رواية ليس لها ذنب الفصل الخامس والسادس بقلم ميلي ميس حصريه وجديده في مدونة النجم المتوهج للروايات والمعلومات
 |
رواية ليس لها ذنب الفصل الخامس والسادس بقلم ميلي ميس حصريه وجديده في مدونة النجم المتوهج للروايات والمعلومات
كان سليم في صراعٍ داخليّ لا يرحم.
صوتٌ في داخله كان يهمس بإصرار:
>"البنت مالهاش ذنب… مش هي اللي دمرت حياتك، هي ضحية زيه زيك… شافت الويل. كفاية."
لكنه ما إن يبدأ في الميل لهذا الصوت، حتى يرتفع صوتٌ آخر، غاضب، جارح، كأنه يصيح في وجهه:
> "ضحية؟! دي بنت المجرم! بنت اللي خلّى كل حاجة فيك تموت. دمّها من دمه، وتستاهل تدفع الثمن!"
أغلق عينيه بقوة، كأنه يحاول يخنق الصمت اللي بين الصراعين. لكن لا فائدة. كل ما يتذكّر دموعها، صوتها المرتعش وهي بتعتذر من غير ما تكون غلطانة... بيحس بشيء يتكسر جواه. شيء مش مفهوم، ولا مقبول.
قام من كرسيه بعصبية، وبدأ يتمشى في غرفته الكبيرة كأن الجدران بتضيق عليه:
"لو سبتها، هيكون ضعف... ولو آذيتها أكتر، أنا اللي مش هنام بالليل."
ضرب الحائط بيده فجأة، وقال بصوت خافت لكن مسموم:
"أنا مش هرحمها... مش هرحمها... بس ليه قلبي بيرتجف كده؟"
تقدّم نحو النافذة، وشاف نور قاعدة في الجنينة، وحيدة، ضامّة نفسها من البرد رغم إن الشمس طالعة. ملامحها مش بنت عدوه… كانت هادئة، مكسورة، بس فيها نوع غريب من الكرامة.
ووقتها، عاد الصراع.
"هي متألمة كفاية… خلّص بقى."
"لا! لسه ما دفعتش التمن الحقيقي!"
سليم ابتلع أنفاسه ببطء…
وتمتم لنفسه:
"أنا اللي محتاج أقرر… الرحمة؟ ولا الانتقام؟"
لكنه ما كانش عارف، إن القرار اللي هياخده في اللحظة دي… هيغيّر كل شيء.
.
ليفتح درج المكتب… طلع صورة قديمة، فيها أخته بتضحك…
ضحكة بريئة… ضحكة راحت.
قرب الصورة من وشه وقال:
ـ "هو ما قتلهاش بس… قتلني معاها."
سكت شوية… عينيه راحت ناحية الشباك.
وشافها.
نور… قاعدة زي طفلة ضايعة،
إيديها حضن نفسها، كأنها بتستجدي حضن حقيقي.
لكن القلب اللي كان هيترقّ، افتكر الدم…
افتكر الصراخ…
افتكر القبر.
ـ "ذنبها؟ إنها اتولدت بنته… وده كفاية."
قام… ومسك المفتاح.
ـ "الرحمة انتهت من يوم ما ماتت أختي."
خرج من الأوضة…
خطواته بتدق ف البلاط كأنها إعلان حرب.
وفي الجنينة... نور رفعت راسها.
شافت سليم جاي…
بس ملامحه مش راجل…
ده كان قاضي… وحكمه جاهز
وقف قدامها… ضله غطّاها بالكامل،
رفعت راسها ببطء… ولقيته واقف بعينين زي النار.
ـ "فاكرة نفسك هربتي؟"
صوته كان حاد، كأنه سكين بيدوّر على مكان يطعن فيه.
ـ "فاكرة إنك كده بقيتي ملاك؟ قاعدة ساكتة، بتبصي ف الأرض، عاملة فيها بريئة؟"
نور ما ردتش…
بس عنيها اتسعت، مش خوف… يمكن صدمة، يمكن محاولة تفهّم.
ـ "لا… ما تتكلميش! ما تفتحيش بقك!"
سليم مد إيده ناحية صدره وضربها بقبضة إيده:
ـ "هنا… هنا في وجع مالوش آخر، وسببه أبوكي!
اللي انتي شايلة اسمه… اللي اتخلقتي من دمه!"
قرب منها خطوة، صوته انخفض بس بقى أخطر:
ـ "ضنيتي إني ممكن أنسى؟
ضنيتي إن شوية دموع، أو صوتك الواطي، أو رعشة إيدك… هيرجعوا أختي؟"
نور همست بصوت شبه ميت:
ـ "ليس ذنبي ..."
قطعها بعصبية:
ـ "كفاية!! متلعبيش دور الضحية…
انتي مش ضحية… انتي غلطة!
غلطة لازم أدفعك تمنها!"
عينه بتلمع…
ماكانش فيها دموع، لكن كان فيها حاجة تانية…
نار.
مد راسه ناحيتها، قالها بصوت كأنه بيرن جواها:
ـ "مش معنى إني سبتك تاكلي، أو تنامي، أو تعيشي…
إني نسيت.
أنا بس كنت بستناك تظني إنك اتحسّنتي…
بس الحقيقة؟
انتي لسه في بدايات العذاب."
لف ضهره، ووقف لحظة…
وبص فوق كتفه، قالها بنبرة خالية من الرحمة:
ـ "متنسيش… كل يوم ليه تمن، وانتي لسه ما دفعتيش ربع الحساب."
ومشي.
وسابها…
مش مكسورة،
لأ…
لكن خايفة من اللي جاي.
وقفت ثواني مكانها بعد ما سليم مشي،
كأن الهوا اتسحب من المكان، وكأن الأرض تهزّت تحت رجليها.
بس شدت على نفسها… بلعت الوجع، ومسحت دمعة خافت تطلع.
اتوضّت بكلمة واحدة بس في قلبها:
"توكلت على الله."
خطواتها كانت هادية… بس جواها عاصفة.
راحت على المطبخ.
المطبخ كان دافي، ريحة اليانسون والمخبوزات ماليين الجو،
والدادة فاطمة واقفة جنب الفرن، لابسة مريلتها القديمة اللي متقطعة من جنب،
ونسرين بنتها كانت بتقشّر بطاطس وهي بتغني بصوت واطي.
أول ما شافوها… وقفوا فجأة.
الدادة فاطمة مسحت إيدها فمريلتها، وقرّبت منها بسرعة:
ـ "يا بنتي… كيف صرتي دلوقتي؟ …"
نور حاولت تبتسم، بس التعب كان واضح في عينيها:
ـ "الحمد لله يا خالة… أحسن كتير."
نسرين قربت وهي ماسكة منديل، حطته في إيد نور:
ـ "الحمد لله على سلامتك يا هانم…"
نور بصتلها، وابتسامة خفيفة خرجت من بين شفايفها:
ـ "نور… ناديني نور بس. مفيش لا هانم ولا حاجة بينا."
نسرين اتفاجئت، بس ضحكت بخفة:
ـ "حاضر يا نور… بس أنا متعودة أقول كده!"
الدادة فاطمة مدت إيدها وسحبت نور تقعد على الكرسي الخشبي:
ـ "اقعدي يا بنتي… خديلك نفس. هنا مفيش أوامر ولا نظرات قاسية…
هنا في شوية دفء يمكن يهونوا عليك."
نور أخدت نفس عميق… وشافت بخار الشاي طالع من الكوباية اللي حطتها قدامها نسرين.
وفي اللحظة دي… حسّت إنها لسه على قيد الحياة.
بس جوه عقلها…
كان صوت سليم بيرن تاني:
"كل يوم ليه تمن… وانتي لسه ما دفعتيش ربع الحساب."
شدت نفسها فجأة…
والدنيا بدأت تلف جوا عينيها،
ما بقتش شايفة المطبخ ولا سامعة صوت نسرين.
اتسحبت جوه ذكرى…
زمان… في بيتهم الصغير.
كانت قاعدة على الأرض، والكراسات حواليها، والمذاكرة خنقاها.
وهي بتتنهد وتقول:
ـ "ماماااا… زهقت! دماغي مش عايزة تشتغل خلاص!"
ووقتها… كانت أمها، بطلتها الحقيقية، جاية من المطبخ بكوباية شاي، وحطته قدامها بلطف.
مسحت على شعرها وقالت بابتسامة دافية:
ـ "انتي نوري… اللي منوّر حياتي،
وانتي اللي عمرك ما كنتي ضعيفة…
بنتي القوية مش بتستسلم، ولا التعب بيغلبها.
انتي هتنجحي يا نور… عشان انتي اتخلقتي تنوري الطريق حتى في عز الضلمة."
الذكرى دي غرست نفسها جوا قلبها،
زي نبضة حياة وسط رماد الألم.
رجعت فجأة لوقتها الحالي،
ولقت الدموع بتلمع في عينيها، بس مسحتها بسرعة قبل ما حد يشوف.
وبهمسة ما بين شفايفها… قالتها، بقوة كانت مدفونة من زمان:
"كفاية بقى…
مش هستسلم…
ولا هكسرك فيا يا سليم يا أسيوطي."
رفعت الكوباية، وشربت أول رشفة شاي…
بس المرارة اللي في قلبها كانت أقوى من أي حاجة.
دقّ… دقّ… دقّ.
صوت الباب خبط فجأة، والدادة فاطمة كانت قاعدة في المطبخ بتجهّز العشا.
رفعت راسها باستغراب وقالت لنسرين:
ـ "مين اللي ييجي في الوقت ده؟ مش العيلة كلها مسافرة عند بنتهم ليلى؟! وسليم بيه في الشركة."
قامت بحذر وفتحت الباب…
وقفت شوية، عينيها وسعت،
قدامها كان فيه راجل ضخم، طوله فارع، ولابس بدلة سودا فخمة.
قال بصوت تقيل وجاد:
ـ "أنا عايز مدام نور… ضروري."
الدادة بصّت له بقلق:
ـ "حضرتك مين؟"
ـ "أنا كنت شغال مع والدها… الموضوع مهم جدًا. لازم تشوفني فورًا."
نادت بصوت عالي:
ـ "نور! يا نور يا بنتي… فيه حد بيطلبك."
نور طلعت بخطوات مترددة…
ولما عينيها وقعت على الراجل، قلبها وقع.
عرفته فورًا… شافته قبل كده في بيت أبوها…
كان من أقرب رجاله،
وشه ما بيتنسيش.
قال بنبرة صارمة:
ـ "مدام نور… والد حضرتك…
اتعرض لـ سكتة قلبية.
هو في المستشفى دلوقتي… وبيسأل عليكي.
قاللي بالحرف… لازم يشوفك. ضروري."
نور اتجمدت في مكانها…
كل حاجة حواليها اختفت…
صوت الراجل بيتكرر في ودانها زي الصدى:
"سكتة قلبية… لازم يشوفك… ضروري…"
الدادة فاطمة قربت منها:
ـ "بنتي… إنتي كويسة؟"
بس نور ما ردّتش… كانت حاسة الدنيا بتلف بيها…
إزاي فجأة كده؟
بعد كل اللي حصل؟
وهو دلوقتي… عايز يشوفها؟ ليه؟
إيه اللي خلاه يفتكرها بعد ما رماها؟!
نور خدت نفس عميق… وعينيها كانت مليانة صدمة وتردد، بس صوتها خرج ثابت:
ـ "أنا رايحة… لازم أشوفه."
الدادة فاطمة قربت منها بسرعة، وعينيها فيها قلق واضح:
ـ "يا بنتي… إنتي ناسية نفسك ولا إيه؟ سليم بيه لو عرف إنك خرجتي من غير إذنه… ده يودّيكي في داهية! ده ممكن يعمل مصيبة!"
نور بصّت لها، وفي عينيها وجع… بس كمان كان فيه قرار.
ـ "أنا مش خايفة…
لو ما رحتش دلوقتي، هافضل أندم طول عمري.
ويمكن… يمكن يكون دي آخر مرة أشوفه."
نسرين كانت واقفة ساكتة، بس عنيها بتراقب الموقف، وشها متوتر.
الراجل الضخم اللي واقف عند الباب لسه مستني، وصوته رجع هادي لكنه حاسم:
ـ "العربية مستنياكي تحت، يا مدام. المستشفى مش بعيد."
نور عدّت جنب الدادة، لمّت طرحتها بسرعة، وهي بتقول بهدوء:
ـ "لو سليم بيه عرف… يبقى يعرف.
أنا مش ههرب… ."
وخرجت من الباب…
ورجليها كانت بترتعش، بس كانت ماشية…
في طريق يمكن يغيّر كل حاجة.
الدادة فاطمة كانت واقفة قدام الموبايل… صوابعها بتترعش وهي بتتصل. أول ما سليم رد، كان صوته جامد:
ـ "أيوه؟"
الدادة بلعت ريقها وقالت بسرعة:
ـ "سليم بيه… معلش، بس لازم أقولك…"
سليم بحدة:
ـ "في إيه؟ اتكلمي!"
الدادة صوتها مهزوز:
ـ "مدام نور خرجت… جالها واحد من شوية وقال إن والدها تعبان واتنقل المستشفى، وعامل سكتة قلبية… وهي أصرت تروح تشوفه… وقالتلي: "أنا لازم أروح، وخرجت."
سليم سكت ثواني… بس كان صوته بيتحوّل، زي النار اللي بتغلي في حنجرتُه:
ـ "إيه؟! خرجت؟!
وإنتي ازاي تسيبيها تخرج من غير ما ترجعلي؟!"
الدادة حاولت تهدي الموقف وهي مرعوبة:
ـ "يا بيه، حاولت أمنعها… والله العظيم! بس كانت مصممة، وقالت إنها مش خايفة، وإنك مهما عملت مش هتقدر تمنعها من تودّع أبوها لو جراله حاجة…"
سليم قفل الخط فجأة… وإيده كانت بتترعش وهو بيشد جاكيتُه من على الكنبة.
عينه لمعت بغضب، بس جواه كان في حاجة بتتكسّر… حاجة مش فاهمها.
ـ "روّحتي له يا نور؟
رغم كل حاجة…
روّحتي؟!
في المستشفى
نور كانت واقفة قدام بوابة المستشفى، قلبها بيخبط بسرعة، والمكان حواليها بارد رغم الحر، بس جواها كان في بركان مشاعر ما بين خوف وقلق وحيرة.
دخلت وسألت السكرتير اللي كان قاعد على الكرسي عند المدخل:
ـ "لو سمحت… المريض حازم الجبّار فين أوضته؟"
السكرتير رفع عينه من ورق الجرنان، وبصّ لها باستغراب شوية:
ـ "أه… حازم الجبّار؟ آه، في الدور الخامس… أوضة ٥١١. المصعد ع الشمال."
هزت راسها بشكر، وقالت بهمس:
ـ "شكراً…"
ركبت الأسانسير، وطلعت. كل ثانية كانت بتمرّ كأنها ساعة… قلبها بيشدها لقدّام، بس عقلها بيقولها ترجعي. أبوها اللي زمان كان جبل، دلوقتي مرمي على سرير؟!
وصلت عند الباب… خدّت نفس عميق، وفتحت.
بمجرد ما دخلت، شافتها "ثريا"، زوجة أبوها، اللي أول ما عينها وقعت على نور، وشها اتقلب:
ـ "أيوه بقى… جهتي!
أكيد كنتي مستنية اللحظة دي…
شايفة حالنا؟!
كله بسبب جوزك! بسبب سليم الأسيوطي…"
نور وقفت متجمّدة، لسه مش قادرة ترد، و"ثريا" مكملة وهي بتلوّح بإيدها بغضب:
ـ "سليم دمرنا! أبوكي اتضرب في شُغله… كل الناس بعدت عنه، شركته وقعت، حتى البيت خدوه مننا! ما بقاش عندنا ولا مليم!"
نور حاولت تتمالك نفسها، صوتها كان هادي بس نظرتها كانت بتقطع:
ـ "أنا مليش ذنب في اللي حصل…"
بس قبل ما تكمل، سمعوا صوت ضعيف جداً جاي من السرير، كان حازم بيتكلم، صوته متكسّر ومتعب:
ـ "ثريا… كفاية.
سيبيني مع نور…
لوحدنا…"
ثريا لفّت بعصبية، وبصّت لنور بقرف، وسابتهم وخرجت وهي بتقفل الباب وراها بصوت مزعج.
نور قربت بخطوات هادية من سرير أبوها، عنيها بتترعش من الدموع، وبتتأمل ملامحه اللي غيرها والمرض… الجلد بقى باهت، وعينيه غايصة، وصدره بيطلع وينزل بصعوبة.
قعدت على الكرسي جنب السرير، ومسكته من إيده، كانت باردة كأنها ورقة شتا.
سكت شوية… وبعدين بدأ يتكلم بصوت متقطع، مكسور، كأنه بيستعطفها ومش قادر يطلب منها:
ـ "نور…
عارف…
عارف إني ما كنتش أب حقيقي ليكي…
ما كنتش قدّ المسؤولية… بس…"
دمعة نزلت على خده وهو بيكمل بصعوبة:
ـ "إنتي… طيبة زي أمك…
أمك اللي ما عرفتش أحتفظ بيها…
بس إنتي…
مش هتسيبي العيلة تنهار… مش إنتي…"
نور كانت ماسكة نفسها بالعافية، قلبها بيتكسر وهي شايفاه بيتهز قدامها، بتقول جواها: "إزاي الدنيا قلبته كده؟!"
ـ "شش… انت محتاج ترتاح…"
هزّ راسه وهو بيقاوم التعب، وقال بسرعة قبل ما نفسه يقطعه:
ـ "لا… اسمعيني…
أخواتك…
ما لهمش ذنب…
ولا اختك لينا…
المرض بيكلها يوم بعد يوم…
ومعنديش غيرك، نور…
أنتي الوحيدة اللي تقدر تعملي حاجة."
نور قفلت عنيها ودموعها نزلت، حاولت تمسحها بسرعة بس حازم شد على إيدها رغم ضعفه:
ـ "حاولي…
حاولي مع سليم…
هو جوزك…
راجل، قلبه مهما كان حجر، له مفتاح…
إنتي مفتاحه يا نور…
حاولي توقعيه…
خليه يحبك…
خليه يرجع الشركة…
مش علشاني… علشان إخواتك…"
نور اتصدمت من الكلام، بصت له بعيون متسعة:
ـ "بابا! إنت بتطلب مني أستخدم نفسي وسيلة؟!"
ردّ وهو بيشهق بصعوبة:
ـ "أنا بطلب منك تنقذي اللي فاضل مننا…
بطلب منك تلعبي لعبته…
بس لمصلحتنا…
هو بدأ الحرب…
وإنتي لازم تكسبيه بسلاحه."
نور سكتت، وفضلت تبص في عنيه اللي فيها رجاء يقطع القلب، حسّت إنها واقفة على مفترق طرق… وقرارها مش هيأثر بس عليها، ده هيغيّر مصير عيلة كاملة.
و فجأة يتفتح الباب بقوة و.......
ليس لها ذنب
الفصل السادس
"
صوت الباب وهو بيتفتح بعنف قطع اللحظة زي سكينة فـ ضلمة.
سليم دخل زي الإعصار، عنيه مشتعلة، وصوته عالي:
ـ "مين سمحلك تخرجي من البيت؟!"
نور وقفت مفزوعة، بس حاولت تتماسك:
ـ "دا بابا… تعبان… جِيت أطمن عليه بس."
سليم ضحك ضحكة كلها سخرية، وعيونه بتلمع بشرّ:
سليم (بتهكم):
ـ جيتي تطمني؟ ولا جايين تحطوا خطط ورا ضهري عشان توقعوني؟
حازم، رغم ضعفه، حاول يرفع نفسه وبيقول بصوت مخنوق وتعبان:
حازم (بغضب ووجع):
ـ كفاية يا سليم… عيلتي مالهاش ذنب… إرجع عن اللي ناوي تعمله… حرام!
سليم عينه لمعت، ووشه اتقلب حقد:
سليم (بغل):
ـ عيلتك؟… وانا؟ عيلتي؟!
فاكر زمان؟ لما كنت فوق الكل؟ لما سرقتوا كل حاجة من أبوي؟
شوف بقى… سبحان الله، الأيام بتلف…
ابن الراجل اللي خدعتوه، النهاردة هو اللي واقف فوق راسك…
وشايفك بتنهار زي ما بويا انهار زمان.
وقبل ما يكمل جملته، فجأة… الأجهزة بدأت تصفر، والنبض اختفى!
نور (بصرخة قلبها بيتقطع):
ـ بـــابــــــااااااااا!!!
الأطباء دخلوا بسرعة، والدنيا اتقلبت، وسليم حاول يسحب نور من دراعها:
سليم (بحدة):
ـ يلا، اطلعي برا!
نور (وهي بتحاول تفلت):
ـ لأ! مش هتحرك من هنا لحد ما أطمن عليه!
سليم (بصوت عالي):
ـ قلت يــلاااا!!!
نور (بصراخ أقوى، وعنيها مليانة نار):
ـ قلت مش هاتحرّك!
مش هاتحرّك!!!
فاهم؟! مش هسيبه! حتى لو آخر يوم في عمري!
سليم كان الغضب باين في عينه، قرب من نور بسرعة، مسكها من دراعها بعنف وابتدى يجرّها وراه وهو بيزعق:
سليم (بعصبية): قلتلك ما تخرجيش من البيت! إنتي نسيتي إنك تحت أمري؟!
نور حاولت تفلت منه، صوتها عالي ودموعها بتنزل من غير ما تحس:
نور (بصريخ): سِيبني! مش همشي معاك! مش همشي وقلبي سايب بابا كده!
سليم زاد في شدّته:
سليم (بغضب): ما تعلييش صوتك عليّا يا بنت حازم! انتي نسيتي انك مراتي؟!
وفي اللحظة دي… الباب اتفتح بسرعة، وطلع الدكتور بعجلة، صوته عالي ووشه عليه علامات ارتباك:
الدكتور: النبض رجع للمريض!… عايز يشوفك حالاً يا أستاذة نور!
نور سحبت إيدها من سليم بكل قوتها، كأنها بتفك قيود من نار، وجريت على أوضة أبوها، قلبها بيدق بسرعة وخوفها سابقها.
دخلت الأوضة، لقت حازم على السرير، جسمه ضعيف جدًا، بس عنيه مفتوحة وشايلة حزن الدنيا كلها، أول ما شافها دمعة نزلت من عينه.
دخلت نور الأوضة، قلبها بيدق بعنف، لقته لسه عايش، بالكاد عيونه مفتوحة، وجهه شاحب، بس نظرته لسه فيها نفس العجرفة القديمة… نفس السيطرة اللي عمرها ما راحت.
بصّ لها بنظرة فيها أمر، مش حنان، ولا شوق… وقال بصوت متكسر، بس واضح:
حازم (بصعوبة):
ـ نور… لازم تنقذي إخواتك… من سليم…
إنتي الوحيدة اللي تقدري تتصدي له…
نور وقفت لحظة، عينها بتترجم كلماته، مشاعرها كلها متشابكة… بس فجأة، فهمت.
نور (بحدة وصدمة):
ـ حتى وإنت بتموت… شايفني أداة؟
مش بنتك؟ مش بني آدمة؟
حازم حاول يفتح بقه، يمكن يرد، يمكن يبرر، بس ماقدرش… كأنه فجأة حس إن اللعبة خلصت.
نور (بغصة):
ـ عمرك ما فكرت فيا، لا كأب، ولا حتى كحامي
اتنهد حازم نفس طويل… عنيه لفّت ببطء، كأنه بيهرب من الحقيقة اللي قدامه…
مفيش كلمة اعتذار، مفيش ندم… بس سكون بارد.
وبهدوء مفاجئ…
جسمه تراخى، نفسه اتقطع، وعيونه اتقفلت…
نور (بصوت مرتعش):
ـ بابا… لأ، استنى، …
بابااااا!!!
صوتها طلع صرخة مكسورة، فيها خوف وكسرة وحزن سنين…
لكن ماكانش فيه فايدة.
رأسه مالت على جنب، عنيه اتقفلت، ونفسه سكت…
وغاب عن الدنيا.
دخل الطبيب في اللحظة دي، بص عليهم، وبنظرة كلها أسى وحزن، قال :
الطبيب (بهدوء):
ـ البقية في حياتك يا آنسة نور…
نور ما ردّتش… كانت واقفة مكانها، عنيها مغرقين دموع، بس عقلها مش قادر يصدّق…
الصمت اللي بقى حوالين جثته كان أصدق من أي كلمة
كانت واقفة قدام جثة أبوها، الدموع نازلة من غير صوت، صدمة، ألم، وجواها حاجة بتتكسر ومش عارفة تتصلّح.
وفجأة…
الباب اتفتح بعنف، وسليم دخل.
خطواته تقيلة، وصوته عالي:
سليم (ببرود مستفز):
ـ خلاص؟ خلص مات؟
نرجع بقى على بيتنا.
نور بصّت له، عنيها حمرا، مش من البكاء بس، من الغضب… من القهر… من كل لحظة وجع عدّت.
نور (بصوت مكسور لكن فيه نار):
ـ أبويا مات…
مات وإنت السبب…
وأنا مش هرجع معاك!
سليم اتفاجئ من لهجتها، قرب منها بخطوتين:
سليم (بعين ضيقة وصوت حاد):
ـ بتتكلمي كده لمين يا نور؟
نسيتي إنك مراتي؟
نسيتي إنك عايشة تحت سقفي وتحت أمري؟
نور رفعت راسها، وقالت وهي بتمسح دموعها:
نور (بصوت هادي لكن مرعب):
ـ آه… أنا مراتك…
بس مش طول العمر هفضل عبدة عندك…
أنا خسرت كل حاجة…
فمافيش حاجة أخاف أخسرها تاني.
سليم (بصوته العالي ونبرته المتغطرسة، وهو بيقرب منها ووشه مليان سخرية):
ـ شكلك نسيتي نفسك…
بقيتي بتخربشي ؟
اسمعيني كويس يا نور…
دلوقتي هتمشي معايا على البيت زي البنت الشاطرة…
أصلا مافيش حاجة تاني تعمليها هنا…
هياخدوه يدفنوه…
وانسي العزا، لإن بيت الجبار بقى بتاعي…
يعني مش هيحصل عزا في الشارع، مشهد مهين ليّ وللي شافك.
خمس دقايق… تكوني تحت.
وإلا… ماتلوميش غير نفسك.
(نور وقفت مكانها، عينيها ثابتة عليه، بس قلبها بيغلي من جوه… قبل ما ترد، دخل صوت مبحوح، بيقطع الصمت زي سكينة):
نرمين (وعينيها كلها دموع):
ـ هيـاخدوا بابا… يدفنوه دلوقتي…
(سكتت لحظة، وبصّت لنور بعين مكسورة)
ـ نور… إزاي قدرتي تعيشي في البيت ده طول المدة دي؟
ده مكان يخنق… يوجع الروح.
(نور رفعت عينيها بصمت، بتدور على إجابة، بس نظرة نرمين كانت حزينة ومليانة وجع، وكأنها بتحاول تفهم اللي حصل لأول مرة):
نرمين (بتكمل بصوت متهدج):
ـ لما أخدوا مننا البيت رحنا لبيت أمك ، بابا ماكانش عنده مكان يروحله غيره…
رحنا هناك لأننا ماكانش لينا حتة ننام فيها…
ولا كان معانا فلوس حتى نأكل بيها…
وياسين… ياسين اتسجن، قالوا إنه سرق من الشركة!
بابا حاول يطلعه بس… الدنيا كلها قفلت في وشه.
وأمي…
(بصّت بعيد، ودموعها نزلت بهدوء)
ماعرفش راحت فين… شكلها عقلهـا تعب، ماقدرتش تتحمل.
ولينا… من ساعة ما سمعت بموت بابا، وهي هنا في المستشفى…
الدكتور قال إن قلبها تعبان… الرطوبة في ذلك البيت زودت حالتها…
وقال لازم تغير صمام القلب قريب…
نور… أنا آسفة، والله آسفة…
عارفة إني ماكنتش أخت كويسة ليكي…
كنت بغير، كنت فاكرة إنك حتاخدي بابا مني…
(نور سابت نفسها وبكت، وبكل وجع الدنيا حضنت نرمين، وكأنها بتحاول تشيل عنها كل السنين اللي فاتت):
نور (بصوت مخنوق بالبكاء):
ـ ما تفكريش فده دلوقتي…
أنا هنا…
وهحل كل حاجة، والله ماهسيبكم .
لتنزل من المستشفى بعد ما ودّعت أبوها نظرة أخيرة، عينيها كانت ناشفة من كتر البُكا، وشها باهت وروحها كأنها اتسرقت. نزلت بخطوات هادية وميتة، لقت سليم واقف ساند ضهره على عربيته، سايب الدنيا كلها ووشه فيه برود قاتل. بدون ما تبص له حتى، فتحت باب العربية وركبت.
سليم (في نفسه، مستغرب):
"إيه اللي حصل للبنت دي؟... كانت نار… دلوقتي بقت رماد!"
(ركب جنبها، وساق من غير كلمة… الطريق كله كان ساكت، إلا من صوت الموت اللي كان مالي العربية. أول ما وصلوا القصر، الليل كان نازل زي الكفن.)
نور (بصوت هادي، مفيهوش أي إحساس):
ـ ممكن… نحكي؟
سليم (بص لها من طرف عينه):
ـ تمام.
(دخلوا القصر، أول ما شافتها الدادة، جريت عليها ودموعها في عينيها، حضنتها بقوة):
الدادة:
ـ البقية في حياتك يا بنتي… يا حبيبتي.
نور (ببرود موجوع):
ـ تسلمي يا دادة.
(عدّت نور ماشية ورا سليم، وكأنها ماشية ورا مصيرها… دخلوا أوضته، سليم قاعد على الكنبة، حاطط رجل على رجل، وبينفخ نفس طويل، كأنه مستعد لسماع حاجة مش هتعجبه.)
سليم (بصوت هادي، بس فيه سخرية):
ـ سامعاكي…
نور (وقفت قدامه، عنيها ثابتة فيه، وصوتها بدأ يخرج أقوى):
ـ عايزاك ترجع البيت لأخواتي…
عايزاهم يلاقوا مكان يناموا فيه…
ويعرفوا يكلوا زي الناس.
سليم (ضحك ضحكة قصيرة فيها استهزاء):
ـ وليه أعمل كده؟
إيه المقابل يعني؟
الناس ما بتديش ببلاش.
نور (باندفاع حارق، صوتها كان بيترجف):
ـ عشان يكون عندك ضمير!
فيه بنت صغيرة…في أول عمرها… محتاجة عملية قلب!
لو اتأخرت هتموت!
سليم (نبرته اتغيرت، بقت غامقة وسامة، والشر بينط من كل كلمة):
ـ ضمير؟
أبوكي كان عنده ضمير لما سرقنا؟
لما خلانا نبيع كل حاجة؟
لما أختي ماتت قدامي… ومكانش عندي تمن عمليتها؟
أبوكي دفن ضميرنا وهو عايش…
بس أنا…
أنا هكون أكرم منه.
(سكت لحظة، وقرب منها وهو بيكتم غضبه):
ـ هرجع البيت لأخواتك…
و هطلّع أخوكي من السجن…
و يشغل هو و أختك فالشركة…
و أختك الصغيرة… هخليها تعمل العملية…
بس بشرط.
نور (عنّيها اتسعت، وصوتها كان فيه خوف وتوتر):
ـ شرط إيه؟
سليم (قام واقف فجأة، ووشه كله جديّة وصرامة):
ـ تبقي ملكي الليلة
تصيرء مرتي شرعي
تبقي ليّا
جسدًا… وروحًا…
و..... يتبع
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق