جميع الروايات كامله

 رواية سند والعذاري البارت الاول بقلم روز الفياض حصريه وجديده على مدونة النجم المتوهج للروايات والمعلومات 

رواية سند والعذاري البارت الاول بقلم روز الفياض حصريه وجديده على مدونة النجم المتوهج للروايات والمعلومات 

في ملحمة جديدة نلتقي وحكاية جديدة نروي ..

نقص عليكم بعض احداثها الشيقة آملين ان تنال اعجابكم .

روز الفياض🌹

في كل روايه وكل قصه هناك شئ مني واشياء منك..💔

اللهم سندا لايميل ولايمل 🖤

اندكت الباب الخارجية حيل ..

مره ..

مرتين ..

تلاثة ...

مافتحته خليته مقفول بالقفل والمفتاح ..

ادري بي هذا سعد واحتمال يكون سكران ..

بقيت كاعده بالهول بحدي واباوع بسكوت من وره البرده ..

فجأة شفته طفر من السياج لداخل الحوش ..

كمزت من مكاني رحت وكفت يم باب المطبخ بالظلمة اباوعله بسكوت خفت خاف يكسر الجام ويفتح الباب ..

كلما يقترب من باب المطبخ يزداد الخوف بكلبي وابقى ارجف ..

سعد :

قندر..ه ..

فتحي الباااب ..

ادري بيج جوه ...

فتحيييه ..

بت النعااا..ل..

انه الج ..

ردت ارد عليه بس اتذكرت انه لازم ابقى ساكته حتى يروح عباله محد بالبيت المن طفيت الاضوية اذا اجاوبه .

سعد :

جلب... ه ..

فتحي الباب لا انعل والديج ..

اشوفج انه اشوفج لاعبالج ظلمة مااشوفج ..

والله وبالله اذا ماتفتحين الباب الا احركج انت والبيت واشوف شلون تطلعين منه ..

عود مسويه روحج مو بالبيت ؟

هههههه وين رايحه يعني لامج الداي...ة ؟

لو اخوج العار ؟

ههههههه محد يلفيج عده لان انت مو ادميه .

يسويها ماعنده مانع ويحرك البيت ادري بي ..

جاوبته :

شتريد سعد انت مو طلكتني ؟

سعد :

هااا .. هههه خفتي احرك البيت بيج ؟

تعلميني بسوالفج ههههه .. حافظهن ..

دفتحي الباب لا تخليني الم الجوارين عليج مثل كل يوم خليني فد يوم احترمج لو متعلمة على النعل تصعد وتنزل عليج ؟

شتريد مو طلكتني .. بيتي هذا بت الزفره شنو شتريد .

عذراء :

سعد روح اليوم لبيت اهلك نام لو روح لواحد من جماعتك انه هسه مره غريبة عنك مااحلك ومايصير تبات يمي ..

سعد :

بت الخ..ه بيتي هذا .. اذا مايعجبج انت طلعي ..

روحي ولي لاهلج للشارع لجنهم لاي مكان يعجبج .

عذراء :

وين اروح ؟

سعد :

لجنهم ..

انه شعليه وين تولين ..

عذراء :

دروح بات عد اهلك عفيه بس اليوم عالاقل ..

صرخت ..

وين اروح هسه ؟

وين انهزم منه ؟

هسه بس يدخل يكطعني ..

دخلت للغرفة ركض وقفلت الباب علي ..

سمعته دخل للبيت وهو يغني مبين سكران ..

كعدت وره الباب وادعي ياربي خليه ينام بهدوء ياربي خليه ينساني لاتذكره بيه ..

سمعت خطواته يم الباب كشيت كال بصوت عالي :

وين تروحين مني جا مااكضج ..

ههههه اذا ماطيحت حظج اصبريلي.

كتله بكلبي :

الله يطيح حظك اكثر واكثر ..

فجأة دك الباب وكمزني ..

فز كلبي من الخوف ..

سعد :

خاف صدكتي طلكتج ومااكدر ارجعج لذمتي ههههه كلها يومين ويرجع ويطلكج وترجعيلي .

لوما تردين ارجعج ؟ 

تردين تديحين ادري بيج ..

هاي امج ..

امج الشريفه العفيفه هههههه .

لو شسمها اختج ؟

بقيت ساكتة كوه اتنفس ..

شيطلع الصبح ..

باوعت للساعة الساعة ب(٣ ) الفجر ..

شلون ياربي ورطه ..

شسوي هسه ؟؟

هذا ماعنده مانع يكتلني ولا عنده مانع يذبني بالشارع ..

وين اروح هسه ؟

لاعنده شرف ولا عنده غيره ..

الله لا يسامحك ياالك  على هاي العمله ..

مالكيت غير هذا تزوجنياه ؟؟

وانه بس هالاخت عدك وماصنتني ..

بس هو المجرم شلون ممكن يكونون اصدقائه وجماعته اكيد مثله مجرمين ..

انت لو ماشي بطريق عدل جا مااتعرفت على واحد مثل سعد ..

بس انت مشيت بطريق اعوج ..

مخدرات وشرب وملاهي ..

بس هم مو صوجك امي وابوي يتحملون ذنبي وذنبك ..

ابوي يبيع  حبوب كبسلة وامي بلغت عليه الشرطة حتى تخلص منه وتتزوج صاحبه ..

انت شطلع بعد ؟؟

انه شطلع ؟؟

عشت عمري كله بالغلط والاهانة والكتل والسحل ..

جنت اتمنى انام واكعد الاكي اهل غيركم اهل نظيفين حترمين سمعتهم طيبة ..

اهل بيهم محنة ..

بيت ينسمع بي صوت الاذان والقران .. بدل صوت الاغاني والدك والركص ..

بيت محد يطبله بدون اذن صاحبه .. محد يطبله بس النظيف وشريف ..

جنت اكعد وره البيت من يجون صحبان ابوي لو اخوي ويبقون لنصاص الليالي يشربون حبوب ومخدرات واشكال والوان ..

اشررد ..

حتى محد يحط عينه علي لو يباوعلي بوصاخه ..

حتى لا واحد يكول اطونياها وادري بيكم ماعدكم مانع تسوونها ..

وفعلا سويتها ياخويه واطيتني لسعد علمود يسد عنك دينك ..

وشكد دينك ؟؟

سعر الايفون الشتريته بوكتها ..

بعتني بتليفون !!

تنهدت وانه اسمع صوت سعد بالمطبخ يحوس ..

باوعت للتليفون ..

اتصل عليه ؟؟؟

لا لا لا زحمه ..

شيكول علي هسه اذا اتصل عليه ؟؟

لا خليج كاعده بالغرفة وقافلتها احسن .

بس لشوكت ؟؟

هذا مايعوفني بحالي .. 

شوكت الله يخلصني منك ..

شوكت ..

كمت تمددت عالجرباية نعست بلكي هذا يبقى نايم بره ..

تغطيت ونمت ..

.

.

.

وره ماادري شكد حسيت بايد حضنتني ..

بالبداية عبالي حلم ..

بس بعدين درت وجهي شفت سعد يمي ..

رجعت غمضت ونمت ..

بس ثواني وحسيت احد عبالك ندهني ..

كعدت عدل باوعت منا ومنا ماكو شي التفتت بصفي الغرفة ظلمة بس اكو خيال جسم يمي ..

مديت ايدي اتلمس .. 

هذا جسم انسان يمي ..

باوعت على باب الغرفة مفتوح !!!

هذا حلم لو حقيقة ؟؟

اتلمست الموبايل وفتحت اللايت ووجهته بعيددد ..

كمت على كيفي رحت فتحت لايت النوم الصغير يم الباب ..

وكفت اباوع حتى افرزن الاشياء بالغرفة الى وصلت للجرباية شفت سعد .

هذا شدخله للغرفة ؟؟

اتدنيت يمه على كييف .

باوعتله نايم ويشخر ..

بسرعة اخذت عباتي وحجابي وجزداني وتليفوني وطلعت من الغرفة ..

بقيت واكفة بالحوش ابجي ..

ياربي ليش هيج يصير بيه ؟؟

ليش ؟؟

اهلي مو خوش اوادم شنو ذنبي انه ؟؟

لان اريد احافظ على شرفي وسمعتي هيج يطيح حظي ؟؟

وين اطي وجهي هسه ؟..

رجعت دخلت للبيت باوعت للساعة بالاربعة ..

سمعت صوت الاذان ..

اذن الفجر ..

بجيت ..

طلعت دعيت وبقيت واكفة ..

ياربي دليني وين اروح والمن اشرد ..

اذا اروح لاخوي يرجعني واذا لامي تزوجني لواحد يمكن انكس من سعد هاي اذا ماسعد اطاها كم فلس ورجعتني عليه ...

ابوي محكوم عشرين سنة .

هسه لو عدي رقم احد اتصل عليه يجي ياخذني ..

بقيت واكفة ربع ساعة يمكن متردده وخايفة بس كلت ماكو غيره ماعندي غيره اصلاً ..

رجعت للغرفة سحبت تليفون سعد واتذكرت هو مخليله رمز مااكدر افتحه ..

رجعته ..

خطرت ابالي فكرة ..

رحت طلعت تليفون سعد القديم وخليته عالشحن لحدما اشتغل صفنت شوية اتذكر الرمز ماله لان كم مره راقبته شلون يفتحه ..

كعدت اجرب..

مره ..

مرتين ..

تلاثه ..

خمسة ..

عشرة ..

ماكو .. كله غلط يطلع ..

ياربي شمخلي من تاريخ هذا ؟؟

لا تاريخ ولادته الكشره ..

لا تاريخ زواجنه الاسود .

جا شمخلي ؟؟

اتذكرت قبل شهرين من سافر وخلاني بحدي بالبيت بدون لامصرف لا شي وراح ويه صاحبته لاذربيجان يتونسون لان هو كل مره يغير الرمز كلما يتعرف على وحده جديدة يخلي مواليدها ومن رجع وسألته وين جنت كلي :

عيد ميلاد نونه ..

اخذتها لاذربيجان سفره .. تتونس .

عذراء :

نونه منين ؟

سعد :

الحب الجديد ..

عذراء :

اخذتها تونسها بعيد ميلادها ؟؟ ... وماخليتلي فلس بالبيت ؟

لاكلت يمكن تحتاج شي تريد شي يخلص الخبز العدها يخلص المسواك ..

يمكن يصير قدر عليها ..

سعد :

ويطبج مرض انه شكو ..

اتنفست حيل وانه اتذكر ..

فتحت التقويم ياترى يايوم جان ؟؟

شكد بالشهر ؟؟

يمكن جان يوم الاربعاء ٣ بالشهر ..

جربت ماضبط ..

يمكن الاحد ؟؟

بقيت اجرب ايام الشهر لحدما انفتح التليفون ..

واخيراً

دخلت بسرعة عالاسماء ادور اسمه ورقمه ..

هذا ..

نقلته بتليفوني بسرعة وطلعت للحوش ادك عليه ..

التليفون يدك وكلبي يدك ..

يدك ..

يدك ..

يدك ..  بس محد يجاوب ..

خرب حظي بس لا مورقمه هذا ..

رجعت من جديد دكيت شكد ظل يدك ..

فجاة انفتح الخط ...

حسيت نشف دمي ..

بس كال الو انكطع الخط ..

صبت دموعي ...

اكيد ماعندي رصيد ..

كعدت بالكاع ابجي واتوسل برب العالمين ينقذني ..

ابجي وساده حلكي بالعباية حتى مايطلع صوتي ..

وحسيت التليفون يدك عالهزاز ..

طفرت من مكاني .

كمزت ..

باوعت شفته هو نفس الرقم ..

كمت ركض اتدنيت يم الباب الرئيسي حتى اجاوب كتله بصوت ناصي ومخنوك من البجي :

الو ..

جاوبني ومبين من صوته جان نايم :

الووو ؟

منو ؟

عذراء :

خويه الحكني فدوه اروحلك انه عذراء مرت سعد ..

جاوبني مستغرب :

منووو ؟؟

عذراء :

عذراء .. 

عذراء مرت سعد الطلكها .. 

طلكني ذاك اليوم وانت ..

جاوبني قبل لااكمل :

اي ..

اي .. 

عرفتج ..

شمحتاجه ؟

عذراء :

الحكني فدوه اروح لمروتك هذا سعد اليوم رجع للبيت وكسر الباب ودخل علي وانه بحدي ..

واخاف منه ..

وانه بعد مااحلله ولا هو يحلي .. هو هسه رجال غريب مايصير يجيني للبيت ولايطب علي ..

وانوب سكران .. والشيطان مامات ياخويه ..

اخاف يروح يذبحني لو شي .

وسكتت لان مااسمعله صوت عبالي انكطع الخط ..

باوعت للشاشة موجود ..

جا وين راح بس لا نام ؟؟

بقى ساكت بعدين سمعت صوته يتنهد حيل وكلي بصوت مال واحد ماله خلك :

ماشي ..

ماشي ..

مااكدر ابقى هنا اكثر باوعت للسما بدت الشمس تطلع خليني اطلع منا كبل لايحس بيه سعد ..

بس وين اولي .؟

اتذكرت مفتاح الباب جوه بالغرفة ..

شيرجعني اجيبه ..

اففف ..

رجعت اتسحب على كيف للغرفة اخذت المفتاح واخذتلي كم قطعة ملابس مااشوف الغرفة ظلمة ماادري شطلعت من الكنتور دورت الشاحن مال تليفوني .. 

ماكو !!

وين راح ؟

كل شي ولا الشاحن ياربي ..

اتذكرت عفته بالمطبخ ..

رحت بسرعة طلعتلي علاكة نايلون خليتها بيها هدومي والشاحن والجزدان .

هو شكد بي الجزدان بالله ؟

فتحته باوعت مابي بس عشرة !!

يالله ميخالف تفيدني كروه عالاقل .

عالاقل برستيج كدام الناس شايلته شكلك عدي فلوس ..

صيت الغنى ..

لبست حجابي عدل ولفيت عباتي فتحت القفل على كيييف وايديه ترجف ..

وادردم ويه روحي :

هذا كله وتاليته يكضني ويرجعني ..

ياهو يلفيني عده .. محد ..

مرجعي عليك ..

حتركت صفحتك .

انفتح الباب ومديت راسي محد بالشارع ..

لزمت عباتي زين وطلعت امشي بسرعة بالشارع مااشوف كدامي من الخوف ..

مااادري وين ادوس طين .. مي .. وصاخه .. ماادري .

فجأة حسيت شي يختض كمزت وشمرت العلاكة من ايدي ..

ثواني واتذكرت التليفون صامت يمكن يدك ..

طلعت التليفون من جيبي وجاوبت كلي :

الوو ..

وينج ؟ انه بره ..

عذراء :

الو .. انه مو بالبيت ..

طلعت ..

جاوبني باسلوب مال واحد ماله خلك :

طلعتي وين يعني ؟

وين رايحه من غبشة الله ؟

عذراء :

انهزمت ..

انهزمت من سعد ..

سند :

المن خابرتيني ؟

شتردين مني اسويلج هسه ؟

عذراء :

اريدك تساعدني ..

جا غير انت رجلي هسه ؟؟

سكت بعدين سألني :

انه شنو ؟

عذراء :

رجلي ..

اتنهد حيل وسألني :

انت وين هسه ؟

عذراء :

انه طلعت للشارع العام اتانيلي سيارة شي ..

احد يوصلني .

سند :

اففف ..

اوكفي انه جاي ..

هم سد التليفون بوجهي ..

بقيت واكفة بالبرد واباوع على رجليه كلها طين ونعالي مكطوع وحالتي حالة ..

شوية ووكف كدامي بسيارته دنكت باوعتله جنه مايشوفني لاحاجني لا باوعلي مد ايده على باكيت الجكاير يمه وطلع جكاره وبدا يورثها !!

فتحت باب السيارة وصعدت كدام وعلاكتي بحضني وكتله :

الله يساعدك ..

جر نفس من الجكاره ونفخه من الشباك ورجع دار علي باوعلي وكلي :

هلا ..

طلع بالسيارة ساكت شوية ومد ايده شغل الراديو خلاه عالقرآن ..

كلت بكلبي شنو هالديانه كلها !!

قرآن مره وحده ؟؟

لا هذا واصل مرحلة عالية بالجذب والكلاوات ..

هو سعد خريج سجون وطايح حظه ومايعرف الا النطيحه والمترديه وينك ووين القران دخيل الله .

اتنهدت بصوت عالي وهو ساكت ولايمه ..

ادردم بكلبي ومنفعله وإشر بايدي من العصبية وهو مغلس ..

فجأة كلي :

سعد وين ؟

عذراء :

نايم 

سند :

يدري بيج طلعتي ؟

عذراء :

لاا .. اكله انهزمت منه يكلي يدري ..

مسودنه اكله حتى مايذبحني .

سند :

شوكت رجع ؟

عذراء:

البارحة نص الليل رجع مثلما اتوقعت راح ويه هاي صاحبته يتونس كم يوم ورجع على كلبي ..

سند :

شسوالج ؟

عذراء :

شسوالي ؟ ماسوالي شي .. اسم الله الرحمن همزين الله عماه ونساه ذكري ..

يمه اسم الله ، تف تف تف ..

ضحك على كيف وبقى ساكت بعدين كلي :

وين تردين اوصلج ؟

بهتت ...

درت عليه كتله :

ماعندي مكان اروحله ولاعندي احد يستقبلني .. انت تدري ابوي محكوم وامي ورجلها مايردوني واخوي مااكدر اروحله ..

هز راسه بمعنى ادري ..

عذراء :

ذبني بأي مكان حتى لو بالشارع بس كون منطقة سعد مايوصللها ..

ما حاجاني ولارد علي ..

طلع بطريق ماادري وين وبأي منطقة من اتزوجت سعد لليوم محبوسة ماشايفة الشارع بس للطبيب لو من انهزمت كم مره منه بالليل من يشرب ويكتلني وكل مره يطلع وراسي يسحلني من شعري كدام الناس ويرجعني للبيت ..

صار سبع سنوات !!

اويلي شلون خلصت هاي السنين ويه سعد وطيحان حضه ؟؟

اباوعله فتح باب بيت ورجع للسيارة ..

دخل السيارة للكراج وكلي :

نزلي ..

نزلت وهو راح سد الباب ورجع مشى كدامي يفتح الباب الداخليه مال البيت ..

بقيت واكفة اباوعله لحدما دخل وعاف الباب مفتوح ..

شوية ومد راسه كلي :

ليش واكفة ؟

دخلت وراه للبيت ..

حسيت بالدفو ..

باوعت البيت اظلم ماكو ضوه ..

اكيد نايمين هسه اهله ..

راح كدامي جوه وانه بقيت اباوع وراه لحدما رجع اشرلي بيده :

اتفضلي ..

كعدت وهو كعد كبالي يباوعلي كتله :

اكلك خوية خاف زحمه من اهلك جيتي لهنا ؟

سند :

محد بالبيت بس انه ..

كمت وكفت كتله :

شنو محد بالبيت ؟

ليش جبتني هنا مادام محد بالبيت ؟

سند :

وين اوديج ؟ هذا بيتي .. انت مو تكولين انه رجلج ؟

عذراء :

اي رجلي بس مو معناها اكعد وياك ابيتك بحدنه ..

ضحك على كيف وكلي :

فهميني بالله انه ماافتهم ..

عذراء :

سعد كلي انت راح تتزوجني حتى هو يكدر يرجعني بعدين ..

محلل على كولته ..

سند :

محلل ؟ هههه ..

ماشي ..

انه ماكلت شي غلط ولا اخليت بالاتفاق ..

عذراء :

اي بس جبتني هنا بحدي وياك ..

شيكولون علينه الناس ؟

وحرام .. 

طلع جكاره ثانية وورثها وسحب نفس وبعدين كام نفخه بوجهي ..

درت وجهي ورجعت خطوتين كلي :

انت مو اخت مالك ؟

عذراء :

اي .. 

رجع باوعلي كأنما مستغرب او مامصدكني :

جا شبيج خابصتنه بعد ؟

عذراء :

شبيه شنو ؟

شنو يعني خابصتك ؟

لاعبالك مالك اخوي معناها انه مثله طايح حظيي ..

انه لو مثله جا ماانهزمت من سعد .. 

لو جا كتلك وديني لبيت مالك لو امي ..

رجع كعد وسحب الطفاية يمه كلي :

سعد خابرني كال طلكت مرتي واريدك تتزوجها حتى اكدر ارجعها لذمتي بعدين .. 

وهسه اول مايكعد راح يدور عليج .

راح يروح لاخوج ويروح لامج وبعدين يخابرني ..

انه راح اكله انت عدي .. 

ابيتي ..

مرتي بعد ..

عذراء :

يذبحك بس تكله عدي بالبيت ..

ضحك ..

سند :

اي يذبحني هههههه ..

سعيد الدسم يذبحني ههههههههه .

خوش ..

عذراء :

سعيد الدسم ياهو ؟

رجلي ؟

سند :

طليقج ..

مو طلكج هو ؟ 

عذراء :

اي 

سند :

معناها طليقج .. 

انت هسه متزوجة سند ..

سند :

شنو ؟

عذراء :

اقصد .. يعني كون مو بس اسمك سند ..

كون تحميني صدك ..

طفى الجكارة بالطفاية ورفع راسه الي :

روحي نامي وارتاحي .. 

عذراء :

وين انام ؟ شلون انام هنا وانت هنا بالبيت ؟

سند :

انه راح اطلع للشغل .. انت نامي واخذي راحتج شتحتاجين موجود الثلاجة بيها اكل الغرفة بيها فراشات وبعد شنو تردين اكيد موجود ..

بقيت واكفة متردده بعدين كتله :

الحمام وين ؟

هذا مفتاح الباب مالج علاقة بمنو يدك الباب ..

انه رايح واذا صار شي رقمي عدج ..

دار وجهه يريد يطلع كتله :

بس عفيه القبله منين ؟

دار علي فاتح عيوني وحاصرته الضحكة :

تصلين ؟؟

عذراء :

اي جا شلون عوزي طول مااصلي ..

ابتسم حاصرته الضحكه :

ماادري منين القبلة صلي باي اتجاه والله يتقبلها ..

عذراء :

شلون يصير هو لعب قابل ؟

سند :

عود من ارجع اسألج الجيران ..

نامي هسه وعوفي الصلاة لاهلها ..

قفلت الباب ودخلت استكشف البيت ..

اول غرفة هاي مبينه غرفته معفسه وحالتها حالة .

وهاي الثانية فارغة كلها زعابيل ..

والثالثة مقفولة !!

جا وين انام ؟

رجعت اخذت عباتي اتلفلفت بيها ونمت عالقنفه ..

حاولت انام بس الخوف من سعد ماخلاني انام صدك ..

بس اتكلب ..

ومنا بارده ولا اكو صوبه ولاهيتر .

ظليت ارجف من البرد ..

الى ان غفيت ..

ماادري بيش الساعة فزيت البيت اظلم يخوف يمكن هذا بعده ماراجع من الشغل ..

كمت اتلمس طريقي اريد اوصل للباب حتى افتحه بلكي يدخل شوية ضوه حتى اندل نقط الاضوية ..

دعمت بالميز ظليت اطفر بمكاني ..

اصبعي الصغير انجعص ..

كعدت اتلمس اصبعي موجوعه اتذكرت تليفوني رجعت لمكاني ادوره حتى افتح اللايت ..

لكيته .

فتحت اللايت لكيت النقط مال الكهرباء دستها ولاوحده تشتغل !!

كل اللايتات محتركه ماعدا الحمام والمطبخ !!

هذا شلون عايش بالظلمة ؟؟؟

باوعت للساعة ماعده ساعة شفت الساعة بالتليفون بالاربعة !!

معقولة كل هذا الوكت انه نايمه ؟؟

حسيت بالجوع كلت خل اشوف شنو بيها الثلاجة ..

فتحتها فارغة مابيها شي غير راس خس وطماطيتين وبيضة وحده ..

هم انعم الله ..

كصصت الطماطة وگليتها لحدما صارت لاجعه وطكيت عليها البيضة ..

دورتلي خبزه ماكو ..

فتحت الفريز لكيت صفطت خبز جامده .

طلعتلي خبزتين حميتهن عالنار مال الطباخ وكعدت اكل على كيفي وافكر انه وين ؟؟ ووين راح اروح ؟

وشراح يصيرلي بعدين ؟؟

ضحكت :

نافخ روحك علي تالي طلعوا يسمونك سعيد الدسم ههههه .

كبر حتى كبر ..

وين ماعار لافي على حظي ..

كملت اكل وغسلت الماعين سمعت تليفوني يدك ..

ركضت شفت سعد يتصل ..

انخمس كلبي ..

خفت ...

اكيد توه كاعد من النوم عساه لاكعد ..

مالكاني دور عالخدامة ماكو كال خل ادك عليها ..

غلقت التليفون وكعدت بالظلمة ..

خفت لايجي وراي سعد لهنا منو يدفعه عني ؟؟

بدت الدنيا تليل والبيت اظلم يخوف .. وانه بحدي ..

بدت الدنيا ترعد بره ...

راح تمطر خاف الجو ناقص كآبه ..

سمعت صوت شي بالبيت ..

كمت وكفت على حيلي عبالي اكو احد بالبيت :

منوو ؟؟

محد جاوب ..

عذراء :

منووو ؟؟

ماكو جواب ..

خفت خاف البيت بي جني لو طنطل ..

كمت لبست عباتي ومن الخوف عفت علاكتي وطلعت بالحوش كعدت ..

صار ليل وهذا ماكو !!

وين راح ؟

بس لا سعد كتله ؟؟

تعبت من الوكفة مره اكعد مره اوكف تعبت ..

والدنيا بارده وانه مالابسه بس دشداشة والعباية ..

كعدت ادعي بكلبي بس الشيطان مايخليني اركز حتى بالدعاء كامزلي يخليني ادردم ويه روحي :

ياربي دخيلك انه فقيره وانت تدري ومالي جنح يشيلني لو طحت بس انت وهذا الرجال وشو طلع كال رايح للشغل واختفى ؟

خاف سعد كتله ؟

انت بعد حلها بمعرفتك انه تعبت من هاي الزلم ولا واحد منهم بي خير الله ياخذهم ..

لا جذب استغفر الله اذا تاخذهم المن اولي ..

المن اروح ..

كتلني البرد وبدا الجو يمطر وانه كاعده بالحوش بحدي بالظلمة ..

وره ماادري شكد سمعت صوت سيارة وكفت بالباب ..

بس مابيه حيل اكوم بعد رجليه جامده من البرد متخشبه احسها ..

فتح الباب دخل السيارة للكراج وسد الباب ..

الحوش اظلم ماشافني وصل للباب الداخليه وفتح تليفونه يفتح اللايت كتله :

بدل هاي الاذية جا حطيتلك گلوب ( لايت ) بالحوش وبالهول لو بالغرفة ..

من سمع صوتي طفر من مكانه وطاح تليفونه :

بسم الله ..

ضحكت حيل وسكتت كوه 

عذراء :

اسم الله ..

هاي انه ..

سند :

شتسوين هنا ؟ صدك جذب وكفتي كلبي ..

عذراء :

كاعده شسوي بعد ...

متت من الظلمة ومدري ياهو جوه بالبيت ..

سمعت صوت بس محد يجاوب .. 

البيت بي جني يمكن 

سند :

جنييش ؟

عذراء :

جني بعد شنو اذا انت تطلع من الصبح وترجع هيج وكت طبعا البيت ينسكن جنانوه وطناطل وسعالو ..

فتح لايت التليفون بوجهي وبقى ساكت يباوعلي مااشوفه بس هو يشوفني ..

بعدين كلي :

كومي فوتي من المطر جوه ..

عذراء :

والله ولا ادخل .. اكلك سمعت صوت ..

سند :

ماكو جني ولا البيت مسكون ..

ماكو جني الا بني ادم ..

هاي فاره ..

هو كال فاره وانه كمت كتله :

حسبي الله عليك من رجال فاره ومخليني نايمه بالبيت بحدي ؟؟

سند :

جا شسويلج احطلج حرس ؟؟

فاره مو اسد ..

يعني حيوان اليف ..

عافني وفات للبيت واسمعه يطكطك ويركض مدري شيسوي فتح لايت تليفوني ومديت راسي عليه كتله :

كتلك لو كتلته ؟

رفع راسه ورفع ايده كاضها الفاره بايده ...

هي صرخه من وهي ركضة لباب الحوش ..

طلع وراي كال :

صارلي سنين بهذا البيت محد سمع بيه لو يدري بيه ماصارلج يوم واحد راح تلمين المنطقة ...

شمر الفار بالزبالة ووكف يغسل بالمغسلة البره .

بقيت ساكته اباوعله بعدين اتذكرت :

سعد دك علي مساع وقفلت التليفون ..

بقى ساكت ..

دخل للبيت وانه دخلت وراه ماادري وين راح اختفى وره شوية طلع من الغرفة مبدل ملابسه ماحاجاني ..

راح للسيارة فتحها نزل علاليك ورجع ..

وكف على راسي كلي :

شغلي لايت تليفونج سويلي ضوه خل اركب الگلوبات .

ركب الكلوبات وشغلهن حسيت عيوني مغوشة لان من الصبح لهسه بالظلمة .

سند :

هاي يمج بالعلاكة لفات كص وفلافل .

عذراء :

اكلت .

سند :

شكلتي ؟

عذراء :

سويت بيض وطماطه ..

ظل واكف صافن علي ..

رفعت راسي كتله :

جعت شيسوي من امس لليوم ماماكلة شي .

ماحجه ..

كعد وطلع باكيت الجكاير رجعت كتله :

سعد دك علي مساع اكيد كعد ومالكاني ..

سند :

سمعتج .

عذراء :

اي ؟

سند :

اي .. 

شتردين يعني شسوي ؟

عذراء :

شنو يعني شتسوي ؟ اكيد هسه يدور علي ..

غير انت رجلي ولازم تحميني ..

ضحك على كيف وبدا يدخن ..

رجع ضحك كال :

رجلي و رجلي ..

ادري انه جاي خاطبج ؟

غير هو اجه كال طلكت مرتي ولازم واحد يتزوجها حتى اكدر ارجعها على ذمتي ..

عذراء :

اي ..

بس انه مااريد ارجعله ..

دار علي باوعلي بعدين كلي :

لازم ترجعين ..

اول وتالي ترجعين ..

عذراء :

وشدعوه هالاخلاص العدكم ؟ 

اليسمع يكول مو خريجين سجون ..

درت وجهي ادردم بسكوت وهو يدخن وساكت ويباوعلي بعدين كلي :

منو كلج انه خريج سجون ..

عذراء :

جا وين تعرفت على سعد ومالك ؟ بالجامع مثلاً ههه .

ماجاوبني ..

بعدين كلي :

عقدت عليج وبعدين اطلكج وبس .. الباقي مو شغلج .

عذراء :

شكد اطاك فلوس ؟

طفى الجكاره ورفع راسه باوعلي :

فلوسيش ؟

عذراء :

لهااي الخطة مالتكم شكد اطاك فلوس ؟

انت شكد تاخذ بهاي الامور ؟ 

اقصد يعني بكل زواجه شكد تاخذ

كام وكف ومشى باتجاه المطبخ وسمعته كال :

مااخذ ..

.

.

.

"الإنسان هو طبيب نفسه، لن يبلغ الشفاء حتى يتخذ هو قرار التعافي."

.

.

مرحبا اصدقائي 

شلونكم ؟

مشتاقون 

البارت_الأول وضح ورسم معالم القصة تقريباً

منو عذراء ومنو سند ..

ومنو سعيد الدسم ..

ارائكم وتعليقاتكم 

لايك وتعليق وعشر ملصقات فضلاً

تكملة الرواية من هنا

روايات كامله وحصريه من هنا

رواياتكم من هنا

تعديل المقال