الظرف المفقود الحلقه الرابعه حصريه وجديده

الظرف المفقود الحلقه الرابعه حصريه وجديده 

لما ضرار قال 

_ من موضوع الظرف إللي إختفي و معاش نعرفوا وين ؛  لي جريمة قتل..

فجأة يجيهم صوت من وراهم وهما واقفين ..

_ أو مافيش ظرف نهائي وهذا موضوع يجري بيكم بيه وخلاص ..

تلفتوا كلهم لمصدر الصوت و لقوا قدامهم ..

مؤيد راجل علياء واقف و في إيده شنطة سفر .

_ علياء :- إنت أمتى جـيت ..

_ مؤيد :- اليوم الصبح طيارتي وصلت قلت نجي نطمن علي صغار خالي اللي يغرقوا في شبر مية ..

_ ضرار :- طول عمرك تحب المفاجأت ..

قدمت عليا طول قامتله الشنطة و جبداته من إيده وقالتله ..

_ عليا:- تعالى ، تعالى معاي نركبوا فوق ..

 علق ضياء بينه و بين نفسه ..

 " طحطحي الحرافة معانا حني بس "..

_ نوح:- نستأذن أني نمشي لي عايدة للمطار نجيبها و نجي ..

تلفتوله ضرار و ضياء بعدم إهتمام وفاتوه و مشو من بحداه ..

_ نوح مع نفسه :- مصح وجوهكم أختكم يروح بيها البراني و إنتو مقعمزين ..

و في دار النوم عند عليا .. وهي تعلق في حوايج مؤيد..

_ علاش ماكلمتنيش و قتلي مروح راهو جبتك أني من المطار ..

_ شن صار في الوصية اللي قلتيلي عليها لقيتوها..

_ لا فص ملح وذاب..

_ باهي من قال وصية .. باهي من قال موجود الظرف هذا أصلاً : و مش جرية من نوح ..

_ وعلاش شن مصلحته..

_ وين نندري " هذا محامي يلعب كيف مايبي ..

_ تي شن هيدقا يلعب ، وبعدين هذا ليه سنين مع  أمي في الشركة وبدي محامي العيلة وهي الله يرحمها كانت تثق فيه ..

إنتَ ماتعرفش اللي صار بعد إختفاء الظرف جتنا رسالة و فيها صورة فيها راجل غريب و مكتوب فيها دورو وراء الراجل صاحب الصورة .

و اليوم الصبح نضنا علي قتل ميساء لقيناها مدبوحة ؛ في حاجات تصير مش مفهومة ..

_ الموضوع هذا وراه خوك ضرار..

_ ضرار شن دخله ..

_ نسيتي ضرار شن دار في أمك من سنتين ..

_ لا مانسيتش لكن الموضوع خلاص إنتهي و ضرار ندم و أمي سامحاته..

_ ههه مصدقة إنتِ تي هذا سوسة من تحت لتحت ؛ واحد خبيث . ولخباط و شراني ..

_ لالا إنت شادها في جرته و تحارب فيه مش ناسي اللي داره فيك زمان ..

_ باهي باه تي إنتِ عندك خوت إسمهم الأخوة الأعداء كل واحد يراجي لي الثاني في غلطة ..

ولا تحسابي ضياء حتى هو مسكين ، ضياء هذا مستعد يبيعكم كلكم علي خاطر الرزق ..

أختك عايدة جاية بش تاخد ورثتها و تغبر معاش تشوفوها طول عمرها أنانية و ماتحب إلا نفسها ..

_ مش مهم هذا كله مايحمنيش أني اللي يهمني حصتي ؛ و لو في ظرف ثلاتة أيام ماطلعش الظرف أني بنرفع قضية عليهم كلهم ..

_ غر أهدي أهدي طول عمرك متهورة ؛ كل شيء يجي بالتكتيك..

_ مافهمتش و شن هو اللي بديره..

_ أصبري تو تشوفي ..

.....................................................

......        " في سيارة نـــوح "

_ أنستينا شن أخبار كندا ..

_ تمام كويسة ؛ بنسألك فتحتوا الوصية..

_ لا مازال ؛ للأسف الوصية إختفت ..

_ نعم كيف .. كيف إختفت و إنت وين مش إنت  محامي العيلة ..

_ أني محامي العيلة مش حارس حوش العيلة ؛ الظرف إختفي من عندكم في حوشكم . .

_ كيف ظرف زي هذا المفروض عندك ..

_ كان عندي لكن قبل وفاة أمك بيومين أمك طلباته مني ..

_ أوووف .. تو كيف ندير أني ؛ " أني نبي نرجع ..

_ ترجعي علاش ترجعي مش كملتي قرايتك خلاص علاش بترجعي تسافري ..

_ لا أني مانبيش نقعد هني حياتي و شغلي برا 

_ أمك لما بعتاتك تقري بش تجيبي شهادة و تجي مش بش تعيشي بعيد علي بلادك و عيلتك ..

_ ههه عيلتي " وينهم عيلتي ..

_ كلنا عيلتك يا عايدة ..

_ 😒😒 عيلتي مصلحتي ..

نــــوح بينه وبين نفسه:

_ 😒😒😒 ياخسارة مافيكم حد قلبه علي حد.

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠ 

............ "في مكتب ضابط التحقيق ".....

_ السلام عليكم يا أفندي ؛ هذا التقرير  الجنائي ..

ضابط التحقيق خدي التقرير و بدي يقرا فيه ..

و بعد ماقري قرر يمشي مشوار .. 

...........في حوش العيلة ...............

ضياء ينادي علي عليا و هو واقف في الصالة ..

_ عليا ، عليا ..

_ خيرك خيرك شن في تعيط ..

_ توا حني حالنا بيوقف حتى الماكلة معاش بناكلو و لا شني ..

_ تو إنت قالب الدنيا علينا علي خاطر تبي تاكل 

    مش واعر راه خش الكوجينة إقلي دحية..

_ نقلي شني ، دحية ، و إنتِ شن قاعدة أديري. 

_ علاش أني الطباخة اللي خلتهالك المرحومة و لا شني .. عندك إيدين إخدم روحك و تعود علي غياب الماما ؛ مش معقولة بنشيل همكم و بنفكر حتى في ماكلتكم و شرابكم؛ أرحموني ..

_ ضرار :- خيرك تعيطي ؛ شن في ..

_ خوك يحسابني فاضيتله بش نقعمزله في الكوجينة و نخمم في ماكلته و شن بياكل ..

_ باهي وين المشكلة مش إنتِ أم العيلة باهي من بيطيب بعد فطيمة ..

_ عندك واحد من إثنين ياتخلي مرتك اللي لابدة في دارها تشمر علي درعانها يا تمشي تجيب شغالة ؛ ساهلة ..

_ ضياء:- صح أي خيرها مرتك لابدة ماتبيش تطلع .

_ ضرار :- مادخلكمش فيها ..

_ عليا:- باه خلاص حتى أني مادخلكمش فيا خلوني في حالي و برا إنت وياه جيب شغالة ثانية بلا سحن و ترد مش ناقصتكم ..

قالت عليا كلمتها و مشت و ضرار علق بإستغراب 

_ ضرار:- خيرها هاذي..

_ ضياء:- هو هذا كل مانجي نكلم حد ينوض يعيط ..

هما يعلو في صوتهم و يتعاركو في بعض و في الجهة الثانية خاشة عايدة بالشنطة و معاها نوح و هني تلفتتله عايدة و هيا تقول ..

_ ها تفضل العيلة السعيدة تو هاذو ناس تعيش معاهم ..

جاوبها نوح و هو يشبحلهم و يتنهد كأنه الوضع واجعه ..

_ نوح :- أااااه عندك حق..

وعليا لما قالت أخر كلمة و جت ماشية لقت قدامها عايدة ..

_  عليا :- 😃 عايدة أهلاً حمدلله على السلامه..

_ عايدة :- علو كيف حالك حبيبتي ..

وحضنو بعض و بدو يبكو الزوز و يعزو في بعض علي وفاة أمهم و بعدين قرنت حواجبها و قالتلها ..

_ عليا :- معقولة ماتحضريش جنازة أمك ..

_ و الله ماقدرت نحصل طيارة تعرفي مشكلة الطيران تو حني عندنا طيارة تنزل طول في المطار ماهو من بلاد لبلاد ؛ وبعدين باهي اللي روحت ..

و في نفس الوقت ضرار و ضياء سلموا عليا ..

و علقت عليا علي كلامها..

_ كيف باهي اللي روحتي ..

_ لي من بنروح ترا قوليلي بعد أمي من عندي هني ..

_ عندك حني خوتك ..

_ ماتكذبيش علي روحك كل واحد لاهي في روحه ..

و هما مازال يهدرزو نزلت مرت ضرار سارة ..

_ سارة :- عايدة حمدلله على السلامه..

_ عايدة :- الله يسلمك سارة كيف حالك ..

_ سلامة راسك في ميمتك تاخدي طول عمرها .

_ الله يسلمك..

وهما قاعدين يهدرزو سمعوا تخبيط بالقوة طلعوا فتحوا علي طول لقوا قدامهم فطيمة ..

 تعيط و تقوللهم حسبي الله ونعم الوكيل فيكم شن درتوا في بنتي و تعيط حرام عليكم..

و كيف قاعدة تعيط و تندب و تدعي عليهم جت الشرطة ..

و قف ضابط التحقيق عليهم و قال لي ضياء..

_ ضياء لو سمحت تفضل معانا إنت مطلوب القبض عليك ..

كلهم إنصدموا و قدمت فطيمة و ضربت ضياء كف و قالتله ...

يتبــــــع