رواية اوتار أحد من السيف الفصل الرابع عشر والخامس عشر بقلم الكاتبه زهرة الربيع حصريه وجديده
رواية اوتار أحد من السيف الفصل الرابع عشر والخامس عشر بقلم الكاتبه زهرة الربيع حصريه وجديده
اتسعت عيونه بذهول لما طلب منه يجي يخطب اخته وفي اقرب فرصه ...مكانش فاهم حاجه ولا عارف يرد بايه فضل ساكت وبس
فياض استغرب وقال..الو...عقبه انت معاي
عقبه قال بتوتر..ايوه..احم...ايوه معاك
فياض اتنهد وقال..انا عارف اني فاجأتك...بس انا كنت مشغول الوقت اللي فات ودلوك انسب وقت قبل الامتحانات بتاعتها ولا انت رأيك ايه
عقبه اتنهد بحزن شديد ده اليوم اللي كان بيتمناه بقاله كتير بس دلوقت ميقدرش يفرح بيه قال بحزن...انت سألت فاطمه...قولها الاول وشوف رأيها...القبول اهم شروط الزواج يا فياض
فياض قال بسرعه..وهيه هترفضك ليه...وبعدين فاطمه طول عمرها ملهاش راي بعد رأيي ..انا شايف نقرو الفاتحه بكره ان شاء الله ...قولت ايه
عقبه بقى في موقف لايحسد عليه مكانش عارف يقوله ايه ومكانش عايز يحكيله على اللي قالته فاطمه فقرر يكسر قلبه باديه ويقوله انو عرض الجواز عليها وهيه رفضت من غير ما يحكيله على موضوع دياب
ولسه هيتكلم فياض قال بحزن شديد..انا عارف ان الأمور دي مبتجيش كروته كده ...وانا كمان كنت عايز اجوزها على مهلي وافرح بيها فرحتي اللي معرفتش افرحها لنفسي...بس مبقاش فيه وقت لازم اجوزها بسرعه
عقبه استغرب كلامه وفياض كمل وقال بحزن.....مخبيش عليك يا عقبه ..دياب حطني في راسه بعد اللي عملته...قالهالي صريحه كل واحد عنده حد يوجعه ومتأكد انه يقصدها...البت صغيره يا عقبه وخايف عليها قوي...عايز حد وياي حد تبقى في عصمته ... يمكن لما تتجوز يشيلها من دماغه
هنا عقبه اتوتر جدا بين كلام صاحبه وان فاطمه محتاجه حمايه ومحتاجاه معاها حتى لو غصب عنها...وبين كرامته بانه يقبل بواحده قالتلوا انها بتحب شخص تاني
لمعت عيونه بالدموع وقال من غير تفكير طويل...وانا معاك يا صاحبي...مدام الامر كده استناني بكره ...في جميع الاحوال محدش اولى بفاطمه مني
فياض ابتسم براحه وحس باطمئنان لوجوده معاه وقال ...الحمد لله...تمام يا عقبه ربنا يتمم على خير وتكون النصيب الصالح ان شاء الله
عقبه قفل معاه وهو فيه قمة المه وكل كلام فاطمه بيتكرر في دماغه
عند دياب كان مصدوم من اللي سمعه من اوصاف وقال بدهشه...انتي...انتي ازاي..واشمعني انتي يعني
اوصاف قالت بضيق..روح قول الكلام ده لابوك...هو خاطفني وحابسني هنه
دياب قال بصدمه ....خاطفك...خاطفك كيف
اوصاف قالت بخنقه...كيف الناس يا دياب.... بعت الي اسمه فياض خدرني وجابني هنه ومراضيش يهملني ارجع داري
دياب قال بسرعه..ايوه السبب..السبب ايه
اوصاف اتوترت وقالت بارتباك..ها...معرفاش...روح اساله هو مش ابوك ...يلا تصبح على خير ناهدت كتير انهارده وعايزه انام
ولسه هتمشي مسك ايدها وقال بغضب....نامي على راحتك ....بس اعملي حسابك ان ليا كلام معاك انتي وابوي..انا مهقعدش كيف الجردل كده ومعارفش ايه اللي بيجرى حوليا
اوصاف اتنهدت وقالت ....تصبح على خير يا دياب
قالت كده ومشيت ودياب التفت ناحية السرير علشان ينام لقى اوصاف قاعده وبتبصله باستفهام قال بخضه.... بسم الله الرحمن الرحيم....خلعتيني يا واكله ناسك مش تكحي حتى
بقلم...زهرة الربيع
غفران وقفت وقربت منه وقالت بسخريه...اكح ليه...فيه حاجات مينفعش اسمعها ولا ايه
دياب قال بضيق....ولا حجات تتسمع حتى....قال اوصاف عروسة ابوي الجديده
ولسه هينام غفران قالت بضيق....عرفت...بس اللي معرفتهوش مين هيه اساسا الست اوصاف
دياب قال بلا مبالاه ..اهي واحده معرفه
غفران قالت بضيق...اه معرفه ...قولتلي ....طب انا شايفه ان الاولى تقول لابوك انها معرفه....يعني لاجل الحلال والحرام
دياب اتفاجأ بكلامها واستغرب من الطريقه اللي بتتكلم بيها بصلها وقال...مفاهمش بتلمحي لايه
غفران قالت فورا....انا ملمحتش انا اتكلمت دغري...لاني فايقه اديلي كتير وشايفه هزار وتمحيك وغزل...ومن رأيي ان لازمن ابوك يعرف.... احسن ما يتقرطس وانت تشيل الذنب
قالت كده وراحت نامت على السرير بضيق ودياب فضل واقف مكانه مستغرب جدا من طريقتها ومش فاهم مالها وبعيد كل البعد عن انه يفكر انها متضايقه من علاقته باوصاف رغم ان كلامها ملوش معنى تاني
اتنهد وراح ناحية الكنبه علشان ينام بس سمع صوتها بتقول....متنامش عندك عشان الجرح تعالى على السرير
دياب قال ...طيب وانتي
بعدت شويه من غير ما تبصله ولا تتكلم حتى
دياب رفع حاجبه باستغراب اكبر وراح نام على السرير جنبها وقال...ايه الرضى ده كلو انهارده
غفران مردتش عليه وفضلت تحاول تنام وهيه بتفكر وقت ما فتحت عنيها ولقته محاصر اوصاف عند الباب ...اتنهدت وهيه حاسه بغضب شديد مش فاهمه سببه وتبريرها الوحيد ليه انه بيعمل كده في اوضتها وقدامها بدون خجل
فضلت وسط افكارها لحد ما نامت
اما دياب فكان كل اللي بيدور في دماغه كلام اوصاف وهيتجنن ويعرف ليه ابوه خطفها من الجبل ..فضل وسط افكاره لحد ما نام هو كمان
في صباح يوم جديد في منطقه جبليه كان فيه راجل في منتصف الاربعين نايم على سرير من اعواد النخيل
وقاعد معاه شيخ في سن السبعين بيعمل شاي على الحطب
دخل شاب اقل من العشرين وقال بتوتر.....مفيش اي خبر عنها...كنها فص ملح وداب يا ابوي
ابوه قال بتعب.....غريب ...عمرها ما اتأخرت علينا كده....الحاجه اللي عندنا قربت تخلص ..والدوا كمان ...نعمل ايه يا مهران فكرك نسألو عليها
مهران قال بضيق...انا شايف اني انزل اشوف شغل يا ابوي الحال ده منافعش...انا من الاول معاجبنيش نعتمد على فلوس البنيه ...يعني كأننا بنقولها ده حق وقفتنا جنبك
ابوه اتنهد وقال ...تروح تشتغل كيف بس وانت يدنا ورجلنا...عايز تمشي وتهملنا لوحدنا ...واحد رجله والقبر وواحد مواعيش للدنيا ...طب بلاش انا افرض الغلبان ده راد يروح الحمام مين بيسنده غيرك ..ولو عوزنا حاجه مين يجيبها غيرك...لاه مهينفعش انت تمشي..احنا هنستنا يومين كمان لو اوصاف مظهرتش روح واطقس عليها واسأل حد قريب
ووقف وبقى يحط ميه دافيه على رجلين وادين الراجل اللي نايم على السرير وقال بحزن...شد حيلك عاد يا قاسم...مش لايقلك العيا يا ولدي
في السرايه كان خطاب قاعد بيشرب شاي والغفير واقف قدامه قاله بهدوء...روح قول لفياض فيه حصاد انهارده..... خليه يقف على راس العمال مش كل واحد معدي يعبي شكارته
الغفير قال....الريس فياض مجاش النهارده
خطاب قال بخنقه...يا فتاح يا عليم يارزاق يا كريم...روحله البيت وامرك لله ....قوله خطاب بيه بيقولك ارجع السرايه دلوك وبطل لعب العيال ده ..كفايه عليا عيل واحد
في الوقت ده نزل دياب وهو حاطط ايده مكان جرحه وقال بتعب...معلش يا خطاب بيه رزقك كده ...اديك هتتجوز تاني يمكن المره دي تخلف واحد يكبرلك قوام وميفضلش عيل
الغفير مشي وخطاب اتنهد وقال بضيق...نزلت من سريرك تاني ليه ..رايد تنزف تاني
دياب قال بغضب...رايد اعرف حاجه واحده بس..هو انا مش ولدك مبتتحرقش علي مبتتوجعش لوجعي كيف اي اب......ده انت حتى مطردتهوش من الشغل بعد ما صفى دمي قدامك ..لاه وكمان رايح تسأل عليه...كيف يا ابوي كيف كل ده علشان بيمشيلك الشغل ..شغلك اغلى مني
خطاب اتنهد وقال....كل ده ليك في الاخر..انت اللي هتاخد كل اللي بجمعه ده ..كل ده ورثك
دياب قال بغضب..انا مليت الكلمه دي ..مين قالك اني عايزك تكنز عشاني...الله يرضى عليك كفايه انا اتخنقت..كل حاجه ماشيه عكس ما بتمنى لجل الفلوس كفياك عاد
وقام بغضب ولسه هيطلع على السلم بس رجعله وقال....الا بالحق...مالك باوصاف....وايه معرفتك بيها..... هتسيبهالي ورث هيه لاخرى
خطاب قال بضيق....السؤال اللهم انت مالك ومالها...واحده غازيه ملهاش ديه شاغل بالك ليه ونازل من فرشتك وانت عيان
دياب بصله بغضب وقال بتحذير......اه مهتردش كنت متأكد مهاخدش منك رد....بس اخر حاجه هقولهالك والمره دي لازمن تسمعني ولازم تنفذ...بعد عن اوصاف..البنيه غلبانه...انت متعرفش عاشت كيف شيلها من دماغك ايا كان السبب وهملها ترجع دارها سمعتني يا ابوي
بقلم...زهرة الربيع
قال كده وطلع على اوضته واوصاف كانت نازله ولقته طالع بغضب شديد نزلت وقالت لخطاب...خير مصبح على ولدك صباح كيف وشك على الصبح
خطاب بصلها بغضب وشاف انه لازم يخلص موضوعها قبل ما يخسر اهله قال بحزم ...هدفع ضعف اللي كت هدفعهولك.. بس تخلصينا من الموال ده علشان تريحيني وترجعي دارك قولتي ايه
اما دياب طلع اوضته بضيق ولقى غفران بترتب الاوضه اتنهد وقال...اقعدي متتعبيش روحك..مش هتقدري تشتغلي بدراع واحد ....هبقى اخلي سنيه لما تاجي ترتبها
غفران قالت..اديني بتسلى الاوضه مكركبه قوي
دياب اتنهد وقال...على راحتك ...بس خدي بالك ل يدك
غفران هزت راسها بالموافقه وهيه وبترتب مسكت جلابيته وبقت تفضي جيوبها علشان الغسيل ولقت الحقنه اللي كان مصر يدهالها مقدرتش تمنع ضحكتها وقالت...ربنا مع الغلابه
دياب بص للحقنه في ايدها وقال بغيظ.....فرحانه عشان مخدتهاش..لعلمك الدكتور قال ضروريه قوي
غفران ضحكت تاني وقالت...انهارده هخدها....انت تعبان وهجيب الست غاليه
دياب اتغاظ اكتر وقال...متفرحيش قوي دول خمس حقن ولابد ما هشد حيلي قبل ما يخلصو الصبر طيب
غفران قالت بتحدي....ده بعينك و
بس قطعت كلامها بدهشه لما لقت السلسله اللي فاطمه ادتهاله بصت على السلسله بذهول شديد وافتكرت موقف مع فياض
كان فياض ادالها منديل و فتحته لقت فيه سلسله نفس السلسله دي قالت بفرحه ....الله حلوه قوي يا فياض
فياض ابتسم وقال...عجبتك..كان نفسي اجبهالك دهب بس الجيب بعافيه اليومين دول عملتهالك فضه ونقشتها على زوقي مفيش مره هتلاقيها لابسه زيها.....لاه للامانه فيه واحده... فاطمه اختي ...انتو الاتنين وبس..
غفران فاقت من شرودها وقالت بذهول....جبت السلسله دي منين يا دياب
دياب التفت للسلسله في ايدها واتسعت عنيه بذهول كان نسي امراها خالص ونسي ما يشيلها من جلابيته
عند فياض كان بيشرب الشاي هو ووالدته وفاطمه وقال بابتسامه...فيه مفاجأه حلوه ليك انهارده يا فطوم
فاطمه استغربت وقالت بفرحه..جد...جبتلي ايه
فياض ضحك وقال...هو كل المفاجأت جيب..على العموم جبتلك احلى حاجه في الدنيا...جبتلك عريس مفيش منه اتنين
فاطمه استغربت وامها قالت بفرحه..جد يا فياض
فياض ابتسم وقال .....جد طبعا ....المواضيع دي مفيهاش هزار يا ست الكل
فاطمه وقفت وقالت بتوتر....بس انا..انا لسه صغيره وعايزه اكمل دراستي يا فياض جواز ايه دلوك
فياض قال باستغراب..وفيها ايه يا حبيبتي..كملي دراستك على راحتك وانتي متجوزه... اصلا عريسك هيساعدك مش هيمنعك
فاطمه قالت بتوتر...بردك لاه يا فياض ..انا معيزاش اتجوز دلوك
فياض اتنهد وقال..فطومه حبيبة اخوها....انا اديت معاد للراجل شوفيه واقعدي معاه مش يمكن ربنا يهدي وبعدها نبقى نتكلم اصلا العريس مش غريب عشان تخافي كده.... ده مننا وفينا
فاطمه فكرت لو كان دياب العريس بس نفضت الفكره من دماغها لان دياب هو واخوها مش متفقين ولسه هتتكلم الباب خبط
فياض قال بابتسامه...اهم وصلو افردي وشك عاد
وراح فتح لهم
دخل عقبه ووالدته وفياض قال بابتسامه..يامرحب يا مرحب يا صاحبي نورتونا
ام فياض اول ما شافتهم زغردت وقالت بسعاده...كان قلبي حاسس والله ..وده محتاج مشاوره بردك يا فياض
وحضنت عقبه ووالدته بسعاده
اما فاطمه كانت واقفه بصدمه شديده ومبقتش فاهمه ايه اللي بيحصل وقالت بذهول وغضب....انتو بتهزرو ولا ده ايه على الصبح وووووو
الخامس عشر
فاطمه كانت هتقع من طولها لما عرفت ان العريس هو عقبه قالت بذهول...ده جد ولا انتو بتهزرو على الصبح..اكيد...اكيد ده مقلب صح
عقبه غمض عنيه بحزن شديد وفياض اتوتر من ردها كان فاكر ان مهيبقاش عندها مانع من الجواز بواحد زي عقبه كل البلد بتحبه وتحترمه قال بغضب..فيه ايه يا فاطمه ...هزار ايه ما انا كلمتك من شويه..يلا روحي اعمليلنا شاي يلا
فاطمه قالت بغضب وانفعال.... شاي ايه وكلمتني في ايه...ده العريس...عقبه...لا ده انت اكيد سهر الشغل تعب دماغك يا فياض
فياض بصلها بذهول شديد وقال بغضب اشد...مين ده اللي دماغه تعبانه يا بت....ما تصطبحي على الصبح لصبحك
واتقدم عليها وهو في قمة انفعاله بس عقبه وقف قدامه بسرعه وقال ...استهدى بالله هتعمل ايه...يمين بالله لو لمستها لساني ما هيخاطب لسانك تاني
فياض حاول يهدى وبص بعيد وهو متعصب جدا من اخته ومن الللي قالته قدامهم
عقبه اتنهد بحزن خصوصا من الموقف اللي حصل قصاد والدته اللي قالت بخنقه...يلا بينا يا عقبه...يلا يا ولدي اللي مايجيلك جري ميستاهلش تتقدم عليه مشي
فاطمه قالت بغضب وسخريه...ههه ومين دي اللي تجري وتتعب رجليها لجل ولدك يا خاله فهيمه....لا مال ولا ولا مركذ ولا حتى يعرف يقول كلمتين حلوين ينسو الهم... ده اخره تجوزيه واحده خرسه زييه عشان يقعدوا ساكتين طول اليوم و......
بس مكملتش كلامها ولقت كف نازل على وشها بقوه وقعها على الارض
الكل اتصدم وفاطمه حطت ايدها على خدها بذهول لما لقت والدتها هيه اللي ضربتها وقالت بغضب....اتكتمي يا قليلة الحيا
فاطمه اتصدمت جدا وقالت بدموع...انتي...انتي بتضربيني ياما
امها قالت بغضب...وهاكسر رقبتك يا طويلة اللسان يا غبيه...ده بدل ما تحمدي ربك ان نصيبك مع واحد سايب الحديت ويا الناس و بيخاطب رب الناس ..يا قلة عقلك وقلة ادبك
فاطمه بقت تبكي على الارض وعقبه قال بحزن...ليه كده يا خاله ...البت صغيره واتفاجأت اكيد متقصدش مينفعش كده
وقرب على فاطمه ونزل لمستواها وقال بحزن...حقك عليا انا يا فاطمه...قومي خلاص
فاطمه بصتله بغل وقالت بهمس علشان اهلها ميسمعوش...انا فتحتلك قلبي وحكيتلك اللي فيه...عمري ما هسامحك...سامع مش مسمحاك
قالت كده وقامت جريت على اوضتها وهيه بتبكي جامد
عقبه وقف وبص لطيفها بحزن شديد وحسره
وفياض قعد وحط ايده على دماغه وهو حاسس بغباء شديد لانه محكلهاش قبل ما يجيب صاحبه ويحطه في الموقف ده
بس عقبه بصله وقال....متنزلش راسك يا صاحبي انت مليكش ذنب
فياض قال بحرج شديد ....حقك على راسي يا عقبه
عقبه ابتسم بالعافيه وقال..عيله ومتوعاش ..عيب علينا لما ناخد على كلامها....متزعلوش روحكم ....بكره تقلبها في دماغها وتاجي تقولك انها موافقه وتستسمحك كمان
بقلم...زهرة الربيع
فياض ووالدته بصوله باستغراب لان شكلها مبيقولش انها هتوافق ولا بعد عمر بحاله
بس عقبه ابتسم بثقه وقال....بالاذن احنا دلوك ....ونبقو ناجو بكره لما ربنا يهديها
قال كده واخد والدته ولسه هيمشي افتكر حاجه والتفت لفياض ووالدته وقال...حملتكم امانه ربكم شاهد عليها ما تلمسوها تاني
فياض لسه هيتكلم عقبه قال....انا حملتك امانه ...ملكش صالح بيها يا فياض لو قربتلها هعرف وهتبقى القاطعه بينا
قال كده واخد والدته ومشي وقلبه مكسور وبيجاهد علشان ميبانش عليه
اول ما مشيو فياض وقف وكسر الطاوله بغضب وانفعال وهو هيتجنن من اللي عملته فاطمه وقلبه وجعه جدا على صاحب عمره لانه عارف انه بيحبها ...جذب شعره بغضب شديد وهو بيفكر ايه سر رفضها الغريب ده وقلقه ذاد اكتر
امه قالت بتوتر...استهدى بالله يا ولدي.... انا هكلمها وان شاء الله اقدر اللين دماغها
فياض اتنهد وقال بغضب...لاه يا اما متكلمهاش...الغلط غلطي...انا اللي غبي لاني فكرت ان لسه عندي اخت مربايه متخرجش عن طوعي ولا تكسر كلمتي
امه قالت بحزن..يمكن اتفاجأت بس يا ولدي
فياض قال بغضب..حتى لو اتفاجات يا اما...وحتى لو مش ريداه وعايزه ترفض محدش كان هيجبرها...بس مش بالطريقه دي واصل ...اللي عملته واللي قالته مهنساهوش ...ولا هنسى انها احرجتني وكسرت قلب الجدع قدامنا كلنا وهيه عارفه زين مكانته عندي
قال كده وفتح الباب ولسه هيطلع لقى الغفير في وشه وقال...كويس اني لقيتك ياريس فياض...خطاب بيه عايزك في الشغل وبيقولك ارجع كفايه عليه عيل واحد
فياض مسح على وشه بخنه وضيق ميتوصفش
عند دياب اتفاجا بالسلسله مع غفران وقام سحبها من ايدها وراح ناحية دلابه وهو بيقول بتوتر...احم...سلسله عادي ...بتفتشي خلقي ليه من اساسه
غفران بدأت تشك اكتر انها لفاطمه من طريقته وقالت ..وفيها ايه ما انا على طول بفضي جيوبك قبل الغسيل....مرديتش عليا يا دياب بتاعة مين السلسله دي
دياب حط السلسله في الدولاب وقرب منها جامد وقال...عايزه تعرفي ليه...مالك من امبارح مهتمه يعني بدياب...وباللي بعمله وباللي بتلاقيه وياي...يعني هيه اول مره تلاقي حاجه حريمي في جيبي
غفران اتوترت من كلامه ومكانش ينفع تقوله انها شاكه ان السلسله لفاطمه حاولت تبعد وقالت بضيق....مش دي اجابة سؤالي بردك و....
بس قطعت كلامها بشهقه لما دياب قربها ليه فجأه وحاوطها بادرعاته علشان متبعدش وقال ...بتاعة صبيه كيف القمر ...ودايبه فيا دوب كمان ... بس انا اللي مهتم بعديم الدم
غفران حاولت تبعد وهيه بتقول...انا عديمة دم وانت ايه ده انت ما عنديكش ريحته..هملني يلا بعد....بعد يا دياب
دياب كان بيقربها ليه اكتر ومستمتع بمحاولتها الغبيه في انها تبعده وهيه لاشيئ قدامه وقال بمشاكسه....عارفه يابت ....لو لفيت الدنيا بطولها وعرضها وشوفت نسوانها كلهم.....ماهيحلالي غير جعفر اللي بين اديا...اصلي بموت في الحوادق
غفران بصتلو بذهول وقالت...ده مدح ده ولا ذم ولا بتقول ايه انت..هملني يادياب خلقي داق ...متخلنيش اناهد معاك انا حايشه نفسي عنك عشان تعبك لحسن تنزف تاني
دياب سابها وضحك وراح نام على السرير وقال....خايفه علي...انا معارفش العقل ده جالك منين .... لو افتكر اني لما اتصاب هتهدي كده كنت افتحلك نافوخي كل ليله...بس يلا ملحوقه
غفران نفخت بزهق لانه برده مقلهاش السلسله بتاعة ميت ولسه هتسأله تاني لقته عمل مكالمه وشاورلها بايده علشان تسكت وقال.......ايوه يا نعيم اخبارك ايه
تحت عند اوصاف ضحكت جامد لما سمعت عرض خطاب وقعدت وحطت رجل على رجل وقالت ...دلوك بقيت عايز تدفع الطاق طاقين...لسه من شهور كنت معايزش تطلع جنيه ذياده..عجبي عليك يا زمن
خطاب قعد وقال بهدوء..يابت الناس انا رايد مصلحتك..انتي مش كنتي عايزه الفلوس لجل تسافري بعيد عن جوز عمتك..طب انا مش بس هديك الفلوس لا وكمان هأمنلك السفر ومكان تقعدي فيه قولتي ايه عاد
اوصاف قالت بسخريه...عايزه كمان سوداني متحمص اتسلى فيه في السفر
وبصتلو بقرف وقالت...تكونش شايف عيله بتريل قدامك ...ما انا عرفت اللي فيها خلاص ...وعرفت انت عايز ايه وليه بتدفع كل الفلوس دي...انسى يا عمده النجوم اقربلك....يارب تكون فهمت ان مفيش فايده وترجعني داري.
خطاب وقف بغضب وقال ....اكده....طيب اجهزي بقى لجوازتنا يا حلوه ...هعمل فرحنا الاسبوع ده ...ولو بت ابوك صوح امنعيني
قال كده وطلع اوضته بغضب شديد
اول ما مشي اوصاف طلعت على الجنينه بسرعه ولسه هتسأل عن فياض لقته جاي جريت عليه وقالت بسرعه ....زين انك جيت انا عيزاك ضروري
فياض رفع حاجبه وقال ...عيزاني ...كيف لا مؤاخذه
اوصاف بصت له بغيظ وقالت...مش وقت خفه ..انا محتاجه مساعده منك.... انت وبس اللي تقدر تعملها
فياض قال بخنقه......انا مخنوق قوي انهارده ومعايزش اي مشاكل ..كفايه اللي على دماغه الله يباركلك.... بالاذن
ولسه هيمشي مسكت في ايده وقالت باصرار...بس دي مساعده انسانيه ...انا واقعه في عرضك..وفي طولك كمان ...وبعدين انت السبب في حبستي هنا ومجبور تساعدني
فياض مسح على وشه بخنقه وقال .....يا صبر ايوب يا رب.....قولي وخلصيني
اوصاف قالت بتوتر........عايزاك تطلعني من السرايا الليله.... فيه حاجه لازم اوصلها بنفسي...وهرجع معاك صد رد اوعدك مهعملكش مشاكل
فياض اتسعت عيونه بذهول وقال بدهشه...وناجو صد رد ليه ما نقعدو نتعشوا ولا مشكم خلص
عند عقبه رجع البيت وهو مش شايف قدامه من التعب والحزن والحرج كان مش قادر يبص لامه ومنزل عيونه طول الوقت وقال ..احم....انا هدخل اريح شويه ...تؤمريني بحاجه يا امي
امه قالت بحزن عليه...ما يؤمرش عليك غير ربك يا حبيبي
عقبه باس ايدها وقال...عن اذنك
ولسه هيمشي مسكت ايده وحطت يدها على خده وقالت...عيونك الحلوين دول اللي منورين بنور كتاب الله ليل نهار... مينفعش ينزلو الارض كده....ورحمة ابوك الغالي هيه الخسرانه
عقبه ابتسم والدموع بتلمع في عيونه وضمها وقال بحزن.....وانا متمناش انها تخسر ياما...ادعيلنا ربنا ينور البصاير ويقرب كل زول لنصيبه
عند دياب كان مستني نعيم يرد عليه بس نعيم كان مش قادر ينطق من الخوف
دياب قال بحده...فيه ايه بلعت لسانك اياك..... بقولك ايه الاخبار عندك
نعيم اتوتر جدا لانه لو عرف باللي عمله مع اوصاف وانه باعها لواحد وضاعت بسبب كده هيخرب الدنيا على دماغه قال بتوتر...ها بخير...بخير طول ما انت بخير يا دياب بيه
دياب قال باستفهام....امم....طيب انا هطلع الجبل الليله وقولت اقولك علشان تجهز القعده على مزاجي ...وخلي اوصاف تستناني
نعيم قال بسرعه وخوف..لاه...مهينفعش الليله..اصل.. اصل البت اوصاف عيانه ...عيانه وراقده ومش هينفع تخدم عليك الليله واصل
دياب غمض عنيه بغضب شديد لما قال كده واستنتج ان له ايد في خطف اوصاف قال بغضب مكبوت...تمام....تمام قوي يا نعيم.... اصلا انا كمان تعبان وكنت متردد اجي ولا لاه.... يلا ليله تانيه بقى..... بس مهطولش في اي وقت ممكن تلاقيني قدامك
نعيم بلع ريقه بخوف وقال...تنور...تنور يا دياب بيه..و
بس قطع كلامه لما لقاه قفل السكه قال بخوف...راحت علينا ..ده اللي كنت خايف منه
فوزيه قالت بتوتر...مقولتلوش ليه انها اتخطفت وانت معارفش مكانها...يمكن كان دور معانا عليها
نعيم قال بخوف...اقوله كده كيف وهو عارف بوجود رجالة الجبل اللي متنتورين في كل حته ..مهيصدقنيش..ده لو عرف اني تاجرت بيها هيدبحني...هيدبحني ايه ده لو دبحني طوالي يبقى رحمه ليا
فوزيه قالت ببكا...يا مرك يا فوزيه يا مرك...ضيعت البت وضيعتنا وياها يا نعيم...منك لله يا شيخ
نعيم قال بغضب...اكتمي يا وليه لارقدك مكانك اكتمي مش وقت ندب خليني اعرف اتصرف
فوزيه حطت ايدها على بقها وبقت تبكي
ونعيم عمل مكالمه بسرعه وقال....ايوه اسمعني زين...خد كل الرجاله اللي معاك واطلعو راس الجبل...فيه بيت هدلكم عليه ...متمشوش من جاره واصل...... اوصاف ضروري هتاجي هناك .. خلو عينكم مفتوحه ليل نهار سمعت
وقفل معاه وقال بتوتر...لازم تاجي يا اوصاف ...اكيد هتلاقي طريقه وتروحي تديهم فلوس ..انا متأكد
بقلم...زهرة الربيع
اما دياب كان في قمة غضبه من نعيم ومتأكد انه ساوم على اوصاف واداها لفياض باديه وعلشان كده كدب وقال انها نايمه وتعبانه قال بغضب...ابن الصرمه معارفش يكدب حتى...ماشي يا نعيم .....ماشي
غفران قالت بضيق...باينلها الست اوصاف تهمك قوي
دياب قال بسخريه .....طبعا تهمني...... مش هتبقى ضرة امي
غفران قالت بضيق ...متلفش وتدور باين انها تهمك من قبل موضوع امك..وواخد رقم حد يعرفها كمان وبتتطقس على اخبارها
دياب بصلها باستغراب وقال.....انتي فيكي ايه يا بت من امبارح...مره تقوليلي اوصاف ومره تقوليلي سلسله....اوعي تكوني غيرانه وانا البعيد طور الله في برسيمه
غفران ضحكت بسخريه وقالت...ايه غيرانه...على مين... عليك انت...الف سلامه والله شكلها الضربه عملتلك حمى
دياب ابتسم بسخريه وقال..انا قولت كده بردك...عموما ملكيش حق تسأليني..لا تساليني ولا اسألك ما انتي اها حبيب القلب قاعدلك في البيت وامبارح ضربني بالسكين عشانك وانا ركبت قرون وقعدت ساكت
غفران قالت باصرار..... .بس انا مهقعدش ساكته ومهامنيش اعرف غير السلسله..امانه عليك تقولي بتاعة مين يا دياب وبعديها مهسألكش على اي حاجه
دياب نفخ بزهق وقال..يووووه يادي ام السلسله اللي وجعتي دماغنا بيها .....اقولك انا نازل اقعد مع الغفر تحت احسن من القعده وياك
وقام بتعب وفتح الباب بس اتجمد مكانه لما قالت بسرعه وبدون تفكير....بتاعة فاطمه اخت فياض...مش كده
دياب فضل مكانه مش فاهم ازاي عرفت حاجه زي دي وقفل الباب ورجعلها وعيونه متبشرش بالخير وقال بصدمه واستفهام...وعرفتي كيف انها لفاطمه
غفران بلعت ريقها بخوف شديد وهيه بتلعن نفسها على تسرعها وووووو
#اوتار_احد_من_السيف
#الخامس_عشر
#بقلم_زهرة_الربيع
اللي جاي ضرب ناااااار واحداث متتحكيش يلا بقى تفاعل جامد جامد علشان نستمر ونشوف فياض هيوافق يخرج اوصاف من البيت...وكمان عقبه هيعمل ايه ..وحتى غفران حطت نفسها في مأزق هيه مش قده يلا بقى وروني التفاعل والمشاركات كتيييير بقى شجعوني🏃♀️🏃♀️🏃♀️🏃♀️🏃♀️
روايتي ظلي المبتور
في دار نبض القمه للنشر والتوزيع صاله 2 ....جناح A36
السعر 90 جنيه فقط لا غير
وتقدرو تحجزوها من البيت وتوصلكم لحد المكان للحجز والاستفسار 👇👇
01061937672
لو فيه حد عايز يحصل عليها من المغرب او سوريا او لبنان او الاردن او الجزائر يكلمني على رسايل الصفحه وهوصله باذن الله
ظلي_المبتور
الكاتبه_زهرة_الربيع
دار_نبض_القمه_للنشر_والتوزيع
معرض_القاهره_للكتاب_2026
لا_دواء_للقلب_إلا_ذاته
الفصل السادس عشر والسابع عشر والثامن عشر من هنا
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
إرسال تعليق