الظرف المفقود الحلقه التاسعه حصريه وجديده

الظرف المفقود الحلقه التاسعه حصريه وجديده 

وفجأة خشت عايدة عليهم من برا و قفت في وسطهم وقالتلهم  بصوت عالي ..

من فيكم كان يعرف إن أمي كانت متزوجة قبل بوي ..

الكل إنصدم و قعدوا يشبحوا لي بعض ..

ضحك مؤيد و قال 

_ و مش بعيد تطلع جايبة صغار قبلكم و يشاركوكم في الورث ..

_ عليا :- إنتِ شن تخرفي كيف أمي متزوجة قبل ....

_ عايدة :- لا مانخرفش أني دورت وراء الصورة اللي إنتم هملتوها و هملتوا الكلام اللي فيها . 

لكن أني مشيت سألت الصورة مصورينها زمان في مدينة معروفة في وسط قرية صغيرة و لما مشيت و سألت عليها في المكان هذا عرفو أمي و وروني حتى حوش جدي ، و قالوا الراجل هذا كان متزوجها لكن الراجل مش من مدينتنا  قعدو عايشين شوية في القرية و بعدين هو و مرته حولوا من المدينة و معاد حد عرف عليهم حاجة .

_ ضياء:- كيف أمي متزوجة راجل ثاني و زعما الراجل هذا توفى و لا شني ..

_ مؤيد :- تبو تعرفوا اللغز هذا و تحلوه عليكم و علي فطيمة ..

_ عليا :- علاش فطيمة ..

_ فطيمة عندها السر كله ...

_ ضياء؛- وهاذي كيف بنتفاهمو معاها و بنتها مقتولة..

_ عايدة :- أني زي ماجبت الأول نجيب الثاني مانوحلش ..

كل واحد خش لي داره و يتشاورو و يخططو ..

وفي دار نوم ضرار و مرته سارة ..

_ إنت متزوج عليا معقولة بعد هذا كله تتزوج عليا ،! بعد حبيتك بعد درت كل شيء علي خاطرك ؛ بعد نغرف من بابا و نعطيك و إنت ماتشبعش..

_ إنت تعزري فيا ولا شنو ، إفهمي يا بلي إفهمي يا بنادمة أني درت هكي علي مصلحتك ..

_ كيف مصلحتي فهمني ..

_ إنتِ ناسية روحك إنك ماتجيبيش في صغار و أني صابر عليك و متحمل ..

و تذارك الموضوع و إستطرد ..وكمل..

_ ضرار:- أني طبعاً تحملت و صبرت لأني نحبك و ماليكش ذنب هذا أمر الله.. لكن حتى أني من حقي يكون عندي عيل و و. ....

_ يعني إنت تزوجت بنت الخدامة بش تجيب منها صغار 😯.

_ إفهمي ..

و وطى صوته و بهدوء كمل كلامه و قاللها ..

_ الموضوع هذا ماحد يعرفه بيني وبينك أني عرفت إن أمي كتبت من الورت لي ميسا ..

و بذكائي بش مايمشيش رزقنا للغريب قلت خلي نتزوجها و نجيب منها عيل و و نطلقها و إنت اللي حاتربي العيل معقولة ولدي تكون أمه وحدة زي هاذي .. و في النهاية العيل بيورثها و كل شي يرجعلنا فهمتي ..

قعدت مصدومة و تشبحله و مش مصدقة اللي قاعد يقول فيه .. و ردت عليه..

_ و زعما أمتى العيل بيورثها بعد ماتقتلها..

_ 😲 شني إنتِ شن تقولي أني نقتل علاش مجرم ..

سكتت وقعدت تشبحله و هي مصدومة .. 

.. فات إسبوع و التحقيقات مازال و عايدة قاعدة تبحث بصمت  ....

.......... و في حوش فطيمة .......    

فطيمة فتحت باب الحوش بعد ماخبط عليهم الصبح لقت عايدة قدامها 

_ عايدة :- صباح الخير خويلة فطيمة 

_ صباح الخير تفضلي..

_ كلنا حاتعاملينا نفس المعاملة ..

_ بنتي توفت عندكم ..

_ أي لكن التحقيقات مازال و حني ماعندناش علاش بنقتلوها تي هيا زي وخيتنا..

_ أني لا نرتاح و لانصفى لين نعرف من قتل بنتي ..

_ إنتِ علاش شاكة فينا و متأكدة  ..

_ ببساطة لأنها نقتلت عندكم في حوشكم ..

_ لأنها نقتلت في حوشنا و لا لأن أمي كاتبتلها من الرزق ..

_ اه معناها تعرفوا معناها إنتوا اللي خنبتوا الظرف بتاع الوصية ..

_ حني ماخنبنا شيء بعدين ماتجمعيش إنتِ عارفة إني كنت مسافرة ، ثاني شي إنتِ كنتِ تحبيني أكثر وحدة ، معقولة إنتي تتغيري حتى عليا أني ..

_ هما مش خوتك ..

_ كل يد تمسح علي وجها و كل شاه معلقة من عرقوبها ..

تنهدت فطيمة و سكتت ؛ وكملت عايدة كلامها ..

_ خويلة فطيمة ميسا ماعندهاش خوت ولا ؛ قصدي إنتِ ماجبتيش غيرها ، راس بنية ..

ردت بتأفف و ضيق ..

_ جبتها و عقمت ..

_ باهي باهي أني أسفة إني ضايقتك..

وناضت من مكانها و هي متجهة للباب تلفتت لي فطيمة و قالتلها ..

_ خويلة فطيمة أمي كانت متزوجة زمان ..

شبحتلها فطيمة و ردت ..

_ من قالك ..

_ يعني كانت متزوجة قبل و لا لا ..

_ مانعرفش..

_ عايدة :- خويلة فطيمة أي معلومة حاتقوليها حاتجيبلك حق بنتك ..

معرفة القاتل و حق بنتك مربوط بأي معلومة جديدة نعرفوها ..

هذااااا لو هاماتك بنتك و حاستيها كأي أم طبيعية ..

_ شن تقصدي ..

_ تو يجي يوم و تعرفي شن نقصد ..

.................................................. 

_ ضياء:- إنتوا لازم تحلوا اللغز هذا أني تعبت ..

_ علياء :- وإنت بروحك اللي مضايق و تبي ترتاح كلنا نبو نرتاحو ..

_ ضرار:- بي تزربيزك هذا بتمشينا في ستين داهية ، و أني أولكم .. 

_ ضياء:- أختك عايدة قاعدة تزربز تبى تعرف السر و بالشوية بالشوية لين توصل لكل شيء ، و هاذي توقع عادي تبلغ علينا ماتعرف لا خوت و لا عيلة أهم شيء مصلحتها ..

_ عليا :- مستحيل في النهاية حني خواتها ..

_ ضياء :- المرة الجاية لو شدوني حانقول كل شيء..

و فجأة قدمله ضرار بسرعة و شدها بإيديه الزوز من حوايجه ..

بعد مادرت كل شي علي خاطركم توا تقولي بنقول كل شيء تي و الله نقتلك ..

قدمت عليا و بدت تنحي في يدين ضرار من علي ضياء وهي تقوله.. 

إنت درت كل شيء علي خاطرك مش علي خاطرنا بالك تحسابني مانعرف شيء ..

نحي إيديك من عليه ..

وخر ضرار و رد عليها درت كل شيء علي خاطري متأكدة ، ترا راجعي روحك مع من ميسا كانت مدايرة علاقة مش خوك اللي إنتي قاعدة تحاميله.. أه من اللي ضحى بي حبه و إستقراره مع مرته ومشي قري فاتحة وحدة مايحبهاش مش اني اللي ضحيت بش ماينضرش ضياء..

_ إنت قريت فاتحتها لما عرفت إن أمي كتبتلها وصية ، و مش بعيد إنت اللي خنبت الوصية 

لأنك تأكدت إنها بتعلن في الوصية إنها بنتها ..

و في اللحظة الصح خش الشخص الغلط ..

وكانت المفاجئة للكل 😯😯 لما 😲😲😲😲

يتبــــــع