الظرف المفقود الحلقه الثالثه حصريه وجديده

الظرف المفقود الحلقه الثالثه حصريه وجديده 

لما نزلو كلهم من الدور الثاني و هما يسمعوا في الدوشة و الصوت العالي ..

كانت " فطيمة واقفة علي المحامي نوح وهيا تتكلم بصوت عالي و تبكي و فجأة لما لقتهم نازلين تلفتت و هيا حاطة عينها علي عليا و قعدت تأشر عليها و تبكي ..

أهيا يا أستاذ نوح هيا السبب هيا اللي قالت لي بنتي أقعدي باتي ، عندنا ناس ..

وقدمت جهتها و قعدت تقول لي عليا و هي تبكي ومنهارة و عليا مصدومة و مش فاهمة شيء..

_ فطيمة :- وينهم الناس أاا وينهم تي حتى عيلتكم مافي ولا واحد منهم قعد بعد الجنازة ..😭 خليتي بنتي تقعد عندكم بش تعول علي الضيوف ولا في ضيوف لا شي بش تقتلوها 😭😭😭😭😭 ..

جاوبتها عليا و هيا مصدومة 😲 😲 و تتفرج علي الرجالة اللي يتحاوسوا قدامها يمين ويسار..

_ نقتلوها 😲😲 من هي اللي نقتلوها مافهمت شيء ..

وهني قدم نوح وقاللها ..

_ خالتي فطيمة إتصلت بيا و هيا تعيط و قالتلي بنتي ميساء  لقيتها مدبوحة في دار الجنان الخدمية ، و أني بلغت و جيت ..

توترت عليا لما سمعت الخبر و إرتسمت علي وجهها علامات مختلطة من الدهشة و الخوف وبصوت يرتجف قالت وهيا تبلع في ريقها بهدوء و تحاول تتماسك ..

_ مدبوحة ، كيف و حني وين و من بيخش ويدبحها و علاش ، خانب مثلاً ..

_ نوح :- يا أستاذة عليا ، الخانب بيخش يدبح بنتها و يطلع من غير مايمس شيء و لا يقيم حتى كاشيك من الحوش ..

_ عادي ممكن تلقاته أول ماخش فاقتلها و توتر و خاف بعد ماقتلها وهرب .

_ ولنفترض خاش بيخنب و فاجأته إطر يقتلها و هرب ، تصرف زي هذا ترا تخايليه بروحك تفاجيء شخص مجرم أو خاش بيخنب معنها توتر و الشخص المتوتر من عامل المفاجئة يطعن ويهرب أو فاجئاته خبطلها راسها بي حاجة وهرب ..

مش يخششها لي دار الجنان و يدبحها دبح و يغطيها بي قلوني وركينة يصبه عليها وبعدين يهرب  ..

_ باهي من بيقتلها..

_ هاذي مهمة البحت الجنائي توا قاعدين ياخدو في الأدلة..

وهما في نفس الوقت يتناقشوا كانوا ضرار و ضياء واقفين يسمعوا و إدخل ضياء و هو مضايق ماللي صاير وقال ..

_ إنقتلت عندنا معناها بيشدوها في جرتنا و يبدوا يكركرو فينا عالتحقيقات و الله ماوقته هي أني راهو بنهرب ناخد حوايجي ونهج ..

رد عليه ضرار بغضب و هو يهدد فيه ..

_ أشحط روحك و أسكت خيرلك لا يجوا يقيموك من بينا إنت أول واحد ..

_ علياء:- اليوم عايدة جاية من المطار لازم واحد فينا يجيبها ..

_ ضرار :- تو هذا وقته هونا تاخد تاكسي ..

_ نوح :- تو أني نجيبها كيف تجي بروحها وتاخد تاكسي بروحها ..

_ ضياء:- تو هيا سافرت بروحها و كملت قرايتها بروحها بتكيد في تاكسي ..

_ نوح:- أول حاجة هيا ماسافرتش بروحها وصلتها أمك الله يرحمها و خوك ضرار و عاشت في سكن طالبات وسط ناس مسؤلين و المفروض لما توا أطرت تروح بروحها في الظروف هاذي أقل شي حد يراجيها في المطار ، و يروح بيها ..

وهو كيف كمل كلمته جي قاطعهم  المحقق و هو يقول ..

_ المحقق :- السلام عليكم خبير الأدلة الجنائية خدي كل شيء و كمل لو ممكن كلكم تفضلو معانا للتحقيق ..

_ علياء :- حني عندنا حالة وفاة و ربي يعلم بحالنا علاش التبهديل كان في حاجة قولهالنا هني ..

_ المحقق:- يا أستاذة هذا إجراء قانوني  و روتيني ضروري منه لازم أقوال الناس اللي كانوا موجودين ..

وهني إدخل نوح .. 

_ بعد إذنك أني محامي العيلة لو ممكن تاخد أقوالهم هني مراعاة للظروف العائلة كيف طالعين من صدمة فقدان أمهم ..

و توا الضحية تعتبر بنتهم متربية في حوشهم 

ولو في إي إشتباه قانوني تقدر تتخذ الإجراء اللي تشوفه مناسب ..

_ مافيش مشكلة تفضلو لو سمحتوا خلي الفريق يكمل شغله و حني نتكلموا شوية ..

وتلفت لي المساعد بتاعه كاتب التحقيق و مشوا للصالون الكبير الفخم اللي معبي تحف و حاجات غالية وكاتروات حتى لما ضابط التحقيق خش قعد يقلب في عيونه منبهر بالفخامة و الرقي و أشر للكاتب اللي معاه يجبد طاولة صغيرة من الطاولات الفخمة اللي في الصالون للضيافة..

وجبد الكاتب الطاولة و قعمز و الكل قعمزو وهما متوترين عليا و ضياء متوترين لكن ضرار باين عليه علامات الغضب ..

وقعد المحقق يستجوب فيهم والكل نكر معرفته بوجود ميساء في الحوش وكل واحد يحكي علي اليوم اللي قبله كيف كان لعند ركوب كل واحد فيهم لي داره و قت النوم ..

هني خشت فطيمة تعيط و تقول ..

_ بنتي يا أفندي عمرها ما باتت برا الحوش و يوم العزي قالتلي علياء خلي ميساء تجي بش تعاونك و في نهاية اليوم وحني مروحين طلبت منها تبات بش تعول علي الضيوف برغم مافيش ضيوف ..

و تلفتلها المحقق وقاللها ..

_ وباهي علاش هيا تبات علاش ماطلبتيش إنتي تباتي في مكانها بمأن بنتك عمرها ماباتت برا ..

_ أني عندي راجل عاجز و مريض مانقدرش نغيب عليه يوم كامل..

تلفت المحقق لي علياء وقاللها ...

_ إنتِ طلبتي من الضحية تقعد تبات عندكم ..

_ علياء :- طبعاً لا يا أفندي ماطلبتش و لا عمري طلبت حتى من فطيمة تقعد حتى لما يبدأ الحوش معبي و عندنا مناسبة تجهز كل شيء و الحوسة بتاع نهاية اليوم اللي يبدا قبله فيه مناسبة هي تجي الساعة ثمانية الصبح كأنها بايتة قصدي معقولة علي نومة الليل مستحيل .

_ فطيمة :- تكذب و الله كذابة هيا اللي قالتلها أقعدي باتي حني مازال في ناس بيجو من مكان بعيد بش يعزونا..

_ علياء :- أولاً إحترمي نفسك كيف تتكلمي معاي ثانياً إنتي و بنتك الكذابات ..

_ فطيمة :- حرام عليك بنتي متوفيه تقولي عليها كذابة حسبي الله ونعم الوكيل..

_ فيك إنت ياكذابة علاش تكذبي كان نبيها تبات راني جيتك إنتِ طول لكن إنتِ تكذبي بش تبرري لي بنتك تصرفاتها.

_ المحقق :- كيف تصرفاتها في شني .

_ علياء :- مش أول مرة يا أفندي ميساء هاذي تكذب علي أمها ، وتصرفاتها مش مزبوطة .

منها مرة كذبت علي أمها و قالتلها خالتي بهيجة تبيني نمشي معاها للجبانة بش ترمم قبر عمي فريد ..

_ المحقق:- من بهيجة ومن فريد. ..

_ جاياتك بالدوة أمي الله يرحمها إسمها بهيجة علي أساس بتمشي للجبانة بش ترمم قبر بوي الله يرحمه بوي إسمه فريد ..

_ المحقق:- باه ..

_ وهي تكذب أمي ماتزورش في قبر بوي هاذي عادة قديمة كانت ادير فيها لما كنا صغار لكن من وقت لما خلاص إقتنعت إن زيارة القبور مكروهة تصدق أو تقراله قرآن من الحوش حتى يوم فكرت ترممه مشت للراجل بتاع الأوقاف أعطاته مبلغ و رممه و من مدة طويلة ومعاش كررتها .

المهم هيا كاذبة علي أمها و طلعت من حوشهم علي أساس جايتنا بش تمشي مع أمي وهي الله أعلم وين مشت ..

_ فطيمة :- حسبي الله ونعم الوكيل فيك تتبلي علي بنتي وهيا في دار الحق ..

تكلم ضرار وهو موجه كلامه لي فطيمة ..

_ حالة الهياج صوتك العالي علينا مش حايجيبلك حق بنتك أهدي و تجاوبي مع التحقيقات بالشوية و اللي عنده حق تو ياخده ..

شبحلها المحقق  بنظرة رضا علي الكلام اللي قاله و هو مقعمز ضرب إيديه الزوز علي رجليه وهم بالوقوف وهو يقول ..

_ باهي ياجماعة هكي التحقيقات الأولية تمت .

وتلفت لي نوح  وجهله الكلام ..

_ هاذي تحقيقات أولية و أني نعتبرها دردشة لو في أي إستجواب ثاني بالخصوص ضروري من الحضور في النيابة بشكل رسمي هذا قانون يا أستاذ نوح ..

_ حاضر يا أفندي تحت أمرك ..

طلعوا كلهم و رفعوا معاهم ميساء القتيلة في سيارة الإسعاف اللي ماشية للمشرحة..

و أمها فطيمة وراهم بالسيارة ..

و قعدو نوح و ضرار و ضياء و عليا مع بعض ..

وتكلم ضرار ..

_ هذا ماناقص قضية قتل و في حوشنا ..

_ ضياء:- أني مانبيش نقعد ..

_ نوح :- كيف ماتبيش تقعد وين بتمشي ..

_ أعطيني أي مبلغ توا و أني نوعدك ..

وتلفت لي خوته ..وكمل ..

_ نوعدكم كلكم معاش نطالبكم بي ورث أعطوني توا فلوس من الحساب ..

_ ضرار:- أول حاجة أشحط روحك ستين ألف مرة نقولك فيها .. ثاني حاجة مافيش حاجة إسمها ناخدو من الحساب كله أنحصر ضمن الورث ..

_ يعني شني أني بنقعد هني في الهم هذا و الله ماصارت " أعطيني حتى من حسابك الخاص ..

_ علياء:- أهدى شوية وترتنا معاك خيرك أصبر تو نشوفوا شن في بالك يعرفوا القاتل و تنتهي الحكاية ..

كمل ضياء كلامه و هو متوتر وخايف و بدي يوتوت و بصوت عالي يقول..

_ يعرفوه و الله ما عرفينه هاذي جريمة مدبرة اني مادخلي في شي اني نبي فلوس توا و نسافر مانبيش نقعد ولا دقيقة ..

و هني جاه صوت قوي و حازم و فيه غضب ..

_ ضرار:- قتلك سكر فمك و أسكت شن تحساب روحك كان أعطيتك فلوس عادي بتطلع و تسافر و إنت من المشتبه فيهم و قاعدين يحققوا معاك و لا تبي تثبت عليك التهمة ..

وهني زاد ضياء هبل و قال ..

_ أااه مشتبه بيهم لاااالالالااااا أني مادخلني في شيء علاش المشتبه فيهم شني حني قتلناها وبعدين شن تثبت عليا التهمة درتوهالي تهمة ..

_ علياء :- ياوخي إفهم ميساء إنقتلت في حوشنا هذا إجراء طبيعي حني كلنا مشتبه فينا وبعدين حني مانبوش نثبتوا عليك شيء تصرفاتك و محاولة هروبك تخليهم يشكوا فيك و إنت تبدا ماليكش دخل .. وبعدين حني كلنا ماليناش دخل وماعندناش علاش بنقتلوها تي هيا كانت فسطنا زي بنتنا شن بنودولها.. فهمت .. " أرجوك أهدا و خلي الأمور تمشي طبيعي و ماترترناش معاك ..

_ ضرار:- من موضوع ظرف إختفي معاش نعرفوا وين لي جريمة قتل..

وفجأة يجيهم صوت من وراهم وهما واقفين ..

_ أو مافيش ظرف نهائي وهذا موضوع يجري بيكم بيه وخلاص ..

تلفتوا كلهم لمصدر الصوت و لقوا قدامهم ..

يتبــــع ...