عنيده في برزخ العشق الفصل الرابع بقلم الكاتبه صباح عبدالله حصريه وجديده
في شقة سارة.. ياسر نايم على السرير مش لابس قميص.. يصحى ويمسك راسه ويتوجع جامد.
ياسر بوجع:
آه… الصداع هيفرتق دماغي.
تدخل سارة لابسة روب وهي ماسكة فنجان قهوة.
سارة بدلع:
صح النوم يا كسول، إيه يا روحي، إنت آخر مرة نمت فيها كانت إمتى؟
ياسر باستغراب:
سارة، إنتي بتعملي إيه هنا؟! وإيه اللي إنتي لابساه ده؟
سارة تضحك بدلع:
أمال هكون فين بس يا روحي؟ إنت اللي عندي وعلى سريري.
ياسر يبص لنفسه بصدمة وهو بيقول:
ياسر:
هو إيه اللي حصل؟ أنا مش فاكر حاجة.
سارة بدلع:
بصراحة… كانت ليلة ولا ألف ليلة وليلة.
ـــــــــــــــــــــــــــ
على الطريق
ندي واقفة جنب العربية بتنَفّخ بزهق وهي بتقول:
ندي
أوووف، ده اللي كان ناقصني! أعمل إيه دلوقتي؟ العربية باظت! وهتأخّر على شغلي، وأكيد الزفت اللي اسمها مراد هيسمعني كلمتين مالهمش لازمة. طب أتصل على ياسر ييجي يوصّلني.
تطلع التليفون بس تفكّر شوية، وبعدين تقول بعيّاط:
ندي
أكيد ياسر مش هيرد زي كل مرة… أعمل إيه؟ حتى الطريق واقف ومافيش أوبر.
فجأة عربية تقف قدّامها وينزل منها مراد.
مراد (باستغراب)
إنتي إيه اللي موقفك كده؟
ندي (بزهق)
أهو اللي بيقولوا عليه… جبنا سيرة القط لقيناه جاى ينط!
مراد (بابتسامة)
والحلو جاب سيرة القط ليه؟
ندي (بزهق)
وهنجيب في سيرة القط من جماله… ولا من جماله؟
مراد يقرب ناحيتها، ندي ترجع بخوف وهي بتقول:
ندي
والله أصوّت وأتبلى عليك وأودّيك في ستين داهية… بقولك أهو!
مراد (بضحك)
هتتبلي؟ تقولي لهم إيه؟ واحد حلو بيعكسني؟ الظاهر دماغك اللي شمال. أنا كنت هشوف عربيتك فيها إيه… وسّعي كده عن الطريق.
ندي تبعد عن العربية بكسوف، مراد يبص لها.
مراد (بمعاكسة)
اقولك بصراحة… ماكنتش أعرف إنك زي البنات الكيوت وبتتكسفي. بس طلعتي عسل وكيوت اوى وإنتي مكسوفة كده.
ندي تنفخ بزهق… وتسكت.
ـــــــــــــــــــــــــــــــــ
في شقة سارة
ياسر يقوم بصدمة
إنتي هتستهبلي ولا إيه؟ قولي اللي حصل، أنا كنت مسطول مش حاسس بحاجة.
سارة بدلع:
الله بقى يا روحي ما تكسفنيش بقى، ده إنت طلعت حصان.
ياسر بذهول:
يعني إيه أنا خُنت ندي؟!
سارة بزهق:
وفيها إيه! ما الهانم غفلتك وطلعت حامل.
ياسر يضربها بالقلم ويقول بغضب
اخرسي! ندي دي أشرف منك مية مرة، وأوعي تجيبي سيرتها على لسانك تاني، إنتي فاهمة؟!
سارة بزعيق:
إنت بتضربني يا ياسر؟! إنت اتجننت؟
ياسر بغضب:
أيوه، وممكن القلم ده يوفقك! وعلشان تعرفي إن مهما حصل مستحيل أسيب ندي وأبص لوحدة رخيصة زيك. عن إذنك.
ياسر يسيبها ويطلع على بره. سارة تعيط وهي بتقول:
أعمل إيه أكتر من اللي عملته علشان تحس بيا وتعرف قد إيه أنا بحبك؟ فيها إيه أكتر مني ولا أحسن مني علشان تحبها الحب ده كله؟
(صوت جرس الباب) تروح وتفتح تلاقي يسريا.
يسريا بمرح:
يا بُختوا يا عم، الله يسهلوا! شوفت الموز نازل وأنا جاية. احكيلي إيه اللي حصل وبالتفاصيل لو سمحتي.
سارة بزعل:
ادخلي يا يسريا واقفلي الباب وراكي.
يسريا باستغراب:
خير! مالك يا سارة؟ هو مش عملتي اللي كان في دماغك ولا إيه؟
سارة بزهق:
لا يا أختي، ولا عملت ولا نيلة! طول الليل مش على لسانه غير اسم الست ندي. حاولت أوهمه حصل حاجة، رفع إيديه عليا وسبني ومشي.
ــــــــــــــــــــــــــــــــــــــــــــ
عند مراد وندي
واحد بيصلّح في العربية، وندي ومراد واقفين.
مراد
بقولك… ما تجي نفطر في أي كافيتيريا لحد ما الأخ يخلص؟
ندي (بحنق)
ما تروح، حد ماسكك؟
مراد
وإنتي مفكّرة ممكن أسيبك مع واحد غريب لوحدك في مكان زي ده؟
ندي (بغرور)
والله أنا ممكن آمن للعالم كله… إلا إنت.
مراد (باستغراب)
واشمعنا أنا إن شاء الله؟
ندي (ببرود)
والله الجواب بيبان من عنوانه.
مراد يقرب منها وهو بيقول:
مراد
وأنا بقى… جوابي عنوانه إيه؟ عاوز أعرف.
في نفس الوقت، ياسر واقف بعربيته في الجنب التاني من الطريق، يشوف مراد مع ندي.
ياسر (بغضب)
معقولة دي ندي! هي بتعمل إيه مع مراد؟
يسكت شوية وبعدين يقول:
معقولة في بينهم حاجة… وأنا اللي حمار مش واخد بالي؟
يبص لهم بغضب وياخد عربيته ويمشي. في نفس الوقت ندي تزق مراد بعيد عنها.
ندي (بغضب)
مكتوب عليه واحد سافل، ومستفز، وحقير قوي، وقليل الأدب… ومحتاج يتربّى من جديد!
ندي تروح وتركب عربيتها. مراد يبتسم وهو بيقول:
مراد
معقولة ده كله يكون عنوان جواب؟! دي رسالة من وزير داخلية.
ـــــــــــــــــــــــــــــــــ
في بيت ياسر
أماني قاعدة قلقانة. ياسر يدخل سرحان.
أماني بقلق:
ياسر، إنت كنت فين طول الليل يا ابني؟ قلقتني عليك.
ياسر يفتكر ندي وهي مع مراد وبعدين يقول:
ياسر بهدوء:
هكون فين بس يا أمي، كنت بايت في المستشفى.
أماني بزعل:
طيب يا ابني مش تتصل عليا تعرفني بدل ما قاعدة طول الليل مستنياك كده؟ حتى اتصلت على ندي قالت ما تعرفش، وحاولت تتصل عليك مش بترد عليها ليه؟
ياسر بزهق:
معلش يا أمي أنا مش فايق للكلام ده دلوقتي. عن إذنك هطلع أغير هدومي وأنزل المستشفى علشان عندي شغل.
ياسر يسيبها ويطلع أوضته. أماني تفضل واقفة تبص له بقلق.
---
بالليل في فيلا أهل مراد
مراد يدخل مبتسم وهو بيفكر في ندي. الخادمة تقابله وهي بتقول:
الخادمة:
مراد بيه، حازم بيه مستني حضرتك وبلغني أما توصل أقول لحضرتك تروح له.
مراد باستغراب:
ما تعرفيش عاوز إيه مني؟
الخادمة:
لا والله يا بيه.
مراد:
طيب، روحي إنتي شوفي شغلك.
مراد يطلع على السلم والخادمة تدخل المطبخ.
---
في أوضة حازم
مراد يدخل مبتسم وهو بيقول. حازم أبو مراد نايم بتعب على السرير.
مراد بمرح:
ميه مسا على الناس الكويسة، عامل إيه دلوقتي يا حزومة؟
حازم يكح بتعب:
كح كح كح..
حازم:
اقعد يا مراد، عاوزك في موضوع.
مراد بقلق وهو يقعد:
خير يا حج، في إيه؟ قلقتني.
حازم بتعب:
عاوز أطمن عليك قبل ما أموت يا ابني. اللي أصغر منك معاهم عيال دلوقتي وإنت لسه زي ما إنت ما بتتحركش، وعايش في الحرام ومش عاوز تفوق منها. وده مخليني أقلق عليك وعلى مستقبلك. أنا ما عنديش غيرك، عاوز أطمن عليك وأشوف عيالك قبل ما أموت. أنا خلاص عارف إن أيامي بقت معدودة في الدنيا دي.
مراد يمسك إيد أبوه وهو بيقول بعياط:
مراد:
ألف بعد الشر عليك يا حزومة. عاوز تموت بسرعة كده وتسبني لوحدي وإنت عارف ماليش غيرك؟
حازم:
ما علشان كده عاوز أطمن عليك يا مراد. عاوز أجوزك وأفرح بيك وأموت مطمن إنك عايش حياتك مرتاح ولك أسرة تسندك من بعد ربنا.
مراد يفتكر ندي ويقول:
مراد:
بصراحة كده يا حزومة، في واحدة في الشركة عندك شغلني وشكلي كده واقع، بس هي تشوف الأعمى ولا تشوفني.
حازم باستغراب:
مين دي واسمها إيه؟
مراد:
مش عارف غير إن اسمها ندي.
حازم بفرحة:
والله وعرفت تختار يا د يا مراد. ندي بنت جدعة أوي، الحقها قبل ما حد ياخدها منك.
مراد بزهق:
ما هو بقولك يا حج، تشوف الأعمى ولا تشوفني، ومش عارف عنها حاجة. افرض مخطوبة ولا مرتبطة، أعمل إيه أنا؟
حازم بتفكير:
ممكن برضه، بس على الأقل اعمل اللي عليك وروح اتقدم لها، وساعتها تعرف. وأوعي تعمل معاها حركة كده ولا كده. البنت دي نظيفة وجدعة مش زي اللي تعرفهم.
مراد:
ما هو ده اللي وقعني والله يا زومة.
عنيدة_في_برزخ_العشق
قصة_رومانسي
الكاتبة_صباح_عبدالله_فتحي
قصص_قصيرة_رومانسي_كاملة
اللي عاوز يعرف اللي هيحصل يتفاااعل ويكتب تم… وفي رأيكم ندي حامل من مين؟
تعليقات
إرسال تعليق