بنت_الخبازة (1)بقلم_اوتار_حزينة البارت_الاول
ليس كل من يبتسم سعيدا
وليس كل من يقف قرب النار يحترق منها،،،
فبعض القلوب تحترق بصمت،،،،،
وبعض الأرواح تخفي خلف ضحكاتها وجعا لا يراه احد
هناك حكايات لا تبدأ بالحب،،،،
بل تبدأ بالتعب
بفتاة انهكتها الحياة قبل ان تمنحها فرصة لتحلم
༻ غلا
رجعت وي عمو سامي للبيت طبيت شفت بابا
جايه واكف بالحديقه يرش بالزرع سلمت
✦ هلو حجي
ابتسم ورد
✦ هلا بغلا البيت
سد المي واجه ليمي سأل
✦ ها جابج عمج سامي
✦ اي بابا بس تأخر عليه اليوم وردت ارجع مشي
✦ ابدا بابا ابدا مااقبل تجين مشي انتظري
هو يجيج واذا ماكدر يخابرني واني اجي اخذج
✦ بابا شلون وياك ووي هذا الخوف تره المدرسه قريبه
علينا يعني اكدر اروح واجي مشي
✦ بنتي اخاف عليج انتي بنيه والوكت صاير يخوف
واشكال والوان جاي نسمع يصير
بنات العالم
سكتت لان اعرف كلامه صح كمل
✦ سمعتي بنتي ابدا لاتطلعين من المدرسه
الا وي عمج سامي لو اني
✦ صار بابا
رديت علي مبتسمه وسالت
✦ هيج تحبنا وتخاف علينا
باوع عليه بنظرات كلها حنيه ورد
✦ انتو روحي والروح غاليه ياغلا بيتي وروحي
✦ فدوه لليحبنا الله يخليك النا ومايحرمنا منك
امين امين امين
رددت امين بكل بوسه بستها من خده ضحك ورد
✦ ويخليكم اليه واشوفكم من احسن الناس
✦ امين يارب
مشيت ويا سأل
✦شلونج بالدراسه مصيطره
✦ اي بابا مصيطرة كلش وادعيلي انجح
واحقق حلمي الي اريده
✦ يعني ماراح تغيرين رأيج
✦ ابدا نو الا طب بيطري مو تعرفني احب الحيوانات كلش
✦ ههه اي اعرف ماتشوفيني سميتج ام البزازين لان ماخليتي بزون بالشارع ماعلمتي علينا
✦ خطيه بابا وين يرحون
✦ يمي مو اني فاتح بيتي فندق خمس نجوم
✦ ههههه
خربت ضحك وجاوبته
✦ بيهن اجر حجي
✦ اي والله كل ذا كبد بي اجر
طبينا للمطبخ ماما واكفه تگلب بالتمن ريهام
يمها تنظف خضره هاي لا فلحت بدراسه
ولا حبت المدرسه انطيها مطبخ
وترتيب فنانه بهل السوالف
اني صفر ملتهيه
بالدراسه
اني غلا قاسم البنيه الجبيره لاهلي عمري 18 سنه
ورايه ريهام وراها محمود اجه بي ضمور بالدماغ لان ماما صارت عدها ولاده مبكره وصار بي نقص بالاوكسجين
كالوا ماراح يعيش بس الله راد
اله يظل ويظل قهره بگلبنا
وراه مصطفى واجتي رنا اخر العنقود
بيتنا جان ملك بمنطقه الكراده حي من احياء
بغداد الراقيه والحلوه من اجيت للدنيا بابا اخذه
قديم ورممه،،،،،،جنت متعلقه بي كلش واحب كل تفاصيله
الحلوه ماما صاحبه ذوق حلو وانيق اثثته
اثاث حلو ونازك جانت مغرمه
بشي اسمه تطريز ولوحات الي يطب بيتنا ويشوفه
يكول عبالك بيت انكليزي هي وبابا
ظلو سنين يرتبون بي الما صار عبالك تحفه فنيه
عدنا اسواق جبيرة وعايشين منها والحمد لله كبرت اسمع بابا يكول من اجتي غلا شفت كل الخير على وجهها
عندي عم واحد اسمه شامل اكبر من بابا
علاقتنا ويا زينة بس مرته ماجانت تحبنا وابدا ماتجي
علينا عنده ولد اثنين اسامه اخذ طبع امه لا يجي
ولا يسأل خريج
كليه تربيه واياد خريج صيدله
هذا طيب ويحبنا
وخال واحد اسمه ماجد عنده ولد ثلاثه الجبير
بكدي والبقيه اصغر
وخاله وحده اسمها فاديه عدها بنيه وحده
بكد مصطفى وولد بكد رنا
ذوله حنين علينا ويحبونا كلش
ودائما يجونا لان ماما من وره وضع اخوتي
ماتطلع هوايه
اهلي جانوا ناس عاديين بس گلوبهم مليانه حب وحنيه وطيبه يحبون الخير للكل ومافد يوم سمعتهم
يحجون على احد واذا شافوا
تقصير من اي بشر يلتمسون
اله العذر وهم يخابرون ويسالون علي
بيتنا حلو وعائلتنا بعد احلى بس قهر اخويه
جان جبير وهمه اكبر اشوف
بابا يصفن عليه ويذب
حسره
جنت اعرف شنو بي اكعد يمه ويشيكلي قهرهم ويگلي
✦ اذا اموت محمود منو اله
اجاوبه
✦ بابا لاتحجي هيج وتقهرني
يرد عليه
✦ مااريد اقهرج بنتي بس هاي سنة الحياه ناس تروح وناس تجي ومايدوم غير وجه الكريم
ازعل علي وابجي ومن يشوف دموعي يگلي
وهو يمسحهن
✦ بجيت عيون بنتي الحلوه
ارد
✦ بابا اذا تحبني بعد لاتحجي هالكلام ومحمود اني
اشيله وياك اخلي بعيوني ومااخلي
يحتاج احد
وجهه يفك واحس يرتاح من احجي هالكلام
يرد
✦ عفيه بيج بنتي اريدج سند اليه ولاخوتج
وامج
،،هالكلام جنت اسمعه منه هوايه لان اني اقرب
وحده منه جنت اشوفه شلون يساعد ماما بي
وياخذها هي ويا بسيارته يفرهم
شوارع بغداد
ابدا ماقصر ويا بشي ولاحسن دكاتره وداه بس محد
كدر يسويله شي وجان يخاف على مصطفى اخويه ودائما يوصيني علي لان طبعه فقير وعلى نيته
بس يضحك بالوجه ويحب
يشاقى هوايه
مسوي حس بالبيت وحركه هو ورنا مرة
احباب ومرة اعداء ومحد يفض عركتهم غير اني
بس يشوفوني اجيت عليهم كل واحد ينهزم
لمكان
بابا ماجان بشر ملاك نازل من السما يحب الناس ويحب
يساعد الكل وكلها جانت تحبه القريب والغريب
وسمعته بالمنطقه معروفه وجانوا
يسموه ابو مصطفى الطيب
تغدينا ومثل كل مره يخلي كدامنا وينسى نفسه
ماجنت اشتغل لان ماما ماتخليني من ورة السادس
كلت خلي انام ساعه
واكعد اقره
وهي نومه ماكعدت للمغرب نزلت من فوك اثاوب رحت
للمطبخ ادور شي اكله لان جعت شميت ريحه
الكيك طبيت شفت القالب على
الميز وماكو احد
گصيت قطعه وكمت اكل بيها رحت للثلاجه ادور
قوطيه ببسي اخذت وحده فتحتها وشربت منها
صوت عاط بأذني
✦ غلااا
فزيت وغصيت من سمعت صوت اختي
صحت بيها
✦ وووجع وسم والله فد يوووم اموت من وراج
✦ هههه اسم الله عليج دكتوره
ابتسمت من كالت دكتورة وجاوبتها
✦ مادام كلتي دكتورة راح اعديها الج
✦ مح
باستني وراحت للثلاجه كعدت وسالت
✦ شراح تسون عشه
✦ اليوم المطبخ معزل لان بابا راح يجيب دجاج شوي
توني اريد احجي وكملت
✦ والج لفتين كص لحم لان نعرف كلش زين انتي مو صلح وي الدجاج ولا البيض
✦ ولج مااحبه بس اشم زفرته تلعب نفسي وتخليني اريد اذب من راسي
✦ اكلج غيري الموضوع وخليني اكل قطعه
✦ ماما وين
✦ يم محمود
جاوبتني وكصت قطعه وخلتها بالماعون كلت
✦كصي الخ وياج
✦طيبه مو
✦اي تخبل وريحتها تجنن
✦شنو طعمها بله
✦برتقال ماادري ليمون
✦ااي سويتها برش الليمون
✦عاشت ايدج بس هاي منو مطير نصها
✦هههه شويه بابا وويا ماما ورنا و مصطفى
واني وياج الباقي
✦الف عافيه بطنا
✦اي والله يله اذا خلصت اسوي باجر
✦سوي لان بليل اجوع وانزل ادور اكل
✦ادللي من عيوني اسويلج
✦مح مح
دزتلها بوستين بالهوه وكملت
✦اكلج ماتفكرين ترجعين سنة الخ للمدرسه
✦لاا مااريد مو تعرفيني مااحبها ولا احب الدراسه
✦ولج حرامات والله الشهاده تفيدج
✦مااريدها ولا اريد اتعب روحي
✦غبيه
✦ههه شكرا ياذكيه
✦الكلام وياج ضايع
✦اي نعم
✦باجر راح تندمين وكولي غلا كالت وطلع كلامها صح
هزت جتفها بعدم مبالاه كملت من كمت
✦اكوم ادرس مااريد اضيع الوقت
✦روحي اول وتالي ماخذه الشهاده وذابتها بالكنتور
✦لااا عيني عندي حلم وان شاء الله احققه
✦تفتحين عياده موو
✦اي نعم والا اسويها
جاوبتها ومشيت من يمها رحت للدرج صعدت مصممه
على هذا الحلم الي جنت احلم
بي من سنين
༻فيصل
كاعد وي جماعتي بشقه تابعه اليه نسهر مثل كل ليله مازن سألني
✦اكلك شلون وضعك وي رفيف
ابتسمت وجاوبت
✦حالها من حال غيرها
✦يعني شنو عفتها
✦اي
✦ ليش مو البنيه تحبك
✦هههه منو الي تحبني هاي ام فلس
الولد صفنو عليه كملت
✦ولكم ولا وحده من الي عرفتهن حبتني
ضربت على جيبي وكملت
✦الي يحبنه هو هذاا الفلوس والصيت المعروف
✦شلون يعني شفت شي منها سمعت كلام يأكد هالكلام
✦الي تطلع وياي وتخليني اگضبها مقابل هدايا
غاليه هاي شسموها
✦ولك خماا
✦لايروح بالك بعيد ماوصلت وياها لهيج شي لا هي ولا غيرها اصلا جنت اختبرها هي والي قبلها من اشوفهن هيج تلعب نفسي منهن واعوفهن
جهازي دك دحكت جان ناصر اخويه
تجاهلتو فصل ورجع اتصل مرة الخ مارديت اجاني مسج
منو سحبت الشاشه قريت
✦يول وينك وليش ماااجاوب
خابر رديت
✦خير شصاير
✦ ولك ابويه حرك الدنيا عليك وصاير نار من ورة وضعك
الي ماجاي تعدلو
مارديت كمل
✦ تعال بسرعه واي شي يحجي وياك
لاجاوبوا بس كول اي ونعم
✦تمام
سديت الخط وكلت وي روحي
اهووو هم راح نسمع مغثه
كمت الولد سألو
✦ها وين العزم
✦اعگب لبيتنا
✦مو بعد وكت
مارديت على اوس اخذت السويج وجهازي وطلعت من
يمهم نزلت للكراج صعدت سيارتي وعكبت
للبيت مثل كل مره
راح اسمع كلام يغث من الحجي وتهديد اني بالشارع
اتصل رديت
✦هلا حجي
✦لا هلا ومرحبا
رد بعصبيه وكمل
✦وين انت ولك
✦جاي بالطريق
✦ تعرف الساعه بيش
✦ يابه تره بعد وكت ساعه 12
✦ عگب ولك واني اعرف شغلي وياك
✦شمسوي اني يابه
✦وتسأااال شمسوي ياااجلب
صاح بأذني الا وخرت الجهاز من اذني كمل
بصياح
✦ تسأل وولك وانت يوميا سهر وما تعكب للفجر
ماريدت كمل بصياح
✦تجي وااني اعلمك ياااطايح الحظ
سد الخط شمرت جهازي على الگشن وكلت
وي روحي بضوجه
✦ راح يعلكها على راسي وهم اسمع نفس الكلام
ظليت ادردم وي روحي الما وصلت لبيتنا الحارس فتح
الباب طبيت بالسياره للكراج نزلت هديه اختي طلعت من
المطبخ جانت يمنا اجت عليه بسرعه
حجت بخوف
✦شيحجي ابويه لاتجاوبوا تره صاير نار من وراك
✦مو جديده عليه هالشي ياخيه
رديت عليها امي طلعت ملامحها كلها خوف من وصلت
ليمها كالت
✦ شلون وياك والله راح اموت ناقصه عمر من وراك
✦وووينو لهذا مااجه
✦هيانوا اجه
امي ردت على ابويه من صاح مشيت للصاله
هنه ورايه كاعد ويمنا اخوتي عناد وغانم كلت بگلبي
والله ملتمين عليه خوش لمه واكيد
حركتو عليه
ابويه كام لحيلو وصاح
بيه
✦وين جنت ولك
✦وين يعني سهران وي شلته مثل كل مرة
عناد جاوب ابويه حجه بعصبيه
✦ااانت تالي وياك شوكت تحس على نفسك وتصير
واحد ادمي
✦يابه شسويت اني حتى تحجي وياي هالكلام
✦وتسأاااالني ولك
صاح بيه وكمل وي اخوتي
✦ولكم يسألني شمسوي ااانتو احجوااا كولوا
اله شجاي يسوي بروحه وبينا
✦هو يعرف بنفسه شجاي يسوي
غانم رد بضوجه وكمل
✦سهر ونسوان وصرف فلوس بدون وجع گلب
التزمت الصمت ابويه نتر
✦سكتت ولك لان تعرف كلام اخوك صح وتعرف اني
شاكدر اسوي بيك اذا ماجزت من هاي سوالفك
الجايفه
حجه هيج وگرب مني امي گربت علي خايفه من
ردة فعله حجت
✦راااح يجوز ابو عناد ويسمع جلمتك بس انت على كيفك
ويا واحجي بهداوه وبدون ماتصير عصبي
✦كله منج يمه انتي السبب دلالج الو طلع عينه
غانم حجه وكمل
✦لو ما نخابرو مايعكب للفجر
هو سكت وعناد استلمني
✦يول كافي وجوز من سوالفك الجايفه
لايجي يوم وتنزل راسنا
ابويه صاح بغضب
✦موو اني الي ينزل راسو بين الناس ومن ورة منو من وره ولد ماعرفت اربي صح
حجه هيج ودفعني من جتفي امي صارت
بصفي كام يهدد بيه وهو يأشر
بأيدو بوجهي
✦اااذبحك ولك واحسب الله ماخلقك اذا ظليت بهاي
سوالفك الرديه والي يگلي
ليش جتلتوا اكلو اصبع عار وكصيتوا
✦على بختك اابو عناد موو هيج الحجي
امي حجت بخوف وتوسل وانهد بيها
✦ااانتي اسكتي كل البله من تحت راسج
سكتت هو كمل بصياح
✦اااسمع ولك اخر كلامي الك واريد من الله تكسر
جلمتي حتى اشوفك شي مو شايفه
حجه هالكلام وكمل
✦سهر بعد ماكو فلوس ماكو حضر روحك من باجر تطلع
وي ناصر يعلمك الشغل واااريد من الله ماتجر
عدل ويا لو تهدو وحدو
درت وجهي منو مو عاجبني السمعتو نتر
باعصاب
✦مووو عاجبك الحجي ولك
✦لا عجبو حجي وراح يسمع الجلمه
امي ردت علي كملت بتوسل
✦مووو يمه
✦اي
رديت بنفاذ صبر وكملت
✦الي تريدو اسوي حجي
✦وغصبا ماعليك تسوي الي اريدو
رد عليه وكمل بعصبيه
✦اني ولك اااني حجي شهاب الدين احمد يطلع من
ظهري واحد ساقط وابو نسوان
✦بقى بس الشرب ماشربه
عناد حجه باستهزاء غانم كمل بنفس اللهجه
✦وشمدريك ماسواها
امي صاحت بيهم
✦كااافي اتگطون حطب فوك النار
ابويه تخبل وكام يصيح
✦سويتها ولك شربت منكر
✦لااا ماشربت ولا ازقنبتو
رديت باعصاب ادحك لاخوتي لكبار بغضب امي
اشرت لناصر اجه لابويه وگلو
✦يابه هدي والي تريدو يصير
اشرلي بعيونو امشي
✦اااي الي اريدو يصير وغصبا على الكل
مشيت من يمهم
صعدت الدرج اسمع هديه اختي وناصر يهدون بي وذولاك
يشعلوها عليه طبيت غرفتي وسديت
الباب بقوه
رحت كعدت اهز برجلي وره مشوار ناصر طب كلت بعصبيه
✦هاا جاي تسمعني نفس الكلام
ابتسم وكعد بصفي رد بهدؤ
✦لاااا لان الحجي ماقصر وياك
فزيت من مچاني وجاوبتوا
✦جاي تصنف عليه
سكت كملت باعصاب
✦مو عيشه هاي جحيم،صاير هالبيت
✦هاي لان نريد مصلحتك كمت تحجي هالكلام
سكتت اخويه كال
✦يول عاجبتك روحك والجاي تسويها بيها
كعدت على قنفه ودرت وجهي منو كمل
✦احنا مو هامنا الفلوس وانت تعرف هالشي
✦لا هام اخوتك وابوك كل حجايه والثانيه وقال تصرف
فلوس وعايش حياتك براسنا
رديت وكملت بضوجه
✦على اساس انت ماجاي تسمع كلامهم الي يوميه
اسمعوا
✦اي جاي اسمع واعرف هم شيريدون منك
حجه هالكلام وكمل
✦رايدك تصير واحد ينشد بي الظهر واحد ماينحجي
علي ويكول ابن شهاب الدين مو خوش
ولد وطلع من الدرب
✦ناصر تره مالي خلك اسمع نفس الكلام والله طگت روحي منكم وراح اهج بليله سودة ومحد راح يعرف
وين وليت
✦روح
رد عليه بروده وكمل
✦بس خلي بالك تروح بدون فلس من ابوك
✦طز بيهن عبالك اني مااعرف اجيب الفلس
✦شلون بله
✦انت شنو جاي تستفزني
✦لا والله اريد اعرف شلون اجيب الفلوس وها اني جاد
بهل الشي اريد اسمعك واسمع افكارك
✦مالي واهس احجي
ردديت علي وورثت جگاره اخويه كمل
✦انت تعرف شنو مشكلتك
سكتت مارديت كمل
✦مشكلتك العناد ولا مبالاه بمستقبلك
وانت مو ناقصك شي ذكي وعندك افكار جثيرة وتكدر
تجيب الفلوس وتصير واحد الكل يحجي
بي وبنجاحو
سكت بعدين كال
✦يول لاتظل بهل الراس اليابس وخلي ايدك بأيدي وتعلم الشغل والله بسنه وحده راح تعرف كلشي عن السوك
وادكوم انت بنفسك اجيب فلوس
التزمت الصمت رافض الجاي ينفرض عليه هو
كمل
✦اسمعني زين وخلي الي راح تسمعوا بينا
دحكت علي كمل
✦ابويه راح يفتح شركه بدبي ورايدني اني اگضبها واستلم الشغل وراح اخذك وياي لهناك بس انت جر عدل
ويا وبطل سوالفك المكسره حتى
يقبل اخذك وياي
ابتسمت باستهزاء ورديت
✦اذا ابوك وافق اخوتك راح يخربو عليه
✦لا بس انت جر عدل وعدل حالك وهو بس يشوفك
تغيرت راح يوافق تروح وياي
سكتت اخذت نفس وزتيتو بقهر كلت
✦اليكول بس انت وهديه اخوتي من امي
وعناد وغانم وزينب من ضره ثانيه
اخويه سكت كملت
✦شفتهم شلون يحرگون بي عليه
✦اخوتك خايفين عليك
✦اي واضح
رديت علي وكملت
✦فرق بينك وبينهم انت وهديه احسكم گلبكم عليه بس
ذولاك احسهم يكرهوني ومايحبوني وهالشي
من زمان من حنا جهال
✦لا شنو هالحجي فيصل اكو اخ يكره اخوه
مارديت من حجه هالكلام كمل مبتسم
✦كول يغارون منك لان اخذت الدلال كله من امي
انت بزر الشيب واخر العنگود وتدللت جثير يول
الما طاح حظك
حجه هالكلام وضربني على جتفي كمل
بضحك
✦واني هم اغار منك
ابتسمت ورديت
✦انت غير عنهم طيب واعرفك تحبني وتخاف عليه
✦عجل اسمع كلامي وجر عدل وخلي ايدك بايدي حتى
نهج لدبي ونگضب الشركه
هزيت راسي بأي وكلت بگلبي خلي اسايس الكل واجر
عدل حتى ترهم روحتي لدبي والحجي
يوافق وهناك اظل براحتي
لا حسيب ولا رقيب
جهازو دك ابتسم وكال
✦الحب اتصل
جان يقصد رغد بنت خالتي خطيبتو
ترخص وكام من يمي
༻ مريم
جانت ساعه عشرة بليل وماعدنا تعلوله رحت ليم
بابا كعدت يمه وكلت من خليت
ايدي كدام وجهه
✦حجي وغق اريد اغوح اشتغي اني ومغوة
باوع للساعه ورد
✦بهل الساعه تريدن تطلعن
✦بعد وكت بابا
✦لا بنتي مو مال طلعه هسه خليها لباجر
✦حباب خلي نغوح والله ماعدنا حلويات ولا جبس
ومحل عمو جمال مو بعيد هيانه بغاس
الشاغع
✦ابو مريم خليهن يروحن حتى هم يجيبن ريوك
وياهن
ماما حجت ويا ذب الجريده وكال
✦اني اروح اجيب الغراض
✦لااا بابا انت ماتعرف شنغيد كل مرة اجيب شغلات مو طيبه وتلعب النفس
سكت بعدين رد
✦روحن بس بسرعه ترجعن
✦اااي طياغه نغوح ونجي
✦شكد تريدن فلوس
✦عشغه
✦راح افلس من وراجن
جاوبني يهز براسه ضحكت وكتله
✦بابا تغه وياهن الغيوك
✦روحي اخذي من المحفظه
سويت اشاره اوكي وبسته من خده
رحت بسرعه اخذت عشرة ولكيت خرده ارباع الفين
اخذتهن رجعت علي كتله
✦بابا لكيت الفين اغباع اخذتهن
✦موو
قاطعته بسرعه
✦اسويلك بيهن حلاه ياحلو
ابتسم ورد
✦تمام
رحت بسته من خده وغمزت لماما وكلتها من فتت من
يمها
✦غجلج ابو بطن
✦اانجبي ولج
✦هاي شحجت عليه
بابا سال وفلتت صحت
✦يله مغوشه خلي نغوح
لبست بشت فوك البجامه مالتي وطلعت وي
اختي ماجنت محجبه ضافره شعري ولابسه طاك اجت
ويانا ملوكه الصغيره كدتها بايد
مروشه خلت ايدها بأيدي
الثانيه كالت
✦اريد موطه وميار هم تريد ومنة
✦واااني هم
ملوكه حجت وكلت
✦اي ادللي بس ها مااغيدج تشيلين وتخلين
بالعلاكه الفلوس مو بس الج النا كلنا
هزت راسها باي
✦هلوو عمرو
اختي الصغيره صاحت انتبهت هو طلع من القطعه
الي بصف بيتهم مروشه هم سلمت علي
اني غلست
وصلنا المحل شفت شباب ناس كاعده وناس
واكفه من اهل المنطقه طبيت
اني وخواتي سلمت
✦هلو عمو
✦هلا بنتي شلونجن وشلون الوالد
✦زين ويسلم عليك
✦وعليكم السلام والرحمه
احجي ويا وعيني على ملوكه بدت تلم بالحلويات
كلت
✦ملوكه شحجيت
✦ها اي
عمرو فات وراح اخذ باكيت جگاير وقوطيه
ببسي وعصير راني ونستله كاكاو
وجبس ليز دفع
فلوسهن وقرب ليم ملوكه انطاها
الجبس والنستله وراني ابتسم وكال
✦هاي الج
✦شكرا عمرو
ردت احجي بس طلع اخذت الي ردنا وطلعنا جان واكف
بره يشرب القوطيه باوع علينا بطرف
عيونه بعدين
دار وجهه
رجعنا لبيتنا كلت
✦ملوكه مو عيب تاخذين الحلويات من عمغو
✦هو انطاهن اليه
✦حتى لو المفغوض ادكولين اله مااغيد
اختي سكتت بعدين كملت
✦مره ثاني لاتاخذين شي من اي احد
✦بس عمرو مو غريب من اقربائنا
مروه ردت عليه كلت بضوجه
✦گغايب من بعيد لا ابن عمنا ولا ابن خالنا
✦بس عمو نزار يصير ابن عم بابا يعني اقربائنا وهم جيرانا وكاعدين بصفنا واحنا نطب عليهم
وهم يجون علينا
✦اهله مو مثله
رديت بنتره وكملت
✦مغوه مو انتي تعرفي هو شنو واحد سكيغ وابوو
بنات
سكتت من شفته فات من يمنا عصر قوطيه الببسي
بأيده وشمرها بقوه على الرصيف وراح
للقطعه الي خالين بيها المولد
✦عزه ولج هذا بس لا سمعج
اختي حجت رديت بعدم مبالاه
✦مايهمني
✦هههه بعدج انتي ويا مثل الفارة والبزون ولا كدرتي
تنسين شلون جان يعيب عليج من جنا
صغار
مارديت طبينا بيت اهلي والتهينا بالتعلوله سويت
حلاه سريع لبابا وكعدنا كلنا بالصاله
نشوف مسلسل تركي
اني مريم جميل عمري 18سنة صف سادس علمي احنا
خمس بنات مروة وميار ومنة وملاك وماعدنا اخ
بابا موظف بامانه بغداد وماما ربه بيت شخصيتهم مرحه ويحبون الضحك وبسيطين كلش وعدهم ميانه
ويانا كلش حلوه عندي عم واحد
ساكن بتركيا اصغر من بابا
وعنده ولد وبنيه وعمه
وحده اكبر منهم ماصار عدها اطفال
عمو قاسم رجلها اخذ ابن اخوه ورباه وزوجه
يمهم وخالات اثنين الجبيره عدها بنيه بكدي وولدين
اصغر والصغيره ولد وبنتين
من جان عمري سنتين توفى جدي ووراه جدتي قسموه
الورث وبابا كدر يشتري قطعه ارض بحي العامل
بنااها وساعدته ماما من باعت ذهبها
كعدنا بي ماما حامل بمروة واجتي بيتنا الجديد
بنفس السنه عمو نزار الي يصير ابن عم بابا باع بيته صلاح الدين وارضي زراعيه ورثها من ابوه وسكن بغداد جان تاجر جبير وعنده معارض مال اجهزة كهربائيه
نقل شغله هنا واشترى بيت قديم وجبير كلش جان بصفنا
فلشه بنى 200متر وعاف نفس المساحه
وسوالها سياج واخذ كم قطعه
بغير مناطق
بابا وماما فرحو بيهم كلش وصرنا مثل الاهل ناس
اطب على ناس وحبينا بيبي لميعه
تصير ام عمو نزار
وكمنا نصيحها بيبي جنا محرومين من اجدادنا من
الجهتين لان ماتوا من زمان
عمو نزار وخاله نجاه جان عدهم
اربع ولد الجبير عماد وراه نهاد وعمار ونهله
وعمرو
هذا رغم اكبر مني ب10 سنوات بس خله عقله وياي
وكام ينصب عليه لان عندي لدغه قويه
بحرف الراء
يسأل شنو ااسمج
ارد علي يخرب ضحك
يسألني على اسمه ارد يضحك بعد اكثر
كبرت وافتهمت هذا جان
ناصب عليه واشتغلت عركاتي ويا
بس هو ولا جان مهتم
يضحك من يخليني اصير
عصبيه
ابجي واروح لعمو نزار اشكي اله يطيب خاطري
ويرزله وهو لا هامه يظل يضحك
ويباوع عليه بنظرات
مستفزه
كبرنا وكبر كرهي اله من مشى بطريق مو حلو
وصادق شله تعبانه كام يشرب ويدور
بنات ويوميا متعارك وجاي
الشرطه علي
اكثر من مرة ذبوه بالسجن من وره عركاته وي الناس
وعمو نزار واخوته يفضوها بفلوس ويطلعوا
اسمع عركات اهله واسمعه شلون يفشر ويكسر بالغراض
اخوته ازجوا وطلعوا من البيت من وراه لان محد
كدر يتحمله او يتحمل مزاجه وعصبيته
نهله اخر وحده ازوجت وسكنت باربيل
وهو ظل وجه البومه مافلح بالدراسه وظل عاطل عن العمل وعايش براس عمو نزار وفد يوم ابوه جاب
مولد للمنطقه وخلاه بقطعه بصف بيتهم جانت
الهم وي الايام هو التهى بي وره فتره خله
الخ للمحلات بالشارع
العام
كمنا نشوفه بهدوم كلها دهن ويفصخ ويشد بمولدات
گلبها صناعه بهاي القطعه وظلت
سمعته نفسها بس جان
ماله دخل بنات المنطقه بالعكس الي يذب حجايه
لوحده من عدنا يسويله مشكله
وتوصل بي يگتله
هالشي جان معروف بي وكلها تحبه رغم سمعته ولقبه
الي انعرف بي عمرو السكران
كلها تحبه حتى خواتي جانن يشوفنا اخ الهن الا اني
جنت اموت منه ومااحب اشوفه وجنت
مااطيق كلمه منه ودائما اتعارك
ويا وهوايه مشاكل صارت
بينا لان كام يدخل بحياتنا
ويريد يرفض رأينا علينا وهالشي صار
لان بابا وماما انطوه مجال هوايه
ومن جنت احجي واعترض يريدون اخوجن وخايف
عليجن وهو مو غريب ابنا وابوه عمجن
خصوصا بابا رغم عيوبه جان يحبه ويموت علي
اسمعه يحجي باعجاب
سبع وذيب ومايخاف من اكبر راس ومن جان يتعارك
وي اهله هو وماما يدخلون ويكدرون
يسكتوه
هالشي جنت اضوج منه وكلامهم جان يخليني
اصير عصبييه واكثر من مرة من
ورة تدخله اتعارك
ويا اني طبعي نار ومن يضوجني احد اجفص
بالحجي وادوس وهو اكثر واحد يخليني
افقد اعصابي مره
من جنت رابع عام رجعت من المدرسه مقهورة لان المدرسه غلطت بتصحيح الورقه ومن اعترضت ولحيت كالت
✦بقيتي بس انتي ام نص لسان تعلميني التصحيح
هالشي قهرني كلش لان شفت البنات كامن يضحكن
عليه رجعت دمعتي بعيوني وكاتمتها
اريد اوصل بيتنا حتى
اطلعها
من وصلت بيتهم هو طلع صفن عليه
نزلت راسي ومشيت بسرعه بس صرت قريبه منه
سأل
✦بيج شي
مادرت بال وصلت بيتنا وهم سأل
✦ ام نص لسان مو جاي اسالج ماتردين
من لح وعيب عليه انفجرت وطلعت قهر گلبي بي
✦وااانت شعليك وشكووو تسأل
✦احد متعرض الج احجي كولي
سال ودار وجهه على الشارع يريد يشوف احد
بعدين باوع عليه بنفس اللهجه
رديت
✦مااعليك بيه ولاتسأل ولاتسوي نفسك ادمي
بغاسي وانت واني نعغف انتو شنو
وشنو اخلاقك
من حجيت هيج خزرني ورد
✦ليش شايفتني ولج حيوان لو من ذوله الساقطين
✦والله انت اعغف بحالك وتعغف منين اجاك لقبك
الحلو
ملامح وجهه تغيرت وصفن عليه بنظرات ناريه جز
على سنونه وكال
✦بيج بخت لان بنيه
باوعت علي ورديت باستهزاء
✦والله اغيد اكلك بيك بخت لان غجال بس ماجاي
اشوفك هيج
حجيت هيج ودكيت الجرس كال
✦باوعي عليه ولج
تجاهلته وانطيته ظهري حجه باعصاب
✦راح اعديها الج لخاطر عمي بس مره ثانيه جربي
تحجين هالكلام وياي وشوفي الرجال
شراح يسوي بيج
ماما فتح الباب وطبيت
༻ غلا
اجت السنويه مال جدو وبابا جان كل سنة يسوي عشه
على روحه هو وبيبي ويوزعه بالمنطقه
الاكل جان يجينا جاهز ومغلف احنا بس نوزعه
عزمنا بيت عمو شامل وبيت خالو وخاله
ومثل كل مره عمه ساهره مااجتي
وطلعت عذر وعمي حاول يبرر
الها واحنا نعرف هي تموت من ماما وماتحب تجي
علينا
جنت بالمطبخ اغسل بالفواكه اياد ابن عمي
طب من باب المطبخ شايل صندوق مي
سال
✦وين اخلي
✦على الميز
جاوبته وطلع مرة ثانيه جايب الخ خلاه بصفه
حجه وهو مبتسم
✦اليوم راح نتعبكم
ابتسمت ورديت
✦تعبكم راحه
سال
✦شلون السادس وياج
✦ ههه لحد هسه زين
ابتسم ورد
✦ ها يعني مااشيل همج
✦ لااااا
الوجه ضحك وكال
✦ اعرفج بطله وراح تطلعين من جحيم السادس
✦ اي والله صار جحيم بالنسبه اليه واريد عاد بس
اكمل واخلص منه
وخرت منها وشلت الفواكهه وخليتها بالثلاجه
✦هانت مابقى شي وها اني حاضر اي شي تريدي
بس خابريني واني اشرحه الج او ادزلج رابط
مضبوط بالماده
✦ تسلم والله انت مو مقصر ويايه بشي
✦ادللي غلا انتي غاليه عليه
حجه هيج وكمل
✦كلكم غالين عندي
ريهام اجت وياها ماما كالت
✦يله خلي نخلي العشه الرجال بالاستقبال واحنا
بالصاله
✦تمام
سوينا مثل ماطلبت ماما رتبنا السفره وكعدنا نتعشه
كملنا والتهينا بالجلف والتنظيف طلعت
كيس الزبل بره وذبيته
بالحاويه
اخذت العظام للبزازين خليتها بماعون بصف الحاويه
ومي هم من رجعت شفته واكف يدخن بالحديقه
سديت الباب ابتسم
وكال
✦ها بعدج تنطين اكل للبزازين
✦ مو احسن مااذبه بالوصخ
✦ اي والله هم بيهن اجر الكم
✦ بابا يكول يدعن للي يطيهن اكل بلكي يدعن اليه
وانجح واروح لكليه الي اريدها
✦كلتي الهن
صفنت علي وسالت
✦منو
✦هههه البزازين حتى يعرفن انتي شتريدين
ويدعن الج
✦هههه انت ناصب عليه
سكت وجهه يضحك ورد
✦ لا حبيت اشاقيج
رد والنظرات تغيرت لحظه بعدين دار وجهه وكال
✦ اريد بعد جاي الاكل دسم كلش
✦ اي ادلل هسه اصبه الك
رحت للمطبخ صاح
✦ غلا بكوب جبير مو بهاي الاستكانات الكيوت
انداريت علي اضحك جاوبته
✦ ادلل اكبر كوب راح اصبلك بي
✦ عاشوا وكثري شكر
✦صار ادلل اياد
جاوبته وطبيت لجوه غسلت ورحت حميت
الجاي صبيته بكوب وكثرت شگر
ودزيته بايد مصطفى
صعدت لفوك غسلت لان بعد مااتحمل روحي نزلت
لجوه عمي وهو جانوا رايحين وبيت
خالو هم بس خاله فاديه
يمنا ترخصت
منها وصعدت اريد اقره
༻ عمرو
طبيت لبيت اهلي اريد اتغده رحت للمطبخ
امي واكفه تسوي زلاطه وجدتي كاعد
بمكانها كلت
✦يمه اريد غده وبسرعه رحمه لاهلج
✦خير يمه اشوفك مستعجل
✦راح يجيني المولد الجديد
✦ها بالخير يمه الله يشوفك خيره ويبعد عنك
شره
✦امين
رديت ابويه طب كال
✦غداج حجيه
✦هسه اصب النا كلنا
ابويه كعد اگبالي وكال
✦ماتسبح وتذب هاي هدومك الكلها دهن
✦لااا،، ورايه هم شغل بالدهن
✦غسل ايدك على الاقل شوفها شلون صايره
سوده
ضجت وكلت
✦هسه انت الي ماكل بيها لو اني
✦طاح حظك على هالجواب شلون وياك ووي
اخلاقك الزفت
✦ مااريد سم لان تسممت من هالكلام
كمت جدتي صاحت بيه
✦والله بس ماتتغده الا اني هم مااتغده
وكفت بمكاني امي كالت
✦اكعد يمه مسويه باميه تخبل وراح اثردلك
كعدت جدتي اشرت لابويه بعد ماحجه شي ثردت
اليه بالفي جبير دست بالغده لان جنت جوعان
كلش كمت وكلت
✦ يمه جاي
✦خلي امك تكمل غداها وتصبلك جاي
ابويه حجه كلت
✦مااريد
✦اوكف راح اصبلك
✦مااريده
نترت وطلعت لبره سمعت جدتي كالت
✦ماتكدر الا تسمم الولد
رد
✦ يمه محد طلع عينا بالدلال غير انتي وامه
✦وانت مادللت مااا
ردت علي وماسمعت بقيه الكلام غسلت بالمغسله اليم الصحيات جان عدنا باب يودي على القطعه فتحته
ورحت للمولد
سويت كم شغله ورتبت مكان للمولد الجديد جان حديث
واخذته بفلوس توجع الگلب كاتم وكلشي
بي حديث
طلعت للشارع ورثت جگاره اخذت نفس وذبيته
باب بيت عم ضياء انفتح طلعت مريم
شايله علاكه تريد تذبها
بالحاويه شافتني
الخلقه انگلبت
درت وجهي منها سمعت صوت خاله ام خالد
تسلم
✦شلونج مريم
✦هلا خاله شلونج وشلون صرتي
✦الحمد لله احسن انتي شلونج امج خواتج
كلت بگلبي
✦سوالف الباب ماتخلص عند النسوان
✦الحمد لله مااجتي همسه
✦لا والله كالت على الجمعه تجي
✦اشتاقيت الها البذات ازوجت ونستنا
✦ههه هاي حال الدنيا يمه انتي هم باجر تزوجين
وتصيرين مثلها
سكتت بعدين كالت
✦شلونك عمرو
هسه يله شافتني
حجيت وي روحي جاوبت
✦هلا خاله
✦مو حاره عليك واكف بهل الحر
باوعت لمريم بعدين عليها وجاوبت
✦هم حار عليج خاله واكفه بهل الحر
✦ههه اي والله صدك راح اموع من الشمس
سمعت ذيج كالت بضوجه
✦باي خاله
طبت وسدت الباب خاله ام خالد كالت
✦سلملي على امك
✦يوصل
جاوبتها وطبت
الوطنيه اجت طفيت المولد كعدت بغرفه مسويها
اليه ومجهزة بكلشي شغلت الغلايه
وسويت جاي لبتون
شربت شويه وكلت
✦والله اذا مو الجاي العراقي فلا يفك الراس
عبالك جاي العروس
ابتسمت وكملت
✦جاي العريس
تمشيت لباب الغرفه وكفت اشرب بالجاي عكدت
حواجبي من سمعت صوت عياط ذبيت
الكوب بالگاع ومشيت بسرعه
طبيت بيت اهلي
الصوت جاي من بيت عم جميل وصوت خاله سناء تصيح
✦الحكوو علينا احترگنا
يتبع
اوتار_حزينة
تعليقات
إرسال تعليق