رواية أوتار أحد من السيف الفصل الخامس والعشرين بقلم الكاتبه زهرة الربيع حصريه وجديده على مدونة النجم المتوهج
رواية أوتار أحد من السيف الفصل الخامس والعشرين بقلم الكاتبه زهرة الربيع حصريه وجديده على مدونة النجم المتوهج
نعيم دفع مهران ودخل هو وخطاب والغفر ومهران بقى يقول بغضب..انتو ازاي تدخلوا كده البيوت لها حرمه...عيب كده
نعيم قال بضيق...بس ياض اقعد على جنب مش هنتساير ويا عيال على اخر الزمن
مهران لسه هيتكلم خطاب قال بسخريه....دول الناس اللي اوصاف طلعت الجبل مخصوص علشانهم
وقرب من غالب وقال...كيفك يا عم غالب...لك وحشه ياراجل يا طيب
غالب كان واقف قدام سرير قاسم بقلق وقال..فيه ايه يا خطاب...ايه فكرك بينا...يلا خد رجالتك وامشي ..محدش رحب بيك عشان تدخل كده
خطاب ضحك وقال....لا وانا قاتل نفسي علشان ترحبوا بيا
وبص لنعيم بغضب وقال....ليه جبتني عند الراجل الخرفان ده..انا صدقت ما اخلصنا من خلقته
نعيم ضحك وقال..ليه كده بس يا عمده ...عمك غالب كان خدام ابوك الله يرحمه وياما خدمكم... معايزش تسلم عليه
خطاب نفخ بخنقه وقال.... انا معنديش وقت لحديتك الماسخ ده انا غلطان اني فكرت انك هتفيدني
ولسه هيمشي نعيم قال ...طب معايزش تسلم على اخوك ..ولا هو كمان ملوش عازه
خطاب استغرب كلامه والتفتله ونعيم راح لسرير قاسم وغالب حاول يمنعه ووقف قدامه وهو بيقول.. لاه يا نعيم لاه
بس نعيم زقه وشال الغطى من على وش قاسم وقال...مش هتستنى قاسم بيه يصحى وتسلم عليه
خطاب اتسعت عيونه بذهول شديد ومبقاش قادر ينطق وحس رجليه مش شيلاه ابدا
عند غفران اتوترت لما شافت حبوب منع الحمل في ايد دياب وقالت بسرعه وتوتر..دياب...بص ..هفهمك انا اشتريته قبل ما نتجوز ..كنت فاكره اننا هنعيش طبيعي زي اي اتنين متجوزين ومكنتش عايزه عيال دلوك و...
قاطعها دياب وقال بغضب ...مني ...اسمها مكنتيش عايزه عيال مني يا غفران مش كده
بقلم...زهرة الربيع
غفران نزلت عيونها بتوتر ودياب قال بغضب....انا قربتلك مره واحده ليلة دخلتنا وبس..وبعد ما شوفت رد فعلك مقدرتش اقرب منك تاني ...بس كل الوقت ده وانتي لسه مخبيه الشريط...لسه ناويه تاخدي منه لو حصلت بينا حاجه ....معقوله تفكيرك يوصلك لكده ..انا مش مصدق...يعني احنا لو عشنا طبيعي كنتي هتفضلي تاخديه من ورى ضهري ومهتفكريش تقوليلي...مهتفكريش يمكن اكون نفسي في عيل او بفكر ليه محصلش حمل...كنتي هتفضلي تاخديه والقرطاس اللي جنبك ولا داري بحاجه
قال جملته الاخيره بزعيق ورمى الشريط على الارض بغضب شديد
غفران اترعبت من صوته وخافت يرجع يضربها تاني وقالت بدموع....انا....انا كنت هرميه ...كنت هرميه يا دياب بس نسيت ..نسيت والله ...وبعدين انا اشتريته وقت ما كنت زعلانه قوي منك ...كنت خايفه وكنت ناويه اتطلق ...ومكنتش عايزه عيال ده اللي جيه في راسي وقتها
دياب اتنهد بتعب وقال....ماشي يا غفران ...على راحتك..تعوزي عيال ولا ما تعوزيش دي حاجه ترجعلك لوحدك... في كل الاحوال انا عيالي مش هجيبهم منك
غفران بصتله بدهشه وهو قال...مستغربه ليه ...انا كده كده هتجوز ...هتجوز وهجيب واحده تحطني كحل في عينها.... وتصلي قيام الليل وتدعي ربها يرزقها عيل مني ...هجيب واحده تستاهلني تستاهل كل التعب وكل الحمايه وكل الحب اللي انتي اخدتيه من غير اي مقابل منك ..دي بس اللي تستاهل تبقى مرت دياب الخطاب وام عياله
قال كده ومشي بغضب وغفران جريت وراه وهيه بتنادي وبتقول...دياب..دياب استنى...دياااب
بس مردش عليها ونزل بسرعه وهيه خبطت باب الاوضه وداست على شريط الحبوب بغضب وعصبيه وقالت ...الله يلعنك يا غفران الله يلعنك
وقعدت على السرير وبقت تبكي وهيه زعلانه جدا على زعله لاول مره
عند فاطمه اتفاجأت بطلب عقبه وقالت بحرج ...كنت فاكره بعد اللي حصل مني مهتامنش اني اكون مرتك
عقبه ابتسم وقال...اللي حصل انتي ملكيش يد فيه....من الاول كنت عارف ان دياب هيستسهل وهتكوني اول طريق ياخده
فاطمه نزلت عيونها بحرج وقالت..عشان كده اصريت نتجوز وكنت بتهددني
عقبه هز راسه وقال...بالظبط انا وفياض قلقنا منه وعشان كده طلبت نتجوز رغم اني عارف انك ....
بس سكت مقدرش يقول انها بتحب دياب وفاطمه ابتسمت بامتنان وقالت ....انت طيب قوي يا عقبه..ولو جيت للحق انا مستاهلكش واصل
عقبه ابتسم بحب وقال..لو جيتي للحق انتي تستاهلي خير الدنيا كله يا فاطمه
فاطمه ابتسمت وقالت ...شكرا يا عقبه...انت حذرتني وانا مسمعتش كلامك وجيت طلبتني وانا بهدلتك وبعدها بردك كنت عايز تلحقني وجيت وراي معرفاش اقولك ايه
عقبه قال بحرج..تقولي موافقه ...علشان نروح لامك وخالتي اتأخرنا لوحدنا هنه وانا مكسوف منهم قوي
فاطمه ضحكت جامد وقالت ...ياجي فياض ونشوفو الموضوع ده
قالت كده وطلعت وهيه مبسوطه جدا باهتمامه
وعقبه حط ايده على قلبه واخد نفسه بسعاده وبص للسما وقال....الحمد لله يارب....الحمد لله
ولسه هيطلع يقعد معاهم جاله اتصال من رقم دياب استغرب ورد وقال بضيق...خير....ابوك ناوي يخطف حد تاني
دياب قال بصوت مخنوق ...عقبه انا عند الترعه القبليه ...ممكن تاجي الله يرضى عليك
عقبه استغرب وقلق من صوته وقال...فيه ايه يا دياب انت بخير
دياب قال بسرعه..بخير مفيش حاجه بس عايز اتحدت وياك دقيقتين
عقبه قال..تمام...انا قريب منك دقيقه واكون عندك
وقفل معاه واستأذنهم ونزل بسرعه
دياب كان في عربيته حاسس بتعب وخنقه وهو بيفتكر كل المواقف اللي عدت اللي بتحسسه انه قاعد مع واحده مش طيقاه ..الفكره وحدها بتجننه
في الوقت ده وصل عقبه وفتح باب العربيه وقعد جنبه وقال..فيه ايه يا دياب جرى ايه...عرفت حاجه عن فياض
دياب غمض عنيه بخنقه وقال..ممكن ورحمة ابوك ما تجيبلي سيرة فياض واصل انهارده ...لو تسمح يعني
عقبه اتنهد وقال...زين.... قول عايزني في ايه...انا افتكر فيه مشكله سبب ما جيت ....غير كده معايزش اشوف خلقتك
دياب ابتسم وقال ...عايز عزومه ...ارقيني كيف ما كنت تعمل زمان لما اكون مضايق
عقبه ابتسم بسخريه وقال...دياب عايز ايه.... همشي
دياب كان عيونه مليانين دموع وقال بخنقه..انا والله بتكلم جد اقرى علي...انا طالب قران ربنا يا شيخ عقبه ...متبقاش بخيل
عقبه شاف حالته صعب عليه وحس ان فيه مشكله حط ايده على دماغه وبدأ يرقيه ودياب كانت نفسيته سيئه جدا بس بدأ يتحسن مع الرقيه شويه شويه
بعد ما خلص ابتسم وقال...ارمي حمولك على اللي خلقك ....وعنده مفاتيح الغيب لا يعلمها إلا هو ...صدق الله العظيم
يمكن اللي في الغيب كله خير ليك وانت متعرفش
قال كده ولسه هينزل دياب قال بسرعه...عقبه....حقك عليا يا صاحبي
عقبه اتنهد وقال....حسن علاقتك مع ربك يا دياب قرب منه مهتبقاش محتاج حد يرقيك ولا هتحتاج وسيط بينك وبينه
قال كده ومشي ودياب ابتسم بحزن وبقى يفتكر وقت ما كانو دايما سوا هما التلاته والضحكه مش بتفارقهم
عند فياض كان بيسمع لاوصاف اللي بدأت تحكيله عن موضوعها مع خطاب وقالت ...انا امي ماتت وهيه بتولدني ...وابوي حصلها قوام كان عندي ٧ سنين ...و بعد ما اتوفى اخدتني عمتي فوزيه وعشت معاها في الجبل وكانت ايام ما يعلم بيها الا ربنا..بس كانت كل حاجه طبيعيه لحد ما تميت ال 21 سنه وجيه خطاب بيه عندنا الجبل
فياض استغرب كلامها واوصاف قالت ....قالي ان ابوي فايتلي ارض بيتنا القديم اللي كنا عايشين فيه والعقد متوثق وكاتبه باسمي تحت وصاية المحكمه ...انا عمري ما فكرت ابيع البيت ده اصله قديم وملوش عازه وكبيره يبقى زريبه ...بس لما اصر يشتريه فرحت وقولت يا اما انت كريم يا رب فرجت واخيرا هيبقى معاي فلوس واسافر وابعد من خلقة نعيم اللي كان هيموت ويتاجر بيا
فياض كان بيسمعها باهتمام وهيه قالت بسخريه....الاول قالي انه جنب زرعه وعايزه علشان يوسع وهياخده ب ١٠٠ الف وفرحت قوي وقولت تمام موافقه ....قالي انو هيجهز الورق ويقابلني...واتفقت معاه اقابله في البيت نفسه اللي هيشتريه علشان نعيم ميعرفش ....وبعدها باسبوع رجع ومعاه العقود وانا مضيت عليهم وقبل ما اخد الفلوس دخل عمي قاسم
فياض استغرب وقال..قاسم مين ...ابو غفران
اوصاف اتنهدت و قالت ..ايوه هو ...قالي متمضيش يا بتي
وخطاب قاله هيه مضت خلاص قام واخد العقد مني وشقه نصين .... وزعق في اخوه وقاله عايز توكلنا الحرام مش قولتلك تحكيلها الحقيقه البت يتيمه ومال اليتيم نار
انا كنت واقفه مش فاهمه اي حاجه وخطاب كان هيتجن ويخليه يسكت بس قاسم قالي ارضك بملاين ..وتحتها دهب من سنين وقال ان اخوه معايزش الارض عايز الكنز اللي تحتها
اوصاف بلعت ريقها وقالت ...بقى يشاورلي ويقولي على اماكن الدهب المدفون وخطاب بقى يحاول يسكته بس مرضاش يسكت فسحب سلاحه...و...و
هنا اوصاف بقت تبكي ومقدرتش تكمل وفياض اتصدم بشده ومسك اديها وبقى يحاول يهديها وقال...اهدي يا اوصاف...اهدي وحدي الله
اوصاف قالت ببكا..لا الاه الا الله.....ضرب عليه يا فياض قتله قدامي وانا كنت لوحدي ..وهو نفسه قلبه اتخلع من اللي حصل وجري من المكان بخوف وسابني
بقلم....زهرة الربيع
فياض لمعت عيونه بالدموع وقال...ابو غفران مات...يعني هو مات مطفش كيف ما قالوا
اوصاف هزت دماغها بالرفض ومسحت دموعها وقالت...هو ولا طفش ولا مات....انا وخطاب افتكرنا انه مات وقتها وهو جرى وهملني وانا كنت هجري وراه من خوفي بس سمعته بيتألم
رجعتله لقيته لسه فيه الروح اتصلت على نعيم مكانش قدامي غيره كان لازم الحقه ....ووقتها نعيم عرف بموال الارض
فياض كان مصدوم من اللي بيسمعه وقال....خطاب بيه ضرب على اخوه...كيف...لا هو...هو طماع وشديد في حكاية الفلوس بس ميقتلش مستحيل
اوصاف قالت بحزن...انت متعرفش حاجه عنه يا فياض ....اقسملك بالله ده اللي حصل
فياض قال بحزن...وعمي قاسم حصله ايه
اوصاف اتنهدت وقالت....اخدناه على دارنا في الجبل وكان تعبان قوي جاته جلطه معرفناش من الرصاصه ولا من صدمته في اخوه ...في الاول مبقاش يتكلم ولا يمشي ولا يتحرك وكان نعيم مش ساكت وبيقول ليه نصرف عليه ...لدرجة اني كنت اسهر جنبه وانا مرعوبه لاحسن يقول لخطاب عنه و يعرفه مكانه...بس بعد شهرين الحمد لله قدر يمسك القلم ويكتب مكان عمي غالب
فياض قال باستغراب..... غالب مين
اوصاف قالت بابتسامه....عمي غالب راجل طيب كان يشتغل ويا ابو خطاب وربى قاسم على يده ...عندهم بيت في راس الجبل البيت اللي روحتله فيه عايش هناك هو وولده
ومن وقتها عمي قاسم هناك بنجبله الدكتور ويتابع معاه بقاله شهور هناك ...بس اتحسن قوي بقى يوقف نسندوه ويمشي شويه ويحرك اديه ودماغه وياكل ...بس لسه مش بينطق
فياض نزل عيونه بحزن شديد وقال...غفران فاكره ابوها هملها ومشى
اوصاف قالت بدموع ..انا شايله ذنبها ...بس معرفاش اعمل ايه....كل املي انه يرجع يوقف تاني على حيله ويرجع لبته..ويساعدني انا كمان نطلع الدهب ونبيعوه..انا مش هعرف اعمل كده لوحدي ...وقتها بس هقدر امشي من هنه واعيش حياتي بعيد عن نعيم...وقتها بس هقدر اتنفس من غير خوف
فياض بصلها لما قالت كده وقال..ايه....تمشي ..تروحي فين..لا مهيحصلش اتجنيتي اياك
اوصاف قالت باستغراب..امال عايزني اقعد هنه علشان يخلص عليا كيف ما خلص على اخوه...خطاب مبيرحمش وباقي علي لحد دلوك لان الارض باسمي وميقدرش يتصرف فيها ولا يلمسها.....انما لو انا طلعت الدهب وبعته ومبقاش عايزني هيدبحني ويسلوقني ده واحد قتل اخوه قتله وهمله من غير ما يعرف عايش ولا ميت
فياض قال بغضب...بردك مش هسيبك تسافري...انا وياك و.....
بس قطع كلامه وقال بقلق .....اوصاف انتي معنى كلامك ده ان خطاب ميعرفش ان اخوه لسه عايش
اوصاف قالت ..لاه الحمد لله ميعرفش .....فاكره مات واحنا تاوناه ...لو عارف انو عايش كان خلص عليه...لانه لو قام ونطق هيقول انه حاول يقتله ومش بعيد يحبسه كمان
فياض بلع ريقه بتوتر وقال..طب...طب بما اننا هربنا....تفتكري ممكن جوز عمتك ده يستندل ويعرفه طريقه
اوصاف اتسعت عيونها بذهول شديد وقالت ...يا مري
عند غفران كانت قاعده على السرير بحزن شديد وبتحاول تتصل على دياب مبيردش
اتنهدت وقالت بقلق...راح فين ده بس ياربي لحسن ينزف تاني ولا يتخانق ويا حد...ربنا يهديك يا دياب
وقامت تمشط شعرها اللي سابته زي ما هو من وقت ما استحمت
بس اتصدمت لما حد كممها من وراها ووبقت تحاول تدفعه بس مقدرتش واغمى عليها في الحال وووو
اوتار_احد_من_السيف
الخامس_والعشرون
زهرة_الربيع
انفجاااارات والي جاي مفاجأت ياترى خطاب هيعمل ايه في قاسم...ورد فعله هيبقى ازاي ...وكمان اوصاف هتتصرف ازاي دلوقت اللي جاي خطير متنسوش لايك للبارت وشير لصفحتنا الحلوه يلااااا ابداووو🏃♀️🏃♀️🏃♀️
ملحوظه
بكره معايا ظرف وفيه احتمال مقدرش انزل البارت علشان متستنونيش على الفاضي بس انا هحاول والله لو قدرت هنزله ادعولي🥰🥰
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
0 تعليقات