شمس تتحدى الغيوم الفصل الأول

 السلام عليكم ورحمة الله وبركاته 

اليوم نبدأ قصة جديدة بأسم ( شمس تتحدى الغيوم ) ارجو تنال اعجابكم .

شمس تتحدى الغيوم الفصل الأول 

قبل ما أبدأ الفصل اتمنى من قلبي ان الروايه تعجبكم واقدر ادخل السرور على قلوبكم

ودلوقتي جاء معادنا مع اول فصل فى الروايه ونقول

 بسم الله الرحمن الرحيم           

نحن الآن في مدينه من أجمل مدن مصر الحبيبة عروس البحر المتوسط مدينة الإسكندرية

تحديدا في احدى ليالي الشتاء البارده حيث هطول الأمطار بشده لتتلاقى مع مياه البحر فى جوف الظلام فيختلط غيث السماء بهذه المياه ويصبحان مزيجا لا ينفصلان فتندفع الأمواج بشدة وتضرب بعضها بعضا

تنغلق الأبواب والبيوت على اصحابها تخفى ما بها من اسرار يجتمع كل حبيب بحبيبه وكل ام باطفالها يود كل محب ان يضع احباءه فى قلبه ليحميهم من برودة الشتاء ويمنحهم من حرارة قلبه ما يشعرهم بالدفء والأمان

تفتح الباب وهى ترتجف من شدة البرد تلتصق ملابسها عليها بشده من كثرة ماتشربته من أمطار السماء لتجد خالتها الحبيبه سناء بانتظارها 

سناء:شمس اخيرا جيتى حمد الله على السلامة يا بنتى  قلقتيني عليكي أوي اتاخرتي كده ليه بس وتليفونك مقفول كمان

شمس وهي ترتجف من شدة البرد وترتعش شفاهها بشده:ادخل اغير بس ياخالتو حاسه اني ها أموت من البرد وبعدين نتكلم براحتنا

سناء:يا حبيبتى ده انتي مية ادخلي ادخلي بسرعه قبل ما تبردي وانتي مناعتك ضعيفه وانا ها أروح احضر لكي الاكل حالا

تدخل شمس غرفتها وتقوم باستبدال ملابسها وتأخذ حماما دافئا لتزيل ما تشعر به من بروده وتخرج لتتناول وجبة العشاء الساخنه التي احضرتها لها خالتها

شمس :الله ريحة الأكل حلوة اوي ربنا يخليكي ليا يارب يا سوسو

سناء:ويخليكي ليا يا شموسه 

هاه قوليلي بقى ايه اللي رجعك متأخر كده وتليفونك مقفول ليه حرام عليكي يا شمس ده انا كنت ها اتشل وكل شويه اروح انظر من الشباك ومش عارفه اعمل ايه ولا اتصرف ازاي واتصلت على إيمان هي كمان ما ردت الكلبه

شمس بضحك وهي تضع في فمها الطعام: حبيبتي يا سوسو الف بعد الشر عنك ياحبيبتي ما أنحرم منك يارب  اهدي كده يا سوسو وصلي على النبي وبعدين نفسي افهم يعني لما تروحي تقفي في الشباك انا كده ها أجي .

سناء :عليه أفضل الصلاة والسلام أعمل أيه ما هو ده اللي في ايدي والشيطان عمال يودي ويجيب بيا وأقول يا ترى يا هل ترى ايه اللي حصل.

شمس:هو انا صغيره يا خالتو ده انا عندي ثمانيه وعشرون سنه  وها يحصل أيه بس يا سوسو هو حد غاوي يجيب لنفسه المصايب

 سناء:ولاد الحرام ما تركوا ل ولاد الحلال حاجه وربنا يسترها معاكي يا بنت اختي يارب اتكلمي بقى يا بنت وقوليلي أيه اخرك كل ده

شمس:كان عندي شغل كتير اوي والله يا خالتو وما كان ينفع يستنى لبكرة وكمان يا سوسو ياحبيبتي الباشمهندس يزيد ب يعطينى اوفر تايم لما أتأخر وانتي عارفه بقى احنا اليومين دول محتاجين كل مليم عشان اقدر أكمل الحاجات اللي ناقصاني 

سناء:طب وعصام كان معاكي ياشمس

شمس:لاء ياخالتو عصام  خلص شغله ومشي

سناء:ازاى يعني يخلص شغله ويمشي ويتركك في الشركه لوحدك ده ينفع برضه

شمس :يا خالتو ياحبيبتي عصام صحيح معايا في نفس القسم بس انا شغلي غير شغله وهو ما له ذنب يفضل على الفاضي ده غير انك ناسيه انه احيانا بيقف مع والده في المحل عشان يعرف يكمل الشقه ونخلص بقية الحاجات اللي ورانا حقك عليا يا حبيبتي انا اسفه والله ما كان قصدي أقلقك عليا يا خالتو

سناء:آه يا اختى كلي بعقلي حلاوة طب ما طمنتيني ليه بالتليفون

شمس :والله العظيم فصل شحن وما اخدت بالي غير بعد فترة وسألت اللي كانوا موجودين على شاحن ما حدا معاه خلاص بقى ياسوسو قلبك ابيض

سناء:طيب يا حبيبتي ربنا يطمني عليكي يارب نفسي اوي اطمن عليكي واشوفك في بيت زوجك وقلبي يرتاح من ناحيتك

شمس:انتي عاوزة تخلصي مني والا ايه ياقلبي

سناء :اخس عليكي يا شمس ده انتي نور عينيه ولو عليا مش عاوزاكي تفارقيني ابدا  والله انا ما عارفه ها أعمل ايه لما تتزوجي والاقي نفسي لوحدي بس برضه نفسي أطمن عليكي في بيت زوجك وأحس أن قلبي ارتاح وصنت الأمانه اللي اختي تركتها لي .

شمس :حبيبتي يا خالتو ما أنحرم منك يارب وربنا يخليكي ليا يا ست الكل هو انا ليا مين غيرك يا حبيبتي من وقت وفاة ماما الله يرحمها وبعد ما بابا راح اتزوج وخلف وانا ولا في دماغه ولا كأنى بنته ده نسانى خالص ياخالتو .

سناء :لا يا شمس لا تقولي كده على  ابوكي ده طول عمره غلبان والله وكان بيحب أمك الله يرحمها اوي  كله من الحربايه اللي تزوجها دي هي السبب في بعدكم عن بعض

شمس:طب انا استفدت ايه من طيبته دي ده زي الخاتم في صوباعها تعرفي يا خالتو لما ب أروح عشان ازوره واشوف اخواتي ب أحس في وسطهم اني غريبه عنهم بيعاملوني كأني ضيفه ها أجلس لي ساعه وامشي ولو حاولت افتح معاهم سيرة اي موضوع يفضلوا ينظروا لبعض وما يردوا ولو ردوا تبقى اجابات مختصره  بقيت ب أكره اروح لهم وما عاوزه اشوف حد فيهم  بس ب أقول عشان صلة الرحم وعشان ربنا .

سناء:معلش يا حبيبتي لا تزعلي نفسك وخلاص ياستي هانت خلاص وها تبقى في بيت زوجك ويبقى عندك حياتك وربنا يتمم على خير يارب واشوف أولادك يا شمس يا بنت نجوى يارب

شمس :يارب ياخالتو يارب

سناء:ب تحبيه اوي كده يا شموسه

شمس:ب احبه كلمة ب أحبه دي قليله اوي على احساسي بيه انا عمر قلبي ما دق لحد غيره من اول لحظه شفته فيها وعينى جاءت في عينه وانا حبيته وأسعد يوم في حياتي لما جاء وخطبني وب أحلم باليوم اللي ها أكون فيه زوجته بس

سناء:بس ايه يا شمس مالك في حاجه يا حبيبتي .

شمس :مش عارفه والله يا خالتو بس عصام بقاله كام يوم كده متغير ودائما سرحان وأحيانا كتير أكون ب أكلمه ألاقيه مش معايا خالص مش عارفه ماله

سناء:يمكن في حاجه مضايقاه والا حاجه هو فاضل له كتير في الشقه

شمس :لا يا خالتو خلاص الحمد لله هو تقريبا خلصها خلاص

سناء :معلش حبيبتي هما العرسان كده قبل الفرح ب يبقوا متوترين وقلقانين فتح البيوت مش بالساهل ياشمس .

شمس :يمكن يا خالتو ربنا يطمن قلبك زي ما ب تطمنيني

 طيب يا حبيبتي انا ها أقوم أغسل الأطباق عشان أدخل أنام

سناء:لا يا حبيبتي ادخلي انتي نامي وادفي وانا ها أقوم أغسلهم. 

شمس:ربنا يخليكي ليا مش عارفه من غيرك كنت عملت ايه

سناء:ربنا يخليكي ليا انتي ياحبيبتي ده انتي والله اللي منورة حياتي كلها خصوصا بعد

ثم تبدا في البكاء ..

ف تحتضنها شمس بكل حب:تاني برضه يا خالتو تاني يا حبيبتي مش كنتي نسيتي خلاص .

سناء:نسيت انا عمري ما نسيت ولا ها أنسى يا شمس أنسى ايه انسى حياتي وعمري اللي راحوا هدر

انسى ان الراجل اللي حبيته وتزوجته وأعطيته كل حاجه راح اتزوج و تركني ورماني وطلقني .

شمس:مش انتي يا خالتو اللي سمحتي له يتزوج .

سناء:ويبقى ده جزائي يا شمس يعني انا ما هان عليا أشوفه نفسه في طفل وأنا مش قادرة اجيبه له وقولتله يتزوج بس عمري ما تخيلت انه أول ما ها يخلف ها يتركنى ويطلقني بالسهوله دي .

شمس وهي تمسح لها دموعها:والله هو الخسران يا حبيبتي هو في حد يفرط في حد بيحبه غير لو كان ماله في الطيب نصيب

سناء :شمس انا عاوزاكي تبقي قويه واوعى تخلي مشاعرك وعواطفك تسيطر عليكي ابدا تضعي حبك في كفه وكرامتك وشخصيتك في الكفه التانيه انتي فاهمه

انا مش ب أسيكي والله يابنتي بس عاوزاكي تتعلمي من تجارب اللي حواليكي واللي اتعود يأخذ لا يعطي أبدا .

وعلى أد ما تحبي وتعطي لازم تلاقي المقابل وتأخذي احنا مش ملائكه احنا بني أدمين واوعي تعملي ظهرك قنطرة لكل من هب ودب. 

شمس :فاهماكي  يا خالتو بس عشان خاطري مش عاوزاكي تزعلي نفسك عشان لا تتعبي انا ما لي غيرك في الدنيا .

سناء:حاضر يا حبيبتي يلا بقى قومي نامي عشان تعرفي تصحي الصبح بدل ماتغلبيني زي كل يوم .

شمس وهي تقبلها من رأسها:تصبحي على خير يا ست الكل

سناء :وانتي من أهل الخير يا شمس يا حبيبتى

وتحدث نفسها:والله انا ما خايفه عليكي غير من طيبة قلبك وانك دائما جاية على نفسك عشان تسعدي غيرك

ربنا يطمني عليكي يارب...

" يأتى الصباح "

 وقد غسل المطر شوارع الاسكندريه وجعلها تلمع وتضيئ لتحمل معها التفاؤل لبدء يوم جديد

" فى داخل احدى شركات المقاولات "

شمس:ها نروح نشوف الموبيليا امتى يا عصام.  عصام. عصام

عصام:ايه انتي ب تكلميني يا شمس

شمس :ب أكلمك ايوة طبعا بقالى ساعه ب أكلمك رحت فين بقى اللي واخد عقلك ياسيدي

عصام :لا أبدا مفيش سرحت بس شويه

شمس:سرحت في ايه في حاجه حصلت انا حساك بقالك كام يوم مش مظبوط كده ومتغير مالك يا حبيبي في حاجه مضايقاك أو حصلت حاجه في البيت .

عصام :لا أبدا يا شمس مفيش حاجه لا تشغلي بالك انتي

شمس :ما أشغل بالي وهو انا لو ما شغلت بالي بيك ها اشغل بالي بمين بس هو انا عندي اغلى منك يا عصام .

عصام :طب قوليلي كنتي بتقولي ايه

شمس :كنت بقولك عاوزين

وفجأة تفتح إيمان صديقتها الباب الزجاجي

إيمان :صباح الخير يا جماعه

شمس وعصام :صباح النور يا إيمان

إيمان : شمس الباشمهندس يزيد عاوزك حالا في مكتبه

شمس:حاضر انا رايحه له حالا

تخرج شمس سريعا بينما تنظر إيمان لعصام نظرة لها مغزى معين

عصام :في ايه يا إيمان عاوزه حاجه

إيمان :عاوزه سلامتك يا عصام انت اللي في حاجه

عصام :بقولك ايه شكلك فايقة ورايقه على الصبح وانا عندي شغل كتير

إيمان :ماشي يا عصام على راحتك

تخرج إيمان وتتجه الى مكتبها بأحد أقسام الشركه وهى تكاد ان تنفجر من الغيظ

بينما تستأذن شمس في الدخول للباشمهندس يزيد

السكرتيرة:ادخلي يا شمس الباشمهندس يزيد منتظرك

" في داخل المكتب " 

يزيد:بجد يا شمس انا مش عارف اقولك ايه ولا اشكرك ازاي .

شمس :يا خبر ياباشمهندس حضرتك تؤمرني وانا ما عملت حاجه يعني

يزيد :نعم ما عملتي حاجه كل ده وما عملتي حاجه مش كفايه اننا كلنا كنا نايمين في بيوتنا والدنيا شتا وبرد وانتي سهرانه هنا تخلصي الشغل .

شمس :انا المهم عندي يكون الشغل والتصميمات عجبت حضرتك

يزيد :عحبتني دي تحفه يابنتي وانا امرت لكي بشهر مكافأة

شمس :ده كتير اوي يابشمهندس حضرتك مغرقني بجمايلك والله

يزيد :ده حقك يا شمس انتي متفوقه في شغلك ومميزة في مجالك وانتي مكسب لينا وللشركه كلها وانا فخور بيكي جدا وان شاء الله ها يكون لكي مستقبل كبير

شمس وهي في قمة سعادتها :انا بجد مش عارفه اقول لحضرتك ايه والله انا ليا الشرف اسمع من حضرتك الكلام ده

يزيد:عاوزك تقوليلي ها نفرح بيكم امتى ان شاء الله

بقالكم كتير مخطوبين مش كفايه كده بقى

شمس:خلاص هانت ان شاء الله

يزيد :ربنا يوفقكم ياشمس بس اوعي الزواج يخليكي تقصري في شغلك

شمس :استحاله ياباشمهندس الشغل حاجه والبيت حاجه

يزيد :وده املي فيكي ان شاء الله تقدري تتفضلي ..

تفتح شمس الباب لتجد امامها الباشمهندس علي (علي ابن عم يزيد وشريكه في الشركه ومتزوج اخته مروة

ويزيد كمان متزوج اخت علي التوأم عاليه)

علي:ازيك يا شمس عامله ايه

شمس :الحمد لله والله يا باشمهندس ربنا يخليك

علي:صباح الخير يا باشا

يزيد :صباح الفل يا علي طمني ايه الاخبار

علي:أخبار زي الفل ان شاءالله

يزيد:بجد يا علي مش معقول يعني ممكن المناقصه دي نأخذها

علي:عيب عليك يامعلم ده انا علي سليم المهدي و لازم أسهم الشركه نوصلها للسما

يزيد:ان شاء الله يا ابو أنس 

صحيح بالمناسبه لا تنسى يوم الخميس الجاي ان شاء الله انا مش جاي الشركه

علي:عارف

يزيد:وايه اللي عرفك اني مش جاي

علي:عيب عليك والله لما تسأل علي السؤال ده

تفتكر اني لو انا نسيت ان الخميس الجاي عيد ميلاد الأميرة عشق ممكن أنس ينسى حاجه زي دي .

يزيد:عارف ان أنس مش ممكن ينسى عيد ميلاد عشق

ويا ترى جاب لها هدية كل سنه والا لسه

علي :اهوه امبارح بالليل كان بيقول لمروة تنزل معاه عشان يشتروا لها الهديه ما أنت عارف بقى دي حبيبة القلب و روحه فيها

يزيد:لسه عيال ياعلي وبكرة يكبروا ومشاعرهم تتغير

علي:ما افتكر يا يزيد الواد طالع حبيب

يزيد:انت ها تقول لى طبعا طالع لأبوه

علي:ماله ابوه يا معلم

يزيد :مش فضلت قارفنا سنين عشان خاطر الست مروة

علي :لا من فضلك رمانه لما تيجي تتكلم عنها تتكلم عنها بأدب انت فاهم آه دي حبيبة القلب

يزيد:انت ها تقول لي طب يا فالح يلا اتفضل على مكتبك لا تعطلنا ورانا شغل كتير النهارده

علب:ايه الشغل اللي قدامك ده

يزيد:التصميمات اللي عملتها شمس

علي وهو يفتحها:بصراحه شمس دي فنانه هايله بجد والله انا مستخسرها في اللي اسمه عصام ده

يزيد:الحب بقى ها تقول ايه

علي:ماشي يا باشا يلا انا ها أروح اشوف شغلي  لو احتاجت حاجه كلمني سلام

" فى احد المولات بالإسكندرية "

في ايه يا عشق كل الفساتين دي مش عاجبك منهم ولا فستان انا تعبت خلاص

مروة:مالك ياعاليه بتصرخي في البنت كده ليه بس بالراحه عليها

عاليه:تعبت يامروه والله من كتر اللف وحاسه اني اتخنقت خلاص انا مش حمل اللف ده كله

مروة:طب تعالي نجلس نشرب حاجه وبعدين نكمل

وانتي يا عشق لا تتعبي ماما بقى انا مش  عارفه دماغك الناشفه دي بقى كل الموديلات دي ومش عاجبك حاجه يا مقروضه انتي

عشق:والله يا عمتو مروة انا ما لي دعوة أنس هو اللي كل شويه ينظر لي ويقول لي لاء، وحش لا تاخديه وأنا ب أخاف أزعله

مروة:وانت مالك يا انس باللي ها تلبسه عشق

أنس :يا سلام يعني انتي عاوزاني اخليها تلبس حاجه قصيرة وعريانه والعيال تفضل تعاكسها هو انا مش راجل ولا أيه .

مروة:راجل ايه يا بتاع انت يا أبو عشر سنين

بقولك ايه عشق صغيرة كل اللي  عندها سبع سنين يعني تلبس وتدلع براحتها

أنس :لاء مش ها تجيب حاجه غير اللي انا اختارها

عاليه:أنس يا حبيبي عشان خاطري انا ياحبيب عمتك  خليها تجيب اي حاجه عمتك تعبانه والا وربي ها أرجع البيت وها أخليها تلبس فستان السنه اللي فاتت

مروة :في ايه ياعالية انتي كمان انتي ها تعومي على عومه ولا ايه انت يازفت وربنا انا غلطانه اني جبتك معايا اصلا يا ريتنى كنت سيبتك في البيت مع عهد عمتك واختك مليكه .

عاليه:آه صحيح هي عهد ما جاءت معاكم ليه دي بتموت في الشوبنج وقلت اكيد ها تيجي معاكم 

مروة:رجعت من النادي تعبانه وما لها مزاج وقالتلي عاوزه أنام .

عاليه :وحشاني اوي بقالها فترة ما جاءت لي

مروة:ما أنتي عارفه بقى من الكليه للجيم للمذاكرة لا تزعلي منها حبيبتي

عاليه:انا أزعل من عهد استحاله طبعا دي مش  اختي الصغيرة دي بنتي يا مروة بس ب توحشني اوي

مروة:خلاص انا ها أقولها تعدي عليكي بكرة وهي راجعه من الجامعه

المهم قوليلي بقى انتي شكلك تعبان يا عاليه مالك ياحبيبتي فيكي حاجه

عاليه:لا يامروة لا تشغلي بالك انا كويسه الحمد لله

مروة:عاليه اوعي تكوني تعبانه ومخبية عليا

عاليه:لا والله انا الحمد لله كويسه بس مش عارفه ليه حاسه باجهاد كأنى مشيت مائة كيلو

مروة:طب قوليلي بصراحه هو اخويا مزعلك في حاجه

عاليه:يزيد وهو في حد في طيبة يزيد يا مروة ربنا يخليه ليا يارب

مروة:ربنا يخليكم لبعض ويخلي لكم عشق يارب

عاليه :يارب يا مروة ده هي دي اللي طلعت بيها من الدنيا

ب أقولك ايه يلا نقوم بقى عشان نخلص عاوزه اروح .

مروة:طب يلا بينا وانت يا ابنى أمامي اقسم بالله لو فتحت فمك بكلمه ل ها أرنك علقه وها أحلف ما أنت حاضر عيد الميلاد وانت عارفني مجنونه ما ناقص غير العيال كمان اللي يمشوا كلامهم علينا

عشق بضحك:  شوفت يا أنس عمتو بتقول على نفسها مجنونه

أنس :ايوة يا بنتى ما هي كل شويه في البيت تفضل تقول كده انا زهقت منها أصلا انا منتظر اكبر بس وانا ها أخدك ونعيش لوحدنا بقى

مروة:سامعاك يا مقصوف الرقبه انت بتقول ايه يا تحفه انت

أنس :ماما من فضلك تحترمينى أمام خطيبتى

عاليه ومروة: ضحكوا .....

" في داخل الشركه " 

شمس:ب أقولك ايه يامونتي وراكي حاجه النهارده بعد الشغل

إيمان :ها يكون ورايا إيه يعني انتي عاوزه حاجه يا شموستي

شمس:آه أصل الباشمهندس يزيد صرف لي شهر مكافأة ولقيت استاذ عبد المحسن مدير الحسابات بيتصل عليا عشان اروح أخذ المكافأة

فانا عاوزه اروح اشتري شوية حاجات ناقصين ثم تهمس لها في اذنها:وعاوزه اشتري شوية حاجات ل عصام .

 إيمان :يا سيدي يا سيدى على الحب اوعدنا يارب ربنا يديكي على اد ضميرك ونيتك الطيبه يارب يا شمس واشوفك سعيده ومتهنيه يا حبيبة قلبي يارب

على العموم انا لو مش فاضيه افضيلك نفسي يا قلبي عينيه ليكي ياشموستي

شمس:تسلملي عيونك يا إيمان يارب عقبال ما أفرح بيكي يا حبيبتي انتي كمان يارب

إيمان :ان شاء الله ياشموستي ها يكون قريب بأمر الله وقريب أوى كمان

شمس:يا بنت الايه وتخبي عليا ولا تقوليلي

إيمان :ما أنتى اللي طول الوقت مشغوله وبتروحي تنامي زي القتيله ويوم الاجازة بنقضيه مع حبيب القلب مش لاقيه وقت اتكلم معاكي خالص ولا عارفه اتلم عليكي

شمس :خلاص يبقى بعد ما نشتري الحاجه ها أعزمك على الغدا ونتكلم براحتنا

إيمان :وانا موافقه طبعا يلا بقى ها أروح اشوف شغلي وقت الراحه خلص

شمس:تمام نتقابل عند الامضا ان شاء الله

تخرج ايمان وهي تلقى نظرة أخرى على عصام

عصام:هي مالها دي

شمس :مالك ياحبيبي في حاجه

عصام :لا أعرف مالها دي كمان بيا رايحه جايه من الصبح تنظر لي مش عارف في ايه

شمس :وهي إيمان ها تنظر لك ليه يا عصام هو فى حاجه حصلت انا لا أعرفها .

عصام :اساليها هي وانا مالي

شمس :ماشي يا عصام انا لما اخرج معاها النهارده ها أسألها بس انا متأكده ان مفيش حاجه انت اللي مش عارفه مالك في ايه

عصام :ايه مجنون انا يعني

شمس :انا لا اقصد طبعا يا عصام بس حالك مش عاجبني بقالك فترة حاساك مضايق ومتوتر ودائما حتسه ان في كلام على لسانك عاوز تقوله ومش قادر

سرحان اكلمك الاقيك مش معايا وكل ما أسألك تقول لي مفيش .

ثم تقوم وتجلس على الكرسي المقابل له :عصام مش انا شمس خطيبتك وحبيبتك احكي لي يا عصام قول لى ايه مضايقك ارمي حمولك عليا .

عصام:شمس انا

تفتح الباب وتدخل احدى الزميلات الجدد في المكتب

مياده:ايه انا دخلت في وقت غير مناسب ولا ايه

شمس:ليه يا مياده بتقولى كده هو انتي شوفتينا في وضع مش كويس ولا ايه

مياده:لاء طبعا اكيد لا اقصد بس يعني شايفاكم ب تتكلموا بصوت واطي

شمس:المرة الجايه ها نبقى نمسك ميكرفون ونتكلم فيه

واحد وخطيبته ب يتكلموا مع بعض اكيد ها يتكلموا بصوت واطى ولا انتي عندك اعتراض

مياده:خلاص في ايه انا ما قولت حاجه ل ده كله انا عاوزه اشتغل وبس

ثم تجلس على مكتبها بينما تبدأ شمس في استكمال عملها

وهي تشعر بالغيظ من تلك الفتاه التي استلمت عملها في المكتب الذى يجمعها بخطيبها منذ عدة اشهر قليله

" فى داخل مكتب على "

علي:كل ده ولسه ما خلصتوا يا مروة ليه يعني هو كان فستان فرح

مروة:خلاص الحمد لله خلصنا اهوه ومروحين حالا

بس اسمع يا علي عاليه حاساها تعبانه شويه ها أروح معاها وانت تعدى تاخدنا تمام

علي بخضه على اخته التوأم :عاليه تعبانه مالها يا مروة عاليه فيها حاجه اجي لكم

مروة:حبيبي لا تقلق مفيش حاجه والله بس انت عارف هي بتتعب من أقل مجهود والزفت ابنك هد حيلنا لحد ما وافق على فستان نشتريه لعشق

على بضحك: اقسم بالله الواد ده مجنون مش عارف طالع لمين

مروة:بقى بزمتك مش عارف طالع لمين

طب يلا سلام دلوقتى عشان ها اسوق تعالى بقى مع يزيد عشان تاخدنا يلا سلام

تقود السيارة وبجانبها عاليه ابنة عمها واخت زوجها علي

وبالخلف يجلس العاشقان الصغيران أنس وعشق.

أنس :عجبك الفستان اللي اختارته. لكي يا عشق

عشق وهي تضحك:ايوة عجبني اوي ياانس بيلف بية جامد

عشان اعرف ارقص بيه

أنس :وانا ها أرقص معاكى 

عشق : ب تضحك

مروة:ها أتشل ياناس العيال دول ها يشلوني

عاليه:ياستي اتركيهم انتي زعلانه ليه

مروة:يالهوي عليكي انتي كمان بس هو انتي ها تجيبيه من برة ما انتي اخت علي النحنوح

عاليه:طب سوقي سوقي خلينا نروح كفايه الهده دي عليا النهارده

يتبع. ..........

انتهى الفصل الأول يارب يكون عجبكم طبعا الاحداث لسه فى البدايه لكن بعد كده ها تكون الاحداث مشوقه ان شاء الله

لا تنسوا بقى اراءكم وتعليقاتكم الجميله

واشوفكم الفصل الجاى ان شاء الله