رواية أوتار أحد من السيف الفصل الثالث عشر بقلم الكاتبه زهرة الربيع حصريه وجديده

رواية أوتار أحد من السيف الفصل الثالث عشر بقلم الكاتبه زهرة الربيع حصريه وجديده 

رواية أوتار أحد من السيف الفصل الثالث عشر بقلم الكاتبه زهرة الربيع

 ايه اللي بينك وبين خطاب وليه خطفك وجابك هنه وبيقول هيتجوزك رغم انو عارف انك مقضياها مع ولده

اوصاف اتسعت عيونها بذهول وقالت...ايه...مين دي الي مقضياها مع ولده ما تحترم طولك يا جدع انت بدل ما اقل منك

فياض ابتسم بسخريه وقل..والله انتي بنفسك قولتيلي كده لما كنا في الجبل ولا نسيتي 

اوصاف اتنهدت وقالت ...منسيتش بس اكيد محصلش وانت عارف كده زين ..بلاش نلاوع على بعض

فياض ابتسم بسخريه وقال...وانا هعرف منين...انتي مش من بقية اهلي لا قدر الله علشان اعرف كيف اخلاقك..انا ليا بالظاهر ...انتي قولتي بلسانك...وكمان من شوي كنتي هتتجني عليه وواخداه بالاحضان... يعني الحب مولع في الغيط ..وباين للاهبل و العبيط

اوصاف بصتلو بغيظ وقالت....تصدق انا اللي هبله وعبيطه لاني فكرت ان فيه منك رجا او ممكن تساعدني ...الحق عليا اللي وقفت اسمعك

ولسه هتمشي وقف قدامها وقال...بس احنا مش موضوعنا دياب ...انتي بتتهربي من سؤالي ليه ...انا بسألك ايه اللي بينك وبين خطاب مش ولده

اوصاف لسه هترد سمعوا صوت زعيق خطاب  وهو بيقول ...يا ولدي جرحك لسه اخضر متتعبش قلبي ...ارجع سريرك يا دياب

بس دياب كان نازل بالعافيه وهو بيزعق بغضب وبيقول...فياض....فياض...بعد عني يا ابوي ...لو كنت خليته يمشي لساني مهيخاطبش لسانك المره دي

فياض اتنهد ولسه هيدخل اوصاف مسكت فيه وقالت...اخزي الشيطان يا ود الحلال ومتقفش قدامو دلوك ...هديتك بالله روح ومتدخل...

بس مكملتش كلامها وفياض بعدها ودخل وهو متجاهل كلامها تماما

بقلم...زهرة الربيع

جوه غفران كانت مع خطاب بيحاولوا يهدوه وقالت بخوف...هو مشى مشى من زمان ...هنعمل كل اللي تعوزه بس ارجع سريرك دلوك 

دياب مسكها من دراعها بغضب وقال..ايه خايفه عليه مش كده...انا هريحك على الاخر دلوك اصبرو علي ..فيااااض

ولسه هينادي تاني لقى فياض في وشه وقال...انا هنه يا دياب بيه...امر

غفران لطمت على خدها لما لقته لسه موجود وخطاب اتجمد مكانه كان فاكره مشي زي ما قاله

دياب ابتسم بطريقه تخوف وقرب من فياض وهو مش ناوي على خير ابدا

في الجبل كانت فوزيه عمة اوصاف رابطه دماغها وبتقول بحزن...ااااه يا صغيره يابت اخوي..يا اخر ما بقالي من ريحة الحبايب...ضيعك نعيم يا بتي....ضاعت امانة اخوي وروحتي مني يا اوصاف اااه يا...

بس قطعت كلامها بخوف لما نعيم زعق فيها بقوه وقال...ما تتكتمي يا مره...هتقعدي تعددي لميته وجعتي راسي ما قولتلك هلاقيها

فوزيه قالت ببكا...هتلاقيها فين يا اخوي...الجدع كان جاي وناوي ياخدها ومحدش يعرف طريقها...الراجل بتاعك قال انو خدره يعني اتقصد ميخليهوش يشوف طريقهم...البت راحت خلاص...ولا عارفين حتى مكانها... اه يا صغيره يا اوصاف يا ترى اخدوكي ليه يا بتي

نعيم كان هيتجنن من الغضب لان فياض قدر يضحك عليه بالطريقه دي وقف وقال بغضب...متقلقيش...هرجعها....وهلاقي الكلب اللي خدها ومش هخليه يقف على رجليه تاني ..انا لسه عندي طريقه 

فوزيه قالت بلهفه...صوح يا نعيم ...صوح هترجعلي اوصاف

نعيم ابتسم بسخريه وقال..لاه...مهرجعهاش ..هيه اللي هترجع هنه بنفسها ...هتعمل المستحيل وتاجي وانا عارف هستناها فين

عند عقبه كان خلص صلاته وقرائة القران وقاعد على زاويه بحزن شديد

قرب منه شيخ كبير في السن وقال....خير يا ولدي..مالك كده مش زي عادتك قلقتني عليك

عقبه حاول يبتسم وقال بحسره..مفيش يا شيخ جمال...بس كنت مستني حاجه بقالي عمر بحاله..ولما وصلتلها لقيتها اتباعت لغيري قالولي مش ليك ولا عمرها كانت ليك

جمال قال...مهم معاهم حق يا ولدي ..كده تبقى مش ليك ولا نصيبك...لو ليك نصيب فيها هترجعلك لو لفت الدنيا بحالها...ده انت دارس وفاهم انا هعرفك ولا ايه

عقبه بلع ريقه بوجع وقال...بس انا كنت فاكر انها ليا ده انا كنت متأكد انها ليا خلاص

جمال ابتسم وقال....الا ان يشاء الله يا ولدي...المشيئه اهم شئ ...متيأسش يمكن ربك بس لسه مرادش ولما يريد هتاخد كل اللي تتمناه ...صلي على رسول الله وقوم ارجع دارك الوقت اتأخر وزمان والدتك مستنياك

عقبه ابتسم وقال ...عليك الصلاه والسلام يا حبيب الله

...حاضر همشي...معلش دوشتك يا شيخ جمال

جمال ابتسم وقال...انت تدوشني ..ده صوتك كيف الدوا على قلوبنا كلنا هنه ربنا يرزقك كل اللي تتمناه يا ولدي 

عقبه ابتسم وقام مشي من المسجد وهو حاسس ان تقل كبير نزل من على اكتافه

عند دياب قرب من فياض وبدون اي كلام ضربه بوكس قوي جدا

فياض رجع لورا اثر الضربه ومحاولش يدافع عن نفسه ودياب هجم عليه  ونسي الجرح بتاعه ووقعه على الارض وبقى يضربه بقوه وغل وطبعا الموضوع اكبر من انه ضربه بالخنجر لا ده غل بقاله كتير ووجع بيخرجه

اوصاف وخطاب وغفران بقم يحاولو يبعدوه عنه واوصاف بقت تزعق وتقول....دياب دياب همله...دياب جرحك هينزف كده بس بقى همله

بس دياب مكانش سامع لاي حد ولا حتى من ابوه وامه ولا غفران وفضل يضربه بقوه وغضب شديد

فياض حاول يتماسك علشان ميأذهوش

خصوصا لما دياب بقى يزعق ويقول..مليكش صالح ببيتي تاني ولا اهل بيتي...غفران مرتي.. مرتي اضربها احرقها مرتي سااامع

في الوقت ده توصاف صرخت وقالت ...غفران ..يا مري

وجريت عليها 

هنا دياب فاق لنفسه وبعد عن فياض بسرعه والتفت وراه لقى غفران مغمى عليها على الارض

راحلها بسرعه وقال....غفران...غفران مالك يا بت

وحاول يشيلها بس لقى جلابيته غرقانه دم والجرح بينزف

اوصاف قالت بخوف...ايه اللي عملته في روحك ده يا حزين...جرحك اتفتح عاجبك كده

دياب كان بيتألم وبدأ يدوخ من الدم اللي بينزل وهو مكانش حاسي من انفعاله

فياض كمان كان بينزف من انفه واتبهدل من كتر ما ضربه بس قال بسرعه...خلينا في اللي حصل دلوك ..انا هشيل غفران وانت يا خطاب بيه سند دياب وهاته وهنجبلهم الدكتور تاني

ولسه هيمد ايده يشلها بس دياب مسك ايده بقوه وقال...جرب تلمسها...وهعلق يدك على باب الدار

فياض اتنهد وقال..هطلعها اوضتها بس..انت بتنزف مهينفعش تشيلها

دياب قال بغضب...قولتلك متتدخلش...غور من خلقتي معايزش المحك لحد ما اطيب..لو لمحتك مهيحصلش طيب واصل

وقرب من غفران حاول يشيلها بس مقدرش كان بيتألم جامد

ابوه قال بحزن...خليه يوصلها يولدي وهيمشي على طول متكابرش يا دياب

دياب لسه هيرد اوصاف قالت..ولاهو هيوصلها ولا دياب ..احنا هنوصلها انا والست نعمات ..احنا مرتين وهنقدر نوصلها يلا يا ست نعمات يدك معاي

نعمات بصتلها بدهشه وقالت..انا..انا عندي هشاشه و....

قاطعتها اوصاف وقالت..يلا ياوليه اخلصي سنديها وياي ...بلا هشاشه بلا قماشه... اخلصي

نعمات راحت معاها بضيق وسندتها قصادها وقالت..يابوي تقيله قوي

اوصاف ابتسمت بسخريه وقالت...البت كيف الريشه متاجيش في وزن دراعك ....صوح اللي ما ليها حما ...حظها من السما ...شدي وياي 

نعمات بصتلها بغيظ وسندوا غفران واخدوها على اوضتها بالعافيه

فياض اتنهد ولسه هيطلع دياب قال بتوعد...انت طعنت طعنتك واستنى طعنتي...بس مهتكونش بتوجع في الجسم .....كل واحد عنديه حد يوجعه ...وكل واحد له طريقته وانا طريقتي واعره قوي..اوعدك مهتتحملهاش

فياض انتفض قلبه من تهديده الواضح وقال..قصدك ايه 

دياب ابتسم وقال....قريب تفهم قصدي

قال كده وطلع على اوضته مع ابوه وهو حاطط ايده على جرحه 

فياض اتوتر جدا من كلامه وطلع بره السرايه بقلق شديد  

فوق عند اوصاف حطت غفران على السرير بتعب وقالت....ربنا يهديكم من وقت ما دخلت وكل اتنين شابطين في بعض

نعمات قالت بسخريه..يمكن لان دخلتك شوم..ووشك وش هباب

اوصاف ضحكت بخفه وقالت...ده وش هباب يا ام وش غراب ...ما تجبيلك مرايه هو العمده بخيل ولا ايه 

نعمات بصتلها بغضب ولسه هترد دخل ابوه وقعد دياب على سريره وقال...هاتصلك بالدكتور حمدي 

دياب قال..لاه ممستهلاش.... اساسا الجرح مش واعر...هغير عليه انا عندي كل الحاجه..وغفران تلاقيها وقعت من الخوف شويه وهتقوم

ابوه قال..انت متأكد يا ولدي انا خايف لحسن النزيف يذيد

دياب ابتسم وقال...انا هغير عليه وهحط لزق كتير متقلقش يا ابوي..انا بس عايز ارتاح هبابه

ابوه اتنهد وقال يلا معاي يا نعمات 

وبص لاوصاف وقال....وانتي يا عروسه روحي اوضتك نامي الوقت اتأخر 

قال كده ومشي هو ونعمات واوصاف نفخت بخنقه وقالت ...اللهي عرسه تقطمك من فخادك يا بعيد

دياب قال بذهول..انتي بتدعي على ابوي قدامي

اوصاف قالت بخنقه .....معرفاش مستحملينه كيف

دياب قلع جلابيته وبقى يطهر الجرح وقال...زعلك في حاجه

اوصاف قالت بغيظ ...قليل زوق كيف ولده

دياب قال ...وه....وانا عملت ايه انا كمان

اوصاف قالت بغضب...مش فيه حماره واقفه كيف تقلع كده قدامي

دياب ضحك وقال..رحم الله امرئ عرف قدر نفسه

وقرب منها جامد وقال...ده بدل ما تساعديني 

في الوقت ده غفران فاقت ولسه هتقوم شافتهم قريبين من بعض ودياب مش لابس جلابيته فضلت مكانها بصمت وذهول

اوصاف قالت بتوتر من قربه ..اساعدك في ايه

دياب قال بهمس...ما تاجي تغيريلي في الحمام

اوصاف قالت بخنقه..وانت تعملها على روحك ليه بس انت عيل

دياب اتسعت عنيه وقال..ايه يا بت اللماضه دي ..ما تتلمي ....وبعدين صوح معرفتش اسالك انتي ايه نزلك من الجبل وايه اللي رماكي علينا ...وليه ابوي بيقولك يا عروسه..انتي هتتجوزي من غير ما اعرف

اوصاف اتنهدت وقالت...ما انا لسه واقفه هنه ومتحمله دلعك الماسخ  لجل احكيلك الموضوع ده... بس انت مراضيش تسكت لجل اتكلم

دياب ضحك وقال..ما انتي اللي فرسه اعملك ايه ...بس هحاول اسكت اها....ها بقى ليه كان بيقولك يا عروسه... قصده ايه بالكلمه دي...و ايه اللي جابك هنا و.....

بس قطع كلامه واتسعت عنيه بذهول وهو بيفتكر كلام امه لما قالتله ابوك هيتجوز صبيه من الجبل وفياض راح يجيبها قال بصدمه ..بت انتي..اوعي يكون اللي في بالي

اوصاف ابتسمت وقالت...ايوه كيف ما فهمت...انا هبقى مرت ابوك يعني كيف امك وعايزاك تسمع الكلام وتشرب اللبن قبل ما تنام 

دياب مكانش قادر ينطق من اللي بيسمعه ومش عارف يستوعب اصلا

بقلم...زهرة الربيع

عند فياض كان وصل بيتهم وقاعد مع والدته اللي قالت بحزن...بردك مهتقوليش مين عمل كده في وشك 

فياض اتنهد وقال..مفيش يا اما عركه مع جماعه كانو بيحوموا حوالين سراية العمده...سيبك من وشي دلوك وقوليلي ايه اخبارك..انتي وحشتيني قوي يا اما

امه ابتسمت بحب وقالت...وانت اكتر يا نظر عيني....اوعى تغيب كده تاني

جات فاطمه من المطبخ وقالت بضحك...دول كلهم يومين يا اما...امال لما يتجوز وتاخده واحده مننا على الاخر هتعملي ايه

فياض اختفت ابتسامته وحاول يتكلم عادي وقال...ومين قالك هتاخدني منكم يا لمضه ..انا قاعدلك هنه هعنس جنبك 

فاطمه ضحكت وقالت....طب انت تعنس عادي ...انما انا اعنس كيف الرجاله اطست في نظرها اياك

فياض ضحك وقال.....ماشي يا مغروره انتي...يلا سهرتكم قوي ..خشوا نامو وانا كمان هروح ارتاح

امه ابتسمت وقالت تصبح على خير يا ولدي

فياض مشي وامه قالت لفاطمه بعتاب..مين قالك تجبيله سيرة الجواز دلوك يا فاطمه ما انتي عارفه حاله يا بتي لازمن تضايقيه

فاطمه قالت بغضب..وماله حاله هو شاب ولابد ما هينساها ويتجوز ...محسسيني ان اللي خلقها مخلقش غيرها سبحان الله

قالت كده وراحت على اوضتها وامها اتنهدت وقالت ربنا يهديكم ويداوي قلوبكم يارب

 

اما فياض كان في اوضته حاول ينام كتير مقدرش كان قلقان وباله مش مرتاح مشغول جدا و بيفكر في جملة دياب ...كل واحد عنديه حد يوجعه

 

فكر شويه ومسك التليفون واتصل على عقبه وقال..انت فين يا عقبه روحت ولا لسه

عقبه قال بحزن ...روحت من زمان يا فياض...كنت تعبان شويه ...احم..ايه اخباره...اخبار دياب بقى عامل ايه دلوك

فياض قال بقلق..هو بقى زين...انا طلبتك علشان الموضوع اللي كنا بنتكلم فيه قبل ما اطلع الجبل

عقبه قال باستغراب...موضوع...موضوع ايه

فياض قال بحزم ..موضوع فاطمه..انت قولتلي رايدها واحنا كلنا موافقين...هات امك وتعال اتقدملها رسمي في اقرب وقت...بكره يناسبك

عقبه اتسعت عنيه بذهول ومبقاش عارف يرد بايه وووو

اسفه جدا للتأخير وشكرا لكل اللي سالو عليا تسلمولي

لاول مره روايه ليا في رفوف المعرض القصه تحفه وواثقه فيها بس قبل كل شئ محتاجه توفيق من ربنا اتمنى دعوه حلوه منكم❤️❤️❤️❤️

 

بداية الرواية من هنا

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

جميع الروايات كامله من هنا 👇 ❤️ 👇 

روايات كامله وحصريه

اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇 

روايات كامله وحديثه

❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺