رواية بنت الغلابه الحلقه الاولي بقلم الكاتب محمد منصور منص حصريه وجديده

 رواية بنت الغلابه الحلقه الاولى بقلم الكاتب محمد منصور منص حصريه وجديده 

ما كنتش احب اني اطلع احكي حكاية امي  واقول اللي هي عملته بعد ما حبيبها سابها طيب هو سابها ليه ولية هو اللي رباني بعد موتها 

حكاية صعبة لكن حقيقية دة علي لسان بنت صاحبة الحكاية لان صاحبتها ماتت  وانتو اللي هتقرو وتحكموا. دي فعلا حكاية حقيقية

ح(1)

من جوة اوضة نوم معالي البنت اللي عندها 25 سنة تقعد علي السرير و قصاد منها راجل في اواخر الخمسينات من عمره ودة يبقي الدكتور عبد الله وكانت معالي بتقول

ايوة بقي يا سي بابا ممكن تحكي لي حكاية امي معالي 

عبد الله

انتي زنانه اوي

معالي

ما انا مش هسكت الا لما اعرف لية سيبت ماما وما اتجوزتهاش  ولية ربتني 

عبد الله

الكلام في الماضي اوقات بيسيب جوة مننا وجع ما نقدرش نتعالج منه

معالي

ما تقلقش عليه انا جامدة ومهما انت كنت وحش زمان مع امي.  ف انا مش هقدر انسي كل اللي انت عملته معايا

عبد الله

وهفضل بالنسبة لك بابا عبد الله

معالي

هتفضل بابا عبد الله

عبد الله

طالما كدة. يبقي هحكي لك،،،

ومن هنا بدات الحكاية 

مستوحاة من احداث حقيقية

بنت الغلابة 

كتابة واقتباس

محمد منصور.  

منص

وقبل ما نبدا نوحد الله ونصلي علي رسول الله

صلاة تحل بيها العقد وتفك بيها الكرب

من جوة المستشفي العام  بطنطا من 27 سنة فاتو.. كان في ممرضة طيبة جدا 

و قمورة جدا. اسمها معالي.  معالي دي كانت تقريبا مخطوبة ل دكتور معاها في المستشفي ودة يبقي

 عبد الله وكان عبد الله بيحب معالي اوي وكان ديما قريب منها وبيعمل لها اي حاجة تفرحها من قبل حتي من تطلبها.  لغاية ما جه يوم الحال بقي غير الحال 

وعبد الله  وقف قصاد معالي وقال لها 

انا مش هنفع اكون ليكي

وبعد ماقال عبد الله كدة هربت دمعه من عيون معالي وقالت

لية بتقول كدة انا زعلتك في حاجة

عبد الله

انتي عارفة ان اختي داخلة علي الثلاثين ومش حلوة اوي وجالها عريس بس شرط علشان الجوازة تتم اتجوز اخته وعلشان كمان في مشروع بين بابا والراجل دة اللي داخل براس المال يعني لو قولت لا كل حاجة هتبوظ وهبقي انا السبب

معالي مسحت دموعها وقالت

فكرت في اختك وفي ابوك لكن انا لا.

عبد الله 

لا. يا معالي مش كدة بس انا والله مش عارف اعمل اية

معالي

عملت الصح دوست علي اضعف واحدة دوست عليا علشان انا بنت الغلابة.  

عبد الله

معالي ان،،،،،،

لكنه سكت لان معالي سابته ومشيت وفضل عبد الله واقف مش عارف يسامح نفسه ،،،،،،،

ويتغير المشهد ونشوف معالي في اوضة التمريض قاعدة مع سماح  المديرة بتاعتها اللي بعد ما عرفت اللي قاله عبد الله قامت وقفت وقالت

انا لازم اروح اتكلم مع. دة انتو في حكم المخطوبين والمستشفي كلها عارفين باللي بينك وبينه

معالي اللي مفحومة من العياط قالت

بالله عليكي لا. انا اتكلمت معاكي علشان افضفض عن نفسي مش اكتر لكن خلاص اللي بيني وبين عبد الله خلص

سماح

طيب كفاية عياط انتي عارفة اني بعتبرك زي بنتي وما حبش اشوفك كدة

معالي

انا هبقي كويسة مش هموت يعني علشان هو سابني. وبعدين انا اصلا كنت غلطانه لما صدقت ان دكتور زي عبد الله ابن الحسب والنسب يتجوز ممرضة زيي بنت ناس غلابه ابوها بواب وامها عاملة نظافة في حضانه

سماح

دة يبقي نهاره اسود معايا 

لو سابك علشان كدة فعلا دة انتي احسن بنت في المستشفي. وبعدين هما مالهم الممرضات مش بني ادميين ومن حقهم يحبو ويتحبو ويتجوزو 

معالي

من حقنا نتجوز اللي من توبنا انما اللي زي عبد الله صعب شوية. الله يسهل له انا هعمل نفسي مصدقة انه بيضحي بيا علشان اخته متباقش بايرا. وهعمل نفسي مصدقة اني اقدر اعيش من غيره،،،،،،،،،

ويتغير المشهد ونشوف 

عبد الله. رجع الشقة اللي عايش فيها مع ابوه وامه واخته وكان باين عليه الحزن الشديد وشافته اخته زبيدة وندهت عليه لكنه ما ردتش

ودخل اوضة وقامت زبيدة وراء منه ودخلت وراء وهي بتقول بهزار 

انت يا عم انا بنادي علية رد عليا

بص لها وابتسم وقال

معلش يا زبيدة والله ما خد بالي 

رغم ابتسامة عبد الله لكن الحزن كان باين عليه فقربت منه زبيدة وقالت

مالك

عبد الله

مافيش. بس الشغل كان كتير النهاردة

زبيدة

الشغل ولا في حاجة تانية

عبد الله

لا. الشغل

زبيدة

لو جوازك من بنت صاحب بابا استاذ عمر. مضايقك بلاش تعمل حاجة غصب عنك علشان جوازتي انا تتم

عبد الله

لية بس بتقولي كدة انا فرحتي بانك هتتجوزي فرحة عمري ما حسيت بيها قبل كدة

زبيدة عيطت وقالت

مش ذنبي اني وحشة علشان اتجوز بالشكل دة.

عبد الله راح خدها في حضنه وطبطب عليها بمنتهي الحنية وقال

مين دي اللي وحشة دة انتي قمر واحلي بت في الدنيا انتي يا زبيدة

زبيدة

تعرف اني بحبك اوي. ومقدرة اللي انت بتعمله علشاني 

عبد الله

وبعدين بقي كلامك ملهوش لزمة.

ومسح دموعها وقال

وبطلي عياط بقي انتي عارفة دموعك بتعمل فيا اية

مسحت زبيدة دموعها وقالت

هسيبك تغير واروح انا اسخن الاكل لغاية ما بابا وماما يرجعو من الشغل

وخرجت زبيدة وعبد الله راح ناحية رف عليه كتب طبية كتير ما انا نسيت اقول لكم ان عبد الله دكتور نساء وولادة .  المهم فتح الكتاب وبص لصورة معالي اللي كانت مزينه الكتاب ونزلت دموعه من عيونه وقال للصورة

حقك عليه.  يا احلي حاجة حصلت في حياتي ،،،،،،،  

وتاني يوم يروح عبد الله المستشفي ويدور علي معالي بين كل الممرضات الموجودين لكنها ما كنتش موجودة سال عليها مديرة قسم التمريض سماح. فرديت عليه سماح بحدة وقالت

وانت بتسال عليها لية

عبد الله باحراج

مش المفروض انها اللي معايا في الاستقبال زي كل يوم

سماح

طلبت تكون في الطوارئ علي طول

عبد الله

ازاي تعمل كدة وهي عارفة اني ما بعرفش اشتغل من غيرها

سماح

هتتعود تشتغل من غيرها

ولسة هتمشي سماح فقال لها عبد الله

سماح

وقفت سماح وقالت

نعم

عبد الله

باين اوي من طريقة كلامك معايا انك عرفتي باللي حصل بيني وبين معالي امبارح

سماح

عرفت وبصراحة انت زي ابني ما تزعلش مني. لكنك نزلت من نظري اوي

عبد الله

طالما وصلت ل كدة يبقي بلاش نتكلم احسن

وسابها عبد الله ومشي فقالت سماح لنفسها

نفسي مرة اقابل راجل يطلع نفسه غلطان. ،،،،،،،،

بعد اللي حصل دة ب تلت شهور بالظبط. معالي هتتجوز عارفين اتجوزت مين خطيب زبيدة. طيب ازاي دة حصل. بكرة باذن الله هقول لكم

اللي بيحب ربنا يعلق. دي لو عجبتكم. سلام

تابعووووني 

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم