رواية رشيد وكارمن الحلقه الاولى بقلم الكاتبه ملك ابراهيم حصريه وجديده

 رواية رشيد وكارمن الحلقه الاولى بقلم الكاتبه ملك ابراهيم حصريه وجديده 

رواية رشيد وكارمن الحلقه الاولى بقلم الكاتبه ملك ابراهيم حصريه وجديده 

"اتقابلوا بعد أربع سنين فراق.. عينيه اللي كان فيها عشق زمان، بقت كلها قسوة دلوقتي..

وعينيها اللي كانت كلها أمان، بقت كلها دموع ووجع" 

كانت بتتحرك بخفة وهي شايلة المشروبات الساقعة وبتوزعها باحترافية على الناس اللي موجودين في الحفلة اللي جاية تشتغل فيها كنادلة، وبتتبسم بسخرية وهي بتتابع اللي بيعملوه أصحاب الطبقة المخملية اللي كانت بتنتمي ليها من فترة بعيدة.

قربت منها صاحبتها "مودة" اللي ساكنة معاها في نفس الحي، ابتسمت مودة وقالت بانبهار: "كارمن انتي شايفه اللي انا شيفاه ده! هو في ناس عايشين كده فعلاً ولا احنا اللي مش عايشين!"

ابتسمت بسخرية وبصت بسرعة حواليها وردت: "متخليش المظاهر دي تخدعك يا مودة.."

اتبدلت نظراتها للغضب وكملت: "الناس اللي زي دول معندهمش قلب زينا."

بصت ليها مودة بدهشة وقالت بفضول: "انا نفسي اعرف انتي بتفكري ازاي!!"

اتنهدت كارمن بحزن، محدش يعرف هي شايلة في قلبها ايه من ظلم وقهر من أصحاب الطبقة دي. بصت لصاحبتها وردت عليها باستعجال وهي راجعة تكمل شغلها: "انا هروح اكمل شغل بدل ما مستر "رؤوف" يشوفنا ويسمعنا كلمتين ملهمش لازمة."

هزت مودة راسها بالموافقة وراحت هي كمان تكمل شغلها.

رواية رشيد وكارمن بقلمي ملك إبراهيم. 

دخل الحفلة مع صاحبه، كان متردد ومش عايز يحضر، ومبيحبش يحضر حفلات زي دي، وقف جنب صاحبه وبص حواليه بملل وقال: "انا غلطان ان انا سمعت كلامك وجيت."

كان صاحبه بيبص حواليه بحماس وبيتابع تحركات البنات وبيتأملهم بإعجاب شديد، وقال : "غلطان ايه بس انت مش شايف الحلويات اللي حواليك دي!"

بصله بغضب وقاله بملل: "عادل.. انت عارف ان انا مليش في جو الحفلات ده."

بص بسرعة حواليه بملل وكمل: "انا همشي"

استغرب صاحبه من استعجاله ومسك ايديه عشان يمنعه يمشي وأكد: "خلاص يا "رشيد" اهدى وخلينا نقعد كمان شويه وهنمشي على طول صدقني."

اتنفس بغضب وبص قدامه بنفاذ صبر، شاور صاحبه للنادلة عشان تجيب ليهم مشروب ساقع يشربوا حاجة قبل ما يمشوا.

وقف رشيد متضايق وبيتأفف بغضب، قربت منهم بنت شقرا وجميلة، لابسة فستان أزرق قصير، وقفت جنبه وسندت بايديها فوق كتفه وقالت بدلع: "رشيد.. اخيرا جيت!"

اتنفس بغضب وبص لصاحبه بلوم وتوعد، ابتسم صاحبه وقال للبنت بمرح: "اتفضلي استلمي يا "مايا" انا كده عملت اللي عليا."

ابتسمت البنت برقة وهي بتبص لرشيد بإعجاب شديد، وبعدين قالت بدلع: "شكراً يا عادل.. انا عارفه انه مستحيل كان هيجي لو عرف ان انا صاحبة الحفلة."

اتنفس رشيد بنفاذ صبر، عارف ان مايا بتلاحقه في كل حتة وبتحاول تقرب منه بكل الطرق، حاول على قد ما يقدر انه يتكلم معاها بهدوء مصطنع عشان ميحرجهاش: "انتي عارفه ان انا مليش في جو الحفلات ده يا مايا."

ابتسمت بسعادة بعد ما حست انه مش عايز يزعلها، قربت منه أكتر وبدأت تلعب في زراير قميصه وقالت له بدلع: "انت من وقت ما رجعت من السفر وانت قافل على نفسك يا رشيد! نفسي اعرف ايه اللي غيرك كده؟"

ابتسم مجاملة ليها ووطى وشه بيفكر ازاي يمشي من المكان ده قبل ما صبره يخلص أكتر، قربت منهم كارمن وهي شايلة المشروبات الساقعة، حطت الكاسات قدامهم وقالت باحترام: "اتفضلوا"

صوتها مكنش غريب على ودانه، رفع عينيه بسرعة بيبص لصاحبة الصوت.

شهقت كارمن بصدمة ووقعت الكاسات من ايديها لما شافته واقف قدامها، مش مصدقة اللي شايفاه عينيها! حاولت تستوعب انها شافته وهمست بصدمة: "رشيد!!"

وقف بيتأملها بصدمة، جسمه اتجمد كله لما شافها في الحفلة دي! حدق في اللبس الموحد اللي لابساه بذهول، مش مصدق انها بتشتغل نادلة وبتخدم في الحفلات.

تابعت مايا صدمتهم الواضحة بفضول، بصت ليهم باستغراب وقالت بفضول: "انتوا تعرفوا بعض ولا ايه؟!"

فاقت كارمن على صوتها وكأنها فقدت الوعي بعد ما شافته، حست بتوتر شديد وبصت حواليها بارتباك مش عارفة ترد تقول ايه. تابع رشيد ارتباكها بغضب ورد هو بنبرة حادة: "لا طبعا منعرفش بعض."

وطت وشها في الأرض وغمضت عينيها بحزن، اشتد غضبه أكتر وكمل بنبرة قاسية: "وانا هعرف الاشكال دي منين!"

حدقت فيه بصدمة، مش مصدقة انها بتسمع صوته بالنبرة القاسية دي أوي، اتأملت عينيه بذهول، مشافتش جواهم النظرات العاشقة اللي كانت بتشوفها زمان، مشافتش في عينيه دلوقتي غير القسوة والغضب! ملامحه متغيرتش كتير عن زمان، قد ايه اشتاقت ليه ولحنانه وعشقه ليها. لمعت عينيها بالدموع ووطت وشها بسرعة عشان ميشوفش ضعفها.

تابعت مايا تبادل النظرات بين رشيد والبنت دي، حست ان في حاجة بينهم او معرفة قديمة ورشيد مش عايز يقول لحد. علي صوت مايا وقالت لكارمن بغضب: "انتي لسه واقفه! بسرعه نضفي المكان وشيلي اللي انتي كسرتيه ده من علي الارض."

ازاي هتقدر دلوقتي تخبي دموع عينيها بعد ما اتعرضت للإهانة قدامه، ميعرفش هي اتعرضت لذل وإهانة قد ايه بعد ما سابها. انحنت بجزعها على الأرض عشان تشيل بايديها الازاز المتكسر، حست كأنها شايلة أشلاء قلبها المتحطم بعد كل السنين دي على فراقهم.

تابعها بشرود مش مصدق انه شايفها بعد أربع سنين على فراقهم، ملامحها متغيرتش عن زمان! بل بقت أجمل وأنوثة أكتر. سأل نفسه جواه؛ ليه ظهرت قدامه دلوقتي! هل عايزة تختبر مشاعره بعد ما عمل المستحيل عشان ينساها؟ أربع سنين عدت عليه وهو بيحاول ينساها، جت في لحظة واحدة ورجعت الذكريات جواه وكأن فراقهم محصلش!

صرخة جامدة فوقته من شروده، لقد جرحت ايديها بحتة من الازاز. بقت تبكي وهي بتبص للجرح في ايديها وبتتألم بشدة. جري عليها من غير ما يحس هو بيعمل ايه، انحنى بجزعه قدامها ومسك ايديها بيفحص الجرح بلهفة مقدرش يخبيها، كانت بتبكي وبتتألم بشدة. كلمها بحنان من غير ما يحس: "متخافيش الجرح صغير."

بكت بشدة وهمست ليه ببكاء وهي بتتألم: "بس بيوجعني اوي."

بص ليها ومستحملش يشوف دموع الألم في عينيها، بص لصاحبه وسأله عن منديل عشان يحطه فوق الجرح عشان يوقف نزيف الدم، اداله صاحبه منديل ووقف جنب مايا بيتابعوا اللي بيعمله رشيد بصدمة. كان رشيد ماسك ايديها بحنان وبيلم الجرح بحذر وهي بتبكي زي الطفلة الصغيرة وكأن أبوها هو اللي بيداوي جرحها، وقف الجرح عن نزيف الدم ودموعها موقفتش. ده اللي كانت بتعمله زمان! فاكر قد ايه استمر بكاءها لساعات بعد ما اتجوزوا من أربع سنين، قد ايه كان حنين وصبور معاها. كانت ومازالت زي الطفلة الصغيرة، بتبكي من أقل الحاجات! بكاءها، دموعها، صوت شهقاتها، بيفكره كل حاجة بالماضي، مش عايز يفتكر أي حاجة.

ساب ايديها بسرعة واتعدل في وقفته، بصت ليه بعينيها الباكية بتترجاه انه ميسيبهاش تاني، اتبدلت نظرات عينيه للجمود، مش ممكن يصدق دموعها تاني، مش هيسمح ليها انها تخدعه مرتين! سابها ومشي من الحفلة من غير ما يتكلم.

راح عادل صاحبه وراه عشان يلحقه، بصت ليها مايا بغضب وقالت ليها بقسوة: "رشيد يعرفك منين؟"

وطت وشها في الأرض وردت بصوت ضعيف: "ميعرفنيش."

وقفت وهي بتبكي وماسكة ايديها المجروحة، الألم اللي حاسة بيه في قلبها دلوقتي كان أقوى وأصعب بكتير من الألم اللي حاسة بيه في ايديها، مشيت وهي بتبكي بحزن وندم، تابعتها مايا باهتمام وهمست بثقة: "الاكيد ان رشيد يعرفك.. وانا لازم اعرف هو عرفك امتى وازاي!"

رواية رشيد وكارمن بقلمي ملك إبراهيم. 

أخد عربيته وانطلق بأقصى سرعة، بيحاول يهرب من التفكير في الماضي بعد ما شافها في الحفلة، الماضي مسابهوش في حاله وفضل يلاحقه لحد ما رجع بذاكرته للماضي من خمس سنين....

{محافظة القاهرة.. صيف عام 2018}

- الحقوني انا بنتي اتخـ..طفت

= وانا كمان بنتي اتخـ..طفت

" بيان هام.. في اتوبيس سياحي اتخطف وهو في طريق العين السخنه.. الاتوبيس كان فيه طالبات ثانوي لمدرسة خاصة.. الطالبات كانوا في طريقهم لقضاء رحلة سياحية احتفالاً بأنتهاء العام الدراسي، تم الاختطاف من قبل عدد من المجرمين، لا نعلم حتى الآن سبب الاختـ..طاف! ننتظر ما ستفعله وزارة الداخلية"

حالة من الفزع صابت كل العائلات بعد ما شافوا الخبر ده على كل مواقع الأخبار.

اتجمع عدد كبير من الصحافة والإعلام عشان يغطوا الحدث ويعرفوا كل التطورات.

جوه مكتب وزير الداخلية، تليفونه موقفش عن استقبال الاتصالات من عائلات الطالبات وكبار المسؤولين في الدولة، اتجمع عدد كبير من مساعدين الوزير وعدد من الضباط ذو الكفاءة والخبرة، بيدوروا في الحادث عشان يعرفوا مين الخاطف! اتكلم مساعد وزير الداخلية بثقة: "مفيش غير ظابط واحد هو اللي هيقدر يفيدنا في القضية دي."

اتجهت ليه الأنظار باهتمام، تابع كلامه وكمل بثقة: "النقيب رشيد الجبالي.. حفيد اللواء نور الدين الجبالي."

اتبدلت النظرات بينهم بتأكيد على الاختيار. اتكلم الوزير: "احنا كلنا طبعًا نعرف اللوا نور الدين الجبالي.. بس انت متأكد ان النقيب رشيد هيقدر يفيدنا في القضية دي ويرجع البنات؟ الموضع خطير واهل البنات وكل المسؤولين في الدوله بيكلموني كل شوية."

هز اللواء راسه بالموافقة وأكد بثقة: "طبعا يا فندم.. النقيب رشيد من اكفاء الظباط عندنا وتم تكليفه في اكتر من قضية من النوع ده وقدر يحلهم في اقل من 24 ساعة، وهو الوحيد اللي هيقدر يوصل للبنات في اسرع وقت."

علي صوت وزير الداخلية: "وهو فين دلوقتي.. كلموه يجي حالاً."

رواية رشيد وكارمن بقلمي ملك إبراهيم.

في مكان تدريب لاطلا..ق النار.

وقف النقيب رشيد الجبالي وهو مركز في اطلاق النار ومصوب الهدف بكل تركيز. قرب منه صاحبه المقرب النقيب " خالد" وكلمه بنبرة مرحة: "رشيد باشا.. ايه رأيك هنتغدا فين النهارده؟"

أطلق آخر هدف ليه وأصابه باحتراف، ابتسم صاحبه وقال بفخر: "طول عمرك صياد!"

ابتسم رشيد وقال بمرح: "يبقى نتغدا سمك النهاردة."

ابتسم خالد ببلاهة وحرك ايديه فوق معدته بجوع: "وطبعًا انت اللي هتعزمني؟"

هز رشيد راسه بقلة حيلة وأخد حاجاته الشخصية ومشي وهو بيتبسم وقال بمرح: "مش ملاحظ ان انت من يوم ما اتجوزت وانا بس اللي بعزمك!"

ابتسم خالد وهو بيدعي الحزن على حاله وقال بطريقة درامية: "والله يا باشا انا نفسي اعزمك مرة بس المدام ربنا يخليهالي بتاخد المرتب كله وبتديني مصروفي يوم بيوم وانت عارف ان المرتب اتأخر الشهر ده!"

ضحك رشيد باستهزاء وهز راسه بمرح: "لا عاش يا باشا.. احبك كده وانت مسيطر!"

وقف خالد عن المشي وقال بطريقة درامية: "انت كمان بتتريق عليا!.. ماشي.. بكره تتجوز ومراتك تاخد مرتبك وتديك مصروفك زيي."

قرب رشيد من عربيته وحط حاجاته جواها وقال بثقة: "لا انت بتحلم.. مش انا يا حبيبي."

ضحك خالد بمرح وقال بثقة: "بكره نشوف يا حبيبي."

رن تليفون رشيد برقم اللواء "طلعت" بص للتليفون بدهشة وهمس "غريبه ليه اللوا طلعت بيتصل بيا دلوقتي! " رد على التليفون بفضول، سمع صوت اللواء بيطلب منه سرعة الحضور لمكتب وزير الداخلية، جاوب بالموافقة وقفل التليفون. بص ليه خالد بدهشة وقاله بقلق: "خير يا رشيد في ايه؟!"

قال رشيد وهو بيبص قدامه بتفكير: "اللوا طلعت طلب مني اني اروحله على مكتب وزير الداخليه حالاً!"

همس خالد بقلق: "اشمعنا يعني! هيكون في ايه ؟"

بص ليه رشيد وكتم ضحكته وجاوبه بنبرة مرحة: "ممكن تكون مراتك قدمت بلاغ عشان المرتب اتأخر الشهر ده!"

حدق فيه خالد بغيظ، ضحك رشيد بمرح وركب جوه عربيته ومشي في طريقه لمكتب وزير الداخلية. وقف خالد بوش حزين وهمس بإحباط: "طارت العزومة."

رواية رشيد وكارمن بقلمي ملك إبراهيم.

على طريق العين السخنة. جوه الأتوبيس المخـ..طوف. وقف عدد من المسلـ..حين جوه الأتوبيس بيهددوا البنات بالسلا..ح عشان يسيطروا على الوضع.

في الكرسي اللي ورا خالص كانت قاعدة "كارمن" بنت عندها تمنتاشر سنة، أبوها اتوفى وهي عندها عشر سنين، مامتها بتشتغل على صيد الرجالة الأغنيا عشان تعيش بنفس المستوى الاجتماعي العريق بعد وفاة جوزها "أبو كارمن" بعد ما خسر كل فلوسه وشغله التجاري، بتنتقل والدة كارمن من جوز للتاني، وسايبة وراها بنتها، بس بتوفر ليها الفلوس وبتتكفل بدفع الفلوس لتعليمها في واحدة من أكبر المدارس الخاصة، كارمن متعرفش كتير عن أفعال مامتها، بس تعرف ان مامتها بتعشق الفلوس وبتتجوز من رجال الأعمال الأغنيا في الخفا.

كانت كارمن لابسة فستان صيفي كحلي فيه ورد ملون وسايبة شعرها منسدل بطريقة حلوة. هي بنت جميلة بشرتها بيضا وعينيها سودا كحيلة. كانت قاعدة جنبها صاحبتها المقربة "سما" بنت واحد من رجال الأعمال. سما بنت رقيقة ومسالمة، صاحبة كارمن من الطفولة، همست سما لصاحبتها كارمن بخوف: "وبعدين يا كارمن! المجرمين دول هيعملوا فينا ايه؟"

تابعت كارمن تحرك الخاطفين حواليهم وتصويب السلاح عليهم بخوف وهمست: "مش عارفه هما هيموتونا ولا هيعملوا فينا ايه يا سما، انا خايفه اوي.. يارب حد يجي ويخلصنا منهم بسرعه."

همست سما بخوف: "بابي لو عرف اكيد هيتصرف ويخلصنا."

بهتت ملامح كارمن بحزن وهمست بخيبة أمل: "ياريت بابا كان عايش.. ماما عمرها ما هتسيب جوزها وترجع من شهر العسل بتاعها عشاني!"

بصت ليها سما بحزن وطبطبت على ايديها بحنان. علي صوت واحد من الخاطفين وأمرهم بالسكوت، كتموا نفسهم بخوف وهم بيبصوله بهلع.

رواية رشيد وكارمن بقلمي ملك إبراهيم.

جوه مكتب وزير الداخلية.

قعد رشيد بيسمع الوضع بكل تركيز بعد ما قاله رئيسه ان الاختيار وقع عليه في حل القضية دي وفي أسرع وقت.

اتكلم رشيد بعد ما سمع كل الخطط المقترحة لتخليص البنات: "ممكن اعرف ايه طلبات اللي خطـ..فوا الأتوبيس؟"

اتكلم اللواء طلعت: "هما لهم طلب واحد.. اننا نفرج عن رئيسهم."

سأل مرة تانية بفضول: "ومين رئيسهم؟"

جاوبه اللواء: "سعد بشار.. اكبر تاجر مخد... رات في البلد واتمسك متلبس واتحكم عليه بمؤبد وهو دلوقتي في السجن لتنفيذ الحكم."

هز رشيد راسه بالموافقة وقال بثقة: "يبقى انا هحتاج سعد بشار من السجن."

حدق فيه الكل بصدمة، هز راسه بثقة وكمل: "المهم دلوقتي اننا نخلص البنات دول لأن هما ملهمش ذنب بشغلنا.. وسعد بشار انا اللي هرجعه للسجن تاني بإيدي زي ما هاخده."

اتكلم ليه وزير الداخلية بصرامة: "بس ده مش حل يا سيادة النقيب.. بالشكل ده كل يومين هنلاقي اتوبيس اتخـ..طف والخا..طفين يطلبوا الافراج عن مجرم زيهم واحنا هنضطر ننفذ طلبهم!"

وطى رشيد راسه باحترام للكلام وبعدين بص لوزير الداخلية وقال بثقة: "بس احنا هنعمل منهم عبره لأي حد يفكر انه يكرر اللي هما عملوه.. وانا بوعد حضرتك ان سعد بشار هيبات في السجن الليلة دي هو ورجالته وهيدفعوا تمن عملتهم غالي اوي."

بص ليه وزير الداخلية بتفكير، شاف في عينيه الثقة والإصرار، بص لكل مساعدينه وكلهم وافقوا على خطته، حرك الوزير راسه بالموافقة: "وانا موافق على خطتك يا رشيد وواثق فيك."

ابتسم رشيد بثقة وقام من مكانه وقال: "وانا ان شاء الله هكون قد ثقة حضرتك فيا."

وبعدين كمل: "انا هتحرك دلوقتي ومعايا قوة بس لازم اروح السجن الاول واستلم سعد بشار بنفسي."

ابتسم ليه الوزير بثقة، مشي رشيد وهو بيفكر في خطته بذكاء وبيحط على قايمة خطته حياة البنات.

رواية رشيد وكارمن بقلمي ملك إبراهيم.

بعد أقل من ساعة.

وصل رشيد للسجن عشان يقابل سعد بشار وياخده معاه عشان يطلق سراحه وينفذ طلب الخا..طفين.

قعد في أوضة مأمور السجن واستنى مجيء سعد بشار، بعد لحظات خبط الباب ودخل واحد من رجال الشرطة ومعاه سعد بشار وايديه متكلبشة بالحديد، بص ليه رشيد باهتمام؛ كان سعد بشار راجل ضخم في الأربعين من عمره، عنده دقن سودا طويلة، نظراته باردة، بيتعمد يبين القوة والثقة بوقفته.

وقف رشيد وقرب منه وقاله بهدوء: "انت بقى اللي رجالتك عاملين لنا الدوشة دي كلها!"

ابتسم سعد ببرود وجاوبه بسخرية: "لولا اللي رجالتي عملوه ده مكنتش شوفت سعادتك هنا دلوقتي يا باشا!"

هز رشيد راسه بالموافقة وطبطب على ضهره بتأكيد على كلامه، وبعدين حط ايديه فوق ياقة قميص سعد عشان يعدل من وضعيتها وقاله: "عندك حق.. فعلا لولا اللي رجالتك عملوه ده مكنتش هتشوف سعادتي!"

بص للعسكري الواقف بيتابع الكلام بفضول وقاله: "فك الحديد من ايديه."

بص ليه العسكري بقلق، اتكلم المأمور بقوة: "نفذ الامر."

قرب العسكري من ايد سعد وفك قيوده وهو بيترعش من الخوف، بص سعد للعسكري وابتسم بثقة، وبعدين اتحسس ايديه مكان القيد الحديدي وقال للمأمور بسخرية: "ابقوا هاتوا كلبشات واسعه شويه يا باشا.."

وبعدين بص لرشيد وكمل باستهزاء: "اصل القاعده في السجن من غير شغله ولا مشغله بتتخن !"

رسم رشيد على وشه ابتسامة استخفاف وهو بيحاول يكتم غضبه جواه، قال للمأمور: "احنا لازم نتحرك يا فندم."

هز المأمور راسه بالموافقة، قال رشيد لسعد ببرود: "اتفضل قدامي."

اتحرك سعد قدامه وهو بيرسم علامة النصر فوق ملامحه.

رواية رشيد وكارمن بقلمي ملك إبراهيم.

جوه الأتوبيس السياحي.

وقف واحد من الخاطفين بيتكلم في التليفون، قاله واحد من الناس اللي تبعهم ان رئيسهم سعد بشار اتحرك من السجن وفي طريقه ليهم مع رجال الشرطة، صدح صوت زعيمهم بعد ما خلص المكالمة وأمر رجالته انهم يكونوا على استعداد لمهاجمة الشرطة في أي وقت. حالة من الهلع صابت البنات، قام واحد من الخا..طفين باطلاق بعض الطلـ..قات في الهوا عشان يسكت البنات عن البكا والصر..اخ.

همست سما لصاحبتها بخوف وهي بتبكي جنبها: "انا خايفه اوي يا كارمن.. احنا خلاص كده هنموت."

بصت كارمن لرجلها، اتفاجأت انها مبقتش حاسة بيها، حاولت تحركها وحطت ايديها واتحسست رجلها ومش حاسة بحاجة، بصت لصاحبتها بصدمة وهمست: "انا مش حاسه برجلي!"

حدقت فيها سما بصدمة وهمست: "يعني ايه مش حاسه برجلك!"

بكت كارمن بصوت مكتوم من الخوف ونزلت الدموع من عينيها بغزارة: "انا مش حاسه برجلي خالص!"..... بقلمي ملك إبراهيم.

... يتبع

مين هيتابع معايا الرواية القمر دي😍😍

شجعوووني وعايزه تفاعل حلو عشان نكملها♥️