رواية علاقة سامة صديقة الدراسة البارت الاول بقلم ورود الخالدي حصريه وجديده
رواية علاقة سامة صديقة الدراسة البارت الاول بقلم ورود الخالدي حصريه وجديده
دعاء
وج دعاء كومي غسلي الطرمة والممرات
يوم والله مابيه حيل شنو يومية الغسل
يااا وج شنو مابيج حيل قابل موديتج تحصدين
هي طرمة وممرات هالكدوتهن رشيهن مي وغسليهن
والله مصدكت يخلصون جيرانا بناء حتى اخلص من التراب والغسل يومية
وج ذكرتيني يمكن بيت ابو كريم مراح يكعدون بالبيت الجديد..لان شفت ناس تنزل اثاث للبيت ومشفت ابو كريم وياهم؟؟
يوم يمكن عمال
لا ما اعتقد عمال اصلا اني عرفت من الاول مراح يكعدون بيه من اجه ابو كريم عرض عليه يشتري بيتنا حتى يطبكة ويه بيتهم ..لان ممعقوله يطبك٣بيوت ويبني هالبنيان الضخم والواسع حتى يكعد بيه بس هو ومرته ..تدرين كريم من زمان مسافر وكاعد هو ومرته وجهاله بالشمال وهو بس هالولد عدهم
والله يوم لو بايعته البيت وشايلين أبيت جديد مو احسن!!؟
يااا وج شلون ابيع بيت ابوج الله يرحمه مذمم عليه ما ابيعة ولا افلشه اصلا بنا بدموع عينه شلون ابيعة؟
يوم يعني بابا الله يرحمه ميكيف ويفرح اذا شلنا أبيت جديد اصلا الفلوس العرضهن عليج ابو كريم كومه نكدر بيهن نشتري بيت احسن منه ..شفتي بيت سماح الخياطة وام علي من باعن بيوتهن لابو كريم وين كعدن هسه؟؟
اصلا سماح مو صاحيه بيتها ركن ويخبل باعته لابو كريم بتراب الفلوس عبالج هنه الكم مليون ذني فلوس؟؟!!!!!
لعد شلون اشترت بيت جديد بيهن..؟
لتخافين عليها هاي خلصت عمرها بخيله وكاسره ضهرها ع المكينه تلكيها لامه كومه فلوس وكملت ع فلوس ابو كريم واشترت البيت الكعدت بيه هسه..وام علي شو اشترت مشتمل والباقي اشترت بيهن سيارة لرجلها يشتغل بيها..بعد..وين كعدن أوين كعدن قابل شالن للمنصور ؟
انتي كلتي مو ابو كريم راح يكعد بالبيت لعد منو راح يشيل بيه
والله ماما احتمال عائلة جبيرة لان شفتي البناء شكده ٣بيوت سواهن بيت واحد وطابقين كومه غرف بيه صلوات يعني مال عوائل حتى مو عائلة وحده..عموما من يكعدون بيه عود ندزلهم عشه لو غدة ونتعرف عليهم؟؟
يااا..اذا تكولين عائله جبيرة لو أكثر من عائلة شندزلهم اكل يراد كومة نطبخ
عزة بعينج شبيج عينج ضيكة قحط الاكل؟
ههه لا مو قحط بس ادري راح تكربيني دزي اكل ورجعي اكل
اي وشكو بيها هاي عاداتنا الحلوة القديمة من يسكن جار جديد نقدمله اول وجبه حتى يصير زاد وملح
شوف العادات ؟!! خو اشتريلهم هديه للبيت وفضت
راحت
دكومي غسلي الطرمة لا اكسرج بعدهم الناس مكعدو بالبيت وهاي تفكر باللكمة مالتهم؟ شلون جيل تافه
وره ٣ايام جنه راجعين اني وماما واختي ملك من السوك نزلنا. كبال بيتنا وقبل لاندخل شفنه ناس واكفين يم البيت الجديد الي بصفنا بالأحرى مجانو واكفين جانو دينزلون مره جبيرة بالعمر وكعدوها بكرسي متحرك الي نزلها ولد خمنت عمره الاربعين من نصبه جسمه لان مشفت بس ظهره هو بسرعة دخل البيت اخذ الكرسي المتحرك ودخل المرة جوه بس ماما مدري شبيها كبل راحت عليهم عبالك عرفت أحد منهم اول موصلت كالت..
منو..سميرة لو اني متوهمه
المرة رأسا التفت عبالك تعرف صوت ماما. وكالت
لا زغرا بيج بس معرفتچ منو بس صوتج اتذكره
يااا افه عليج معرفتيني وج سميره متذكرين حلومه
المرة كبل أدنت تبوس بماما وتكولها..
بعد عمري احلام شلونج يمه ولا اصدك صار ٣٧ سنه مشايفتج عفيه عليج شلون عرفتني
ههه عرفتج من عيونج الحلوات جنتي مدوخة الوادم بيهن
وضلن يضحكن مبينات وحده تعرف الثانيه..ماما كالت
شنو راح تكعدون يمنا حلم علم؟؟
ها هنا بيتكم والله احنا تونا أخذنا هذا البيت
اي هاي الساعة المباركة تعالي فوتي بيتنا بصفكم
والله تعبانه من الطريق وجنت الملم بالنواعم تعرفين شايلينن جديد
ولا تشيلين هم اني وبناتي نساعدج
بعد عمري تسلمين ..جنتي وبنتي معزلات ومرتبات البيت ماعدنا شي وولدي هم ساعدوهن وبقه شي قليل
صلوات عندج جنه
يااا وج ولدي كبار ابني محاق عمره فوك ال٣٥
محاق شنو؟؟
هو هذا اسمه ابو سماه هالشكل سالفه طويلة بعدين اسولفلج
اي وبعد شعندج صارو انتي تزوجتي وبعد ماشفناج
عندي نعمه من الله٣ ولد وبنوته بعمر بنتج هاي..ذني بناتج مو؟؟
اي بناتي هاي بنتي الچبيره دعاء
يااا هاي الچبيرة شو بعدها طفلة
اي مو اني وراج ب١٠سنوات مدري أكثر يله تزوجت هم أخذته رجال جبير اكبر مني ب١٥سنه..من وره ملحة ابوي الحجي تالي عافلي بناته زغار وراح لرحمة ربج
هسه احنه نضل نسولف بالباب دفوتي خيتي
بس اكمل شغلنا واجيج من عيوني الحمد لله صرنا جيران
وراحت المره فاتت لبيتهم واحنا هم دخلنا للبيت اول مدخلنا سألت ماما
ماما من وين تعرفين هاي المريه شو مشايفتها قبل؟
وج اني هم صارسنين وسنين مشايفتها من ايام المدرسه صح كبرانه بس ذيج هي بعدها تخبل اي..الخير يخير والشر يغير!!
اي والله مبينه حيل زنكيلة شفتيها شكد لابسه سوارات ومحابس
اي عاد...هي من زمان كشاخة واهلها زناكيل
يعني جنتن بنفس الصف!
اي تعرفت عليها بالاعداديه من جنت بالخامس بس تره هي اكبر مني٣سنين لان راسبه هواي بالمتوسطة
وبعدين
صرنا بالسادس صديقات بالروح وحده صح هي أهلها زناكيل وتلبس غالي بس هي فطيرة وحيل متواضعة..وبأيام امتحانات نصف السنة انخطبت وقبل ما تكمل السنه بطلت وتزوجت واحد من كرايب ابوها زنكيل ..بس البنات بالمدرسه كالن اخذت واحد متزوج
شعجب شوهيه تخبل شلون اخذت متزوج؟!!
والله ماما ما عرفت شلون لان حتى ماعزمتني بعرسها وحتى لو عازمتني جدج هم ميخليني اروح بوقتها
بس تكول ابنها الجبير عمره فوك ٣٥ يعني من زمان متزوجة
اي كتلج ماكملت دراسة سادس وتزوجت جانت تخبل وعيونها مدوخة الناس وابوها كولش متشدد وزوجها طفله خطية اني كملت ورحت معهد معلمات مركزي وتعينت وره كومه سنين يمكن١٢ سنه يله تزوجت
ها من هيج اولادها كبار شنو اسمه ابنها
محاق تكول عود شنو محاق
شمدريني اول مره اسمع هيج اسم هسه ابحثه ع النت وتعرف شنو محاق والله يا الله شلون اسم؟؟
اول مره خابري خالتج خلي تجيب فروحة وياها من تجي شنو صارلها٣ ايام عدهم تره عيب من رجلها هسه شيكول
ماما تره هي بتج مجلبه بغزل ومتقبل تجي
شنو مجلبه بغزل خابري خالتج خلي اجيبها وياها مابيه اروح الهم
تمام
خابرت خاله ..وبعدين بحثت بالكوكل عن معنى اسم محاق طلع معنا القمر..الذي ذهب ضوءه أو أحد مراحل ماقبل تكون الهلال...يعني بالعامية قمر اظلم..هههه شلون اسم يلعب النفس
عموما ثاني يوم مامادزت على٣ دجاجات شوي وهي سوت تمن عليه شعريه وكشمش ومدري شنو وزلاطة وفاكهة ولبن وخلتهن بالصينيه الجبيره وكلتلي اخذيهن الهم اويلي مو صينيه عبالك بيها طن كسرت اديه تكسر ع ماوصلت الهم نزلتها بالكاع ودكيت الجرس..باوعت اكو سيارة حديثة بيضة واكفة آبابهم وراها سيارة كيه من هاي البيها بدي هم جديدة دنكت شلت الصينيه وانتظرت تنفتح الباب
وانفتحت الباب طلع لي ولد شاب بس مبين هو هذا ابنهم الجبير هالمرة ركزت بملامحه عيونه حادة واكو خصلات شگرة بشواربه ولحيته....وجهه موضعيف لا متوسط بس شي على شي جذاب وعيونه بيهن فد نظرة مكدرت افسرها بهالثواني
احنا جيرانكم ماما دزت الكم غدة
غير ياخذ مني الصينيه أديه تكسرت شو حتى مباوعلي كلي:
فوتي اختي فوتي
لا اخذ الصينيه مني
والله مستعجل فوتي هسه تطلعلج امي وصاح
يمه..يمه تعالي
وعافني وراح
بس من طلع المرة بسرعة اجتي تمشي ع السريع..وطبعا اكو سيارة سوده لخ هم حديثة جوه بداخل البيت بالممر الخارجي
هلا..هلا خاله ..شنو هالزحمه امج ليش مكلفة نفسها
لا خاله ماكو زحمه الف عافيه
اخذت الصينيه مني وكالت
فوتي فوتي خاله
لا اريد اروح
انتي دعاء مو انتن بس اثنين اخوات لوعندج بعد اخوه واخوات
لا ماعندي اخوان احنا ٣ اخوات اني وملك وفروحة
الله يحفظجن فدوه
اشكرچ خاله
فوتي..خلي البنات يتعرفن عليج بنتي ومرت ابني
غير مرة انشاء الله
سلميلي ع امج وكوليلها عاشت ايدج وانشاء الله اجيكم باجر لو عگبه
تنورينا خاله
من طلعت من بيتهم شفت السيارة البيضة موجودة بس الكية رايحة همه زناكيل مبينين شعجبب ابنهم عنده سيارة حمل يعني ميصعد بسيارة زغير حديثه لان عدهم اثنين شفت
المهم ثاني يوم العصر جتي ام محاق النا بس شنو اللبس شنو العطر وجايه وياها جنتهاوياها اثنين ولد زغار توم يمكن عمرهم سنه ونص جنتهم حيل حبابه واجتماعية اسمها ضحى وبقينا نسولف وقدمت الهم كيك وعصير وماما وام محاق يسولفن ومن بين كلامهن سمعت ماما تمولها
اكولج ولو من ذيج السنين لسه كلبي مغيم لان ماعزمتني بعرسج و
وقبل متكمل ام محاق قاطعتها
خيتي ياعزيمه بوقتها غير اني قبل العرس باسبوع يله عرفت خطيبي متزوج وأبويه يعرفه حق المعرفة وضام عليه
يااا ضام عليج
اي والله عقدت سيد ومن ردت أعقد محكمة قبل العرس يله عرفت وخلصتها حسبات وبواجي
ياااا..يااا..ليش يعني اهلج هيج يسوون وياج شنوماعدهم لكمة خبز شو اهلج الله يزيدهم جانو حيل زناكيل وانتي جنتي طفله
شوفي أبويه جان صديق المرحوم ابو رجلي وجانو أكثر من الاخوان فذاك يشكيله يكوله ابني كلمايصير عنده طفل يموت لان مرته مدري شبيها بيها حاله نادرة ميعيشلها جهال وهي يتيمه مايكدر يطلكها..وخاطبني منه وطايح بعينه وكايله بيتها وحدها ويدللها دلال ومرته ماعدها مانع ومستعده هي تجي تخطبله المهم ابويه مقتنع وقنع امي لان مايكدر يرد صديقه
ها..هيجي خيتي قسمه تريد تصير
اي والله
يعني هم اخذتلي رجال اكبر منج بهواي مثلي ابو دعاء اكبر مني بهواي
لا مجان هواي اكبر مني اني عمري بوكتها٢٠ وهو٢٧بس أبوه مزوجه ذيج من وكت ومصارت عنده خلفه بس من أخذني الله رزقه محاق ومصطفى ومجد والبنية
اكولج عود شنو محاق هو هذا اسم
امداني كولي همزين سماه محاق راد يسميه مدفون
يااا ليش اسم الله مدفون
عجوزي تكوله انت مايعيشلك بزر سمي ع اسم الموته حتى يعيش
اسم الله
اني كلبت الدنيا بوكتها كتلهم شنو اول خلفتي أسموه مدفون عاد جده الله يرحمه جان مثقف كله سمي محاق يعني قمر مخفي حتى يعيش وماينحسد كوه قنعوني وسموه هالاسم
اكولج هاي العجوز الشفتها امج لو عجوزج؟
انتي العجوز مو هيه لاتشوفيها كاعده بالعربانه تدلل كلشي مابيها تمشي وتعاركني اقوه مني عمرها٩٠ سنه
ومثل الصل وداعتج
هههه
وهاي الحلوة مرت محاق
لامرت مصطفى
شعجب مزوجه الوسطاني قبل الجبير
الجبير ماعندك حظ المسكين
ليش خطية
من صار عمره٢٠ سنه زوجته بت عمه شلون بنيه تخبل جمال ومال واخذها بنفس عمره هم٢٠ بقت وياه خمس سنوات..خطية ماحبلت وطول الخمس سنوات تراجع تالي الدكتورات كالن الها ماكو ما تخلفين لان متجيها الدورة هي تحبه تموت عليه ضلت تلح عليه تزوج ما اتزوج واني اخطبلك وما اريدك ننحرم من الجهال بسببي المهم كوه قنعته ..رحنه خطبناله بنيه ثانيه وهي موافقه وراحت ويانه بالخطبة وبالعرس وطبيعي شو هاي بس سمعت مرته الجديدة حبلت تخبلت ع الولد كامت تملخ بروحها وتبجي وتنحب وزعلت عند اهلها ..وطلبت الطلاك راح رجلي وأخذ ناس لبيت اخو لان هي بت عمه رادوها ترجع مقبلت اله تتطلك وابني. هم راح وحجه وياها مرضت المهم طلكها..بعدها مرته الجديدة حبله بشهرالسابع سمعت من رجلي أنه بت اخو تزوجت واحد ارمل وعنده اربع جهال كلنه شكو بيها هي متخلف ويجوز تريد تربيتهم..بس ابني حيل انقهر بوقتها لان صدك جانت تحبه ومحد يعرف ليش طلبت الطلاك وكلها الناس تلوم بيها وكايليلها..لو ضاله ع رجلج ومنتظره يخلف وتربين بزره وياه ع الأقل بيناتكم عشره ومحبه وكرابه...المهم انتظرنا مرت محاق الجديدة حتى نشوف بزره...بس خطية الله ماقاسمله مرته بغرفة العمليات ماتت هي والولد الي ابطنها
يمه اسم الله..اسم الله خطية والله هذا ابنج قصته تبجي
هذا الحجي صارلي كومه سنين
اي ليش مازوجتيه بعد قابل انكطعت النسوان؟ مو هذا أبوه الله رزقه على عينج!
لا والله اصلا النسوان كاتلات نفسهن عليه بس هو ميقبل يتزوج وإذا فتحنا وياه الموضوع يكلب الدنيا رافض فكرة الزواج بعد
خطية انصدم هواي
ملهي روحة بالمعمل
صلوات عنده معمل؟
اي عنده معمل نجارة مال غرف نوم؟
لازم ماخذ مهنه أبوه وإجادة
لا خيتي أبوه ميعرف بالنجارة هو اشتغل واتعلم وحده أبوه عنده أملاك وعماره الحجي جداولادي يقبض ايجارهن ويكعد لاشغل ولا عمل هو ومصطفى ميشتغلون ومجد طالب جامعة مرحله ثانيه
يااا مجد يعني بكد ملك بنتي هم مرحله ثانيه
اي اذا مرحلة ثانيه يعني بكدها
وبتج
بتي يمكن بكد بتج دعاء هي شكد عمرها
عمرها٢٣ العام تخرجت
اي مروه هم العام خلصت جامعة
وفروحة المدلله هسه بالثالث متوسط
صلوات الله يحفظهم بس حملج ثكيل بعدج اداومين سمعت من بعيد صرتي معلمة
لا خيتي طلعت تقاعد اني سويت تقاعد مبكر مابيه حيل الدوام بعد
هاا
راتب التقاعد واليجيني من حصتي من ايجار محل ابو دعاء الله يرحمه ماشيه الأمور
حصتج شنو غير ايجاره الكم
عشتو أخته هم تأخذ حصه ويانه
ها هيجي!
انتظروا بارت2
