رواية خطوات على الزجاج الفصل الاول والثاني والثالث والرابع والخامس والسادس بقلم سيد احمد الشاذلي حصريه وجديده على مدونة النجم المتوهج
رواية خطوات على الزجاج الفصل الاول والثاني والثالث والرابع والخامس والسادس بقلم سيد احمد الشاذلي حصريه وجديده
تبدأ القصه فى الجامعه، نيره واقفه مع اصدقاءها نفين وميري. نيره كانت تقف معهم ولكن عقلها في مكان اخر، كان عقلها يفكر فى شاب يجلس وحيدا، بعيدا عن كل الزملاء والاصدقاء، يبدو على وجهه الحزن.
نفين: يلا بينا يانيره. (نفين تكرر: نيره.. نيره).
نيره تنتبه لنفين: بتقولي حاجه؟
نفين: لا دى انتى واضح انك مش معانا خالص.
نيره: معاكم ياحبيبتي.
ميرى: القمر عقله مشغول بايه؟
نيره: والله انتى اللى قمر ياميرى.
ميري: اكيد فيه واد مز شاغل بالك شاورى وقوليلى مين هو.
نفين: يابنتى دى الجامعه كلها بتتمنى نظرة رضا منها.
ميرى: رضا مين؟
نيره: عن اذنكم دقيقه واحده.
نفين: ايه رايحه فين؟
نيره: جايه حالا.
نيره اتجهت نحو الشاب واسقطت محفظتها امامه متعمده. رامى لم يقم من مكانه ولكنه ينادى عليها: ياانسه.. ياانسه.
نيره: بتكلمني انا؟
رامي يشير الى المحفظه ويقول لها: فيه حاجه وقعت منك.
نيره تقوم بالتقاط المحفظه الخاصه بها من على الارض.
نيره: متشكره جدا بس ليه حضرتك مااخدتهاش وسبتها على الارض ماخفتش ان حد ياخدها وانت بتنادى عليه؟
رامى: مافيش حد بياخد حاجه مش بتاعته.
نيره: لا فيه اللي بيقبل وبياخد عادى.
رامى: ده يبقي حرامى.
نيره: اسمك ايه؟
رامى: اسمى رامى.
نيره: تشرفت بيك ياستاذ رامى اسمى نيره.
رامى: عاشت الاسامي.
نيره: بعد اذنك.
رامى: اتفضلي.
نيره توجهت نحو اصدقاءها نفين وميري.
ميرى: مش بقولك علي الطلاق كان قلبي حاسس.
نيره: حاسس بايه؟
ميرى: حاسس بمصيبه جايلى مصيبه مكانتش على بالى. (ميرى ونفين كملوا الاغنيه وفضلوا يضحكوا).
نيره: بقولك ايه انتي وهي مش عايزين دلع بنات ماسخ.
ميرى: دلع بنات ايه دانت اللى بتدلع وقلبك من الحب مولع ياواد ياشقي.
نيره: حب ايه الله يخربيت دماغك؟
نفين: يلا يانيره بسرعه نشرب ماسكه فيه.
نيره: ماسكه فيه ليه انا هشرب واحد قهوه مظبوط.
ميرى: ياواد يامظبوط انت بس ياخوفي مين اللي جاي.
نيره: هو ايه اللي جاي؟
ميرى: بصي وراكى وانتى تعرفي.
نيره: طيب بقا اقوم انا.
ساهر: ازيكم يابنات.
ميرى ونفين في صوت واحد: بخير يامعلم.
ساهر: معلم ايه هو انتى شايفانى جزار؟
ميرى: انت تطول تبقي جزار ده حتى بياكل لحمه كل يوم.
نيره: اشوفكم بعدين يابنات.
ساهر مسك ايد نيره وقالها: لحد امتى هتفضلي تهربي منى؟
نيره: عارف لو ايديك لمستنى تانى ايه اللي هيحصل لك.
ساهر: عايز اتكلم معاكي.
نيره: مافيش بينى وبينك كلام ياساهر.
ساهر: ممكن اعرف ليه؟
نيره: بصراحه كده مش بتنزلى من زور.
ساهر: انا ناوى خير.
ميرى: الموضوع مقفول ياساهر مالوش لزوم الكلام.
ساهر قام بعصبيه اخد مفاتيح عربيته ومشى.
نفين: فى داهيه ياساهر منك لله عكننت علينا الماسكه فيه طعمه كان لذيذ.
ميرى: ااهدى يانيره واقعدى كملى قهوتك.
نيره: انتى اتهبلتى ده مسكها بايديه وشرب منها انتى عايزانى اشرب مكانه؟
نفين: عليه الطلاق ابدا اشرب انا باقي القهوه جايز واد مز كده يظبطنى النهارده ويبقي اليوم كله مظبوط.
نيره: اتظبطى شويه ياهبله.
نفين: عايزانى انظبط قوليلي ايه حكاية الواد المز اللى انتى كنتى بتتكلمى معاه؟
نيره: قصدك رامي.
نفين: اه يارامى ياحرامى ياسارق قلب نيره.
ميري: عيب كده احنا في جامعه محترمه ومافيش فيها حراميين فيها حب من اول نظره فيها حاجه كده محفظه تقع انتى رايحه تعملى للواد اختبار انطقي واعترفي يانيره حبتيه ولا لا.
نيره: انا هقوم.
نفين: وانا كمان هقوم استنى خدينى معاكى جايز واد حلو حلويات زي رامى يشوفنى ينشكح بيه.
نيره: نصيبى من وسط الجامعه كلها يبقي اصحابي الاتنين مهفوفين في عقولهم.
ميري: ومالهم المهفوفين ياحبيبتي مش احسن مانكون نكديين؟
نيره: لا انا بس خايفه من حاجه واحده.
نفين: اقولك ايه هي؟
نيره: قولي يامهفوفه.
نفين: اان الواد رامى يطلع مهفوف زينا.
نيره: ماعتقدش ابدا ان فيه زيكم ورامى بالذات.
نفين: احنا فعلاً مافيش زينا جامدين اوى اوى.
ميرى: ايه اللي عاجبك فيه؟
نيره: مش عارفه بس فيه حاجه كده بتشدنى ناحيته.
نفين: يمكن يكون رابطك بحبل.
نيره: بجد مابهزرش مستغربه جدا ليه دايما قاعد لوحده برغم انه بسم الله ماشاء الله عليه انسان يتحب ووشه كله قبول.
نفين: ياسيدى ياسيدى انا عايزه من ده ياحزمبل.
نيره: بطلوا تهريج بقا شويه.
نفين: حاضر هنبطل قوليلى بقا قالك بحبك وقلتى له ايه؟
نيره: لا قالى ولا قولت له.
ميرى: حبتيه؟
نيره: اكدب عليكى واقولك لا.
ميرى: انتى بقالك فتره كده متغيره بس هو مش شايف ده؟
نفين: انا عندي فكره نخليه يشوف ده؟
ميرى: فكرة ايه؟
نفين: نلبسه نضاره.
نيره: بطلى ده احلى حاجه فيه عيونه جاتك نيله على افكارك.
نفين: عيونه جننتنى.
نيره: جن اما يعفرتك.
ميرى: انا هروح ابص في عيونه واقوله يابنى الحب ادامك القمر منور في السماء وانت النضاره السوده عاميه عينيك.
نيره: واضح جدا انكم بتهزروا ومش حاسين بيه.
ميرى: عليه الطلاق انا حاسس بيك يامعلمى وانا اللى هخلى الواد ده يقولك بحبك يامعلمه نوسه بس اهدى عليه كده شويه وانا اتكتك له.
نفين: والله انتم الاتنين هبل يعني هو مش شايفها ولا حاسس ببها هتقولي لي اروح اتكتك له، يابت الحب هما الاتنين لازم يحبوا بعض من اول نظره.
ومرت الايام وكان رامى ونيره بيتبادلوا النظرات نظرات حب صامت بدون كلام. وفي يوم نيره وهي بتخرج من بوابة الجامعه كان رامى وراها التفتت وبصت عليه وخرجت من البوابه، رامى خرج وراها.
نيره واقفه مستنيه علشان تعدى الطريق.
رامى: لو سمحتي ياستاذه نيره.
نيره: رامى نعم.
رامى: ممكن اتكلم مع حضرتك شويه.
نيره: نتكلم هنا في الشارع يعني؟
رامى: لا ماقصدش هنا ممكن نتمشى شويه بس بعيد عن هنا.
نيره: اتفضل.
مشى رامى ونيره مع بعض، رامى بداء بالكلام: سامحينى في كلامي اللى هقوله ده.
نيره: اسامحك.
رامى: من زمان وانا دايما ابص عليكى من بعيد وماكانش ليه الجراءه انى اتكلم.
نيره: بتبص عليه ليه؟
رامى: لبسك والاستايل بتاعك ياستاذه نيره.
نيره: هو انت من الجماعه اللى عاملين فيها مشايخ ماله لبسي؟
رامى: ماقصدش انتقاد ولا حاجه ولاانا من الجماعه دول؟
نيره: امال ايه ياستاذ رامى؟
رامى: اعذريني انى متلخبط فى الكلام.
نيره: ممكن حضرتك تقول فيه ايه بالضبط؟
رامى بيحاول يستجمع كل قواه علشان يتكلم. فجأه حرامى شد الشنطه من نيره، رامى طلع يجرى وراه. رامى وهو بيجرى عربيه جايه بسرعه خبطته. نيره كان بينها وبينه مسافه لانه كان بيجرى وراء الحرامى. ولاد الحلال اتلموا في الشارع وشالوه ودوه المستشفى. نيره فضلت تبص على رامى ومستنظراه انه يرجع بالشنطه بتاعها.
نيره بعد مازهقت من طول الانتظار قررت تاخد تاكسي وترجع بيتها. ولما وصلت خلت مامتها تحاسب التاكسى، وحكت ليهم اللى حصل وازاي شنطتها اتسرقت.
نيره دخلت اوضتها مسكت التليفون واتصلت ب ميرى:
نيره: الو.. انا اتسرقت.
ميرى: ايه اللي اتسرق منك؟
نيره: الشنطه بتاعتى بس انا مش زعلانه عليها اد زعلى على الموقف اللي حصل.
ميرى: ايه الموقف احكيلى؟
نيره: بعد ماخرجت من الكليه رامى مشى معايا لحد مالشنطه اتسرقت جرى وراء الحرامى وماشفتوش تانى.
ميرى: يعني ايه ماشفتهوش تانى؟
نيره: يعني مارجعش بالشنطه.
ميرى: مش يمكن ماحصلش الحرامى؟
نيره: حتى لو ماحصلوش كان المفروض يرجع.
ميرى: وانتى ماحاولتيش تشوفيه مش يمكن الحرامى خبطه ولا حاجه؟
نيره: اكيد بالعقل كده لو الحرامى خبطه الناس كانت هتتلم.
ميرى: اكيد المهم انتي بخير.
نيره: واضح جدا ان اختيارى غلط من البدايه وقلبي خدعنى واختار واحد حتى لايقال عليه راجل.
ميرى: انتي لسه في البدايه وكويس ان ربنا كشفه من الاول.
نيره قفلت مع ميرى ونامت على سريرها. مامتها بتنادى عليها.
نيره: حاضر ياماما.
هل كان رامى بطلاً ضحى بنفسه.. أم جباناً هرب بالشنطه؟ الإجابه في الجزء القادم
الجزء الثاني
خطوات على الزجاج
نيره بعد مارجعت البيت
وقعدت مع مامتها وحكت ليها على موضوع سرقة الشنطه
الوقت قرب على المغرب
جرس الباب ضرب
الأم/مين؟
صوت رجالي هادي
أمين شرطه يا فندم
نيره /آمين شرطه ايه؟
وبصت لأمها وبعدين قربت من الباب وفتحت
نيره/خير يا حضرة الأمين؟
أمين الشرطه/حضرتك نيره حافظ
نيره /ايوه
امين الشرطه /محتاجين حضرتك في القسم
الأم ااتخضت وقالت في ايه؟ بنتي عملت ايه؟
أمين الشرطه
لا يا فندم مافيش حاجه بس إجراء بسيط
نيره حاولت تلم أعصابها وكانت خايفه وقالت
طيب أغير هدومي وأجي لحضرتك
نيره في الطريق لقسم الشرطه
مامتها اتصلت بوالدها علشان يحصلها ويعرف فيه ايه؟
نيره وصلت القسم
قاعده قدام مكتب الظابط
إيديها متشبكه في بعض
وعينيها تايهه وخايفه
الظابط /وهو بيقلب في ورق
حضرتك اتسرق منك شنطه النهارده؟
نيره/أيوه
الظابط/ احنا لاقينا الشنطة ولقينا اللى سرقها
نيره /شكرا لحضرتك جدا
الظابط/بس فيه حاجه
نيره/جاجة ايه؟
الظابط/اللي كان معاه الشنطه عمل حادثه وهو بيجري ودلوقتي في المستشفى حضرتك تيجي علشان تتعرفي عليه
علشان ياخد جزاؤه
نيره/حاضر
نيره راحت المستشفى مع الظابط
الظابط وقف قدام أوضه
فتح الباب بهدوء
الظابط/اتفضلي
نيره دخلت
خطوه والتانيه
ولما عينيها وقعت على السرير
اتجمدت مكانها
رامي كان نايم على السرير
راسه متربطه
ودرعه في جبس
نيره بصوت واطي
لا
الظابط/هو ده اللي كان معاه الشنطه.
نيره قربت خطوه
وبصت لرامي
وشها اتغير
وعينيها دمعت
نيره /ده… ده مش حرامي ده زميلي في الجامعه
الظابط/أمال ايه اللي جاب الشنطه معاه؟
نيره/كان بيجري ورا اللي سرقها
الظابط/حضرتك متأكده؟
نيره /ايوه متاكده
وبدأت تحكي اللى حصل
لحد اللحظه اللي جرى فيها رامى وراء الحرامى
وما رجعش
الظابط يعني انتي شايفه إنه حاول يساعدك؟
نيره/ايوه
الظابط قفل الملف
وقال بهدوء
مافيش محضر سرقه
الظابط خرج من الاوضه
رامي فتح عينه بالعافيه وبص لنيره
وصوته كان مبحوح
نيره الشنطه رجعت
نيره كانت عينيها مليانه دموع
وقالت ايوه رجعت يارامى
نيره /ايه اللي حصل؟
رامى /لما قربت امسك الحرامى وبشد منه الشنطه ومسكتها في ايدى زقنى كانت عربيه جايه خبطتنى
نيره /انا اسفه انا السبب
رامى /مافيش اسف ولا حاجه ده نصيبي
نيره /انا همشى دلوقتي وهرجعلك تانى لان ماما قلقانه عليه
رامى /اتفضلي
خرجت نيره وهي منهاره من المستشفى
ركبت تاكسي ورجعت للبيت
الام /خير يانيره فيه ايه؟
نيره /كانوا عايزينى علشان الشنطه ياماما الحمدلله رجعت
الام /هلحق اكلم بابا علشان زمانه راح لك القسم
نيره /انا هدخل اوضتى
نيره دخلت الاوضه رمت الشنطه على السرير واتصلت ب ميرى
ميرى /الو
نيره /ميرى انا مش هسامح نقسي ابدا
ميرى /فيه ايه وليه كده؟
نيره بتعيط وقالت انا ظلمت رامى وقلت عليه مش راجل
ميرى /ايه اللي حصل احكيلى وبتعيطى ليه دلوقتي؟
نيره حكت اللى حصل لميرى
ميرى /لاحول ولاقوة الابالله العلي العظيم وهو عامل ايه دلوقتي؟
نيره /متكسر ومتربط في المستشفى
ميرى /اهدى بس كده
نيره /اهدى ازاي هو فيه انسان يضحى بروحه بالطريقه دى انا صعبان عليه جدا
باب الاوضه بيخبط
نيره /هكلمك تاني ياميري
نيره قفلت السكه مع ميري
دخل الاب اوضة نيره
الاب /ايه اللى حصل؟
نيره حكت لبابها اللى حصل
الاب شاف الدموع في عينيها وسالها ايه الدموع دى؟
نيره /منظر الشاب اللى عمل الحادثه صعبان عليه جدا
الاب /شاب مين قصدك الحرامى
نيره /لا يابابا ده واحد زميلي في الجامعه كان بيجرى وراء الحرامى
الاب /ادينى عنوان المستشفى
نيره /خير يابابا ليه عايز العنوان
الاب /لازم نشكره يابنتى على وقفته جمبك وعلى الاقل نعزم عليه بفلوس
نيره /مافيش داعي يابابا
الاب /اللى يعمل حاجه كويسه لازم يتكافىء عليها يابنتى وانتى بتقولي ده متبهدل خالص
نيره /ايوه يابابا
نيره اعطت لبابها عنوان المستشفى والاسم
و قعدت في اوضتها ومش قادره تمنع نفسها من العياط
بعد شويه جرس الباب خبط
الام فتحت الباب
نفين /نيره موجوده ياطنط
الام /ايوه ياحبيبتي في اوضتها
الام نادت على نيره
نيره اول ماشافت نفين اخدتها ودخلوا الاوضه
نيره /انا مخنوقه جدا
نفين/ مخنوقه من ايه؟
نيره /رامى عمل حادثه
نفين /مين رامى
نيره /رامى اللى كنت بتكلم معاه الصبح
نفين /لا بقا فهمينى علشان بصي انا مافيش فيه عقل خالص
نيره قالت لنفين على اللى حصل
نفين /ياسواد الحلل دانتى واضح وشك وحش على الواد 😂
نيره /والنبي مش وقت هزار
نفين /صح ده وقت عشاء طابخين ايه النهارده 😂
نيره /اقولك الواد عامل حادثه تقوليلى عشاء
نفين /بصي بقا وركزى معايا انا مابعرفش افكر وانا جعانه فلازم اشبع وامخمخ كده 😂
نيره /عايزه حل
نفين /حل ايه هو احنا اخدنا امتحان
نيره /قومى روحي يانفين
نفين /اروح ايه انا بايته عندك النهارده
نيره /ليه؟
نفين /المشاكل عندنا مشعلله بابا وماما مولعين في بعض وقلت اخلع انا ومافيش غيرك ليه
نيره /البيت بيتك
نفين /انا جعانه جعانه اصرخ واقول ياطنط جعانه 😂😂
نيره /تعالي نشوف ايه يتاكل في المطبخ
نفين /يارب نلاقي لحمه 😂😂
نفين بعد ماكلت هي ونيره
نفين /بصي بقا ياستى وماستك الا انا
نيره /قولى
نفين /مافيش غير ميرى بت كلامها مزوق وبتفوت فى الزلط هي اللي هتحللك المشكله دي
نيره /انا قلت لها هكلمك تاني وماكلمتهاش
نفين /قومى اتصلي بيها
نيره ونفين اتصلوا بميري وفضلوا يتكلموا
ميرى طمنت نيره وقالت لها ماتقلقيش وباذن الله كل حاجه ليها حل
اليوم التالى
نيره ونفين راحو الجامعه
بس نيره ماكانش فيه تركيز خالص
كان كل همها انها تطمن على رامى
وبعد ماخرجوا من الجامعه
راحت هي ونفين وميرى المستشفى
قبل مايدخلوا المستشفى
ميرى لمحت والد نيره خارج
ميرى سحبت نيره من ايديها ورجعتها
نيره /فيه ايه؟
ميرى /بابكى خارج
نيره ونفين وميرى اتدارو لحد ماطمنوا انه مشى
ودخلوا المستشفى
رامى كان قاعد في السرير
نيره /الف سلامه عليك يارامى
رامى /الله يسلمك
ميرى /ايه ياستاذ قوم بسرعه احنا من اولها كده هنقعد في المستشفى ولايه؟
رامى /مافيش حد بيكون عايز كده
ميرى /هو مافيش حد من اهلك يعرف اللى حصل؟
رامى /لا مافيش حد قالهم
ميرى /طيب هات العنوان وانا اروح اقولهم
رامى /هتعبك معايا كده
ميرى /ياسيدى مش مشكله بس خليك فاكر الجمايل
رامى عطاها العنوان
ميرى /باذن الله هروح ليهم النهارده
رامى /متشكر جدا
رامى بيبص لنيره ويقولها
انا بشكرك جدا
نيره /على ايه يارامى؟
رامى /والد حضرتك كان عندي هنا من شويه
نيره /وايه اللى حصل
رامى /مش مهم اللى حصل المهم توصلي ليه الرساله مش كل عمل لازم يكون مكافئته بالفلوس فيه كلمه قليله بس بتعنى كتير جدا اسمها شكرا
نيره /انا اسفه جدا
نفين /انت غلطان يارامى كنت خدتهم منه واديتهم لى 😂
رامى ضحك
نيره /انا بصراحه يارامى مش عارفه اقولك ايه بس اللي اقدر اقوله واعمله انى اكرر اسفي ليك
اسفه انى شكيت فيك
واسفه ان بابا ممكن يكون جرحك بابا راجل عملى ومادى شويه
رامى /شكيتى فيه؟
ميرى /الهى تتشكى في قلبك اسكتى
ميرى /بقولك يارامى هو لو انا اتعرضت لنفس الموقف ده والشنطه بتاعتى اتسرقت هتجرى وراء الحرامى ولا انت عملت كده عشان نيره وبس؟
نيره /طيب هستناكى بره الف سلامه عليك يارامى
رامى /الله يسلمك
ميرى /رد يلا هتعمل كده علشانى ولا لا؟
رامى /نيره تستاهل اكتر من اللى عملته واكيد انتى كمان تستاهلى انى اقف جنبك
ميرى /طيب قوم بسرعه بقا
رامى /اقوم فين
ميرى /اقف جمبي 😂
رامى بيضحك
ميرى /هسالك سؤال واحد وهمشي
لو نيره حست انك لما جريت وراء الحرامى انك مش هترجع وماكانتش تعرف انك عملت حادثه تعذرها ولا لا؟
رامى /اللى مايعرفش رامى كويس اكيد ليه عذره
رامى ممكن يضحى بروحه علشان خاطر حد بيحبه
ميرى /افهم من كده انك بتحب نيره؟
رامى /ده السؤال التاني وكده وقتك خلص
بس هجاوبك ايوه بحبها
ميرى /طيب ليه مابتقولهاش؟
رامى /كنت ناوى اتكلم بس نصيبي اول لقاء بينا يحصلي كده
ميرى /يبقي اسمع بقا كلام اختك اخلع يابنى 😂😂😂
رامى /والقلب نعمل فيه ايه؟
ميرى /انا هقولها
رامى ابتسم لميري
الجزء الثالث
خطوات على الزجاج
بعد زيارة نيره وميرى ونفين ل رامى في المستشفى
ورامى اعترف لميرى انه بيحب نيره
ميري /رامي بيحبك يانيره
نيره /هو قالك كده
ميرى /ايوه
نيره /وليه ماقاليش هو لازم وسطه في الكلام ده؟
نفين /يابنتى مش انتى بتقولي كان ماشي معاكى قبل مايتخبط وكان شكله متلخبط وهو بيتكلم
نيره /ايوه كان بيقولى كلام كده غير مفهوم على لبسي وشكلى وانا فكرته من الجماعات اللى بيشوفونا متبرجات باللبس ده
نفين /مايمكن كان بيفتح معاكى كلام
بس انتى اللى مش فاهمه انتى بتحبيه ولا
نيره /هو فيها ولا اه بحبه
ميرى /وهو كمان بيحبك بس عايزه اقولك حاجه رامى من كلامه وتصرفاته شخص جاد جدا مع انه يبان انه هادى بس يقف ادام الف راجل
نيره /ايه ده لحقتى تعرفي كل ده
نفين /يابنتى دى بلوى سوده 😂😂
نيره /وانتى بقا ايه؟
نفين /انا ماليش في الكلام ده انا جعانه قوى 😂😂
ميرى /انا هسيبكم وامشى علشان اروح لاهل رامى وخلى بالك لان نفين ممكن تاكلك 😂😂😂
نيره /ماشي خلي بالك من نفسك وكلمينى لما ترجعي
ميرى راحت لاهل رامى وبلغتهم انه في المستشفى
ورجعت معاهم لحد ماوصلوا المستشفى
ودخلت لحد الاوضه
رامى /شكرا ياميرى
ميرى /مافيش شكر. بين الاخوات وحمد لله على السلامه
مشيت ميرى من المستشفى ورجعت البيت
وكلمت نيره
نيره سالتها اسئله كتيره جدا وكانت ميري بترد عليها
نيره الساعه ٧ مساء خرجت من اوضتها
نيره /هو فين بابا ياماما؟
الام /بابا خرج ياحبيبتي
نيره /ماتعرفيش عمل ايه مع الولد بتاع الحادثه؟
الام /باباكى قال انه عرض عليه فلوس ورفض ياخدها
نيره /ليه ياماما كل حاجه عند اغلب النااس بتتقاس بالفلوس؟
الام /يابنتى فيه حاجات وكلام بسيط احسن من الفلوس الف مره زي كلمة شكرا كتر خيرك بس باباكي شايف الفلوس لغة العصر
نيره /طيب بقولك ايه انا هقوم البس واروح لميرى شويه؟
الام /لميرى ولا
نيره /ايه ولا دى ياماما
الام /تعالى ياحبيبتي انا امك والام اللي ماتلاحظش على بنتها التغييرات المفاجئه ماتبقاش ام
نيره /هو ايه التغييرات دى ياماما انا زي مانا؟
الام /يمكن اكون ماعنديش احساس اوبخرف بس هقولك خلى بالك على نفسك
نيره /حاضر ياماما
نيره طلعت لبست وخرجت
راحت على المستشفى لرامى
رامى كان قاعد على سريره وجمبه اخته نشوى
رامى /اتفضلى يانيره
نيره /الف سلامه عليك يارامى
رامى /الله يسلمك
نيره /جيت اطمن عليك
رامى /هاتى اي حاجه للاستاذه نيره يانشوى
نيره /مالوش لزوم انا همشي
نشوى خرجت تجيب حاجه سقعه
رامى /ميرى قالت لك حاجه؟
نيره /لا
رامى /بحبك
نيره سكتت ومانطقتش
رامى /ساكته ليه؟
نيره /مافيش
رامى /وانتى
نيره /انا ايه؟
رامى /بتح
نشوى دخلت ورامى قطع الكلام
نيره ابتسمت ورامى الابتسامه كانت ماليه وشه
نيره /انا هستاذن علشان ارجع قبل مابابا يرجع البيت خلى بالك من نفسك
رامى /هفضل مستنى الاجابه؟
نيره / الاجابه بنفس الرد
ومشيت نيره من عند رامى كان قلبها مليان بالسعاده
نيره وصلت بيت ميرى
ميرى شافت الفرحه في عيون نيره
نيره /متشكره ياحبيبتي على كل اللى بتعمليه علشانى؟
ميرى /على ايه بتشكرينى؟
نيره /على كل حاجه بتعمليها
ميرى /انا مابعملش حاجه اكتر من اللازم وانا وانتى مش اصدقاء احنا اخوات
وكويس انك جيتى نفين اتصلت بيه وجايه اهو نقعد مع بعض الثلاثه الاخوه
نيره /انا روحت لرامى
ميرى /امتى؟
نيره/ لسه راجعه وقالى بحبك
ميرى /وانتى قولتي له ايه؟
نيره /لا ده بقا كان موقف هحكيلك عليه 😂
نفين بتضرب الجرس ميرى بتخرج تفتح لها
بتدخل نفين تلاقي نيره قاعده
التلاته بيجتمعوا مع بعض ويهزروا ويضحكوا
بعد شويه التليفون بيرن
ميري /الو
والد نيره /اذيك ياميرى
ميرى /اذيك ياعمو
والد نيره /هي نيره موجوده عندك؟
ميرى /ايوه ياعمو
والد نيره /عندك من امتى
ميرى /من حاولى ساعه ياعمو
والد نيره ماشى قوليلها متتاخرش
تفتكرواايه سبب اتصال والد نيره بميرى ؟
نيره بعد اتصال باباها
بقت قلقانه وخايفه
بعد شويه رجعت البيت
نيره /بابا فين؟
الام /بابا لسه مارجعش
نيره /هروح اغير هدومى وارجع علشان عايزاكى
الام /ماشي ياحبيبتي
نيره غيرت ملابسها ورجعت قعدت مع مامتها
الام /عايزه ايه قولى؟
نيره /ماما انا مشاعرى متلخبطه شويه اليومين دول
الام /مين اللي شاغلك ومخلى مشاعرك متلخبطه؟
نيره /واحد زميلى
الباب بيفتح وبيدخل الاب
نيره والام سكتو وبطلوا كلام
الاب /كنتى فين يانيره؟
نيره /كنت عند ميرى
الاب /وقبل ماتروحي لميرى كنتى فين؟
نيره /ماكنتش يابابا
الاب بيضرب نيره بالقلم ويقولها عيب بطلى تكدبي
نيره /اكدب فى ايه يابابا؟
الاب /ايه اللى خلاكى تروحي المستشفى؟
نيره /كنت رايحه اشكره على وقفته معايا
الاب /تشكريه ليه هو انا مش مالى عينيكى ولايه؟
نيره /للا يابابا مالي عينيه وكل حاجه بس المشكله ماحصلتش مع حضرتك انت انا اللي لازم اشكره بدل ماديله فلوس
الاب /ده ولد قليل الادب ومابيفهمش في الذوق ابدا اروح اعرض عليه فلوس يقولى خلى فلوسك معاك ياباشا
نيره /ليه كل حاجه بالنسبه لحضرتك بتبقي بلغة المال يابابا؟
الاب /المال بيفتح اي باب مقفول؟
نيره /بس فيه حاجات كتيره المال مايقدرش يعملها
الاب /تبقي هبله واعملى حسابك لو عرفت انك روحتى المستشفى تانى مش هخليكى تخرجى من باب البيت
نيره /حاضر يابابا مش هروح بعد اذنك يابابا
الاب /استنى هنا انا لسه ماخلصتش كلامى
نيره /اسفه يابابا
الاب /والد ساهر ومامته وساهر جايين بعد يومين
ولازم تكونى موجوده
نيره /ممكن اعرف السبب ايه سبب زيارتهم.
الاب /جايين يطلبوكى ل ساهر ابنهم
نيره /بس يابابا
الاب /مافيش حاجه اسمها بس اللي اقول عليه يتسمع وبس فهمتى
نيره دخلت اوضتها وعماله تعيط على اخرها
الام بعد ماجهزت العشاء للاب
دخلت ل نيره
شافت بكاءها
نيره اترمت في حضن مامتها
الام /امسحى دموعك ياحبيبتي كل حاجه وليها حل
نيره /انا بكرهه بكرهه ياماما ومش عايزه اللي اسمه ساهر ده
الام /طيب اسمعي كلام مامتك بس ومشى الدنيا وربك هيحلها من عنده
نيره /مش هقدر ياماما ساهر واهله هيفتكروا انى موافقه
الام /ماتخافيش ياحبيبتي انا جمبك
انا هروح علشان باباكى
نيره اطمنت ان مامتها معاها
الام تانى يوم اتصلت ب ميرى ونفين علشان يخرجوا نيره من اللي هي فيه؟
ايه اللي حصل بعد كده
وساهر هيخطب نيره؟
والفرح هيتحدد امتى؟
وميرى ونفين والام هيعملوا ايه؟
الجزء الرابع
خطوات على الزجاج
الام اتصلت بنفين وميرى علشان يخرجوا نيره من اللي هي فيه
نيره اول ماشافت ميرى ونفين فضلت تبكى
ميرى /انا عايزه افهم انتى بتعيطى ليه دلوقتي العياط هيفيد بايه
نيره /انا خايفه خايفه الاقي نفسي بين يوم وليله بقيت لواحد مش طيقاه
نفين /لا والله اروح اقتله 😂
ميرى /شاطره يابت انا بقا جاتلى فكره مافيش بعد كده
نيره /فكرة ايه؟
ميرى /اسمعي الكلام اللي هقولك عليه ونفذيه بالحرف الواحد
نفين /قول يابوالتكاتيك ياجامد
ميرى /لازم تمشي الدنيا والجو وتقعدى معاهم لحد مايطلب ايديكى وبعد كده سيبي الباقي عليه
نيره /ايه الهبل ده؟
نفين /خليكى وراء الاهبل لحد باب الدار 😂😂
نيره /انا لازم اعرف انتى ناويه على ايه؟
ميرى /اعملى اللي بقولك عليه وبس
نفين /اقولك تعملى ايه يانيره؟
نيره /ايه قولى بسرعه
نفين /سندوتش كده نمزمز فيه 😂
ميرى /بس ياجعانه
نيره /لازم رامى يعرف اني مش هقدر ازوره في المستشفى
نفين /هيعرف يامعلمه نيره 😂
نيره /مين اللي هيعرفه؟
نفين /هو فيه غيرها الراعي الرسمي بتاعنا 😂😂
ميرى /كل اللي انتي عاوزه هيتم ماتشغليش بالك بحاجه
نيره /هتروحي امتي؟
ميرى /بكره باذن الله
نيره /خدى ده اديه لرامى؟
نفين /ايه اللي مكتوب في الجواب ده.؟
ميرى /اكيد كلام يعني مش اكل 😂
نفين /طيب شوفي كده جايز يكون فيه حتتين كبده ورغيفين 😂😂😂
الاب بيدخل عليهم
اذيكم يابنات عاملين ايه؟
ميرى ونفين /الحمدلله ياعمو
الاب /كويس انكم هنا اختكم نيره متقدم ليها عريس وطبعا انتم لازم تكونوا موجودين علشان تساعدوا ماما في تجهيز العزومه
ميرى /باذن الله ياعمو هنكون موجودين ربنا يتمها بخير والف الف مبروك
الاب خرج
نفين /كده ضمنا اكله ميه ميه 😂
ميرى /اانتى مابتفكريش غير في بطنك؟
نفين /يابنتى انا كده كده عارفه ان نيره مش موافقه فلازم نستفاد وناكل لقمه حلوه ويبقي عمى غرم حق العزومه وحلال علينا الجاتوه بتاع ساهر وامه 😂😂
ميرى مشيت هي ونفين
ونيره خرجت قعدت في الصاله
الام /قومى البسي وتعالى نخرج نجيب شوية طلبات
نيره / طلبات ايه ياماما مش قادره ياماما تعبانه
الام /طلبات للعزومه
نيره /طفحوه انا مش جايه
الام /حاسه بيكي بس زي ماقلت لك مافيش حاجه هتتم غير اللي انتى عايزاه
نيره /وبابا
الام /سبيها على ربنا
نيره /ونعم بالله
الام خرجت ونيره قعدت في البيت
الاب نايم في اوضته
نيره قاعده تفكر في كلام ميرى وكلام مامتها
ليه الاتنين متفقين ومصرين ان نيره لازم تماطل وتعدى اليوم
ياترى الام بتفكر في ايه؟
وميري هتعمل ايه؟
ورامى هل بيحبها بجد ولا لا؟
طيب لما يعرف انها مش هتقدر تزوره في المستشفى هيكون ايه رد فعله؟
ولما يقراء الجواب بتاعها ايه اللي هيحصل؟
نيره مش قادره تستوعب ولاتفهم كلامهم
ولاعارفه توصل لحل للتخلص من ساهر
الام رجعت بعد شويه
ونادت على نيره
وطلبت منها انها تشيل الحاجه معاها
نيره /لو بتحبيني بجد بلاش تطلبي منى حاجه لانى ممكن اتجنن واحط في الحاجه دي سم واخليها بدل العزومه تبقي مذبحه
ويروحوا فيها كلهم
الام /وانتى مش هتاكلى
نيره /ومين اللي هيكون ليه نفس ياكل في يوم زي ده؟
الام /يابنتي ماتكبريش الموضوع ده يوم وهيعدى
نيره /ياماما اليوم ده بابا هيوافق على ساهر وهيتفقوا على كل حاجه وانتى مش تايهه عن بابا ممكن يحدد الجواز بعد اسبوع
الام/لا متخافيش مش هيحصل ده وحتى لوحصل واتفقوا مش هسيبك تتجوزى واحد انتي مش عايزاه
نيره /بجد ياماما هتقفي جمبي؟
الام /يابنتي انا ضحيت بحياتى وبحريتى علشانك ولولا انتى كنت اتطلقت من زمان
نيره /للدرجه دى ياماما
الام /بعدين احكيلك ياحبيبتي لاحسن بابا زمانه هيصحى ويسمعنا ويبقي يوم مالوش اخر
نيره ومامتها كانوا في المطبخ
وبعد شويه الاب صحى
ونادى على الام
الاب /انا مسافر وهرجع على بكره اخر النهار بنتك ماتخرجش من البيت
الام /والجامعه بتاعها
الاب /خليها تقعد اليومين دول لحد مالخطوبه تتم
الام /احنا خلاص الامتحانات قربت وماينفعش تقعد
الاب /تروح الجامعه بميعاد وترجع بميعاد لو اتاخرت تعرفينى
الام /حاضر
الاب لبس هدومه وخرج من الاوضه
نيره كانت في الصاله
الاب بيبص لها ويقولها مافيش خروج من البيت سمعتى ولا لا
نيره /حاضر يابابا
الاب خرج من الباب ومشى
نيره /ماما طيب افرضي بقا عايزه اروح مشوار ولا اخرج اعمل ايه هو ايه التحكم ده؟
الام /ممكن تقوليلي بقا ايه اللى مغيرك ومين بقا زميلك اللي ملخبط مشاعرك ومخليكى عايزه كل شويه تجرى على بره
نيره حكت لمامتها عن رامى وعرفتها انها بتحبه
الام /انا حاسه بيكي من اول يوم
بس ياترى رامى يستاهل حبك
نيره /ياه ياماما الحب كله لرامى
الام /حبيتيه من امتى؟
نيره /من زمان ياماما كنت دايما شايفاه انسان هادى قاعد في حاله
كان الحب بينا بالنظرات مش بالكلام حسيت اني بحبه من اول لحظه شوفته فيها
الام /واتكلمتوا
نيره /يوم الكلام ياماما كان يوم اسود
يوم الشنطه ماتسرقت وهو جرى وراء الحرامى وعربيه خبطته
الام / جراله ايه؟
نيره /اتشلفط ياماما
الام /ياترى بقا عنده المقدره انه يتجوز ويفتح بيت ولا باصص ليكى علشان حاجه تانيه
نيره /حاجه تانيه زي ايه ياماما؟
الام /ممكن يكون طمعان فيكى مثلا
نيره / مافتكرش ياماما وياريت بلاش تتكلمى بلغة الماده زي بابا
نيره زعلت من مامتها ودخلت اوضتها
اليوم التالي
نيره راحت الجامعه
ميرى راحت لرامي المستشفى وسلمته الجواب بتاع نيره
رامى /هاتى رقم تليفون بيت نيره
ميرى /ناوى على ايه؟
رامى /هكلمها
ميرى /ولو حد من البيت رد عليك هتعمل ايه؟
رامى /هعمل اللي المفروض يتعمل؟
ميرى /انا عارفه انك مش ممكن تتسبب ليها في مشاكل اتفضل الرقم
ميرى خرجت من عند رامى رجعت على البيت
ونيره ونفين بعد ماخلصوا الجامعه رجعوا بيوتهم
نيره مسكت التلفون واتصلت بميرى
ميرى حكت ليها اللي حصل
نيره دخلت غيرت ملابسها
الام /يلا نحط الغداء علشان نتغدى
نيره قامت تحط الاكل
التليفون بيرن
الام بترد
الو
رامى /ازي حضرتك ياامى
الام /الحمدلله بخير مين حضرتك؟
رامى /انا رامى زميل نيره في الجامعه
الام /اهلا وسهلا بيك خير فيه حاجه؟
رامى /لوسمحتى عايز اكلم نيره
الام استغربت من طلبه
نادت على نيره كلمى
نيره /مين ياماما
الام /رامى
نيره مسكت التلفون
نيره /الو
رامى/اذيك عامله ايه؟
نيره /الحمدلله
رامي اسمعي الكلام ده كويس انا خرجت من المستشفى من ساعتين تقريبا
انا بحبك من زمان من اول يوم دخلنا فيه الجامعه كنت بشوفك كل لحظه وفي كل ثانيه
بس ماكانش ينفع اتكلم واعبر عن حبي لانى كنت لسه مجرد طالب ادامه سنين لحد مايتخرج ويبقي قادر يخبط على الباب ويقول انا جاهز انى اتقدملك
ماكانش ينفع انى اعشمك بالحب وانا لسه ادامى مشوار طويل
كنت بكتفي بنظرتى ليكى ومطمن انك لسه ادامى شايفك مافيش علاقه بينك وبين اي شاب
الحب في قلبي من سنين وده الوقت المناسب اللي اقولك فيه عن كل اللى جوايا
ولو قلتى اتقدم لى حالا انا جاهز
نيره ساكته مش بتتكلم
ورامى بيكمل كلامه انا عارف من نظرات عينيكى انك بتبادلينى نفس الشعور
وجوابك ده خلانى اقوى انسان في الدنيا
كلمة بحبك منك هعمل بسببها المستحيل وهوصلك
الام قاعده بتبص لنيره
نيره مانطقتش ولاحرف
الام /يلا ياحبيبتي الاكل هيبرد
رامى سمع صوت مامتها وهي بتنادى عليها
قفل معاها وقالها روحي شوفي مامتك
نيره قاعده على الاكل سرحانه
الام /مالك ياحبيبتي فيه حاجه؟
نيره قامت حضنت مامتها وباستها من خدها
الام /رامى شاب شجاع جدا واسلوبه في الكلام يدل على انه راجل مش عيل
نيره/دده سيد الرجاله
نيره خلصت اكل وجريت مسكت التلفون كلمت ميرى وحكت لها على اللى رامى قاله
ميرى /هي دى الرجاله بصحيح مش العيال التيتت اللي احنا بنشوفهم
نيره وهي بتتكلم مع ميرى سمعت صوت باباها
نيره هقفل معاكى دلوقتي
جه اليوم المنتظر اللى ساهر هيتقدم فيه ل نيره
ميرى ونفين ونيره بيساعدوا في تجهيز العزومه
نفين /قوليلي ياطنط
الام /نعم ياعيونى
نفين /هو كل واحد فيهم هيتحط ليه كام حتة لحمه؟
الام /ليه بتسالى
نفين /اكيد علشان اعرف منابي اد ايه 😂😂
ميرى والام بيضحكوا
الام /انتي عايزه اد ايه ياحبيبتي؟
نفين /بصي انا مش طماعه انا هاخد الاكل ده اقعد اكل لحد ما اشبع وبعدين نقدم ليهم الباقي 😂😂
ميرى /باقي مين ده لو اتبقي حاجه 😂
نفين /لا يااسطى انا هسيبلك حته كبيره علشان انت ابوالتكاتيك 😂😂
ميرى /عيون الاسطى يخربيتك انا خايفه لتاكلينى 😂😂
الجو كان كله ضحك نيره كانت بتمثل الضحكه
ميرى /التمثيل واضح جدا عليكى انا عايزاكى طبيعيه
نيره /حاضر
نفين عماله تغنى
وجع قلبي وأحبه وأموت.. ونار قلبي مشعلقة فيه..
ضربني الحلو ميت شلوت براس قلبي وقال إخيه..
إخيه يا عيني إخيه يا روحي إخيه يا سيدي..
وجع قلبي
الام /خلاص ياجمالات ياكفته
ميرى ونيره واقعين من الضحك
نفين /هي فين الكفته ياطنط؟
الام /في الفرن ياحبيبتي
نفين /انا هدوقها
ميرى /على جثتى 😂😂😂
نفين /اخس عليكي مستخسره فيه صباع كفته 😂😂😂
الاكل جهز وكل حاجه بقت تمام في انتظار عربس الغفله
الام دخلت تجهز نفسها وتلبس
ونيره ونفين وميرى دخلوا الاوضه
نفين عماله تهزر
وتضحك كعادتها
بعد مالكل لبس جهز وبقا تمام
اهل ساهر وساهر جم
ميرى والام بيجهزوا السفره
نفين واقفه في المطبخ بترص الاكل في الصحون
نفين /بقولك ايه يانيره هما جايبين كام دستة جاتوه
نيره /ماعرفش اسالي ماما
نفين /يارب يكون جايب كتير علشان اعرف احلى 😂
نيره/والله العظيم انتى اللى مخليانى اعدى اليوم ده
نفين /عدى ياحبيبتي عدى كله هيعدى تاخدى صباع كفته 😂
السفره جهزت وكله بقا تمام والكل قعد ياكل
نفين عماله تبص لوالدة ساهر وهي بتاكل
ميرى ملاحظه نظرات نيره
بتحاول تلفت نظرها
نيره بتنتبه ليها وبتبان طبيعيه
بعد ماخلصوا اكل
نفين وميرى والام بيشيلوا السفره
نيره بتقدم الجاتوه والحاجه الساقعه
والد ساهر ووالد نيره بيتكلموا في التفاصيل من الدهب والعفش والتجهيزات
الاب موافق
والد ساهر نقراء الفاتحه
الام /مش نستنى لحد مانعرف اخوالها واعمامها واهو تلبس الدهب مع الفاتحه
الاب يبقي الاسبوع الجاي باذن الله نجيب الدهب ونقراء الفاتحه
والدة ساهر بتزغرط لولولولوي
اهل ساهر مشيوا
الاب بيعاتب الام ايه اللي خلاكى تدخلى في الكلام وتاجلى قراية الفاتحه؟
الام /الاصول والواجب تسال بنتك الاول موافقه او لا؟
الاب /هي بنتك هتلاقي عربس احسن منه فين؟
الام /العرسان كتير بس ماينفعش انك تتجاهل بنتك ومايبقاش ليها راي حتى لو كلام ادامهم
الاب /انا اديت كلمه الاسبوع الجاي الدهب ونقراء الفاتحه وكلمتى مش هرجع فيها
الام /اللى تشوفه اعمله
الجو اتشحن والبيت اللى كان كله ضحك وهزار بقا على جمرة نار
نيره /اعمل ايه مش عارفه ياميرى ده اللى انا كنت خايفه منه؟
ميرى /قومى وسبيها على الله بس عايزاكى تركزى معايا كويس اوي
وكل اللي هقوله تعمليه وتنفذيه بالحرف الواحد
نيره /انكلمى سمعاكى
ميرى قالت لنيره على اللى هتعمله وتنفذه
ميرى ونفين مشيوا ونيره قاعده في اوضتها
الاب خرج
والام في المطبخ
ساهر اتصل بالتليفون
نيره خرجت ترد
ساهر /الف مبروك علينا ياحبيبتي
نيره بتتكلم من غير نفس
الله يبارك فيك
ساهر /هتروحي الجامعه بكره
نيره /اكيد رايحه
ساهر /خلاص هعدى اخدك ونروح سواء
نيره /مالوش لزوم
ساهر /ماينفعش اسيب خطيبتى تروح لوحدها
نيره /خلاص تمام
اليوم التالى
نيره لبست ورايحه الجامعه
ساهر مستنيها بالعربيه تحت البيت
نيره ركبت وهي مخنوقه منه وبتحاول تبان طبيعيه
ساهر بيسالها كام سؤال وهي بترد عليه من غير نفس
نيره وساهر وصلوا الجامعه
ميرى ونفين بيقابلوا نيره
ميرى/ الف مبروك ياساهر
ساهر ببكل فخر وتباهي الله يبارك فيكي عقبالك ياميرى
الجميع يذهب الى الكافيه
وصلوا الكافيه ساهر بيطلب الطلبات ليهم
ميرى قامت وقفت
وبصوت عالى
لوسمحتم ممكن تسمعونى
كل اللى في الكافيه يلتفت لميرى
ميرى تتكلم بصوت واضح ومسموع للجميع
كلنا النهارده لازم نبارك لاخونا ساهر بمناسبة خطوبته
خطوبته على اجمل وارق نيره في الدنيا كلها اختى الجميله
بس قبل اي مباركه اوتهنئه ياريت نسمع كلمه من الاستاذ ساهر
ايه مشاعرك دلوقتي ناحية نيره؟
ساهر /اكيد فرحان جدا انا بحب نيره جدا
ميرى /دلوقتي نسمع راي نيره
ايه مشاعرك من ناحية ساهر
نيره/ ساهر اتفرض عليه وانا بصراحه مش طايقه ولا قابله انى اشوفه
ساهر بالنسبالي ولا حاجه
مش معنى انا بابا موافق انى موافقه
ساهر حس باحراجه ادام الجميع
بص لميرى ونيره بنظره غريبه
وساب الكافيه وخرج
الجزء الخامس
خطوات على الزجاج
بعد ميرى ونيره ماحرجوا ساهر وخرج من الجامعه غضبان مكسور رجولته
نيره /بجد انا مش مصدقه اللى حصل انتى داهيه ياميرى
ميرى /قلت لك عدى اليوم وسبيها على الله
نيره /تفتكرى ساهر هيقول لبابا على اللى حصل؟
ميرى /كل شيء جايز بس ماعتقدش انه ممكن يفكر فيكى بعد اللي حصل
نيره /بس واضح ان ساهر مش هيسكت انتى ماشفتيش نظرته وهو خارج
ميرى /ياخبر بفلوس بكره يبقي ببلاش
نفين /انتى نسيتى حاجه مهمه
ميرى /ايه هي؟
نفين /يوم الخميس الجاي ساهر هيجيب الشبكه ويقروا الفاتحه
ميرى /اه صحيح
نيره وشها اتغير تانى بعد ماكانت بتضحك
ميرى /ايه ياحزين مالك
نفين /اكيد جعانه 😂😂
نيره /خايفه قوى
ميرى /من حقك تخافي بس قولى يارب وارمى حمولك عليه
وعدى اليوم في الجامعه وكل حاجه تمام
نيره رجعت البيت وهي مرعوبه كانت خايفه ان ساهر يقول لباباها على اللى حصل
الاب رجع من شغله
وقال لام نيره باذن الله هعملها ليله الكل يتحاكى بيها
الام /ربنا يخليك ليها وتعمل
نيره اطمتت ان ساهر ماتكلمش بعد ماقعدت مع باباها وهو بيحكى على اللى ناوى يعمله في الشبكه
ميرى اتصلت بساهر
ساهر /الو
ميرى /انا اسفه ياساهر انى عملت كده ماكنتش عارفه ان ده هيكون رد نيره
ساهر/ انتى ونيره هنتيونى في كرامتى ورجولتى
ميرى/ انت غلطان انك مشيت وراء باباك ومامتك وانت عارف ان نيره مش عايزاك
ساهر/ فعلا غلطت والغلطه دى خلتنى مسخه ادام الكل
ميرى /المهم تلحق نفسك قبل يوم الدهب والفاتحه
ساهر/مافيش فاتحه مافيش انا مش ممكن ارتبط بنيره كانت ممكن تقول كده بينى وببنها ازاي ارتبط بيها بعد الكلام اللي قالته
ميرى/ هتعمل ايه في كلامك مع باباها
ساهر /الراجل اللي مايعرفش يربي بنته وتطلع بتربيتها دى استحاله احط ايدى في ايده انا هسافر كام يوم علشان انسى اللى حصل واحاول الملم كرامتى الباقيه
ميرى /وباباك ومامتك
ساهر /بابا وماما مالهمش دعوه بقرارى بس انا بقا ناوى ارد الضربه والاهانه دى لنيره واهلها
ميرى /ترد الضربه ازاي؟
ساهر /انا مش هاجي يوم الشبكه هكون مش موجود ولازم اخليهم عبره للجميع
ميرى /مع ان نيره صاحبتي بس بجد برافوا عليك تستاهل
وقفلت ميرى مع ساهر
ميرى ونفين راحوا يزوروا رامى
رامى /مش عارف بجد اقولكم ايه على الزياره دى
نفين /انا اقولك ياعم تقول ايه؟
رامى /اتفضلي
نفين /قولهم يعملوا لنا شوية عصير سندوتشين فرختين محمرين 😂😂😂
رامى /عينيه الاتنين ليكم
ميرى /تسلم عيونك
صحصح كده بقا واسمعنى انا عملت اللى عليه وزحت لك ساهر من طريقك اتجدعن بقا وشد حيلك علشان نفرح بيك
رامى /ساهر عمره ماكان حاجز بينى وبين نيره
ميرى /ساهر كان حائط سد مش حاجز
المهم هترجع الجامعه امتى
رامى /اول خروجه ليه من هنا هتكون لبيت نيره
ميرى /هتروح تعمل ايه؟
رامى /لازم احضر شبكتها وقراءة الفاتحه
ميرى /بلاش تعمل كده يارامى
رامى /ليه
ميرى /المنظر مش هيكون لطيف وخصوصا ان باباها شاكك ان فيه حاجه بينكم
رامى /انا اخدت القرار
ده رقمي كلمنى عليه بالليل
انا همشى
يلا بينا يانفين
نفين وميرى مشيوا من عند رامى
ياترى رامى هيروح شبكة نيره ولا لا؟
نفين رجعت بيتها وميري راحت على بيت نيره
ميرى بتضرب الجرس
مامت نيره فتحت لها
ميرى /ازيك ياطنط
مامت نيره /اذيك ياحبيبتي
ميرى /نيره فين ياطنط
مامت نيره راحت مع باباها ياحبيبتي
ميرى هقولك سر وتخليه بينى وبينك
مامت نيره /قولى ياحبيبتي
ميرى حكت اللى حصل مع ساهرفى الجامعه واللى ساهر ناوى يعمله
وحلفتها انه يفضل سر ولكنها تعرف حاجه وتخلى كل حاجه تمشى زي ماهي
مامت نيره /انتى احلى واجمل اخت لنيره
ميرى /وانتى احسن واجمل ام بلاش تقولي لنيره ياطنط علشان كل حاجه تفضل ماشيه زي ماهي
مامت نيره /بس صعبانه عليه جدا
ميرى /اكيد هتصعب على الكل واحنا كلنا هنكون موجودين حواليها
مامت نيره /حاضر مش هقول لها حتى تكون مفاجاءه ليها
ميرى مشيت من بيت نيره
رامى اتصل بميرى بالليل
ميرى دار حديث طويل بينها وبين رامى
رامى بلغي نيره انى مش هاسيبه مهما كان
وتمر الايام
وييجى يوم الخميس
وتم التجهيز للحفل
في تمام الساعة السابعه
كان ولد نيره
اعد كل شيء وقام بتجهيز الحفل الساهر لاعلان خطوبة ابنته نيره على ساهر
وبداء المدعوين بالتوافد واحدا تلو الاخر والكل يبارك لوالد نيره والام
نيره كان ترتدى فستان الخطوبه بدموع وحزن
وبدات ميرى وبعض الاصدقاء محاولة تهدئتها
الزغاريد تملاء المكان والموسيقي والاغانى ترج ارجاء المنزل
هاتف المنزل يرن
مامت نيره تذهب للرد
اهل ساهر يعتذرون عن اتمام الخطوبه فساهر ليس موجود بالمنزل منذ ايام
الام تخبر الاب بماقاله اهل ساهر
الاب يقوم بالاتصال بوالد ساهر
والد ساهر يحاول الاعتذار
والد نيره غاضب جدا
والد نيره يقف في وسط المعازيم
ياجماعه انا اسف العريس حصل عندهم ظروف منعتهم من الحضور
المعازيم يتمتمون
العريس هرب
ولاايه اللى حصل؟
على باب المنزل رامى يقف وينتظر الاذن بالدخول
احد الاعمام تفضل يابنى ادخل
رامى يدخل المنزل
والد نيره يرى رامى
رامى يتجه نحوه
رامى/ الف مبروك ياعمى
والد نيره/ ايه اللي جابك هنا؟
رامى/ انا ضيف في بيتك وجاي مدعو
والد نيره/ مين اللي دعاك؟
الام تذهب الى الاب
انا اللى دعيته
انت سايب المصيبه اللى احنا فيها وبتدور مين اللي عزمه
الاب يحاول كتم غضبه
الام /اتفضل يابنى وكتر الف خيرك على اللى عملته مع نيره
رامى/ مافيش داعي للكلام ده يا امى
رامى يلقي السلام على الرجال المتواجدين
نيره تنظر اليه نظرة اعجاب
رامي بعد مايعرف ان العريس مش جاي يقوم بالاستاذان ويهم بالخروج
ميرى ونفين والجميع ينظرون الى رامى وهو يخرج
نيره مبتسمه وتقوم باحتضان ميرى وهي سعيده
نيره دخلت تقلع الفستان
ميرى /انا كنت عارفه ان ساهر مش جاي وماما كمان عارفه
نيره/ انتى عارفه وسيبانى هموت من الخوف؟
ميرى /كان لازم اعمل كده علشان كل حاجه تكون طبيعيه ومافيش حد يلاحظ حاجه
نفين /بما ان بقا مافيش عربس يبقي مافيش اكل وانا هموت من الجوع 😂😂
نيره /دانا هنزل اشترى ليكي خروف دلوقتي 😂
نفين /يلا بسرعه من عند الحاتى 😂
الام دخلت عليهم
الام /عايزه ابتسامتك دى تدريها ادامك بابا ومثلي انك زعلانه
نيره تحضن مامتها وتقولها شكرا ياماما على كل حاجه عملتيها علشانى
الام /انتى بنتى ومافيش حاجه في الدنيا اغلى منك
نفين /فيه ياطنط الاغلى منها
الام /لا مفيش
نفين /بقولك فيه ياطنط صدقينى
الام /ايه الاغلى منها؟
نفين /كيلو لحمه بتلو مع حتتتين ريش مع شويه ضانى لوزنت بنتك وبعتيها بالكيلو مش هتجيب سعر الحاجه دي 😂😂
الام بتضحك هو انتي مابتفكربش غير في الاكل
نفين /الاكل ده ياطنط حاجه جميله جدا مافيش الذ واطعم منه 😂
الام بتخرج هي وميري
نيره قاعده هي ونفين في الاوضه
المعازيم مشيت
الاب بينادى على نيره
نيره /نعم يابابا
الاب /ماتزعليش بكره هجوزك سيد سيده
نيره /حصل خير يابابا وكويس ان ربنا عمل كده
ياريت يابابا تاجل شويه موضوع الجواز ده علشان الامتحانات
الاب /وقت ماييجى لك عدلك هتتجوزى
الام/ يلا تعالى اتعشى معانا
الاب /ماليش نفس اتعشوا انتم
نفين /خلاص ياعمى انا هاكل ليه وليك 😂
الاب بيبص لنفين ويبتسم
نفين/قعدت على السفره استنوا مافيش حد يمد ايده هاخد حقي وحق عمى الاول 😂
الام وميري ونيره بيضحكوا
ميرى بعد العشاء دخلت مع نيره اوضتها
ميرى بترن على رامى
ميرى بتحط التليفون على ودن نيره
رامى /الو
نيره /الو
رامى /نيره
نيره /ايوه
رامى /بحبك
نيره /وانا كمان يارامى هتروح الجامعه امتى؟
رامى /باذن الله من بداية الاسبوع
نيره /ماتتصورش اد ايه يارامى لما شوفتك النهارده كنت فرحانه جدا
رامى /انا اول يوم اخرج من البيت النهارده
نيره /شوفت اللي حصل النهارده؟
رامى /وعارف ان ده هيحصل من يوم ماهنتيه في الجامعه
نيره /عرفت منين؟
رامى /من ميرى
نيره /على كده انا اخر واحده تعرف
رامى /المهم انه حصل
نيره/ تصبح على خير
رامى /وانتي من اهل الخير
ميرى اخدت التليفون وطالعه من الاوضه
نيره /ايه اللي خلاكى تتصلي ب رامى في الوقت ده؟
ميرى رجعت وقفت ادامها وقالت لها
انا اه اتصلت بيه مش انا اللي فكرت في كده
نيره /امال مين؟
ميرى /اكتر واحده محتاجه تشوفك سعيده
نيره /قصدك ماما
ميرى بصت لها وابتسمت وخرجت من الاوضه
مشيت ميرى ونفين
ونيره نامت في سريرها وسرحت بخيالها
فى رامى
اايه بقا اللي هيحصل بعدكده؟
الجزء السادس
خطوات على الزجاج
نيره ونفين وميرى
قاعدين في كافيه الجامعه
رامى رجع الجامعه من جديد دخل الكافيه
نيره اول ماشافته كانت عايزه تقوم تاخده بالحضن
رامى سلم على الكل
واستاذن من ميرى ونفين وخرج هو ونيره
نيره /ليه خرجنا بره ماكنا قعدنا في الكافيه؟
رامى /معلش انا مابحبش الاماكن المغلقه وعايز اتكلم معاكي
نيره /اتكلم يارامى
رامى /انا السنين اللي فاتت دي كنت كل لحظه بتمنى اقرب منك واقولك بحبك بس كان فيه حاجات كتيره منعانى انى اعمل كده؟
نيره /حاجات زي ايه؟
رامى /بسم الله ماشاء الله لبسك ومنظره يدل على انك بنت عز وانا انسان على ادى
نيره /الحب مالوش دعوه بفقير وغنى يارامى
رامى /ده يمكن يكون في نظرك انتى ونظر كل اتنين بيحبوا بعض لكن في نظر ناس تانيه ماينفعش الحب ده
نيره /وايه تانى اللى كان مانعك؟
رامى /انا من اول سنه وانا بحبك قلت لنفسي قبل ماتفكر تنطق الكلمه دي لازم تكون عندك المقدره وتكون شبه جاهز علشان لو اتقدملك اكون جدير بيكى
نيره /بتحبنى كل السنين دي وساكت
رامى /لازم اسكت ياحبيبتي
نيره /كنت بستغرب قعدتك لوحدك وانت بتبص علينا كنت بحس بحاجه غريبه بتحصلي لما بشوفك ماكنتش بقدر اتكلم واقول اي حاجه بس كنت ببقى سعيده جدا
رامى /ماما تعرف اللى بينا؟
نيره /ايوه تعرف كل حاجه
رامى /نفسي توصلي ليها الرساله دي
نيره /رسالة ايه؟
رامى /انتى امى بعد امى الله يرحمها شكرا
لوقفتك جمبي شكرا ليكى جدا انك خلفتى اجمل وارق نيره في الدنيا كلها
نيره ورامى بيتبادلوا الحب
ساهر داخل الجامعه شافهم الاتنين واقفين مع بعض
ساهر وقف يبص لنيره
نيره صامده ومنزلتش عينيها
رامى بيبص ناحية الكافيه
ميرى طالعه بتجرى
نفين طالعه وراها
رامى بيسال نفين فيه ايه؟
نفين /مشكله مع واحده صاحبتنا
رامى ساب نيره ونفين وطلع جري وراء ميرى
رامى شاف واحد بيتخانق مع بنت
رامى اتدخل
رامى /مش من الرجوله انك تمسك بنت كده ايه هو انت ماتعلمتش المرجله
الشاب بيتخانق معاه
رامى اتعور فى دماغه
امن الجامعه اتدخل والمشكله اتحلت
نيره /ايه اللي خلاك تتدخل يارامى؟
رامى /كان لازم اتدخل ماينفعش اشوف بنت بتتهان وحد ماسك فيها واسكت
نيره /كنت اتفرج زي اللي بيتفرجوا وماتجيبش لنفسك المشاكل والكلام
رامى /لو كل واحد فينا سكت يبقي مالهاش لازمه الرجوله
نيره /دلوقتي تتحرم من دخول الجامعه
رامى /مش فارقه
ميرى /اهدى يانيره انا مش بشهد لرامى ولا حاجه بس اللي رامى عمله صح فاكره يوم الشنطه رامى قال ايه لماسالته لوانا اللى حصل لى كده كنت هتعمل ايه؟
فاكره رده عليه؟
نيره /ايوه فاكره
ميرى /اعتذرى لرامى
نيره /انا اسفه جدا
رامى /مافيش داعي للاسف خلاص
ميرى /خلاص ياعم بقي وخلي بالك من نيره
رامى/نيره في عينيه الاتنين
نيره /بقولك ايه انت وهي احنا خلاص الامتحانات على الابواب عايزين نركز شويه
نفين/ ايوه صح لازم نركز يلا يارامى نسيب نيره هنا ومانخليش الحب يعطلنا عن التركيز 😂😂😂
رامى /بس الحب مابيعطلش عن التركيز
نفين /ياعم بيعطل اسمع كلامى اتخن منك شويه يعرف عنك كتير 😂😂
رامى /انا كده خلاص لازم اصدقك
نيره /ابعد عنها شويه لاحسن تاكلك
نفين /ده مايعملش حاجه ده عامل زي خلة السنان يدوب يسلك الزور 😂😂😂
رامى /بقولكم ايه بقا انتم التلاته انا قررت اعمل حاجه
نفين /تبقى واد جدع لو عزمتنا على شوية سندوتشات 😂
ميرى /يخربيتك يامفجوعه ايه يانجم ناوى علي ايه؟
رامى /اتقدم لنيره
نيره سكتت
ميرى /انت الخبطه اثرت على دماغك ولا حاجه؟
رامى /لا انا بحب نيره ولازم ادخل البيت من بابه
نفين /قولى بقا امتى هتروح علشان اجى اكل جاتوه 😂
رامى بيبيص لنيره وبيسالها ساكته ليه؟
نيره /عايزنى اقول ايه؟
رامى /موافقه ولا لا؟
نيره /لو عليه هقولك تعالى نخرج من البوابه روح لبابا اخطبنى
رامى /امال فيه ايه؟
نيره /خايفه يارامى
رامى /ماتخافيش عايزك ماتفكربش غير في حاجه واحده بس انى مهما حصل مش هسيبك
ميرى /انت ممكن تعمل ليها مشاكل في البيت وخصوصا انها لازم تقول لباباها ان فيه واحد جاي يخطبنى علشان يحددلك ميعاد
رامى /لا هي مش هتقول حاجه انا كل اللي يلزمنى موافقتها وبس ولو قالت اه هعرف اوصل لباباها
نفين /ايوه روح نام لهم تحت البيت واول ماتلاقى باباها داخل قوله خد ياعمو هنا انا عايز اتجوز بنتك هيجوزها لك على طول 😂
رامى /موافقه ولا لا؟
نيره /موافقه بس مش تستنى حتى لما اقول لماما حتى علشان تمهدلك الدنيا عند بابا؟
رامى /لا مش عايز حد يتدخل عشان ماعملش مشاكل ليكم انتى ومامتك
نيره /ربنا يعمل اللى فيه الخير
اليوم عدى بسلام
واليوم التالى
رامى راح الجامعه وبعد ماخرج من الجامعه راح لوالد نيره مكتبه
رامى استاذن بالدخول
دخل رامى
والد نيره /اتفضل
رامى /شكرا لحضرتك
انا جاي اتقدم لنيره بنت حضرتك
الاب /اولا انا ماعنديش بنات للجواز
ثانيا ده مش مكان لطلب حاجه زي دى
ثالثا المفروض تاخد ميعاد
رابعا المفروض يعني اهلك هما اللى ييجوا يتقدموا
طلبك مرفوض اتفضل مع السلامه
رامى بص لوالد نيره وخرج
رامى اتصل بنيره في البيت
الام /االو
رامى /ازي حضرتك ياامى
الام /الحمدلله تمام يابنى
رامى /ممكن اكلم نيره ياطنط
الام /طيب معلش يارامى ممكن تكلمها كمان شويه
رامى /طيب ممكن حضرتك تبلغيها ان باباها رفض
الام /رفض ايه مش فاهمه؟
رامى/ انا اتقدمت لوالد نيره النهارده ورفض
الام /ركز بس في الامتحانات وربك هيحلها من عنده
رامى قفل السكه مع مامت نيره
مامت نيره بلغتها ان الاب رفض
نيره انهارت وفضلت تعيط
نيره /ليه رفضه ياماما؟
الام /اهدى شويه قوليلي عياطك وصريخك ده هيحل ايه ولاهيعمل ايه؟
نيره /انا لاهاكل ولاهشرب انا هموت نفسي
الام /اسمعينى بقا وفوقي لي
لازم تبانى طبيعيه ادام بابا علشان مايحسش ان فيه حاجه بينك وبين رامى وكل حاجه ليها حل
نيره /حل ايه ياماما وازاي؟
الام /دموعك دى تخلينى اعمل المستحيل عشان تعيشى سعيده في حياتك وانا مش هتخلى عنك انتي ورامى بس لما بابا ييجي يسالك قولى انك ماتعرفيش حاجه خالص عن موضوع ان رامى هيتقدملك
نيره /حاضر
الام خلصت كلام مع نيره
واتصلت بميرى
ميرى /ايوه ياطنط
مامت نيره /اتصلي برامى وقوليله انى عايزه اقابله وحددوا المكان وكلمينى
ميرى /خير ياطنط فيه ايه؟
مامت نيره /اما نتقابل هتعرفي والد نيره رفض رامى
ميرى /كنت متاكده ان ده هيحصل بس مارضيتش احبطه
مامت نيره / حددى الميعاد مع رامى وكلمينى
يتبع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
جميع الروايات كامله من هنا 👇 ❤️ 👇
اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇
❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺
تعليقات
إرسال تعليق