الظرف المفقود الحلقه الثانيه حصريه وجديده

الظرف المفقود الحلقه الثانيه حصريه وجديده 

أول ماقرو الرسالة كلهم بدو يشكو في بعض و كل واحد فيهم بدي يتساءل من هو الشخص المجهول و من اللي بعت الرسالة أصلاً ..

و قررو إن مافيش حد يطلع من الفيلا إلا لما اللغز ينحل ..

_ ضرار:- مافي حد يطلع من هني إلا لما يطلع الظرف و نبي نعرف شن سر الراجل اللي في الصورة ..

_ علياء :- مش موضوعي لا ظرف و لا الراجل المجهول ..

وتلفتت للمحامي .. نوح ..

_ إنتَ بصفتك محامي العيلة المفروض تهتم بموضوع الميراث . . صح و لا أني غالطة ..

_ نوح :- صح لكن قبل الميراث في وصية ..

وهني إدخل الولد الصغير ضياء ..

_ ضياء :- وصية شني ، حني مانعرفوش إن أمي مدايرة وصية ..

_ نوح :- الظرف اللي أختفي هو الوصية ..

فجأة علي صوت ضرار و بكل عجرفة رد عليه ..

_ و إنت من قالك إنها وصية إنت تجري بينا و لاشني ..

_ طالما وصت إن بعد وفاتها لازم صغارها يفتحوا الظرف معناها هذي بحد ذاتها وصية ..

_ علياء :- خلاص معناها أني بنقعد هني لين نشوفوا كيف نحلوا القضية هاذي ..

_ ضياء :- أهلاً  ، هلت البشاير ، الأستاذة علياء أول حاجة بديرها بتقعمزلنا في الفيلا علي اساس من الورثة ، و خودلك شن يحزها..

_ نبي نعرف شن واجعك نقعمز و لا لا هذا حوش بوي و اني حرة بنقعمز فيه ..

_ ضياء :- و إن شاء الله من أمتى الإنتماء لحوش بوك اللي طلع عليك فجأة..

لكن قطع نقاشهم الحاد صوت ضرار ..

_ ضرار:- خلاص و لا كلمة إنت وياها ، كل واحد يقعمز في داره ..

ويتحاشى الثاني لين نلقوا حل للي حني فيه ..

و طول شبح لي نوح ، و هني نوح بادر وقال ..

_ أاا نستأذن أني توا غدوة الصبح الساعه تسعة حانجيكم ..

_ ضياء :- و علاش الساعه تسعة بكري هلبة ..

لكن جاه الرد من ضرار بنظرة حادة ..

وطلع نوح روح و قعدو الثلاتة بروحهم ..

وهني تلفت ضرار لي ضياء و قاله ..

_ ضرار:- مش عارف أمتى تحس بالمسؤولية..

ردت عليه علياء ..

_ وقول أمتى يرزن و يشد لسانه اللي مايعرفش يقول كلمتين علي بعض ..

_ ضياء:- إنتم هذا فاش فالحين حاطين روحكم إنتوا التوب و أني الفرخ اللي مايعرفش لا يتصرف و لا يتكلم و الغلط راكبني من قباعة راسي لي صبعي الكبير ..

ردت عليا بقرف ..

_ مقرف حتى في أمثاله و تشبيهاته..

ومشت خشت لي دارها ..

كل واحد خش لي داره و بدي كل واحد يخطط بروحه و كل واحد يسعى يلقى الظرف هو الأول..

وخش ضرار لي داره ، تلقاته مرته أسيل ..

_ أسيل :- ها شن صار ..

_ ضرار:- ماصار شيء..

_ أمالا علاش قتلي خشي لي دارك ماتطلعيش و ماتبينيش نسمع و لا نعرف شيء ، إنت داس عليا حاجة ، إنت مش قلت بتفتحوا الوصية ..

_ مافيش وصية ..

_ كيف مافيش وصية إنت تضحك علي ..

وقبل ماتكمل الجملة و بخفة و قوة هجم ضرار علي أيه و خنقها من رقبتها و خبطها لصقها علي الدولاب بكل عنف لدرجة الخبطة صوتها كان عالي سمعاته علياء في دارها و تلفتت ناحية الصوت وبكل هدوء ركزت بش تسمع لكن بعدها الصوت إختفي فاكتفت عليا بإبتسامة مكر ..

وضرار مازال خانق أيه و يقوللها بهدوء و بوشوشة في ودانها ..

_ أخر مرة تدخلي فيما لا يعنيك بش ماتلقيش تصرف لا يرضيك ..

ردت عليه و هيا مستسلمة و بخوف ..

_ شن قصدك حاتكون نهايتي زي اللي قبلي ..

_ لو لزم الأمر ، نهايتك حاتكون أعنف من اللي قبلك ..

وبخوف بلعت ريقها و هزت راسها بالموافقة إنها مش حاتتكلم ..

ولما طلقها قالتله ..

_ لكن علياء هاذي لفعة مش حاتسكت ..

_ لو تسكتي إنتِ مافي حد حايحس بشي وخلي علياء عليا أني ..

و في دار ضياء : "ضياء يتكلم في التلفون ..

_ صدقيني ياقلبي أول مانحصل الفلوس نهج اني وياك نمشوا لمكان بعيد و نبدوا حياة جديدة ..

وهو منسجم يدق عليه الباب ..

يسكت و يقول ..

_ مني ..

_ أني أفتح ..

طلب من حبيبته اللي معاه في التلفون إنها تسكر ..

_ إسمعي سكري شوية تو نعاودلك ..

و وقف بحدا الباب 🚪 وقال بصوت واطي ..

_ مش وقتك توا ، و أني بنرقد ..

_ لعلمك أني واقفة من بكري بحدا الباب من وقت ماقلتلها .

ناخد الفلوس و نهجوا و نعيشوا مع بعض ..

_ شن تبي بالضبط مانقدرش نفتحلك في أي لحظة علياء تطلع من دارها و تشوفك و بعدين إنتِ شن قاعدة أديري هني ماروحتيش..

_ أني مانيش مروحة أني بنقعد بش نحضر القسمة ..

_ إنتِ هبلتي كان يسمعوا خوتي يلزوك..

_ خلاص اللي كنت خايفة منها ماتت توا اني ليا معاكم في الفيلا هاذي ، اني توا ماشية لكن من غدوة بنجيب شنطة حوايجي وجاية..

و إختفت بسرعة و ضياء قعد ينادي بالشوية بصوت توشويش..

_ ميسو  ، سوسو وين مشيتي  .. 

لكن حس إنها خلاص مشت خدي شهيق بهدوء و أنفخ براحة وقال ..

_ أوووففف الحمدلله مشت ..

و عدت الليلة هادية و كل واحد إستسلم للنوم ..

و في الصبـــح  ينوض ضياء و ضرار و علياء علي صوت عالي و دوشة ..

و لما كلهم ينزلوا للصالة ..

يتفاجؤ بالشرطة و الحوش كله معبي و عياط و مرا واقفة علي المحامي نوح و تقوله بصوت عالي  وهيا تعيط ....

يتبــــع ...