رواية الخطيئه المئه البارت السابع والثامن بقلم أمل أحمد سلوم حصريه وجديده
صحيت من نومها بكير وهيه حاسه حالها نشيطه ومفعمه بالحيويه .. كيف لا وهيه اجاها بالليل خبر انه الشرطه لقيت راما
فاتت عالحمام اخدت شاور وطلعت نشفت حالها وسشورت شعرها الاجعد ولبست حجابها وجلبابها وطلعت على جامعتها
…… .
ـ بالحرم الجامعي ــ
رنيم : السلام عليكم صبايا كيفكم
يارا ونهال : وعليكم السلام اهلين رمروم
نهال : شووو رمروم شايفه وشك عم يضحك
رنيم : ههههههه ايه مبسوطه كتير
يارا : اللهم اجعله خير هاتي ابسطينا معك
لوت تمها بعجرفه وهي عم تعطيهم ضهرها
رنيم : مسائل عائليه ما الكم فيها يالله السلام عليكم
نهال : لاحول ولا قوة إلا بالله
يارا : العمااا شو حكينا
نهال : انسيكي منها وحده مغروره وشايفه حالها…
يارا : من تواضع لله رفعه
نهال : اي تواضع هاد لك مستغربه كيف وحده متعجرفه بتفوت شريعه لتدرس دين… لك الدين اخلاق
 |
ربنا حكا بالقرآن الكريم ..(( وَلَوْ كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ )) صدق الله العظيم
يارا : صدق الله العظيم خلص انسي بلا ماينحسب علينا عم نغتابها الله يصلحها
نهال : امين يارب العالمين
يارا : يالله عالمحاضره احسن شي
نهال : يالله
┬──┬┬──┬
قاعد عالسفره مهموم وعم يفكر براما وشو ممكن يصير معها
ام جواد : شبك ابني
بيان : اكيد عم يفكر بقصة راما ماهيك اخي
هز راسه بتعب واخد نفس عميق وقام عن السفره
ام جواد : ما اكلت شي حبيبي
جاد : مالي نفس امي
ام جاد : برضاي عليك تجي تاكول وراما ربها مارح ينساها
جاد : تكرمي امي رح اكول بس مو هلأ … صحيح وينو زياد
بيان : متل العاده نايم
جاد : سهر طول الليل ونوم بالنهار هاد ايمت رح يعقل ويركز انا طالع شوفو
……
زياد اخو جاد الصغير شب طايش ومتهور اتعرف على شله هامله وجروه معهم ب اعمالهم الوسخه من شرب ودخان ونسوان……
…… ..
دخل جاد لعند زياد وفتح الستاير بقوه وهو عم يصرخ : لك زيااااااد فيق يالله عاوزك
ارتعب زياد من صوت جاد وقعد على اربعته بنص التخت
زياد : شوو في شوو في
جاد : شووو في لك انت ايمت بدك تركن وتحط عقلك براسك اااه كم مره قلتلك الشله الهامله يلي ماشي معها بتختصرها عالاخر
زياد : لك شو فيها ازا تسليت شوي مع رفقاتي
جاد : الرفيق السيئ بيجر صاحبه معه لك اخي مابيكفي جامعتك وتركتها وقاعد بلا شغل عم تاخد مصروفك مني ومن امك
زياد : يلي بيسمعك بيحكي انا بحاجة شغل .. الحمد لله عنا مال مابتاكلو النيران وبيوت وعقارات وشركات لشو بدك عزب حالي بالشغل
جاد بعصبيه ; لان الشغل عباده ياغببي الرسول صل الله عليه وسلم كان يشتغل
زياد : عليه الصلاة والسلام.. خلص سلمني وحده من الشركات
جاد : هههههه لا والله عنجد لحتى اتبيعها وتخرب سمعتنا بالسوق
زياد : احترت معك اخي بدك اشتغل ولا لا
جاد : قوم غسل وجهك والحقني لتحت بسرعه
زياد وهو عم يتثاوب : ايه لاحقك اخي
جاد : دقيقتين وبتكون مزروع قدامي عالسفره
زياد : طيب طيب يالله جايي
قام غسل وجهو ولبس بلطلون قطني رمادي وتسيشرت ابيض ونزل عالصاله وهو عم يتثاوب
زياد : هااااااااخ صباح الخير
بيان : احكي مسا الخير اخي قرب يئدن العصر
زياد : وليش غداكم اليوم متأخر وسحب كرسيه وقعد وبلش ياكول
ام جاد : لك ابني لايمت بدك تبقى على هالحاله
زياد : كرمال الله امي لاتبلشي فيي انتي كمان
جاد : احكي مع امك بأدب ولااا
نزل عينه بصحنه وبلع السانه
جاد : يازياد انا وامك واختك حابين نشوفك احسن واحد بالدنيا
زياد : خلص اخي بوعدك الاقي شغل بعيد عن شركات ابي واشتغل منيح هيك
جاد : لا مو منيح
زياد : لكان شو بدك اخي
جاد : انت باقيلك سنه وبتخلص جامعه ليش ماتحط عقلك براسك وترجع لجامعتك
ام جاد : اي والله ابني فكره حلوه
بيان : وانا من رأيهم اخي والله الشهاده بهالزمن سلاح للبنت والشب
حك راسه وهو عم يقلب الفكره براسه
زياد : ماشي موافق بس بغير التخصص
بيان : بدك احسن من قسم الشريعه الاسلاميه
زياد : والله هاد شرطي .. انا دخلت قسم شريعه كرمالكم ومالقيت حالي فيه لهيك مارح انجح فخلص خلوني براحتي اختار يلي بيناسبني هالمره
جاد : وشو حابب تتخصص
زياد بثقه : ادارة اعمال… شو رأيك اخي
هز راسه ب اعجاب ووافق على فكرة زياد لانه حابب يتعلم شي يستفيد منه بالمستقبل
زياد : دايمه انا بدي روح مشوار ومابتأخر
ام جاد : مابينت ساعتي يلي عطيتك ياها لتصلحها
زياد ب ارتباك : اه للا لا مابينت… . يمكن حطيتها بشي مطرح ونسيت رح ارجع دور عليها يالله سلام عليكم
الكل : وعليكم السلام
┬──┬┬──┬┬──┬┬──┬
مرق اسبوعين وراما على وضعها بالمشفى ماعم تتزكر شي
الضابط : اي دكتور كيف وضعها هلأ
الدكتور : البنت اكله ضربه قويه عراسها افقدتها ذاكرتها وعدا عن هيك في ورم براسها
الضابط : ورم ؟؟ قصدك كانسر ؟؟
الدكتور : للاسف اي بس لساتو بمراحله الاولى وفينا نعملا عمليه ونستئصلو
الضابط : انا مهمتي اخدها وحقق معها
الدكتور : شو بدك تحقق مع وحده فاقده للذاكره ؟؟
الضابط : قصدك مافي امل تتجاوب معي بالتحقيق
الدكتور : بنوب
الضابط : لكن رح استدعي زوج امها وحطو بالصوره وهو بيقرر يستمر بالشكوى او بيسقط. حقه عنها
الدكتور : خليه يمر لعندي وانا بشرحله الوضع
الضابط ; تمام
┬──┬┬──┬
حسين.: اهلا حضرة الضابط .… . شلون !! كانسر ؟؟؟…… اي فهمت عليك……… . ماشي حضرة الضابط انا هلأ رح اطلع عالمشفى وشوف الدكتور…… .. احترامي… الله معك
… ..
نزلت المعلقه من ايدها وهي بتطلع ب ابوها ب استغراب
رنيم : شو في بابا مين معه كانسر
حسين : راما
رنيم : عنججججد 😃
حسين : شبك هيك فرحتي
رنيم : وبددددي طيررر من الفرحه
ووقفت وبلشت تفتل حوالين حالها
رنيم : الله كبيررر الله كبيرررر هي خطية امي ياللي دبحتها الله كبيررررر
غص حسين وماعرف يرد عليها… مسح تمه وقام لغرفته لبس وطلع بوجهه عالمشفى
┬──┬┬──┬
كانت متل الملاك نايمه بهدوء بتختها عم تتأمل بخيالها صوت العصافير يلي جاي من بره
…
دق دق ..
الدكتور عمر : كيفك انسه راما
راما : الحمد لله بس مليت من هالنومه حاسه بدني مكسر
الدكتور عمر : هانت هانت كلا كم يوم وبتطلعي من هون اكيد اشتقتي لامك
راما : امي ؟؟
الدكتور : اي امك ماشتقتيلا… ..وبقلبه ((والله هيه هذه نفس البنت يلي اجت لعندي من سنين طويلة مستحيل انساها ))
رجعت الاصوات الغريبه ترن بذهن راما ولقطات سريعه بتمر بمخيلتها
امييييي لااا لاتموتي اميييي
انتي قتلتيهاااا
انا بريه يامووو والله بريه ياموووووو
نفضت حالها وحطت ايديها التنين عراسها وصارت تضغط عليه بقوه
راما : اااااااااه ااااااااااااه
الدكتور عمر : شو صرررلك .. يا سستر جيبلي ابرة مهدأ بسرعه
اعطاها ابرة مهدأ وبلشت اعصابها ترتخي وغمضت عيونها بسلام واستكانت
وقف قبالها وهو متردد وبعد تفكير مد ايدو وكشف عن بطنها وشاف مكان العمليه… . لمعت عيونو وطلب من الممرضه تجيبلو جهاز كشف الحوامل لغرفة راما……
الدكتور عمر : متل ماتوقعت هي هيه نفس البنت يلي عملا الدكتور جمال عملية استئصال رحم… .
بيندق الباب وبيفوت حسين وهو عم يطلع براما بطرف عينه وخايف ترجعلا زاكرتها وتعرف انه اشتكى عليها بوقتها رح تحكي للشرطه كل شي عمله وكيف قتل امها
حسين : طمني كيف صارت دكتور
الدكتور عمر وهو عم يتفحص وجه حسين : حضرتك زوج امها
حسين بخوف : اي ايه انا
الدكتور عمر : تفضل معي عالمكتب لو سمحت
……
┬──┬┬──┬┬──┬
قعد حسين مع الدكتور بمكتبه ودقات قلبه عم تتسارع من الخوف
الدكتور عمر : يمكن وصلك خبر انه الانسه راما عندها كانسر
حسين : ايه عرفت… ياترى في امل تشفى وتتعالج
الدكتور عمر : اكيد الو علاج حاليا خصوصي انه بمراحله الاولى وبعمليه وحده فينا نستأصل الورم لانه حميد
حسين : ايوه حميد قلتلي طيب ولو ماعملت العمليه في احتمال تموت
الدكتور عمر : الاعمار بيد الله ونسبة الموت بسبب الورم 70%
حسين : ايه… لكن رح نعملا العمليه
الدكتور عمر : والشكوى
حسين : لا موضوع الشكوى منتهي رح حلو بطريقتي انا خلص سامحتها واكيد فقدان ذاكرتها ومرضها اكبر عقاب الها… .
الدكتور عمر : انت قلبك كبير بارك الله فيك
حسين : تسلم دكتور صحيح راما بنت مرتي بس يشهد ربي عليي انها متل بنتي واعز
الدكتور عمر بمكر : بدي اسألك… . ام راما وينها ؟؟
حسين : عطتك عمرها من سنين
الدكتور عمر : كم كان عمر راما وقت توفت امها.
حسين : 14 سنه
الدكتور عمر : وراما متزوجه شي
اتلعثم حسين وبلش يتصبب عرق
للا لا مو متزوجه ليش عم تسأل
الدكتور عمر : ابدا بس لحتى اعرف اتعامل معها بوضعها الجديد
حسين : انت متأكد انه زاكرتا مارح ترجعلا
رجع عالكرسي وشبك ايديه ببعض وهو عم يحاول يشتت تفكير حسين بكلامه
شوف سيد حسين عالاغلب الورم يلي براسها عم يأثر عالجهاز العصبي وبيضرب على جزء معين من الدماغ ويلي بيكون وظيفته حفظ الذكريات
حسين : قصدك انه بس تعمل العمليه بترجعلا زاكرتا
الدكتور عمر بخبث : عالاغلب ايه
حسين بقلبه : العماااا على هالمصيبه
ايه طيب دكتور شكرا الك يعطيك العافية فيني خرجها ماهيك
الدكتور عمر : اي بس انتبه مالازم تتعرض لاي توتر
حسين : من هالناحية اطمن 😏
طلع حسين وهو يتوعد لراما…
ازا المصاري مابترجع رح تكون حياتك الثمن يابنت الكلب
☆☆
ايها اللعين ايها الكاذب بأي لسانا واي دينا تقسم بأن فريستك كانت كالابنه لك تبت يداك على ما اقترفت ايها الكاذب اللعين… . حقا انت كما قيل… يقتل القتيل ويمشي بالجنازه لست سوى شيطان بصورة انسان
☆☆
مر اسبوع وحسين حل كل شي مع الشرطه واسقط. حقه عن راما ولحتى يضمن انها ماتنحبس حق عام حكى بالتحقيق انه المجوهرات يلي لقيوهم مع راما هنه بالاصل الها بس هو غلط. بين مجوهرات بنته يلي نسرقت ومجوهرات راما
وبهيك راما طلعت من المشفى لبيت حسين من جديد بس بذاكره معدومه واحساس بالخوف من المستقبل !!!!
ياترى شو بعد مخبيه الاقدار لراما
♬♫♪◖(● o ●)◗♪♫♬
#يتبع
♬♫♪◖(● o ●)◗♪♫♬
#الخطيئه_المئه
#امل_احمد_سلوم
#الجزء_الثامن
وصلو عالبيت وراما عم تتلفت حواليها ب استغراب
حسين : شرفي فوتي
راما : لوين جبتني
حسين : انقبري فوتي وبلا كترة حكي
وقفت راما مكانها وحست بخوف داخلها… كان قلبها عم يخفق بطريقه غريبه وحاسه ب احساس ماعم تحسن تفسرو
راما : لوين فوت بيت مين هاد
حسين : اسمعي ولي انا لهلأ ماسك حالي عنك بالزور فأحسلك اسمعي الكلمه بلا ماطالع جناني عليكي وانتي بتعرفي حسين بس يجن شو بيعمل
بلعت ريقها ورجعت خطوه لورى : ا انت مين وليش جايبني لهون
مسكها من زندها وكز ع اسنانه
حسين : حاج تلعبي هالدور خصوصا معي انا حسين يلي مابيلتعب معه وازا كنتي ناسيه بزكرك مين حسين
راما : والله ماعم اتزكر شي
عصب منها ودفشها لجوات البيت ووقعت عالارض
راما : اااااه الله ياخدك ياحيوان
مسك شعرها ورفع راسها وهو عم يصرخ فيها
حسين : عيدي شو قلتلي ماسمعت عيدي لشوف 😡
راما : تركني تركني ااااه يا امي
… .
هلأ لتزكرتي انه الك ام
اطلعت بعيون باكيه بإتجاه الصوت لتشوف رنيم واقفه قبالها وهي متكتفه وعم تطلع فيها بغرور واحتقار
راما : مـ مين انت
رنيم : هه انا قدرك الاسود
راما : انتو شو بدكم مني ليش جبتوني لهون
حسين : شووو بدنا منك ههههههه سلامتك راما خانوم مابدنا غير سلامتك وضربها اول كف ولحقو بالتاني والتالت ورنيم واقفه تتفرج ومبسوطه
راما : ااه اااه يا ياامووو اااه
مسكها من كتافها وبلش يهز فيها وهي تترنح بين ايديه
حسين : ووووين المصاري والمجوهرات ولي احكي وينن قبل ماطالع روحك هلأ
راما : مـ مبعرف عـ عن شو بتحكي
حسين : ولسه بتكزبي كمان
ورجع ضربها كف ورا كف وعيونو عم تقدح شرار
احكيييييي وين رحتي بالمصاري والمجوهرات وليييي احكيييييي
مسكت راما راسها بقوه وبلشت تصرخ
راما : مااااابعرررررف ماااعم اتزززكررر شييي ااااااه رااااسي ااااه ياااااااامووووووو
وقعت عالارض وفقدت وعيها
رنيم : حاج بابا اتركا هلأ
حسين : لك شو صرلا هي
رنيم بعدم مبالاه : هه بتكون عم تمثل
نزل لعندها وبلش يضرب ع خدودها لتفيق بس راما كانت فاقده الاحساس تماما
حسين : هاتيلي كاسة مي رنيم
رنيم : يابابا عم قلك انها عم تمثل حتى شوف… وركتلها بقوه ببطنها وراما ساكنه بمكانها وكأنها ميته
رجعت رنيم خطوه لورى وحطت ايدها عتمها بخوف
حسين : هاااااتي كاسة مي بسرررعه
ركضت عالمطبخ جابت كاسة مي وناولتها لحسين يلي بلش يرش وجه راما لتفيق بس ماكانت تحس على شي
رنيم : شـ شو صرلا
مسح جبينه بخوف ومسك موبايلو بسرعه واتصل عالدكتور يلي كان بيتابع حالة راما بالمشفى
ـــ الو… مرحبا دكتور عمر انا حسين الشامي عم. راما يلي طلعت اليوم من المشفى… ايه دكتور ممكن تجي تشوفها… . مابعرف فجأه صارت تصرخ وحطت ايدها عراسها وغابت عن الوعي… .. شلون… .. لا ابدا ماحدا زعجها… . ايه ايه تمام ناطرك دكتور خود عندك العنوان….. الله معك ))… ..
┬──┬┬──┬
ــ وبالمستشفى ــ
الدكتور عمر: الضاهر الانسه راما رجعت تعبت
جاد : مين كان عم يحكي معك
الدكتور عمر : هاد بيكون زوج امها
جاد : يلي سرقته ؟؟
الدكتور عمر : لا طلع الموضوع فيه خربطه… صحيح انت كنت جاي لتطمن على راما شو رأيك تجي معي
جاد : مممم بصفتي شو
الدكتور عمر : الممرض المساعد تبعي ههه
جاد : هههه فكره حلوه لكان يالله لنروح
الدكتور عمر: تمام بس لجيب شنتايتي
جاد : دكتور عمر
التفت الدكتور عمر ناح جاد : اي جاد
جاد : ليش. حاسك بتعرفها لراما من قبل
الدكتور عمر : وليش عم يراودك هيك احساس
جاد : اسلوبك بالتعامل معها وقت كانت بالمشفى كنت تعرف شو وجعها وشو علتها قبل ماتكشف عليها
فتل الدكتور عمر حالو ليتناول شنتته ووقف قدام جاد وحط ايدو ع كتفه : معك حق انا بعرفها لراما عز المعرفه
جاد : شلون ؟؟
الدكتور عمر : خلينا نروح هلأ وبعدين بفهمك كل شي
┬──┬┬──┬┬──┬
حملها بين ايديه المرتجفه وحطها بتختها وهو بيطلع بملامح وجهها الساكنه
حسين : لك الله لايوفقك بدك اتجيبلي مصيبه ويحسبوكي عليي بني ادم انا لازم اتأكد من موضوع فقدان زاكرتك وبعدا لكل حادث حديث
تركها وطلع لعند رنيم يلي كانت قاعده عالكنبه ومتكوره عحالها
حسين : شبك بابا
رنيم : خفت تموت عنا
حسين : اي ماتخافي هي متل القط بسبع ارواح
رنيم : وهلأ شو ناوي تعمل بابا
حسين : بالاول خليني اتأكد من حكاية فقدان زاكرتها وافهم من الدكتور عمر حالتها بالزبط وازا في امل ترجعلا زاكرتها او لا
رنيم : بابا انت من عقلك عم تحكي
حسين : شلون مافهمت
رنيم : حاسه انه هالدكتور كزاب ومو بعيده يكون عشيقها لراما ومتفقين سوا لسرقة المصاري وموضوع فقدان زاكرتها
ضيق عيونو وهو صافن بكلام رنيم وبين عملامحه انه كلامها فات براسه
حسين : لك والله كأني شايفه لهاد الدكتور قبل هيك بس مابعرف وين
رنيم : لازم تتأكد بابا هي وحده ملعونه ممكن تعمل اي شي لتأزينا نسيت شلون قتلت امي بدم بارد
فرك جبينه بعصبيه وهو يحكي
حسين : لك الدكتور عمر شكلو بالاربعين
رنيم : ليش هاي الوسخه بتوفر شب ولاختيار
ايه معك حق انا لازم اتأكد من موضوع مرضها وفقدان زاكرتها وازا كلامك صح رح اشرب من دم راما والدكتور تبعها
رنيم : بشو عم تفكر
حسين : رح اطلب من صاحبي الدكتور جمال يجي ويكشف عليها وياويلها ازا كانت عم تمثل عليي والله لاعدمها حالها والله
رنيم : وازا طلع الموضوع جد
سكت حسين وكأنه حدا كب عراسه سطل مي بارده…
حسين : بنكون فلسنا بنتي
رنيم : مين حكا هيك بابا يلي كانت عليه بزمانها بتم عليه وهي فاقده الزاكره
حسين شـ شو قصدك
رنيم : قصدي ترجع تشتغل خدامه متل الاول
حسين وهو بيلقط نفسه بالعافيه
اه ايه ايه صح بس خلينا نتأكد بالاول
بيقطع حديثهم صوت رنة الجرس
رنيم : هاد اكيد الدكتور العاشق وصل انا رح فوت لغرفتي وانت انتبه بابا
هز براسه وتوجه لعند الباب
الدكتور عمر : مرحبا استاز حسين كيف وضع الانسه راما
حسين : تفضل معي لتكشف عليها
الدكتور عمر : ايه تمام تفضل جاد
حسين : مين الاخ
الدكتور عمر : جاد الممرض المساعد تبعي ومتدرب عندي
حسين بقلبه (( لك والله وجه هالدكتور مارق عليي بس ويييين ))
اشرلهم ب ايدو لمكان غرفة راما وتوجه الكل لهناك ورنيم عم تسترق السمع من شق الباب
✿♬✿♬✿
اول مالمحها جاد حس بشي غريب شعور ماعمرو ماحس فيه قبل هالمره… . كانت نايمه متل الملاك وملامحها اجمل واصفى وخاليه من اي كدمات وجروح مو متل اول مره شافها فيها
- " جميله أنتى ، كجمال براءة الآطفال فـ نومها " ..💛!
بلش الدكتور عمر يفحصها وجاد حاسس بالانزعاج لان راما بدون غطا على راسها وحاول يبعد نطرو عنها بس ماقدر كانت عيونه لا اراديا توقع على هالوجه الملائكي المتعب
وفجأه بتوقع عينه على الساعه يلي كانت مزتوته عالطاوله بحد صورة مريم… . بيكز ع اسنانه وبيشد عقبضة ايدو وهو بيطلع بالساعه
جاد بقلبه : لك هي الساعه لامي شو وصلها لغرفة راما… .. معقول يكون زياد……… ..اااخ
خلص الدكتور فحص وبعدها عطاها ابره بالوريد وكتبلا على ادويه معينه
حسين : كل هالادويه لشو
الدكتور عمر : اعتقد اني شرحتلك وضع الانسه راما وانه لازمها عمليه مستعجله لاستئصال الورم قبل مانضطر نلجئ للعلاج الكيماوي
انصدم جاد وقت سمع كلام الدكتور واطلع براما وقلبه مكسور عليها
حسين : ايه ايه ماشي يعطيك العافيه دكتور… فيك تتفضل
استغرب جاد من تصرف حسين وطلع ورى الدكتور عمر وهو مزعوج
……
رنيم : شو راحو
حسين وهو عم يمزع روشيتة الدوا : ايه نهفو
رنيم : انا من رأيي تتصل هلأ بالدكتور جمال وماتضيع وقت
حسين : وانتي قلتيها
مسك موبايلو واتصل للدكتور جمال وطلب منه يجي لعندو عالبيت
┬──┬┬──┬
جاد : شبو هاد ليش هيك تصرف
عمر : الضاهر تزكرني
جاد : اتزكرك ؟؟
عمر : جاد انت صديقي من زمان بس في امور مابقدر احكيها شرف المهنه بيحتم عليي احتفظ بخصوصيات مرضاي
جاد : اي خصوصيه لك انا فهمت من كلامك مع حسين انه راما في براسها ورم خبيث
عمر : اي مزبوط وانا متأكد رح يتركها تموت
جاد : شوووووو
عمر : جاد انا بفضل تنسى انك قابلت هالبنت بشي يوم هيك افضل الك صديقي
جاد : انت بكلامك عم تزيد اصراري اعرف قصتها عمر قلي شو السر يلي مخبيه عني
اطلع عمر بعيون جاد يلي عم تلمع وفيهم غـضب مستكين
عمر : توعدني هالشي يبقى بينا
جاد : اكيد بوعدك
عمر : وحتى اخي سعد مايعرف بشي
جاد : والله العظيم مارح افتح تمي بحرف احكي نطفت قلبي
عمر : من شي 12 سنه او اكتر اجا حسين لعندي وهو حامل بين ايديه بنت بعمر 16 سنه تقريبا
جاد : ايه
عمر : كانت غايبه عن الوعي تماما وعم تنزف… . فورا دخلناها لغرفة العمليات واتضح انها حامل
جاد : حامل ؟؟ يعني كانت متزوجه وعمرها 15
عمر : كانت حامل من اخو حسين بالحرام
جاد بصدمه : شوووووو
عمر : عملتلها عملية تنظيفات ونزل الحمل وبعد ماخلصت فتت عالمغسله الخاصه بالاطباء لاغسل ايدي وتفاجئت انه البنت بعدها بغرفة العمليات ماطلعت
جاد : ايه
عمر : اشرت ب ايدي لوحده من الممرضات لحتى يطالعوها وفتلت حالي ورجعت لمكتبي
وقت دخلت مكتبي استدعاني زميل الي اسمه الدكتور جمال رحت لعندو وكان قاعد هوه وكمان شخصين واحد منهم حسين
جاد : ايييييه
عمر :حكالي جمال انن جايين لعندي ب استشاره طبيه وطلب مني اقعد معهم وساعدهم وما اتركهم لحتى يرجع هزيت راسي وقعدت معهم و بلشو يحكوا معي بمواضيع طبيه شي افهمه وشي ما افهمه وبعدا حسيت انه في شي غلط بس ماعم اعرف شو هوه كانو وكأنهم عم يلهوني بالكلام لحتى يخلص جمال مهمته
جاد : مهمة شو
عمر : للاسف كان عم يستئصل لراما رحمها مع انه سليم ومابيشكل اي خطر على حياتها
جاد : العمااااا وليش لحتى يعملو هيك شو الهدف من هالشي
عمر : وقتها انا كنت رح اتركهم وروح لمكتبي لاني حسيت بملل منهم بس فجأه دخل جمال ووجهو اصفر وطلب مني اروح معه لغرفة العمليات فورا وهناك عرفت انه تم استئصال رحم راما بس العمليه مانجحت وصار عندها نزيف حاد وكانت رح تموت لو مالحقتها بالوقت المناسب
جاد : وشو عملت ؟؟
عمر : بعد ما اسعفت البنت هجمت على جمال وبلشت اضرب فيه وهو يصرخ انه ماله زنب وكل شي صار بناءا على طلب ابوها يلي هو حسين لانها كانت بنت فالته وحملت من عمها وبدهم يدايرو فضيحتهم
جاد : يدايرو فضيحتهم بإنهم يستئصلولا رحمها ؟؟
عمر : هون كان السر يلي مافهمته لليوم
جاد : طيب وشو عملت بوقتها مع هالكلاب
عمر : قدمت شكوى بجمال لنقابة الاطباء وسحبو منه
وكنت رح قدم شكوى بحسين واللي معه بس كانو مختفيين تماما حتى راما دخلت للمشفى بأسم غير اسمها لهيك ماقدرت لاقيلهم اثر
وبعد هالحادثه سمعت انه جمال فتح عياده خاصه بموقع استرتيجي بالبلد ورجع يمارس مهنته
جاد : كيف والرخصه انسحبت منه
عمر : الواسطه بهالبلد بتعمل كل شي ياصاحبي
نزل جاد عيونو بالارض وحس بصدرو بغصه
حملت وعمرها 15 ؟
استأصلو رحمها ؟
منظرها يلي كانت فيه اول ماشفتها
وساااعة امي يلي كانت مع زياد ؟؟؟
اكيد في سر وراكي ياراما وسر كبير كمان وانا لازم اعرفه شو ماكلفني الثمن
♬♫♪◖(● o ●)◗♪♫♬
وصل جمال لعند حسين يلي سلم عليه بحراره وطلب منه يتفضل معه عالمكتب
حسين : كيفك يارجال عاش من شافك
جمال : انا ولا انت يا قطوع لك من لما توفى اخوك جهاد الله يرحمه ماعدت شفتك
حسين : الله يرحمه… . صدقني مشاغلي لفوق راسي
جمال : بعين الله… اي خبرني لشو طلبت مني اجي لعندك بسرعه لاتقلي مشتقلي بزعل منك هه
حسين : ههههه لك والله انت دايما عالبال بس صارت معي شغله فوتتني بالحيط وقلت مابيحلا الا صديقي وحبيبي جمال
جمال : خير ان شاء الله شو القصه
حسين : نفس البنت ياجمال نفس البنت
جمال بعدم فهم : اني بنت
حسين : يلي عملتلا عملية استئصال رحم
جمال : شبها ليكون عرفت بالموضوع ؟؟
حسين : لك لااا مو هيك القصه
جمال : لكان شو القصه احكي بالالم نشرح
حسين : هالوسخه بعد ماربيتها وتعبت عليها سرقتني وهربت ومن حظي المعتر عملت حادث وفقدت الزاكره
جمال : ومارجعولك مصرياتك ؟؟
حسين : لك. ااااخ عم قلك فقدت الزاكره وبصراحه شاكك انها عم تكزب عليي لهيك بدي انت تفحصها وكمان بدي تشوف ازا فعلا عندا ورم براسها ولا لا
جمال : ماصورو راسها صوره طبقيه بالمشفى
حسين : امبلا بس هالدكتور ماعم ارتحلو ويا اخي حاسس حالي شايفه قبل هالمره
جمال : شو اسمه
حسين : عمر الصالح
ضرب جمال ايدو على جبينه بقوه وهو بيحكي لحسين : لك الله يصلللحك ياحسين على هالعمله داقت فيك الدنيا ومالقيت الا عمر الصالح
حسين بتوتر : ليش مين بيكون
جمال : مين بيكون ؟؟ رجاع بزاكرتك 13 سنه لورى بتعرف مين بيكون
صفن حسين شوي وهو ماسك قلمه ب ايدي وعم يحركه يمين وشمال وبعدا بحلق عيونو وهو شادد عالقلم لحتى انكسر ب ايدو
حسين : ليكوووون هداك الدكتور ماغيرو 😲
جمال : اي سيدي هوه بعينه
حسين بعصبيه : هالواطي معناته صحيح شكوكي وانه متفق مع راما لينهبوا مني كل شي
جمال : ههههههههههههه مجنون انت شي شو بدو ينهب منك يعني مليون مليونين… . لك ثروة الدكتور عمر لاتحصى ولاتعد والمشفى يلي كنت فيه بالاصل ل الو… من هالناحيه طمن قلبك عمر من النوع الخلوق ومالو عهيك فوتات واكيد روحة راما لعندو صدفه بصدفه
حسين : هيك قولتك
جهاد : خود مني عمر مابيعمل هيك شي
حسين : بس انا بدي اتأكد من موضوع فقدان زاكرتها
جمال : ومرضها ؟؟
حسين : لك تمووووت مابتهمني مو ناقص عليي الا بغزق يلي باقي معي على عمليتها .. انسالي موضوع مرضها وركزلي بس انها فعلا فاقده زاكرتا ولا بتمثل عليي 😡😡
جمال : ولايهمك جيبها لعندي بكرا وانا بعمل اللازم
حسين : تسلم يارب
جمال : نحكي بالاتعاب
حسين : طول عمرك واطي لك ماكفاك اشترالك اخي عياده بهديك الحسبه
جمال : نسيان اني اتضررت بشغلي بسببكم وعموما خلي كل شي لحال
حسين : تمام تفضل شو طلباتك
كانت واقفه عند الباب وحاطه ايدها عتمها وماعم تصدق يلي سمعته
رنيم : ولي… ليش ابي يطلب من الدكتور جمال يستئصل رحم راما ؟؟ مو ع اساس كان عندا الزايده ؟؟ شووو عم بيصيرررر 😲
يتبع
لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم
البارت الحادي عشر والثاني عشر من هنا
أدخلوا واعملوا متابعة لصفحتي عليها كل الروايات بمنتهي السهوله بدون لينكات من هنا 👇 ❤️ 👇
❤️💙🌺🌹❤️💙🌺🌹❤️💙🌺🌹❤️💙🌺🌹❤️💙🌺🌹❤️💙🌺🌹
إرسال تعليق