حكاية أسيل الفصل الثالث حتى الفصل الثالث عشر بقلم الكاتب إسماعيل موسي حصريه وجديده
حكاية أسيل الفصل الثالث حتى الفصل الثالث عشر بقلم الكاتب إسماعيل موسي حصريه وجديده
انت تقف أمامى لذلك لا يمكننى ان أجزم انك تحبنى، فكل الذين احبونى ماتو، كل الذين احبونى ماتو.......
عادت اسيل لمنزلها مهدودة الحيل، لا تكاد تشعر برأسها، كان الصداع يخرج من عينيها واذنها وانفها، بالكاد تناولت عشائها ونامت، ايقظتها والدتها الصبح بطلوع الروح، لبست هدومها وطلعت جرى على الشركه، فى الطريق كانت بتفكر هما ليه عملو معاها كده، معقول كانو بيختبرو كفائتها من اول يوم؟
الشركه كانت صاخبه كعادتها، اول ما اسيل قعدت على الكرسى، طلبت فنجان قهوه، دخل بيه عبد الفتاح فورآ وعلى وشه ابتسامه ماكره، ايه الاخبار يا استاذه؟
اسيل الحمد لله تمام
عبد الفتاح بلغنى ان روحتى الساعه عشره بالليل؟
اسيل، كان لازم اخلص الشغل بتاعى يا عم عبد الفتاح
عبد الفتاح، ربنا يساعدك يا استاذه، تأمرى بأى حاجه تانيه؟
اسيل لا، متشكره
نزل عبد الفتاح على الحديقه وهو بيضحك، اسيل شافته من الشرفه ماشى ناحيت الشاب
دار بينهم حوار كله ضحك واسيل مركزه معاهم هتموت من الغيظ
الشاب شاور بايده وبص على الشرفه فجأه شاف اسيل واقفه بتبص عليهم
اسيل لما شافته بيبص عليها قعدت على الكرسى على طول
ضربت الترابيزه بايدها، زمانه دلوقتى بيقول البنت دى معجبه بيا؟
مكنش لازم ابص عليه ، النهرده هقابل المدير واقدم شكوى رسميه فى الشاب ده.
وقت البريك اسيل طلعت على مكتب المدير وطلبت تقابله، السكرتيره طلبت منها تسيب شكوتها وهى هتعرضها على المدير، لكن اسيل أصرت تقابل المدير بنفسها
السكرتيره قالت ماشى، مفيش مشكله، اتفضلى استنى المدير واول ما يطلبك هقلك.
مرت ساعه واكتر واسيل قاعده فى الاستراحه، شويه والشاب وصل كان جسمه كله عرق، السكرتيره كانت هتقوم لكنه شاورلها بايده فقعدت مكانها، اسيل شافته وعلى وشها تكشيره كبيره، أحمق، وقح، جاي بنفسك هنا، انا هوريك يا استاذ لما اقابل المدير
الشاب بهدوء، بلاش يا استاذه، مديرنا صعب وبتاع نسوان وانتى ما شاء الله جميله وجذابه انا خايف عليكى!
اسيل بزعيق كل كلامك ده هقوله للمدير والسكريتره شاهده عليك
الشاب بابتسامه ماشى
اختفى الشاب نص ساعه بعد كده السكرتيره طلبت من اسيل تستعد عشان تقابل مدير الشركه
انفتح باب مؤدى لرواق طويل وقفت قدام باب تانى فتحته السكرتيره ومشيت
دخلت اسيل المكتب، كان فيه شخص لابس بدله مديها ضهره وقاعد على الكرسى
اتفضلى يا انسه اقعدى
قعدت اسيل من غير ما تتكلم
مدير الشركه، السكرتيره بلغتنى ان عندك شكوه، اتفضلى انا سامعك
اسيل بارتباك، فيه شاب شغال هنا، البستانى، دا حضرتك شغال فى الحديقه بلبس النوم، انا حاولت احذره لكنه شاب وقح جدا، وعلى فكره قال ان مدير الشركه ميقدرش يعمله حاجه، لكن انا حضرتك مسكتش، شتمته وبهدلته وهددته انى هبلغ حضرتك
مدير الشركه، للدرجه دى؟
اسيل ايوه حضرتك واكتر كمان، قال ان حضرتك لا مؤاخذه يعنى بتاع بنات وكده!؟
مدير الشركه ضرب الطاوله بايده هى وصلت لكده
ولف الكرسى بتاعه بقى فى وش اسيل إلى بصت عليه ومقدرتش تبلع نفسها
يتبع
اسماعيل موسى
...
الجزء الرابع
التفت مدير الشركه ناحيت اسيل، كان لابس نضاره وشكله متغير لكن اسيل تعرفت عليه!
اسيل تكورت على نفسها، تقزمت وكأن الأرض بلعتها
الشاب قلتيلى بقا انتى جايه تشتكى من مين؟ ولا بعلتى لسانك ؟ بتتراجعى عن كلامك صح؟
اسيل فى نفسها، ياروح ما بعدك روح، كده كده هيطردنى يبقى خليها بكرامه
بشتكى من البستانى، وقحته ولبسه، ويتصادف ان البستانى هو حضرتك
طبعا دى شركتك ومن حقك تعمل إلى انت عايزه فيها، لكن انا مكنتش اعرفك طبعا، وكمان لبسك بالنسبه ليه كان مستفز جدا وغير محتشم
الشاب بابتسامه مستفزه، يعنى مش بتتراجعى عن كلامك؟
اسيل وهى بتستعد للوقوف، لا حضرتك، مش هتراجع
الشاب عارف عقاب كلامك دا ايه؟
اسيل عارفه ومستعده وجاهزه، انا اصلا منفعش للشركات الكبيره إلى زى كده واستقالتى هتكون على مكتب حضرتك قبل غروب الشمس
الشاب بهدوء، ارجعى مكتبك وانتظرى قرارى
ولما اقول انتظرى قرارى يعنى متتخذيش ار قررات عنتريه لحد ما ابت فى شكوتك
ا
رجعت اسيل مكتبها بتتحصر على الشركه والمرتب والمكتب الجميل، هترجع تانى للبيت وشغله وقرفه
مكنتى حطيتى لسانك فى بقك يا اسيل ومشيتى فى حالك لازم تعملى نفسك فيها بطله؟
يتبع
اسماعيل موسى
. ...
الجزء الخامس
امر مزعج لما تكون عارف إلى هيحصل ورغم كده مستنيه يحصل، جزء كبير داخل اسيل كان عارف انها ممكن تترفد وجزء صغير كان بيمنحها الأمل، ان مدير الشركه يكون شخص عقلانى وبيفكر خارج الصندوق زى هدومه إلى بيلبسها فى الحديقه ويتقبل اعتراضتها بطريقه عادله، مش على محمل شخصى.
مضت نص ساعه اسيل قضتها فى اضطراب، زى اى موظف جديد خايفه تخسر وظيفتها
خاصه انها لسه متفشخرتش بيها على صحابها، لسه متصورتش جنب الشباك ونزلت صورتها على الفيس مع اغنيه
الموضوع ده كان مضايق اسيل جدا اكتر من الرفد نفسه
بعد نص ساعه وصل الساعى عبد الفتاح على وشه ابتسامه كعادته
المشكله فى عبد الفتاح انه دايما مبتسم مهما كانت الاخبار إلى جايبها معاه، متقدرش تقراء من وشه حاجه
اسيل فى نفسها، ارغى يا صديق المدير المغرور
عبد الفتاح، استاذه اسيل، المدير بيطلب من حضرتك المثول أمامه فى مكتبه مع مدير مكتبك
اسيل مشيت بخطوات بطيئه ناحيت مديرها إلى شكله اتغير لما سمع الكلام
سأله انتى عملتى مصيبه؟
اسيل ابدا والله
المدير امال فيه ايه؟
وصلو مكتب المدير إلى كان منتظرهم، المدير بص على اسيل بنظره متمعنه، شاف اضطرابها وارتباكها
انتى الموظفه الجديده كأنه اول مره يشوفها ؟
اسيل باستغراب ايوه حضرتك
المدير انا قررت انقلك لمكتب تانى وغمز بعينه من غير ما يذكر اسباب ولا حاجه
مدير مكتب اسيل إلى تأمر بيه حضرتك
ضغط على جرس دخل موظف نحيل وكبير فى السن، الموظفه الجديده هتشتغل معاك تقدر تاخدها تعرفها مكتبها
خرجو من المكتب، اسيل جمعت حاجاتها وراحت على المكتب الجديد إلى كان بيبص على الحديقه لكن متطرف شويه.
اليوم ده رغم رعبه كان اسعد يوم فى حياة اسيل، وقررت مهما حصل معاها او شافت مش هتفاح بقها
مدير مكتب اسيل الجديد انتى عارفه شغله هنا هيكون ايه؟
اسيل لا حضرتك مش عارفه
طيب، انتى هتكونى السكرتيره الخصوصيه لمديرنا الشاب
اسيل كانت هتقع من طولها
بس انا معرفش حاجه فى شغل السكرتاريه
المدير هتتعلمى، اهم حاجه مهما كانت أوامر المدير اياكى تعترضى عليها او حتى تبدى امتعاضك
مديرنا مش بيحب يسمع غير كلمة حاضر، مش بيحب النقاش
راجل ديكتاتورى مقرف
اسيل استعجبت لما سمع كلمة مقرف اول واحد فى الشركه يشتم المدير
اسيل بس حضرتك هتساعدنى انا مش عايزه اخسر الشغل ده
مديرها العجوز، هساعدك متخفيش هو اصلا مش بيطلبنا اصلا غير كل فين وفين
ارتاحت اسيل شويه، لما عدى يوم واتنين واسبوع المدير مطلبهاش ولا حتى شافت وشه
وبدأت تتعود على حياة الشركه وتفهم شغلها كويس
بعد مضى اسبوع اسيل كانت قاعده وحدها فى المكتب إلى انفتح فجأه وشافت المدير قدامها، رمى ملف على مكتبها
وقال، راجعى المكتب دا كويس، احفظيه زى اسمك
بكره عندنا غداء عمل، البسى كويس وخليكى جاهزه
خرج المدير واسيل حست بالعجز والضعف، غداء عمل ايه؟
والبس ايه.
يتبع
اسماعيل موسى
..
الجزء السادس
جلست اسيل على مقعدها متيبسه، عنيها متسعه من المفاجأه، غداء عمل ايه بس ياربى؟ دا نا حضرت فرح اختى بالعافيه!
دلوقتى مطلوب منى البس واتزين وكل حركه وكلمه بحساب رغم كده، اسيل فتحت شبكة الإنترنت وبحثت عن الملابس الخاصه بعشاء العمل وبعض النصائح المتعلقه بمهام وظيفتها الجديده.
كان فيه نصايح كتيره جدا، انها لازم تكون دارسه ملف العمل كويس جدا ومستعده للرد على اى سؤال فيه
انها تكون سريعة البديهه ومبتسمه على طول وانيقه
اسيل كانت متأكده انها هتفشل.
روحت البيت مهمومه مخنوقه مكنتش تتمنى ان حياتها العمليه تنتهى بكارثه زى إلى هتحصل بكره
قبل الساعه 8 بالليل اسيل كانت حافظه ملف الشغل كويس وطلبت من والدتها تراجعه معاها، حفظت جدول العمل صميم وفضل قدامها العقبه الأهم اختيار رداء أنيق يليق بالحفلات
معظم الملابس إلى شافتها مكنتش ملائمه ليها، تنناير قصيره وملزقه، جزمه كعب عالى او بدلة عمل رسميه
خبطت اسيل الملف على الترابيزه، كده معدش نافع خالص
انا عايزه انتحر ! 👋
اخيرا اختارت جيبه سوده وقميص ابيض وتحجيبه قصيره مع ابراز ساعة اليد الثمينه التى تمتلكها، وحقيبه شانين موف، بصت لنفسها فى المرايه
تمتلك اسيل عينين بوسع بحيره وغمازتيها بعمق منخفض، شفتيها بسمك قشرة انانس، شامات سوداء مثل رايات الحرب مبعثرة على خريطة وجهها وقوام بليونة بيتزا ايطاليه
تمعنت اسيل فى مظهرها قائله، لا بأس ، إلى الحرب اذآ ✌️
عندما وصلت مقر الشركه، مجرد يوم عادى لكن بالنسبه لاسيل كان يوم فارق فى حياتها العمليه، إلى زاد اضطراب اسيل انها دخلت على موقع الشركه على الفيس بوك وشافت لقطات للسكرتيره القديمه مع مديرها إلى كانت لابسه لبس ضيق زى المانيكان
الساعه 12 الضهر المدير طلبها، وصلت المكتب عنده، سألها انتى جاهزه
اسيل بصت يمين وشمال وقالت جاهزه حضرتك
لم يعلق المدير على لبسها ولا حتى شكلها، اكتفى نظره متفحصه طويله ثم نزلو على العربيه واسيل احتارت هتقعد فين؟
لكن لما الباب إلى جنب السواق اتقفل بسرعه قعدت جنب المدير فى المقعد الخلفي
كانت الحفله صاحبه وشعرت اسيل انها متقزمه وهى تسير إلى جوار مديرها الشاب الانيق لا ترغب ان يراها اى شخص
ان تختفى مثل عقلة الأصبع حتى تنتهى الحفله
مرت بين فتيات جميلات انيقات على سنجة عشره مختفيه خلف ظهر مديرها الشاب الانيق
كانت تحتاج لأى شئ يساعدها على الصمود، التفت مديرها نحوها وكانت المره الأولى التى يرمقها بتلك النظره
تبدين رائعه انسه اسيل
ياه نزلت الكلمه على صدرها مثل البرد، اخيرا استطاعت ان تظهر نفسها وتتحرك من خلف مديرها وتسير إلى جواره
يتبع
اسماعيل موسى
..
الجزء السابع
خرجت اسيل من خلف ظهر مديرها الشاب الأنيق، لكنها كانت لسه مرتبكه
مديرها؟__اسيل خدى راحتك واتصرفى على حريتك لحد ما ارجع
___ اسيل بخوف، هو حضرتك هتروح فين؟
مديرها ___ هكون هناك وشاور بأيده معايا حاجه لازم اناقشها مع الست إلى قاعده هناك
تحرك مديرها الشاب، اسيل بصت على اكتر مكان هادى مفيهوش ناس ومشيت ناحيته
سندت نفسها على حيطه وهى عماله تبص على الناس كأنها بتتفرج على فيلم قديم
ملابس الستات مكنتش عجباها خالص، احيانا كانت بتودى وشها الناحيه التانيه عشان متشفش تنوره مفتوحه
او فستان ضيق ملزق وصدره مفتوح
اسيل فى نفسها، هى الناس دى عايشه ازاى كده؟
عين اسيل بالصدفه وقعت على مديرها إلى كان قاعد ما امرأه جميله انيقه وبيضحك بارتياحيه
الست كانت لابسه لبس قصير لكن كان واضح انها متعوده على كده!
اسيل فى سرها وانا إلى طول الليل عماله احفظ فى الدوسيه وفاكره نفسى هقعد معاه فى كل مكان؟
طيب جايبنى ليه معاه طالما هيسبنى كده زى المتشرده فى الحفله!؟
انتى اسمك ايه؟
بصت اسيل لقيت شاب أنيق لكن واضح انه مغرور جدا ومتكبر
اسيل وانت مالك؟
الشاب بعصبيه، مش انتى واحده من الخدم هنا، انا عايز كأس ويسكى!
اسيل لا حضرتك انا سكرتيرة رعد بيه
الشاب ضحك ضحكه كبيره جدا وبص على رعد، مكنتش اعرف ان رعد مستواه انحط للدرجه دى
اسيل شعرت بالاهانه، من فضلك ابعد عنى، قالت وهى بتكافح دموعها
الشاب بتناكه انتى فاكره نفسك ايه؟ انتى متعرفيش بتكلمى مين؟
اسيل بعدائيه لا مش عارفه
الشاب انا جاسر بيه السويدى ابن أكبر رجل اعمال فى مصر
إلى زيك فى قصرنا بيحلمو انى اتكلم معاهم
اسيل ابن ابوك يعنى؟
جاسر رفع ايده ونزلها على وش اسيل بصفعه قويه خلت الحفله كلها بصت عليها
رعد قام يجرى على اسيل إلى كانت بتبكى، وجاسر كان واقف قدامها
رعد حصل ايه يا اسيل؟
جاسر بغضب، ابقى علم موظيفنك الأدب، علمهم ازاى يتكلمو مع اسيادهم
رعد، اسيل قولى حصل ايه؟
اسيل من غير ما ترد خدت بعضها وجريت على باب الفيلا وهى بتجرى
يتبع
اسماعيل موسى
..
الجزء الثامن
مسحت اسيل دموعها اول ما خرجت من الحفله، رعد كان بيجرى وراها لكن لما لقاها بعدت رجع تانى على الحفله، اسيل اخدت تاكسى وروحت على البيت مرحتش الشركه، كانت مهزومه ومحتاجه تقعد مع نفسها من غير ما تتكلم مع حد ولا حد يكلمها!
يمكن دى اللحظه إلى تخليك تفكر لما تشوف شخص مش عايز يتكلم مع أى شخص ولا عايز اى شخص يكلمه قبل ما
ما تلقى باللوم، وتحط مبررات، انك تستغنى عن كلمات الدعم النفسى وان الدنيا حلوه وفيها الف حاجه جميله تخلينا نبحث عن السعاده ولا نخضع للحزن وان الشخص دا ضعيف ومهزوم، انت مكنتش مكانه ولا مشاعرك زى مشاعره ولا حتى قوة تحملك زى قدرة تحمله.
انا هبكى شويه وابقى كويسه، اسيل فى غرفتها لم تتوقف عن البكاء، صعبت عليها نفسها جدا والى زاد من حزنها انها ما دافعتش عن نفسها، كان ممكن تصرخ، تشتم، تضرب، لكن اسيل مش كده، اسيل انسانه خجوله وعمرها ما دخلت فى نزاع او مشكله، ثم انها مش هتقدر تعمل كده حتى لو كانت عايزه، فى حاجه جواها بتمنعها، بتربطها
اسيل رفضت تتعشى رغم الحاح والدتها عليها، دا ما يمنعش انها بعد نص الليل تسللت للتلاجه وضربت نص كيلو موز وتلت سندوتشات جبنه، مكنش ليها نفس للأكل
الغريب ان لا شيء قد يمنع المرأه عن الأكل حتى الحزن
الصبح والدتها ايقظتها عشان تروح الشغل، اسيل رفضت، قررت تاخد اليوم دا أجازه
اسيل كانت مقرره متروحش الشغل تانى
الساعه 10:30 الصبح تليفون اسيل رن، رقم غريب لكنه يخض
01000514
اسيل ايه الرقم الغريب ده؟
مسكت التليفون بمزاجيه معكننه، مين؟
الو، وصلها صوت هادى ورقيق
اسيل مين معايا؟
انا رعد
اسيل بخضه، رعد مين؟ انت مدير الشركه؟
الصوت الرقيق الهادى، ايوه انا رعد
اسيل ايوه يا فندم معاك
انتى مجيتيش الشركه ليه يا اسيل؟
اسيل بلخبطه، كنت تعبانه حضرتك
تعبانه؟
لو سمحتى اسيل غيرى هدومك وتعالى الشركه، قبل ما اسيل تتحجج الخط قفل
غيرت اسيل هدومها وراحت على الشركه مضطره، مدير الشركه كلمها بنفسه ودى حاجه مش قليله
تحت الشركه قبل ما تركب المصعد، مديرها كان مستنيها فى العربيه وطلب من السواق ينادى عليها
اسيل خير ان شاء الله
السواق لو سمحتى يا استاذه مدير الشركه بيطلب منك تركبى العربيه
ركبت اسيل العربيه من غير كلام، والعربيه انطلقت وسط الشوارع
رعد مكلمش اسيل خالص ولا فتح بقه عليها
كانو قاعدين ساكتين لحد ما العربيه وقفت قدام كافيه
رعد نزل من العربيه وفتح الباب لاسيل
نزلت اسيل بخجل ومشيت ورا مديرها إلى دخل الكافيه وفضل ماشى جوه الكافيه الواسع لحد ما وصل طاوله قاعد عليها جاسر مع شوية بنات
رعد شاور لاسيل تقرب منه، من غير كلام رفع ايده وضرب جاسر على وشه بالقلم
احترام سكرتيرتى من احترامى فاهم
حصل نزاع صرخ فيه جاسر انت متعرفش انا مين؟ وابن مين؟
انت نسيت نفسك يا رعد؟
الناس اتدخلت وفصلت ما بينهم، خرج رعد واسيل تحت تهديدات جاسر، مبقاش ابن ابويا لو مدفعتكش التمن غالى
رعد لاسيل كبرى دماغك، دا عيل مدلل ابن ابوه، انا اسف يا اسيل، مقدرتش اعتذرلك امبارح لانك مشيتى
اتمنى تقبلى اسفى
اسيل قعدت تبكى
رعد، بتبكى ليه تانى؟ انا اخدتلك حقك!؟
اسيل مش بحب اكون سبب فى نزاعات او مشاكل ممكن تضرك
رعد بص لاسيل، كرامتك من كرامتى يا اسيل
القلم إلى انتى اخدتيه نزل على وشى انا
انا كنت بدافع عن نفسى مش عنك
يتبع
اسماعيل موسى
...
الفصل التاسع
9
خلاص بقا، وقفى عياط انسه اسيل، إلى يشوفك كده يقول انا مزعلك، شايفه الناس بتبصلنا ازاى؟
اسيل فى نفسها بيبصولك انت، وسامتك وشياكتك، لكن انا لبسى متلخبط مقلتش ليه اننا خارجين؟
صامته ليه انسه اسيل؟ هو اما عياط، او سكوت؟ مفيش حل وسط عندك
اسيل بخجل فيه حضرتك، انا بشكرك على إلى عملته معايا، بصراحه مكنتش متوقعه كده خالص
رعد بابتسامه، ليه انسه اسيل!؟
اسيل وهى باصه على الأرض بكسوف، إلى يشوفك فى الحديقه وانت قالع، قصدى لابس لبس غير محتشم يفتكرك شاب من اياهم
صمت رعد سامح لاسيل تكمل كلامها
اسيل، شاب مرفه، مدلل، ابن ابوه، صاحب شركه وفاكر نفسه مش ماشى على الأرض
رعد بحزن للدرجه دى انسه اسيل؟
اسيل مش قصدى والله، يخرب بيتك يا اسيل الظاهر انا عكيت
شوفت حضرتك المفروض اسكت ومكملش
رعد بالعكس انسه اسيل، كويس جدا نشوف الناس شايفانا ازاى
لكن عايز اقلك حاجه، إلى هيعيش زى ما الناس عايزه عمره ما يعرف يلاقى نفسه ولا روحه
ركبو العربيه، والسياره انطلقت ناحيت الشركه، وصلت رساله لرعد خلت وشه اتغير
اسيل فيه حاجه حضرتك؟
رعد وهو بيضع الهاتف فى جيبه لا مفيش حاجه
لما وصلو الشركه، رعد طلع على مكتبه وساب اسيل تروح مكتبها
اسيل بقا كده؟ مفيش فنجان قهوه مع حتة كروسوه دا انا على لحم بطنى
انتم الرجاله كده، دايما تاخدو إلى انتو عايزينه وتسيبونا فى نص الطريق
قعدت اسيل على مكتبها سعيده وشها بيضحك، رحل كل الحزن منها وحل مكانه فرحه غمرت روحها
توقعت ان رعد يطلبها مكتبه ويتواصل كلامه معاها
لكن رعد كان مشغول جدا، وكل ما اسيل تبص عليه تلاقيه بيرجع مستندات وبيمضى أوراق ومش بيرفع وشه
انتهى اليوم على كده، اسيل تأخرت شويه فى الشغل لكنها روحت وكان رعد لسه فى مكتبه مشغول
ايه إلى حصل يا جاسر؟ الحراس بلغونى ان فيه خناقه حصلت بينك وبين رعد
جاسر بغضب، رعد الجبالى ضربنى على وشى بالقلم قدام الناس ولازم تجيبلى حقى
السويدى بعصبيه بتقول ايه؟
جاسر رعد ضربنى
السويدى، ابن الجبالى ضربك؟ وانت قعدت ساكت
جاسر كنت هضربه لكن الناس وقفت بينا
السويدى، اتكى على الكرسى، دا حتة حشره، انا هفعصه زى ما فعصت الجبالى والده قبل كده
جاسر، والبنت السكرتيره بتاعته انا عايزها خدامه عندنا فى الفيلا
السويدى بعصبيه هو دا كل إلى همك؟. مش خايف على مركزى وسمعتى وبتدور على حتت بت مفعوصه؟
دخلت شاهنده والدة جاسر كانت لسه راجعه من الكوافير
خدت جاسر فى حضنها، فيه ايه حبيبى؟ حصلك حاجه؟
انت كويس؟
جاسر كويس يا ماما لكن رعد الجبالى لازم يتأدب، والبنت إلى كانت معاها هى سبب كل حاجه
لازم تبقى خدامه فى القصر يا ماما
السويدى بعصبيه كفايه حماقه، سيبونى افكر بهدوء
خرج جاسر مع والدته إلى كانت منفوخه من الغضب
اسمها ايه البنت دى يا جاسر
اسمها اسيل يا ماما!
شاهنده، سيب الموضوع دا عليا يا جاسر
جاسر عايزها خدامه تحت رجليه يا ماما
شاهنده، مبقاش شاهنده مدكور لو مجبتهاش تشتغل خدامه فى القصر خلال اسبوع
خبط باب شقة والدة اسيل، اسيل كانت فى الشغل، دخل عليها موظف محترم شايل طرد وطلب منها توقع على استلامه
والدة اسيل، طرد ايه دا يا ابنى؟ ومين إلى باعته؟
الموظف، دا طرد مشتريات اون لاين يا حجه باسم اسيل رفاعى
والدة اسيل، لكن اسيل بنتى مقلتش انها هتشترى حاجه من بره
الموظف، وقعى يا حجه انا ورايا شغل كتير
وقعت والدة اسيل على استلام الطرد والموظف مشى
والدة اسيل كلمت بنتها ان فيه طرد وصل البيت بأسمها
اسيل انا مشترتش حاجه يا ماما، سيبى الطرد زى ما هو لحد ما ارجع
مفيش دقايق والشرطه هجمت على الشقه واقتحمتها بتهمة حيازة مواد مخدره
ينبع
اسماعيل موسى
...
الجزء العاشر
ضابط الشرطه ___فين المخدرات إلى عندك يا حجه؟
والدة اسيل بخوف مخدرات ايه يا بنى لا سمح الله؟
ضابط الشرطه بزعيق __ فتشو الشقه
والدة اسيل شافت عساكر ومخبرين وكلاب بوليسيه كأنها فى حرب، فقدت وعيها من الرعب
مخبر الشرطه جاب الطرد إلى كان متروك على منضده فى المطبخ، المخدرات هنا يا باشا
كانت والدة اسيل استعادت وعيها بمساعدة الجيران لما فتح ضابط الشرطه الطرد
مخدرات يا حجه؟ بتجارى فى الممنوعات؟
قيدت المرأه بكلابشات من الحديد وسيقت لمركز الشرطه
تركت اسيل الشركه فجأه دون أذن او اعتذار، فى قسم الشرطه أخبرها ضابط المباحث ان والدتها محتجزه بتهمة حيازة مواد مخدره
وكلت اسيل محامى لوالدتها، كانت متأكده انها بريئه لكن محضر الضبط بيقول غير كده
المحامى مقدرش يطمن اسيل ولا حتى يخرج والدتها بكفاله
المحامى قال المحضر مفيهش اى غلطه، والدتك هتلبس حكم بالسجن المؤبد
قعدت اسيل تبكى وتنوح
مر يوم ويومين واسيل متغيبه عن الشركه، تليفونها مقفول
شؤون العاملين حاول يتصل بيها
وكمان رعد مدير الشركه لكن محدش عرف يوصلها
بعد اربع ايام اسيل كانت قاعده مع والدتها فى زياره
فى مكتب ضابط المباحث طيب القلب الذى سمح لها برؤية والدتها رغم مخالفة القوانين
باب المكتب انفتح ودخلت منه امرأه فى أواخر الأربعين يفوح منها عطر لاروس وشعرها قصة بيكسى
كانت لابسه تنوره ضيقه قصيره ورغم عمرها الا انها بدت شابه
فكل ما تحتاجه المرأه، راحه ونقود لتمنحك شباب لا ينتهى
قعدت شاهنده على مكتب ضابط المباحث وهى بتبص على اسيل الدامعه ووالدتها المريضه
شاهنده، عايزه تخرجى والدتك من هنا؟
بصت اسيل على شاهنده وعنيها كلها دموع، وهزت رأسها
شاهنده، هتنفذى كل إلى اقلك عليه ووالدتك هتروح البيت معاكى
اسيل مين حضرتك؟
شاهنده - - - مش وقت اسأله دلوقتى، عايزه والدتك تخرج ولا اقسم بربى هتتعفن فى السجن؟
اسيل لا، لا، عايزاها تخرج
شاهنده صفقت بايدها دخل محامى أنيق عجوز فى ايده أوراق وملفات
شاهنده، هتقدمى استقالتك من شركة رعد الجبالى من غير ابداء اى اسباب!
اسيل حاضر
شاهنده، هتضربى رعد بالقلم قدام كل الشركه
اسيل راحت تفتح بقها، شاهنده زعقت، اسمعى يا بنت انا مش جايه اهزر هنا
عايزه اسمع كلمة حاضر فقط
اسيل بدموع حاضر
بعد ما والدتك تخرج، هتيجى تشتغلى خدامه عندى فى القصر
اسيل حاضر
شاهنده كويس دلوقتى وقعى على الورقه دى
دا شرط جزائي لو منفذتيش كل شروطى هرميكى فى السجن
وقعت اسيل العقد والشرط الجزائى
شاهنده، تمام خالص
عبد المعبود، اسيل تروح مع والدتها دلوقتى، خلص الأوراق وكل حاجه وكلمنى على التليفون
بعد ما شاهنده ما رحلت، اسيل عرفت من المحامى انها والدة جاسر إلى ضربها بالقلم فى الحفله
لكن كل همها كان إنقاذ والدتها مهما كان التمن
رجعت والدة اسيل للشقه، العجيب الاجرأت التى ممن الممكن أن تستغرق عام تنتهى فى ساعه او جلسه، المحضر المرسوم طلع فشنك بجرة قلم
كل الاجرأت التى اتخذت والبلاغ الكيدى تجاه المرأه البرئيه
فى الشرطه انت فى ايدى امينه لكل شيء حل فلا تقلق
عندما جلست اسيل مع نفسها استطاعت ان تربط الأوراق ببعضها، شاهنده والدة جاسر السويدى الذى قام بصفعها فى الحفله، ثم قام رعد الجبالى مديرها برد الصفعه، بس ليه انا الى اكون فى وسط المعمعه دى؟ ليه عايزانى اشتغل خدامه عندهم؟
فكرت تتصل برعد لكنها تذكرت كلمات شاهنده، اى حركه هتقومى بيها هتوصلنى
لازم تقطعى علاقتك مع رعد بطريقه مباشره ودون تقديم اعتذارات
افتكرت اسيل رعد والى عمله عشانها وصعبت عليها نفسها، معقول اردله الجميل بالشكل ده؟
مش يمكن لو قلت لرعد على إلى حصل يقدر يخرجنى من الورطه دى؟
بس هى عارفه انها وقعت على شرط جزائى بمليون جنيه لو اخلت بالشروط
سلمت اسيل أمرها لله، الصبح حضر سواق من قصر جاسر السويدى عشان يوصلها الشركه تقدم استقالتها ويكون شاهد على الصفعه إلى هتضربها لرعد
وصلت اسيل الشركه وطلعت على شؤون العاملين قدمت استقالتها وشافت رعد قاعد فى مكتبه، المفروض دلوقتى انها تصرخ بأسمه ولما يوصل عندها تضربه بالقلم
حاولت اسيل تعمل كده لكن ما قدرتش، رعد معملش معاها حاجه وحشه، ازاى تضربه قدام موظفين الشركه؟
وقفت فى مكانها، اعمل ايه بس يا ربى؟
يتبع
اسماعيل موسى
...
الجزء ١١
انسحبت اسيل بهدوء، نزلت درجات السلم نحو السياره التى تنتظرها، اسيل فى نفسها، مش معنى انى مضطره ومجبره انى اتخلى عن انسانيتى وأدبى
ركبت اسيل العربيه
السائق، عملتى ايه يامدمازين
اسيل عملت التى اتفقت عليه مع الهانم
السائق، اصلى مسمعتش هيصه ولا ضجه؟
اسيل هو فيه ايه؟ انت هتعملى محضر، سوق من فضلك وملكش دعوه
وصلت السياره قصر السويدى ونزلت اسيل من العربيه
السواق من داخل السياره، روحى هما منتظرينك
مشيت اسيل فى طريق من الجص وسط الحديقه إلى أن وصلت باب القصر
فتحت ليها ست متوسطة العمر لكن ملامحها شريره
انا اسيل
الخادمه، وماله يا اختى ادخلى
دخلت اسيل القصر مرتبكه ومكسوره، راحت تقعد فى المطبخ لكن الخادمه قالت الهانم مستنياكى
كانت شاهنده قاعده حاطه رجل على رجل لما اسيل وصلت عندها
شاهنده رفعت حاجبها بتناكه، عملتى ايه
اسيل عملت إلى اتفقنا عليه يا هانم وانا مستعده للشغل
شاهنده اها، طلعت سيجاره وولعتها، عملتى إلى اتفقنا عليه كله؟
اسيل ايوه
شاهنده وقفت ومشيت بدلال بقدمين حافيتين وقوام طرى مهتز
بصت فى اسيل بغضب، نفخت دخان السيجاره، لكن معملتيش ده، رفعت ايدها وضربت اسيل على وشها
اسيل اتخضت من الصدمه ووقفت ثابته من غير كلام
شاهنده، كلامى يتنفذ بالحرف الواحد
كنتى فاكره انى مش هعرف انتى عملتى ايه؟
انا ليه عيون فى كل مكان وكل حركه هتعمليها هتوصلنى فى لحظتها، يلا غورى من وشى واعتبرى دا آخر تحذير
جاسر نازل من على السلم، لا تروح فين يا ماما انا عايزها
تعالى هنا يا بت انتى
اسيل بوجوم قربت من جاسر، انتى هتبقى خدامتى الخاصه هنا، وظيفتك انك تلبى رغباتى انا، أكلى، شربى، هدومى
اوضتى كل حاجه تخصنى، فاهمه يا شاطره!؟
اسيل مش قادره تتخيل حجم القذاره إلى وقعت فيها، الموقف كله عملها ارتباك
جاسر بصراخ، ردى
اسيل ماشى
جاسر مسكها من رقبتها، ماشى دى تقوليها لأمك فى البيت
هنا تقولى حاضر، فاهمه؟
اسيل بعدت ايد جاسر عنها، ايدك دى متلمسنيش تانى، لو لمستنى هتلاقى منى رد يزعلك
جاسر انتى، انتى بتقولى ايه؟ انا هبحسك، هرميكى فى السجن يا قذره، يا حيوانه
شاهنده بصت لجاسر، بالراحه يا جاسر، اسيل لسه جديده هنا ومتعرفش ازاى تتعامل مع ناس من طبقه عاليه
اسيل كانت واقفه متحفزه وعلى آخرها، كانت بدأت تتخلص من المفاجأه
شاهنده، خلاص روحى انتى يا اسيل على المطبخ
بعد رحيل اسيل، جاسر، انا مش مبسوط يا ماما، ازاى البنت الحقيره دى تقف قصادى كده؟
ماما، انا عايزها لعبه فى ايديا، عايز اكسرها، ازلها
شاهنده، اصبر يا حبيبى ورحمت امى لخليها تتمنالك الرضا ترضى
هخليها تركع قدامك، لكن الأول لازم اكتفها كويس، سبلى انا الموضوع ده
رعد اتفاجاء باستقالت اسيل لما سأل عنها، مدير شؤون العاملين بلغه ان اسيل استقالت من غير ما تبدى اى اسباب
رغم قصر مدت تعارفهم رعد كان متأكد ان فيه سبب لاستقالة اسيل، حاول يكملها اكتر من مره لكن تليفونها كان مغلق
وسط شكوكه وهو قاعد فى مكتبه وصلت صوره لرعد من تليفون جاسر
صورة لاسيل فى لبس الخدم فى مطبخ القصر، وتحتها، سكيرترك جبتها خدامه عندى
يتبع
اسماعيل موسى
...
الجزء ١٢
تأكد رعد ان اسيل إلى فى الصوره، غصب عنه خبط التليفون فى الطاوله، مكنش محتاج تفكير كتير عشان يعرف ان فيه حاجه حصلت اجبرت اسيل تعمل كده، لكن عقله مقدرش يتخيل المعلومات إلى وصلتله، المخدرات وسجن والدة اسيل، توسط شاهنده لاخراج والدة اسيل من السجن ثم عمل اسيل خادمه فى قصر السويدى
ليه يا اسيل ما اتصلتيش بيا!؟ ليه خضعتى لابتزاز شاهنده وابنها؟
يمكن الحق عليا انا إلى كان لازم اهتم اكتر واتواصل مع اسيل
رعد كان عارف ان دا انتقام جاسر منه، وكان مشفق جدا أن اسيل تتحمل وحدها نتيجة أفعاله
الرجال الحقيقون يرفضون ان يتحمل شخص آخر نتيجة أفعالهم وقراراتهم، يخرجون عرات الصدر ليتلقو الرصاصه ولا يختبأون مثل الفأران
ترك رعد المكتب، ركب سيارته وانطلق مبتعد عن الشركه
لن يترك اسيل بمفردها داخل جحر الحيات
فضل ماشى بالعربيه لحد ما قرب من قصر السويدى
ركن العربيه وولع سيجاره وهو متكى على الكرسى وبيبص على مدخل قصر السويدى
الساعه التاسعه مساء خرجت اسيل من قصر السويدى
سارت على الرصيف تائهه وواجمه، مرت على عربية رعد وهى شارده مش واخده بالها
تحرك رعد بالسياره ووقف جنبها، اسيل؟ اسيل؟
بصت اسيل للعربيه لقيت رعد
رعد اركبى من فضلك؟
ركبت اسيل العربيه وهى محرجه جدا من رعد ومش عارفه تقول ايه
رعد، عايز اعرف إلى حصل يا اسيل من فضلك!؟
وكأن اسيل كانت منتظره رعد يكون معاها ويسألها عن أحوالها وعن إلى حصل معاها
لطالما تمنت خلال حياتها ان تجد ذلك الشخص الذى تستطيع أن تبوح له بمشاكلها واسرارها دون خجل
ان تحكى وهى تعلم انه يستمع ومهتم، انه يشعر بها، ان يطمأنها ان كل شيء سيكون بخير حتى لو لن يكون بخير ولا يحمل اى بادره للخير
انسان محطم وبائس ومعزول ذلك الذى لا يمتلك صديق يبوح اليه
سردت اسيل قصتها دون أن تغفل اى نقطه، الطرد إلى وصل شقتها، الشرطه، السجن، شاهنده والشرط الجزائى
رعد كان بيسمع وهو شارد عقله كان راح لبعيد جدا، كان متأثر بكلام اسيل والى حصل معاها
ليه ملجأتيش ليا يا اسيل؟
اسيل بخجل، مكنتش عايزه اشغلك بمشاكلى، ثم كنت عايزنى اقلك ايه!؟ انى مضيت على شرط جزائي بمليون جنيه؟
انا مملكش المبلغ ده، ومش ممكن اطلبه من حد
ومش ممكن اشوف نظرة الشفقه فى عيون اى انسان لانى مش ضعيفه
احترم رعد مشاعر اسيل، كان لديه حلول كثيره، آخرها فى ذهنه، هذة الانسانه التى ينظر إليها لا تبحث عن حلول الان
أبتسم رعد
ومسكتى ايد جاسر وصرختى فيه؟
انتبهت اسيل وتفاجأت ان رعد كان مركز فى التفاصيل الصغيره دى، روحها المعنويه ارتفعت وقالت طبعآ وكان ممكن اكسرهاله
رعد انتى قويه جدا على كده!
اسيل دا مدح ولا سخريه؟
رعد __ إلى يبص عليكى ويشوف وشك يا اسيل لا يمكن يقدر يسخر منك ولا يقلل منك
اسيل بفخر __ متشكره
رعد طبعا انتى قدمتى استقالتك فى شركتى
اسيل بخجل ايوه
رعد __وطبعا انتى مضيتى على شرط جزائى وتورطتى
اسيل بحزن اكتر ايوه
رعد __وطبعا الشرط الجزائى دا بمليون جنيه؟
اسيل بفروغ صبر ايوه
رعد __ وطبعا مش هيفرق معاكى انك تعزمينى على العشا
مية جنيه ولا ميتين مش هيزيدو الطين بله؟
بصت اسيل على رعد إلى وقف العربيه قدام مطعم متواضع
وفتح باب العربيه
انا عزمت نفسى على حسابك يا اسيل
اسيل بلا هى كده كده خربانه
ترك رعد اسيل تدفع حساب العشاء إلى كان حريص انه ميكونش غالى
انتى هترجعى الشركه يا اسيل، انا مصر على كده
اسيل ازاى بس؟
رعد انا مش هقدر استغنى عن سكرتيرتى اكتر من كده
ثم المليون جنيه مبلغ ضخم ومش هتقدرى تسدديه من غير شغل
اسيل شغل ايه إلى هكسب منه مليون جنيه؟
رعد، انتى هتشتغلى سكرتيره الصبح وبعد الضهر هتشتغلى فى المبيعات، لو قدرتى تبرمى كام صفقه هيطلعلك منها مبلغ كويس
بصى يا ستى، انا هديكى سقف معين للعروض وانتى وشطارتك
يعنى مثلا صفقه بنص مليون جنيه لو انتى قدرتى تخلصيها على ٦٠٠ الف يبقى دا مكسبك بالحلال
انا هدفع الشرط الجزائى وهيكون دين عليكى، اعتقد كده اتفاق عادل
اسيل صمتت وفكرت ا انت شايف كده؟
رعد ايوه
اسيل مدت ايدها، توكلنا على الله لكن بشرط
انا الى هدفع الشرط الجزائى لشاهنده
رعد __موافق
حملت اسيل النقود فى حقيبه جلديه فى طريقها لقصر السويدى
مدخلتش من باب الخدم، دخلت من الباب الرئيسى وقعدت فى الصاله تنتظر شاهنده
صفحة الكاتب على الفيس بوك باسم اسماعيل موسى
شاهنده انتى قاعده تعملى ايه هنا يا بت انتى؟ غورى على المطبخ
اسيل، هو انتى متعرفيش يا شاهنده؟
شاهنده بغضب، شاهنده حاف؟ أسمى شاهنده هانم
اسيل، لا معلهش مش النهرده، يمكن فى يوم تانى
انا بستقيل من شغلى عندك يا شاهنده
اتفضلى الشرط الجزائى وفتحت الحقيبه الجلديه
بصت شاهنده على الفلوس بغضب، اسيل بصوت واضح، فين العقد؟
شاهنده بغضب وابتسامه صفره وماله اجبلك العقد
الخادمه طلعت بسرعه جابت العقد ونزلت، اسيل قطعت العقد وحطيته فى جيبها
كده مش ناقص غير حاجه واحده
شاهنده ايه يا انسه اسيل؟
اسيل فاضل ده، وصفعت شاهنده على وشها بكل عنف، ثم خرجت بسرعه من القصر ناحيت الشارع
يتبع
اسماعيل موسى
...
الجزء ١٣
لا اعتبرنى شجاعه، لقد ركضت بعد أن تركت القصر، شعرت بالخطر، الاوغاد لا يرحمون، الاوغاد خبيثون، لم اطمأن حتى وضعت قدمى داخل سيارة الأجره.
كنت فرحانه، سعيده بنفسى، انها من المرات القليله التى أفعل فيها شيء أرغب به من كل قلبى
لماذا لم تدافع شاهنده عن نفسها؟. كنت مستعده لصراخها
للخدم عندما يضربونى، وربما يحملونى مثل المقعد ويلقو بى فى الشارع.
عدم تحركها، رد فعلها الباهت اشعرنى بالخطر
هاتفت رعد حبيبى، فارس احلامى، افهم انه حب من طرف واحد لن يجر سوى المتاعب، لكنى حره، لكنه يستحق، اعتقد عندما نجد الحب الحقيقى، شخص يستحق حبنا علينا أن ننتهز الفرصه، اذا كانت كل حياتنا مؤلمه لماذا نخاف من جرح اخر؟ جرح رغم وجعه قد يجعلنا سعداء لبعض الوقت
نعم بعض الوقت فأنا لا اظن ابدا اننى سأجد سعاده دائمه طوال حياتى
سألنى رعد ماذا فعلتى؟
قلت فعلت المطلوب واستخدمت يدى اليمنى
ضحك رعد، يدك قويه؟
اجل، قويه جدا عندما احتاجها لكن لا تخاف
رعد __ اخاف ليه ومن ايه؟
اه من الرجال خبثاء جدا، يفهمون ويعرفون، لكنهم لا يتوقفون عن اللف والدوران
قلت لا شيء كبر دماغك
سأنتظرك فى الشركه، قالها مديرى بنبره تدفعك للاعتقاد ان الشركه لن تقوم لها قائمه دونى، وانها قبل وصولى للعمل كانت خاسره وضائعه
ابتعت سندوتشات، قنينة ماء، لتر ساقع فى طريقى لمكتبى
كان أول شيء فعلته ان ملأت معدتى واحتسيت مق شاى كبير
بعد ربع ساعه استدعانى رعد، عرفنى على موظف اخر، قال انه مدير مكتب المبيعات واننى سأعمل معه فى الفتره المسائيه واوصى ان ابداء عملى فورا وان يسند لى مديرى صفقه سهله كبادرة حسن نيه
وشعرت ان كل شيء مرتب، ان رعد حبيبى دبر كل شيء لنجاحى
بعد يومين، كنت فى شركة الأحمد للمنتجات الغذائيه انتظر مديرها لاعرض عليه صفقتى
أكثر من تلت ساعات رغى ومرواغه، اخذ ورد، ابتسامات خبيثه، تلميحات مستتره عن المكاسب المنتظره من الصفقه
ابرمت الصفقه بطلوع الروح، كان ربحى قليل لكنه معقول جدا، ٢٥٠٠٠ جنيه، مرتب نصف عام فى صفقه واحده
راح ذهنى يعمل بطريقه جد لعينه، وطموحاتى تصعد حدود الضباب، سأختار صفقاتى بعنايه فى المره القادمه
سأعمل على الصفقات الخاسره او المردوده
نعم هناك بعض الصفقات التى لم تنجح الشركه فى ابرامها لعدم وجود عروض، او فشل الصفقه لتباين السعر
لقد فاجأت مديرى بقرارى والذى بدا متحير جدا وسألني اكتر من مره انت متأكده؟
انت متأكده؟
انت متأكده؟
نعم متأكده، قال مديرى هذه الصفقات تحتاج وقت طويل، ربما عام احيانا
قلت لا بأس، ليس لدى مشاريع مؤجله أخرى فى حياتى سوى النوم
كنت بشوف رعد قليل جدا، ورغم انى كنت بتمنى اشوفه اكتر من كده لكن كان فيه شيء بيمنعنى من التقرب منه، وكان أكثرها خطوره دينى الذى تكفل به
قعدت ليالى طويله اسهر على ملفات الشركه، ملفات المبيعات الخاسره المتروكه والمردوده بتركيز كبير جدا
كان فيه اكتر من صفقه فاشله، فاشله لدرجة ان الشركه نفسها محاولتش تشتغل فيها، الحاجه الكويسه ان الصفقات دى كان خاصه بمعدات، واحيان هالك اجهزه، بمعنى انها غير قابله للتلف
هتبيعى روبابيكيا يا اسيل؟ الصراحه كان فيه اكتر من دافع انى اشتغل فى الصفقات دى، اولها مساعدة رعد والتانى ان أرباح الصفقات دى لو نجحت فيها هتكون كبيره جدا
درست خطط موظفى المبيعات، الشركات إلى عرضو عليها الصفقات، تقريبا معظم شركات السوق
اكيد انا مش اشطر منهم عشان اقنع شخص رفض الصفقه قبل كده انه يقبلها
القصه بقلم اسماعيل موسى
وصلت لحائط سد، وقعدت ايام طويله كل تفكيرى فى حل للمشكله الكبيره من غير اى نتيجه
فى مره وانا قاعده مع والدتى مر من تحت البيت بياع روبابيكيا، مش عارفه ليه نزلت الشارع اشترى منه، كان معاه حجات كتيره مكنتش مفيده بالنسبه ليا
سألت البياع ان بتكسب من بيع الحاجات دى؟
البياع قال الحمد لله ماشى الحال، اصل مفيش شخص هيديك سر مهنته
قلت انا معتقدش ان فيه ناس ممكن تشترى الحجات دى؟
البياع ضحك، انا اقدر ابيع الحجات دى للناس إلى اشتريتها منها، المهم انك تعرف تتعامل وتتخطط
الإقناع يا استاذه، الشركات إلى بتبيع الحجات بتحتاجها تانى اصلا، السبب ممكن ان المعدات دى قديمه ومش موجوده فى السوق، او ان الشركات المنتجه ليها قفلت فمبقاش فيه قطع غيار منها
شكرت البياع واخدت إلى اشتريته على الشقه وانا بفكر هو ممكن دا يحصل
واخدت قرار عنترى ، انا هعرض الصفقات دى على الشركات المنافسه لينا فى السوق
يتبع
اسماعيل موسى
الفصل الرابع عشر حتى الفصل الثامن عشر من هنا
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
إرسال تعليق