النفس الاماره بالسوء

النفس الاماره بالسوء 

 فى ليالى ديسمبر الشتوية الباردة ، سامع صوت الإمطار بتخبط فى ازاز الشباك بتاع اوضى كنت واقف بشرب الشاى قصاد الشباك و باصص على الشارع برا 

الامطار غزيرة و مكانش فى حد نهائى فى الشارع كنت ببص لتاكسى بتاعى و كنت بفكر انزل اشتغل فى الجو ده و كمان و كان فاضل على راس السنة 3 ايام فا كنت محتاج فلوس ، الحقيقة كنت متردد مع ان كانت الساعة 3 بعد منتصف الليل ، كنت بفكر انزل و اروح فين وفى وسط تفكيرى لقيت باب اوضى بيخبط 

* ادخل 

- اى اللى مسهرك لغاية دلوقتى يا بابا 

* مفيش انا بس هلبس و انزل الشغل 

- الوقت متأخر يا بابا و بعدين هتنزل فى الجو ده 

* هعمل اى بس يا نورهان انتى عارفة احنا محتاجين مصاريف و غير مصاريفك و مصاريف اختك الصغيرة 

لقيت بنتى نورهان مردتش عليا و التزمت الهدوء بقالى فترة كبيرة بعيش دور الاب و الام و بحاول على قد ما اقدر اربى بناتى احسن تربية بعد وفاة امهم . 

لقيت بنتى نورهان ردت عليا و قالتلى : 

* طيب يا بابا مش عاوز حاجة اعملهالك قبل ما تمشى 

- لا شكرا ياحبيبتى خشى انتى نامى 

* تصبح على خير يا بابا 

- و انتى من اهل الخير يا حبيبتى 

بنتى قفلت الباب و رجعت تانى ابص على التاكسي بتاعى من شباك الاوضة اخد نفس عميق و اتوكلت على الله فتحت الدولاب بتاعى و بدأت البس هدومى 

نزلت من البيت و فتحت باب العربية و ركبت و بدأت اتحرك من المكان الحقيقة مكنتش عارف اروح فين 

قولت اتحرك و اطلع على البحر بالذات شوارع اسكندرية بليل فى الجو ده ساعات كتيرة بلاقى ناس ،

عدى من الوقت نص ساعة وانا بتجول لغاية ما وصلت الشاطبى و انا ماشى فى الطريق لقيت راجل بيشاورلى فى سن ال 30 تقريبآ ، وقفتله و لقيته فتح الباب و ركب و هو ساكت تمامآ من غير ما يقول اى حاجة ، بدأت اتكلم و اقوله : 

* حضرتك رايح فين 

- مقابر خورشيد ، عارفها 

* مفيش مشكلة ايوة عارفها  

اتحركت بالعربية و بدأت اشغل حاجة كلاسيك لام كلثوم و مهتم و باصص لطريقى لغاية ما الشخص ده بدء فى الكلام و قال : 

* تعرف كان ليا شخص عزيز اوى عليا 

- حضرتك كلنا لينا اشخاص عزيزة علينا 

* لا بس ده كان عزيز اوى عليا كان اسمه عمر فاروق و كان دكتور مشهور جدآ 

- ربنا يخلهولك يا باشا 

* لا مهو مات خلاص 

- يا حول الله ربنا يرحمه 

* تعرف ، مات زى النهاردة بالظبط يوم 28 ديسمبر السنة اللى فاتت 

- اكيد هو فى مكان احسن من كدة 

* ايوة انا عارف و متاكد من كدة ، كان دايما مكتئب و نفسيته تعبانة و انا عشان بحبه كنت بنصحه دايمآ انه يشرب سجاير بأستمرار عشان يهدى 

- ......؟! 

* تعرف ان السجاير مفيدة اوى لصحة 

- حضرتك قصدك مضرة لصحة 

* لا مفيدة لصحة ، كنت دايمآ بنصحه بيها لدرجة انه كان بيشرب سجارة و بيلحم فى التانية علطول باستمرار 

- حضرتك كدة بضر صحته 

* لا مين قالك ، الميزة اللى كانت فيه انه كان مطيع و بيسمع كلامى دايمآ 

- معلشى فى السؤال هو كان ضعيف الشخصية و عارف ان ده غلط لية بيسمع كلامك 

* عشان ضعيف الايمان 

-......؟! 

* تعرف مش شرط تكون ضعيف الشخصية ، فى اشخاص كتيرة الناس بتخاف منها بس هما ضعاف الايمان 

كنت ببص لطريقى و ادركت ان الشخص اللى معايا ده مجنون و استحالا يكون طبيعى كنت بحاول على قد ما اقدر انى متكلمش معاه بس هو كمل كلامه و قال : 

* تعرف جت عليه فترة و بقى مديون لطوب الارض و مكانش عارف يعمل اى تعرف نصحته بأى ؟ 

- بأى حضرتك 

* نصحته انه يشرب خمرة و ينزل يسرق سوبر ماركت او اى محل 

- ....؟! حضرتك بتنصحه بحاجات حرام و وحشة 

* هو فين الحرام ؟ 

- حضرتك الخمرة حرام و السرقة 

* لا مش حرام ولا حاجة بالعكس دى مفيدة لصحة جدآ و السرقة هواية جميلة جدآ و مش انا بس اللى بقول كدة ، كل صحابى بيقوله نفس كلامى 

- .....؟! 

* تعرف مات ازاى ؟ 

كنت ببص للشخص ده و لقيت ملامحه هادية جدآ و مخيفة و كان باصص لطريق مكنتش عاوز اطول معاه فى الكلام و متردد ارد عليه بس فضولى غلبنى و رديت عليه بكل يأس و قولتله : 

- مات ازاى ؟ 

* مات بسبب ان جاله مياه على الرئة بسبب السجاير بسبب انه كان بيشربها على الريق ، اللى انا كنت بنصحه بيها 

- حضرتك السبب فى موته 

* نزلنى هنا 

لما لقيته قالى الكلمة دى بصيت حواليا و لقيت نفسى فعلا فى مقابر خورشيد كنت مستغرب جدآ ازاى وصلت بالسرعة دى ، يمكن كنت سرحان فى كلامه و مخدش بالى من الوقت ، لقيته قبل ما ينزل سابلى مبلغ كويس قصاد منى بدأت اتكلم و اقوله : 

- هو حضرتك مين 

لقيته بصلى لاول مرة و ابتسملى ابتسامة مروعة و قالى : 

* مش مهم انا مين ، المهم ردك لسؤالى اللى جاى 

- اتفضل 

* انت تعرف عن النفس الامارة بالسوء 

- مع انه سؤال غريب بس ايوة اعرفها و مؤمن بيها بس لية بتسأل السؤال ده 

لقيته ابتسملى و نزل من العربية و مردش عليا و اتحرك ببطئ شديد للمقابر مع انه شخص غريب جدآ و مجنون بس مهمتش بالموضوع ، بصيت قصاد منى و اتفزعت لما ملقتش فلوس الاجرة نزلت من العربية بكل عصبية عشان انادى عليه بس خلينى اقولك على الصدمة و هى انى ملقتش حد نهائى اختفى من الوجود 

اتحركت بالعربية بكل عصبية و خوف و ندمت جدآ انى نزلت طول الطريق و انا بفكر فى الشخص ده و اللى كان بيحكى عنه ، عندى فضول رهيب يطلع مين الدكتور ده و من فين و كان عايش ازاى ، و ازاى شخص مجنون زى ده يصدق كلامه 

روحت البيت و دخلت اوضى و فتحت التلفون بتاعى كنت بحاول افتكر اسم الشخص اللى كان بيحكى عنه كان اسمه اسمه ايوة افتكرت كان اسمه عمر فاروق 

الدكتور عمر فاروق 

بحثت عنه على النت و ظهرلى صورة شخص ، تلفونى وقع من ايدى من الصدمة المرعبة مكنتش قادر اتمالك اعصابى لقيت نفسى بقول : 

* هو هو هو انت 

صورة الدكتور عمر فاروق كان الشخص اللى كان راكب معايا كان هو و كان مكتوب تاريخ الوفاة يوم 

28 ديسمبر 2023  

وسبب الوفاة : مياه على الرئة 

بس افتكرت حاجة غريبة جدآ افتكرت اخر جملة قلهالى قبل ما ينزل 

* انت تعرف عن النفس الامارة بالسوء 

ساعتها ادركت حرفيآ انى مكنتش بتكلم مع بنى ادم طول عمرى عارف عنها و مؤمن بيها ، بس اول مرة اشوفها و اتكلم معاها 

********************** 

قصتى انتهت اتمنى تعجبكم ❤

لو عجبتك القصة متنساش تعمل شير عشان دعمك مهم ليا ❤