الفلاح والمخطوفه الفصل الخامس قصه رومانسيه ممتعه بقلم الكاتبه صباح عبدالله حصريه وجديده
(الحاضر)فاق رياض من شروده على صوت ريماس وهي بتهزه من دراعه.
ريماس
رياض... رياض... رياض.
رياض
عاوزة إيه يا زفت؟ صورتيني؟
بصتله ريماس بشك.
ريماس
روحت فين كده؟ بقالّي ساعة بكلمك، ولا إنت هنا أصلًا؟
بصلها رياض بتوتر، وحاول يغيّر مجرى الكلام.
رياض
وهروح فين يعني؟ ما أنا مرزوع قدامك أهو.
ريماس (بجمود)
عاوزة أعرف في إيه بينك وبين جبل. ولو سمحت ما تحاولش تغيّر الموضوع، لأن بجد أنا مش مطمنة له... ولا ليك. وحاسة إن في سر كبير مخبيه.
بصلها رياض بتوتر، بينما كملت هي:
ريماس
وحاسة... إن جبل يبقى أخوك يا رياض.
اتسعت عيون رياض بصدمة، وبصلها وهو مش مصدق.
رياض
إنتِ جبتي الكلام ده منين؟
ريماس بحزن
يعني كلامي صح، وجبل يبقى أخوك، مش كده؟
تنهد رياض بهدوء، وبعدين بص لريماس.
رياض
أيوة يا ريماس، جبل أخويا من الأب.
مي بصدمة
يا نهار أسود يعني الراجل اللي شبه العفريت ده أخوكي يا ريماس؟
رياض بهدوء
لا، مش أخوها.
ريماس باستغراب
مش أخويا إزاي وهو أخوك؟
بصت له بصدمة، واتجمعت الدموع في عيونها.
ريماس
ولا أنا اللي مش أختك، وحياتي كلها كانت كدب في كدب.
رياض بدهشة
إيه الهبل اللي بتقوليه ده؟ إنتِ أختي يا هبلة، وماليش غيرك.
مي
إنت ناوي تجننّا ولا إيه؟ إزاي أختك، وجبل أخوك، وريماس مش أخته؟
بص رياض لريماس بحزن وهو بيقول:
رياض
أظن جه الوقت اللي تعرفي فيه كل حاجة يا ريماس... الراجل اللي رباكي من صغرك مش أبوكي الحقيقي.
ريماس بصت له بصدمة أكبر، ورياض ما سابش لها فرصة تقول حاجة، وكمل كلامه.
رياض
أمي، الله يرحمها، كانت الزوجة الثانية لأبوي، وطلقت منه خمس سنين، واتجوزت أبوكي ياسر، كان ابن عمها، وجابتك منه. وأبوكي الحقيقي مات في حادث، وإنتِ عندك شهرين. وبعد ست شهور، أبويا رجع اتجوز أمك تاني لما أم جبل ماتت. وللأسف ما اتغيرش، وفضل بالجحود ونفس المعاملة. والباقي إنتِ عارفاه.
غرقت الدموع عيون ريماس، وقالت بحزن:
ريماس
وليه ما عرفتنيش كل ده؟
رياض
خوفت، وخصوصًا إني عارف طريقة تفكيرك، وما كنتيش هتحبيني وتعتبريني أخوكي من قلبك زي دلوقتي.
ريماس بصت له بحزن، وقامت من مكانها وجريت على غرفتها وهي بتبكي… قام رياض بسرعة وهو بينادي عليها.
رياض
ريماس... استني.
كان هيمشي وراها، لكن مي مسكته من دراعه وهي بتقول بحزن على صاحبة عمرها.
مي
سيبها لوحدها لحد ما تهدى، أفضل. مش هتسمع من حد حاجة دلوقتي.
بص لها رياض، وبعدين بص ناحية غرفة ريماس بقلق.مي بصت له بشك.
مي
عندي سؤال محيرني يا رياض... جبل عاوز إيه من ريماس؟ وإيه الاتفاق اللي كان بيقول عليه؟
بص لها رياض وسرح في ملامحها من غير ما ياخد باله.
مي بصت له باستغراب.
مي
مالك؟ بتبصلي ليه كده؟ في حاجة؟
خد رياض باله، وبص لها بإحراج وهو متوتر.
رياض
لا، مافيش حاجة... بس سرحت شوية.
مي
أتمنى ترد على أسئلتي. ريماس مش بس صاحبتي من الطفولة، دي أختي اللي ما جابتهاش أمي، وأي حد هيفكر يأذيها أنا هاكله بسناني، حتى لو كان إنت يا رياض. وأتمنى ما تحطش ريماس في لعبة سخيفة بينك إنت وأخوك.
رياض بهدوء
للأسف، هي دخلتها خلاص، سواء بمزاجي أو غصب عني.
مي بحنق
يعني إيه؟ إنت ناوي تضحي بأختك علشان تراضي أخوك؟
_______
في شوارع البلد من بعد المغرب، كانت ريماس بتتمشى وهي سرحانة في الزرع اللي حواليها، ومش واخدة بالها من مجموعة الشباب اللي ماشيين وراها بيتغزلوا في جمالها. كان جبل معدي بالصدفة، قاعد على ظهر حصانه. قرب منها وهو بيقول بغضب لما شاف الشباب وراها.
جبل
إنتِ بتعملي إيه بره البيت لدلوقتي؟ إيه، رياض باشا مش عارف يحفظ الأمانة لصحبها لحد ما ناخدها؟
الشباب أول ما شافوا جبل خافوا منه ومشيوا. ريماس بصت له بغيظ.
ريماس
وإنت مين، إن شاء الله، علشان تقولي أطلع إمتى وما أطلعش إمتى؟ أوعى تفكر علشان إنت أخو رياض هتعمل اللي على مزاجك وكلمتك هتمشي علي وتعمل عليا أخويا الكبير والجو ده.
بص جبل لها باستغراب.
جبل
عرفتي الكلام ده منين؟
ريماس
وإنت مالك؟ هتتصاحب عليا ولا إيه؟
سابته ومشيت، وجبل فضل واقف شوية وهو بيتمتم.
جبل
هتكون مراتي إزاي دي؟ (ضحك) لسانها، ما شاء الله، أطول منها، اللي قد حبة الفلفل الكوبي دي.
جري وراها بالحصان.
جبل
استني يا حضرت الدكتورة، كنا جايين قاصدينك في خدمة.
بصت له ريماس بغيظ.
ريماس
مش خدامة عندك عشان أقدي لك خدمات.
جبل
بس ده واجب، مش خدمة. على حسب علمي إنك دكتورة، مش كده برضه؟
ريماس بغرور
أيوة، دكتورة ريماس.
جبل نفخ بزهق.
جبل
أستغفر الله العظيم وأتوب إليه... يا مصبر الوحش على الجحش، صبرني.
ريماس بغضب
قصدك إني جحش يعني؟
جبل ضحك.
إشمعنى الجحش بس؟ كويس إنك عارفة نفسك.. بس المهم، محتاجك في شخص غالي على قلبك قوي، تعب شوية وطالب يشوفك، وبالمرة تشوفي إيه اللي عندها.
ريماس بصت له باستغراب.
ريماس
وهيكون شخص غالي على قلبي بيعمل إيه عندك؟ ومين هو الشخص ده؟
مد جبل إيده لها علشان تركب الحصان قدامه.
جبل
تعالي معايا، وهتشوفي بنفسك.
ريماس بصت له بتردد، وفضولها غلبها تعرف قصده على مين. مدت إيدها، وجبل سحبها وقعدها على ظهر الحصان قدامه، وتحرك بالحصان، وشعرها بقى يطير على وشه. بص لها بتوهان وهو سرحان فيها.
جبل
إيه رأيك في الموضوع اللي رياض قالك عليه؟
ريماس بصت له باستغراب، وفكرت إنه قصده على اللي رياض قاله لها.
ريماس
حتى لو اعترضت، ده الواقع اللي لازم أقبله في النهاية.
جبل
يعني إنتِ موافقة؟
ريماس
وأنا مين عشان أرفض أو أوافق على حاجة زي دي؟
ابتسم جبل.
كلام عين العقل.. يبقى كلامي مع رياض راجل لراجل.
ريماس بصت له باستغراب، بس سكتت أول ما عيونها جت في عيونه، وكل واحد سرح في جمال التاني. ريماس اتكسفت ونزلت وشها للأرض، وجبل ابتسم على كسوفها وبص قدامه.
______
رجع رياض من شغله في وقت متأخر. اتفاجأ بمي واقفة قدام الباب، وأول ما لمحته جريت عليه وهي بتقول بقلق.
مي
رياض، الحمد لله إنك جيت، مستنياك من بدري.
رياض
خير، في حاجة ولا إيه؟
مي
ريماس قالت إنها مخنوقة شوية وحابة تطلع لوحدها تتمشى، ومن وقتها لسه ما رجعتش.
بص رياض لساعته وهو بيقول باستغراب.
رياض
طلعت من إمتى؟
مي بحنق
إنت غبي ولا إيه؟ هو إيه اللي طلعت من إمتى؟ هو المهم لسه ما رجعتش ليه لحد دلوقتي؟
بص لها رياض وهو بيهز راسه بيأس.
رياض
بغض النظر عن قلة أدبك ولسانك اللي عاوز قص، بس معاكي حق.
مي بغرور
طول عمري بجيبها في الجون.
رياض
واضح.
يطلع تليفونه علشان يتصل بريماس، يتفاجئ بالتليفون في إيد مي.
رياض
تليفون ريماس بيعمل إيه معاكي؟
مي بحنق
يا فصاحتك يا خويا، ما هو لو تليفونها معاها هقلق ليه؟ ما كنت كلمتها وخلصت من أم غبائك ده.
رياض
إنتِ، ما شاء الله، مسحتي بكرامتي الأرض الخمس دقايق اللي وقفهم. أنا طالع أشوف ريماس راحت فين أحسن من التهزيق ده.
مي
استنى، رجلي على رجلك.
رياض
إذا كان أنا طفشان من لسانك.
مي حطت صباعها على بوقها.
مي
وغلاوتك ما هتسمع نفسي.
رياض بحنق
على أساس إني غالي يعني؟ عدي قدامي، ولو سمعتلك صوت هاخدك أسجنك، اتفقنا؟
مي بصت له بخوف.
مي
وعلى إيه؟ روح مع نفسك، أنا مش واثقة في لساني إنه هيسكت.
رياض بص لها وضحك وهو بيهز راسه بيأس.
رياض
مجنونة رسمي، وهتجني أهلي معاكي.
رياض اتحرك علشان يطلع، مي اتسحبت وراه ومشيت وراه. رياض بص لها وضحك.
رياض
على أساس يعني إني مش شايف خيالك سابقني يعني.
مي بكسوف
ونبي خدني معاك عشان قلقانة على الزفتة أختك، وإنت بطل غباوة، وأنا مش هغلط فيك، اتفقنا؟
رياض
يا مصبر الجحش على الوحش، صبرني.
مي بغضب
قصدك إيه؟ إني جحشة؟
رياض
قولت جحش، مذكر، أنا جيت جنب المؤنث؟
مي بتفكير
خلاص، أنا آسفة يا عم.
رياض
طيب قدامي يا حمار.
مي
أنا حمار؟
رياض بسخرية
حمار مذكر، إنتِ مؤنث ولا مذكر وبتضحكي علينا؟
مي بصت له بغضب. رياض ضحك عليها وسبها ومشي، وهي جريت وراه وهي بتنفخ بغيظ.
______
في سراية جبل
ريماس دخلت مع جبل وهي بتبص للمكان بدهشة. وقعت عيونها على صورة جبل وأبوه، واتنهدت بحزن، ومشيت وراه وهي بتمسح دموعها. اتسعت عيونها بصدمة أول ما جبل فتح باب الغرفة وشافت جدتها نايمة على السرير.
ريماس
ستي بتعمل إيه هنا، وجات عندك إزاي؟
جبل
مش مهم، المهم ادخلي شوفي الحجة مالها، وإيه اللي تعبها.
ريماس جريت على جدتها وهي بتزعق له.
ريماس
أقسم بالله لو كنت عملت فيها حاجة، لأقتلك.
جبل دخل وراها وهو بيرد عليها بحنق.
جبل
على أساس يعني إني قتال قتلة، وماشي أقتل في خلق الله.
ريماس جريت على ستها وفحصتها، وبعدين اتنهدت بهدوء.
ريماس
الحمد لله، سخونة عادي.
جبل بسخرية
طيب الحمد لله، طلعت براءة من تهمك اللي بترميها في وشي دي.
ريماس بجمود
ستي بتعمل إيه معاك يا جبل، وعاوز منها إيه؟
جبل
والله اللي أنا عايزه خلاص خدته، وستك ضيفة عزيزة، مش أكتر ولا أقل، وهتفضل معايا لحد ما إنتِ تيجي بالسلامة.
ريماس باستغراب
أجي فين؟ مش فاهمة.
جبل
تيجي فين إيه؟ هتيجي بيتي طبعًا، أمال هتبقي مراتي إزاي؟
ريماس بصدمة
نعم؟ أنا هبقى مراتك إنت يا جاهل يا معفن إنت.
فجأة جبل مسكها من فكها بغضب.
جبل
بت إنتِ، لازم تتعلمي تقصري لسانك ده، وتعرفي إمتى تتكلمي معايا، وإمتى تحطي جزمة في حنك اللي بينقط سم ده.
ريماس اتجمعت الدموع في عيونها، وجسمها كله بقى يرتعش وهي بتبص له بخوف. جبل بعد عنها بسرعة وهو بيقول بقلق.
جبل
أنا آسف، مش قصدي أخوفك، بس إنتِ اللي بتعصبيني عليكي.
ريماس بدموع
أنا بكرهك، وبكرهكم كلكم.
سابته وجريت على بره وهي بتعيط. جبل قلق عليها وطلع وراها بسرعة..
_______
في عربية رياض، رياض بيسوق وقاعدة مي جنبه بيدوروا على ريماس. مي بصت له بزهق.
مي
هتفضل تلف كده كتير؟ دي لو اتخطفت زمانها اتقطعت، وحضرتك بتلف كده.
رياض
هو ده اللي هتقعدي ساكتة؟ وبعدين هو إنتِ مفكرة الخطف بالساهل يعني؟
مي
ما هو إنت رياض باشا، والمجرمين حواليك زي الدبان. وبعدين الزفت اللي شبه العفريت ده، دبور دكر، وأكيد خطفها تاني.
رياض ضحك.
أكيد قصدك على جبل. ده لو سمعك هيسلخك بالحي.
مي بلعت ريقها بخوف.
مي
هو لساني اللي ينشك ده اللي هيجيب أجلي قريب.
رياض
في دي معاكي حق والله.
مي
طيب يا خويا، سيبك من لساني، أنا هتصرف معاه وأخلص، شوف أختك مين اللي خطفها.
رياض بص لها للحظة، وبعدين قال بهدوء.
رياض
هو إنتِ بجد بتعتبريني أخوكي؟
مي
مش فاهمة قصدك إيه، بس إنت أخو صاحبتي، وأعرفك من وأنا صغيرة، ومش عندي إخوات، فبعتبرك إنت وريماس إخواتي بجد.
رياض
بس أنا مش عاوز أبقى أخوكي، أنا عمري ما اعتبرتك أختي. أنا بحبك.
مي بصت له بصدمة.
مي
نعم؟ يعني إيه بحبك دي؟
رياض ضحك.
يعني نتجوز ونجيب شوية مجانين حلوين زيك كده.
مي
رياض، ما سمحش لك تهزر معايا الهزار الرخم ده.
رياض بحزن
ليه؟ مفكراني بهزر؟ أنا بجد بحبك من وإنتِ طفلة. إنتِ كبرتي قدام عيني، وحبي ليكي بجد حقيقي، وأنا جاهز أخد خطوة وأتقدملك. أنا بجد بحبك.
مي بكسوف
مش بالساهل يا رياض، أنا عمري ما شوفتك غير أخويا.
تنهد رياض بحزن.
رياض
تمام يا مي، براحتك، مش هجبرك على حاجة، بس ممكن أعرف سبب الرفض؟ يعني إنتِ مش حباني علشان شايفاني أخوكي، ولا في حد في حياتك؟
مي
ولا حد ولا الاتنين، طول عمري وأنا ما أعرفش غيرك. وبعدين أنا مش رفضاك، بس النقلة دي تقيلة عليا شوية، فاهم؟
رياض بص لها بحب وهو مبتسم على عفويتها. مي بصت له بكسوف.
مي
بتبص لي كده ليه؟
رياض
آسف، هغمض، بس بجد لو عيوني غمضت، قلبي هيغمض عنك إزاي؟
مي بلعت ريقها بكسوف.
مي
هااا، إنت بقيت بتقول شعر يا ريس؟ فين هيبة الحكومة؟
رياض ضحك عليها. مي بصت بالصدفة قدامها، شافت ريماس مقبلة عليهم وهي بتجري وتعيط.
مي
وقف، وقف، ريماس أهي.
رياض وقف العربية أول ما شاف ريماس. مي نزلت بسرعة وجريت عليها.
مي
ريماس، مالك؟ حصل إيه؟
فجأة ريماس حضنتها وهي بتعيط. رياض قرب منها بسرعة وحط إيده على رأسها.
رياض بقلق
ريماس، مالك؟ حصل إيه؟ حد عملك حاجة؟
ريماس زقت إيده من على رأسها. رياض بص لها بحزن. وفجأة جه صوت جبل من وراهم.
جبل
ما تخفش يا رياض بيه، أختك دلوقتي من حرمان جبل، وما حدش في البلد يقدر يقرب منها.
رياض بص له باستغراب، وبعدين بص لريماس. مي بصت لجبل بحنق.
مي
أنا قولت البلد دي مسكونة بالعفريت ده، ما حدش مصدقني.
جبل بحنق
ما عفريت، لا بني آدم. أنا همشي دلوقتي، وزي ما اتفقنا، بكرة هجيب المأذون يا رياض، ونكتب.
مي بصت لرياض بصدمة. ريماس بعدت عنها وهي بتقول بدموع.
ريماس
إنت بجد هتجوزني للجدع ده؟
رياض بحزن
مش عندي خيار تاني، إنتِ مش عارفة حاجة. حياة ستك في كفة، وجوازك منه في كفة.
ريماس بصت لجبل بحنق.
ريماس
إنت خاطف ستي، وجيت تاخدني أكشف عليها، وتقولي ضيفة عزيزة؟
جبل
والله هي ضيفة عزيزة مكرمة لحد ما تدخلي بيتي وتبقي مراتي، غير كده هنقف ناخد عزاها معاكم.
ريماس بغضب
يعني إيه؟ هتغصبني على الجواز منك؟
جبل
أستغفر الله العظيم وأتوب إليه، كله بالغصب إلا الجواز، برضا.
مي بسخرية
والتهديد، والخطف، والابتزاز ده يا مولانا، مش أستغفر الله العظيم وأتوب إليه برضه؟ ولا إنت الوحي مش بينزلك غير في المصايب ياشبه الغول انت.
جبل بص لرياض وهو بيقول بحنق.
جبل
بقولك يا رياض، هي البت المخبولة دي تلزمك في حاجة، ولا أخلص عليها؟ علشان أنا ماسك نفسي عنها بالعافية.
مي جريت تستخبى ورا رياض.
مي
ما تنساش، إنت لسه قايل إنك بتحبني.
ريماس بصت لهم بصدمة، ورياض ضحك.
رياض
معلش بقى يا جبل، مرة تانية.
جبل بص لريماس بصمت للحظة، وبعدين تنهد.
جبل
طيب، أنا همشي دلوقتي، وزي ما قولت هجيب المأذون ونكتب بكرة، وكل واحد عقله في راسه يعرف خلاصه.
جبل خلص كلامه وسابهم ومشي. مي بصت لرياض باستغراب.
مي
إنت بجد ناوي تجوز ريماس للجدع ده، ولا بيخرف؟
رياض بص لريماس بحزن.
رياض
ريماس، أنا عمري ما أجبرتك على حاجة، بس إنتِ بنفسك سمعتي اللي قاله، والاختيار ليكي.
ريماس بصت له بحزن.
ريماس
أنا تعبانة... ممكن حضرتك تاخدني على البيت؟
رياض
حضرتك؟ ومن إمتى الاحترام ده؟
ريماس
من الوقت اللي قررت تضحي بسعادتي علشان ترضي أخوك. ما هو أنا اللي طلعت غريبة في وسطكم.
خلصت كلامها وجريت على العربية وهي بتعيط. رياض هز راسه بحزن.
رياض
أدي اللي كنت خايف منه حصل.
مي مسكت إيده بعفوية.
مي
ما تزعلش من ريماس يا رياض، هي بس علشان زعلانة، وكمان النقلة دي مش سهلة عليها. هتاخد فترة على ما تستوعب اللي بيحصل ده. بس أنا مش فاهمة، الجدع ده عاوز منها إيه؟
رياض بهدوء
أظن عاوزها هي بس... ريماس مش فاكرة حاجة تجمعها بجبل.
مي باستغراب
قصدك إيه؟ مش فاهمة.
بص رياض ناحية ريماس اللي قاعدة في العربية بتعيط.
رياض
بيحبها... زي ما أنا بحبك. بس الاختلاف إن جبل اختار طريق غلط علشان يوصل لها.
مي بصدمة
إنت أهبل ولا إيه؟ حب إيه ده اللي ييجي من يوم وليلة؟
رياض
جبل هو اللي ربّى ريماس لحد ما بقى عندها عشر سنين، وكانت متعلقة بيه... حتى أكتر مني. بس للأسف، ريماس مش فاكرة مين هو جبل، ولا فاكرة أي حاجة تربطها بيه. وللأسف، شايفة أبوه فيه.
مي
انا دماغي عملت ارير ومابقتش فاهمه حاجة خالص.
#الفلاح_والمخطوفة
قصة رومانسية ممتعة.
#الكاتبة_صباح_عبدالله_فتحي
#قصص_قصيرة_كوميدي_رومانسي_كاملة
اللي عاوز الجديدة ينزل بسرعة يتفااااااعل.. وحاجة كمان يا جماعة مهم جداً متابعة لصفحة لو عاوزة تتابع القصة… طيب اي اللي هيحصل لو تابعة الصفحة الفيس من نفسه في كل حلقة جديدة يبعتلك اشعار لحد عندك يعرفك ان اللي انت متابعة نزل جديد وهكذا..
بعتذر جداً على التأخير
فاق رياض من شروده على صوت ريماس وهي بتهزه…){kind=link}
تعليقات
إرسال تعليق