تزوجت فتاه من عالم الجن الفصل الاول والتاني والتالت والرابع والخامس للكاتبه آيه عادل
تزوجت فتاه من عالم الجن الفصل الاول والتاني والتالت والرابع والخامس للكاتبه آيه عادل
الفصل الاول
سيرا
انا جانبك يا جاسر وحواليك انت بس اللي حاسس اني بعيد عنك
جاسر
يعني ايه، انتي مين وعايزه ايه ، اظهري بقي انا خلاص تعبت واعصابي تعبت انتي مين
سيرا
انا ذنبك اللي هتعيش بيه طول عمرك ياجاسر ...
بالليل السهره غير ، مع قصه جديده مرعبه
تزوجت فتاه من عالم الجن ( كامله )
قاعد زي كل يوم علي النت ولا شغله ولا مشغله كل يوم بعرف واحده جديده ، فجاه لقيتها ، ايه الشياكه الحلاوه دي ، ادخل بقي ابعتلها رساله يمكن يبقي حظي حلو معاها ، ايه ده دي بعتالي رساله من يومين في الازر ..
جاسر
ازيك عامله ايه ، انا اسف لسه شايف الرساله حالا ، انا جاسر المصري انتي مين
سيرا
انا سيرا ، معجبه بيك اوي من زمان ، كان نفسي ادخل أكلمك بس كنت دائما بتردد ممكن نبقي صحاب !
جاسر
ممكن ايه بس ده اكيد ، بقولك ايه انا مش بحب اكتب ماتيجي نتكلم فيديو او حتي صوت
سيرا
طيب ممكن نتكلم صوت، هتلاقي صوتي بعيد شويه معلش حاول تسمعني عشان السماعه عندي بايظه
جاسر
طيب مش مشكله
لقيت سيرا بترن عليا حسيت بهوا غريب في الاوضه بتاعتي ازاي نبقي في عز الشتا وحاسس بهوا سخن ، مش مشكله هشغل التكييف
جاسر
ايوه يا سيرا عامله ايه
سيرا
كويسه ، كلمني عن نفسك
لقيت صوت صعب اوي حواليها صوت وش غريب مش عارف مصدره ايه ، صوت اغاني بصوت ضخم مقزز اصوات مكتومه كتير مش عارف افسرها ، بقيت اتكلم معاها وانا حاسس بصداع وفي نص الكلام لقيت نفسي قفلت السكه مش قادر اتحمل
لقيتها بعتالي رساله بتقولي
سيرا
ايه قفلت ليه ياجاسر
جاسر
انا مش عارف اسمعك ، معلش اسف
سيرا
معلش اصل السماعه مش مظبوطه وبابا مشغل الراديو ، احنا ممكن نتقابل
جاسر
ممكن طبعا ، ايه رايك نتقابل بكره
سيرا
تمام ماشي ، اشوفك بكره ابعتلي العنوان والميعاد وهجيلك علي طول
ايه الحلاوه دي معقوله بالسهوله دي ، ده انا طلعت جامد اوي وانا مش عارف ، اهي فرصه اضيع يومين مع واحده جديده
جاسر
تصبحي علي خير ياحبييتي اشوفك بكره
سيرا
وانت من أهله ياحبيبي ، سلام
قفلت التليفون وقفلت نور الاوضه ، حسيت بهوا ساقع اوي ، افتكرت أني مشغل التكييف وطفيته ، ولما جيت نمت حسيت أن في حاجه فرو جانبي ، ولما جيت اشوف ايه ده ، سمعت صوت حاجه بتزوم ، ايه ده ، انا بحلم اكيد
جريت بسرعه من مكاني ولقيت جانبي حيوان مجهول مش عارف اسمه، خليط حيوانات اول مره اشوفه لقيته بيبصلي وبيزوم اكتر جريت من الاوضه وقفلت الباب ورايا ، لقيت اخويا سامح خبط فيا وقالي
سامح
يابني مش تحاسب في ايه علي المسا قرفتنا في عيشتنا
جاسر
سامح، الحقني في حيوان جوا مش عارف ايه ده ولا جه منين ابوس ايدك تعالي معايا نشوف هنخرجه ازاي
سامح
تعالي معايا طيب نشوف ايه اللي جوا ده مانت مايجيش من راك غير الشر
دخلت انا وسامح الاوضه وسامح اول ماشاف الحيوان وقف ساكت مابيتحركش قعدت اخبط علي دراعه واقوله
جاسر
يابني انا جايبك نشوف حل انت كويس ، ياسامح اجيب سكينه ولا اموته بأيه ده
وفجاه لقيت صوت جاي من بره الاوضه ، جريت ناحيه الباب ولقيت اخويا سامح قدامي وقالي
سامح
في ايه يابني انت كويس
بقي اتنين سامح مش واحد بس ، دي ليله مش فايته......
تزوجت فتاه من عالم الجن
للكاتبه آيه عادل
الفصل الثاني
بقي اتنين سامح مش واحد بس ، دي ليله مش فايته ، جسمي قشعر بقيت مش عارف اعمل ايه وجريت من الاوضه وقفلت عليهم هما الاتنين الاوضه وروحت ناحيه الباب ، بس لقيت الباب مش موجود ، باب الشقه اختفي وانا بقيت محبوس ومش عارف اخرج جريت بسرعه علي الاوضه ، بس المرادي لقيت اخويا سامح نايم في سريره وقالي
سامح
في ايه يا جاسر مالك خايف كده ليه
جاسر
سامح ، تاني ، انت ايه ياعم انت طالع بكام وش حرام عليك انت بره ولا في اوضتي ولا نايم في اوضتك
سامح
يابني في ايه انا نايم هنا ايه اللي حصل
جاسر
اخرج شوف اللي بيحصل بره ده ، في اتنين سامح بره
خرجت انا وسامح اللي ماكنش مستوعب كلامي وخرجنا من الاوضه وسمعت نفس الصوت اللي سمعته وانا بكلم سيرا ، صوت مكتوم مش واضح كان بيغني بس صوته وحش اوي ، لقيت البيت كل حته فيه بتتحرك وانا وسامح واقفين جنب بعض والاتنين اللي في الاوضه خرجو منها ومعاهم الحيوان اللي شكله.غريب ، بس اللي خرجو من الاوضه كانو شبههي انا مش شبه سامح خالص
وابتدو يقربو مننا وبقو يقولو كلام مش مفهوم طلاسم غريبه ، اصوات غريبه ، انوار وأجواء مرعبه ، مش عارف ايه سببها
وفجاه كل شئ انتهي بمجرد ماغمضت عيني ولما فتحتها لقيت النهار طلع وكل شي طبيعي جدا، وانا نايم في الصاله ولقيت سامح بيجهز نفسه عشان يروح الشغل وفي ايه فنجان القهوه وقالي
سامح
انت يابني انت ، بطل العك اللي انت بتعمله ده واتجوز مش كل يوم هتفضل تتكلم مع واحده شكل ، اعقل كده وكمل نص دينك بلاش تبهدل ولاد الناس معاك
جاسر
واتجوز ليه واتعب نفسي واعمل بيت واصرف واشيل الهم ، انت ماسمعتش عن ازمه الكتاكيت ، دي البلد مش متحمله الكتاكيت اروح انا بقي اجيب لنفسي كتكوته عندها ٢٤سنه اتجوزها واخلف منها كتاكيت صغيرين مالهمش ذنب في الدنيا واعذبهم معايا ، لا ياعم يفتح الله خليني لوحدي كده احسنلي ولا واحده تقولي رايح فين وجاي منين ولا عيال صغيره عايزين بامبرز ولبن صناعي
سامح
يابني ربنا موجود وخليك عارف انك موجود في الدنيا أداه عشان تساعد ناس تانيه ، انا بكلم مين صحيح مانت نطع الكلام معاك مالوش لازمه ، انا نازل
جاسر
طيب ياخويا انزل ، وماتنساش تكلم خطيبتك الشيخه فتنه في موضوع الشقه اللي فوق انت مش هتسيبني وتسكن بعيد
سامح
طيب ياخويا بس انت اتعدل ومالكش دعوه قولتلك مليون بره ب سلمي هي انسانه دارسه وفاهمه في علم الروحانيات انت جاهل اخرك تفك الخط ، سلام
نزل سامح وانا فضلت قاعد مع نفسي مش فاكر اي حاجه من اللي حصلت امبارح ، ولا عرفت اقول ل سامح علي اللي شوفته يمكن اكون بحلم
دخلت الحمام اخد دش واجهز نفسي للميعاد اللي اتفقت عليه انا وسيرا
ولما نزلت لقيت واحد واقف علي باب العماره شكله مجذوب لقيته قالي
المجذوب
ميعادك فيه هلاكك يابيه ، امشي في الطريق النور ابعد عن الضلمه
جاسر
انت جعان صح ، امسك فلوس اهي روح كل سندوتشات فول
المجذوب
مش باكل ولا بشرب انا طيف ، طيف هايم وسط البشر ، بنصح كفيف القلب
هقف يعني قدامه اتكلم واتساير معاه ، انا ماشي
مشيت ناحيه عربيتي وركبتها ،ولقيت الكرسي اللي جانبي في آثار حد قاعد عليه ، طيب ازاي ، بصيت للمرايا لقيت المجذوب قاعد في الكنبه اللي ورا وعينه سودا مجوفه ......
تزوجت فتاه من عالم الجن
للكاتبه آيه عادل
الجزء الثالث
جاسر
انت ايه ، انت انس ولا جن
الجذوب
انا الماضي وانا ذنبك ، انا اللي هتلاقيني حواليك في كل مكان يا جاسر
نزلت بسرعه من العربيه ووقفت بعيد عنها من الخوف ، انا مش عارف ايه سبب كل اللي بيحصلي ده من امبارح
لما وقفت بعيد علي امل انها تكون تهيؤات لقيت الراجل ده اختفي بس لما قربت من العربيه لقيت مكانه لسعات سجاره انا بدخن بس مش في الكنبه اللي ورا ، مشيت بالعربيه وانا خايف احسن يظهرلي تاني ، حاولت اقنع نفسي انها اكيد هلوسه او قله نوم ، او يمكن انا متوتر عشان رايح اقابل سيرا
روحت المكان اللي كنا متفقين عليه ، مكان قرب النيل كله شجر وزرع ، روحت لقيتها قاعده مستنياني نفس الصوره اللي كانت محطوطه علي البروفايل ايه الحلاوه دي ، مستحيل اتخيل أن في بنات حلوه اوي كده ، فضلت اكلم نفسي وهي بتبصلي بأبتسامه تخطف العقل وبعدين قالتلي
سيرا
ايه بقي ، هتفضل بتبصلي كده كتير ياجاسر امشي يعني
جاسر
تمشي فين ، انا ماصدقت لقيتك انتي عديتي كل توقعاتي ، قوليلي بقي انتي مين وساكنه فين
سيرا
انت ياسيدي ساكته في أكتوبر علي طريق الواحات
جاسر
ايه ده ، ده مكان فاضي خالص انتي عايشه لوحدك
سيرا
هو فعلا مكان فاضي اوي ، وده احلي مافيه مافيش احسن من الهدوء والسكون والبعد عن البشر ، تصدق المكان هناك احسن من اي مكان متعمر
جاسر
ماهو لولا اختلاف الاراء ل بارت السلع ، انتي عايشه لوحدك ولا معاكي حد
سيرا
عايشه لوحدي ، ماليش حد خالص ، قولي بقي انت عايش مع مين وبتعمل ايه في حياتك
جاسر
انا ياستي عايش لوحدي انا واخويا سامح بعد موت امي وابويا ، اخويا سامح عنده ٢٧سنه وانا عندي ٢٦سنه ، مولودين فوق روس بعض وخناقاتنا كتير بس حقيقي ماقدرش استغني عنه
سيرا
اها ، بس باين أنه احسن منك واصلح منك
جاسر
دي حقيقه فعلا هو باين عليا اني فاسد أوي كده هههه
سيرا
اها ودمك تقيل كمان وضحكت سمجه جدا
جاسر
ايه قله الذوق دي ، علي العموم مقبوله منك
سيرا
طيب علي العموم انا مبسوطه اوي اني اتعرفت عليك
جاسر
وانا كمان مبسوط اوي
لقيت الويتر قرب مني وطلبت اتنين عصير والويتر نزل الطلبات وانا شربت العصير كله بس سيرا كانت سايبه العصير ، قولت اكيد بقي عايزه تعمل نفسها مكسوفه وقولتلها
جاسر
بقولك ايه اشربي العصير التلج ساح وهيبقي ماسخ علي فكره ، ولا انتي بقي مكسوفه
سيرا
انت طلبت العصير وانا مش بشرب عصير اصلا ، خلينا نتكلم وسيبك من العصير
فضلنا نتكلم انا وسيرا ، لحد الساعه مابقت ١٠ بالليل وقالتلي
سيرا
ياخبر مش فايت انا لازم امشي الوقت اتأخر اوي
جاسر
لا اصبري هوصلك انا برضو افهم في الأصول ومش هسيبك تروحي حته مقطوعه زي دي لوحدك
سيرا
لا انا اسلك في الحديد ، خاف علي نفسك انت ، سلام
جاسر
لا استني بس احاسب وجاي وراكي
حاسبت الويتر وخرجت عشان الحق سيرا بس لقيتها مشيت ، بنت الجنيه طارت زي الصاروخ
روحت البيت وكنت مشغل اغاني مهرجانات ، وفجاه لقيت الصوت اتغير وسمعت نفس الصوت المكتوم ، قفلت التسجيل خالص وروحت البيت وانا تعبان وجسمي مكسر ولقيت سامح مش موجود كلمته في التليفون وقولتله
جاسر
انت فين ياخينا انت الساعه ١٢ بالليل ياجدع
سامح
ماهو انت لو بتفتح التليفون زي البني ادمين كان زماني وصلتلك وعرفت اني مسافر في شغل يومين كده في اسكندريه
جاسر
والله شكلك مسافر تعط مع واحده
سامح
ليه هو انا مهزء زيك ، امشي يلا عايز انام قلقتني عيل مقرف ، خد بالك من نفسك ياض وغطي نفسك وانا مش موجود ، سلام
جاسر
سلام ياعم المحترم
قفلت مع سامح وانا مبسوط وقررت اكلم سيرا ماهو ده وقتها ، البيت فاضي وكله تمام
اتصلت بيها ولقيتها ردت من اول مره وقالتلي
سيرا
ايه ياحبيبي روحت
جاسر
ايوه وانتي
سيرا
من بدري
جاسر
انا زعلان منك اوي علي فكره مشيتي بسرعه وانا كنت عايز اوصلك دي مش طريقه معامله دي
سيرا
حقك عليا ، مسيرك تجيلي كتير الفتره الجايه
جاسر
بقولك ايه انا تعبان اوي وعايزك تيجي تقعدي معايا أصل اخويا مش موجود والظاهر كده عشان روحت متأخر جالي برد
سيرا
بقولك ايه انا عارفه وانت عارف انت عايز ايه كويس ، تعالي ذوغري
جاسر
مادمتي فهمتي تعالي بقي وبلاش فرهده قصري الطريق معايا وانا مش هسيبك وهفضل جانبك المهم نبقي مرتاحين سوا
سيرا
بشرط محدش يعرف اي حاجه عننا ولا تقول لحد علي علاقتنا .....
تزوجت فتاه من عالم الجن
للكاتبه آيه عادل
الجزء الرابع
سيرا
بشرط محدش يعرف اي حاجه عننا ولا تقول لحد علي علاقتنا
جاسر
ايه الشرط الصعب ده ، ياستي موافق طبعا اكيد مش هروح اقول للناس انك بتجيلي البيت هههه
سيرا
تاني شرط انك تبطل خفه الدم
جاسر
طيب حاضر ، بس اهم حاجه قوليلي هشوفك امتي وهتيجي امتي
سيرا
تعالي خدني من طريق الواحات دلوقتي لاني مش بعرف اخرج الصبح كتير
جاسر
طيب انا جايلك في الطريق حالا
سيرا
انت مش قولت انك تعبان
جاسر
جاتلي الفوقه سلام
جريت بسرعه علي العربيه وطلعت علي طريق الواحات زي ما سيرا قالتلي ومشيت علي اللوكيشن ، لقيت نفسي عند مقابر كتير اوي ، بقيت مش عارف هي فين وفين مكانها ، اللوكيشن بيقول اني وصلت ، طيب هي فين
لقيت سيرا جايه وركبت العربيه من غير كلام وقالتلي
سيرا
يلا اطلع بسرعه ولا عاجبك المكان
جاسر
عاجبني ايه انتي ازاي ساكنه هنا ، يخرب عقلك مش بتخافي
سيرا
اخاف من مين ، من الأموات ، انا اخاف منك وماخفش منهم ، يلا بسرعه علي البيت
طلعنا علي البيت وانا مش عارف ايه اللي هيحصل من سيرا وايه الاستسلام اللي هي فيه ده ، ووصلنا البيت ولقيتها بتدخل اوضتي من غير حتي ماقولها انها اوضتي ولقيتها قعدت علي سريري وقالتلي
سيرا
حلو السرير ده ، انت بقي بتشغل التكييف كده ،وبتمسك التليفون كده وبتفتح الكاميرا وانت قاعد من ناحيه الزاويه دي
بقيت مستغربه ومذهول من كم المعلومات اللي تعرفها عني وقولتلها وانا بحاول اجمع الكلام
جاسر
انتي عرفتي كل ده ازاي ، انتي مخاويه ولا تعرفي حد من اللي كنت اعرفهم
سيرا
شوف انت بقي كلمت مين وتعرف عنك كل ده ياجاسر ، انت خايف كده ليه تعالي اقعد جانبي هو انا هاكلك
جاسر
انتي ايه حكايتك
سيرا
تعرف اني بعرف ارسم تاتو حلو اوي ، تعالي ارسملك
جاسر
هترسمي بأيه
سيرا
افتح الدرج اللي هناك ده ، فيه علبه خيط وابر ، وهات الولاعه بتاعتك من علي المكتب وتعالي
جاسر
يانهار مش فايت ، بت انتي مين اطلعي بره
سيرا
هههههههههههه متخافش انا بخمن ، هو فعلا في خيط انا حبيت اعمل فيك مقلب بس باين عليا نشنت صح
جاسر
انتي قولتي علي علبه الخيط بتاعت امي وقولتي علي مكان الولاعه اللي علي المكتب غريبه
سيرا
فكك بقي من كل ده المهم اننا مع بعض ، ولا تحب اخد بعضي وامشي
جاسر
لا لا خلاص انسي بقي كل اللي فات ده
قعدت انا وسيرا سوا ورسمتلي بالابره بعد ماسخنتها ولما بصيت في المرايا عشان اشوف الرسمه لقيتها عباره عن حروف ماعرفتش اقراها ، بصيتلها وقولت
جاسر
ايه ده معناه ايه الكلام ده
سيرا
مش وقته تعرف لما جرح الرسمه يخف هتعرف معناه
لقيت سيرا بتبصلي بصات غريبه مش اللي في بالكم ، لا بصات مرعبه مش عارف معناها ولقيت ملامحها بتتغير وكل مادا بتقرب مني وكان جاي منها هوا سخن اوي ، ولما جيت اقرب عشان المسها لقيتها عباره عن كتله نار ، صرخت من شده الالم اللي حسيت بيه ، وقومت اجري من جنبها بس لقيت نفسي بتسحب ليها ورجعت جنبها تاني وتاني يوم الصبح لقيت سامح اخويا بيصحيني وهو قلقان وقالي
سامح
انت كويس ياجاسر عشان خاطري ماتقلقنيش عليك ، اصحي
جاسر
في ايه ، ايه اللي حصل
سامح
ياعم انت بقي حرام عليك يا جاسر انا تبعت منك يا اخي ، بقي تجيبني المسافه دي كلها وبعدين افضل اصحيك الاقيك مش بتصحي وفي الاخر تقولي في ايه ، انت شربت ايه
جاسر
والله ماشربت حاجه ، ايه الوجع ده أنا مش قادر يا سامح جسمي مكسر
لقيت سامح بيرفع التيشيرت لقي مكتوب جمله مش مفهومه ، وقالي
سامح
ايه اللي انت عامله في ضهرك ده
جاسر
مالكش دعوه انت ، انا حبيت اجرب الوشم ، المهم ايه اللي حصل فكرني
سامح
انا لقيتك بتكلمني وانت بتعيط وكان باين أن في حد بيضربك قولتلي الحقني جيت جري من اسكندريه كان ممكن اعمل حادثه بسبب قلقي علي فكره
جاسر
حقك عليا معلش ، انا هحضرلك فطار عشان نفطر سوا
دخلت المطبخ وانا هتجنن من اللي بيحصلي ، وفتحت التليفون عشان اكلم اللي اسمها سيرا وانهي علاقتي بيها بس لقيتها عملالي بلوك من كل حته ......
تزوجت فتاه من عالم الجن
للكاتبه آيه عادل
الفصل الخامس
لقيت كل حاجه ممكن اوصل بيها ل سيرا متقفله قدامي مافيش غير حل واحد بس ، هو اني اروح اللوكيشن بتاع بيتها وادور عليها هناك ، بس ليه ادور عليها. خلاص واحده زي واحده عرفتها وطلعت طقه
خرجت من المطبخ وفطرت انا وسامح ولقيته واقف بيكلم خطيبته في التليفون وقالها
سامح
انا بصراحه يا سلمي مش شايف أي سبب يخلينا نسيب الشقه اللي فوق ، دي بتاعتي وانتي عارفه اني مقدرش اسيب جاسر لوحدي ، طيب الحمد لله انك اقتنعتي علي العموم ياستي انا هقابلك بكره الصبح واجيبك الشقه عشان مهندس الديكور هيجي بكره يظبط الشقه ، طيب ياحبييتي ، سلام
دخلت علي سامح وقولتله
جاسر
خلاص سلمي وافقت تيجو تعيشو في الشقه اللي فوق
سامح
ايوه وافقت بس ياريت بقي بلاش انت تطلع عيل وتخليني اندم علي اليوم اللي سكنت فيه في الشقه اللي فوقك
جاسر
ياعم ماتقلقش اخوك يشرف بلد
سامح
اها مانا عارف ، هو في حد عره وعاررني غيرك ، اسمع بقي انا هروح مقر الشركه اللي هنا عشان اقولهم اني رجعت وهسافر تاني بعد يومين تلاته اكون خلصت حوار مهندس الديكور
جاسر
طيب مش هتكمل فطارك يابني
سامح
البيض ني والعيش محروق وحتي الشاي ماسخ انسان عايش يرازي فينا وخلاص ، انا نازل
ونزل جاسر وسابني قاعد لوحدي في البيت ، دخلت اخد شاور بس لما دخلت الحمام وبصيت في المرايا لقيت ضهري فيه علامات كتير اوي زي الخربشه ، مش عارف ايه سببها ولا فاكر اللي حصل بيني وبين سيرا حتي ، ولما كنت واقف تحت الدش لقيت حد دخل عليا الحمام ، باب الحمام اتفتح ببطء شديد ، افتكرت سامح بيعمل فيا مقلب كالعاده قولت بصوت عالي
جاسر
يا سامح اطلع بره انت داخل عليا الحمام وانا باخد دش ، انا ابتديت اشك فيك علي فكره ، سامح انت يلا ، سااامح بطل غلاسه دمك تقيل علي فكره
اول ماقولت كده لقيت ستاره البانيو اتفتحت ولقيت قدامي واحده شكلها بشع ، شعرها قصير منكوش وايدها كلها طين ، وعينها مش موجوده وبوقها مشقوق ، كانت بتضحك وقالت بصوت انا عارفه كويس
سيرا
دمك انت اللي تقيل اوي يا جاسر
ده ، ده نفس صوت سيرا ، اعمل ايه هفضل واقف كده مش قادر اتحرك ، بقيت واقف مش بتحرك خالص وشايفها عماله تحرك رقبتها بشكل مريب كان صوت عضمها باين ، كأن مالهاش لحم ، غمضت عيني من كتر الرعب ، ولما فتحتها لقيت كل شئ اختفي
خرجت بسرعه من الحمام ودخلت اوضتي افكر وأشوف هعمل ايه في اللي بيحصلي ده ، ولقيت سيرا ظهرتلي تاني في اوضتي بشكلها الطبيعي وقالتلي
سيرا
انا مش هسيبك انت ماتستحقش غير اللعنه يا جاسر ، انا بكرهك
جاسر
انتي انس ولا جن انتي ايه ، انطقي انا خلاص تعبت من اللي بيحصلي ده ، انتي مين وعايزه مني ايه وليه بتكرهيني عملت فيكي ايه
سيرا
عملت كتير اوي ، لو لسه عندك شويه ضمير هتعرف انت عملت ايه ، انا جانبك وحواليك في كل مكان يا جاسر ، اعرف سبب لعنتك بيا بنفسك
اختفت سيرا وظهرلي نفس الحيوان اللي مش عارف اسمه كان خليط بين الأسد والكلب والنمر ، عايش في فيلم رعب مش عارف ايه نهايته ولا ايه معناه اصلا ، خرجت من اوضتي ومن البيت كله ونزلت قعدت في عربيتي واتصلت ب سامح قولتله
جاسر
سامح انا في حاجات غريبه بتحصلي انا محتاجلك تجيلي حالا
سامح
انت تاني يا جاسر ، انت فين طيب
جاسر
انا في العربيه قدام البيت خايف اطلع
سامح
طيب تعالالي الشركه
روحت ل سامح وانا ضهري بيألمني وكان باين عليا التعب ولما سألني عن اللي انا فيه قولتله كل اللي حصلي من اول ماكلمت سيرا لحد وجع ضهري ، لقيته بيسمعني بكل اهتمام وبعد ماخلصت قالي
سامح
اسمع يا جاسر اللي بيحصلك ده ممكن يكون بسبب أن اعصابك تعبانه مثلا ، انا هفضل جانبك لحد ماالازمه دي تعدي علي خير
وفضل سامح معايا وتاني يوم سلمي جت البيت وخبطت علينا واول مابصتيلي قالتلي
سلمي
ايه ده مالك يا جاسر انت كويس
جاسر
انا كويس ، هو انتي ليه اتخضيتي لما شوفتيني
سلمي
لا مافيش ، فين سامح
جاسر
جوا والمهندس علي وصول
فضلت سلمي تبصلي بقلق وبعد ماطلعت هي والمهندس وسامح وخلصو كلامهم ، لقيت سلمي قالتلي
سلمي
جاسر حاول تحل اللعنه بنفسك
اتصدمت من اللي قالتله وبقيت باصص ليها ول سامح ....
يتبع
