 |
رواية عزبة فكه
البارت الخامس والسادس
بقلم ريناد يوسف
كامله على مدونة النجم المتوهج للروايات
البارت الخامس 5
التاكسى وصل بفكه وشيماء لغاية اول الشارع بتاعهم ويوسف كان واقف على
باب الورشه وشاف الاتنين نازلين من
التاكىسي،،
وشاف هدوم شيماء معفره تراب زى ماتكون كانت فى خناقه فجرى عليها بخوف وسألها بلهفه :شيماء مالك ايه اللى عمل فيكى كده؟ عملتى حادثه ولا ايه اتكلمى!
شيماء لسه هتنطق يوسف كان بيبص لفكريه اللى لابسه قميص كاروهات وبنطلون جينز رجالى وكوتش اسود
ولافه شماغ رجالى على دماغها،،
فسأل،، ومين الاخ ده وجاى معاكى ليه؟
فكه بصتله من تحت لتحت وسكتت
شيماء :تعالا بس يايوسف نطلع فوق
وانا هقولك كل حاجه ومسكته من
دراعه وشدته لفوق وشاورت لفكه
انها تطلع معاهم..
يوسف :وده رايح فين كمان ايه ياعم
انت على فين؟
شيماء ضحكت وقالتله هفهمك فوووق
يوسف استسلم وطلع لفوق وام يوسف
فتحت الباب واتخضت من منظر شيماء وشهقت بخوف،،
وشيماء حضنتها وقالتلها،، كنت هضيع ياخالتى النهارده لولا فكريه
يوسف بنفاذ صبر ومين فكريه كمان
ماتتكلمى ياشيماء متعصبنيش حصل
معاكى ايه
شيماء :.....................وبس ياسيدى
ام يوسف خبطت على صدرها:
يلهوى يالهوى عشان تبقى تنشفى دماغك
ومتسمعيش الكلام وتصممي تخرجي لوحدك،،
ياشيماء انتى امانه فى رقابتى يابنتى متخلينيش خاينه للامانه انا مقدرش اتحمل كده
يوسف قام بغضب
شيماء :رايح فين يايوسف
يوسف :رايح القرافه اخلص على الحيوان
ده اكيد لسه مرزوع هناك مغمى عليه
فكه :مفيش داعى يأخ يوسف هو اصلا
الخبطه اللى ادتهاله شيماء ممكن يموت
فيها واهو يبقا مكانه ووصله
يوسف :احنا متشكرين جدا يااخ فكريه
احنا مش عارفين لو انت،، انتى مكنتيش
هناك كان ممكن يحصل ايه
ام يوسف :اصل شيماء طيبه وربنا وقفلها
ولاد الحلال ربنا يبارك فيكى يابنتى
الا انتى لابسه كده ليه؟
فكه بصت للارض وسكتت
شيماء :اصل فكريه،، وبصتلها فكريه بخوف ففهمت انها مش عاوزاها تحكيلهم فغيرت شيماء الكلام،، اصل فكريه اهلها عاوزين يجوزوها غصب عنها وهى هربت منهم فمتنكره بالهدوم دي عشان محدش يعرفها،،
وبعد اذنكم هى هتقعد معايا فى
الشقه لغاية لما تلاقيلها سكن وشغل
ام يوسف :تنور والله دى كفايه دمها اللى
ساح عشانك ياشيماء،، دى لو مشلتهاش
الارض نشيلها فوق دماغنا
فكه بكسوف :انا متشكره ياخالتى ربنا
يخليكى يارب،، وهنا بصت ناحيه يوسف
ويوسف كمان بصلها وأول ماعنيه جات
فعنيها قلبه فضل يدق جامد وتاه فى
جمال عنيها الرماديه وجمالهم الهادى
يوسف فضل باصص فى عنين فكه
كتير وهى كمان عنيها اتعلقت بعنيه
وحست بحاجه غريبه جدا محستهاش
قبل كده!!!
اما شيماء فكانت بتحكى مع خالتها ام يوسف ومش منتبهالهم،،
وممكن يوسف يساعدها تلاقى مكان كويس ولا ايه يايوسف؟
يوسف، يايوسف،،
ويوسف مش سامع وكأن فيه مغناطيس فى عيون فكه شده لعالم تانى مرجعش منه الا لما فكه انتبهت وبصت للارض،،
ساعتها فاق يوسف على صوت شيماء: يوسف رحت فين؟
يوسف :نعم يامه بتقولى حاجه؟
شيماء :انا اللى بقول انت مالك النهارده
بريزه كهربك ولا ايه؟
يوسف وهو باصص لفكه :اه انا اتكهربت
النهارده والكهربه كان فولتها عالى اووى،،
فكه فهمته وابتسمت عشان كان بيتكلم
بعنيه كمان وهو باصصلها وبيتملى فيها
شيماء :والله الولا بريزه ده هيجيب اجلك
يوسف فجأه قام مخضوض .
يالهوى صحيح دنا سيبه مع العيال لوحدهم احسن يعمل فيهم حاجه
ووقف ومد ايده لفكه :فرصه سعيده يأانسه فكريه .
فكريه سلمت عليه :انشاله يكرمك ياسى
يوسف يارب
يوسف مكنش عاوز يسيب ايدها لكن هى
سحبتها منه بكسوف وهو مشى وهى
قعدت سرحانه وباصه للباب اللى خرج
منه
شيماء دخلت اوضتها وجابت جلابيه جميله لفكريه وطلبت منها تدخل تاخد
حمام،،
وفعلا فكه دخلت تاخد حمام وخرجت
فى هيئه تانيه وشيماء اول ماخرجت
صفرتلها ايه يابت الطعامه دى كلها
كنتى مخبياها فين؟
ام يوسف بصتلها لقتها خارجه بشعرها
والعيون الرماديه الواسعه وجمال رباني متمثل فوشها وجسمها قالت:
بسم الله تبارك الله ايه الجمال ده كله
ربنا يحرسك من العين يابنتى والله
فكه :شاله يخليكم دى عنيكم بس هى
اللى حلوه
شيماء قعدت تضحك وتحكى مع فكه طول اليوم ويهزرو ودا شيئ هما الاتنين كانو مفتقدينه انهم تكون ليهم صاحبه او اخت بنت يحكولها اسرارهم
وجه الليل ويوسف رجع من الورشه واتعشوا كلهم سوا وسابهم يوسف وطلع نام فوق فأوضته،، والاتنين دخلو ينامو فأوضه شيماء،، لكن فضلو للصبح صاحيين يتكلمو فكل حاجه ويحكو لبعض عن ادق تفاصيل حياتهم..
شيماء :يااااه دانتى حياتك كلها مغامرات،،
تصدقي انا طول عمرى نفسى اعيش حياه زيها!!
فكه :لا دى حياه مليانه ذل ومرمطه،،
دنا اللى طول عمرى نفسى اعيش
زيك،، متستته فبيت مش خايفه من
حد، ولا هربانه وديما بجرى فى الشوارع
وعنيا طول الوقت فنص راسى،، انتي فنعمه ياشيماء مانتيش حاسه بيها
شيماء :صحيح محدش يافكريه بيرضى
بحياته ابدا ..الا اقولك صحيح انا مش
عاجبنى اسم فكريه ده،، متزعليش منى
يعنى انا بستتقله،، ممكن ادلعك واناديكي بأسم غيره،، بصى انا هقولك يافوفا او فيفى او فكوكه ايه رأيك؟
فكه :ايه فكوكه دا؟،، لا ياعم اى حاجه غير فكوكه ده الله يكرمك
شيماء بضحك :استنى دلوقتى يوسف
هيطلعلك اسم تعرفي انه مسمينى شمامه
فكه :يالهوى شمامه؟
شيماء :اه تصورى ويقولى الشمامه اللى بتتاكل مش حاجه تانيه،،
فكه بسرحان وهي بتلعب فى خصله من شعرها،، باين عليه دمه خفيف
شيماء :هههههه يوسف دمه خفيف دا رزل،،، وسكتت وبصت للارض مره وحده
فكه :مالك يابنتى مالسه كنتي بتضحكي انتى ملبوسه ولا ايه؟
شيماء اتنهدت :لا ابدا تصورى يافيفى
انك نستينى الهم والحزن اللى انا فيه
انا حاسه ان ربنا بعتك ليا من السما والله
فكريه كشرت على ناحيه .
شيماء :مالك
فكه :اصلك لما بتقوليلى فيفى دى بحس نفسى رقاصه
شيماء :ههههههه والله انتى مصيبه يلا ننام شويه يامصيبه،، الفجر هيأذن خلاص
فكه :لا انا هصلى الفجر وبعد كده انام
شيماء :تقبل الله،، انا مش قادره هنام
فكه :نوم العوافى ياحبيبتى نامى،، وغطتها وحضنتها من ضهرها وحطت دماغها على المخده جمبها وسرحت فى عيون يوسف العسليه الجميله
اما شيماء فلما حضنتها فكه حست بأمان،، وكأن امها هى اللى حضناها،، ولاول مره من يوم وفاه مامتها وبباها تنام براحه كده،، وكمان تغفى وهى مبتسمه
ويوسف تانى يوم الصبح نزل عشان يفطر
معاهم وضرب الجرس وطلعتله
فكه وفتحت الباب،، وهو ابتسم اول ماشافها وبصلها من تحت لفوق وقالها :
صباح الخير ياقمر ممكن تصحى شيماء
وفكريه وامى لو سمحتى؟
فكه بصتله باستغراب
يوسف يلا ياقمر بسرعه والله شيماء دى
حكايه كل شويه تجيبلنا حد شكل بس
المره دى جايبه مززه
فكه كانت فاكره ان يوسف مش عارفها
لكن هو كان عارفها وبيستهبل
فكه.انا فكريه ياسى يوسف سلامتك!!
يوسف :لا لا متقوليش كده، فكريه دى
كانت زى الراجل لكن انتى ست البنات
وكلك رقه وانوثه تقوليلى فكريه؟
فكريه ابتسمت ووشها احمر وبصت للارض
يوسف :احنا نهارنا نادى ولا حاجه
فكه :لا دنا اللى هنادى
يوسف :هتنادى لمين
فكه :هنادى لخالتى ام يوسف وسابته ودخلت ويوسف ابتسم ومسك قلبه
وسند على الباب،، إهدى شويه ياعم
هتفضحنا مش من تاني يوم كده دانت خفيف اوي،، حاسس انها سامعه صوتك
ام يوسف كانت جوا المطبخ بتحضر
الفطار وفكه بلغتها بوجود يوسف وطلبت
منها هى تعمل الفطار
ام يوسف رفضت وقالتلها انتى ايدك متعوره ولازم ترتاحى وانها هى اللى
هتحضره والايام جايه تبقا تحضره
براحتها لما تخف
فكه سمعت كلام ام يوسف لكنها فضلت واقفه جنبها لغاية ماخلصت وابتدت تاخد فى الاطباق وحطتهم على السفره وقعدت تفطرهى ويوسف،،
ام يوسف : انا هاروح اصحى شيماء مش عاوايدها تنام لدلوقتى
فكه :مش هتصحى عشان نايمه من شوية اصلنا فضلنا طول الليل نتكلم مع بعض لغايه الفجر،، وهى نامن وانا صليت الفجر ومجانيش نوم
يوسف :يابختها،، قصدى يابختك قصدى
يابختكم انتو الاتنين بتتكلمو مع بعض
مش زى حلاتى وحيد ياعينى ومش بلاقى حد اتكلم معاه خالص ولما انام احلم ببريزه اقوم مسروع
امه ضحكت وفكه سألته بإستغراب :مين بريزه ده؟
يوسف :هبقى ابعتهولك تتعرفى عليه بنفسك،،
الحمد لله،، يلا سلام انا نازل الورسه بقي حد عاوز حاجه؟
فكه :ربنا يفتحها فوشك يارب
يوسف :ايوووووه ايه الدعوه الحلوه دى؟
دى ست الحبايب ياحبيه مبتقولهاليش!!
صباحنا زى الفل..
ام يوسف :بقولها فسرى ياواد مش لازم
اسمعهالك..
يوسف وهو باصص لفكه :بس حلوه اووى لما بتتسمع يامه والله..
ام يوسف :خلاص هبقا اسمعهالك وازعق
واسمعها للحاره كلها هوينا يلا وانزل شوف اكل عيشك
يوسف نزل علي عينه غصب عنه وكان نفسه يقعد النهارده فالبيت معاهم مينزلش لكن اكل العيش واحكامه،، وبمجرد ماقفل باب الشقه خرجت شيماء من الاوضه بنوم :
صباح الخير
ام يوسف وفكه : صباح النور
شيماء :هو يوسف لسه منزلش من فوق ؟
فكه :لا نزل وفطر وراح شغله
شيماء قعدت بحزن على السفره لانها كانت بتستنى ميعاد الاكل بفارغ الصبر عشان تقعد معاه،، لكن للاسف النهارده ملحقتهوش
ام يوسف :هاه احكيلى يافكريه يابنتى
انتى منين واهلك مين وايه حكايتك؟
فكه شرقت وفضلت تكح
وبصت لشيماء بصة استنجاد عشان
مش عارفه تقولها ايه؟
شيماء :حيلك عالبونيه ياخالتى دى لسه
تعبانه،، اهى قاعده معانا وهنتكلم فى كل
حاجه علي رواقه،، بس نسيبها دلوقتى على راحتها..
ام يوسف :على رأيك يابنتى.. عن اذنكم انا هطلع اشوف اوضه يوسف وارتبهاله
فكه :اجى اساعدك ياخالتى؟ بصراحه فكريه مكنش هدفها الاول المساعده كان نفسها تشوف المكان اللى بينام فيه يوسف
ام يوسف :لا يابنتى انتى لسه تعبانه وجرحك ملمش احسن يتفتح وتتعبى،،
وبعدين يوسف منظم اوووى انا هشوف الغسيل بتاعه بس وامشى على
الاوضه عالماشى كده..
فكه :اللى تشوفيه ياخالتى
وطلعت ام يوسف،، وشيماء وفكه شالو
السفره ودخلو يحضرو الغدا،،
وشيماء اتفاجأت بفكريه اللى مبتعرفش حاجه فى المطبخ خااالص
شيماء :يالهووى عليكى يافيفى وعلى اللى
هيتجوزك دانتى ابيض خالص فى المطبخ؟
فكه :يعنى هو انا كانت امى جنبى تعلمنى،
ولا كنت بقعد فى البيت اصلا،،
دنا طول عمرى يأمه على مواسير بيت متشعلقه،، يأمه بجرى على الارصفه واتنقل من اتوبيس لاتوبيس لمترو من
يوم ماوعيت على الدنيا..
شيماء بصتلها لقتها بتتكلم بحزن راحتلها وحضنتها،،
شيماء :حبيبتى يافيفى متزعليش انا جنبك وهعلمك كل حاجه
فكه :ربنا يخليكى ليا ياشيماء انا مش عارفه من غيرك كنت عملت ايه؟
شيماء باستها من خدها وفضلوا يتكلمو
ويضحكو،، وقربو من بعض جدا فى الكام
يوم اللى قعدتهم فكريه معاها وحكو لبعض تفاصيل كتيير وبقو قريبين من بعض وحسوا بألفه لبعض اكنهم من دم بعض..
وفكه مستمتعه بالحديث الانثوى اللى
كانت مفتقداه وعمرها مكانت بتتكلم
الا مع الكانو او بيكا كأنها راجل زيهم...
يوسف كمان كان فى كل مرة يشوف فيها فكه قلبه يدق جامد كأنه هيخرج من
صدره،،
وطول ماهو قاعد عينه منها من تحت لتحت وكان دايما بيحاول يفتح معاها كلام بأي طريقه،،
وامه لاحظت ده وادايقت جدا،، وقررت
انها لازم تحط حد للموضوع قبل مايكبر
طبعا مع اصرارها على السؤال على اهل فكه شيماء وفكه قالولها ان ابوها اتوفى
قبل ماتتولد،، وامها ماتت وهى صغيره ،،
وانها كانت عايشه مع جوز امها ومراته
وانه عاوز يجوزها غصب عنها واحد
اكبر منها بكتير عشان كده هربت
فكه لشيماء وهما قاعدين مع بعض فالاوضه بتاعة شيماء :
شيماء محتاجه شغلانه ضرورى
اعيش منها متعرفيش حد يساعدنى ؟
شيماء: ومين سمعك،، وانا كمان محتاجه
اشتغل عشان مش هقدر افضل اخد
فلوس من يوسف على طول واعيش عاله
عليه طول العمر،،
كفايه عليه اتحمل مصاريف دفنه ابويا ومصاريف البيت من ساعة ماتوفى ورافض انى افك الوديعه اللى حططها بابا بأسمى فى البنك وبيقولى خليها متعانه لجوازك..
فكه :يوسف ده باين عليه راجل اووى!!
شيماء :راجل اوى وشهم اوى وحنين
اوى، ورزل اوى اوى اوى ....اوى
فكه بضحكه :الالالا دا باين الموضوع كبير اوي اوي اوي.
شيماء :موضوع ايه مفيش مواضيع ولا
حاجه؟
فكه ديقت عنيها وسألتها بخبث :متأكده؟
شيماء هزت دماغها وقلدت فكه :اه متاكده!!
ولفت الناحيه التانيه ونامت،، وسابت فكه اللي فضلت صاحيه مبتسمه وهى بتفكر فى يوسف وبتعيد بينها وبين نفسها كل كلمه وكل حرف بينطقه وهو قاعد معاهم وارتاحت لما عرفت ان شيماء قلبها خالي من ناحيته..
تاني يوم شيماء فاتحت يوسف تانى فموضوع شغلها وهو رفض كالعاده لكن هى صممت ومع اصرارها ابتدا يلين..
شيماء :عشان خاطرى يايوسف انا نفسى
اشتغل
يوسف بزهق :انزلى ياشيماء انزلى ولفى واتبهدلى براحتك وعلى فكره نصيبك من الايراد هيوصلك كل شهر سواء اشتغلتى او مشتغلتيش..
وان شاء الله وبأذن الله مش هتلاقى شغل،، وكل حد تروحيله على شغل يشوفك قرد او حراميه، ويطردك قادر ياكريم
شيماء :قرد فعينك دنا أمر الامرات
يوسف زاحها بضهر ايده من قدامه : طب بس اوعي كده بلا امر،، دا أمر بالستر ياختى،، وسابهم ومشي
وبصت شيماء لفكه لقتها حاطه ايدها على بوقها وبتضحك
شيماء :بالذمه شفتى رزاله اكتر من كده؟
فكه :لا حرام عليكى دا دمه عسل
شيماء :والله يختى مافيه عسل غيرك،، المهم انا بأذن الله من بكره هنزل ادور على شغل ليا وليكى عشان عارفه انتى مش هينفع تلفى،،،، الا صحيح يافيفى انتي معاكى بطاقه؟
فكه :اه امال ايه اهى،، وورتهالها
شيماء :تمام اصل اول حاجه بيطلبوها البطاقه..
شيماء نزلت يومها و لفت كتير وفكل مره يأمه الشغل مش مناسب،، او المرتب مش مجزى،، وترجع كل يوم تواجه الشماته من يوسف وتقوله هلاقي بإذن الله،، وفضلت على الحال ده كام يوم لغايه متعبت،،
وهما بيتعشوا كلهم بعد يوم جديد من اللف :
شيماء :اه يانى يامه يارجلى مش قادره،،
تقولش الزفت ده لما دعى كان باب العرش
مفتوح والدعوه اتقبلت!
يوسف :يابنتى العبد لله مكشوف عنه الحجاب، واللى اقوله بيحصل على طول
دانتي المفروض كل يوم الصبح تبوسى ايدى وتاخدى البركه،، ومدلها ايده وشيماء ضربته على ايده..
ام يوسف كانت مركزه مع فكه اللى كانت
بتبص ليوسف وهى مبتسمه وسرحانه
وقررت انها تاخد موقف معاها وتنهي المهزله دي..
ام يوسف :الا يافكريه يابنتى مكلمتيش حد يشوفلك سكن؟ انا شايفه انك خفيتى والحمد لله!!
فكه اتصدمت واتجرحت من كلام ام يوسف وسابت المعلقه فى الطبق وردت عليها بحزن :
انا عارفه انى تقلت عليكم ياخالتى انا فعلا خفيت خلاص ولازم امشى،، وقامت جرى دخلت الاوضه وشيماء جريت وراها
استنى يافكه خالتى مش قصدها انتى مش هتمشى من هنا..
يوسف خبط على الطربيزه بأيده :
ليه يامه عملتى كده ليه؟ تروح فين الغلبانه دى دلوقتى دى وحدانيه حرام عليكى!!
ام يوسف :تروح مطرح ماتروح احنا مش
مسؤلين عنها هى كانت من باقى عيلتنا؟
وبعدين اللى فى دماغك مش هيحصل
يايوسف..
يوسف :ولا اللى فى دماغك هيحصل يامه..
ولو انا وشيماء اخر اتنين فى الدنيا مش
هتجوزها،، ولعلمك بقي وخلى كلامنا عالمكشوف،، قسما بالله لو مش
فكريه يبقا مش هتجوز طول عمرى،،
وهفضل عازب وانتى عارفه يوسف لما
يحلف يام يوسف،، وسابها وقام نزل
شيماء فضلت تهدى ففكه اللى مصممه تنزل،، ودموعها زى الشلال وحست بكسره نفس شديده قدام يوسف،،
وفين وفين لما شيماء اقنعتها بالعافيه انها تقعد لتانى يوم الصبح،، وكانت منهاره
عشان فكه هتسيبها،، ومش متخيله انها
تبعد عنها،،
وفعلا باتت فكه الليل واتجمعوا عالفطار، والكل ساكت وفكه طول الوقت باصه فى الطبق وحاطه ايدها على خدها وقطع الصمت ده يوسف وهو بيقول :
:احممم فكريه بقولك لقيتلك اوضه
على سطح العماره اللى قصادنا، مأجرها
واحد من الارياف وهيسيبها ويرجع بلده،
وهتكون فاضيه الاسبوع الجاى
فكه وشيماء بصو لبعض بفرح وشيماء ردت عليه بفرحه :
الله عليك يايوسف احلى خبر عشان
فيفى تفضل قدامى على طول
يوسف :وقدامى انا كمان،، احمم اقصد وسطينا كلنا يعنى
فكريه :شاله يخليك ياسى يوسف يارب
ومايحرمنى منكم ابداً..
يوسف ابتسم و بص لامه اللى لقاها بتبصله بغضب وقامت دخلت اوضتها
شيماء بمرح :اشطا عليك يايويو ياحلال العقد
فكه :ابتسمت وبصت للارض
يوسف :ايه عجبتك يويو وبتضحكى
مهى كمان اسمها شمامه
فكه بضحك :اه عرفت قالتلى
يوسف :وانتى كمان من هنا ورايح هيبقا
اسمك فته ههههههه حلو فته
فكه :لا والله طب وانتا من هنا ورايح
يوستفندى
يوسف :ضحك بسماجه وبطل ضحك مره وحده ورفع حاجب واحد ورد عليها
منتى سكر اهو وليكى فى القلش وعشان
القلشايه الحلوه دى ليكى عندى هديه
شيماء :الهديه بالنص فيها لاخفيها
يوسف :ياشمامه انتى تؤمرى خديها كلها
لو عاوزه
فكه :وياترى ايه الهديه
يوسف :حزرو فزرو هبعتلكو بريزه يقضى
معاكو النهار
الاتنين فى نفس واحد :لئااااااااه وقاموا
يجرو على الاوضه
يوسف قام وراهم ودخل الاوضه عند امه وقفل الباب وراه وقعد جمبها على السرير
ومسك ايدها وباسها
ام يوسف :مشيت اللى فدماغك برضوا؟
يوسف مسك ايدها وحطها على قلبه
اسمعى كده،، حاسه بيه،، شوفى بيعمل طاخ طاخ طاخ ازاي؟ وكل ماشوف فكريه بيعمل كده يمه من الفرحه،، ليه عاوزه تكسريه وتكسري فرحته مش حرام عليكي يمه؟
ام يوسف :انا يابنى عاوزه اكسر قلبك؟ طب دانت روحى يايوسف،، وكل اللى بعمله ده عشان خايفه عليك من كسرة القلب،،
يبنى احنا نعرف هى مين ولا ايه حكايتها
ووراها ايه وجايه منين؟ بتكدب ولا لا؟
يبنى انا عاوزاك تتجوز شيماء اللي مربياها على ايدى،،
بنت ناس وحلوه وجميله والف مين يتمناها،، دى حتي احلى من فكه دى
بكتير!!
يوسف :مش بالحلاوه يامه،، بالحب يام
يوسف،، وبعدين انتى قولتيها شيماء
الف مين يتمناها وهيجيلها سيد سيدى
كمان،، يعني دنيتها ماهيش واقفه عليا..
ام يوسف :بس انا قلبى متوغوش من فكريه دى وان وراها مصيبه..
يوسف : بس انا قلبى بيقولى انها بنت كويسه اوى يامه وبنت حلال وزي مابتسمعي لقلبك انا بسمع لقلبي،، واللى قبل كده ميهمنيش حتي لو عامله الف مصيبه..
ام يوسف اتنهدت بقلة حيله :
اللى تشوفو يايوسف،، بس خليك فاكر انا حذرتك وقلتلك بلاش وانت اللي ركبت دماغك،،
وعندى شرط كمان مفيش جواز من فكريه ولا كلام فى الموضوع ده غير بعد ماتتجوز شيماء.. ودا كلام مفيهوش مناقشه ولا فيه اعتراض..
يوسف :وانا موافق ياست الكل،، واهو بالمره نتعرف علي بعض اكتر من كده،،، وباس على دماغها،، ربنا يخليكى ليا ياست الكل
***************
اما فى القاهره
فاتولد وحش مفترس اسمه الكانو،،
بقا ولا عصابات المافيا،، قتل وسرقه
وبلطجه وكل حاجه تخطر على باله يعملها
بدون تفكير،،
وبيكا بقا ميقلش عنه اجرام،، يعمل اى حاجه ويتحامى فاخوه،، والبوليص حتى مش بيقدر يقربلهم لانه مش بيلاقى وراهم دليل على اى جريمه يعملوها ولا حد بيعترف عليهم ولا حد يجرؤ اساساً
***************
في اسكندريه فساعه عصريه كده
فكريه وشيماء باصيين من البلكونه،، ولفت نظر فكه حتة ارض مواجهه لورشه يوسف كانت زى الخرابه وفيها زبالة الحاره كلها،، مكانتش كبيره بس تنفع لفكره جات فى دماغ فكه
ياترى ناويه على ايه وايه هيحصل معاها
هى ويوسف وشيماء كل ده واكتر هنعرفه
الحلقه القادمه
لايك وكومنت
بقلم /ريناد يوسف
صاحبة السعادة ❤️🌹
رواية عزبة فكه
البارت السادس
فكه :شيماء هى الخرابه دى ملك مين،، مين صاحبها؟
شيماء :معرفش احنا طلعنا لقيناها خرابه كده ومفتكرش حد سأل عليها ولا قال
بتاعتى ولا حد دور عليها بتسألى ليه؟
فكه :اصلى جاتلى فكره،، ايه رأيك لو نصلحها ونعمل فيها محل سمك مشوى،،
انا لاحظت انه مفيش فى الحاره حد بيعمل سمك ولما حد بيجيب بيروح مسافه كبيره عشان يلاقى اقرب حد يجيب منه!!
شيماء :انتى عبيطه يافيفى صح! انتى عارفه عشان بس تنضفيها من الزباله دى
هتتكلف كام غير التجهيزات؟
فكه :بصى بس انا معايا ١٠ تلاف جنيه كان
مديهومنى المخفى كانو عشان اشترى بيهم حجات وهيكفو صدقينى
شيماء برقتلها وقالتلها بهزار ،، معاكى عشر تلاف وقاعده كده عادى؟
ياجبايرك دنا لو مسكت المبلغ ده فأيدي اعمل نفسى من الاعيان
فكه :هههههه على ايه يعنى دنا مسكت اكتر من كده ١٠٠ مره بس المشكله انى مش عاوزه ابداء مشروعى واكل عيشى بفلوس حرام عشان ربنا يباركلى
شيماء :ابتدى بيهم وابقى جمعيهم من مكسبك وطلعيهم لله بعد كده وربنا يسامحك
فكه :تفتكرى ينفع؟
شيماء :ينفع مينفعش ليه انتى مضطره
فكه :طب ايه،، معايا ولا ايه؟
شيماء :انا معاييش فلوس عشان اشاركك
فكه :شاركينى بمجهودك
شيماء :لا يختى مبحبش البرطشه انا
فكه :يبت برطشه ايه احنا اخوات
شيماء :لا معلش انا بس ممكن اشتغل معاكى بمرتب شهرى
فكه بضحكه : ماشي بس اوعى تطلعى زى بريزه
شيماء :دنا العن من بريزه استنى وشوفى
الغباوه اللى على حق،، وضحكو هما الاتنين وحضنوا بعض..
بالليل فاتحو يوسف لما جه من الورشه فى الموضوع،، وهو رحب بالفكره وخصوصا انهم هيكونو قدام عنيه دايما،،
وتاني يوم ابتدو بحماس ينفذو المشروع مع بعض،، نضفو الخرابه ورشوها كلها لون اخضر جميل،، وجابو زرع اخضر كتير حطوه فيها وزعوه فى كل مكان،،
وجابو كام طربيزه وكراسى وبنو اوضه على جمب فيها والخرابه بقيت جنه
شيماء بفرحه وهي بتبص حواليها :كده يبقا مش فاضل غير اننا نبدأ
فكه: بس فيه مشكله انا مش بعرف اشوى سمكولا اعمل حاجه خالص!
شيماء :لا دى سهله هعلمك متخافيش كل
حاجه تبقا فأولها صعب وبعدين بالمحاوله
بتهون وتسهل
فكه :بكره ننزل الصبح بدرى حلقه السمك
نجيب السمك نبدأ حتى ب ٥ كيلو احنا مش عارفين الناس هتشترى ولا ايه النظام
شيماء لا نجيب ١٠ ولو فضلت حاجه نخزنها وخبطت على دماغها اااخ نسينا حاجه مهمه اوى،،
نسينا ان لازم يكون فيه فليزر عشان
السمك اللى يفضل يتخزن فيه لتاني يوم.
يوسف جاى من الورشه نحيتهم ولما وصل عندهم : الخرابه جهزت اهي وبقت زي الفل،، هاه هتزفرو الحته امته بقي؟
فكه :ايه نزفر الحته دى متتكلم كويس على المطعم الخمس نجوم ياجدع!!
يوسف :اله هو الحق بيزعل ليه هو السمك
مش زفاره برضو ولا ايه؟ دنتو هتبقا ريحتكم فله وتلمو علينا قطط السنين
شيماء :ياااعم الخفيف انت سيبك من قلشك ده وحللنا المشكله دى عاوزين ديب فريزر،، واحنا فله معناش غير ٥٠٠ جنيه بس،، نعمل ايه
يوسف :احلى ديب فريزى مجمع من بتاع الروبابيكيا على ايد العبد لله يكون بكره
واقف عريس فقلب الخرابه هنا
فكه :ياعم يوسف اسمه مطعم الله يكرمك
هتطفش الزباين من اولها
يوسف : اسفين لجناب المطعم،، ها هتبتدو امته؟
فكه :بكره بعون الله،، الا بقولك يايوسف هو اخينا صاحب الاوضه لسه مرجعش بلدهم؟
يوسف بيهرش فشعره :هو بصراحه سافر من يومين يافكريه
فكه :طب ليه مقولتش من ساعتها يايوسف؟
يوسف كان نفسه يقولها عشان متبعديش
عنى، عشان كل يوم اقعد معاكى على السفره وابص جوا عنيكى واشوف ابتسامتك الجميله اللى بتنور حياتى دى،، لكنه مقدرش ومقالش غير كلمه وحده : نسيت..
شيماء :بقولك ايه يافيفى اعملى حسابك
هبات معاكى على طول ادينى بقولك اهو
فكه :ياخبر دى احلى حاجه فى الدنيا
يوسف :وانا كمان معاكو
شيماء :معانا فين ياعم انت هو اى كلام والسلام؟!!
صوت من وراهم :وانا كمان معاكم،، يبصو
لورا يلاقو بريزه واقف معاه رغيف حاف
بياكل فيه
يوسف :وانت معانا فين؟
بريزه :اى حته اى حته
يوسف :وايه اللى بتاكله ده
بريزه :عيش حاف،، كل يوم اجيب العيش
واستنى السمك ومبيعملوش،، هيعملو امته انا جعان اووى
يوسف :وانت مالك بالسمك ياحبيبى؟
بريزه :اسكت اصلك انتا متعرفش حاجه
انا اللى هدوق السمك كل يوم حلو ولا مش حلو قبل ميدوه للزباين
يوسف :لا ياشيخ؟
بريزه :اه امال ايه
يوسف :طب والشغل عندى؟
بريزه :لا منتو شدو حيلكم انتو واعتمدوا علي نفسكم،، هو كل حاجه عليا انا؟ اشتغل انتا وصبيانك بقي وانا هشتغل هنا مع شيماء وفكريه هنا في المطعم..
فكه :خسرنا والحمد لله
الكل ضحك ويوسف بصلهم وقالهم : اهه
مجبتش حاجه من عندى ادى اول نوع من القطط اللى هتلموها عليكم
تانى يوم حضرو كل حاجه وابتدو الشوى
وريحة السمك قلبت الحته،، والعشره كيلو
خلصو ولسه الناس بتيجى تسأل،، وفكه
وشيماء مش ملاحقين على الناس،،
ويوسف مراقبهم وفرحان جدا من نجاحهم واقبال الناس عليهم وراحلهم ومعاه الديب فريزر شايله هو وواحد من صبيانه ودخله فالاوضه وطلع سألهم :
هاه فين السمك الباير عشان تخزنوه؟
شيماء :باير؟! طب دحنا شطبنا قبل منبدأ ياعم
يوسف :مشاء الله تبارك الله،، يعنى ايه طيب مفضلش سمك ليا اتغدى وانا اللى مجوع نفسى من امبارح؟
فكه طلعت طبق من الفاترينه كانت مخبياه ازاى يعنى ده انا شايلالك منابك اهو
شيماء :ايده هو الطبق ده مش ليا انا وانتى؟ داحنا مفطرناش وانا وقعت وبصبر نفسى بالطبق ده..
فكه : لا دا طبق سى يوسف قولت لازم ياكل من سمك الافتتاح هو يعني الناس اللي اكلت سمك دي كلها احسن منه ولا ايه؟
يوسف اخد الطبق من ايد فكه وحطه على طربيزه وراه ورجع بص لفكه وقالها :
متشكر اوى يافكريه انتى اصيله
والله وكلك زوق،، مش زى الواطيه دى وعلى العموم الطبق مليان ويكفينا احنا التلاته،، يلا تعالوا لقمه هنيه تكفي ١٠٠
فكه :هجيب رز وسلطه وطحينه واجي،، وانتى ياشيماء هاتى عيش وتعالى ناكل لقمه عشان هنروح نجيب سمك تانى لبليل
شيماء :يابت كفايه كده انا رجلى اتشلت
وكسبنا كتير نرتاح ونكمل بكره وبعدين مين هيتعشى سمك يابنتي؟
فكه :لا بكره ايه مفيش بكره النهارده وفيه كتير هيتعشى سمك لعلمك..
شيماء :قولها حاجه ياعم يوسف اللى
وخدانى عالحامى دى هتهدنى
يوسف : متهدك زي ماهي عايزه،، امال فالحه اشتغل يايوسف،، واتعب يايوسف ومش عارف ايه يايوسف،، وانتى
ملكيش فى الشغل ولا اده،،، فكه عاوزك تمرمطيها
فكه :اعتبرها اتمرمطت
شيماء بتمثل البكا :اه يانى يامه يانى وقعت وسطكم ياظلمه
الكل ضحكو وراحو ياكلو وفجأه كلهم وقفو
لما لقو بريزه قاعد على الطربيزه وبينهى
فأخر حاجه فى الطبق
يوسف بغيظ :ايه يابريزه حلو السمك؟
بريزه شاور بايده 👍 واتجشاء بصوت عالى
يوسف بيمثل البكي :صحححه يامعلم..
وبصو لبعض هما التلاته ومسكو عيش حاف كلهم وابتدوا يقطمو وهما بيبصو لبريزه بأسى،،
---------------—--------------
نقلت فكه على الاوضه اللي فضيت واللي كانت احلى حاجه فيها انها مقابله لاوضه يوسف،، يعنى لو كل واحد خرج من اوضته يبقو شايفين بعض بوضوح،،
وفكه عملت قعده بكنب جميله قدام الاوضه وفرحت بيها اووى وكانت حساها زى القصر،، وحست فيها انها اخيرا اخدت حريتها،،
يوسف كمان كان فرحان اووى لانه وهو قاعد مكانه شايف فكه ومتابعها بعنيه دايما،، وبقي معسكر قدام الاوضه وطول ما فكه فيها هو قدام اوضته قاعد..
والمطعم كمان كان حاله ماشي وبيشتغل حلوا ويجيب فلوس زي الفل،، وفيوم فكه كانت في المطعم وبصت ليوسف وندهتله: يوسف يايوسف خمسه الله يكرمك
يوسف راحلها بسرعه :ايه يافكريه عاوزه
حاجه
فكه : تعالا والنبى شوف الفريزر بتاعك
الخرده ده مش شغال ليه؟
يوسف :ازاى ده،، اخص كسفنا الله يكسفه،، ولا يابريزه
حط الفيشه كده ...اه فعلا مش شغال
طب خليك عندك لما اقولك وصل بالكهربه
توصل
بريزه :ماشى
يوسف بص لفكه اللى بتبصله واتقابلت عنيهم وركزو اووى فى عيون بعض وكل
واحد فيهم تاه فى عيون التانى وفكه
فاقت وابتسمت وبصت للارض
بريزه :اوصل يسطى
يوسف بعدم تركيز وماسك السلك عريان
اتنهد وصل يابريزه
بريزه حط الفيشه ..يوسف زززززززززززز
اااااه يخرب بييييييييتك افففففصللل
فكريه جريت فصلت الفيشه وماتت من
الضحك ويوسف بصلها بتوهان :
الله يخرب بيت جمال الضحكه يابريزه،، لو اعرف كده دنا كنت اتكهرب كل يوم،، وبصوت واطى همس وهو باصصلها وفاكر ان همسه مش مسموع،، كهربنى تانى والنبى يابريزه كده خلينى اشوف الضحكه الحلوه دى..
بريزه سمعه ومد بوزه واتنهد وبصوت واطى برطم،، كل شويه وصل يابريزه افصل يابريزه،، وحط الفيشه ويوسف صرخ تانى : ااااااااه يخخخخخرب بيييييتك
هتتتموتتتتنىىى اففففصصصصلاااااي
وفكه بتضحك بصوت عالى ومش قادره من كتر الضحك تروح تفصل الكهربه المرادى وشيماء خرجت جرى من الاوضه اللى كانت بتجيب منها طلبات وشافتهم وجريت على الفيشه فصلتها ويوسف ويوسف وقع فى الارض وبصوت مبحوح:
هتموتنى متكهرب يابن الجزمه،، اكبر كهربائى فاسكندريه تماً هتموته متكهرب،، يارب تموت يابريزه وارتاح منك
بريزه :طب انا عملت ايه طيب؟
وشيماء وفكه فطسانين من الضحك لما قعدوا على الارض جمب يوسف
*******************
وابتدت الايام تعدي بسعاده علي الكل،، وبعد مرور حوالى ٣ شهور من الشغل المستمر والنجاح للمشروع وتحقيق الربح فجأه يدخل اتنين المطعم ويبتدو يكسرو
الطربيزات والكراسى ويوسف كان بيجيب حجات للورشه مكانش موجود،،
وكانت شيماء وفكه بس قاعدين وبريزه
معاهم،،
فكه جريت عليهم :فيه ايه ياجدع انت وهو،، بتعملو كده ليه؟
الاتنين كان شكلهم لبط وقالولها بنبرة. بلطجه : الارض دى بتاعتنا ولازمانا
شيماء :نعم؟! وكنتو فين من زمان لما كانت خرابه؟ ولا لما نضفت طلعلها صحاب!! وبعدين فين الورق بتاعكم ورونا الورق واحنا نسيبها
الراجل :مفيش ورق،، وبكره تفضى المكان
انتى وهى،، ولا اقولكم،، من دلوقتي،، وابتدو يكسرو فى المكان
فكه :اه دا نظام بلطجه بئه طب متقولو كده ياجدعان من الاول،، واحنا اللى عمالين نتكلم،، ونتفاهم
الراجل :اه بلطجه واعلى مافخيلك اركبيه
فكه.سحبت شومه من تحت البنك وبصتلها وكلمتها،، تعالى ياحلوه جه وقتك وهتشتغلى
الرجاله بصو لبعض وضحكوا عليها :
ودى ايه دى ياشاطره؟
فكه :دى كنت جايباها اهوش بيها القطط
الطفسه من هنا معرفش ان فيه كلاب كمان هتيجى
الراجل :اله اله دانتى لسانك طويل وعاوز
يتقص بقا وهجم عليها
شيماء صوتت واستخبت وبريزه جرى وهو خايف وراح الورشه لقى يوسف جاى من بعيد جري عليه.
يوسف مالك يابريزه بتجرى ليه عملت ايه؟
بريزه :كسرو المحل ومفيش سمك تانى
يوسف :هما مين يلا؟ وفجأه سمع صويت
شيماء وبص لقى المطعم متكسر،، جرى
عليهم لقى الناس اتلمت وفكه ماسكه الشومه ونازله فى الاتنين ضرب مكسراهم،،
يوسف وقف وقعد يتفرج عليها وهو مبتسم ومربع ايديه
فكريه بعد ماخلتهم كأنهم جثث فى الارض وقفت وسندت علي الشومه وبصتلهم :
اتفوو عليكم اشكال وسخه،، ودينى وما أعبد لو حد فكر تفكير انه يهوب هنا ليكون اخر يوم فى عمره،،
بصت لقت يوسف باصصلها وبيضحك اتكسفت اووى وبصت للارض وابتدت تعدل فهدومها و يوسف لما شاف كسوفها زعق بصوت عالى وهو بيسقف،، فكريه الناجى اسماله،، عليه والناس ردت وراه اسماله عليه اسماله عليه
فكريه الناجى اسماله عليه
*اسماله عليه اسماله عليه
وراح عند فكريه ورفع ايدها بالشومه،، احنا من هنا ورايح معاك يامعلم فكريه والاتاوه هتجيلك لحد عندك وطول منتا فى الحاره هننام واحنا مطمنين
والناس فضلت تضحك وفكه زغدته فصدره وضحكت هي كمان
وبريزه واقف بعيد يوسف نده عليه لكن بريزه خايف يروح
يوسف :تعالا يلا خلاص مفيش حاجه،، كده تهرب وتسيبهم وانا عامل ورايه راجل يسد معاهم! يلا ياجبان..
بريزه :يسلام ماشيماء كمان استخبت تحت الطربيزه زى الفار ولسه مستخبيه اهي..
يوسف وطى وبص لشيماء اللى بصت بعنيها لفوق وهي بتهمس :الله يفضحك يابريزه الزفت
يوسف :انت مش فاهم شيماء اكيد كانت بتدور على حاجه تضرب بيها يبنى
شيماء وهي بتخرج من تحت الطربيزه :ايوه تصدق انت اللى فاهمنى فيهم،، هو دا اللي حصل فعلاً
يوسف :اه اومال ايه انتى هتقوليلى دانا حافظك..
فكه وشيماء بصوا لبعض وضحكوا
وقربت الرجاله عشان تاخد العيال المضروبين وترميهم بعيد وفكه وشيماء ابتدوا يعدلو المحل ويظبطوه مره تانيه
وبعد ماخلصوا،، يوسف قاعد معاهم بيشربو شاى فى المطعم
يوسف :شيماء فيه خبر حلو ليكى عندى
شيماء بفرحه :ايه هو
يوسف :فيه عريس جايلك يطلب ايدك
بكره،، هو ابن حلال وكسيب وراجل
وبيحبك
شيماء فهمت ان يوسف هو العريس وبصت للارض بكسوف،،
ويوسف بص لفكه،،، وانتى كمان يافكريه جايلك عريس بكره،، يعنى كلنا هنفرح مره وحده،، وبصلها وهى ابتسمت واتكسفت وبصت للارض
*******************
تانى يوم فى الشقه عند شيماء،،
أم يوسفبتستعد بتحضير الاكل والشرب والحلويات فى المطبخ،، وشيماء وفكه بيستعدو فى الاوضه بيلبسو،، وشيماء ادت فستان لفكه جميل اووى وكانت اول مره فكه تلبس فستان زى ده يظهر جمالها
وعشان كانت علطول بالتيشرت والبنطلون الجينز فكانت طالعه زى القمر،،
وشيماء عملتلها ميك أب خفيف ولبستها طرحه مناسبه للفستان وهي
كمان لبست فستان شيك وبسيط والاتنين
طالعين قمرات
شيماء حضنت فكه جامد :شفتى يافيفى
كرم ربنا حتى العرسان جيالنا فيوم واحد
احنا زى ماتكون حياتنا مترتبه زى بعض
فكه :
تعرفى ياشيماء انا مدقتش طعم السعاده غير لما عرفتك ودخلت بيتك،، انتى هدية ربنا ليا ياأجمل اخت واحن واجدع صحبه فى الدنيا
شيماء باستها وكل وحده سرحت بخيالها
فيوسف اللى جاى يخطبها،، وفرحتها هتكمل بيه ومعاه،، وان النهارده اسعد يوم فى حياتها .
يوسف على الباب رن الجرس فتحتله ام
يوسف ورحبت بالعريس،،
ويوسف دخله الصالون واستأذن عشان ينده العروسه وأم يوسف دخلت المطبخ عشان تجيب ضيافه للعريس
يوسف بيخبط على باب الاوضه بشويش
فكه وشيماء :ادخلى ياخالتى
يوسف :لا مش خالتك العريس
فكه وشيماء ارتبكو وقامو جرى يظبطو
نفسهم قدام المرايه،، وراحو فتحو
يوسف اول ماشاف فكه عينه سبتت عليها
واتسمر فى مكانه وابتسم ابتسامه عريضه
خلت فكه تتكسف وتبص فى الارض لانه اول مره يشوفها كده فى كامل انوثتها،،
وخجلها اضاف لجمالها جمال خاص
وشيماء من ورا فكه بتبص من فوق كتفها :
ايه عجبك النيولوك ايه رايك بالزمه مش
قمر؟
يوسف :الا قمر دى قمر وشمس ونجوم كمان..
شيماء عدت ووقفت قدامها :احم طب وايه؟
يوسف :ايه!!
شيماء :اييييه
يوسف :اييييه؟
شيماء :احمم،، انا،، انا ايه رأيك فيا؟
يوسف :ااااه طب وانتى محتاجه رأيي انتى طول عمرك ست الستات واميرة الاميرات ياقمر انتي..
شيماء اتكسفت وبصت للارض
يوسف :طب يلا العريس بقاله مده قاعد لوحده احسن يطفش واحنا مصدقنا لقيناه
جمال من جوه :احممم
يوسف :متتنحنحش كتير جايين اهو
اصلى اول مابشوف حبيبتى بنسى الدنيا،،
فكه وشيماء اتكسفو هما الاتنين وبصو للارض،،
يوسف كفايه كسوف بقا يلا وانتو قمرات كده،، واخدهم ودخلو الصالون
جمال اول ماشاف شيماء وقف وقال : بسم الله مشاء الله وسلم عليها : اهلا ياانسه شيماء عامله ايه،، اخبارك ياأنسه
فكريه؟
الاتنين :الحمد لله
يوسف نده على مامته اللى جت بالحلو والساقع وقدمتهم للعريس
يوسف :بص لجمال لقاه مكسوف وباصص
للارض :
مش عارف انا ايه العرسان دى،، الوحده تفضل قاعده جوا اوضه مكسوفه ويندهو
عليها تيجى بالعافيه،، ودول قاعدين عادى
وانا وجمال اللى مكسوفين
شيماء :اله مش انتا اللى ندهتنا
يوسف :وانا يعنى اول مانده تيجو جرى
ايه ده؟
شيماء وفكه بصو لبعض وابتسمو واتكسفو
يوسف بص لجمال :هاه تتكلم انتا ولا اتكلم انا؟
جمال :اى حاجه اتكلم انتا
يوسف :تمام هتكلم انا بدالك،، ياجماعه جمال جاى النهارده بحلوياته وجاتوهاته وشيكولاتاته يطلب ايدك ياشيماء
شيماء بصت ليوسف ومتكلمتش وكأن الدنيا وقفت فى اللحظه دى،، وكأنه ضربها بحاجه جامده علي دماغها خلاها وقفت مش قادره تستوعب..
وكمل يوسف :وانا النهارده طالب ايد فكريه،، وهكون اسعد واحد فى الدنيا لو وافقت تبقي مراتى وام عيالى،، وقام قعد جمبها وهى اتكسفت وابتسمت وبصت للأرض وهو فضل يتأملها بعيون عاشق ولهان
وشيماء كانت بتبصلهم ومش مصدقه اللى
بتشوفه،، ومش عاوزه تصدق،، واتمنت لو
يكون كابوس وتصحى منه،، غمضت عنيها
لحظات وفتحتهم،، متنميه انهم يختفو
وتكون بتحلم،، لكن للاسف قاعدين بجد
ويوسف قاعد وبيبص لفكريه بجد
وجمال بيبص لشيماء ومستنى ردها
يوسف :ام يوسف مش بيقولو فى الحالات دى السكوت علامه الرضى؟ طيب ما تزغرتى ولا ازغرت انا ولا ايه النظام؟ طب حتى زغرت انت ياجمال
وام يوسف زغرتت وهنا شيماء فاقت وقامتمره وحده وجريت ودخلت الاوضه وخبطت الباب وراها
جمال :هى مالها زعلت ليه؟
يوسف :لا مزعلتش ولا حاجه،،
بس يعنى اكيد افتكرت بباها ومامتها الله يرحمهم،، اى وحده بتبقا نفسها يكونوا معاها فى اليوم ده وخصوصا انهم ملهمش فتره كبيره متوفيين،، وطبيعي لسه جرحها مفتوح
جمال: معاك حق يايوسف،، طب بعد اذنكم
ممكن ادخلها اكلمها كلمتين؟
يوسف :اه طبعا اتفضل
جمال خبط على باب الاوضه لكن شيماء
مردتش عليه،،
ففتح باب الاوضه بشويش،، وبص لقاها قاعده على حرف السرير وسرحانه
وعنيها ثابته فى مكان واحد
جمال:شيماء انا مقدر حزنك على اهلك
وعاوز اقولك انى هعوضك عن كل الحزن
اللى مريتى بيه،،
وهكونلك اب وام واخ وصديق وزوج وحبيب، وكل حاجه فى الدنيا،،
شيماء انا بحبك من زمان وكنت
مستنى لما اقدر احوش مهرك وشبكتك واجي اتقدملك،،
وكل يوم كان قلبى بيتعزب من الخوف
من فكرة ان ممكن حد يسبقنى وياخدك
منى،، والله كنت ساعتها مت ياشيماء ..شيماء،، شيماء ردي عليا قولي اي حاجه ارجوكي،، لكن شيماء مبتردش وجمال فى الاخر سابها وخرج.
ويوسف بصله :هاه؟
جمال :معلش سيبوها تهدى شويه،، استأذن انا وهنتكلم بعدين يايوسف
يوسف :هنتكلم تانى وتالت وعاشر اصل من هنا ورايح انا حماك
جمال :احسن حما فى الدنيا
يوسف :حبيبى
وخرج جمال وفكه قامت..
فكه :انا هاروح اشوف شيماء
يوسف :لا خليكى انا هدخلها وراحلها وخبط ودخل
وام يوسف بصت لفكه بعد ما يوسف مشي :فكريه،، اسمعينى يابنتى
ابنى يوسف هو كل حاجه ليا فى
الدنيا، هو دنيتى كلها وهو طيب وعلى نياتهودا عيبه،، استحلفك بالله يابنتى تخلى بالك منه،،
يوسف حبك يافكريه وهو اول مره
يحب اوعى تكسرى قلبه فيوم من الايام
فكريه قربت منها ومسكت ايدها باستها
ياخبر ياخالتى انا ازعل يوسف؟،، طب دا يوسف ده الهوا اللى بتنفسه،،
اوعدك طول منا عايشه يوسف هيبقى تاج فوق راسى وربنا يقدرنى واسعده وانتى كمان يأم الغالى هتكونى فعنيا الاتنين
ام يوسف قربت منها وباست جبينها
ربنا يبارك فيكى يابنتى ويسعدكم سوا
يارب
يوسف مع شيماء فى الاوضه :ايه ياشيمو
زعلانه ليه،، مش عاجبك العريس ولا إيه؟
بس لعلمك جمال ابن حلال وطيب اووى
وانا لايمكن اوافق على عريس لأختى
من غير متأكد انه احسن واحد فى الدنيا
شيماء بصتله بحزن وبصوت واطى همست :اختك ؟
يوسف :طبعا اختى وبنتى كمان ولا عندك
شك،، ولا متعرفيش غلاوتك عندى ولا إيه؟
شيماء بصت الناحيه التانيه وسكتت..
يوسف :بصى ياشيماء اديله فرصه حاولى
تحبيه صدقينى الحب ده حاجه حلوه اوى
شيماء بصتله بصه مليانه ألم
يوسف :عارف عارف انك زعلانه منى عشان محكتلكيش اول وحده على حبى لفكريه،،
لكن ده كان طلب من امى انى متكلمش
فى الموضوع ده غير لما انتى تتجوزى،،
واول ماجمال اتقدملك وطلبك منى قلت
خلاص فرصه نفرح كلنا مره وحده
شيماء برضو باصه بعيد ومش بترد ودموعها نازله،، وبتسمعه وحاسه انه ماسك قلبها بين ايديه وبيعصره بدون رحمه،،
وبعد وقت طويل فضل يوسف يكلمها فيه وهي متردش ومفيش غير دموعها بس نازله يوسف خرج من عندها وهو مش عارف مالها،، وطلب من فكه انها تدخلها
فكه دخلت لشيماء وقعدت جمبها ومسكت
ايدها :قوليلى بقا مالك؟
شيماء بصتلها بألم ومتكلمتش
فكه :ياحبيتى مالك بس وجعتى قلبى والله،،
طب جمال مش عاجبك نخلى يوسف يمشيه ويجيلك احسن منه؟
شيماء اول ما فكه نطقت اسم يوسف انفجرت فى العياط اوووى وحست إن
روحها بتتسحب منها وبعد شويه بصت
لفكه وسألتها :بتحبيه يافكه؟
فكه :بصى مش عارفه،، بس انا لما
بشوفه ببقى فعالم تانى، وسعيده وقلبى
يرفرف،، ولما بسيبه بحس روحى بتروح
منى،، ولما بيبتسم الدنيا بتنور،، ولما يكشر
بتبقا الدنيا زى خرم الابره ديقه قدامى،،
وديما على بالى، وصورته مش بتروح من
قدام عنيا،، بس ولا يوم اتخيلته جوزى،،
مكنتش اقدر،، كنت شايفاه كتير اووى عليا،، لكن ربنا ادهونى زى مايكون بيقولى
عشان انتى سبتى الحجات اللى مش بحبهاهديكى الحاجه الوحيده اللى بتحبيها وتتمنيها،،، الف حمد وشكر ليك يارب
شيماء بأسى : بصتلها بس دا مش حب يافكريه،،،
دا عشق وانا عارفاه كويس...
فكه مفهمتهاش بتتكلم عن ايه لكنها حضنتها وفضلت تطبطب عليها وشيماء منهاره فى البكا ويوسف دخل ليهم واصر ان شيماء لازم تخرج تتعشى معاهم والا محدش هيتعشى...
وقدام اسرار الكل خرجت شيماء وقعدت على السفره لكن مأكلتش،، والكل بيتكلم معاها وهى ولا سامعه
يوسف بزعيق :شيماء اتكلمى قولى مالك
فيكى ايه فهمينى؟
شيماء بزعيق :انتا عاوز ايه؟ كلكم عاوزين
ايه؟ عاوزنى اوافق على العريس خلاص
انا موافقه وهتجوزه ارتحتوا
وقامت دخلت الاوضه جري وفكه هتقوم تدخل وراها لكن ام يوسف قالت انها هى هتدخل تكلمها المرادي،،
ام يوسف دخلت لشيماء اللى لقتها بتعيط،،
حضنتها وطبطبت عليها وهمستلها :
شيماء انا عارفه انتى عامله كده ليه وايه
مزعلك،، خطوبة يوسف لفكريه مش كده؟
شيماء بصتلها..
ام يوسف :عارفه انك بتحبيه وانه حب
عمرك كمان،،
وصدقينى انا حاولت معاه كتير لكن يوسف شايفك اخت ليه مش اكتر،،
انا كنت اقدر اغصب عليه واخليه يتجوزك
لكن صدقينى ساعتها كنتوا هتتعبوا انتوا
الاتنين،،
انا بكلمك دلوقتى بصفتى امك اللى ربتك وبتخاف عليكى اكتر من اى حد فى الدنيا،، واكتر من يوسف كمان،،
عشان يوسف راجل وقوى ويتحمل،،
لكن انتى قلبك ميتحملش،، ونصيحه منى
خدى اللى يحبك متاخديش اللى بتحبيه
شيماء بتبكى بحرقه ودموعها مش بتوقف
وكانت عاوزه تصرخ فى ام يوسف وتقولها
لا انا مش عاوزه غيره،، انا مش شايفه غيره،، انا عاوزاه هو وبس من الدنيا دى،،
انا عشت طول عمرى بتمنى اللحظه اللى تجمعنى بيه،، انا من غيره حياتى ملهاش معنى،،
ااااااااه نار جوا قلبى..
لكن شيماء سكتت ومقالتش ولا حاجه من كل دا،، سكتت لانها من الاول غلطت لما رفضت تحكى عن حبها ليوسف قدام فكريه،
يمكن ساعتها ماكنتش قربت منه ولا حبته
وسألت نفسها ياترى هى غلطت لما جابت
فكريه بيتها ودخلتها حياتها وسمحتلها
تاخد منها حب عمرها؟!!!
ياترى هيحصل ايه وياترى شيماء هتستسلم
ولا هتدافع عن حبها هنعرف الحلقه الجايه
بقلم /ريناد
