القائمة الرئيسية

الصفحات

الأخبار[LastPost]

رواية عشق الصخر الفصل الاول والثاني والثالث والرابع والخامس والسادس والسابع بقلم اسماعيل موسي حصريه وجديده

 رواية عشق الصخر الفصل الاول والثاني والثالث والرابع والخامس والسادس والسابع بقلم اسماعيل موسي حصريه وجديده 

رواية عشق الصخر الفصل الاول والثاني والثالث والرابع والخامس والسادس والسابع بقلم اسماعيل موسي حصريه وجديده

كنت قاعده جنب جوزى بنتفرج على فيلم، وكان واخدنى فى حضنه فجأه تليفونه رن برساله، التليفون كان على الطاوله مد ايده ومسك التليفون فصل النت ووضعه فى جيبه، انا بحبه جدا ومش بشك فيه بس مش عارفه ليه مستريحتش للحركه دى وافتكرت كلام والدتى إلى مكنتش موافقه على جوازى وهى بتقول الرجاله ملهموش امان

بعد دقايق جوزى سبنى وطلع على البلكونه قعد دقيقه ورجع تانى ولاحظت ان وشه متغير

بقوله فيه حاجه؟

قال لا

قلت بتردد ان وصلتك رساله؟

من غير ما يبصلى قال دى رساله من الشركه عشان الباقه قربت تخلص


لأول مره قلبى يتخض وجسمى يرتعش، الرساله كانت على الواتس ان عارفه ده كويس

ولقتنى ببصله بذهول وباخد بعضى على اوضتى محاولتش اتكلم معاه ولا حاجه وتوقعت انه هيدخل الاوضه ورايا يشوفنى زعلانه ليه وكان باب الاوضه مفتوح 


لكن فضل فى الصاله بيبحلق فى التليفون بشرود، مقدرتش امسك نفسى استنيت شويه، جوزى دخل الحمام، خرجت ومسكت التليفون، اتصدمت لما لقيته مغير الرمز السرى

طول عمرى بحاول احل مشاكلى بهدوء، سبت التليفون ودخلت نمت وبحثت خلال النت عن برامج تعرفنى الرقم السرى، عرفت الطريقه واستنيت الصبح يجى بسرعه فى الوقت إلى جوزى هيكون فيه مشغول بالفطار وتغير هدومه هفتح التليفون، وحصت كل حاجه زى ما خططت ليها فتحت تليفون جوزى وشفت الصور الى مبعوته ليه والكلام إلى مكتوب

#عشق_الصخر


                  ٢


اول ما قرأت كلام الحب إلى مكتوب وصور البنت الى مبعوته لجوزى، حسيت قلبى انقلع من مكانه، دماغى لفت بيا وصرخت ادهم انت بت ____ مكملتش الكلمه وفقدت وعيى، الحب إلى كان جوايا لادهم انهد فوق دماغى ومقدرتش اتحمله


اول ما فتحت عنيه لقيت ناس كتير حواليه، بابا، ماما، عمتى، ابن عمى رعد واخوه فهد، وبابا كان عمال يصرخ فى الدكاتره

كنت فى مستشفى بابا الخاص، والدتى قربت منى وحضنتنى وبابا، عنيه كان بتدور على ادهم وسط الزحمه لكنه مكنش موجود


قالت ماما الحمد لله على سلامتك يا روحى، قوليلى الكلب دا عمل فيكى ايه؟

والدى بص على والدتى بنظرة لوم لكن والدتى كملت قوليلى عمل فيكى ايه؟

قعدت أبكى بصوت عالى، خبيت راسى فى دماغ والدتى وهمست أدهم بيخونى يا ماما، بيخونى

قلتلك وما سمعتيش كلامى يا يارا، نشفت دماغك ووقفت قدام رغبتى واتجوزتى الزفت ده

والدى حسن الهراس رفع ايده، مش وقت الكلام ده دلوقتى ان هجيب أدهم واعرف ايه إلى حصل

انت لسه هتجيب ابن اخوك وتعرف ايه إلى حصل يا حسن؟

شوفت اخر حنيتك وصلتنا لفين؟

بنتى الوحيده إلى كان متقدملها اولاد ناس من  أكابر البلد اصريت تجوزها لابن اخوك، كل دا بسببك يا حسن يا هراس

اسكتى يا رغده مش وقت الكلام ده، يارا لسه تعبانه

صرخت والدتى بصوت عالى ورحمة امى يا حسن لاطلقها منه واجوزها لسيد سيده

رفع رعد ابن عمى  ياقة قميصه وعنيه لمعت وأطلق ابتسامه

وهو بيبص لوالدتى

قال والدى احنا لازم نسيب يارا تستريح شويه

صرخت والدتى بتحدي بنتى مش هتفضل هنا حسن ، يارا هترجع معانا على القصر


خدونى على القصر وانا مش قادره اوقف عياط، حاسه بالقهر والخزى، انا الى اخترت أدهم رغم ظروفه الصعبه ووافقت اعيش معاه فى شقه حقيره واسيب القصر باعنى بكل سهوله


وصل ادهم القصر وسمعت زعيق والدتى معاه، والدى فصل بينهم، والدى قعد مع أدهم وسأله، قولى يا ابن اخويا ان إلى بتقوله يارا مش صحيح؟

بص أدهم فى عيون والدى بثبات وهمس يارا فهمت كل حاجه غلط

والدى صرخ فيه مره تانيه، قولى ان مكنش فيه صور ومحادثه بينك وبين واحده ست تانيه غير بنتى


رفع أدهم ايده كان فيه محادثه فعلا لكن يارا مسمحتليش اشرحلهت حاجه ان ملظوم يا عمى وتقدر تشوف المحادثه بنفسك وخرج تليفونه وقدمه لوالدى

والدى ضرب التليفون وقعه على الأرض وقف فى مكانه، انت ملكش مكان بينا، انا كنت غلطان لما أتمنتك على بنتى، انت هتطلق يارا يا أدهم غصب عنك

وقف أدهم كمان،وقال بتحدي  يارا مراتى ومشاكلنا هنحلها مع بعض

نزلت السلم وهما بيتكلموا كنت لسه بعيط، بصيت على أدهم وقلت طلقنى يا أدهم انا مش عايزه اعيش معاك

جرى أدهم ناحيتى وعنيه كلها لهفه وخوف، يارا ادينى فرصه اشرحلك من فضلك

داريت وشى بعيد عنه، مش عايزه اسمع حاجه، طلقنى لو سمحت


صرخ رعد وكان قاعد قريب مننا، انت عايز ايه تانى مش كفايه لمناك من الشوراع طلقها حالآ


بص أدهم ناحيت رعد، انت مين سمحلك تتدخل بين وبين مراتى؟

دى مشكله بين وبين يارا واحنا هنحلها لوحدنا


صرخت والدتى ولسه ليك عين تتلكم؟ اطلع بره القصر مش عايزه اشوف وشك تانى وورقة الطلاق تتوصلنا بأقصى سرعه


ابتسم أدهم، محدش يقدر يرغمنى اطلق مراتى، انا هقعد مع يارا لازم تفهم كل حاجه


تدخلت عمتى كمان، طلق يارا يا ابن وداد انت ملكش مكان بينا


وقف أدهم قصادهم كلهم، انا من زمان مليش مكان  بينكم وعمرى ما اعتبرت نفسى واحد منكم بعد ما اخدتم حق والدى وقتلوه ظلم


صرخت والدتى سامع يا حسن ابن وداد بيقول ايه؟

هو ده إلى انت عطفت عليه واخترته لبنتك؟


اطلع بره صرخ والدى، بره يا أدهم


بصلى أدهم مره تانيه وكان قريب منى، يارا اسمحيلى اقعد معاكى هتفهمى كل حاجه هتعرفى انى مظلوم

اقرى المحادثه كويس يا يارا؟ عنيه كانت كلها حزن وخوف

حسيت انى عايزه اديه فرصه لكن عمتى صرخت

انسان قذر زى والدتك، صرخ أدهم امسكى لسانك يا حربايه

المصايب كلها من وراكى

وقبل ما يخلص كلمته رعد هجم عليه ولكمه فى وشه وقعه على الأرض

كل حاجه حصلت بسرعه بعد كده، الخدم مسكو أدهم ورموه بره الشقه

كنت قاعده وسطيهم مش سامعه حاجه رغم صراخهم وزعيقهم، عقلى فى مكان تانى

والدى قال كل حاجه انتهت، انا خلعك من الكلب ده بطلى عياط وسامحينى يا بنتى


طلعت غرفتى اترميت على السرير، الخيانه وحشه اووى وصعبه، لما الإنسان إلى وثقت فيه وسبت عشانه كل حاجه يخونك بتحس الدنيا كلها ضلمه


فهد كان واقف بره القصر لما أدهم خرج منه، علاقة فهد وادهم كانت مميزه عشان كده جرى عليه واخده فى حضنه

همس فهد عملت كده ليه يا أدهم؟

انت عارف ان يارا باعت الدنيا كلها عشانك؟


ادهم بص فى عينن فهد، مفيش حاجه حصلت يا فهد، دا ملعوب كان معمول ويارا صدقت

البنت دى كانت مزقوقه عليه، انا معرفهاش ولا عمرى شفتها

بص للتليفون وحط ايده فى جيبه يخرج الفون عشان فهد يقراء المحادثه ملقيش الفون

ادهم كان نسى التليفون جوه القصر، بص لفهد برعب ومسك ايده برجاء

فهد ارجوك انا عايز التليفون دا الحاجه الوحيده إلى هتخلى يارا تصدقنى لما تقرا المحادثه كويس

انا مكتبتش حرف ولا رديت على البنت دى، ارجوك ادخل بسرعه وهات الفون


مسكت عمتى تليفون أدهم من غير ما حد ياخد باله، قربته من رعد وهمست امسح المحادثه كلها وكسر التليفون ده


دخل فهد القصر، قعد يفتش بعنيه عن التليفون، مقدرش يسألهم ان كان فيه حد شافه خاف من والدته ورغد والدة يارا

شاف رعد ماسك فى ايده حاجه وماشى بيها ناحيت اوضته

#عشق_الصخر


  3


كان أدهم بينتظر بلهفه ظهور فهد، لما لمحه عنيه تعلقت بيه

 فين التليفون يا فهد  انا مش شايفه فى ايدك؟

فهد بتردد ملقتش التليفون يا أدهم وكان على لسانه بقيت كلام أحتفظ به لنفسه


ادهم / ازاى بس؟ انا كده هخسر يارا، لازم ادخل ادور على التليفون!

مسك فهد ايد أدهم، بلاش يا أدهم، الدنيا جوه مولعه، مش من مصلحتك تدخل القصر تانى


أدهم بحزن!/ انت مصدقنى يا فهد؟ كان أدهم كمن يتعلق بقشه ويرى العالم كله يقف ضده


فهد /مصدقك يا أدهم، لكن، المهم يارا تصدقك

أدهم بثقه / انا واثق ان يارا بتحبنى وفاهم انها زعلانه منى لكن اكيد هترجع لعقلها وهتفكر كويس وتعرف الحقيقه


فهد / بص على القصر، أدهم انت لازم تمشى دلوقتى مش لازم اى شخص يشوفنا مع بعض


رحل أدهم وجزء منه عالق داخل القصر، القصر إلى كان ملك والده قبل ما ينطرد منه هو ووالدته

لما دخل الشقه فى اول لحظه شعر بالوحده، يارا الشخص الوحيد إلى كانت بتخفف عليه وجع الدنيا وقسوتها

الهديه إلى ربنا اكرمه بيها بعد طول صبر، معقول يخسرها كده بسهوله؟


نزل بسرعه اشترى تليفون جديد، اتصل على يارا، مره، اتنين، عشره إلى أن نام والدموع مغرقه عنيه

بعد رسايل كتير ليارا كان ببيشرح فيها بالتفصيل إلى حصل معاه

ازاى البنت دى قابلته ورفض يتكلم معاها، الرسايل لبى وصلته منها ورفض يرد عليها

كان هيقول ليارا كل حاجه بعد ما يعرف قصة البنت دى ومين وراها


اليوم التانى اتصل أدهم بيارا كتير جدا كان محتاج يسمع صوتها عشان روحه ترجعله

اخيرا سمع رد لكن مش صوت يارا صوت والدتها إلى فضلت تشتم فيه وادهم ساكت لحد ما قفلت التليفون فى وشه وبلكت الخط


مقدرش يستحمل فراقها، اخد بعضه وراح القصر وانتظر خارج القصر لحد ما لقى واحده من الخدم طلب منها توصل رساله ليارا وانتظر بفروغ الصبر خروج يارا

لكن الى ظهر من القصر رعد ومعاه اتنين من الحراس

رعد /انت بتعمل ايه هنا يا أدهم، انت ملكش مكان هنا خلاص

أدهم بتحدى / انا ليه هنا مراتى يا رعد


ابتسم رعد بسخريه، صدقنى انت انسان غبى، يارا مبقتش مراتك، يارا هتتجوزنى انا

أدهم، مستحيل يا رعد، انت انسان قذر وحقود، ابعد عن مراتى يا رعد


اخرج رعد هاتفه وأجرى اتصال بسماعه خارجيه ووصل صوت يارا واضح، قاسى، حاد

انا مبقتش مراتك يا أدهم خلاص، مش عايزاك يا اخى، انت ايه مش بتفهم، مش عايزاك

أدهم بانكسار يارا انا أدهم حبيبك نسيتى كل ده؟

يارا /انت انسان خاين وحقير وانا ميشرفنيش ان فى يوم جمعنا مكان واحد

وقبل ما أدهم ما يفتح بقه ضربه رعد وحراسه، ضرب موجع

أستسلم أدهم للضرب، مقدرش يقاوم، كان مهزوم من جواه

سبوه مرمى على الأرض فاقد الوعي، لحد ما وصل شخص من الشارع خلاه استعاد وعيه  وساعده يركب تاكسى ويرجع شقته


وصله اتصال من عمه حسن الهراس، انت هطلق يارا يا أدهم، البنت مش طايقاك، خليك راجل زى ما انا اعتبرتك راجل

أدهم باخر آمل، مش هطلق يارا غير لما تطلبها منى

صرخ حسن الهراس باسم بنته إلى وصلت عنده وسمع أدهم

طلقنى انا مش عايزاك، خليك راجل وطلقنى

دا آخر كلام عندك يا يارا؟ نسيتى كل حاجه؟

يارا /قلتلك طلقنى مش عايزه اسمع صوتك مره تانيه ولا اشوف وشك مدى الحياه


أدهم / انتى طالق يا يارا، طالق


رمى أدهم جسمه على السرير وحس بسكاكين بتقطع فى جسمه، دماغه زى الطبله والف صوت جوه ودانه مقدرش ينصب طوله ووقع على الأرض


بعد ساعه فتح عنيه على صوت التليفون، كانت بنت خالته

كيان

استغرب أدهم لما قراء اسمها، كيان عمرها ما اتصلت بيه وعلاقته بيها معدومه

كيان مش بتكلم اى انسان غريب عنها، لبست النقاب من اول ما كانت طفله بعد ما اتعرضت لحادثه شوهت وشها

مفيش اى شخص شاف وش كيان بعد الحادثه وكيان عمرها ما سمحت لشخص يشوف وشها

كيان شابه دلوقتى أصغر منه باربع سنين وعمرها ما اتكلمت معاه فى التليفون غير مره واحد لما والدته وداد ماتت


فصل أدهم باصص على التليفون ومرضيش يرد، مكنش ليه نفس يكلم اى انسان

التليفون رن مره تانيه وتالته، أدهم مسك التليفون وبكل عزمه رفع ايده


#عشق_الصخر


                 ٤


كان أدهم منكمش على نفسه ينظر تجاه سقف الغرفه التى جمعته مع يارا بشرود وحزن


لكن تليفونه واسم فهد خرجه من شروده، مسك التليفون ورد على فهد بحزن

اهلا فهد

فهد / انا لقيت التليفون يا أدهم، خلاص مشكلتك اتحلت وتقدر تشرح ليارا كل حاجه

بلع أدهم ريقه، كل حاجه انتهت يا فهد انا طلقت يارا

فهد /مفيش حاجه انتهت انت بريء ويارا لازم تعرف الحقيقه

وبعدين يا سيدى ناس كتير اتطلقت ورجعت لبعض


قابلني بعد نص ساعه جنب القصر، عارف المكان المهجور بتاع فيلا الأحمدى القديمه؟ هقابلك هناك لكن بسرعه


بدل ملابسه وبسرعه نزل على مكان الفيلا، دخل من الباب المكسر وانتظر فهد داخل الفيلا

كان بيعد الدقايق على وصول فهد وروحه متعلقه بيه، مفيش خمس دقايق وسمع صوت خطوات بره الفيلا

صرخ ادهم فهد؟

محدش رد


طلع على باب الفيلا جرى واول ما وصل اخد ضربه بشومه على نفوخه

صح على دلو مياه بيتسكب على وشه، كان متكتف بالحبال فى كرسى ورعد واقف قدامه بين حراسه

أدهم انت؟ __ انت بتعمل ايه هنا؟


رفع رعد ايده ولكم أدهم على وشه، وقابله بأبتسامه مرعبه، متتكملش غير لما اسمحلك

أدهم بتحدى، هقتلك يا رعد، هقتلك!

رعد _ بلكمه أقوى، غلط، انت مش بتسمع الكلام ولازم تتربى!

ادهم، ورحمة امى ما هسيب يارعد

رعد __نفس الكلام إلى قاله ابوك قبل ما اقتله، الناس فى لحظاتها الاخيره بتقول كلام مستحيل يحصل

ثم اخرج الهاتف من جيب بنطاله

انت بتدور على ده صح؟

تعلقت عيون أدهم على الهاتف، روحه كلها موجوده فيه

رمى التليفون على الأرض وكسره مية حته

يارا ملكى وهتفضل طول عمرها ملكى يا أدهم

صرخ أدهم ببكاء، انت مش انسان انت حيوان


رفع رعد ايده تلقى ادهم ضربة شومة تانيه فى دراعه كسرته

صرخ أدهم من الوجع، ضحك رعد، اصرخ، انا حاسس الماضى بيعيد نفسه، نفس الضعف والطيبه والغباء، زى والدك بالضبط

قلتلك خليك بعيد عن يارا لكنك بكل وقاحه بصيت لحاجه مش بتاعتك

بص رعد على الحارس وصرح خلصت؟

همس الحارس بسرعه لسه يا باشا قربت


رعد _طيب نلعب شويه، طلع مسدس من جيبه وصوبه ناحيت أدهم

أدهم بسخريه هتقتلنى؟ فاكر انك مش هتتعاقب لو عملت كده؟

فهد عارف انى هنا وهيبلغ الشرطه عنك

اطلق رعد ضحكه كبيره، هو انا مقلتلكش؟ وصفق بأيده دخل فهد متكتف مجرور بين حارسين وعلى وشه أثر ضرب

كل خاين لازم يتعاقب حتى لو كان اخ

صرخ أدهم __انت عملت ايه، دا اخوك من لحمك ودمك؟

اشعل رعد سيجاره ونفس دخانها، متشغلش بالك بفهد

فكر انا هعمل ايه فيك؟

احنى أدهم جسمه لقدام وللخلف عشان يحرك الكرسى ويقدر يتخلص من القيد

مسك رعد فهد من رقبته وحط المسدس فى ايده المربوطه بالحبل واجبره يضغط الزناد انطلقت رصاصه كسرت سكون الفيلا المهجوره من مسدس رعد، رصاصه اخترقت جسم أدهم، وقع أدهم على الأرض سايح فى دمه وسط صراخ فهد إلى فقد وعيه


رعد ___نظر تجاه الحارس يلا خلص يا زفت مش لازم نقعد هنا اكتر من كده

ورفع ايده للحراس رجعو فهد على القصر، كده مش هيقدر بفتح بقه، فهد هو الى قتل أدهم


الحارس / لكن يا باشا أدهم لسه فيه الروح

رعد بصراخ، اسكت انت يا غبى، أدهم هيموت دلوقتى

اسماعيل موسى 

وصل الحارس من خلف رعد وكان ماسك مكوه فى ايده، انا جاهز يا باشا!!

برقت عيون رعد، طيب يلا سيح جلده خلينى نخلص

وضع الحارس المكوه على وش أدهم، ارتفعت رائحة لحمه محروقه، والجلد لزق فى المكوه


الحارس! /تمام كده يا باشا


رعد/ ببرود كمل!


أنهى رعد سيجارته وكان جسد أدهم يحترق مثل الفحم

خلاص بلا بينا ورفع ايده وأطلق على أدهم رصاصه اخيره


الحارس هنخبى فين الجثه يا باشا؟

رعد / مش هنخبى حاجه، سيبوه للكلاب هتاكل جسمه ولو الشرطه عثرت عليه هتبقى قضية سرقه او سطو


غادر رعد الفيلا المهجوره مع حراسه تلحق به رائحة دخان شواء

#عشق_الصخر

              ٥


ياماما إلى هتعمليه دا حرام، همست يارا وهى تقف فى وسط الرواق الطويل المكتظ بالكوادر الطبيه


أطلقت والدتها، رغد الشربينى نظره مسمومه سكنت وجهه يارا، اسكتى انتى خالص، انتى السبب فى كل إلى احنا فيه


واصلت يارا بنبره منكسره مهزومه، دا حق أدهم كان لازم يعرف


مسكت رغد الشربينى ايد بنتها وعصرتها بقوه، مش عايزه اسمع اسم الكلب دا تانى، فاهمه؟ 

مش كفايه بقاله شهرين لا ظهر ولا سمعنا منه كلمه وبصت ليارا فى عيونها، رماكى زى الكلب ، سأل عنك؟

دا ما صدق خلص منك وراح للبنت بتاعته  إلى كان بيخونك معاها

انا مش عايزه اى حاجه تربطك بالولد ده ومش عايزه اسمع صوتك تانى 


ظهر رعد فى نهاية الرواق يحمل على فمه ابتسامه مقيته

كل تمام يا مراة عمتى وزى ما طلبتى محدش هيعرف اى حاجه، حتى عمى حسن الهراس


أطلقت رغد الشربينى نظره شريره، انا مش بفكر فى عمك دلوقتى لازم نخلص من المصيبه دى

كان هناك طبيب نحيل يركض نحوهم على وجهه نظاره طبيه

ازيك رغد هانم

ردت بأستعلاء بخير، عارف هتعمل ايه كويس؟

الطبيب بنفس لاهث طبعا يا هانم اطمنى خالص


رغد الشربينى // مجهودك مش هيضيع، مكانك فى رئاسة القسم فى المستشفى فى انتظارك

ابتسم الطبيب وبص ليارا، اتفضلى يا هانم غرفة العمليات جاهزه


بعد ساعه خرج الطبيب يجرى تجاه رغد الشربينى، كله تمام ياهانم، الحمل نزل ويارا هانم بخير

مدت رغد الشربينى ايدها قبلها الطبيب بخضوع كلبى قبل أن ترفع يدها فأنصرف نحو مكتبه 


بصت رغد الشربينى على رعد، انت عارف هتعمل ايه؟

رعد / عارف يا مراة عمى وأخرج من جيبه شيك جاهز للتوقيع دخل به غرفة الطبيب ثم ظهر بعد دقائق يهز رأسه


اتفضلى يا مراة عمى، دا شيك يخليه ميفتحش بقه طول عمره دا ان كان ليه عمر لا سامح الله

وضعت رغد الشيك فى حقيبة كتفها وتنهدت، خلى الممرضات يوصلو يارا العربيه ومتنساش وزع عليهم الاكراميه

وبصت لرعد بتركيز، رعد فك ايدك شويه بلاش حركاتك إلى انا عارفاها


داخل غرفتها استلقت يارا على السرير، تشعر ببعض من الاعياء لكن جرح قلبها ينبض بشده

بقا كده يا أدهم شهرين لا حس ولا خبر؟ هنت عليك وبعتنى بالرخيص؟

وتذكرت المحادثه إلى قرإتها على الواتس، أدهم مردش على البنت

مكتبش ولا حرف، ليه محاولش يتصل بيها ويشرح الحقيقه لو كان مظلوم

لأنه خاين همست يارا فى سرها ونزلت منها دمعه مسحتها لما سمعت صوت مراة عمها


دخلت المرأه العجوز، انت بخير يا حبيبة عمته؟

بخير الحمد لله


متقلقيش ورحمة على الهراس لاعملك فرح تتحاكى بيه مصر كلها، حتى ر..... ليكون موجود فيه

يلا اتجدعنى وشدى حيلك بسرعه


بعد أن رحلة والدة رعد، حطت يارا ايدها على بطنها، تخلصت للتو من آخر شيء يربطها بادهم، بعض منه

مش عارفه ليه حاسه بالألم والفقد رغم أنها نفذت إلى كان فى عقلها


بعد اسبوع ثلاثة أشهر وقفت رغد الشربينى فى منتصف الحفل الغنائى الصاخب، ترمق الحضور بعيونها الخضراء

شايف يا حسن الفرح عامل ازاى؟

كل أكابر البلد هنا حتى الوزراء، مرتديه فستان مكشوف الكتف ماركة شانيل  وحذاء لامع تفوح منها رائحة العطور تتفحص نساء الحفل، مين فى اناقتها وشياكتها؟

بلغت الخمسين من عمرها لكنها تشعر انها لازالت شابه، تفتخر رغد الشربينى بقوامها الساحر وبريستيجها

بصت ليارا ورعد على الكوشه، اخيرا عملت إلى هى عايزاه

رعد زى الخاتم فى صباعها، تعرف ان حسن الهراس أيامه قليله بعد أن أصابه السرطان وكان تحتاج لشخص تتحكم به مثل رعد

#عشق_الصخر


                     ٦

تفحصت رغد الشربينى الحضور لم تكن أكثرهم جمال بالطبع لكنها تعرف جيدا ان كل انثى لا تثق فى نفسها ليست جميله

مشيت داخل الحفله توزع القبلات والأحضان كأنها لم تراهم منذ عام لنساء كانت بتتكلم معاهم امس عن العرس العملاق

لم يكدر صفوها الا همسات ساخره كانت تنتقل بين التجمعات الصغيره عن بنتها المطلقه 

وكانت رغد تقابل كل ذلك بشموخ مكتفيه ان لا أحد يستطيع أن يتحدث أمامها بما تكرهه


طغى صوت الاغاني على الهمسات وتراقصت الأجساد على النغم هناك ما يسمح بالنسيان

نسيان انسان لا حول له ولا قوه كانت حفلة عرس غنائيه على شرف ذبح انسان.


شعر أدهم ان قلبه لا يزال ينبض، عرف كده لم قدر يحرك ايده

هناك نار مشتعله فى وجهه ورقبته وبقية جسمه، قعد مده طويله على بال ما قدر يفتح عينيه

كان عارف انه ميت ولا يستطيع انسان انقاذه، دمه سايل فى كل مكان، جسمه مرمى على الأرض حاول اكتر من مره يوصل للتليفون من غير فايده، حتى صرخة آلم مش قادر يطلعها

امر بشع ان تموت دون قدره على الصراخ او التوجع

جمع مما تبقى من ريقه وبلعه امتص رحيق بطعم التراب الملوث


مكنش يعرف ان رعد ابن عمه هو الى قتل والده وكان ذلك يضغط على صدره ويصدر هزات لا اراديه من الوجع

هيموت من غير ما ينتقم لوالده او والدته فتح فمه وحاول ان يقول كلمه حشرت فى فمه

بداء جسمه يرتخى، يستسلم للموت لم يعرف كم مضى من الوقت وهو فى تلك الحاله لمح طيف يعبر الصاله نحوه وفقد وعيه


فى نهاية الرواق الذى يقطع الفيلا المهجوره فى غرفه محطمه كان هناك عندما فتح أدهم عينه مذياع صغير وسرير متهالك ورجل منبطح على الأرض يضع رأسه فوق كومة ملابس يغط فى نوم هاديء ويده تحت رأسه تكاد تشعر وهو مغمض العينين انه يتأمل سقف الغرفه المشقق المقشر

يده معلقه بكتفه، شاش ابيض ملتصق بصدره وعلى وجهه ورقبته وجسده نخاع شجره ولحائها


تأمل أدهم الرجل، ملابس قديمه متسخه، اظافر طويله ولحيه بيضاء طويله والى جواره قطعة خبز ناشفه


حاول ادهم يعرف هو فين لكن دون نتيجه كل إلى توصل له انه فى خرابة مهجوره تلعب فيها القطط التى تحيط بجسد الرجل


لا تتحرك من مكانك مهما حدث همس الرجل لأدهم وهو يوليه ظهره، انا متحير كيف نجوت؟ يبدو أن لديك روح تحب العذاب

كان الألم فى جسد أدهم خف شويه ويشعر بطراوه تسير داخله


طيب قولى انا فين على الاقل وانت مين؟

سؤأل غبى غمغم الرجل، انت فى نفس المكان الذى كنت ميت فيه، من حسن حظك اننى اقيم هنا


انت مين طيب؟

انا رجل متشرد اذا كان هذا سيرضى فضولك


عالجتنى ازاى؟ انا حاسس ان جسمى بقى كويس؟


أخرجت من جسدك رصاصتين كانتا قريبين جدا من اعضائك الحيويه

اتمنى الا تصاب بحمى او اى شيء اخر


انت بتفهم فى الطب؟ انا مستغرب جدا الصراحه شكلك اعذرنى ميقولش انك دكتور ولا حاجه؟


الحياه مليانه مهازل يا فتى، متحاولش تفكر اكتر من الازم 

انا حطيت على روحك عشبة الاذريون ورجل الأرنب والقرنفل اتمنى ميحصلش تقيح وممكن نحتاج بعض المضادات الحيويه قبل أشهر ستتمكن من المشى على قدميك


يعنى انا هعيش هنا شهور من غير ما اقدر امشى على رجليه


انت مش شايف نفسك كويس؟ انا لما عثرت عليك جلدك كان شبه مسلوخ، عشان دورة الجلد تعيد نفسها محتاج ستة شهور وكمان بعدها يمكن متقدرش تبص فى المرايه من التشوهات إلى حصلتلك، انت كنت محظوظ لانى محتفظ ببعض الأعشاب والمراهم التى اخدتها معايا من المعمل


همس أدهم انا لازم امشى من هنا لازم انتقم من كل الناس إلى خذلتنى واخد حقى


بص الراجل فى وش أدهم، مين الى ضرب عليك النار وشوه وشك بالشكل ده؟

بحزن قال ادهم، ابن عمى رعد هو الى عمل فيا كده لكن اقسم برب العباد لاخد حقى تالت متلت، ادهم الضعيف الغلبان مات خلاص مات وانسلخ جلده


قال الرجل تعرف شخص تثق فيه يقدر يجبلنا مضادات حيويه وبعض المراهم؟ ممكن تساعدك فى الشفاء؟


همس أدهم، انا شخص وحيد ومليش عائله او شخص يهتم بيا ونظر لهاتفه المرمى جنبه بآسى قبل أن ينطق صرخة انتصار اعرف شخص يقدر يساعدنى

#عشق_الصخر


                 ٧

كانت الحياه تمضى داخل القصر رعد ويارا بينما كان حسن الهراس يزوى تحت عيون رغد الشربينى، كان المرض تمكن منه وأصبح يستيقظ وهو يصرخ كل ما ارتكبه فى الماضى الأشخاص الذين تخلص منهم يظهرون له فى أحلامه ويخنقونه، لم ينجح الأطباء فى تخفيف الألم، استيقظ القصر على صرخات حسن الهراس كان يطلب المحامى من أجل توقيع أوراق صحيت زوجته رغد الشربينى على صوت صريخه

فيه ايه يا حسن؟ مالك؟


همس حسن الهراس لازم أدى كل واحد حقه، انا حاسس انى هموت ومش عايز اقابل ربنا وانا ظالم اى انسان!

حطت رغد الشربينى ايدها تحت دقنها، تقصد ايه يا حسن؟

اقصد فلوس اخويا محمد الهراس والمصنع دول ملك أدهم


ضحكت رغد، أدهم مات يا حسن انت بتحلم؟

حتى لو كان مات ودا امر مشكوك فيه لازم اكتبله حقه قبل ما اموت ودا قرار نهائى، لو انتى بتحبينى يا رغد ساعدينى اموت نضيف

كتمت رغد الشربينى نخره، ورسمت ابتسامه صغيره، طبعا يا حبيبى،  وهفضل طول عمرى احبك

لازم تعرف انى كنت جنبك وهفضل طول عمرى جنبك وان إلى يريحك هيرحنى وانا هريحك على الأخر يا حسن، رمقها حسن الهراس بنظره مستفهمه فقالت رغد

انت مش عايز تستريح؟

همس الهراس وقد تورد وجهه ايوه

قالت رغد وانا هريحك 


حسن الهراس / يعنى معندكيش مانع أدى أدهم حقه؟

رغد / لا ابدا وهكلم المحامى بنفسه، اتصلت رغد بالمحامى وطلبت حضوره وانتظرت مع حسن الهراس لحد ما وقع الأوراق كلها


انت استريحت دلوقتى يا حسن؟ يلا اطلع ريح شويه يا حبيبى وانا شويه وهلحقك، وكان الرجل لازال يتذكر الكلمه

هريحك وشعر بالحياه تدب داخله مره اخرى. 

صعد حسن الهراس درجات السلم الحلزونى نحو غرفته والقى نفسه تحت الماء الساخن وعلى وجهه ابتسامه عريضه  وظهر رعد فيه ايه يا مراة عمى، المحامى كان بيعمل ايه هنا؟


حسن عمك اتجنن يا رعد، كتب المصنع والفلوس لادهم

__اللعنه صرخ رعد، كده كل حاجه باظت


مفيش حاجه باظت يا رعد، تعالى ورايا، دخلت المكتب وقفلت الباب

عمك حسن الهراس كده كده ميت، مش لازم نخسر كل حاجه بسببه وطالما امر ربنا هينفذ وصمتت 

وكأن رعد فهم، تأمرى بايه يا مراة عمى؟

هو انت اول مره تعملها يا رعد؟


لكن... ، تردد رعد دا عمى مش اى حد

صرخت رغد انا بعمل كل ده عشانك وعشان بنتى؟ انت جاى دلوقتى تقولى عمى؟

 انا هاخد يارا معايا مشوار اول ما ارجع عايزه الاقى امر ربنا نفذ 


والأوراق إلى معاه تكون معايا فاهم؟

حاول رعد ان يتبرم لكن رغد بصتله بصه مرعبه اجبرته على السكوت


كانت رغد تتسوق مع يارا بنتها لم الخبر وصلها على التليفون

وقعت وسط المول وقعدت تبكى

حضنتها يارا بخوف، خير يا ماما؟

همست رغد والدك مات يا يارا، استريح يا بنتى من المرض دى كانت امنيته فى أيامه الاخيره متزعليش


سقطت يارا، تبخر اخر آمل لديها فى الحياه فرغم انها تزوجت رعد الا ان قلبها لازال مع أدهم ووالدها الشخص الوحيد إلى كان يقدر يساعدها


وصلت رغد القصر وهى تصرخ ودموعها تغمر وجهها، حسن حبيبى، التف الخدم حولها يحالون مواستها لكن بخوف ورعب


اقترب رعد أيضآ والدموع على وجهه عمى مات مات يا مراة عمى

امر ربنا يا رعد يا ابنى هنعمل ايه، انا عايزه الترتيبات كلها تكون جاهزه، عزا يليق بعائلة الهراس


فى غرفة الهراس مزقت رغد الأوراق التى وقعها وطبعت على وجهه قبله اخيره بكل آسى واحتضنته وهى تبكى


عندما وصلت سجى الفيلا المهجوره وجدت رجل خمسينى ضعيف يجلس امام الفيلا متكور على نفسه ملابسه ممزقه وشعره منفوش اطل الرجل بنظره متأمله، انتى بنت خالة أدهم؟

همست سجى بخجل ايوه هو فين؟


نهض الرجل وتلفت يمين ويسار، أدهم جوه، لكنه لاحظ تشككها من مظهره فأطلق لعنة وقال لا تقلقى يا انسه تعرفين أكثر منى ان المظاهر تخدع، عدلت سجى نقابها وشعرت بالخجل منذ عمر طويل لم تتحدث مع شخص غريب

أدهم محتاجك، ياريت انتى كمان متتخليش عنه واختفى داخل الرواق

تبعته سجى لنهاية الفيلا حيث وجدت جسد راقد على السرير يدارى وجهه

أدهم؟

رفع أدهم يده، ازيك يا سجى انا اسف انى اتصلت بيكى

لكن الصراحه مفيش حد ممكن اثق بيه اكتر منك

وكان يدارى وجهه بوشاح


فيه ايه يا أدهم مدارى وشك ليه؟

همس أدهم لانك مش هتقدرى تبصى فيه يا سجى

يتبع 


🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

ادخلوا بسرعه حملوه وخلوه علي موبيلاتكم من هنا 👇👇👇

من غير ماتدورو ولاتحتارو جبتلكم أحدث الروايات حملوا تطبيق النجم المتوهج للروايات الكامله والحصريه مجاناً من هنا


وكمان اروع الروايات هنا 👇

روايات كامله وحصريه من هنا


انضموا معنا على تليجرام ليصلكم اشعار بالروايات فور نزولها من هنااااااااا


🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺🌺🌺🌺



تعليقات

CLOSE ADS
CLOSE ADS
close