 |
عشق الزين
الجزء السابع والعشرون..
مراد : انتى استنى .... يابنتى استنى
سارة : عاوز ايه منى ؟
مراد: مش جدعنه ابدا انك تسيبى بنت خالتك وتمشى
سارة : انا مش جدعه ..وصلها انت .. سلام
مراد بعصبيه : يوووووة ما قولنا مش فاضى ... يالا يا شاطرة وصليها
سارة : لا مش هاوصلها وفكك منى
مراد : سارة استنى بس اقولك حاجة
سارة : متنطقش اسمى ...عاوز ايه؟
مراد : لو سمحتى متلبيسش اللون الاحمر علشان بيعصبنى ...
سارة : وانت مالك ؟ ...
مراد قاطعها : اه وخدى الكشاف دا
مراد ضربها على وشها وتحديدا على قورتها ومشى بسرعه يضحك.
سارة فاقت من الصدمه : اه يا حيووووووان
مراد مشى وساب سارة فى صدمتها وماهيتاب اللى فاكرة انه هايوصلها
سارة : ايه ياست الحسن والجمال ... الباشا خلع
ماهيتاب : مش مشكله ... بس قد ايه زوق وعسل وجنتل مان وامور اوى
سارة : امور وجنتل مان دا حيووووان ... يالا ياختى علشان اوصلك
*******************
على التليفون بين مراد وزين
زين : ياعنى انت كويس ..... فيك حاجة ..
مراد : والله كويس او كنت كويس لغايه ماشوفتها عكرتلى دمى
زين : مين دى
مراد : بعدين.... انا ااتصلت بعلى وقولتله ان عملت حادثه بسيطه وانت مسافر واجلنا الاجتماع وهانبقا نبلغه المعاد امتى
زين : كويس وانا قربت اوصل ... اجيلك
مراد : ما قولتلك كويس يا زين
زين : انا غلطان .. سلام
***********************
فى الشرقيه
ايمان : ازاى تسمحيله يعمل كدا مين دا .. انا اول مرة اشوفه .... مين دا علشان يتحكم فيا
توحيدة : اخرسى ومتعليش صوتك عليا .... ودا قريبى قولتلك .... دا حبيب ابوكى .. ابوكى كان بيحبه اوى ... وبعدين عاوزة ايه عبد الرحمن يقول مالكيش رجاله
ايمان : اسفه يا ماما... يا ماما علشان خاطرى كلميه اقنعيه تانى والله عبد الرحمن كويس وغير اهله
توحيدة اتنهدت : ماشى .. بس بردوا عاوزة اقولك عبد الرحمن لو بيحبك هايعافر لغايه ما يوصلك ... سيبى ربنا يسرلك امورك يابنتى .... واللى فيه الخير يقدمه ربنا
ايمان : يارب يسرلى امورى
*****************
فى بيت الجارحى
زين: مساء الخير
ليليان : زين ... انت جيت
ليليان قامت تجرى عليه حضنته فرحتها بيه متتوصفش انه رجع بالسلامه كانت خايفه عليه ليقابل اعمامها
زين ما صدق حضنته ... قد ايه هو كان محتاج حضنها بعد يوم طويل زى دا
ليليان : انت كويس ... تعبان
زين : اه كويس ... الحمد لله
ليليان : عملتوا ايه .. شوفت عبد الرحمن
زين : اه شوفته ... فيه شبه كبير منك
ليليان : اه فعلا شبه بعض عمى شاكر شبه بابا جدا وانا شبه بابا .. فانا وعبد الرحمن شبه بعض.
زين : اممممممممم
ليليان: ها كتبتوا الكتاب ..
زين : لا ... انا رفضته.
ليليان بعدت عن حضنه : ليه يا زين .
زين شدها تانى لحضنه : متبعديش عن حضنى .... وليه متوجعيش دماغك الحلوة دى انا عاوزك تذاكرى وبس
ليليان : زين متكسرش قلبهم. .. انت ترضى حد يكسر قلبك
زين : مفيش حد يقدر يكسره غيرك انتى .... انتى ترضى تكسرى قلبى ؟
ليليان : عمرى ما اقدر اعمل كدا
زين : خلاص متحطنيش فى مقارنه مع حد ... وبعدين انا فعلا تعبان وجعان نوم وعندى بكرا يوم طويل فى الشركه ممكن ننام بقا
ليليان : اممممم ماشى انا سمحتلك تنام علشان انت بس تعبان .... واهرب منى براحتك
**************
فى الجامعه
ليليان : هههههه هههههههههه بجد مش قادرة .... الله يا سارة نفسى احضركوا مرة هاموت على نفسى من الضحك
سارة : انتى بتضحكى وانا مش عارفه انام من الغيظ .. دا ادانى واحد كشاف يا ليليان
ليليان : ههههههههههههههه والله ما قادرة
سارة : اضحكى...... دا انا بطلب من ربنا يجمعنى بيه كمان مرة بس وانا انتقم منه
ليليان : ههههههه يارب ياستى تشوفيه بس هاتعملى فى ايه ايه سارة
سارة : هاخنقه هاموته البجح كان بيشقط بنت خالتى قدامى
ليليان : والله انه لذيذ.
سارة : لذيذ.... تمام استنى اسجلك وابعتها لزين
ليليان : لا زين ايه بس ... من حق كنت عاوزة اروحله الشركه
سارة : ليه ؟!.
ليليان : حوار كدا هاحكيلك بعدين... طيب اقولك تعالى معايا اتفرجى على الشركه مش انتى نفسك تروحيها واحكيلك واحنا ماشيين
سارة : اشطا يالا
*****************
ليليان وسارة تحت مبنى الشركه
سارة : بقولك اطلعى انتى لغايه ما اروح اجبلى حاجة اشربها
ليليان : طيب متتاخريش
ليليان طلعت ووصلت مكتب زين والمرادى دخلت ومستنتش سهيله تتدخل تستأذن ودا غاظ سهيله جدا
ليليان : زين
زين : ليليان ...تعالى.. شايفك بقيتى تيجى الشركه اكتر ماكنتى بتشتغلى فيها
ليليان بقمصه : ماجيش ياعنى ايه المقابله الوحشه دى
زين : هههههه والله ..
ليليان راحت وقعدت على المكتب قدامه : لا انا زعلانه صالحنى
زين :طيب وطى كدا وانا اصالحك .
ليليان ضحكت ووطت وهو باسها من خدها : متزعليش يا لى لى
ليليان : عفونا عنك ..... انا كنت جايه اتكلم معاك فى موضوع
زين شدها وقعدها على رجله : اتكلمى براحتك بقا انا كدا اعرف اركز كويس فى كلامك
***************
سارة : يا ماما انا فى مشوار مش هاعرف اجاى وبعدين انا عملت اللى عليا امبارح وجبتها من المستشفى
: لازم تيجى يا سارة حتى لو شويه
سارة : طيب هاشوف كدا واكلمك ... ماما اقفلى بس بسرعه
سارة شافت مراد بيركن عربيته وداخل الشركه .. استخبت بسرعه وحلفت لتنتقم منه
سارة : ههههه وقعت تحت ايدى
****************
سهيله : حضرتك مينفعش تدخل من غير معاد
: انا لازم ادخل ودلوقتى ..... اوعى كدا من سكتى
زين كان قاعد على كرسى و ليليان قاعدة على رجله وبتحاول تقنعه بموضوع عبد الرحمن وايمان وهو مستمتع جدا بيها وتقريبا مش مركز مع كلامها وفجأه الباب اتفتح ودخل منه حد
: ايه ليليان
ليليان : عبد الرحمن
الجزء التامن والعشرون هنا 👇
بداية الروايه من هنا 👇👇👇
