رواية عروسه باتنه قصة حصرية و لأول مرة الحلقه الاولى حصريه وجديده
 |
اسمي « اسمهان » عمري 22سنة نسكن في العاصمة نقرا رياضيات في الجامعة عامي ثالث نموت على الرياضيات و الألغاز شاطرة في قرايتي و دايما نماجوري الحمد الله ، طويلة طاي 38 بلوندة سيفيليزي و الحاجة لي تميزني شعري جاي طويل و بوكلي اصفر ذهبي وين نروح يعلقولي عليه حتى وليت نديرونجا منو و نغطيه بالقرمونة عينيا خضروا و خرجت لبابا ربي يرحمو . مهم نعيش مع اختي سارة عمرها 18 سنة عندها الباك و ماما في بطيمة f3 الحكاية بدات نهار جيت مرة على الوحدة من الجامعة وصلت الدار صت ماما قاعدة تخمم مامبا محستش بلي دخلت
انا : ماما . ماما اوو وين راكي قلت السلام مرديتيش؟
شافت فيا و انخلعت منبعد قاتلي: والو ابنتي كنت غير نخمم هدا مكان باينة راكي جيعانة درك نسخنلك تاكلي و ناضت تشعل على الفرن، فوتها نورمال و قلتها وي راني ميتة بالجوع و العيا درك نغسل و نبدل حوايجي و نجي. المهم كي كملت صوالحي رحت للكوزينة و قعدت صتها مطيبة شربة بنينة كما نحبها مع الشتاء كانت تصب علامة ايا قلتها يعطيك الصحة ماما و الله جات في وقتها البرد اليوم و الشتاء، حتى نصيبها راحت و قاتلي بصحتك ، ايا قلتلها ماما تروحي و تخليني ناكل وحدي اقعدي قابليني نحب نشوفك كي ناكل و نهدرو . ضحكت معايا ضحكة حسيت بلي كاينة حاجة المهم قعدت و بدات تفرك في صباعها و انا نخزر فيها منبعد نطقت انا: ماما غير الخير ازرع ينبت واش كاين ! ضحكت معايا و سكتت ثماك خلاص فهمتها حطيت المغرف و قلتلها : ماما متقوليليش خطاب جاني برك! قبل ما تنطق قلتلها : و أيمن نسيتيه و هد الخاتم لي في يدي! شافت فيا و رقدتلي عينيها منبعد قاتلي : متخافيش مشي خطاب 😒بصح هدا ايمن تاعك حط الكلمة برك عليك و لبسلك الخاتم بينك و بينو ما شفنا امو ما شفنا دارهم ما والو ما جا خطبك كي الناس . قاطعتها و قلتلها: كفاش حبيتيه يجي و هو دورو ما عندو السنة يكمل الماستر تاعو و حنا رانا متفاهمين يكمل القراية من يحوس على الخدمة في الصيف يلايم روحو شوية قيس الخطبة و الفاتحة و يجي ، حتى هو قلي ندلك كما البنات كامل و و راك عارفة بالتفصيل الظروف تاعو ماني مخبية عليك والو، و كملت ناكل حتى الشربة بردت …. سكتت شوية ماما منبعد قاتلي و كفاه معولة تصبري معاه عامين و لا 3 و انت تسناي! قلتلها ايبه لخطرش نحبو و هو ثان يحبني . شافت فيا منبعد قاتلي: لا علينا موضوعنا مشي ايمن اليوم صباح عيطت جداك : ضحكت معها منبعد قلت و امنبعد ماني دايما تعيطلك راهي مليحة! قاتلي منيش على مانك "يامنة" راني على جداك الشاوية تاع باتنة « لالة الجوهر » هي قالت اسمها و انا قليي ولى يخبط انخلعت المغرف طاحت وحدها …. خزرت فيها معنكرة و قلتلها واش تسحق عندنا!!! اه كفاه تفكرتنا!!!! من نهار مات بابا ربي يرحمو و جاو داوه لبلادهم و دفنوه و خلاونا هكاك كالكلاب مشردين نبكو عليه ما حوسوش علينا ، واش فكرها بينا هد العجوزة و انا عمبالي ماتت و هي مازلت حية ابن عمي شحال يعيشوووو هادو !!!شحال في عمرها يرحم باباك قوليلي!! ماما شدت راسها و قاتلي : اوووو شحال تهدري اسكتي شوية وين علبالي شحال في عمرها المهم راهي عارضتنا للعرس وليد عمك راح يزوج و قاتلنا ارواحو سمانة قبل ، انا مت بالضحك: ههههههه وليد عمي زوج!!! مبروك عليه و انا واش دخلني فيه ما عنديش عمومي ما عنديش ولاد عموم منحيتهم من راسي من زمان كون مشي اسم العايلة مزلت رافداتو جامي نتفكرهم … ماما: اوووو كون غير ما قتلكش خلاص ابنتى لي فات مات نبقاو غير نبشو في الماضي واش دارو …..تقلقت من هدرتها و نضت جيت رايحة خزرت فيها و قتلها اذا نسيتي انت واش دارولك انا ما نسيتش واش دارولي و رحت لشمبرتي بكيت بكيت حتى شبعت تفكرت بابا ربي يرحمو رقدت و انا نوم فيه حتى فطتني اختي جات من القراية على 5 نضت مخلوعة تلفت كامل وين راني معرفت الصباح و لا الليل
سارة ولات تضحك عليا: هههه ما تخفيش مكيش روطار راهي 5 تاع عشية باينة خمرتي من رقاد عيينك راهم منفخيين
خزرت فيها منبعد عاودت دخلت تحت الكوفيرطة …. سارة تبدل في حوايجها و تهدر : سمعتي الجديد! عندنا عرس في باتنة! واش رايك نروحو نزهاوو شوية نحو الغمة تاع القراية مزية جاتنا مع العطلة هي تهدر و انا قلبي يتلوى عليها 😤😡 نحيت الكوفيرطة على راسي و شعري مشعطط و نوض ليها: اسمعي العرس روحي ليه وحدك و زهاي وحدك كامل نسيتو بابا و حابين تزهاوو و الله ما تحشمو … دموع سبقوني و بقيت نمسح فيهم ما حبيتهاش شوفني نبكي منبعد درت مالجهة الاخرى و تغطيت …سارة انخلعت فيا منبعد قعدت جنب السرير و قاتلي: الله يهديك انت مشنفة من جهة و ماما من جهة قاعدة ما تهدرش وشابيكم اليوم!! هدا غير كي عرضونا للعرس !! و ارواحي نقلك حاجة لي يسمع يقول بابا مات البارح عندو 15سنة الله يرحمو و كي راكي تقولي علينا انسيناه و حابين نزهاو ياك ساعات وحدك وحدك تونضي شعلي الغنا و تشطحي مقلبة الحالة!!! تفكرتي بابا غير كي عرضونا للعرس!! خلاص ما قدرتش نصبر …هدرتها وجعتني جيت راح نضربها بكف منبعد عضيت شواربي كتمت الغيض و نضت تقعدت مسحت دموعي و قلتلها: شوفي سارة انت متشافيش لبابا بزاف كنت صغيرة كي مات بصح انا نشفالو مليح كان في عمري 8 سنين و نهار لي مات و جاو ماليه يدوه هداك ابشع يوم في حياتي ماما متغاشية من جهة و النساء يبكو و ماليه يندبو و ينوحو و انا صغيرة قاعدة في الكوانة نبكي و نشوف و ماقادرة ندير والو و انت في حجري راقدة كان في عمرك 3سنين و هدي امو لالة الجوهر جات لابسة الاسود في الاسود و موشمة في وجها كانت تخوف حسبتها الساحرة الشريرة قعدت شحال و انا نوم فيها مامبا ما جاتش حوست على بنات وليدها و لا محسبتناش كامل مكنتش فاهمة بلي بابا خلاص منزيدوش نشوفوه ملي خرج من داك الباب اخر لقطة هداك النهار لي تيتمنا فيه عرفت معنى اليتيم و لي عشناه موراها راكي عارفاتو بلاما نحكيلك …و درك جاية لالة هادي تحوس علينا علاه!! واش تسحق ؟؟ واش فكرها بينا !!! كي وقفنا على رجلينا و ماما تمحنت على جالنا عاودت ولات لينا!! منسحقهمش انا العبد لي منصيبوش في الشدة تاعي معندي ما ندير بيه في الفرح نهدر و دموعي ويدان …اختي عنقني و لات تبكي هي ثان منبعد مسحت دموعها وولات تضحك قتلها علاه راكي تضحكي: قاتلي تشفاي بابا كي كان يحكينا على واحد القصر جاي في الريف و الطبيعة الخلابة ويقعد يوصفنا فيها بلاصة كما الجنة و فيها الخيل و الحيوانات و الخدم و صح وصفلنا واحد المراة قالنا عجوزة شابة و حكيمة علبالك كان يحكينا على دارهم و هديك العجوزة الشابة يماه لالة الجوهر و انت قلتيلي الساحرة الشريرة ….هدرتها رجعتني وين كنت صغيرة و بابا مقعدنا على حجرو و يحكينا و حنا نتخيلو بقيت شاردة شوية منبعد قلتلها اييه يماه صح واش حبيتيه يحكي عليها!! يقلك ما مشي مليحة!! ما قبلتش بزواجي من يماكم!!
قاطعتني سارة و قاتلي: شوفي هد الحكايات خليهم للكبار حنا ما دخلنا فيهم مهم حنا نسالو معاهم و فيهم و عليهم ههههه مادمنا اسمنا عائلة "اكسيل" رانا معدودين منهم نطقت انا : افففف داك الاسم الشين الي يشرف بزاف مكاش استاذ ما يغلطتش فيه و مكاش واحد من البلدية ما ينساليش حرف كرهت حياتي معاه😤 سارة ولات تضحك : هههههه انت وحدك!! واش عندك في الاسم المهم واش كاين مور الاسم!! اييه ا لالة واش كاين موراه!! سارة: خلينا مالا نروحو للعرس نعرفو واش كاين موراه و بدات تاخل فيا اسمهان تعيشي و الله عييت من القراية حبيت نريح و العرس جاء في وقتو تعيشي اقبلي نروحو نحو الغمة باه كي نولي للقراية مخي يكون فراش و جديد ههههه تقبلي معليش خلينا نزهاو شوية …. انا :اوووو اسكتي عليا غميتني بالهدرة تاعك شكون قلك ما تروحيش روحي روحي مع مك ازهاو انا نقعد وحدي هنا ! ديجا ايمن راه يعيط اخرجي نهدر معاه
سارة : هاو نخرج على جال سي ايمن معليش
جات خارجة قلتلها اغلقي الباب من موراك و تكسلت على الفراش تنهدت مليح و رفدت عليه ايا بقينا نهدرو واش درت اليوم ووو منبعد قلي انا نروح نريح عييت اليوم بحكم راه يخدم يعاون روحو و يقرا في نفس الوقت مهم انا تقلقت منو كي حاب يقطع بلخف قتلو: خلاص صحا سمحنا كي ديرونجيناك راك عيان
ايمن: علاه راكي تهدري هكا!
انا : كفاش راني نهدر!
ايمن : ياك انا لي عيطتلك مشي انت !
انا: وي راني عارفة!!
ايمن : مالا علاه تقولي اسمحنا كي ديرونجيناك! راني عيان هدا مكان قلت نهدر معاك قبل ما نرقد شوية
انا: خلاص اسمحلي روح ترقد
ايمن: بصح علاه راكي مشنفة
هدرتو قلقتني قلت نهدر معاه نحي الغمة زاد غمني معرفتش واش نجاوبو بقيت ساكتة 😑 خفت نهدر نزيد نخسر حكمت فمي
ايمن: علاه راكي ساكتة! واش كاين؟ كاش ما صرى!
انا: وي كاينة حاجة منبعد نحكيلك درك راك عيان روح ريح شوية
ايمن: ايا صحا منبعد ان شاء الله
كوبا عليا و انا بقيت مشوكية بانلي مهوش مهتم و لا حوس يفهم واش كاين يحوس يرقد برك معليش مخليتيش بليس يوسوسلي انا نضت جيت خارجة حتى لحقني ميساج
تابعوني وكونوا بالقرب للتكمله
