رواية سند والعذاري الفصل الثاني والثالث والرابع والخامس بقلم روز الفياض حصريه وجديده على مدونة النجم المتوهج للروايات

غير افكارك و ستتغير كل حياتك

في كل روايه وكل قصه هناك شئ مني واشياء منك..💔

‏فـ 🔥 نار المرء و جنته افكاره وتفكيره

‏( ان الله لا يغير مابقوم حتى يغيروا ما بأنفسهم)

بليلتها اطاني فراش وكلي :

فرشي بالغرفة ونامي ..

انه هنا راح انام .

اخذت الفراش ورحت فرشته وتمددت ..

بس ماغمضت عيني ..

شلون انه نايمة ابيت رجال غريب !!

لو بت عالم وناس جا اهلي ذبحوني ..

اي ..

الناس عدهم الشرف غالي .. وانه اهلي مدري شنو من اهل ..

المعجبني ابوي وين لكه امي وخذاها ؟

هسه اذا الابو مو خوش ادمي عالاقل الام تطلع بيها خير ..

انه اثنينهم نفس الطركاعه.

اتنفست حيل مااكدر اكول تعبانه ..

هالكلمة مااعرف معناها ..

جبت كل عمري نطفه نكسة على كولت امي جانت تكلي من تصير عصبية :

امداج وامده البطن الجابتج ..

نطفة نكسة على ابوج ..

جا اذا انه نطفه نكسة ليش مااحبكم ومااحب عيشتكم الكلها حرام ونكاسه ؟؟

والله ياربي حيرتني ..

انه منين .؟

من ذول من ذولاك ..؟

جا هو النكس هم يصلي ؟ جا مو جاي اصلي ؟؟

اي بس حتى الشمر جان يصلي وتالي كتل الحسين عمت عيني ..

الله يرحمج حجيه ام جاسم علمتيني شلون اصلي شلون اصوم شلون اعرف الحلال من الحرام ..

ولو ابنج جان طايح حظه ويوميه واكف كبال بابنه لحدما اطيح حظه يالله يولي بس انت جنتي خوش مره طيبة جورتكم ماتتعوض ..

تعبت من التفكير وسلمت امري لله ونمت ..

كعدت الصبح على دكت باب الغرفة ..

باوعت انه وين ؟

هاي المزبلة مو بيتنه !!

اتذكرت ..

كمت بساع لبست حجابي وفتحت الباب لسند كال :

صباح الخير

عذراء :

صباح النور

سند :

اريد ابدل حتى اروح للشغل .

عذراء :

اي اي ..

ادخل ..

طلعت من الغرفة كبل للحمام غسلت واتوضيت ورجعت كعدت اتانيه ..

طلع من الغرفة كتله :

وين تشتغل ؟

باوعلي وكعد يلبس جواريبه ..

سند :

الكهرباء ..

عذراء :

يااا اشوفها الكهرباء مابيها خير ههههه ..

رفع راسه باوعلي ..

درت وجهي جني جفصت ..

غلست وهو هم غلس وضحك على كيف هز راسه وكام كلي :

موظف انه مو وزير .

عذراء :

اي ادري ..

يعني هذا شكل وزير ..

ضحك كال :

هاي شلون بلوه من الصبح ..

عذراء :

قابل مجذبه ..

بس هو اليحجي الصدك محد يحبه ..

سند :

ماشي ..

انه رايح واذا صار شي رقمي عندج .

عذراء :

خاف ..

قبل مااكمل كلي :

لانخافين ..

سعد مايندل هذا البيت ..

وتره ماعرفنالج مره تردين سعد مره ماتردينه ؟

عذراء :

انه مااعرف شريد الله وكيلك ..

مرات اكول الله ياخذه حتى اخلص منه ومرات اكول اذا يموت وين اروح ..

صدك هو مو آدمي بس عالاقل مكعدني ابيت وضامن لكمتي ..

اذا طلكني المن اروح ومنو يطيني ..

بقى ساكت هز راسه وسكت اشرلي بيده مع السلامة وطلع ..

مرت يومين ابيت سند ..

خايفة وادعي الله ياخذ سعد ويفكني منه ..

بس وين اروح اذا مات ؟

خلي من يرجعني على ذمته يالله يموت عالاقل البيت يبقى الي ..

اكعد بي خوما اكعد بالشارع .

صافنة وافكر وسمعت الباب اندك ..

غلست ..

سند مو هنا وكلي مالج شغل بالباب اذا يندك ..

اندك اكثر من مره غلست ..

بس صار عدي فضول اعرف منو بالباب باوعت من الشباك مايبين ..

ماكو كدامي غير السطح ..

فتحت باب السطح المبين عليه صار سنين محد صاعدله وباوعت بسكوت شفت مفرزه مال شرطة ..

نزلت اركض طلعت تليفوني دكيت على سند كتله كلي :

مو كتلج لاتفتحين الباب ؟

عذراء :

مافتحته صعدت باوعت من السطح ..

سند :

المن صاعده ؟..

ماشي

ماشي .

عندي شغل هسه شوية واجي ..

رجع وره ساعة دخل وانه كاعده وحاطه ايدي على خدي لانت عده بالبيت ولاتلفزيون ولاشي ..

جا انه وين اروح بس الفكور وراي .

سند :

هاي لفات اذا جوعانه .

عذراء :

الشرطة اليوم اجت ..

سند :

ادري ..

مو كتيلي ؟

عذراء :

اي كتلك بس ماكو جواب كلما اكلك على شي تغلس ..

سند :

شسوي يعني اكوم ابوس راسج لان كتيلي ؟

ادري بيهم يجون وكتلج الباب لاينفتح ..

تنهدت وكلت ويه روحي بصوت ناصي :

منين الله يذب علي هاي المصايب ؟!!

سند :

آسفين عيني ..

ازعجناج ..

اتحملي شوية سعد خابرني وكلي اخليج شكم يوم لحدما يرجع من السفر وارجعج اله ..

عذراء :

مصيبة صابته هالسعد ماصارله يومين من رجع ..

اكيد راح ويه وحده من هالنمونات اليعرفها نونه عشتوا ..

وصخونه كون تنام بفادك وافادها ..

ضحك وبقى ساكت ..

بعدين كام راح سوه جاي واجه وصبلي وياه استكان استغربت كتله :

خير ؟

سند :

شكو ؟ ماتردين جاي ويه اللفات ؟

عذراء :

لا اريد بس ليش ماكتلي انه اسوي ..

سند :

متعود ..

عذراء :

جا انت شعجب مامتزوج ؟

بدل ماكاعد بحدك بهالبيت وحالتك حالة ..

بقى ساكت وطلع الجكاير راد يدخن كتله :

يرحم والديك كافي شكد تدخن البيت ريحته تكتل ..

اتنهد بضجر وعاف الجكاير وفتح العلاكه طلع اللفات واطاني وحده وكعد ياكل ..

شوية وكلي :

امي تريد تجي شكم يوم تبقى هنا ..

بقيت ساكته ماعرفت شكول ..

اباوعله عنده حجي يريد يكوله فكتله :

ادري ثگلت عليك بس اذا تكدر تاخذ مفتاح البيت من سعد عادي اروح اكعد بي مادام هو راح يولي ..

منا لمن يرجع يحلها الحلال ..

ماحجه شي ..

خلص عشاه وكام راح صب جاي من جديد ورجع ..

سند :

كملي عشاج مايحتاج ترحين لبيت سعيد .

بقيت ساكته ومخليه ايدي على خدي وافكر بتاليتي ..

مد ايده اطاني لفة وخله كدامي الجاي واشرلي اكل ..

عذراء :

مالي نفس ..

سند :

امي مره جبيرة ومن اهل كبل وفقيرة .

بالاحرى هي مو امي هي جدتي .. هي ربتني من ماتت امي وانه جاهل ..

الموضوع اثار فضولي كتله :

يعني انت امك ميته ؟

يعني يتيم ؟

ياا سوده علي ..

شلون ماتت ؟

اكيد من مصايبك لابد سويتلك مصيبة وجلطت المره اعرفكم زلم بس الاذيه وراكم مثل مالك ماكو مصيبة ماسواها بس امي مو فقيرة مثل امك لذلك ماماتت ..

بقى صافن بوجهي بعدين طكها ضحكه واشرلي اكل .

اخذت اللفه وبديت افتح الورق اللي ملفوفه بي وهو يباوعلي بعدين كلي :

امي ماتت لان دعمتها سيارة ..

عذراء :

يااا خطيه ..

الله يرحمها ..

بس همزين من ماتت عالاقل مالحكت على مصايبك ...

حسيته ضاج ..

سكتت ..

بقيت افكر يمكن جفصت ..

شلون بيه ياربي وبلساني مو لسان فيته ( شريط قياس ) على كولت سعد بس يطونه مجال يفتلت بالحجي ..

طلع بالحوش يدخن ..

اباوعله من الشباك مارجع فات للبيت الا من خلص باكيت الجكاير ..

شافني كاعده يم الشباك كلي :

بعدج مانايمة ؟!!

عذراء :

بعدني ..

شبعانه نوم شعندي غير النوم طول النهار ..

كعد ساكت وصافن بعدين كلي :

شلون اتزوجتي سعد ؟

عذراء :

مالك زوجني غصبا ماعلي ..

يوم اسود مصخم جان ..

ضحك ،،

عذراء :

والله ..

هو سعد هم بشر .

اتنهدت وسكتت وهو هم بعدين كلي :

امج ..

ابوج ..

شلون قبلوا بي ؟

كتله بتعب :

اهووو ..

اليسمعك يصدك عدي ام وابو مثل بنات العالم ..

تره انه مااعتبرهم اهلي ..

ولا احبهم ولايحبوني ..

اهليش ..

امي اصلا جانت تريد تزوجني من جان عمري (١٥ ) سنة بس ابوي جان بعده مامسجون ويدري يكتله الوصخ والضيم بدوني ..

واميلك زمال .. يروح فدوه للزمال .. والا اكو واحد يبيع اخته بآيفون !!

اتعجب .. كلي :

آيفون ؟؟!!!

عذراء :

اي شبيك متعجب تره اهلي عارات كلهم مابيهم واحد بي خير ..

سند :

الله يطيح حظه ..

عذراء :

منو ؟

سند :

اخوج ..

عذراء :

اي .. الله يطيح حظه بالدنيا والاخره .

جلب ..

شمرني على هالجلب الثاني اجلب منه طلع ..

بقى ساكت ..

عذراء :

انت اهلك خوما هم مثل الجلاب العدي ؟

سند :

لا ..

اهلي ناس طيبين الحمدلله .

عذراء :

جا شجابك على سعد واميلك ؟

سند :

غباء ..

عذراء :

اي والغباء موهبة ههههه ..

خزرني وبقى ساكت وانه هم حطيت لساني بلهاتي وسكتت لان مصختها ....

شفته يتثاوب كلت الظاهر يريد ينام فكتله :

اعوفك تنام وتاخذ راحتك ..

تصبح على خير .

سند :

مو تكولين شبعانه نوم ؟

عذراء :

اي بس وين اروح لانت لاتلفزيون اروح اتمدد وابقى اتكلب منا لحدما انام .

سند :

اكو تلفزيون تردين تباوعين عالتلفزيون ؟

عذراء :

وينه ؟

كام راح للغرفة المقفولة فتحها رحت وراه اباوع شفت الغرفة بيها جرباية مال طفل وكنتور .

طلع التلفزيون وخلاه بالهول وركبه عالكهرباء وكعد يركب الرسيفر ..

غلس ..

عبالك مايسمعني ..

خلص كام شغل التلفزيون كلي :

هاج الريموت ..

هسه تكدرين تباوعين براحتج ..

ومادام التلفزيون صار هنا معناها انه راح اخذ الفراش اروح انام بذيج الغرفة وانت نامي عالجرباية ..

عذراء :

يطيك العافية ..

سند :

الله يعافيج .

مشى خطوتين ورجع دار علي كلي :

اخوج ماعنده غيره ..

رغم اخوي واعرفه مااحتاج احد يكلي عليه ماعنده غيره بس استهضمت ودمعت عيوني ..

بلعت ريكي وكتله :

ادري ..

راح نام وبقيت انه كاعده للصبح افكر .

لو الله بس يخلصني من التفكير ..

من جنت بالمدرسة جانت وياي بنية حلوه اخوانها يخافون عليها يومياً واحد منهم يجيبها ويرجع ياخذها ..

رغم بيتهم قريب بظهر المدرسة ..

جنت استغرب ..

اجي مسافة بعيدة ادك الطريق مشي من بيتنه للمدرسة تقريبا ساعة كاملة بحدي ..

محد يخاف علي ..

حتى لو مرات اتأخر محد بحالي الا اذا امي تريد تكربني بشغل البيت بس ادخل للبيت تستلمني غلط وطك ..

بقيت اتكلب اخر شي فكرت اذا امه تريد تجي وانه هنا عده بالبيت زحمه البيت وصخ خليني عالاقل انظف البيت واصلا لعبت روحي مامتعوده على هالوصخ هذا ..

صدك بيت سعد نص قطعة بس انه مخليتها تلمع ماعدي شي يلهيني غير التلفزيون والتنظيف ليل ونهار اغسل واجلف مرات اكول الحمدلله ماعندي جهال ..

ومرات اكول لو عندي جاهل يونسني ..

الصبح كعدت على صوته يحجي بالتليفون ..

راح كالمعتاد لشغله وانه كمت اتريكت واتحزمت ..

قررت اليوم اجلف البيت كله ..

رحت للغسالة شغلتها وذبيت البردات ووجوه المخاد والجراجف وبعدين كنست ومسحت ..

طلعت زبالة مال سنة ..

هذا شلون جان عايش بهالوصاخه هاي ..

بقى المطبخ منين ابدي ينرادله حرك مو تنظيف !!!

رشيت الطباخ بماي حار وطلعت كل الجدوره والماعين من الكاونتر اغسل واشطف وانشف ..

نظفت الكاونتر ورجعتهن ..

باوعت للساعة صارت ب( ١٢ ) جعت ..

كلت خل اصلي وارجع اكمل ..

صليت وسويتلي لفة جبن ورجعت كملت ..

منا للمغرب يالله خلصت ..

طحت صفح ..

كلت خل اطب اسبح مادامه بعده ماجاي ..

طبيت سبحت وكعدت بالبانيو اريد مثل ذوله بالافلام استرخي على كولتهم بالماي الحار ..

كعدت شوية شو ضجت كمت جلفت روحي بلا استرخاء بلا كلاوات ..

اغني ويه روحي واحجر رجليه بالمحجاره :

حجيك مطر صيف ..

حجيك مطر صيييف ..

مابلل اليمشون ، حجيك مطر صيييف ..

وردتك تمر ضييف ..

ردتك تمر ضيييف ..

وتسكت اليحجون ، ردتك تمر ضيف ..

حجيك ..

مندمجه واغني بصوت مسموع وأشر بيدي واندك الباب من فزتي زلكت وطحت بالبانيو ..

سمعت صوت سند يحاجيني :

الدنيا تمطر صدك والضيف وصل ..

من فشلتي كتله بعصبية :

افتهمنه ..

كمت لبست وطلعت بسرعة وغلست سويت روحي مامسوية شي وهو صدك قابل شمسوية مايصير اغني يعني ..

طبيت للهول وادندن على اساس مافشلانه لان سمعني ومصره اسمعه ..

اتفاجأت بمره حجية جبيرة كاعده ..

ظليت متصوخله وواكفة اباوعلها وهي هم تباوعلي ..

دخل هو من الحوش بيده علاليك باوعلي وكللها :

يمه ..

هاي مرتي ..

رادت تكوم الحجية تسلم علي ماخليتها دنكت عليها بوستها ودرت عليه باوعتله ..

غلس راح دخل العلاليك ورجع كعد يمي كللها :

ها يمه شلونها ؟

الحجية :

حليوه ..

كون تطلع خوش بنية مو مثل الجلبة عذيره ..

فكيت عيوني وحلكي كتلها :

ياعذيره قصدج !؟!!!

رأسا هو جاوبني :

سُرى كومي خلي الفاكهة بالثلاجة وجيبي لامي صحن ..

عذراء :

سُرى ؟!!!

طحت بالحمام بس لا صار بيه جني ..

الحجية :

اسم الله الرحمن خالة شحلاتج وينج ووين الجني ..

صلي على محمد ..

عذراء:

اللهم صل على محمد وال محمد ..

من رخصتج حجية ..

رحت للمطبخ اغسل الفاكهة والخضره وانتظره يجي وراي ..

شوية واجه كتله :

سُرى منين ؟

انه مااسمي سرى !!

سند :

ادري اعرف اسمج .

عذراء :

ومنين امك تعرفني وتكول مو مثل عذيره ؟ شسامعه عني ؟

شكايللها ؟

سند :

مو عليج ..

ماكايللها شي بس اخوج صاحبي واطانيج ..

واسمج سرى ..

واهلج ميتين ..

عذراء :

يااا ؟!!

اكله منين تعرفني يكول مو عليج !!

سند :

تره مو بس انت اسمج خ..ه عذراء ..

عافني وراح ..

هذا شبيه المخبل .

اخذت صحن الفاكهة للحجية خليته كدامها وكعدت ساكته مالي خلك احجي قهرني اسلوبه ..

دارت علي الحجية كلتلي :

شبيج خالة ؟ ساكته ؟

عذراء :

مابيه شي خالة ..

الحجية :

سند موضجج ؟

غاثج ؟

ماادري ليش طاحت دمعتي ودنكت مااريد ابجي ماكو شي يخليني ابجي كل انواع العذاب شفتها ..

الحجية :

ليش يمه وياها ؟

مرتك ويتيمه ومالها احد وتكول خوش بنيه جا شبيك وياها ليش تأذيها ؟

سند :

ماسويتلها شي ..

الحجية :

شلون ماسويتلها شي مو هالتبجي ؟

دكوم بوس راسها وصالحها كوم ..

كام يريد يبوس راسي كتله :

لا لا مااريد ..

مسامحتك لخاطر الحجية ..

الحجية :

اي عفيه بنيتي ..

اصيلة مو مثل الجلبة عذيره ..

فكيت حلكي ودرت عليه كتله :

ساعة السوده عليها ..

الحجية :

خوما اجتج وتكاونت وياج ؟

عذراء :

تكاونت يعني شنو ؟

سند :

يعني اتعاركت وياج .. لا مااجت يمه ..

ماتجي ..

الحجية :

عساها لااجت ..

لاحلت بركة عليها ..

عذراء :

بعدد ؟!!!

سند :

صليتي ؟

عذراء :

بعدني ..

سند :

اذن كومي صلي ..

باوعتله مستغربه كالت الحجية :

تصلين خالة ؟

عذراء :

اي خالة محتاجة شي ؟

الحجية :

لا سلامتج ..

اي عفيه بنيتي صلي ..

صلي محد يفيدج ..

ادعيلنه نخلص من عذيره ومصايبها ..

عذراء:

الله يخلصكم منها ان شاءالله ..

دخلت للغرفة اصلي شوية وفتح باب الغرفة ودخل وسد الباب ..

عبالي راح يطلع بس ماطلع بقى واكف .!!

اضطريت اكطع صلاتي ..

عذراء :

هاا ؟

سند :

اكلج منين القبلة ؟

عذراء:

منين جاي تشوفني اصلي ؟

سند :

هاا ..

متأكده ؟

عذراء :

اي متأكده طلعته بالتليفون .

سند :

هاا ماشي ..

ماشي ..

طلع مصلاية من الكنتور وطلع .

رجعت عدت صلاتي وبقيت كاعده عالكاع البارده ..

محتاره شلون اتصرف ؟؟

لازم الكالي مكان مايصير ابقى هنا ..

وهذا ماادري شنو فلمه هو وامه ..

شوية ورجع دخل كعد كبالي بالكاع باوعلي وكلي بصوت ناصي :

خدمة مقابل خدمة ماشي ؟

عذراء :

شنو هاي انوب حزوره ؟

سند :

انه مو خلصتج من سعد وجبتج هنا ؟؟

بالمقابل سوي روحج مرتي كدام امي واتحمليني واتحمليها هي شكم يوم وترجع لبيتها ..

باوعتله بنص عين كتله :

خلصتني بصورة مؤقته باجر بس يكلك طلكها تطلكني ..

سند :

جا شلون غير متفق وياه ؟؟

عذراء :

متفق على شنو ؟

كول الصدك ..

بقى ساكت بعدين كلي :

مقابل مليون دينار ..

فكيت عيوني كتله :

يطيك مليون حتى تعقد علي وانوب تطلكني ؟؟!!!

جذب مااصدك ؟؟

ومخليني حسره علي الفلس ؟؟؟؟

لا ياجلب ياابن الجلاب ..

وانت شدعوه عليك هلكد ماخذ ؟؟

طلعت هاي خوش شغله شعب اميلك مامشتغلها هو سعد ؟

سند :

هسه انت دافعه من جيبج ؟!!

عذراء :

لااء حتى جيب ماعدي ..

بس على كولتك قابل الفلوس مني ..

زين تسوي بي لو كايله خمس ملايين وقاطه ..

ضحك كتله :

والله شبيك ..

شعره من جلد خنزير ..

بدل مايصرفهن عالموزينات ..

سند :

هسه شكلتي ؟

عذراء :

بشنو ؟

هاا .. اي ..

وانه شستفاد ؟

انت راح تقبض منه فلوس وهو راح يستلمني من جديد وارجع لطيحان الحظ ..

شمستفاده من اتفاقكم ؟

باوعلي وبقى صافن بوجهي شوية بعدين كلي :

شتردين انه حاضر ..

عذراء :

اممم ...

نشوف ..

حالياً ماابالي شي من اتذكر اكلك بس مالك حق تعترض ..

سند :

ماشي ..

عذراء :

لا مو ماشي ..

هي مال كلاوات ..

شنو اليضمن ؟

سند :

كلمتي ..

عذراء :

ان شاءالله شايفني قشمر واصدك بكلمتك ؟!!

انت مو مطي كلمة لسعد ؟

سند :

اي

عذراء :

واذا كتلك ماترجعني ؟

بقى ساكت ..

عذراء :

معناها لاتطي كلمة انت مو كدها .

كام راد يطلع كتله :

لاتخاف مااحجي شي كدام امك بس مو ياخذك الواهس ..

ماحاجاني ..

كمت سويت عشا عالسريع وصبيته وهو يساعدني بدون كلام

وره العشا الحجية كالت :

نعست

سند :

سُرى فرشي لامي بالغرفة ..

بقيت كاعده نسيت اسم سرى معناها يحاجيني ..

الحجية تباوعلي مستغربة وانه اكول شبيها صافنه علي ..

لحدما كلي هو :

وين صافنه ؟

عذراء :

هاا ؟ تحاجيني ؟

سند :

مو صار ساعة اصيح سُرى ..

سُرى .

فرشي لامي بالغرفة .

عذراء :

هاا .. اي

صار ..

هسه ..

كمت فرشتلها ورحت غسلت الماعين ونظفت المطبخ لحدما شفتها راحت نامت رحت سديت عليها باب الغرفة ورجعت لكيته كاعد يدخن ..

عذراء :

ما وراك دوام ؟

سند :

وراي ..

عذراء :

جا ماتنام ؟

سند :

كعدي ..

كعدت ..

سند :

انه وياج راح انام بنفس الغرفة ..

عذراء :

لا ربحنه ..

سند :

خليني اكمل ..

عذراء :

كمل عيني كمل ..

سند :

انت نامي عالجرباية وانه بالكاع ..

امي تره كل شي تلاحظ كملي جميلج للاخر ..

عذراء :

اعذرني يعني بس امك شوكت ترجع لبيتها ؟

سند :

ماتطول اسبوعين ..

عذراء :

هاا ؟؟؟

سند :

صوتج لا تسمعنه ..

شبيج فزيتي ..

مره جبيرة اجت لكت مره ويه ابنها بالبيت شكللها يعني ؟؟

عذراء :

وصدكتك من كتلها مرتي واخوها العار اطانياها ؟؟

سند :

اي صدكت اكيد ..

عذراء :

ههههه وين اكو بطه تلعب شناو ؟!!

شنو اي صدكت ؟

سند :

افففف ..

كتلج صدكت .. لاتلحين .

تعرفني اسويها لذلك صدكت ..

سكتت وباوعتله وكتله :

بس لا صدك مسويها قبل ؟؟

سند :

شنو هي ؟

عذراء :

متزوج بدون علم اهلك ؟

باوع للساعة وكلي :

كومي نامي انه راح اروح انام وراي كعده الصبح ..

ومثلما كتلج نامي عالجرباية وانه عالكاع ..

راح للحمام وانه رحت للغرفة فرشت بالكاع وتمددت وتلفلفت بعباتي ..

شوية واجه لكاني نايمة بالكاع كلي :

ليش نمتي هنا كومي نامي عالجرباية ..

عذراء :

تلعب روحي ..

كلي باستغراب :

نعم ؟؟

عذراء :

تلعب نفسي انام على فراش رجال غريب ..

مااكدر ..

بقى واكف يباوعلي بعدين كلي :

براحتج ..

طفى الكلوب ونام ..

بسرعة نام وبدا يشخر ..

مبين تعبان ..

بالبداية خفت لان نايم بنفس الغرفة بس النعاس غلبني ..

نمت لان كاعده من الصبح وانكسر ظهري بالتنظيف ..

حسيت بدفو غريب ..

من كعدت الصبح لكيته مغطيني بالبطانية مالته ..

صوت الحجية من الصبح ذكرني بالناس قبل .. صوتها بي حنية مدري انه لان اتعودت انام بحدي واكعد بحدي وابقى طول النهار بحدي صار سنين ..

هسه هم نفس الشي بس اكو فرق بسيط .

كعدت ريكت الحجية سند طالع .

الحجية :

وحشه عليج النهار كله بحدج .. كتله اليوم الصبح خلص شغلك وارجع للبيت .

ارجع لمرتك بحدها والدنيا تخوف ..

عذراء :

دوامه متعب ..

الحجية :

اي .. تعب عليه من الشغل للدار ..

مافهمت شنو يعني دار وخفت اسألها تشك ..

عذراء :

هم كون يطونه شي يسوه ..

الحجية :

لا مايريد ..

جم مره كتله كللهم يطونك جم فلس عالاقل مال البانزين مايقبل يكول لوجه الله ..

عذراء :

اي ..

الله يطيه على كد نيته ..

الحجية :

مثلما خادم هاي الشياب والعجزه لوجه الله ، الله ان شاءالله يسخرله ناسه الطيبين ..

يسخرله جهاله ان شاءالله ..

وكفت اللكمة على كلبي ..

باوعتلها اجيت اسألها متزوج ؟؟ بس عبالك واحد وربط لساني ماكدرت احجي ولاكلمة ..

اتذكرت جرباية الطفل الشفتها اول البارحة بالغرفة المقفولة ..

جا وين مرته ؟

وين جهاله ؟؟

هذا هم وراه قصة ...

ولازم اعرفها .

كمت طبخت الغدا والحجية يمي تسولف على ايام كبل :

جنه نروح للسوك من الصبح يودوني اروح اجيب تمر ..

اجيب زبيل التمر على راسي ..

احطه على راسي وارجع مشي للبيت والدرب طويل وكل شوية اتناوشلي تمرايتن تلاثه آكلهن ..

منا لمن اوصل للبيت الكه التمر مخلص والزبيل فارغ ..

#الزنبيل :

هو سلة محاكه من خيوط الخوص ( سعف النخيل ) .

عذراء :

ياا .. ومايحاجونج اهلج ؟

الحجية :

مايفيد ...

يحجون مايحجون هو الدرب بعيد بيش نخلصه ..

عذراء :

اي هم صدك ..

بس التمر حلو كلش ماتخافين يسوي بيج سكر ؟

الحجية :

لااا ..

كبل ماكو هاي الامراض لاضغط لاسكر بينه ..

ولهسه مابيه ..

التمر يطي صحه وعافية ..

حتى سنوني ماشلعت منهن ولا واحد ولارحت عليهن للطبيب بيوم من الايام .

جا مثلجن بنات هالايام بعدجن جهال وتشتكن من مفاصلجن وسنونجن طايحه ..

عذراء :

اي والله صدك ..

من امس لليوم ظهري يوجعني من التنظيف ..

الحجية :

على كيفج ويه روحج البيت نظيف ويلمع المن منظفته .

كتلها بكلبي لو تدرين شلون جان حاله قبل التنظيف ..

عذراء :

سوله خالة

الحجية :

شوفيلج غير سوله ، سوله بيها فايده اكثر ..

دللي رجلج .

مااشوفج مهتمه بي ،.

درت عليها باوعتلها لا هاي الحجية خطره البارحة اجت شوكت لحكت شافتني مامهتمه بي ؟؟

انوب يكول امي فقيرة ..

اثاري ماكو ام فقيرة ..

عذراء :

مو اكلج تعبانة مكسور ظهري من التنظيف امس كله البيت جلفته لاخليت بردات لافراشات متعوده كل شهر اسوي حملة .

ب(٣ ) رجع سند ..

جنت كاعده اباوع عالتلفزيون والحجية منسدحه بالغرفة ..

سند :

السلام عليكم

عذراء :

عليكم السلام .

دخل كبل لامه مدري جدته سلم عليها وكعد يمها شوية ورجع دخل للغرفة يبدل ..

اجت الحجية يمي كالت :

البارحة مكسور ظهرج من التنظيف اليوم شبيج ؟

عذراء :

شبيه ؟

الحجية :

كومي وره رجلج اطيه هدومه كليله شمحتاج ..

فكيت عيوني هاي الحجية ماناوية تجيبها البر ..

كمت دكيت علي باب الغرفة كال :

دقيقة ..

الحجية :

المن داكة الباب غير رجلج هو

استغفرت ربي من هالدوخه هاي والاذية وكتلها :

استحي .

الحجية :

مامبين عليج ..

عذراء :

يااا !!!

خلف الله عليج خاله .

بعدنه نحجي فتح هو الباب كال :

هاا ؟

باوعتله وعضيتله شفتي وظهري للحجية كتله :

ماكو بس الحجية كالت اشوفك خاف محتاج شي ..

تكول مامهتمة بيك انه .

صفن بوجهي ثواني ودار باوع لامه كللها :

لاا ..

ماكو مثلها عذ.. قصدي سُرى ..

مهتمه بكل شي ونظيفه ومرتبه وتاخذ الحجي ..

الحجية :

جا مادامها هيج هاي علاكة الهدوم من امس جوه الكرسي ماتشوفها ؟

باوعتله وانه روحي طافره الحجية الفقيرة بدت تكشر عن انيابها كتلها :

هدوم قديمة لميتها بعلاكة اريد اطيهن للفقره ..

الحجية :

هاا كون هيج خوش .

عبالي هدومج كلت يجوز رايحه لاهلج وراجعة وباقيات بعلاكتهن .

حس هو الجو اتوتر وانه بديت اضوج ومايدري شكو كال :

نتغدا ؟

الحجية :

اي يمه حقك جوعان ..

اسراء مدري شسمج ..

صبي لرجلج جوعان ..

بعدني واكفة كباله ومطيتها ظهري رفعت حواجبني متعجبه غمزلي بعينه اسكت ..

لا تتقاسَم جُنُونك مَعَ البَاردِين

#سند_و_العذارى ٣___٤

#البارت_٣

#روز_الفياض

- إنَّ أعظَم ما يَتواجَد فِي سَجِيّة شخصٍ ما . . كونهُ حَنُوناً .

الحجية جانت تنام من وكت الحمدلله من رحمة لان لو تبقى كاعده يمكن ارتكب جريمة ..

سند :

شبيها امي وياج اليوم ؟

عذراء :

امك الفقيرة طلعت مفتحه بالتيزاب ..

ضحك كال :

شبيها ؟

عذراء :

شبيها بعد تعرف انه مو مرتك ..

صفن بوجهي ..

عذراء :

كل حجيها وتلميحاتها تكول تعرف انت جذاب .

سند :

الملافظ سعد على كولت المصريين .

عذراء :

وانه شكلت ..؟

سكت ودار وجهه كتله :

شكد اعمارهم جهالك ؟

التفت علي كلي :

شنو ؟

عذراء :

جهالك شكد اعمارهم ؟

بقى ساكت مده بعدين كلي :

هواي تحبين تسألين ..

عذراء :

جا هسه هم كدام امك انه مطفية وطابكه على صفحة حتى زحمه ظليت افر باذاناتي اليوم وهي تسولف كل شي مااعرف ..

رجع سكت بعدين كلي :

اخوج خابر اليوم يسأل عليج .

عذراء :

شيريد ؟

هم اله عين يسأل .

سند :

يتأكد انت عندي ..

عذراء :

يدري بيك عاقد علي ؟

سند :

طبعا يدري .. هو كايل لسعد علي .

عذراء :

جا شيريد ؟

سند :

ماادري .

اخوج انت اعرف بي مني .

عذراء :

خوت عظامه ..

اخوي ..

سند :

اهلجج..

سكت كتله :

مابيهم خير ..

سند :

انت حاقده عليهم لان ذبوج على سعد لو لان ماتحبينهم لو شنو بالضبط ؟

عذراء :

اشوفك انت هسه كمت تسأل ؟

سند :

مثلما تردين تعرفين خاف امي تسألج انه هم لازم اعرف ..

عذراء :

شكد عدك جهال ؟

سند :

ولد عمره ١٢ سنة وبنية عمرها ١٠ سنوات .

عذراء :

يااا كبار ، عبالي جهال صغار .

ضحك وسكت وانوب رجع ضحك كتله :

سلامات ؟

سند :

من تحجين تضحكين ..

سكتت لان مو اول مره اسمع هالجملة سعد دوم جان يضحك علي ..

بقيت ساكته ولاحجيت بعد ..

شوية وراح يقفل الباب انه كمت نمت .

اجه هو نام ..

عبالي غفى فجأة كلي :

من تحجين تنفعلين ، تحجين من كل كلبج ..

ماجاوبته ادري بي يريد يبرر كال :

انت مبين عليج فقيره .

عذراء :

عادي لاتصير حساس .

دائما سعد يضحك علي ويكلي ماتعرفين تحجين ..

وامي جانت تكلي عبالك تربات عرب لاتعرفين تحجين ولاتتصرفين ..

جانت تصيحلي المعيدية ..

سند :

ليش ؟

عذراء :

لان البس حجاب وهدومي طويله ..

بقى ساكت ..

عرف هسه موقفي من اهلي شنو .. وليش .

درت انام سمعته تنهد حيل بعدين كلي :

جهالي عد امهم ماتخليني اشوفهم .

علي الجبير ونرجس اصغر منه .

ماجنت اريد احجي بس اتذكرت شغلة فكتله :

ليش كلت اسمي سروه مدري اسراء ؟

سند :

سُرى ..

عذراء :

اي سُرى ..

ليش ؟

بقى ساكت بعدين كال :

مرتي اسمها هم عذراء .

رفعت راسي كتله :

احلف ؟

سند :

والله ..

عذراء :

اشوف امك نازله علي غلط ..!!

سند :

مو عليج على مرتي ، ليش انه كتلها اسمج سُرى حتى ماتزعلين من تغلط عليها وحتى ماتحقد عليج بدون سبب يسوه ..

عذراء :

وسروه منين ؟

سند :

سُرى ..

اسم اجه على بالي وكلته .

عذراء :

اممم .

بس والله الحجية مو هينه .

ضحك على كيف كال :

كتلج على كل شي تنتبه وكل شي تلاحظ .

وفعلاً كلام سند ..

اول ماكعدنه الصبح طلعت من الغرفة سند بعده نايم اليوم جمعة واسمع صوت الحجية بالمطبخ تحوس .

رجعت اخذ تليفوني كعد سند :

صباح الخير .

عذراء :

صباح النور .

سند :

قبل لا تطلعين رتبي ملابسج بالكنتور لاتنتبه الحجية على العلاكة .

كمت اخذت علاكة الملابس خليتها جوه الجرباية لان استحي افتح كنتوره .

باوعلي وهز راسه ماعجبه .

كمت اريد اطلع جرني من حجابي ..

عذراء :

شكو ؟

هيي !!!

سد باب الغرفة وكلي :

نزعي حجابج .

فكيت حلكي :

هااا ؟

سند :

تره امي مو غبية من اجت لهسه وانت لابسه الحجاب حتى بالبيت ..

عذراء :

لا تره مااتفقنه هيج !!

كتلك اذا هاي اخذ المفتاح من سعد وخليني اولي بس انت ما ....

بعدني احجي جر حجابي وذبه ..

ردت اصرخ بس رأساً كلي :

اشششش ..

لاتحجين ..

انه عاقد عليج يعني مو حرام تنزعين كدامي ..

من سمعت تنزعين كدامي حسيت صار عدي شحطه ابلعومي ظليت اكح ..

شرگت من حجاية ..

سند :

على كيفج ..

تره مامسوين شي غلط شبيج صرتي صفره ..

سكتت وعدلت شعري بيدي حاولت اتقبل الفكرة بس ركضت عالحجاب كتله :

مااكدر ..

دفعني وره الباب ورجعني عالحايط بيده وكلي بعصبية بس بصوت ناصي :

انت تتغابين لو شنو ؟؟

انت تفتهمين يعني شنو انه عاقد عليج لو لا ؟

تفتهمين سعيد الدسم بعد مو رجلج انه رجلج هسه ؟...

حاولت اسيطر على انفاسي رغم خوفي حتى ابقى ساكته ماادري شجاي يصير بحياتي

ليش اطلع من مطب افوت بمطب ثاني ؟

هذا شكله واحد مو صاحي ..

خبل .. واخبل من سعد بعد ..

بلعت ريكي كوه كتله :

وخر ايدك ..

وخررر ..

دفعته وفتحت الباب وطلعت ..

جسمي كله ينتفض ويرجف ..

دخلت للمطبخ لكيت الحجية كاعده :

صباح الخير

الحجية :

صباح النور ..

سويت الريوك واسمع صوته راح للحمام .

الحجية عيونها وراي تباوعي فجأة كلتلي :

لوما نازعة الحجاب اليوم جا كلت هاي مسويتلها مصيبة ومهزومة من اهلها وسند ملفيها عده ..

اتفاجأت بكلامها ..

سند كلامه صحيح الحجية تلاحظ كل شي عبالك تقرا افكاره مدري يقرا افكارها ..

عذراء :

اذا شعري رطب البس حجاب لو ربطه الجو بارد .

الحجية :

اي صحيح ، احسن من ذيج الصلفة عود تتعيقل وتدلع تلبسلها كاسيته مدري شسمها .

عذراء :

شنيه انوب الكاسيته ؟

دخل هو كال :

كاسكيته ..

عذراء :

هااا ..

عشتوا ..

هي قابل كل عذراء يلوكلها ..

ماباوعلي بقى مدنك والحجية تباوعلي وتفر بايدها مأيدتي وهي ماتدري اقصدمن .

كعدنه نتريك ساكتين فجاة الحجية كلتلي :

لا لابستلج حلقة لاتراجي ..

رفعت راسي باوعتله وكتلها :

مااحب البس .

الحلقة تخنكني ..

الحجية :

عالاقل تراجي لبسيلج الزلم تحب المره التتزوك وترتب روحها وانت عدج رگبة مال ناگة تلمع ..

فتحت عيوني هاي شتيمه لو شنو باوعتله كتله :

رگبتي رگبة ناگه !!!

رگبتي طويلة قصدج ؟!!

سند :

قصدها يعني حلوه

الحجية :

هاي المره الحلوه كبل يكولون جنها ناگه ..

ثداياها كبار وبيضه ورگبتها تلمع وتراجيها تتلاصف ..

عفت الخبزه البيدي وكمت بسرعة كتله:

بعد مااكدر ..

طلعت من المطبخ ركض للحمام دخلت وسديت الباب ..

يمه منين طلعتلي هاي المره ؟؟

ربي عفيه جا انت تخلصني من سعد وتذب علي هاي الحجية ام لسان مفتلت ؟؟

لسانها اخس من لساني ..

بقيت بالنص ساعة كاعده بالحمام استحي اطلع ..

مالي عين اراوي وجهي للرجال بعد !!

فجأة دك الباب ..

كمزت ..

سند :

سُرى ؟

بقيت ساكته رجع دك الباب :

بيج شي ؟

فتحت الباب شوية وطلعت بس عيني كتله :

جدتك فقيره مو ؟؟

هاي مو مره جيمس بوند ..

ضحك حيل وانه رجعت سديت الباب ..

اسمعه يضحك وره الباب ..

شوية ورجع دك الباب من جديد ..

فتحته كلي :

ادري ليش حابسه روحج هنا ؟

عذراء :

شارده منها بعد ليش ..

حسيته حاصرته الضحكة :

خلص راحت للهول طلعي كملي ريوكج ..

راح وانه غسلت وجهي لان احسه اشتعل نار .

طلعت للمطبخ كبل كعدت اكلت لكمتين وكمت ..

رحت ادور عليه حتى اسأله شنو اسوي غدا لكيته كاعد هو وياها بالهول يباوعون عالتلفزيون .

بس شافتني كالت :

هاا شلون صرتي ؟

باوعتله مافهمت سؤالها شنو معناه بس كتلها :

الحمدلله

الحجية :

اي خوش .. الحمدلله ..

اكلي زين اول جاهل يريدله تغذيه زينة ..

رأساً هو كال :

امي عرفتج حامل بس شافتج لعبت نفسج من الاكل .

احتاريت شحجي ..

غلست عالحجي السمعته حتى لااخرب الاتفاق وكتله :

تعال بدلي القنينة خلص الغاز ..

مو زين عالجاهل اشيلها ..

رحت للمطبخ اتانيه اجه كبل عالقنينة كتله :

تعااال ..

عوف القنينة مابيها شي وفهمني وين تريد توصل ؟

ضحك كال :

علمي علمج ..

عذراء :

شوكت تروح ؟

سند :

ماادري هي عدها مراجعة للطبيب من تخلصها تروح .

عذراء :

اللهم صبرج ياروح ..

سند :

اخذي الموضوع بضحك ..

هن يومين وكلمن يروح لحال سبيله ..

كتله بعصبية :

وحجابي ؟

ونومتي يمك بنفس الغرفة ؟

والحجي اليفشل التحجي كدامك ؟

انت يمكن تكدر تضحك بس انه مااكدر ..

سكت ودار وجهه بعدين رجع دار علي :

يعني انت جنتي تلبسين حجاب كدام سعد ؟

لو تنامين بغير غرفة ؟

عذراء :

سعد جان رجلي شتحجي انت ؟

سند :

جاان .

جاان ..

هسه منو رجلج ؟؟

باوعتله وبقيت ساكته .

سند :

انت تدرين شنو شروط رجوعج لسعيد ؟؟

تدرين لو لا ؟؟

لو بس لابسه حجاب وتصلين بدون فهم ؟؟

عذراء :

عالاقل اصلي ..

مو مثل غيري مسوي نفسه يساعد العجزه والمسنين لوجه الله وهو حتى صلاة مايصلي ..

سند :

وللججج ...

رفع ايده يريد يطكني وانه صرخت وغطيت راسي ..

صاحت الحجية :

هاا ؟

شكو ؟؟

شبيكم ؟؟

سندد ؟؟

اتنهد حيل ونفخ بوجهي وراح ..

فوك القهر انوب لازم اطبخ ..

بديت اجهز مواد الطبخة بس لاعنده بهارات لا عنده معجون طماطة شنو اسوي الغدا نواشف ؟؟

صفنت افكر واتذكر من بطلتني امي من المدرسة بالسادس ابتدائي ولزمتني المطبخ وره ما اختي خنساء شردت ..

انهزمت من البيت وبعد مالكوها .

جنت يومية احصلي كتله لان مااعرف اطبخ .

يوم اسوي التمن عصيده

ويوم يبقى حب

ويوم يحترك الجدر ويوم ماصخ ويوم مالح ..

شبعت كتل لحدما اتعلمت اطبخ .

دخل سند حاجاني وانه صافنه ماادري شيكول ..

فجأة نزيت من خله ايده على جتفي يندهني ..

رأساً وخرت وهو رجع ليوره كلي :

احاجيج ماتسمعين ..

عذراء :

شنو ؟

سند :

اكلج لاتطبخين راح اروح اجيب سمج مادام امي هنا .

عذراء :

شدعوه عدك شي ينطبخ ..

سند :

مااعرف اطبخ شسوي ..

شنو تردين اجيب ؟

عذراء :

كيفك براحتك ماكو خطار يتشرط .

ماحاجاني ولاباوعلي طلع كبل .

هسه لازم اروح اكعد يم الحجية عالاقل حتى لو تجفص هو ماموجود ماكو احراجات .

رحت كعدت والصدك جنت نعسانة هي متمددة وتباوع عالتلفزيون وانه كاعده اتثاوب وصافنه عليها .

كعدت كالت :

ماتطيني تليفوني وتحطيلي بي هذا مال الترنيت ..

عذراء :

شنوه الترنيت ؟

الانترنيت قصدج ؟

الحجية :

اي اي ..

ضحكت كتله :

هم تعرفينه ؟

والله عمي خوش حجيات اخر وكت .

الحجية :

جا شمالني مااعرفه .

تطيناه هناك ظل بالغرفة .

رحت جبتلها تليفونها واطيتهيا .

الحجية :

سويلياه ..

عذراء :

ماعدنه نت بالبيت ابنج ماشاد نت .

الحجية :

هاا ؟ شعجب ؟

وانت صابره بدونه ؟

عذراء :

جا شسوي ..

الحجية :

كليلي بالله شلونه سند وياج ؟

زين مو زين ؟

وين يروح منين يجي ؟

عذراء :

كل شي ماادري الله وكيلج يطلع الصبح بعد مااشوفه لليل يجي لو يتعشى لو متعشي يشربله كم جكاره وينام لافوكها ولاجواها .

الحجية :

لايسولفلج لايكلج ؟

عذراء :

شيسولفلي ؟

اكلج يطلع الصبح يجي بالليل ينام .

الحجية :

معناها انت خارمه ..

اكو وحده تخلي رجلها يطلع من الصبح يجي بالليل يلف راسه وينام ..

باوعتلها بنص عين كلت هسه هاي شحجي وياها كتلها :

شسويله ؟

الحجية :

صارلي يومين اباوعلج واراقبج ، خارمه ..

عذراء :

حجية مو جنج نازلة علي دوسه ونص فدوه ؟

الحجية :

هدمتج ماتبدلينها ..

من الصبح لليل نفس الدشداشة .

لاشميت بيج ريحة عطور من هاي الطيبة لا لسبتيلج لبسة مرتبة لا فتحي شعرج .

لا حطيتلج شوية حمره وكحله .

حطيت ايدي على خدي اباوعلها شلون تحجي وتسرسحت عالكرسي شويه كتلني النعاس .

الحجية :

دشداشتج شعرضها حتى انه المره الجبيرة دشداشتي احلى منج .

عذراء :

الدنيا بارده شلبس يعني ؟

الحجية :

هاي سوالف البنات تارسه السوك واشتري ..

عذراء :

ان شاءالله من يصير عدي فلوس .

الحجية :

مامعقولة سند مايطيج مصرف ، واشتري .

عذراء :

لا مايطيني من اجيت لهالبيت هذا ولهسه فلس احمر مامطيني .

الحجية :

مااصدك .. يجوز انت بخيلة .

مبين عليج بخيلة .

كعدت عدل كتله :

يااا .. انعم الله عليج .

هو هذا حظي وهذا فالي .

صارت الساعة ب(١٢ ) ونص وسند ماكو .

بالوحده اجه .

جايب سمجه وخبز حار وطرشي ومتسوك ..

كعدنه نتغدا ساكتين فجأة الحجية كلتله :

ليش ماتطي لمرتك مصرف ؟

رفع راسه مستغرب باوعلي بطرف عينه كتله :

الحجية تكلي هدومج شحالها كتلها مايطيني مصرف .

بقى ساكت .

الحجية :

تكول من طبيت لبيته لليوم مامطيني فلس صدك ؟

ماباوعلي بقى ساكت كلتله :

اطيها خليها تلبسلك تتزوكلك .

سند :

حلوه بدون ماتتزوك .

الحجية :

اطيها مصرف تشتري تلبس المن هي لابسه .

هز راسه اي وكللها :

ان شاءالله .

الحجية :

اخذها للسوك وشوفها شمحتاجه هدوم دشاديش مال بنات من هاي المخصره ، داخليات مال عرايس ، عطورات ، شسمه هذا اليحطنه فوك عيونهن يلمع ..

عذراء :

مال حكيمة مرت دواس ترديني احط منه ؟؟!! هههههههه ..

هاي العايزه ..

الحجية :

مو الج اله هو هم يريد المره النايمه بحضنه متزوكه ولابسه .

عذراء:

نايمه بحضنه ؟!!

وصلنه لهنا ؟؟

من فشلتي ماكدرت اسكت وحتى اخليها ماتجفص بعد كتلها :

تكليلي مبين عليج بخيلة خو شفتي بعيج حتى مايكول صار بس ساكت .

وتجين انت ترديني البسله واتحمرله ..

تلومين بيه انه بس ابنج ماتطين بي .

الحجية :

لاا يااا مو هل جاي احجي وياه والومه ، جا شسويله اكثر اذبحه خوما اذبحه .

مو هل يكول ان شاءالله شيسوي يعني ؟

يجوز ماعده فلوس لو عده مايقصر اعرفه ..

هي تصيح وانه اصيح عافنه وكام ..

ردت اسكتها كتلها :

ارتاحيتي هسه من اتعاركنه بسببج وزعل ؟

الحجية :

فوكما اداعيلج ؟

عذراء :

مو انه ليش متحمله وساكته لان ادري بي يزعل .

وانوب تكليلي انت بخيلة ..

سكت هي بعد ماحجت ..

بعد الغده سويتلهم جاي ورحت نمت شوية ..

حسيته دخل للغرفة نام عالجرباية ماحاجني ولاحاجيته ..

العصر كعد كال :

رايح اودي ملابسي من اللوندري ..

تردين ترحين وياي حجية ؟

تغيرين جو شوية .

الحجية :

يالله امشينه .

هي لبست وطلعت كعدت بالسيارة وهو رجع انه كاعده بالهول بحدي وصافنة دخل كلي :

ترحين ويانه ؟

عذراء :

خاف زحمة ؟

سند :

من ؟

عذراء :

منك يعني مطلعني واليوم مغديني سمج ..

سند :

لبسي عباتج وتعاي .

ركضت لبست عباتي وحجابي وكعدت بالسيارة الحجية كاعده كدام وانه وره .

نزل هدومه للوندري ورجع كلتله :

شوكت يخلصن ؟

سند :

عكب باجر .

الحجية :

جا شبيج ماتغسليله هدومه ؟

غير واجبج هذا ؟

مو حاطلج غسالة ؟

باوعتله بالمراية وهو هم باوعلي ودار وجهه يباوع من الشباك ..

عذراء :

الغسالة عطلانه خاله .

الحجية :

طبعا تعطل اذا انت يومية تكولين مسوية حملة تنظيف عالبيت شلون ماتعطل .

سكتت مابيه حيلها هالعجيز بيها كل الحيل للمداهر والحجي .

اخذنه للسوك بقيت كاعده بالسيارة ونزل هو والحجية تمشوا مانزلت صدك يفشل شكلي .

عباتي شحالها ونعالي لاستيك ومكطوع ودشداشتي ملحه ..

حسبي الله عليك ياسعد .

تصرف العندك والماعندك بالملاهي وعالموزينات وانه حسره علي الدشداشة .

شوية واندكت الجامه علي باوعت شفت سند ..

فتحت الجامة :

هاا ؟

سند :

ماتردين تشترين بهارات وهالسوالف ؟

عذراء :

شسوي بيها ، مو تكول متفق ويه سعد من يرجع تطلكني .. وانت ماتعرف تطبخ .

ماحاجني ..

سديت الجامه ..

رجعنه للبيت ساكتين ..

بالليل طلع علاكه سالني :

هاي تكفي لبنيه عمرها (١٠ ) سنوات ؟

باوعت شفته جايب بجامه لبته اكيد كتله :

حلوه ..

وتكفي اي ..

سند :

هي ناعمة شوية مو خشنه .

عذراء :

الله يخليلك اياها .

وطلع تراك مشتريه لابنه راوانياه ..

عذراء :

صعبه العنده جهال ينفصل ..

قرار صعب ..

بقى ساكت .

بعدين طلع علاكة كلي:

هاي الج امي اختارتهن .

فتحت العلاكة بيها شحاطه عبالك مشحوف ودشداشتين من ذني اليلمعن كلهن تطريز وزرق ورق وانوب وحده ماروني والثانية حمره ..

عذراء :

ماله داعي تجيبلي تره انه من حجيت عالغدا ..

قاطعني :

ادري بيها هي صعبه وتحجي وتنتقد هواي وانت تحاولين تاخذينها على حسب تفكيرها .

عذراء :

جا معناها بدلهن ذني مو شحاطه عبالك مشحوف تره قياس رجلي ٣٨ مو ٤٨ .

ضحك وسكت ..

انقهرت عليه لان يفكر بجهاله وهمه مو يمه .

وانقهرت على روحي اكثر محد يفكر بيه من جنت صغيره ولامن كبرت ..

سند ؛

تشربين جاي .

عذراء :

اي اشرب بس انه اسوي لا امك تشهرني مثلما انهدت بيه الظهر على هدومك ليش مااغسلها .

ابتسم وطلع باكيت الجكاير وانه رحت سويت جاي واجيت

طفى الجكاره وكلي :

شعجب ماعدج جهال ؟

شوكت اتزوجتي سند ؟

بلعت ريكي وشربتلي شربة جاي حار شوية وبعدين كتله :

صار سبع سنين عجاف ..

حط استكانة الجاي ودار علي :

نعم ؟؟

ضحكت كتله :

سبع سنين عجاف شبيك مستغرب ؟

ضحك بعدين كلي :

ليش ماعدكم جهال ؟

ضحكت جذب خاف تخوني عيوني وتدمع :

من رحمة الله ماعدي جهال ، المن مخلفه جهال من واحد مثل سعد .

سند :

يعني انت ماتردين لو هو ؟

عذراء :

رحمي طفولي ..

ماحاجاني ولاعبالك سمعني ..

بقى ساكت .

شرب جايه وطلع يكمل تدخين بره ..

بقت الحجية يمنه عشر تيام وراحت ..

يوميه جنت اتوقع يجي سند ويكلي سعد اتصل لو اجه حتى يكلي اطلكج بس ماكو شي .

وين وله هذا ؟

لشوكت ابقى كاعده ابيت الرجال بالله ؟؟

وره يومين اجه بالليل كلش متأخر وانه غافيه بالغرفة الثانية سمعت الباب انفتح كعدت ..

شوية واندك باب الغرفة عبالي اتحلم جنت بعدني نعسانة ..

عذراء :

منو ؟

فتح باب الغرفة كلي :

كاعده ؟

عذراء :

شكو ؟

بقى واكف اباب الغرفة ويباوع بتليفونه بعدين رفع راسه كلي :

سعد خابرني اليوم ..

كمت على حيلي كتله :

شيريد ؟

سند :

اطلكج ..

شيريد يعني ..

يريد اطلكج حتى يرجعج .

عذراء :

بس انه مااريد ارجعله ..

التفت علي باوعلي :

وين تردين ترحين ؟

عذراء :

اي مكان ؟

سند :

روحي لمالك ..

روحي لامج ..

سكتت الظاهر لازم ارجع لسعد ..

او ليش مثلما كال سند اروح لامي اجرب عسى ولعل تحن علي مره بحياتها ..

اي احسن حل لازم اشوفلي مكان كبل لايطلكني احاول عالاقل ..

ثاني يوم الصبح وره ماراح للشغل لبست عباتي وطلعت رحت لامي ..

دكيت الباب فتحته كتلها :

ها يمه شلونج ؟

باوعتلي :

هلا ..

بعدج عدله ؟

عذراء :

اي ..

بعدني ..

دخلت وعافتني بالباب ، دخلت وراها .

البيت قذر بمعنى الكلمة وهي كاعده من الصبح تدخن نركيلة ..

عذراء :

يمه بعدج على سوالفج ؟

نركيلة من الصبح ؟!!

امي :

وصمه شعدج جايه ؟

شعجب ذكرتيني هسه ؟

عذراء :

تدرين بسعد حابسني مايخليني اطلع .. هلبت يوم اجيتي شفتيني ؟

امي :

بطرانه ..

هو الجبير يسأل عالزغير لو بالعكس .

عذراء :

جا مو ادك عليج شكددد لو تكطعينه لو تطيني حظر لو ماتشيلينه ..

من تردين شي من سعد ومايرد عليج تشيلين الحظر وتخابريني بس هاي ..

امي :

بطرانه ، تحبين النكد والنگ مثل ابوج بس مال عتب ولوم وطيحان حظ .

عذراء :

انعم الله .

امي :

ومرض فوك مرض .. مابيكم خير لا انت لا اخوج لا ذيج الجلبة الشردت وماجابتنله بس الحجي .

بس عليمن تطلعون على ابوكم العار .

عذراء :

اليسمعج يكول اتزوجتي وره ابوي نبي ، هههه .

امي :

اكلي خ... ه وانجبي .

شتردين لافيه على حالي ؟

عذراء :

سعد طلكني .

امي :

وشنو الجديد يومية يطلكج ويرجعج .

مدري المن مجلب بيج ؟!!

عذراء :

خدامة وبلاش هدومه نظيفة ومكويه لكمته جاهزه بيته نظيف شيريد بعد ..

امي :

وشتردين هسه خلصيني؟

اريد اروح للسوك ماعدي وكت ..

عذراء :

اكلج طلكني مايصير ارجعله بعد الا اتزوج واحد ثاني يالله .

وانه اصلا مااريد ارجعله ..

امي :

جا وين تولين ؟

رجعيله وانجبي ..

احسن تاخذين الشوارع لو اخوج السگط يزوجج ..

لو كلي لاخوج يشوفلج رجل ..

عذراء :

مااريد ..

اخوي .. عاف الناس كلها واطاني لسعيد ..

اذا ذيج المره باعني بتليفون هالمره بشاحن .

امي :

هههههه هم صدك .

عذراء :

هسه شلون ؟

امي :

بشنو ؟

عذراء :

وين اروح ؟

امي :

وانه شسويلج ؟

روحي عرسي روحي لاخوج رجعي لرجلج ..

عذراء :

يمممه .. شوفيلي حل ..

خل ابقى يمج ..

امي :

لاا عيوني رجلي رجال غريب وانت مره غريبة انوب تسويلج مصيبة وتبليني وياه .

عذراء :

شسوي ؟ والله مااسوي شي ..

امي :

يالله عذيره يالله خلصيني اريد اروح للسوك .

عفتها وطلعت دمعتي على خدي ..

بقيت امشي بالشارع ماادري وين اروح ..

حتى بيت سند مااندل ارجعله ..

كعدت عالرصيف ابجي لحدما حركتني الشمس .

كمت كعدت بالفي براس الشارع ..

بقيت يمكن ساعتين كاعده بالشارع استحيت ادك على سند ..

اكو دائرة بقيت كاعده اباوع عالناس الطابعه والطالعة .

ماادري بيش الساعة صارت بس شوية وسمعت صوت اذان الظهر ..

حسيت نفسي جعت وماعندي بس (٥٠٠٠ ) لان دفعت خمسة كروه من اجيت وهي اصلا عدي بس عشره ..

بقيت كاعده واسأل نفسي معقولة الله سبحانه وتعالى يدري بيه نظيفه وشريفة ويخليني اروح لطريق الغلط ؟؟

لا لا مااعتقد يخليني انه سامعة يكولون الله يكول ( وعلى نياتكم ترزقون ) وانه نيتي بس الستر والعافية ولكمة حلال ..

اتذكرت امي انقهرت حتى ماخافت علي ابقى بالشارع ماخافت علي خاف ماعدي كروه ..

خاف ماعدي اشتري لكمه ..

دك تليفوني سعد ..

كطعته ..

رجع دك هم كطعته ..

دك مره ثالثة ردت اكطعه بس بعدين فكرت مالي غير سعد الظاهر لازم ارجعله واتحمل مصايبه كل عمري ..

جاوبته :

الو

سعد :

ووجع ليش تكطعينه ؟

عذراء :

ماعندي شحن

سعد :

شبيج ماعدج شحن لو ثولة دومج ثولة ماتشحنين التليفون كم مره كتلتج على هاي السالفة ومااتوبين .

عذراء :

هسه شتريد ؟

سعد :

وقز القرط ..

حظري روحج اليوم بالليل اجي اخذج ، مفهوم ؟

عذراء :

ليش تريد ترجعني ؟

سعد ؛

حتى انعل والديج .. حتى تجين تكربيلي ليل ونهار .

عذراء :

مثلما اتوقعت

سعد :

ايباااه اتوقعت هي الدكتوره اتوقعت هههه ، بت الفگور .

امشي روحي ولي يالله ..

سد التليفون بوجهي ..

حتى مااطاني مجال اكله تعالي علي اخذني منا .

اخذت تكسي ورمشت على سند حتى يطيني العنوان ..

بس دخلت للبيت دك سند :

وين جنتي ؟

عذراء :

رحت لامي ..

سند :

ليش ماكلتي اوصلج ؟

عذراء :

لا خويه .. ثگلت عليك هوايه يطيك العافية ماقصرت .

سكت شوية بعدين كلي :

اليوم سعد يجي ياخذج ..

عذراء :

ادري خابرني هسه اجهز ملابسي ماعدي شي شوكت مايجي هلا بي ..

سند :

اي ..

احسنلج .. انت متعوده علي ..

وهو متعود عليج .

سكتت خنكتني العبره ..

سند :

ماشي ..

انه راح ارجع اليوم من وكت وراح اجيب اكل وياي .

عذراء :

براحتك ..

سديت التليفون وكعدت ابجي واندب حظي ..

ارتاحيتلي اسبوعين من سعد لاحجي لاغلط لااهانه لاكتل لا دردمه ولا شرب وعربده ..

الساعة ب(٢ ) رجع سند جايب غدا وياه .

اتغدينه بهدوووء

بدون كلام ..

خلصنه كلي :

شصار ويه امج ؟

عذراء :

مثلما اتوقعت ، طردتي ..

رفع حواجبه متعجب ..

عذراء :

حتى ماانقهرت علي ولا كالت هاي وين تروح ..

انه غاسلة ايدي منهم بس كلت احاول ..

سند :

الله يرحمج يايمه ..

شكد جانت حنينه ..

فقيره وطيبه ..

عذراء :

بس لافقيره مثل الحجية جيمس بوند ؟

ضحك ..

سند :

هم انعم الله عليها ربتني ..

تسأل عني ..

عذراء :

صح ..

تنهدت حيل كلي :

شگلج خايفة .؟

لو مستعجلة ؟

عذراء :

لاهاي ولاذيج ..

بس احس روحي مخنوكة ..

اتمنى اموت !

باوعلي :

لا يابه ..

ذكري الله ..

عذراء :

لا اله الا الله ..

ماكلت راح انتحر كلت اتمنى اموت ..

مامعقولة مامرت عليك لحظه تمنيت تموت ؟

دار وجهه وبقى ساكت ..

"يديّ صغيرة لكنّها تكفي لسدِّ فراغات يدك🫀."

لايك وتعليق وعشر ملصقات فضلا

#سند_و_العذارى

#ب٤

#روز_الفياض

اصبحت شيء منعقد بـ قلبي لا يغادرني ابداً .

( اتيهك وأبتعد و الگاك يم روحي .. )

بقى سند بالبيت ماطلع العصر كله بالحوش يدخن وانه عندي كآبة واتمنى يصير شي وماارجع لسعد ..

متلفتله بالعباية وتمدده بالغرفة ..

صليت المغرب وكعدت على السجادة ادعي ..

انه مامخلصه مدرسة حتى اعرف ادعي دعاء مرتب ومااعرف ازوك الحجي كبل لا اكول الك ياربي ..

بس انه عندي اسئلة بكلبي واريد منك حل لو جواب ..

انه يمكن جاهلة وماعدي معلومات بس احبك وعندي ايمان انت حق وعدل وماتقبل بالظلم .

بس معقولة واحد يخلص حياته كلها مظلوم ؟؟

يعني معقولة هاي حياتي خلص بعد ماكو مفر من العيشة الكلها اذيه ونكاسه ..

انه ماادري صلاتي مقبولة لو لا بس هاي مقدرتي انه جاي احاول بكل قوتي ابقى ملتزمه واحافظ على روحي وعلى ديني بس ياربي هالسعد هذا مايخليني يمكن هذا ابتلاء بس شوكت يخلص ؟

تعبت ..

دك سند باب الغرفة كتله :

هاا ؟

فتح الباب كلي :

فد ساعة ويجي سعد ياخذج ..

خنكتني العبره ماحاجيته بقى واكف بعدين كلي :

اذا تحتاجين شي رقمي عندج ..

لاتستحين .

هزيت راسي اي بدون كلام لان بس احجي ابجي وانه جبت كل عمري اضحك جذب واتشاقى وانكت حتى لحد يشوفني ابجي ..

بقيت كاعده بمكاني واردد :

ياغياث المستغيثين

ياصريخ المستصرخين

ياراحم المساكين

ويامعطي السائلين

اسألك برحمتك التي وسعت كل شيء وبكرمك وجودك ان تقضي حاجتي وترحمني ياارحم الراحمين .

اقل من ساعة ورجع سند فتح باب الغرفة :

سعد بره ..

انقبض كلبي باوعتله على طرف لساني اتوسل بي وابوس ايده بس لايرجعني بس كمت خليت عباتي على راسي وطلعت كدامه من الغرفة وصلت للهول اخذت علاكة هدومي ودرت عليه كتله :

يطيك العافية ماقصرت خويه

هز راسه وبقى ساكت جنت اريد اتأخر بكل طريقة مااريد اشوف سعد فكتله :

هسه راح نروح للشيخ ؟

سند :

لا فد يومين هسه عدي طلعة لبغداد مااكدر اتأخر .

ماكدرت احجي بعد وماكو شي ينحجي .

طلعت وهو وراي شفت سعد واكف بالحوش ماحاجاني ولاحاجيته اشرلي براسه اوكف وراه ..

وكفت بدون كلام ..

سعد :

يالله ...

عبالي يحاجيني بس سند رفع راسه الي باوعلي وكلي :

انت طالك ..

رجال غريب ماجان رجلي صدك بس حز بنفسي اتطلك للمره الرابعة دمعت عيوني ودنكت .

سعد ؛

هسه على عكب باجر ؟

سند :

ان شاءالله .

اتذكرت العده فكلت :

انه هسه بالعده مو ؟

باوعلي سند وبقى ساكت وسعدد جاوبني :

اي عده هههه

عود تفتهم هي هههه

عذراء :

اي عدة المطلكة ليش تضحك ؟

باوعت لسند كتله مو صح ؟

ماحاجني ..

سعد صار عصبي صاح علي :

افتهمنه انت بالخ... ه

كافي سكتي ..

روحي ولي كعدي بالسيارة ..

اباوعله طلع فلوس من جيبه حتى يطي لسند ..

عفتهم ورحت كعدت بالسيارة حتى بجي بعد مااكدر ابجي سعد يكتلني اذا بجيت هسه عبالة ابجي على سند ..

بقيت كاعده صافنه وفجأة سمعت صوت صياح ..

فتحت الجامه سمعت صوت سعد يصيح ويغلط على سند ردت انزل انوب كلت لا يطبهم مرض انه شكو ..

بقيت كاعده بالسيارة شوية واجه سعد عيونه براسه صعد بالسيارة وطبك الباب حيل ..

ماحاجيته لايطلع عصبيته بيه .

اخذ الطريق كله يفشر ويغلط علي وعلى سند وعلى اهلي ..

وصلنه للبيت دخلني وقفل علي الباب من بره وراح ..

بقيت يومين بحدي بالبيت والباب مقفول علي من بره همزين اكو اكل بالثلاجة ..

وره يومين اجه ..

وياريته مااجه ..

جايب وياه وحده من صاحباته ..

طبت عينها صلفة سلمت علي ودخلت وياه للغرفة وانه كاعده ولاعبالك موجوده .

شوية وطلعوا من الغرفة للحمام !!!

لعبت روحي ..

سبحت الخاتون واجت كعدت يمي كالت :

انت مرت سعد ؟

عذراء :

امر خدمة ؟

كالت :

لا بس مااتوقعتج صغيرة وحلوه .

بقيت ساكته طلع هو بدل واجه كللها :

ياا كوميلنه خل نروح .

كامت هي كلتلي :

فرصة سعيدة التقيت بيج .

عذراء :

ياريت اعرف اجذب واكلج هم فرصة سعيده التقيت بيج .

بقت صافنة بوجهي وهو يضحك ..

طلعوا وانه بقيت متعجبه شو ادعي الله يخلصني انوب اتورط بالزايد انوب ظل يجيبهن لبيتي وعلى فراشي ..!!!

وهذا سند شو مااجه حتى يطلكني يم الشيخ ؟

معقولة بعده مسافر ؟

ظليت ماادخل للغرفة استنكسها ..

اخذت هدومي للغرفة الثانية واصلا انه بعدني بالعده هنا احسنلي بحدي ..

وره كم يوم هم جاب وحده ثانية ومن حجيت كتلني كتله كسر عظامي وهجم علي وشگ ايدي بالسجين مال الفاكهة وظل الدم يصب مايتوقف ..

بالبداية عباله جرح صغير ظل مستمر يغلط ويفشر هيج منج ومن اهلج ومن عشيرتج ..

بس بعدين من شاف المطبخ انترس دم خاف ..

اخذني للمستشفى خيطوا ايدي خمس خياطات ورجعت للبيت ..

بقيت اسبوع مااكدر اشيل راسي يصير عندي دوار وادوخ لان فقدت دم هواي ..

اروح للحمام زحف مااكدر اكوم ..

وابقى ميته من الجوع محد يطيني لكمه ..

الى ان جيرانه عدهم ولد صغير صعد عالسياج وظل يصيح على سعد ..

جريت روحي كوه وفتحت الشباك كتله :

هاا ؟

مو هنا سعد شتريد ؟

كلي :

خالة البلبل مالتنه نزل بحوشكم اريد اطفر اخذه .

عذراء :

اطفر ..

اباوعله نزل اخذه ورجع صعد عالسياج فكتله :

الله يخليك الباب مقفول علي وانه مريضه ومااكدر اتحرك ماتطيني خبزة من بيتكم ؟

كلي :

هسه .

وره شوية رجع دك علي الشباك كال ؛

هاي امي ودتها .

اطاني لفتين وتفاحة .

عذراء :

انعم الله

كعدت اكل على كيف رغم الجوع البيه بس مابيه حيل روحي مبهوته ..

ثاني يوم الصبح جنت نايمة وسمعت الولد يصيح فتحت الشباك كال :

سعد هنا ؟

عذراء :

لا

كال امي تريد تحجي وياج ..

عذراء :

الباب مقفول من بره كللها سعد قافله ..

صعدت المره حاجتني من السياج كالت :

صباح الخير

عذراء :

صباح النور

كالت :

انه ام مصطفى جارتكم .

عذراء :

اعرفج ..

هلا بيج

ام مصطفى :

مصطفى كلي الباب مقفول عليج كلت خل اشوفج شمحتاجة

عذراء :

يطيج العافية ماقصرتي والله

ام مصطفى :

انت حامل ؟

عذراء :

لا بس انشكت ايدي ونزفت دم هواي فمااكدر اتحرك ادوخ ..

ام مصطفى :

ياا سوده علي حبيبه لاتتحركين شتردين منا صيحي علي وانه يومية اوديلج غدا وعشا .

عذراء :

لا خيه خاف اكلف عليج .

ام مصطفى :

لا عليمن هالتكلفة هي لكمة ..

وفعلاً ظلت ام مصطفى يومية توديلي غدا وعشا وسعد ولابين ..

مر اسبوع ثاني وانه محبوسه وبس ام مصطفى تسأل عني ..

ام مصطفى :

خاف حامل .

عذراء :

لا مو حامل .

ام مصطفى :

لا انه اكول حامل .

عذراء :

مو كتلج مو حامل ياام مصطفى هي كوه .

ام مصطفى :

مو مرت اخوي مثلج نكللها حامل تكول لا لحدما حللت لكت روحها حامل وماتدري .

عذراء :

الله يلعنك يالشيطان ..

الا تخلينه نحجي يعني ..

رحمي طفولي ..

ام مصطفى :

شنو يعني طفولي ؟

عذراء :

يعني حالي حال البنية الما بالغة لاشهرية ولاحباله ..

صفنت بوجهي :

اول اسمع بهيج شي ..

عذراء :

ولاتكليلي اتعالجي تره ماله علاج ماسمعت بوحده رحمها طفولي وبعدين حبلت وصار عدها جهال ..

ام مصطفى :

كل بيد الله وشمدريج ماكو وحده تعالجت يجوز اكو بس انت ماسامعة .. اليأس من رحمة الله حرام ..

كفر ..

ثاني يوم من الصبح دك علي مالك اخوي مالي نفس اجاوبه بس كلت خل اشوف شعده ..

عذراء :

الو

مالك :

هااا عذيره شلونج ؟

عذراء :

عايشة ..

مالك :

اكلج سعيد بعده مارجع مو ؟

عذراء :

شمدريني بي ، صارله ايام مالافي عالبيت وقافل الباب علي .

مالك :

شوفي اكلج ، هو وصاني كبل لايروح اشوفلج رجل حتى ..

قاطعته كتله :

شنووو ؟؟

شنو اشوفلج رجل ؟!!

رجليش انتم ماتستحون ؟؟

مالك :

انجبي واكلي خ...ه لا انعل والديج بت الزمال مو جاي احجي خليني اكمل ..

استغفرت ربي وسكتت كلي :

وصاني اشوفلج واحد يتزوجج حتى يكدر بعدين هو يرجعج افتهمتي ؟

عذراء :

جا مو زوجتوني لهذا صاحبك مدري منو سند وطلكني جا طلابه بعد ..

مامكفياته سعد النسوان الدايح وياهن يومية جايبله وحده للبيت وانه ساكته شيريد بعد ؟

مالك :

والله لو اكضج افرك حلكج فرك بت القندره سمعيني كتلج .

انت لو زوج لو زوج مابيها مجال ..

عذراء :

انعم الله

مالك :

انطمي ..

سند الله يطيح حظه مابي خير طلع مو زلمة ماكمل الزواج فما يصير ترجعين لسعيد الا زواج كامل .

عذراء :

هو انه من تزوجت سعد ماسوالي زواج كامل اخذني بعباتي من بيتنه لبيته لاعرس ولا صخام ..

مالك :

مو اكلج انت زوج ، انه ماشايف بغبائج اكلها زواج كامل تكلي عرس ولج راسج هذا بي عقل لو نعل ؟

عذراء :

تره اذيتني بس تغلط علي وانه ماادري شتريد ..

مالك :

فتحي دماغج وياي بس تخلص العده مالتج هالمره سعد راح يزوجج لواحد اتعرف عليه جديد ..

واحد طاك عده فلوس ياابو فلوس يلعب بالفلوس لعب انت لاتحجين لاتكولين مااريد من تتزوجين ذاك بعد لاترجعين لسعيد ابقي عد ذاك هو يحطلج بيت بحدج ويدللج لاترجعين بعد لسعيد ..

افتهمتيني ؟

عذراء :

وانت شمدريك بي عده فلوس ؟

مالك :

اعرف مالج شغل انت .

عذراء :

معناها انت موديه على سعد بس على اساس ماتعرفه مو ؟

مالك :

هسه فهمتي ؟

عذراء :

ذيج المره زوجتني علمود ايفون هسه هذا شمطيك ؟

مالك ؛

دانعل ابوج لابو الخلفج يافگر يابت الفگر انه صوجي اريدلج الزين ..

شكد هي العده مالتج ؟

عذراء :

وانه شمدريني .

سد التليفون بوجهي .

كعدت صافنه ماادري شسوي ماادري شتصرف ؟

ماادري المن اشتكي ..

بس خاف صدك هالمره سعد يزوجني لواحد ثاني ويورطني ؟؟

انوب هذا يكلي لاتطلكين ..

واذا طلع مو خوش ادمي ؟

هو اكيد مو خوش ادمي مادام من طرفك انت وسعد قابل شيطلع ..

ظليت محتاره ماادري شسوي ..

المن اروح هسه ؟

مالازم ايأس من رحمة الله ام مصطفى كالت اليأس كفر وانه مؤمنة .

المغرب وره الصلاة ضاك صدري كللش اخذت تليفوني طلعت رقم سند كلت احاول محاولة اخيرة .

يمكن يكدر يساعدني ..

دكيت عليه دك ماشاله ..

استحيت ارجع ادك مره ثانية ..

وره نص ساعة هو دك علي كلي بدون سلام :

شلونج سُرى ؟

عذراء :

بس لا الحجية يمك ؟

ضحك كال ؛

لا ..

شلونه سعد وياج ؟

عذراء :

الله لايرده ..

سند:

اتفضلي ؟ شمحتاجة ؟

عذراء :

اريدك تساعدني بشغلة ..

سند :

وهي ؟

عذراء :

اريدك تشوفلي شغل ..

اي شغل حتى لو خدامه ماعدي مانع المهم مكان يلمني واكل بي لكمه حلال ..

بقى ساكت سمعته يتنهد كتله :

عفيه ماعندي مكان هذولي مالك وسعد ماناوين يعوفوني بحالي مالك خابرني كلي سعد راح يزوجني لواحد طاك عده فلوس لان زواجنه ماكامل مدري شنو وانوب من يطلكني على اساس سعد يرجعني ..

بس مالك يكلي لاتطلكين هذا عده فلوس .

بقى ساكت ..

عذراء :

انه مااريد اظل بيعه وشروه كلما تصح فرصة لمالك يبيعني ويحصل من وراي كم فلس ..

مااكدر ..

سند :

والله ماادري شكلج ...

انت هسه وين ؟

عذراء :

ابيت سعد ، قافل علي الباب صار كم يوم ومايجي للبيت ..

الجيران يطوني اكل من الشباك ..

سند :

اطيني مهلة يومين اشوف اذا اكدر اسويلج شي .

عذراء :

يومين ؟

سند :

يومين ..

عذراء :

بس عفيه اريده مكان بي ناس خيره وشريفه مو مثل العدي ..

هاا .. حتى لو بدون راتب ميخالف المهم مكان يلفيني ولكمه حلال ومستوره وكاعده ..

جاوبني بملل :

ماشي ..

عذراء :

بعد شغلة ..

اذا حصلت اي شي لا تدك علي خاف هذا هنا ويكتلني .. رمش بس لو ودي رسالة عالرصيد لان ماعدي نت .

سند :

ماشي ..

سديته من سند وكعدت افكر ..

انه شجاي اسوي ؟؟؟

انه يمكن اتخبلت ؟؟

وين رايحه اشتغل وششتغل ؟

لا وجماله اتمندل واتشرط اريد شغل واكل وشرب ومبيت ههههه والله العظيم انه مو صاحية .

بس تره حقي اتخبل اذا انه صارلي سبع سنين محبوسه ويه هالجلب ..

لا منين ..

محبوسة بحدي وهو يطلع ويتونس ويسافر بحده ..

الله لايوفقك دنيا واخره ..

بقيت كاعده مكابله التليفون هسه يتصل بعد شوي يتصل ماكو ..

الساعة صارت ب(١٢ ) نعست كلت خل اروح انام متت من الضوجة بحدي ...

بس حطيت راسي نمت .

ماادري بيش الساعة فزيت اسمع سعد يحجي بالتليفون ويضحك ويه واحد شوية ودفر باب الغرفة صاح علي :

عذيره ؟؟

هييي ..

كعدي ..

باوعتله :

خير ؟

سعد :

ووجع ..

كعدي شويه ..

كعدت ورحت وراه واكف بالمطبخ ياكل ..

وكفت ساكته كلي :

بعد شكد للعده مالتج وتخلص ؟

عذراء :

وين ادري انه شكد العده ..

شتريد ؟

سعد :

هذا المطي سند طلع مو زلمة ومادبرها ..

حصلتلي واحد يعقد عليج وبعدين يطلكج حتى ارجعج ..

عذراء :

انت ماتغار ؟

انه ماشايفه مثلك !!!

سعد :

انجبي ..

حجت ام حلك الفاهي ..

عود تفتهم هي ..

حظري روحج فد يومين ويجي يشوفج ..

فكيت حلكي كتله :

هم لو ابوي جا حرگت كلبه الحجاية حتى لو حلال الله بس جا هم صعبه عليه رجال ثاني يجي يشوف بته وياخذها منه ..

سعد :

هههههههه ابوج هم ابو بت السكط هو ابوج واحد مكبسلجي طايح حظه لاغيره ولاشرف ولا خلقه ولااخلاق ..

سكت شوية وانوب رجع يضحك ..

اتنهدت ورجعت لفراشي بعدما قفلت باب الغرفة علي ..

هذا مايتأمن ..

خلصت الليل بجي ..

ثاني يوم الصبح كعدت لكيت مسج من سند :

اذا تكدرين رمشي علي .

رمشت عليه جاوب :

السلام عليكم

عذراء :

عليكم السلام هلا خوية .

بشر ؟؟

سند :

هذا بعده قافل الباب عليج ؟

عذراء :

ماادري ماشفت الباب اليوم بس يمكن ماقفله لان هو موجود البارحة رجع ماادري وين جان مسافر ..

سند :

يعني هسه هو بالبيت لو طالع ؟

عذراء :

لا اتزقنب وطلع ..

سمعته ضحك بعدين كلي :

حصلتلج شغل بالدار الاشتغل بي انه ..

تنظفين وتساعدين العجايز الموجودات انه شغلي يم الشياب ..

يطونج جرباية ويه بنية ثانية لان ماكو غرف ..

راتب ماكو بس اكل وشرب ومبيت ..

وانت براحتج ..

عذراء :

يطيك العافية ويخلصك من كل ضيك مثلما خلصتني من هالبشر الوصخه ..

سند :

ماشي اذا موافقة اخلص دوامي واجي اخذج حضري نفسج واوراقج .

عذراء :

اوراقيش ؟

سند :

هويتج جوازج ..

عذراء ؛

جوازي ؟؟

منيلي جواز ياخويه صدك تحجي ..!!

سند :

اوراقج الموجوده شنو عندج من اوراق جيبيها وياج ..

عذراء :

عد سعد ، بس هسه ادورها بالله ..

سند :

ماشي عالساعة ب(٣) اتصل عليج تطلعين ..

عذراء:

ان شاءالله .

سد التليفون رحت ركض جهزت هدومي وشغلاتي وكعدت ادور اوراقي .

حصلت بس الجنسية خليها بالجزدان ..

كعدت ادعي الله يسخرلي الناس الطيبه حتى مااتندم على روحتي لهناك ..

مااتندم كون على عيشة سعيد ..

من التوتر والخوف خاف سعد يجي ويخرب الخطة بقيت احوس بالبيت حتى لكمة ماحطيت بحلكي ..

لحدما صارت الساعة ب(٣ ) الظهر لبست حجابي وعباتي والشحاطه وكعدت كبال التليفون متانيته شوكت يرمش ..

الساعة ب(٣ ) ونص دك علي كلي :

انه عالشارع وين ذيج المره اخذتج ،.

طلعيلي ..

اخذت علاكتي ورحت الشارع فارغ بس مره طالعه تذب الزباله غطيت وجهي من عبرت عليها ولو مااعرفها ولاهي يمكن تعرفني ..

وصلت للشارع شفته كاعد بالسيارة وفاتح الجام ويدخن ..

فتحت الباب بلا كلام وكعدت ودحست روحي ليجوه خاف احد يشوفني ..

بقى واكف ماشغل السيارة ملتفت علي يباوعلي ..

درت عليه كتله :

شو واكف ؟

سند :

تره انت مو مرته بعد ليش لهدرجة خايفه ؟

عذراء :

اتكفى شره ..

اطلع عفيه ..

اطلع يبس كلبي من الخوف ..

شغل السيارة وطلع ..

من شفته طلع من منطقتنه يالله اتنفست وكعدت عدل ودرت عليه كتله :

شلونها الحجية ؟

خوما اجت وراي وكشفتك ؟

سند :

لا .. مااجت

عذراء :

جهالك شلونهم ؟

ماشفتهم ؟

سند :

لا

عذراء :

جا شبيك ماتروح تشوفهم لو تجيبهم يمك يومين يونسونك ..

بقى ساكت بعدين كال :

امهم ماتقبل .

عذراء :

ياا طركاعه لفتها ليش هيج كطعيه .

بقى ساكت بعدين كلي:

اذا سألوج وين اهلج كولي ميتين بانفجار وماعدج اخوان ..

زين ؟

هزيت راسي زين

وصلنه لدار المسنين مديرة الدار مره طيبه ومؤدبة رحبت بيه وكعدت يمي تسألني عن وضعي وليش ماعدي مكان حجيتلها مثلما سند علمني ..

ظلت تباوعلي متردده لان ماكو واحد عده عقل براسه يتورط ويه وحده مثلي مايعرف اصلها ولافصلها ..

بس ست هناء جانت طيبه كلتلي :

راح اوافق على وجودج واتحمل مسؤوليتج بشرط ماتطلعين تجذبين علي ..

عذراء :

سدج امين ، انه وحده ماعدي اهل لاعدي كرايب بس سعد وطلكني واصلا هو واحد عار مااريد ارجعله .

بس اكو شغله مااحب اسم عذراء ، سميني سُرى .

باوعت ست هناء لسند كللها :

صدك مو حلو اسم عذراء ..

ست هناء :

على راحتج .

اخذتني للغرفة خليت هدومي وبعدين خذتني راوتني كل المكان وعرفتني عالعجايز الموجودات ورجعنه لكيت سند بعده موجود كلي :

انه رايح لشغلي واذا تحتاجين شي ..

كتله :

رقمك عندي ..

ادري .

يطيك العافية .

طلع ورجع كلي :

سُرى ؟

عذراء :

جا انت صدكت اسمي سرى خوما صدكت ؟

سند :

احلى من اسمج ..

عذراء :

لاا انت ماتحب اسم عذراء .

دنك وطلع من جيبه فلوس خله بيدي كتله :

لا لا لا والله مااخذها .

سند :

مو بكيفج ..

عافني وطلع ..

نمت بذيج الليله قلقه بعدني مامتعوده عالحرية ..

البنية المفروض تنام وياي بنفس الغرفة كالوا مريضة ونايمه مستشفى ..

وره يومين طلعت ..

دخلت للغرفة لكيتها متمدده سلمت عليها وكعدت ..

رفعت راسها كلتلي :

انت سُرى مو؟

عذراء :

اي سُرى تكدرين تدلعين سروه .

البنية جان اسمها هديل ..

جنه نكعد يومية بالسبعة الصبح نصلي ونتريك ونبدي كلمن شغلها .

انه جنت اريك الحجيات الموجودات وبعدين اي وحده تحتاج سباحة وماتكدر جنت اسبحها واغسل الملابس مرات ومرات اغسل الماعين ..

شنو الشغل اللي يكلولي عليه اسويه ..

مااشتكي ولااحجي متعوده عالشغل ..

بس هالمره اشتغل براحة محد يهيني لو يطكني لو يغلط علي .

جنت فرحانه بوجودي بهالمكان .

كل الناس طيبة

والحجيات طيبات بيهن مثل الحجية جيمس بوند وبيهن كلش فقيرات بس بالنهاية كل احنه جنه مالنه احد ..

مكسورات الجناح ..

مر شهر ماشفت بي سند ولا خابرني ..

وبيوم جنه نسولف انه وهديل بالليل وسألتني :

شيعودلج سند ؟

عذراء :

مايعودلي ..

هديل :

جا وين تعرفينه ؟

ظليت صافنه ماادري اكدر اكللها سند اتزوجني وطلكني لو لا .

قررت احجيلها لان اول مره تصير عندي صديقة كلش حبيتها حجيتلها الصار وحلفت ماتحجي لاحد بس صدمتني من كلتلي :

بس انت تكولين سند مالمسج ..

عذراء :

اي والله شبيج الرجال انعم الله عليه خلاني عده واتحملني ولوما هو هم جابني هنا جا سعد زوجني يمكن كبل لااخلص العده .

هديل :

ولج ياعده ، والله خبصتيني بالعده هو غير مالمسج معناها ماكو عده ، ماعليج عده ..

كعدت عدل كتلها :

ياهو يكول ؟

هديل :

ولج انه قاريتها ودرسناها كبل بالمدرسة اذا الرجال مالمس المره وطلكها ماعليها عده .

عذراء :

ياااا ..

وانه اكول سعيد واميلك يكلولي زواج ماكامل مدري شنو ..

وانه عبالي يقصدون العرس والزفة ..

هديل :

ههههههههه خررب يومج

انت تصنيف هههههه .

عذراء :

شمدريني انه بالابتدائية وبطلوني وبعد لاطلعت لاشفت ناس لاشفت دنيا ..

زين مني ولهسه اعرف اقرا واكتب .

هديل :

ليش ماترجعين للمدرسة

عذراء :

لاا بعد يامدرسة دماغي بعد مايستوعب عقلي مو ويه الدراسة من كبل خوما بطلوني وانه شاطره انه جنت اكسل وحده بالصف .

ضحكت هديل :

اول وحده تكول جنت كسلانه

عذراء :

ولج كلمة كسلانة قليلة بحقي جنت اكسل وحده بالمدرسة وجماله عدي شلة مال كسالة ههههههه

هديل :

ههههههههههههه ههههههههه اااخخخ يمه بطني .

عذراء :

جا سمعي .

جنت من عدنه درس مااحبه اخذ شلتي بالفرصة ونطفر سياج المدرسة .

هديل :

عااا . .. تشردون من المدرسة ؟

عذراء :

اي هههههه نشرد نروح لاقرب بيت عالمدرسة ندك الباب نشرب ماي ومرات يطونه اكل وانوب نروح نفتر بالمنطقة ومن يخلص الدرس نرجع .

هديل :

هههههه ياشيطانه .

رئيسة عصابة جنتي .

عذراء :

اتذكر جان عدنه معلم اسمه استاذ عبدالطيف ..

بس هو ابد مو لطيف .

هديل :

هههههههههه راح اموت حرام عليج هههههههههه .

عذراء :

يالله كافي مادام راح تموتين خليها غير يوم اكملج مغامراتي .

هديل :

هههههههههههه يايابه ههههههه هههههه

عذراء :

آآخ ..

هديل :

شبيج ؟

عذراء :

صفاحي توجعني

هديل :

عدج رمل شربي ماي هواي

عذراء:

رمل وحصو عدي اي واحد عده بناء كليلي اتبرعله .

هديل :

هههههههه كله عندج تصنيف انت ؟

قبطت شهر بالدار واستلموا الموظفين بهذا اليوم رواتبهم بس انه على اعتبار متطوعه مالي راتب .

ثاني يوم اجت ست هناءالصبح وصاحتلي بمكتبها :

كعدي سُرى .

كعدت خايفه ..

ست هناء :

بسرعة خلص الشهر مو ؟

عذراء :

اي صح .

ست هناء :

شلونج ؟

مرتاحة هنا ؟

عذراء :

كلش مرتاحة الحمدلله .

ست هناء :

الموظفين البارحة استلموا رواتبهم .

بس انت وجودج هنا بصورة غير رسميه لذلك ما الج راتب .

عذراء :

ادري ..

ست هناء :

بس انت هنا بتنا واختنا والكل هنا حبوج الحجيات كلهم يمدحون بيج ويحبون سوالفج .

عذراء :

وانه هم احبكم كلكم

ست هناء :

احنه جمعنه بيناتنه مبلغ بسيط وجبنالج بعض الشغلات اللي تحتاجينها وان شاءالله تعجبج .

عذراء :

وانه مااكول لا هههه .

جابولي فساتين اثنين مال محجبات وحجابات وجنطة وحذاء وبجامتين وملابس داخلية وجواريب وروب قديفة لان بالليل الدنيا بارده بالدار ومنشفه وشامبو وليفة وعطر ..

من شفتهن ظليت ابجي ..

ست هناء :

ها ليش ؟

ليش البجي ؟

مسحت عيوني كتلها :

اول مره احد يجيبلي شي بدون مقابل ..

ست هناء :

شلون بدون مقابل وانت ماصارلج شهر كل الحجيات هنا يسولفون بيج وبطيبة كلبج ..

ماكو شي بالحياة بدون مقابل .

عذراء :

انعم الله عليكم ماقصرتوا وياي .

كمت اريد اطلع صاحت وراي :

تره حتى سند مشارك ويانه .

عذراء :

يطيكم العافية .

رحت اركض للغرفة فرحانه ..

اريد اقيس هدومي ..

هديل جانت توها كاعده :

شبيج ؟

باجيه ؟

عذراء :

لا عليمن ابجي ..

قيست الهدوم كلها تالي لبست فستان ووياه الحجاب ماله حتى اكشخ مثل الموظفات الباقيات .

هديل :

الله على قياسج فت .

عذراء:

حلو علي ؟

هديل :

يخبل .

عذراء :

لا لا تجذبين علي مو جني معيديه .

خاف مايلوكلي هذا اللبس ؟

هديل :

وليش مايلوكلج ؟

شنو اللي يلبسن احسن منج ..

عذراء:

سعيد جان يكلي معيدية ، همجيه ، هوش الله بارض الله .

هديل :

حبيبتي سُرى انسيه هذا الحيوان انت هسه انسانه ثانية لاتخلين كلامه يحطم نفسيتج ويخليج تقليليين من قيمة نفسج .

عذراء :

شسوي يعني ؟

علميني .

- ‏ما فائدة أن تهُرب مادامت الأشياء تسكن بداخلك.

#سند_و_العذارى. ٥___٦

#ب٥

#روز_الفياض

ربِ إشرح لي صدري ويسر لي آمري.❤️

بيومها اجه سند ..

جنت افتر بالقاعة يم الحجيات اراويهن فستاني الجديد واشممهن العطر ..

ام احمد :

بالعافية ..

بالعافية تستاهلين .

عذراء :

الله يعافيج ام احمد

ام صفاء :

حلوه ولايكلج اللون الوردي ..

لو ابني بي خير جا خطبتج اله .

عذراء :

لا دخليج ام صفاء جا حظي بس للعارات يوديهم عليه مايصير اتزوج واحد محترم ، عده شهاده ، عده وظيفه محترمة ..

واحد كون يخاف الله بيه ابنج اذا انت امه وذبج هنا جا انه شيسوي بيه ..

ام صفاء :

امداه وامده مرته ..

هو ليش اكلج لو بي خير بس مابي خير ...

كمت اطي لخالة فخرية دواها التفتت شفت سند واكف اباب القاعة ابتسمت كتله :

يا هلاا اليوم مسير علينه ؟

سند :

السلام عليكم .

ردينه كلنه السلام

جان بيده علاكة بيها ادوية جايبها للحجيات وجايب زنود الست لام بارق مشتهيتها وموصيته وجايبلي الدشاديش الي اشترالياهن هو والحجية من جنت عدهم ..

بوكتها كتله بدلهن وماصار مجال .

اطاني العلاكة كلي :

بدلتهن حسب وصية امي .

عذراء :

عااا تتذكرني ؟

فدوه مشتاقتلها

ضحك كال :

شو جنتن مثل الفاره والبزون كل دقيقتين الجن صيحة .

عذراء :

اي بس حبيتها مره على نياتها وفقيرة .

سند :

مو على اساس مو فقيرة ؟

عذراء :

لو مافقيرة ماتمشي عليها جذبتنه ..

سند :

شلونج هنا ؟ مرتاحه ؟

عذراء :

يطيك العافية

يومية ادعيلك بصلاتي الشاهد الله .

لوما انت جا انه هسه متورطه ورطه سوده ..

اسود من القبلها .

سند :

مامحتاجة شي ؟

عذراء :

عدي رقمك ..

سند :

ماشي ..

ديري بالج على نفسج .

وسمعي كلام ست هناء والحجيات هنا كلهن طيبات .

عذراء :

ان شاءالله

لاتخاف ماافشلك ..

سند :

ماخايف .

دار يريد يروح وكتله :

صدك نسيت اكلك ..

رجع دار علي كتله :

جا مو طلعت مالي عده .

سند :

مافهمت ؟

عذراء :

جا مو طلعت المطلكة مثلي يعني انت هسه مو طلكتي بس مالي عده ..

ابتسم نص ابتسامة :

ليش ؟

عذراء :

سعد كلي الزواج ماكامل بس انه ثوله حشاك ماافتهمت بس بعدين هديل كلتلي .

اتغيرت ملامح وجهه واجه باتجاهي كلي :

هديل ؟

عذراء :

كلتلي مالي عده طلاك لان انت مالمستني .

سند :

يعني حجيتي لهديل ؟

عذراء :

اي صاحبتي خوش بنيه لاتخاف ماتحجي لاحد .

صار عصبي :

انت مخلوقة عجيبه !!!

ماادري انت غبية لو تتغابين ..

عذراء :

ليش الغلط ؟

سند :

هذا الموضوع اذا احد دره بي معناها مو بس انت تنطردين منا لااا ..

حتى انه ..

لان انه الجايبج على مسؤوليتي .

عذراء :

وانت شعليك تنطرد ؟

سند :

لان طلعتيني جذاب كدامهم ..

انه اجي هنا حتى اكفر عن ذنبي واخلص وقت ارتاح بي ويه هاي الناس وانت بغبائج خربتي كل شي .

ماحاجيته ورغم متعوده عالغلط والصياح بس لان هو تصرفاته وياي زينة استهضمت وانقهرت ..

عذراء :

انعم الله عليك ..

عفته ورحت ..

بقيت طول اليوم ضايجة حتى الحجيات لاحظن هالشي :

اليوم ساكته سُرى لا تضحكين لاتسولفين .

عذراء :

راسي يوجعي خالة اسم الله عليج .

ليش كلها تشوفني غبية ؟؟

اكيد لان انه غبية .

حجيت لهديل كالت :

حقه ..

هو وين يعرفني حتى يثق بيه ..

معرفته بيه سطحية .

عذراء :

يعني انه غبية صحيح ؟

هديل :

لا حبيبي انت على نياتج انت مثل الطفل البريء اول مره يطلع للشارع ويشوف الناس والدنيا..

عذراء :

انه اخذت قرار اريدج تعلميني وتفهميني وتدرسيني حتى اصير مثلج .

هديل :

تصيرين مثلي ؟

تره انه هم مثلج مو كل شي اعرف بس انه احب اقرا كتب واتعلم .

عذراء :

اي علميني .. خليني اقرا كتب .

هديل :

قرايتج زينه ؟

عذراء :

يعني ..

الله يساعد استاذ عبد اللطيف علي كبل كوه اتهجأ

ضحكت هديل كتلها :

مره من المرات كال اليوم راح اكوم من الكسالة الما رافعين ايدهم وانه اختج رئيسة الكسالة فرفعت ايدي حتى لايكومني عود صرت لوتيه ..

هديل تضحك ميته من الضحك .

عذراء :

بس رفعت ايدي كومني النذل .. غدر بيه وكومني ..

هديل :

هههههههههههههههاااي

عذراء :

كال اليوم اريد اسمع عذراء تقرا ..

باوعتلي هديل :

ياعذراء ؟

بلعت ريكي وبسرعة لختنت عليها الموضوع كتلها :

اهوو قصدي سُرى مايدري سُرى كوه تتهجأ ..

كللهم صفكولها شجعوها ..

كمت وانه رجليه تطكطك من الخوف وكفت يم الصبورة والقراءة بيدي وكلي يالله بابا اقري ..

هديل :

هههههههههه

اتورطتي هههههههههه

عذراء :

خلص الدرس وانه اتهجأ حرف حرف كوه كملت سطر كطعت كلبه هههههه .

هديل :

هههههههههههه متت خرب يومج

عذراء :

بعد خطيه مدري انقهر على روحه مدري علي كللهم صفكولها اول مره تكوم هههههههه .

هديل :

ههههههههههههه مرمرتي الرجال

عذراء:

يامرمرته زين ماطردني من المدرسة .

انوب رجعت للبيت مكيفة اليوم صفكولي مصدكه روحي وياهو اشوفه بالمدرسة اكله اليوم صفكولي مرتين بالصف ..

هديل :

هههههههههههههااي كافي ولج كافي شنو انتِ .

عذراء :

يالله كافي المره الجاية احجيلج الفخ الطحت بي انه وجماعتي الكسالة ..

هديل جانت بنية لطيف وحبابة بس جانت جبيرة بالعمر ومامتزوجة لان مريضة بيها سكر ..

هم يتيمة امها وابوها متوفين واخوانها متزوجين ومحد منهم يقبل تروح عده بالبيت لان بيوتهم ضيكة عدهم جهال ولان هي خريجة ساعدتها ست هناء وشغلتها بالدار .

وره اسبوعين شفت سند من بعيد يم مكتب ست هناء .

غلست ورحت كملت شغلي .

العصر جنت كاعده بالحديقة يم ام احمد تعلمني احوك بوند مال شعر وسمعت صوته وراي :

السلام عليكم .

درت باوعتله :

وعليكم السلام

سند :

شتسوون ؟

ام احمد :

سروه تحب تتعلم كل شي فقررت اعلمها تحوك ..

سند :

سروه !!

ماحاجيته كال :

امي تسلم عليج ،.

درت من جديد عليه كتله بحماس :

اجت ؟؟

سند :

لاا ..

بس خابرت ..

اشرلي براسه اكوم وراه ..

ترخصت من ام احمد ورحت وراه كتله :

شكو ؟

طلع جكاره ورثها واخذ نفس نفخه بوجهي ..

سند :

سعد ..

عذراء :

شبيي؟ اندل مكاني ؟

يمه ..

سند :

لا ..

مات ..

فكيت عيوني مامصدكة ..

عذراء :

شبي ؟

سند :

مات ..

عذراء :

كول غيرها يمعود ..

العار مايموت هههههه ..

رجع اخذ نفس من الجكاره وانوب ذبها بالكاع وداس عليها :

لكوه مكتول بسيارته ..

الصدمة جانت مو سهلة بقيت مامستوعبه :

ما ..

لا ..

شن ..

شلون يعني ؟

صدك يعني مات !

سند :

مكتول ..

عذراء :

يع .. يعني .. مات ..

مات صدك ؟؟

سند :

ماااات ..

عذراء :

منو كلك ؟

سند :

اخوج .

عذراء :

يدري بيك انت جايبني هنا ؟

سند :

لاا مايدري .

عذراء :

جا ليش كلك ؟

انت شعليك بسعد يموت لو يعيش ؟

سند :

لان اكيد هسه يستدعوني للتحقيق ..

عذراء :

هاا ؟

يستدعونك ليش ؟

انت شعليك ؟

سند :

شلون شعلي .. انه اخذتج من بيته واكيد اكو كاميرات بالمنطقة صورتج من طلعتي من البيت لحدما صعدتي بالسيارة .

بقيت ساكته مااكدر استوعب احس دماغي متوقف ..

عذراء :

كاميرات ؟؟؟

يعني هسه انه مطلوبه للعداله ؟

ابتسم ..

سند :

مطلوبه للعدالة ؟؟ مبين بديتي تتعلمين ..

عذراء :

معناها مالك يدري انت اخذتني من البيت ، شمدريه بالكاميرات والتحقيق حتى يكلك ؟

سكت شوية بعدين كلي :

ماادري ...

مااتوقع يدري ..

لو يدري بيج هنا مايخليج ..

اتوقع يطلبوني للتحقيق واذا طلبوني معناها انت هم راح يطلبونج ...

عذراء :

خيحققون وياي يجوز ماافتهم ومااعرف احجي بس راح احجيلهم الصدك وفضت راحت .

باوعلي :

واثقة من نفسج ؟

عذراء :

الحمدلله مامسوية شي غلط ، انت شمسوي ؟

سند :

انه هم مامسوي شي ..

عذراء :

جا شبيك بعد ؟

ماحاجاني طلع جكاره كتله :

مراكبك غركانه ؟

سند :

شنو ؟

عذراء :

لو مراكبك غرگانه لو عاشگ مابيها مجال ..

سند :

شتحجين انت ؟

عذراء :

احجي عالتدخين .

سند :

ياريت عالفلوس تتعوض ..

وياريت عالعشگ هم يتعوض ..

عذراء :

جا شنوه المايتعوض ؟

سند :

العمر ..

اذا خلصتيه بالغلط ..

الصحة ..

اذا هدرتيها ..

السند

اذا اتخليتي عنه ..

عذراء :

مافهمت شي .. العمر اذا خلصته بالغلط ؟؟

ماجان بيدي شي كله بيد اهلي ..

ومااذيت احد ماادري اذا زواجي من سعد وحجيي عليه الله يعتبره ذنب .. وطلعتي من بيته غلط ؟؟

معقولة ؟؟

الصحة ..

هم مو بيدي اذا من الصبح اكعد اكرب لحدما ينخمد والحبسة الانه بيها سبع سنين مو شوية حتى الجيران مااعرفهم ولايعرفوني مو زين وبراسي عقل لهسه ..

كل كم شهر اطلع مره وشرط للطبيب بعدما يكسرني من الكتل واذا الله يرحمني يكون الطبيب يم سوك اشتريلي كم حاجة بالشافعات ويبقى يعيرني بيهن لحدما يتكطعن ..

والسند ..

كل عمري ماعدي سند بس الله وبعد كل هالسنين انت ساعدتني ..

الله يريح بالك مثلما ريحت بالي .

سند :

لو باقية على ذمته يمكن محصلتلج شي ..

سعد جان عده فلوس ..

عذراء :

اهله مايخلوني احصل شي .. وهو هم جلب الله يرحمه .

ضحك ..

عذراء :

شبيك تضحك ؟

يروح فدوه للجلب .. اسبوع انه مااكدر ارفع راسي من المخده ازحف زحوف للحمام ..

وهو قافل علي الباب الجيران يطوني لكمه اكلها من الشباك .

خبز وهو خبز ماعندي ..

كلاص ماي محد يطيني ..

ليش كتلك قبل اتمنيت اموت لان انه عشت حياتي بذل عد اهلي وعد سعد ..

اتصور تطلب من الجيران خبزه لان جوعان وماعدك ربع دينار تشتريلك لكمة ؟؟

ومستغرب اكول عليه جلب ؟؟

شفايتله لو جلب عالاقل بي فايده ..

لو مستغرب لان كلت الله يرحمه ؟

لان مايطيني كلبي اكول الله لايرحمه ..

مو لان ميته عليه بس انه هم اريد باجر من اموت احد يتذكرني ويكول الله يرحمها .

بقى ساكت بعدين كلي :

وليش جنتي مريضة ؟

شبيج ؟

عندج ضغط لو سكر ؟

عذراء :

لاء ..

بس الله يرحمه

بعدني ماكملت الجملة رجع ضحك ..

سند :

رحمه لوالديج لاتكولين الله يرحمه ههههههههههههه .

اتنهدت وكتله :

مو مشكلة اكول بكلبي ..

كتلني كالمعتاد بس هالمره طكني بالسجينه بأيدي وخله دمي يخر..

جان مدنك يدوس الجكاره ..

رفع راسه باوعلي وهز راسه بمعنى ماسمعت ..

عذراء :

شك ايدي بالسجينه ..

ونزفت دم هواي فظليت ادوخ بس ارفع راسي .

سند :

شك ايدج ؟؟

صدك تحجين ؟

وشسويتي ؟

عذراء :

والله ليش مستغرب ..

شسويت ؟

ماسويت شسوي يعني ؟

هو من شاف الدم اخذني للمستشفى خيطوا ايدي خمس خياطات ورجعني للبيت .

سند :

وليش ماخابرتيني ؟

عذراء :

وانت شتكدر تسويلي ..

انت بعد رجعتني اله وانه مااكدر احجي لان اذا حجيت وين اروح ..

ماكو غير الرصيف يلمني..

بدون كلام مد ايده اخذ ايدي كلي بدون مايباوعلي :

وينه الجرح ؟

سحبت ايدي كتله :

يعني شلون اراويكياه وانه محجبة فهمني بالله ؟

سند :

ليش كتلج ؟

عذراء :

مدري عليمن مااتذكر كتلاتي هواي ههه ..

يمكن لان جاب صاحبته وياه للبيت وانه حجيت مدري لان كلي راح يجي واحد يشوفني حتى يعقد علي وبعدين يطلكني ..

استهضمت وكتله ماعدك غيره ماتستحي ..

سند :

ههه ادري هسه هو مو خوش ادمي بس ماكال شي غلط اي واحد يريد يتزوج لازم يشوف العروس ..

عذراء :

لاا يمه اسم الله ..

شنو يتفرج علي رجال غريب بعدين هو يعقد علي حتى سعد يرجعني خوما باقية عده العمر كله ..

سند :

مايصير هو بكل الحالات هاي سالفة المحلل باطلة .

عذراء :

باطلة ؟

جا انت ليش قبلت ؟

سند :

هاي سالفة طويلة ..

فد يوم يجوز احجيلجياها.

عذراء :

سالفتيش ؟

وانه شيصبرني ؟

سند :

بعدين ..

يالله مااريد اعطلج اكثر .

اذا احتاجيتي شي رقمي عندج ..

عافني وراح ..

مافهمته هذا الرجال شنو فلمه ؟

شنو وراه ؟

شنو قصته ؟

بالليل سألت هديل :

شتعرفين عن سند ؟

هديل جانت كاعده تقرا كتاب طبكته وكلتلي :

شعرف عنه مااعرف عنه شي تقريباً بس اللي الكل يعرفه .

عذراء :

مثل شنو ؟

هديل :

منفصل وعنده جهال عد امهم وموظف وعايش بحده.

واعتقد عاش حياة صعبة بطفولته ..

عذراء :

زين ليش مطلك مرته ؟

هديل :

مااعرف والله كتلج ماعندي معرفة قوية بي هو شوية غامض ومو كلش اجتماعي ..

عذراء :

انه الاعرفه مرته ماتخليه يشوف جهاله ..

هديل :

اغلب المنفصلين هيج بسبب المشاكل الي تصير بينهم بالطلاك يشتغل العناد ومرات حتى حقاره حشاج .

وهذا بالنهاية قرار المحكمة اكيد ، لو المحكمة شايفته اله حق يشوف اولاده يشوفهم غصبا عن امهم .

عذراء :

يعني قصدج هو مو خوش ادمي ؟

هديل :

انه ماكلت مو خوش ادمي بس المحكمة ما تاخذ هيج قرار الا اذا الاب عنده غلط جبير او جريمة ..

جريمة !!!

اي اكيد جريمة .. منين يعرف مالك اخوي وسعد الله يرحمه لوما مسوي مكسوره جبيره وذابينه بالسجن ..

بس هو كال ماداخل للسجن !! جا منين عرفهم ؟

عموما هو اليعرف هاي الاشكال اكيد عده مصايب ..

لا لا لا انه هسه مو اعرفهم بس انه مو مثلهم بس زماني اغبر وقسمتي سوده ..

رجعت على هديل :

بس حتى اليغلط هم يستحق فرصة ثانية يجوز يتغير للاحسن يجوز يتوب ..

هديل :

كل الناس تستحق فرصة ثانية اكيد بس المحكمة تدور مصلحة وسلامة الجهال اكيد ..

وامهم نفس الشي ..

اتدنيت يمها وكتلها بصوت ناصي :

انه ماشفت بي اذيه لو شفت عليه شي من عقد علي ومايحجي ولايسولف قليللل ..

هديل :

البيوت اسرار ، الله اعلم شنو السبب .

عذراء :

شنو تتوقعين السبب ؟

انه جنت يومية انكتل ويخليني بحدي ايام ويقفل علي الباب وماادري عايش لو ميت ولايدري بيه اعيش اموت بحدي بالبيت وحسره علي الالف دينار لاطلعة لاطبه لا مصرف لااكل لا هدوم لا بحجايه بيها حظ ..

وماعدي جهال ومع ذلك مااتطلكت بكيفي ..

هديل :

مو كل وحده عدها صبرج وقوة تحملج ، ولاكل وحده تكدر تعيش مثلج ..

لاتنسين انت ماجان عدج بديل لو عدج مثلا اهل او وظيفة جان اطلكتي وخلصتي من هالعذاب ..

بس ماعندج .

والدليل من توفر عدج بديل ومكان يأويج اجيتي هنا مابقيتي عده .

عذراء :

هاا .. يعني انه هم بيه بلا وانه ماادري ؟!!

هديل :

ههههههه انت منيلج بلا انت كتله من الحلاوه والطاقة الايجابية .

ماشاءالله عليج كلج طاقة ونشاط اليوم اباوعلج ماتكعدين من شغلة لشغلة حتى اذا مو شغلج وما مطلوب منج هم تسوينه .

عذراء :

گلبي حار شسوي ..

مااعرف اكعد .. اتعودت اطلع شغل من جوه الكاع حتى الهي روحي من التفكير .

الشغل والتعب ارحم واهون من التفكير ..

الشغل يمكن يمرض بس التفكير يموت ..

هديل :

الله يعينج ماادري شلون جرعتي زوجج ،.

عذراء :

بالآه والويلاه ..

سبع سنوات لو اريد اتذكرها واسولفلها بالتفصيل متاكده ماراح تفرق عن معاناة المسجون ظلم .

هديل :

العجيب اهلج ..

هواي اكو مثل زوجج ماعدهم رحمه ماعدهم غيره ماعدهم انسانية بس اهلج ؟!!!

اغرب من الخيال .

عذراء :

الحجيته الج نقطه ابحر ..

لو اسولفلج على حياتي بالتفصيل يشيب راسج ..

بس كضت وصارت سوالف .

هديل :

انت قوية ..

عيني بارده عليج انت صدك قوية ..

لو انه بمكانج جا شردت من زمااان لو انتحرت ..

عذراء :

هاي مو شردت هسه واجيت هنا ..

بس مال انتحر بعيده ..

جذب ..

عليمن انتحر واموت كافره اسم الله ياهو يستاهل اخسر دنيتي واخرتي علموده ؟

طز بيهم والله .

هديل :

عفيه عليج دائماً خليج ايجابية لاتخلين اي شي يغير تفكيرج ويجرج لليأس ..

بالعكس خلي اللي صارلج بحياتج حافز الج حتى تتقدمين بحياتج ..

وره كم يوم تقريبا اربع تيام سمعت ست هناء تسولف ويه موظف تسأله عن سند كللها :

اليوم رابع يوم مايجي ..

ست هناء :

مااتصلتوا عليه ؟

جاوبها :

مُغلق تليفونه .

ست هناء :

جان رحتوله للبيت خاف الولد بي شي ..

كللها :

اليوم امرله بالله .

نسيت الموضوع وره يومين هديل سألتني :

دريتي بسند ؟

عذراء :

شبي ؟

هديل :

موقوف ..

عذراء :

يعني شنو موقوف ؟

هديل :

يعني قصدي مسجون ..

عذراء :

يااااء .. ليش ؟

شوكت ؟

منو كلج ؟

هديل :

ست هناء اليوم كلتلي ..

صار اسبوع مختفي وتليفونه مغلق راحوا عليه للبيت كلولهم الجيران جايه عليه الشرطة وماخذته ..

صفنت ..

هذا شنو قصته ؟

من جنت عنده هم اجت عليه الشرطة ..

شمسوي ؟؟

لو يمكن علمود سعد الله يرحمه ؟؟

يجوز هو كاتله ؟

بس ليش يكتله ؟

شبيناتهم ؟

هو كال مايعرف سعد الا عن طريق اميلك اخوي ..

هو مودي سعد عليه ..

جا ليش كتله ؟؟

يمكن هذا سند مجرم خطر وانه الفاهية جنت كاعده بالبيت وماخذه راحتي ..

وره اسبوع ثاني جنت اسبح بالليل واندك باب الحمام حيل ..

عذراء :

هاا هااا هاااا ..

ياستار شبيكم ؟

هديل :

سُرى .. طلعي بسرعة ..

عذراء :

ياستار يارب ..

شصاير ؟

بس لا سعيد طلع عدل واجه وراي ..

حظي واعرفه اعور واعرج ومابي خير .

طلعت من الحمام اغني وادندن ماحافظة اغاني بس من كل اغنية كلمة المهم اللحن عدي مضبوط ..

لفيت شعري بالمنشفه ولبست البجامه الجابولياها ماادري المن جنت ضامتها ومستعزه بيها ..

اول مره البس بجامة بحياتي حسيت روحي عريانه ..

لبست الروب القديفة فوكاها يسترني ..

ورحت اتمشى على كيف وادندن واباوع لروحي اليوم شنو هالاناقة ..

واشوفلك ست هناء اباب الغرفة وهديل ووياهم واحد من الموظفين ووياهم دسته مال شرطة ..

وكفت كتلهم :

شكو ؟

سعيد الدسم طلع عايش ؟

حتى لو عايش ماارجعله ..

والله لو تذبحوني ماارجعله .

وكلوله صدك لو كالوا العار مايموت ..

هديل :

دتعاي هسه هسه ياعار..

اتدينت على كيفي شو وجوهم ماتتفسر وست هناء مبينه ضايجة وهديل هم ..

عذراء :

شكو ؟

تره والله مالي شغل بسوالف ابوي واخوي وطياح حظهم ..

سجنوهم اثنينهم مؤبد وخلصوا العالم من شرهم واذا تعدمونهم بعد احسن لان شكدد شباب اندمرت من وراهم ..

الشرطة يضحكون ماادري شبيهم وكلها ساكته بس انه ادردم .

ست هناء :

عذراء ، حضرة الضابط جاي وعنده امر القاء قبض .

هديل :

جا سُرى منو ؟

درت على هديل :

بعدين اسولفلج مو كدام العالم..

رجعت على ست هناء :

القاء القبض ؟

عليمن ؟

انت تعرفين كل القصة وتدرين بيه مااريد ارجعله ..

الضابط :

اختي انت عليج القاء قبض مو انت عذراء عقيل ...

عذراء :

اي انه واستغفر الله من كلمة انه ..

خير شتريد مني ؟

الضابط :

مطلوبه للتحقيق بقضية قتل المجني عليه سعد خلف ....

فكيت عيوني :

يااا وانه شكو بي وتحققون وياي .

مات يطبه حمس اليحمسه ولو الميت ماتجوز عليه غير الرحمة بس هو مايستاهل .

جلب .. يروح فدوه للجلب .

الضابط :

اتفضلي ويانه للمركز هناك نحجي .

عذراء :

لا مااروح مو بكيفك اروح اسألني هنا وانه اكلك شمصخم مصخم الوجه ..

الضابط :

مايجوز اختي التحقيق يتم بالمركز فاذا تحبيت تلبسين وتجين ويانه لو ترحين بهاي ملابسج براحتج ..

باوعت لست هناء اللي ماعجبها الموضوع وهديل اشرتلي ادخل ابدل ملابس .

بدلت ورحت وياهم بحدي محد منهم اجه وياي .

الدنيا بااارده بذيج الليلة تكص كص وانه توني سابحة وشعري مبلل ومالحكت امشطه .

صعدوني بالسيارة ارجف هم من البرد هم من الخوف ..

وصلنه للمركز اخذوا بياناتي ومعلومات عني وبعدين ذبوني بالتوقيف والصبح يحققون وياي ..

دخلوني ..

شفت بنات ونسوان من كل الاعمار تقريباً ماحاجيتهن ولاحاجني كلهن نايمات ماعدا وحده كاعده وبقت تباوعلي وصافنه علي ..

بقيت للصبح كاعده ..

ماادري شراح يصير بحالي اكثر ..

يمكن هذا مصيري ويمكن هذا احسن شي يصيرلي .

انسجن وابقى بالسجن احسن مااضيع بالشوارع ويكتلني الجوع والوصخ ويجوز يخطفوني عصابة ويجوز يشغلوني مجدية ويجوز ويجوز ويجوز ..

للصبح سمعت اسمي ..

اخذوني للضابط ..

دخلوني سلمت واشرلي اكعد ..

سألني اسمج فلانه بنت فلان اي يابه اسمي .

الضابط :

شنو علاقتج بالمجني عليه ؟

عذراء :

الله يرحمه جان رجلي بس طلكني .

الضباط :

ليش طلكج ؟

عذراء :

هو الله يرحمه عصبي مايتحمل شي وعلى اقل شي جان يكتلني كتل مال كفر ومن يضوج مني يطلكني يكلي حتى تتأدبين اريد اشوفج من اطلكج منو يلفيج ..

حتى تحمدين ربج انه قابل بيج وصابر عليج .

الضابط :

عندج اطفال منه ؟

عذراء :

لا ماعدي .

الضابط :

شنو معلوماتج عنه ؟ شنو يشتغل ؟ وين يروح ؟ بيمن يلتقي ؟

عذراء :

خويه يا معلومات الله يخليك هو انه جنت اشوفه خلقته اصلا يروح يغط يختفي بالايام والاسابيع ويقفل الباب علي من بره ويخليني حسره علي اللكمة لو اموت بالبيت محد يدري بيه .

شنو يشتغل هم ماادري كل يوم شكل مره بالسيارات مره بالمولدات مره بالمقاولات ..

بس الله وكيلك فلس احمر ماشايفه منه فلوسه كلها عالحرام .

مخلص فلوسه كلها عالنسوان والشرب والملاهي ..

الضابط :

شكد صارلج من تزوجتيه ؟

عذراء :

سبع سنين عجاف .

الضابط :

سبع سنين شنو ؟

عذراء :

سوده مصخمه .

الضابط :

وشوكت انفصلتوا ؟

عذراء :

تقريبا قبل ٦ شهور . .

الضابط :

الكاميرات اللي بمنطقتكم صورتج وانت طالعة من البيت الفجر وطلعتي للشارع العام وهناك جانت اكو سيارة تنتظرج ؟؟

ليش طلعتي الفجر ؟ ووين رحتي ؟ ومنو جان ينتظرج ؟

عذراء :

هاي وره ماطلكني بكم شهر هو مخلصها سفر مااشوفه المهم انه بقيت بالبيت ماعدي مكان اروحله وهو هنا سافر بس قبل لايسافر جاب واحد عقد علي حتى يكدر يرجعني بعدين على ذمته وكلي لازم تتزوجين واحد ثاني حتى اكدر ارجعج .

بس رجع من السفر وخفت منه يعتدي علي وانه على ذمة رجال ثاني بعدني وماعدي مكان اروحله فخابرت عالرجال العقد علي حتى يساعدني اجه اخذني ..

الضابط :

وليش مارحتي وياه من اول ماعقد عليج ؟؟

عذراء :

ماادري سعد ماكلي روحي وياه ..

الضابط :

انت غير اتزوجتي واحد ثاني شلون بقيتي ويه سعد ؟

ووين رحتي وياه هذا الثاني ؟

عذراء :

خوية انه شمعرفني ليش ماخلاني اروح وانه اصلا جنت مااريد اروح رجال غريب شسوي رايحه وياه لبيته ..

اخذني لبيته من خابرته

الضابط :

شلون شتسوين رايحه وياه غير صار زوجج ؟؟ غير المفروض ترحين وياه ؟

زين ، شكد بقيتي عنده ؟

عذراء :

انه ماافتهم بهاي السوالف وسعد ماكلي روحي ولا هو سند كلي تعاي وياي للبيت همه جان بيناتهم اتفاق وانه سويت مثلما كلي سعد ..

ومن اجه سند اخذني بقيت عده تقريبا اسبوعين لان سعد من عرف انه عده سافر هو وصاحبته وكله لاترجعها الا من ارجع ..

الضابط :

شلون جانت علاقتج بسعد ؟

عذراء :

ياا بعد هذا كله تسألني شلون جانت علاقتي بي ؟!!!

علاقة واحد مسجون بالضابط المجرم .

باوعلي الضابط كتله :

يعني انت شنو علاقتك بالمساجين تحقق وياهم وتشبعهم دك انه نفس الشي الله يرحمه يجي يحقق وياي شسويتي زقنبوت اليوم شسويتي عشا وين قميصي الازرك وين فنيلتي الزيتوني وبعدين بالنهاية يشبعني كتل لو العشا مايعجبه لو الاكل ماصخ لو القميص الياخه مالته معقج ..

جلب جان الله يرحمه ..

الضابط حط ايده على خده وكلي :

انت تتعاطين ؟

عذراء :

شنو يعني ؟

يعني قصدك يطيني شي ؟

لا لا الله وكيلك حسره علي الخمس فلوس والله ابوك الالف منه بالكوه واضمه جوه الهدوم حتى لايرجع ياخذه مني بحجة ما عده خرده ..

فگر الربع كوه يطلعه .

يالله الله يرحمه الميت ماتجوز عليه غير الرحمة ..

ضحك الضابط وضحك الرجال الثاني الوياه مااعرف رتبته شنو بس على جتف نجمتين وكله:

الضابط :

هاي منين تطفى ؟ ههههههههه

الرجال الوياه :

هههههه ما تطفى الا تجسي الباتريات .

مافهمت شيقصد بس غلست خاف يكولون تحجي هواي على كولت ابو المثل اذا كان الكلام من فضة السكوت من ذهب ..

منك ينكسر گلبي واكولن

كسر مال احباب يتجبر ...

لايك وتعليق وعشر ملصقات

كم بنت تعرفوها تشبه معاناة عذراء اهلها مو كفو يسندوها وزوجها عار مثل سعيد الدسم ؟

#سند_و_العذارى

#ب٦

#روز_الفياض

عملية تحويل حُزن أحدهُم إلى ضحكة:

"بطولة إنسانيّة"

ظل الضابط يسألني وانه اجاوب .

بعدين كلي :

شنو علاقتج بالمدعو سند ... ؟

عذراء:

عقد علي غير .. وبعدين طلكني .

الضابط :

وبعدين ؟

بالتحقيق هو كال لكالج شغل بدار المسنين ؟

عذراء :

اي صدك .. ماجذب الرجال .. هو لكالي هذا المكان لوما هو جا انه ماخذه الشوارع اجدي ..

الضابط :

احجيلي شلون تم التواصل بينج وبينه ؟

عذراء :

بالتليفون غير .. هم ماعدي رصيد بس ارمش وهو دك علي يطيه العافية .

الضابط :

هو يشتغل وياج بالدار ؟

عذراء :

شمدريني بي هو يحجي الله وكيلك عبالك اخرس حتى من اسأله يغلس .

بس مااشوفه كل وين وويييين .

بس هو كلي انه اشتغل ويه الشياب وانت ويه العجايز .

ظل يسألني عن ابوي وامي ومالك وانه اجاوبه سألني اذا اكو عداوة بينهم وبين سعد :

والله خويه نارهم تاكل حطبهم همه والمرحوم لجنهم وللجير ان شاءالله .

الضابط :

شنو علاقتج بأهل المرحوم ؟

عذراء :

مااعرفهم ولاشايفتهم ولا ملتقيه بيهم ..

الضابط :

شنو السبب ؟

عذراء :

السبب ..

هواية اسباب ..

الضابط :

شنو هي الاسباب ؟

عذراء :

جذب هو سبب واحد ماكو غيرها بس هاي اغنية كبل مال معلبات كربلاء تتذكرونها مال السبب السبب هوايه اسباب هههه؟

الضابط :

لا مانتذكرها ..

فضينه عاد ورانه شغل ..

شنو احنه جايين نتشاقى ونضحك هنا ؟

عذراء :

وليش تصيح ؟

شنو اشتغل عدكم انه ؟

السبب هو لان هو متزوج بت عمه واتزوجني وانه ماادري بي متزوج وعده جهال فاهله مارادوني من الاول وشرطوا عليه مايشوفون رگعت وجهي .

الضابط :

شنو العلاقة بين اخوج مالك وسعد ؟

شتعرفين عنهم .

عذراء :

اثنينهم الله مطيح حظهم ودائما بيناتهم اتفاقيات طايح حظها عالنسوان والشرب وكل انواع طيحان الحظ مشتركين بيها اثنينهم .

الضابط :

وشنو العلاقة بين امج وسعد ؟

عذراء :

امي !! نفس علاقة مالك بسعد شكو سالفة مابيها خير تره رجل امي جانت مكبسلجي وبعده لهسه وسعد بالشرب والكبسلة محد يلحكه وامي تخابر على سعد دوم من تريد تتفق وياه على رجلها وتقشمره وتاخذ منه فلوس ..

الضابط :

تقشمره ؟

عذراء :

اي جا امي فلك اسود لاعبالك خيره ..

بقيت بالتوقيف شهر كامل .

رغم المثلي جان يكدر يطلع بكفاله بس منو يكفلني ..؟

شفت الضيم من الموقوفات وياي حجي كله فشاير وكل شوية يتعاركن يصيرن لحم علمود كلمة لو علمود هاي تشخر لو ذيج تسولف بصوت عالي لو مدري شنو ..

وانه احصر روحي بالزاوية خاف تلوحني كفخه ..

خلصت عمري جبانه على كولت امي ..

جنت من تصير عركة بين الجهال انهزم واروح اختل بمكان كون محد يلكاني حتى مايلوحني طشار ..

بينما اختي آمال جانت تتعارك وهي ومالك يسوون حزب حتى بالمدرسة وجانوا يكتلون الطلاب وانه جنت اخاف وانقهر اكللها خطيه يكلولي انجبي انت جبانه ..

خيخه ..

وره مايكتلون الجهال يشردون ، وجانت الامهات تجي تدور عليهم ماتلكاهم واذا لكني يكتلني انه بمكانهم ..

عود انه جنت ادافع لجهالهن ..

تالي انه اشبع كتل بدون ذنب ..

ومن اروح لامي اشتكي جانت هم تكتلني لان مابيه خير على كولتها وجبانه ..

جانت آمال ايدها طويلة تبوك من الجهال بالمدرسة مصرفهم لفاتهم اقلامهم ..

ومره من المرات باكت فلوس من بنية بصفهم واجت العلمة كلتلي كلي لاهلج ..

والجهال بالحلة كلها تصيح وراي البواكة .. البواكة .. البواكة ..

لان آمال شردت ركض للبيت ويخافون اصلا منها مايكدرون يصيحون عليها البواكة ..

اجو يتشطرون علي انه الجبانه ..

وانه ابجي واحلف انه مو بواكة ..

ولهسه بعدني جبانه ..

من يباوعن علي الموقوفات اظل ارجف ..

واحاول اهدي الموقف وبالنهاية تلوحني كفخة كفختين .

وانه لابيها ولاعليها ..

جانت آمال شخصيتها قوية هي ومالك ماكو شي يسوونه غصبا عنهم يسوون اليردونه همه وبس .

جانوا يتعاركون ويه امي وابوي ويغلطون عليهم اذا حجوا وياهم ..

اتذكرها من جانت تواعد صاحبها بالسوك .

تسوي روحها رايحة تتسوك وتواعده هناك .

اسمه كمال ..

بس منين ؟ ماادري ..

وين بيتهم ؟ هم ماادري ..

بيوم كعدنه الصبح مالكيناها ماخذه هدومها ومهزومه ..

دوروا عليها مالكوها ..

هنا جان عمري ١٣ سنة ..

شبعت كتل .. هي شردت وانه اتعاقبت ..

هواي مواقف شتذكر وشنسى ..

بس مختصر مفيد انه ضعيفة وجبانه مااعرف ادافع عن نفسي .

بيتنه جان على طول بي ناس خصوصا بالليل ..

شباب وبنات وحتى شياب ..

كلها تجي تشتري من ابوي حبوب كبسلة ..

بيتنه صغير وقديم وحالته تلعب النفس ..

اصلا هو مو بيتنه ..

جنه كاعدين بمعسكر مدري دائرة .. بعدها ابوي بدت تصير عده فلوس ..

اشترالنه بيت حواسم بدل مايشتري بيت ملك واشتراه بانكس منطقة ..

لان المناطق التعبانة هواي بيها ناس تبلع هاي الحبوب وبكل الاعمار ..

بالنهار ابوي نايم وبالليل سهران يبيع ويستقبل زباين الله مطيح حظهم مثله ..

ولان جان يخاف ينام بالليل خاف الشرطة تسوي عليه كبسه وتكضه ..

يكعد هو وصاحبه بالباب للفجر بعدين يدخل ينام وصاحبه يروح ومرات جان يبقى ينام عدنه ..

جنت ادخل انام جوه الجرباية ، لان اخاف على روحي من هالشكولات الموجوده عدنه بالبيت طابه طالعه ..

واتذكر مره من المرات كعدت من الصبح لكيت ابوي نايم بالهول ويشخر ،.

اكيد مكبسل مايدري بالدنيا..

رحت باوعت اميلك ماكو .. اكيد هم هذا راح يسكر بمكان وبقى هناك ..

سمعت صوت امي تبسبس بالغرفة عبالي تحجي بالتليفون .

مافتحت باب الغرفة لان اذا افتحه انكتل ..

بس باوعت من فتحة الباب وشفت امي هي وصاحب ابوي عالجرباية !!!

هذا عمو جبار !!!

من يومها كرهت امي وكرهت جبار وكرهت ابوي واخوي واهلي كلهم ..

ابوي من كدما جان يحصل فلوس مايدري شكد عده يطيحن من جيبه مايدري بيهن .

اهله جانوا يشجعونه على شغله لان مستفادين منه ..

شكد عده بجيبه يطيهمياه من يروحلهم بس ماجانوا يجون عدنه لان امي جانت تطردهم ..

طبعا اهله مو احسن من عده ..

اما اهل امي فجانوا اتعس ..

امي بالنسبة الهم خط احمر لان الدجاجه اللي تبيض الهم ذهب ..

يردون يكوشون على كل شي يحصله ابوي .

ومابين طمع الفريقين النفر الوحيد المظلوم هو انه ..

لان جنت مااسكت عالغلط احجي واكول هذا غلط رغم اعرف راح انكتل بعدين بس ضميري مايخليني ..

جنت دائما النفر المكروه بالعائلة ..

بقيت بالتوقيف الى ان خلص التحقيق وياي ومالكوا شي ضدي فطلعوني وكالوا احتمال يرجعون يستدعون اذا لكوا شي ..

كتلني الجوع والوصخ والضيم ..

محد يذكرني بأكل لو هدوم نظيفه ..

منو عدي حتى يذكرني ..

طلعت ماعدي مكان اروحله ..

وين اروح حتى سعد مات .. ماكدامي غير دار المسنين ..

مااندل الطريق ولااعرف العنوان ولا عدي كروه اروح ..

رجعت للضابط كتله يكتبلي العنوان بورقة لان مااندل ارجع ..

كتبه الي وسالني :

عدج كروه ؟

عذراء :

هاا ؟

الضابط :

فلوس عدج تركبين تكسي ؟

عذراء :

لاء ..

ماعدي .. انه اشتغل بالدار علمود اكل وانام بلاش .

الضابط :

استريحي ..

هسه ملازم حسن يوصلج .

اشر لملازم حسن الي توني عرفت اسمه ..

وصلوني بالسيارة لباب الدار ونزلت وانه ادعي كون مايطردوني ..

دخلت دكيت الباب فتحوه ..

شافتني هديل من بعيد اجت علي تركض اشرتلها بيدي لاتدنين :

ليش ؟

شبيج ؟

عذراء :

مابيه بس كلي وصخ ..

دخلتني هديل كبل للحمام خطية واخذت هدومي غسلتها وكلتلي ؛

سبحي براحتج وانه راح احضرلج ملابسج واذا ردتي شي يصيحي علي ..

عذراء :

يطيج العافية ..

راحت هديل وانه كعدت جلفت روحي جلف كعدت اتخيل روحي مثل صحن صيني بس بي اكل لازك عليه ..

اجلف بروحي حيل وافكر هسه شلون اشرح لست هناء الصار وشلون اقنعها انه مالي ذنب بالصار ..

هي حذرتني ماتريد مشاكل ..

وحذرتني اذا جذبت عليها وانه وسند كنالها اهلي ميتين ..

هسه اكيد عرفت كل شي من سند ..

انوب المشكلة خاف هم سند بطلوه من وراي ؟؟

هو الصدك مو من وراي بس من وره سعيد الدسم ..

حتى وانت ميت اذيتك لاحكتني لاحلك بركة عليك ..

بقيت بالحمام يمكن ساعة جنت احس روحي مااريد اطلع ..

الاحساس بالنظافة شعور عجيب سبحان الله ..

اخذني التفكير الى ان دكت هديل الباب :

خلصتي سُرى ؟

ثواني صفنت بيها منو سُرى ؟!!

بعدين اتذكرت كتلها :

خلصت ..

طلعت من الحمام اتلكتني بالمنشفة والملابس :

يطيج العافية ..

هديل :

الله يعافيج ..

اخذتني للغرفة حتى اتدفى الجو جان بدا يصيف بس بعد بي شوية بردوه ومغيم ..

كعدت متلفلفه على روحي ومخليه راسي على ركبي ..

كعدت هديل يمي كلتلي :

شلونج ؟

طاحت دمعة مني ومسحتها بساع كتلها :

اول مره بحياتج يمكن تشوفين وحده طالعة من السجن ؟

هديل :

على كيفج ويه نفسج ، انت ماجنتي متهمة انت جنتي مطلوبه للتحقيق ..

هاي حققوا وياج وطلعتي مالج علاقة اكيد وطلعوج ..

عذراء :

وست هناء ؟؟ تقبل ترجعني ؟

تقبل تصدك قصتي ؟

هديل :

ليش ماحجيتيلها الصدك من الاول ؟

انه لهسه مااكدر اصيحلج باسم غير سرى .. احسه لايك عليج اكثر من عذراء .

اتعودت على اسم سُرى .

عذراء :

انه ماجذبت عليها بس كتلها اهلي ميتين ..

وياريتهم ميتين ولا هالجاي يصيرلي بسببهم ..

هديل :

هي اليوم ماجايه خالتها متوفية ، اليوم ارتاحي واذا اجت باجر داومت انه راح احجي وياها ..

وحتى الحجيات راحن يحجن وياها ..

عذراء:

الله ..

شكد مشتاقتلهن ..

خل اروح اشوفهن ..

هديل :

كعدي هسه راح اجيبلج ريوك اتريكي واتدفي ونامي ..

ارتاحي حبيبتي ومن تكعدين روحي وين ماتردين ..

اكلت جني ماماكله قبل الحمدلله رب على هاي النعمة .

جبت كل عمري اتعجب على الناس التذب الاكل الباقي بالزبالة وانه جانت تمر علي ايام اجوع حتى خبزه يابسة ماعدي آكلها ..

ابقى ادعي سعد يرجع من وكت بلكي متسوك لو ادعي احد من الجيران يدك الباب يكول هذا صحن الكم ..

جنت اشبع بس بمحرم ..

سبحان الله عبالك اهل المنطقة يدرون بيه جوعانه ..

من اكعد لحدما انام مره صحن مره جدر مره لفات مره رطب مره فاكهة كل بثواب اهل البيت ..

حتى بمصابهم مايعوفون الفقير ..

جنت مرات اباوع من السطح عالناس اختنك كله كاعده بحدي واشوف النسوان تطلع تذب الاكل بالزباله ..

وانه جنت اجمده كله وشوكت ماجعت اطلعه واحميه واكله ..

سعد جان بمحرم حتى الخبز يكطعه علي بحجة :

مو هاي جاي الناس توزع واكلي من الثواب الا اجيبلج زقنبوت ؟

عذراء :

اي عالاقل خبز اريد لاانت تقبل تجيبلي تنور وانه اخبز ولاانت تخليلي فلوس واخلي الجهال تجيبلي خبز لو صمون ولا انت تجيبلي ؟!!

سعد :

الا خبز بت الباشا ..

مااجيب ..

ماعاجبج طكي راسج بالحايط ..

لو روحي ولي لاهلج الباب يوسع جمل ..

عذراء :

هذا كله علمود خبزه ؟؟

هو كله ست خبزات مدري ٨ بالف ..

سعد :

الالف حرام بيج ..

اتنهدت وانه اتذكر وشكرت ربي الخلصني منه ..

خلصت ريوكي ونمت بفراشي واتغطيت ..

نمت ..

من الصبح لحد الساعة ب(٣ ) الظهر كعدتني هديل ..

هديل :

كعدي يمعوده شنو جنتي بالجيش ؟

كعدت كوه كتلها :

تعبانه ..

هديل :

حقج ..

اصلا مبين عليج حتى ضعفانه وذبلانه وين جانت خدودج تخبل ..

عذراء :

هو انه شعام علي وجايبلي العين غير خدودي اليشوف خدودي مايصدك سعيد الدسم مجوعني ..

هديل :

الله ينتقم منه ..

ماادري هذا بشر لو حشر ..

عذراء :

هي بقت عليه هو منو بحياتي ادمي ..

هديل :

خلف الله عليج !! ههههه .

عذراء :

تدرين بيه مااقصدج انت ورده .. بحياتي كلها محد عاملني مثلج ..

هديل :

شلون يعني ؟

عذراء :

يعني اهتم بيه وكلي نامي وارتاحي وهالسوالف هاي ..

كلمة ارتاحي ماسمعتها من احد كل عمري ..

هديل :

تره محد يكولها للمره خصوصا تخلص عمرها تعبانه محد يكللها ارتاحي .

عذراء :

سديتيها بوجهي مو توني امدح بيج ..

ضحكت هديل وكالت ؛

احلى مابيج انج تنشرين طاقة ايجابية بكل وقت وبكل مكان حتى باتعس الظروف ..

عذراء :

كوميلنه خل اروح اسلم عالحجيات كللش مشتاقتلهن كلبي طاك عليهن وعلى سوالفهن ..

هديل :

لا بالاول كعدي اتغدي ، بعدين روحي سلمي براحتج وسولفي ادري بيج ماتشبعين من السوالف .

عذراء :

الله عليج ؟؟؟

انه هواي اسولف ؟؟

كولي غيرها يمعوده ..

رحت سلمت عالحجيات الي اتلكني بالاحضان والبوس لدرجة بجيت ..

ام صفاء :

اي ليش تبجين هاي رجعتي بالسلامة كفاره على كولت المصريين ههههه.

عذراء :

ابجي لان اشتاقيتلكم ..

احس رجعت لاهلي ولبيتي ..

ام عقيل :

والله احنه هم اشتاقيتالج ، مكانج فارغ .. عبالك بنيتنه راحت من عدنه ..

جنتي تجين تشوفينه يوميه الصبح والعصر وبالليل خاف محتاجين شي ..

تسبحينه وتغسلين هدومنه ..

والله يوميه اذكرج بالليل وادعيلج الله يوفقج جنتي تجين تمرخين رجليه من يوجعني وتفركينهن بفكس ارتاح وانام ..

هديل :

جا مو يوميه انه اجي امرخلج رجليج بمكانها ؟

ام عقيل :

اي صحيح الله يرضى عليج بس مو مثلها هي من تسوي شغله تسويها من كل كلبها لذلك ايدها بيها العافية من تمرخني رأسا انام حتى الوجع يروح ..

مسحت دموعي كتلها :

ام عقيل طلعت تحبيني على مصلحة مو لله ..

ضحكت حيل وباستني ..

جانت عدنه حجيه جبيره بالعمر مره مثقفة كلش تحب الشعر والكتب تقرا طول الوقت عدها بنية وحده بس البنية من اتزوجت ذبت امها بدار المسنين بعدما اتفقت هي ورجلها وقشمروا الامايه وباكوا فلوسها واملاكها ..

طبعا الابو متوفي والام بعد وفاته مامتزوجة باقية ارملة وحيده حتى تربي هاي البنية احسن تربية وتدللها وتدخلها احسن مدارس واحسن جامعات وللاسف ماغزر ..

جانت بالحمام من اجت وشافتني كاعده ظلت تبجي حضنتني :

ياروحي ياماما وين جنتي ...

شكد مشتاقتلج ..

والله هسه احس روحي ارتاحيت احس عبالك الله عوضني بيج عن سارة بتي ..

عذراء :

حبيبتي خالة فدوه اروحلج .

ام سارة :

يومية اقرا قصة واتخيلج كاعده يمي مثل قبل واكول هاي لسُرى ولو اسمج طلع مو سُرى بس تبقين بالنسبة الي سُرى اللي عوضتني وخلتني احس انه ام من جديد ..

عذراء :

لا خالة احب اسم سُرى احسه يخليني انسانة ثانية مثقفة مو عذراء الخلصت عمرها ذليلة وجوعانه وبس تكرب ليل ونهار وكل يومية تنكتل وياريت على سبب يسوه ..

ام سارة :

اتمنى بنتي سارة لو مثلج ومثل اخلاقج وقوة تحملج .. بنت شابة مثلج حرامات تعيش بهيج مجتمع ظالم ..

انت كان لازم تكونين هسه طالبة ماجستير او دكتوراه بعدج بمقتبل العمر المثلج هسه بدت تحب ..

وحده بهالبراءة جريمة تعيش بهيج مكان .

عذراء :

خالة حجيج حلو بس هو انه هنا واتمنى لو يقبلون ابقى ..

حتى مدرسة ماكملت بطلوني حتى اكنس وامسح واطبخ ولو انه اصلا كسلانة شلون اصير دكتوره ترديني اموت العالم هههه .

ام سارة :

طالبة دكتوراه مو دكتوره ..

الدكتوراه تختلف يعني هم تصيرين دكتوره بس مو طبيبه ..

فهمتيني ؟

عذراء :

لا والله كل شي ماافهمت ..

جان يوم سعيد بالنسبة الي حتى ابو سمير موظف عدنه جبير رجال طيب اجه سلم علي :

افتقدناج والله مكانج فارغ عمو ..

عذراء :

ابو سمير من اشوفك اتذكر الوكيل مال الكمية ( الحصة التموينية ) مالتنه يم اهلي كبل ..

جان اكبر حرامي يبوك من الطحين والشكر ..

ضحك :

هههههه والله كلامج صحيح ...

الوكلاء اغلبهم حرامية .

عذراء :

اشوفك صاير مرح وتضحك كبل كله مغندب بس لااتزوجت على ام سمير ؟

ابو سمير :

ههههههه لا ام سمير غالية مااكدر اتزوج عليها .

عذراء :

اي هو خوفك من هاي الكلاوات مالتكم غاليه وعالية وتالي تطلع متزوج بت السبعطعش وام سمير نايمة ورجليها بالشمس ..

ابو سمير:

ههههههههههه والله اليوم صدك ضحكنه انت صدك مسويه حس بالدار ...

عذراء :

والله انه شاكة بيك متزوج هاي السعادة غريبة ..

نمت مرتاحه بالليل رغم خوفي من ردة فعل ست هناء من تجي وتشوفني هنا ..

ثاني يوم كعدت الصبح نشيطة اريد اشتغل اريد ارجع لحياتي الهادئة بالدار كمت طلعت بره شفت الجو دافي وحلو اخذت كم حجية سبحتهن وغسلت هدوهن وبدلت جراجفهن وانوب رحت للمطبخ سويت ذاك الريوك المعدل الي والهن وكعدنه نتريك ونسولف ونضحك الى دخلت ست هناء :

هاا عذراء ...

الحمدلله عالسلامة .

طلعوج ؟

عذراء :

هلا ست هناء شلونج

اي والله طلعوني لان مامسويه شي .

البقية بحياج هديل كلتلي عدكم حالة وفاة ..

ست هناء :

حياتج الباقية ..

خلصي وتعاي وراي ..

نكتت ايديه من الخبز وكمت بس الحجيات كللي :

كملي ريوكج وبعدين روحي ..

عذراء :

خاف تطردني ..

هديل :

كل احنه نحجي وياها خلصي اكلج بالاول ..

كامت هديل راحتلها الظاهر وبعدين كم وحده من الحجيات ..

بقيت متوتره بعدين كلت لا خل اروحلها والكاتبة الله يصير الله مايخليني ويدري انه ماعدي ذنب ..

رحت لكيت كم حجية يمها وابو سمير وهديل كلهم يحجون وياها دخلت وبقيت واكفة وهي ساكته بعدين كلتلي :

انه خليتج هنا على مسؤوليتي ، مامحتاجة عاملة ولاموظفة بس انقهرت عليج وكلت خل تبقى وسند كلي انت يتيمة وماعدج احد ..

ولان طلع ماعدج شي ولان اول موظفة الكل يحبها ويجي يدافع عنها ويطلب مني انطيها فرصة ثانية ...

راح اوافق تبقين هنا بس بشرط هاي اخر مره تصير مشكلة او نتعرض لموقف بسببج ..

اي شي ممكن يصير وياج او يصيرلج راح تدخليني انه بمشاكل انه في غنى عنها ..

تردين تبقين هنا مااريد لاشرطة تجي تدور عليج ولا اي مخلوق هذا دار مال مسنين مو دار ايتام اي غلط منج تطلعين منا وبدون رجعة ..

انه مااكدر اتحمل المسؤولية ..

واضح ..

هزيت راسي اي ..

ست هناء :

تكدرين ترحين لشغلج ..

عذراء :

يطيج العافية ست ..

ماجاوبتني ادري بيها ضايجة مني بس حقها تخاف من المسؤولية بهذا الزمن الناس ماتتأمن ..

بقيت مده مااعرف شي عن سند وتليفون انمسحت منه كل الارقام وانغلقت الشريحة ..

عذراء :

هديل هم شفتي سند بعد ؟

هديل :

اي من طلع من السجن اجه لست هناء سأل عليج ..

عذراء :

انعم الله عليه من سأل علي ..

هديل :

عوفينه من سند احجيلي بالله عن حياة السجن مثل اللي يطلعونه بالافلام والمسلسلات عصابات ومدري شنو ؟

عذراء :

اييي ..

جا ماكتلج انه اتمنيت مااطلع على كدما ونسه جا غير صرت رئيسة عصابة جمعتلي شلة من ذني الشقاوات وشبعتهن دك خوفتهن مني راويتهن العين الحمرة من اول يوم طبيت بي عليهن روايتهن النبي عربي خليتهن يتراجفن هجي هجي يتراجفن مني ..

هديل :

الله عليج ؟؟

وشسون بالله ؟

عذراء :

شيسون يعني برأيج هن يكدرن يسون شي بعد انه استلمتهن حاصل فاصل كتل ورزايل ..

احجي وهي ملتهيه بالتليفون ..

عذراء :

هاا ؟

انام لو عدج بعد سؤال ؟

هديل :

دقيقة بس .. انتظري ..

نعست وهي ملتهية بالتليفون رجعت كتلها :

خلصتي ؟

هديل :

اي خلصت ..

احجي هسه ..

عذراء :

بس انه نعست ، شرايج ابطل جذب وانام ؟

هديل :

جذبيش ؟؟

عذراء :

مال كلاوات العصابة والكتل ..

تره جانت امي تسميني الجبانة ، الخارمة ..

هذا شكل رئيسة عصابة وتصلخ وتملخ ؟؟

شو هن يتعاركن بيناتهن وانه خاتله بالزاوية وكل شوية تلوحني كفخة ..

هديل :

هههههههههههه يعني كل هذا الحجي جذب ؟

ههههههههه وانه مصدكة واكول بسرعة تأقلمت ويه حياة السجن ههههههههههه .

عذراء :

يالله تصبحين على خير باجر اسولفلج قصة الضابط الانعجب بيه بالسجن وسألني اذا مخطوبة لو لا ..

خليت راسي عالمخده وهجمت علي هديل :

عليج الله ؟

شلون هيجي حجه وياج ؟

شكلج يعني ؟

عذراء :

كلي حبيتج من اول نظره لوما هسه عدنه تحقيق وياج جا خطبتج واخذتج من اهلج غصبا ماعليهم ..

ونعلت والديهم ..

هديل :

وعليكن ينعل والديهم ؟

عذراء :

خاف يعترضون غير ..

صفنت هديل بعدين دنكت يم اذني :

ماادري ليش احسج تضحكين علي ؟

عذراء :

والله ياهديل كلامج صحيح ، طبعا اضحك عليج من كل عقلج الضابط ينعجب بيه ؟؟

شبي اعمى لو اثول ؟

هديل :

ههههههه خرب يومج وانه اكول معقولة سُرى راح تصير قصتها مثل قصص الانترنت .

عذراء :

قصصيش هاي ؟

مال بنات يحبونهن ضباط ؟

هديل :

هههههههه ضابط وشيوخ ومجرمين وكلهم يطيحون بغرام الصبايا من اول نظره .

عذراء :

عليج الله ؟؟

وعود صدك يتزوجونهن ؟

هديل :

شمدريني ..

عذراء :

الله يطيح حظج ياامريكا ..

جا شبيه محد يحبني لو ينعجب بيه ؟؟

هديل :

ههههههه شبيج تره مجرد قصص خوما كلها صدك هيج الشيوخ والضباط فارغة ماعدها شغل بس تكتب بقصصها هههههه ..

عذراء :

وين يكتبونهن يعني ؟

هديل :

اكو بنات هيج بعمرج واكبر واصغر يكتبنهن .

عذراء :

اريد اكتب قصتي ...

هديل :

ليش لا .. بس انت قصتج كلها حزن ومآسي عالاقل حققي شي بحياتج حتى تستحق تنكتب ..

صفنت افكر وهديل نامت بس ماكدرت انام ..

ندهت هديل :

اكلج علميني اريد اصير مثلج اقرا كل شي واتعلم كل شي وافتهم كل شي ..

هديل :

تره الساعة ب (١٢ ) اليتعلم الصبح مو هسه ..

عذراء :

اي هم صدك ..

نامي نامي انه هم نسيت عبالي بعدني عد سعيد الدسم لاشاف السعادة كون بالدنيا ولا بالآخره ..

الله يرحمه اسم على غير مسمى على كولتهم .

بدت هديل تعلمني اقرا كتب وتشرحلي امور ماجنت افتهمها بالبداية ..

عن المشاعر وشلون نتحرر من مشاعرنه الحزينة والماضي العشناه ..

عذراء :

انه شعليه بالماضي المصخم .. انه اريد اتزوج ضابط معليه ..

وينه هذا البي القصص ؟

طلعيه خل اشوفهم ..

هديل :

ولج ياضابط فتحي عقلج وياي مو تردين تتعلمين عوفي القصص هسه من اول قصة انت تنهزمين ونظل ندور عليج .

عذراء :

انهزم وين اولي ؟

هديل :

ترحين تسويلج مصيبة حتى ترجعين للسجن يم الضابط .

ضحكت كتلها :

تصدكين عجبتني هاي الفكرة ، هديل تره انت هم مرات عدج افكار مفيده غير الكتب وهاي الكلاوات مال العقل البشري مدري شسمه ..

البارحة بالليل كله اضحك على هاي السالفة الكتيلي عليها مال الانسان اصله قرد تره يمكن صدك .

هديل :

لا مو صدك بس هي نظرية قديمة بناءا على هياكل عظمية اكتشفوها للانسان القديم بس شكلها يشبه القرد بس مو صحيحه هي .. لان الله خلق قبل عالمنه هذا الف عالم وقبل سيدنا ادم ابو البشر الف ادم يعني مو بس احنه اجينه عشنه عالارض هاي قبلنه جان اكو مخلوقات مختلفه ..

عذراء :

لا صدكيني ..

انه متأكده هاي نظرية على كولتج صحيحة والدليل اميلك اخوي خوت عظامه كون ..

وسعد الله يرحم اثنيهم قروده تره مو بشر ..

زحمه اكول جلاب كل مره خاف الجلاب تزعل ..

باوعتلي هديل وفطست من الضحك ..

عذراء :

اسم الله ..

على كيفج ..

ضميلج ضحكة لباجر ..

ثاني يوم الصبح كعدت وطلعت اشر وصلة المسح بره وشفت سند طالع من يم ست هناء ..

صحت عليه :

هيي ..

شسمك انت حتى نسيت اسمك ..

اي سنددد ..

سندد ، حتى اسمك الله كالبه ..

التفت شافني بقى واكف ..

رحت عليه كتله :

ها الله يساعدك .

سند :

سُرى !! شلونج ؟

عذراء :

الحمدلله انت شلونك ؟

شلونها الحجية ؟

سند :

الحمدلله ..

زينة ..

شخبارج ؟

عذراء :

بخير الله يسلمك ، انت شخبارك ؟

سند :

الحمدلله ..

شلونهم وياج هنا ؟

عذراء :

زينين .. كلش زينين ..

رحم الله والديك من جبتني هنا ..

بس اكلك خوما كتلوك بالتحقيق ؟

التفت علي باوعلي وهو يضحك:

لا ، ليش يكتلوني ؟

عذراء :

شمدريني همه غير من يحققون ويه المجرمين يكتلونهم يدبغون جلدهم دبغ حتى يعترفون خصوصا المو اول مره يسوون مصيبة ..

سند :

وانه شمسوي من مصايب قبل ؟

عذراء :

شمدريني ..

انت كول شمسوي ؟؟

غير سالفة متزوج بدون علم اهلك .. دهر كون ماخفت يزعلون ماخفت شي ..

وهديل بطرانه تكول مو قرد والله يا الله ..

سند :

قررردد ؟!!!

‏"على المرء ألا يَسأل ما لَم يَملك قوة تحمُل الإجابة."

يتبع

بداية الرواية من هنا

حملوا تطبيق النجم المتوهج للروايات الكامله واحصلوا على أحدث نسخه مجانا من هنا

روايات كامله وحصريه من هنا

تعديل المقال

النجم المتوهج The glowing star

رواية سند والعذاري الفصل الثاني والثالث والرابع والخامس بقلم روز الفياض حصريه وجديده على مدونة النجم المتوهج للروايات

مقالات قد تهمك