جميع الروايات كامله

الخطيئه الفصل الأخير الجزء الاول من الأخير بقلم ولاء حامد حصريه وجديده علي مدونة النجم المتوهج للروايات والمعلومات 

عمر لقي الأكياس وطلعهم ولسه هاينزل الميكانزم بتاع السرير كانت الصدمه لقي كيس اسود مربوط بطريقه غريبه جدا فضوله خلاه يفتحه وكانت الصدمه موبايل ندا القديم اللي قالتله انها ادته لمرات اخوها والأكثر صدمه علبه من علب خله السنان مليانه خطوط موبايل كتيييير جدا عمر

عمر بذهول : ايه داه بتوع مين دول داه تليفون ندا القديم طيب ليه كدبت عليا وقالت إنها ادته لمرات اخوها

حاول عمر يفتح التليفون كتير بس للأسف التليفون مقفول ببساوورد

رجع عمر كل حاجه مكانها زي مكانت

ونزل وهو شارد وسرحان

ندا بعصبيه: كل داه تأخير يا عمر

عمر بإنتباه: معلش كنت بدور على كيس واخيرا لقيت في المطبخ

ندا بلجلجه: كنت بتدور فين

عمر بشك: في الإدراج في الصاله واخر ما زهقت جبت كيس من المطبخ

ندا بتنهيده ارتياح: طيب يلا اتأخرنا

طلع عمر وندا وركبوا تاكسي لحد بيت اخته طول القعده عمر شارد

وبعد وقت قصير قام وطلب يدخل الحمام

دلته اخته على الحمام وقامت معاه

عمر بوجع: بقولك يا سهر طالب منك خدمه

سهر بحب: عنيا ليك

عمر: تسلمي انا عايز امشي دلوقتي هاجهز مفجاءه لندا بس متخليهاش تمشي الا لما ارن عليكي أو ارجع اخدها

سهر بضحكه: سيدي يا سيدي على الحب يحقلها يا عم البت الله أكبر بدر منور

عمر بسخريه متداريه: ايوه يحقلها اووي

وفعلا رجع عمر مكانه وعمل ان تليفونه بيرن وطلع البلكونه دقايق قليله ورجع

عمر: معلش يا جماعه انا هانزل شويه وراجع

ندا بإستغراب: ليه رايح فين

عمر: واحد صاحبي رن عليا عايزني في موضوع ضروري مش هتأخر نص ساعه ساعه بالكتير واكون رجعت خليكي مع سهر وانا راجع

مصطفي جوز سهر احتراما للموقف قام: طيب يلا انا كمان نازل اصلي العشاء في الجامع

ونزل عمر ومصطفي كل واحد في طريق مصطفي راح الجامع وعمر رجع الشقه بسرعه ودخل اوضه النوم وطلع التليفون والخطوط وحطهم في جيبه وطلع على واحد صاحبه خبير في التليفونات

فوزي بترحاب: عمر حمد الله على السلامة يا غالي ايه الطله الغريبه دي

عمر: الله يسلمك يا فوزي عامل ايه ياراجل والدنيا عامله معاك ايه

فوزي: الحمد لله على كل حال الدنيا تمام

عمر بتلجلجه: ليا خدمه عندك

فوزي شاور على عنيه: اؤمر يا غالي من عنيا

عمر اخد نفسه وطلعه بهدوء وطلع الموبايل من جيبه وحطه قدامه

فوزي بعدم فهم: ماله الموبايل داه هاتبيعه

عمر بهزه رأس: لا عايزك تفتح الباسوورد بتاعه وترجع اي حاجه اتمسحت عليه هاتعرف

فوزي: سهله النت مخلاش حاجه الا وبقت فيه وسهله

عمر: هياخد وقت قد إيه

فوزي: مش كتير مدام مش عايز تعمل سوفت هادخله على الجهاز واشتغل عليه وبالاخير الموضوع من هياخد نص ساعه ساعه

عمر : طيب يلا ابداء

وفعلا فوزي بداء بشتغل على الموبايل من غير ما يعرف ايه حكايته

ومره واحده ساب الجهاز

عمر بلهفه: ايه خلصت

فوزي: لا لسه يا ابني البرنامج بيحمل على ما يتحمل ويسطب نفسه على الموبايل هايفتح اتوماتيك وبعدين هانعمل برنامج تاني يرجع كل حاجه كانت على الجهاز

عمر بهزه رأس: ماشي

فوزي بتردد: عامل ايه مع مراتك كويس

عمر بنظره شك: ليه بتسأل السؤال داه عنيك بتقول انه فيه حاجه حصلت

فوزي بتردد: بصراحه اه

عمر بإنتباه: ايه اللي حصل ومخليك مش على بعضك كده

فوزي: بص انا هاحكيلك بس وكيلك ربنا تتصرف بعقل

عمر ببوادر عصبيه: فوزي اخلص

فوزي: بص انا شوفت مراتك من فتره كانت رايحه منطقه....... واترددت على المنطقه دي كتير وكانت لابسه لبس يعني ميصحش

عمر: لابسه ايه مراتي مبتلبسش الا دريسات طويله وحجاب طويل

فوزي بهزه راس: لا كانت لابسه بنطلون ضيق اوي وتيشيرت على كمر البنطلون وحتى شعرها كان طالع من الطرحه ومكياج بطريقه اوفر كأنها رايحه فرح

عمر بذهول: انتا بتقول ايه

فوزي:والله العظيم انا شوفتها بعنيا دول

عمر هز رأسه بيحاول يستوعب

قاطع لحظاتهم فوزي البرنامج اكتمل تحميله ثواني بقى علشان يسطب نفسه

دقايق بتمر وعمر مترقب وبيدعي ربنا انه يكون ظالم مراته لآخر لحظه بيحاول يطرد الشك من جواه

فوزي: كده الموبايل فتح هانعمل برنامج....... وداه بيرجع كل حاجه على الجهاز من يوم ما اتفتح من علبته

عمر بخوف: ماشي يلا

وبداء فوزي يحمل الجهاز

قاطع دخولهم شخص

فوزي بترحاب: ايه داه انهارده يوم الحبايب ولا ايه متجمعين عند النبي يا جماعه

شاكر: آمين وبص علي الضيف اللي قاعد وعطيه ضهره

شاكر: مين يا فوزي

فوزي: يا راجل مش عارف مين داه

اتعدل عمر على الكلام وقام

عمر : ازيك يا ابني.

شاكر بقلبه وش: كويس طيب بالاذن يا جماعه ورايا مشوار

فوزي باستغراب: فيه ايه يا ابني انتا زعلان من عمر في حاجه

شاكر: لا مفيش انا ورايا مشوار عن اذنكم

عمر: استني يا ابني انتا حتى مسلمتش عليا لو في حاجه مزعلاك مني قولي

شاكر: ههه لا مالوش لزوم عن اذنكم وسابهم وطلع

عمر بسرعه :فوزي كمل وانا راجع

وطلع بسرعه ورا صاحبه وشده من دراعه

عمر: استني يا ابني فهمني فيه ايه ومالك قالب وشك عليا ليه كده اظن من الرجوله لما ازعلك واحنا عشره عمر انك تيجي تعاتبني مش تبصلي بصه سخريه وتسيبني وتمشي

شاكر: بالله عليك انا ما فايق ليك انا فيا اللي مكفيني امشي من قدامي يا عمر

عمر بإصرار: مش هامشي الا لما اعرف مالك وزي ما قولت كل واحد فيه اللي مكفيه وانتا نفسك متعرفش اللي فيا ومع ذلك واقف بحايل فيك

شاكر: يا عمر الله يخليك سيبني يا اخي

عمر: هاسيبك بس بعد ما اعرف زعلان مني ليه آخر مره قبل ما اسافر كنا زي السمن على العسل ومظنش اني وانا مسافر زعلتك في حاجه

شاكر: يا عمر سيبني الله يرضى عليك

عمر: مالك يا شاكر احنا عشره عمر أصحاب من واحنا جيران مش صحوبيه يوم ولا سنه بحق الصحوبيه والعشره والعيش والملح قولي مالك

شاكر بإنهيار: في اني بيتي اتخرب من تحت رأس مراتك ومراتي طالبه الطلاق وشيفاني وسخ وخاين

عمر بصدمه: مراتي وايه دخل مراتي بيك او بمراتك وهي ماتعرفهاش اساسا

شاكر: مراتك دي سبب المصايب البلاوي ولو بدعيلك بدعيلك ربنا يخلصك منها لأنها شر ماشي على الأرض للخراب

عمر بعدم استيعاب: فهمني ايه اللي حصل

قعد شاكر على الرصيف بتعب: مراتك من كام شهر دخلت على الاكونت بتاعي وبعتت إضافه وانا رفضتها دخلت على الماسنجر وبعتت رسائل كتير انها معجبه بيا واني واني واني انا مسحت بكرامتها البلاط وفهمتها انها مرات صاحبي واني متجوز وبحب مراتي بس مراتك زادت وبدئت تبعت صور ليها بهدوم البيت والنوم ولما عملتها بلوك راحت لمراتي وقالتلها اني على علاقه بيها من وراها ومن ورا جوزها وورتها الصور بس مشافتش المحادثات ومراتي قلبت الدنيا وراحت بيت ابوها وطالبه الطلاق

عمر بصدمه: فين المحادثات دي

طلع شاكر موبايله ووراهم لعمر

عمر: انا عايزهم

شاكر: ليه

عمر بدموع: من غير ليه عايزهم

شاكر طبطب على كتف صاحبه هون عليك والله ما كنت عايز اتكلم علشانك انتا اللي اصريت

عمر: كنت عايز تسيب صاحبك متقرطس

شاكر ميل في الارض وسكت

عمر بحسم: اعمل اسكرين شوت وبعتلي المحادثات على الواتس دلوقتي

شاكر :حاضر بس بالله عليك اهدا

وفعلا شاكر عمل اسكرين شوت لكل المحادثات وبعتهم لعمر

عمر قام من غير اي كلام وماشي زي التايه ودخل المحل عند فوزي واترمي على الكرسي

فوزي بقلق: مالك يا صاحبي قالك ايه الواد داه خلاك بالحاله دي

عمر: مفيش حاجه خلصت

فوزي: خلاص دقايق وابقى خلصت

وفعلا فوزي خلال دقايق سلم التليفون لعمر

عمر :عايز عده زي دي بالظبط

فوزي : حاضر وفعلا جابله موبايل شبهه

ودفع عمر تمنه ومشي وصل شقته بمعجزه

دخل واترمى على الكنبه وبداء يقلب في الموبايل ومع كل دقيقه بتمر صدمه لعمر بتكسره وتكسر رجولته اللي اتداست تحت رجلين اللي المفروض مراته مراته اتحولت لعاهره بقت بترمي نفسها تخت رجلين الرجاله علشان الفلوس بتصور لحمها علشان الفلوس بتعري جسمها علشان الفلوس مراته بقا ليها عشيق وتترمي في حضنه وعايشه معاه في الحرام

عمر هايتجنن : ليييه لييه قصرت معاكي في إيه

عمر فقد اعصابه بعد ما شاف الفيديو اللي بعته وائل لندا وهما مع بعض في علاقه محرمه

وقراء كل الرسائل عرف العنوان خو نفس العنوان اللي فوزي قالهوله وعرف ان ندا بتبعت كل شهر فلوس تعبه وشقاه في الغربه لعشيقها وان كمان دهبها اتباع

عمر ازاي وهو شايف الدهب في العلبه جوه

دخل وفتح العلبه وهو مستغرب بس ماخدش وقت طويل وكان واخد علبه الدهب وطالع على الصاغه واتأكد عمر ان ندا باعت الدهب وجابت شبهه دهب صيني

عمر فضل يعيط زي عيل صغير وما أصعب كسره راجل قدم كل الحب لمراته وهي ردته بالخيانه

عمر اتمالك نفسه: لا مش انا اللي اتكسر علشان زانيه زيك والله لو روحي فيكي اخلص روحي من جسمي واعيش ميت او موت مش فارقه بس مش بعد ما أكشف حقيقتك الوسخه

قام عمر وهو مقرر هايعمل ايه وغسل وشه

وهدا نفسه وطلع على شقه اخته

سهر بحب: خلاص خلصت

عمر بوجع: خلصت اه خلصت

سهر بإستغراب من الوجع اللي باين في عيون اخوها: مالك يا قلب اختك

عمر بوجع: مفيش ودخل يلا يا ندا علشان نروح

ندا: اوكي يلا

ونزلوا وكان الصمت رفيق الموقف

ندا: مالك يا عمر اتأخرت بره وجاي مش طايق نفسك

عمر: مفيش مشكله عند صحبي بس زعلتني

ندا: ليه ايه اللي حصل

عمر: مفيش أسرار ناس مينفعش تتحكي لأي حد

ووصل عمر وندا لشقتهم ولأول مره عمر يحس انه مش طايق المكان ولا طايق وجود الخاينه دي فيه

ندا: انا هادخل اغير

عمر: ماشي

ندا دخلت بسرعه: ورفعت السرير وبصت على الكيس لقيته مكانه زي ما هو اتنهدت ورجعت السرير مكانه

عمر واقف بره الاوضه وشايفها وأصبح الشك معاه يقين

مر اليوم وعمر عينه جفاها النوم وطول الليل بيفكر ازاي يرد حقه ورجولته اللي اتكسرت ازاي ياخد حقه بالاصول لانه ابن أصول طول الليل يصلي ويدعي لربنا يلهمه الصواب وميسبوش لشيطان عقله

تاني يوم عمر خد اول خطوه وهو انه بداء يراسل وائل على انه ندا

ووائل بيرد

وائل: مش خايفه من جوزك يا نادو

عمر من تليفون ندا: لاء نايم وانا في الصاله

وائل: يا قلبك يا جاحده

عمر: قلبي معاك يا بيبي

وائل: قلب البيبي يا ناس

واستمر الكلام بينهم على انه وائل بيكلم ندا

ولما يطلب بكلمها فون بتتحجج ان جوزها ممكن يسمعها

لحد ما عمر قرر انه يكتب النهايه

وفعلا في اليوم داه غير

عمر من تليفون ندا: بقولك ايه يا بيبي متيجي عندي

وائل بخوف: وجوزك انتي اتجننتي

عمر :لا جوزي مسافر أسبوع مصر بيخلص ورقه علشان السفر

وائل بخبث: طيب ما تيجي انتي الشقه يعني هي اول مره

عمر بوجع وكسره: مينفعش ممكن يتصل او حد ييجي من اهله او اهلي

وائل بتفكير: طيب مهما ممكن ييجوا وانا عندك

عمر: اطمن خالص لو حد جه وانتا عندي استخبي او هانزلك من سلم الطوارئ بس انا مينفعش اسيب البيت اليومين دول وكمل بوجع ودموع ماليه عنيه هو انا موحشتكش ولا استغنيت عني

وائل بسخريه: انا اقدر يا بيبي داه انتي القلب والحب والعشق

عمر: خلاص يبقى هستناك بكره جوزي ماشي اخر النهار علشان يلحق بكره اليوم من أوله

وائل بمكر :ماشي بس جهزيلي مبلغ صغير حبيبك مزنوق واكيد جوزك جه ومريشها عليكي

عمر بشر: من عنيا حااااضر اللي عايزه كله وزياده داه حتى جابلي حته طقم دهب تحفه تمنه شيئ وشويات

وائل بطمع: خلاص بكره هاكون عندك بس اجي أمته

عمر بشر: على العصر كده عارف العنوان ولا ابعتهولك

وائل: لا عارفه يا قلبي يا باي

عمر :باي

وقفل التليفون وخباه

طلعت ندا عنده ايه يا حبيبي بقالك كام يوم بعيد عني من يوم ما كنا عند اختك هو انا زعلتك في حاجه ولا بقى بطلت تحبني

عمر بسخريه بس ندا مركزتش فيها: لا يا ندا انا مشغول بس بمشكله صاحبي وواخده كل تفكيري

ندا :طيب ما تقولي يمكن اقدر اساعدك

عمر: متشغليش بالك

ندا بعصبيه: كل ما اكلمك متشغليش بالك عادي وحجج فارغه في ايه انتا كلها كام يوم ومسافر تاني حتى مستكتر عليا ابقى في حضنك الكام يوم دول قبل ما تمشي واشبع منك

عمر: خلاص يا ندا هانت ان شاء الله انهارده رايحين نحل مشكله الراجل وبكره يا ستي اللي ربنا عايزه هايكون

ندا بسخريه: ياريت لأحسن انا حاسه اني بقيت عايشه مع اختي في البيت

عمر بسخريه: متقلقيش خالص حبيبك راجل وراجل اوي ومن ضهر راجل وسابها ومشي

وصل بيت اهل مراته واتفق معاهم ان ندا تقضي اليوم بكره معاهم لحد ما يرن عليهم علشان عايز يجهز مفجاءه لندا قبل ما يسافر والكل رحب بالفكره

وتاني يوم مديحه كلمت ندا

ندا بخنقه من موقف امها الاخير: خير يا ماما

مديحه بحب: قلب ماما بقولك ايه تعالي قضي معانا انهارده بالله عليكي ما ترفضي انتي وحشتيني

ندا: مش هاينفع علشان عمر

مديحه: انا هاكلم عمر ماشي

ندا بغرور: خلاص انا هاقوله وهو اصلا مش بيرفضلي طلب

مديحه:ماشي يا نن عيني مستنياكي هاتيجي أمته كده

ندا :يعني شويه كده افطر وافوق واخد النسكافيه بتاعي

مديحه: خلاص قبل الضهر تكوني هنا هاعملك الأكل اللي بتحبيه

ندا: ماشي هاجي يلا باي

وقفلت معاها وطلعت جهزت فطار بسيط من التلاجه وقعدت فطرت هي وجوزها وهما بياكلو ندا قالتله ان مامتها اتصلت وهاتروح ليهم وجهزت نسكافيه ليها ودخل عمر يعمل قهوه لنفسه

ندا: كنت قولتلي وانا كنت عملتهالك

عمر بغموض: بعود نفسي على الوحده

ندا:يعني ايه مالك هو انا مسافره ومش راجعه داه مشوار عند ماما كام ساعه

عمر:لا متشغليش بالك داه علشان السفر اصلي متعود طول حياتي انا اللي بعمل لنفسي كل حاجه

ندا بملل: خلاص اوكي اوكي ياريتني ما سألت كل كلمه عندك بموشح دي بقت عيشه تطهق

عمر بسخريه: عندك حق

ندا بعصبيه وصوت عالي: يعني ايه قصدك إيه يا سي عمر انا اطهق الله يرحم ايام ماكنت بتحايل علشان بس تكلمني وتسمع صوتي

عمر بسخريه وغضب متداري: كنت مغفل

ندا بغيظ: انا ماشيه

عمر:بالسلامه

وندا فعلا سابته ولبست لبس محتشم كعادتها في وجود عمر

عمر لنفسه بسخريه: الشكل ملاك ومن جوه عاهره بقلب شيطان

وصلت ندا بيت أهلها وهي متضايقه

مديحه بحب: مالك يا قلب ماما ايه اللي مزعلك كده

ندا بعصبيه: سي زفت

مديحه باستغراب: مين

ندا: عمر الزفت منكد عليا الله يحرق دمه

مديحه بحزم: عيب كده داه جوزك ايه اللي حصل لكل داه علشان تشتمي جوزك كده

ندا: بقت عيشه تقرف يا ماما البيه على طول واخد جمب على طول بينام في الصاله او اوضه الأطفال حتى مش بيقرب مني على طول كلامه سخريه حساه بقى غامض زي اللي بيدبر لحاجه طول الليل والنهار لوحده وقافل عليه الباب حاسه انه بيخوني او يعرف بنات عليا

مديحه اتحكمت في ضحكتها على اساس ان عمر بيجهز مفجاءه لندا: يا بنتي استعيذي بالله من الشيطان الرجيم وابعدي الوساوس دي عن دماغك انا مش قولتلك حاولي تحملي قبل ما يسافر

ندا: يا ماما انا بقولك ايه وانتي بتقولي ايه بقولك حاسه انه يعرف بنات عليا بس والله لو طلع احساسي صح لطين عيشته وابهدله وافضحه

مديحه: ربنا يهديكي يا بنتي

وسابتها وقامت دخلت المطبخ تجهز الغدا وبعد وقت قصير انضم ليهم خلود وصفا وبعدهم ميرفت وأمل وعلا

وبداء الجميع في تجهيز الغدا ماعدا البرنسيس ندا قاعده تلعب على التليفون

عند عمر قاعد على جمر من نار الوقت بيمر وبيمر معاه كل صبر عمر

لحد ما وصل الوقت الحاسم رن تليفون ندا برساله من وائل

وائل: ايه يا نادوا انا تحت العماره الدنيا عندك امان

عمر بشر وغضب اعمى: أمان اطلع وانا هاسيبلك الباب مفتوح ادخل بسرعه واقفل الباب قبل ما حد من الجيران يشوفك

وائل: ثواني واكون عندك

عمر بشر: مستنياك على ناااااار ناااار

طلع وائل بسرعه ولقى الباب موارب

دخل وقفل الباب بسرعه ونادا بصوت واطي: نادوا حبيبتي انتي فين

طلع عمر قدامه فجاءه انا هنا يا روحي ومره واحده قبل ما يستوعب وائل خبطه بالدماغ خلاه فقد اتزانه

وفي لحظات نزل فوقه ضرب مميت ووائل مش مستوعب إيه اللي بيحصله وليه بس قدر يتعرف عليه انه جوز ندا اتوقع ان ندا اتبلت عليه وكشفته لجوزها

وائل بخوف: والله ما لية ذنب دي هي هي اللي طلبت مني اجي هي هي والله انا ماليش ذنب

عمر بغضب جحيمي: دلوقتي يا كلب بقى مالكش ذنب دلوقتي عرفت ربنا وبتذكره على لسانك النجس

غضب عمر كان اعمى ككل ضرب في وائل بكل كسره وحرقه جواه ولما تعب قام وشده رماه على كرسي من كراسي السفره دخله اوضه الصالون وكتفه كويس اوي وكمم بوقه وحط عليه بلاستر ومسك موبايله ومسك ايده وفتح التليفون لانه إما يفتح ببصمه أوباسوورد

ودخل واتفرج على كل اللي بيجمع مراته وعشيقها وفيديوهاتهم مع بعض لحد اخر فيديو قبل وصول عمر بيومين

عمر شد البلاستر من على بوق وائل: ها يا ******* بابشع الألفاظ هاتحكي كل حاجه من نفسك ولا البسك انتا والوسخه التانيه قضيه زنا مكتمله الأركان بالفيديوهات دي

وائل بخوف: هاحكي والله هاقولك كل حاجه

عمر :قول وانا سامع

قص وائل كل شيء على عمر من اول معرفته بندا في شات قذر لحد اللحظه دي

عمر: والفلوس اللي كنت بتاخدها منها

وائل بخوف من الغضب والشر اللي باين في عنين عمر: معايا في جزء في محفظه الكاش وجزء في حسابي في البنك عمر رقم المحفظه كام

وائل :ليه

عمر :اخلص يلا انتا فاكر ان شقى عمري وتعبي في الغربه هاسيبه لكلاب زيكم تبقى غلطان

وائل ملاه الرقم السري واخد المحفظه من جيبه لقى فيها اكتر من فيزا

عمر: يا ابن الكلب كل دي فيز انتا شغال ايه يلا

وائل بخوف: اعمال حره

عمر بسخريه: اه عارفها الأعمال الوسخه دي الأرقام السريه كام يا روح أمك

وائل عرف ان لا مفر من دفع التمن قاله كل الأرقام : بس مش كلها فلوس مراتك دي فيها فلوس انا كمان وفيها فلوس كتير

عمر بشر: مبخدش مال حرام اللي هاخده حقي وبس يا *******

وطلع عمر بعد ما حط البلاستر مره تانيه على بوق وائل واتصل بأخوه وطلب يجيله بسرعه

اخوه قاله انه قريب منه وفعلا بعد أقل من ربع ساعه وصل اخوه تحت العماره ونزل عمر ليه

مؤمن: مالك يا عمر خير جبتني على ملا وشي

عمر بتعب: مفيش اسمعني بسرعه: تاخد الفيز دي كلها ودي الأرقام السريه بتاع كل فيزا

مؤمن: تمام بتوع مين دول كلهم وجايبهوملي ليه

عمر بتنهيده تعب: اسمعني للآخر تاخد الفيز دي وتطلع على مكنهATM اللي في الموقف وتسحب الحد الأقصى للسحب من كل فيزا ولو المكنه خلصت شوف غيرها لحد ما تجمعهم وتجيبهم وتيجي انتا معاك محفظه كاش صح

مؤمن: ايوه ليه

عمر: تمام هايتحولك عليها مبلغ دلوقتي كان ليا عند واحد ومش قادر ييجي وقالي هايبعته على محفظه كاش

مؤمن بشك: عمر انتا مخبي عليا إيه

عمر :مفيش يا مؤمن روح دلوقتي ولما تخلص رن عليا

مؤمن بخوف من اخوه اللي شكله ميطمنش: حاضر بس طمني الله يخليك شكلك بيقول ان فيه مصيبه

عمر بعصبيه: اخلص يا مؤمن يلا وسابه وطلع

ومؤمن اتحرك يخلص اللي قاله عليه اخوه

طلع عمر وقعد قدام وائل بشر: عارف يا ***** انا ممكن اعمل فيك ايه ومش هاخد لا فيك ولا فيها دقيقه

وائل بخوف هز رأسه ومش قادر يتكلم من البلاستر اللي على بقه بس بقى يزوم

عمر قام بتكاسل: وشد البلاستر مره واحده خلى وائل صرخ

عمر بسخريه: أهدى يا لول لسه بدري على الصراخ

وائل: ابوس ايدك سيبني مش اخدت حقك وفلوسك سيبني وانا والله ماهاقرب تاني من مراتك

عمر بشر وعيونه حمرة زي الدم من كتر العصبيه: انتا فاكر اني بدور على الفلوس تبقى غلطان ولا كنوز الدنيا تعوض شرفي اللي كلب زيك وكلبه زيها مرمطوه في الوحل تخيل كده أهلك وأهلها لما يعرفوا ويترفع عليكم قضيه زنا هايحصلهم ايه

وائل: ابوس ايدك بلاش فضايح انتا كده هاتتدمر معانا انتا شكلك محترم وابن ناس بلاش كده ارجوك الفضايح مش هاتفيد حد حقك ورجعلك وهي شوف صرفتك معاها ابوس ايدك انا عندي بيتي وأهلي محدش يعرف وكمل بنحيب والله غلطه وتوبه والله ماهكررها

عمر بسخريه: غلطه يا ***** دانتا تليفونك مليان وساخه شبهك كل مالك جامعه من حرام مشفتش ليه من ربنا قبل ما تخاف على أهلك هاا رد يا *****

وائل:عندك حق والله عندك حق

عمر حط البلاستر على بق وائل مره تانيه وطلع الصاله هايتجنن بعد وقت اتصل بيه اخوه وبلغه انه خلص ومعاه مبلغ كبير اوي يعمل بيه ايه

عمر: هاتو وتعالي البيت بس قبل ما تيجي عدي على محل موبيلات يكون عنده سحب كاش واسحب المبلغ اللي اتحولك

مؤمن: انا عملت كده فعلا اول ما المبلغ وصل

عمر :تمام هاتو وتعالي وانا هستناك تحت

وفعلا بعد وقت وصل مؤمن ونزل من عربيته وسلم شنطه هاند باج لعمر : دي الفلوس كلها ودي الفيز بس طمني بتاع مين الفلوس دي كلها

عمر بوجع: أمانه ناس يلا روح انتا ومتجيبش سيره لحد باللي حصل يلا سلام

مؤمن شده من دراعه: فيك إيه قلبي بيقولي انه فيه حاجه كبيره مين وائل علام داه

عمر: عرفت الإسم منين

مؤمن: مكتوب على الفيز مش محتاجه ذكاء

عمر: اخو واحد معايا في الكويت يلا سلام وسابه وطلع

مؤمن بخوف: استرها يارب

طلع عمر شقته وقفل الباب ومسك تليفونه ورن على حماه

عمر: السلام عليكم ورحمة الله وبركاته ازيك يا حاج

محسن بود: وعليكم السلام ورحمة الله وبركاته يا ابني ها طمني خلصت

عمر بوجع: اااه خلصت لو ممكن بس حضرتك تيجي انتا والجماعه كلهم علشان تبقى مفجاءه حلوه اوووي لندا وكمل بشر علشان تفضل فكراها العمر كله

محسن: ربنا يبارك فيك يا ابني من عنيا ساعه زمن وتلاقينا عندك

وفعلا محسن دخل بلغ كل الموجودين والكل بسرعه غيروا هدومهم عندهم فضول يعرفوا ايه هي المفاجئه اللي عمر محضرها الكل عارف بعشق عمر لندا

ندا باستغراب: ايه في إيه كلكم لابسين ورايحين فين برابطه المعلم كده

مديحه حضنت بنتها: جايين معاكي جوزك يا ستي محضرلك مفجاءه وقال كلنا نيجي نحتفل معاكم قبل ما يسافر

ندا بإستغراب: مفجاءه ايه وليه محدش جابلي سيره

مديحه: هو طلب مننا كده علشان يصالحك يعني كان بيخطط الأيام اللي فاتت علشان يسعدك مش بخونك زي ما كنتي فاكره يا خايبه

ندا بغرور: اصلا ميقدرش حد يبقى معاه البرنسيسه ندا ويبص بره

مديحه: طبعا ربنا يحفظك يا قلبي يلا بقى اتأخرنا

ومشي الكل لمصير محتوم

بعد ساعه كان الباب بيخبط عمر فتح هو لابس ترنج بيتي

الكل بص لبعضه بإستغراب

تكملة الفصل الأخير من هنا

بداية الروايه من هنا

جميع الروايات الكامله من هنا

تعديل المقال