اما انتي ناسية اني نجار ولا ايه !
داليدا بصت لسيد وابتسمت وقالت:ايوا يا سيد والنبي افتحة بسرعه!
سيد بص لداليدا وابتسم وقام بسرعه دخل شقتهم المجاورة وخرج بعد ثواني وهو ماسك المفك!
داليدا ابتسمت وسيد بدأ يفتح الباب وبعد دقايق قدر انه يفتحه!
ام سيد بصت لابنها بصدمة وقالت:انا اشك انك حرامي يا سيد!
سيد ضحك وداليدا بصتله وقالت بشكر:انا متشكرة اوي يا سيد والله ماعارفة اقولك ايه!
سيد ابتسم بحب وقال:متقوليش حاجة يا دكتورة دا وجبي مش اكتر!
داليدا ابتسمت وهيا بتبصلهم وبتقول:انا هدخل علشان ارتاح شويه واما اصحي هبق اكلمك يا ام سيد!
ام سيد بصت لداليدا وهزت راسها وقالت:ماشي يا حبيبتي اتفضلي وانت يا سيد يلا روح علي شغلك!
سيد هز راسه ونزل وداليدا دخلت شقتها وقفلت علي نفسها الباب!!
وفي شركة عمار كان قاعد في مكتبة بعد انتهاء صفقة الوفد الألماني وكان ماسك في ايديه المفتاح وبيبصله وهو بيفكر في داليدا ولية بتحاول تهرب منه رغم انه معملهاش حاجة لحد دلوقتي .
فتح تيلفونها وهو بيبص فيه علي صورتها وابتسم وهو بيقول:الظاهر ان الدكتورة مروحتش بيتها من امبارح !
في بيت داليدا كانت بتبص علي كل حاجة في الشقة بتفحص واستغربت اوي ان الشقة سليمة رغم ان الشخص دا المفروض عرف عنوانها. داليدا قربت من السرير بتاعها بتعب وفردت جسمها عليه وهيا بتقول:النوم في بيت شريهان كان متعب اوي..
قالت كلامها وهيا بتغمض عينيها بتعب وبعد وقت نامت..
وفي مكتب عمار كان واقف وهو بيجهز نفسه علشان هيخرج وكان مقرر انه هيروح شقة الدكتورة علشان يفكرها بالاتفاق اللي بينهم!
السكرتيرة بتاعت عمار كانت واقفه وهيا بتقول:حضرتك خارج يا مستر عمار.
عمارهز راسه وهيا قربت منه وقالت:تحب اعدل لحضرتك البدلة!
عمار بصلها وهز راسه برفض وقال:شكرا !
السكرتيره بصت في الارض بخجل وعمار سابها وخرج !!
ركب عربيته واتجة بيها لبيت الدكتورة وكان بيبص لصورتها كل شوية ويبتسم!
وصل عمار بعد وقت مش كبير قدام عمارة من اللي موجودين .خرج من عربيته وهو بيبص حواليه وبيشوف رقم العمارة اللي مكتوب في الورقة لحدما لقي الرقم علي العمارة اللي واقف قدامها اتحرك لجوة وهوا بيبص لارقام الشقق لحدما وصل عند الشقة اللي مكتوب عليها ٧ خرج من جيبة المفتاح اللي كان معاه وفتح بيه الباب واول ما دخل لقي الشقة فاضيه!
ابتسم لان عندة حق وان داليدا بايته برا البيت فضل يمشي في الشقة وهو بيتفرج علي كل ركن فيها لحدما وصل عند اوضتها وقبل ما يفتح الباب لقي الباب بيخبط..؟
يتبع بقلمي شيماء صبحي
الفصل السادس والسابع والثامن والتاسع والعاشر من هنا
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق