رواية الليلة_الحمراء بقلم مروة_آغا الجزء_الثالث حصريه وجديده على مدونة النجم المتوهج
 |
نرجس: ساعدونيييي مشان الله ساعدونييي
هيك كانت بتصرخ وبتستنجد وعلى صوتها التمو كل الموجودين على اليخت
للحظة وحدة حس على حالو شو عمل اتراجع شوي شوي ليشوفها عم تحاول تنقذ حالها وتحرك ايديها بعشوائية … خلال ثواني بس كان شالح جاكيتو ورامي حالو وراها ليساعدها … وصل لعندها وحاول يرفعها لتقدر تاخد نفس وهي ميتة رعبة وبتحاول تتنفس بصعوبة
مراد بقلق: نرجس نرجس ليكيني معك
شهقت وهي بتحاول تلقط نفس
مراد: لا تختنقي خدي نفس منيح يلا شهيق زفير ليكيني معك اتمددي على ايديي وارخي حالك واتنفسي منيح
عملت متل ما قلها وساعدها لتتنفس منيح
رفع راسو شاف الكل التمو عليهن وبلشو يصرخو ليساعدوهن … مسكها من كتفها ورفعها شوي فوق جسمو وبلش يسبح فيها لوصل لليخت وقف عند أول درجة موجودة تحت خط المي وحملها بين أيديه وشهق وهو بشوف منظر اجريها المكشوفة … ركا جسمها على درج اليخت وهو برتبلها فسطانها الابيض يلي أرتفع شبر زيادة ووصل لنص فخادها حاول يخفي مفاتن جسمها وطلع قدام الناس يلي بتتفرج عليهن وحطها على الأرض
كانت عم تتنفس بسرعة كبيرة لتقدر تنظم نفسها وتسعل من خشونة الملح
صرخ مراد: جيبولي مي
ركضت وحدة من العاملات لتجيب مي وعطتوا اياها
رفعلا راسها على اجريه وهو بحاول يشربها مي وهي نصف مغيبة عن الواقع لساها مصدومة بشكل ما طبيعي وتنفسها لساه مانو منتظم وعم تسعل كتير
فجأة اتذكر شي مهم صرخ بالعاملات: بسرعة روحي جيبي من جزدانها بخاخ الربو
ركضو العاملات وبلشو يدورو على جزدانها بين كتير اغراض لحتى لقوه
قرب وليد وهو بحاول يعرف شو صاير وكان مرعوب عليها
وليد: نرجس شبها … شو يلي صار
قعد بقربها وهو بحاول يساعدها بس مراد سحبها لطرفو ومن دون ما يرفع نظروا لعندو أخد مراد الشنتة من ايدين الموظفة وطالع البخاخ ووهو بحاول يرتب راسها على اجريه وبخلا عدة بخات ورا بعض وبقي ناطر ثواني وشوي شوي بلشت تهدا وترتاح
اتراجع وليد وهو بشوف انو هالشب الغريب بيعرف كتير شغلات عن نرجس وهو ببساطة الو سنين بيشتغل معها ماييعرف عنها شي !!
قرب ناجي وهو بيطمن عليها: كيف صرتي
بلعت ريقها وهي بتهز راسها من دون جواب
قرب منها أكتر وهو بيسألها: كيف صار هيك
رفعت راسها لجهة مراد اتطلعت عليه بطرف عينها بلؤم ورجعت قالت: مابعرف يمكن دخت لما قربت كتير على الحرف
ناجي لمراد: وانت منين بتعرف انو بدها بخاخة ربو … أنت بتعرفها شي؟؟
قرب جمال ليغير الموضوع وهو بيسأل نرجس بقلق: يعني مافيكي شي
نرجس بحيرة: لا مافيني شي روحو ارتاحو اسفة عطلت عليكن السهرة
ناجي: طيب حصل خير خلو البنت تاخد راحتها يلا نرجع للعشا
الكل حواليها هنوها بسلامتها ورجعوا للغرفة بس ناجي بقي ليتطمن عليها
ووليد بقي يراقب الوضع وهو بعيد
وأخيرا هي قدرت تقعد وتبعد عن هاد الشرير يلي عمل فيها هيك زحفت شوي وهي بتركي جسمها على طرف اليخت وشافت جمال قدام عيونها بيتطلع عليها وبيزورها وبيتوعدلها وبعدين مشي ولحق باقي الرجال
اتنهدت وهي بتفكر سبب تعصيبو أكيد قربها من هاد المراد !!
بعدما شغلو الضو بهالمنطقة المنعزلة من اليخت وقفت وهي بترتب شعرها وصار واضح شكل فسطان نرجس الأبيض كيف صار شفاف ويلي تحتو شبه واضح … فتح عيونو مصدوم من هالمنظر … مشي بسرعة مكان ماترك جاكيتو ورماه عليها
التفتت وهي بتزورو بلؤم وكأنها بركان رح تنفجر
مراد: لا تزوري بس فسطانك كتير اتبلل وصار شفاف
سكرت زرار الجاكيت عليها وهي خجلانة رتبتو منيح وهي بتحاول مابيبن شي تحتو
قربت منو وواجهتو بغضب: مارح انسالك اياها
مراد: انا ماقصدي وقعك بس انت فلتت ايدك مني
نرجس: كذاااااب أنت وقعتني وتركتني ومشيت
مراد: كنت بعمل حدود بيناتنا وبعدين عاملتيلي حالك شيخ الشباب ومابتعرفي تسبحي
نرجس: بدك بنت متلي تعرف تسبح بنص البحر وبالليل يمكن يجيني شي قرش شو بعمل بحالي
ضحك مراد عليها وهي زادت عصبيتها ضربتوا على كتفو وهي بتقلو: والله لفرجيك شو رح يصير فيك
بعدت عنو ودخلت لغرفة اليخت بس وقفت لما شافت ناجي بحيي مراد على عملتو العظيمة بإنقاذها خصوصا قدام الريس عبود يلي ما شال نظروا عنها !!!
مراد: لا ولو ما عملت شي هاد شغلي لما سمعت صوتها ما قدرت ما ساعدها
الريس عبود: شايف يا ناجي انا لولا مابعرفو انو شهم ما كنت خليتو عندي لك هاد صار واحد من ولادي ومابنسى فضلو لما دافع عني بالحادثة الأخيرة فداني بروحو
ابتسم مراد وهو بجاوبو: شكرا يا بيك انا والله روحي فداك
التفتت هي لتعطيه نظرة حقد شاملة وبالنهاية مشيت وهي بتحاول تكسر الأرض تحت اجريها لتخفف عصبيتها
مشيو ناجي وعبود بقرب بعض لمكان العشا وعبود بيهمس لناجي بقرب اذنه: هالبنت الها أهل
التفت لعندوا مصدوم وهو بجاوبه: لا هي يتيمة بس الها واحد بيقربها وظفها عندي
الريس عبود: مين؟
ناجي: جمال
هز راسو وهو بلف شواربو بفكر بشي محدد..
*****
بدلت تيابها بعصبية وهي بتتوعد لمراد انها رح تعلموا درس بحياته ما شافه ورح تفرجيه شو قيمتو … رجعت طلعت من الغرفة وهي لابسة نفس تيابها يلي اجت فيهن الصبح بنطلون جنز ديق وفوقو كنزة حمرا لحد الخصر رفعت شعرا المبلول كلو لفوق بشكل ذيل حصان واتجهت لعند ناجي بيك كانوا الكل راحو وبقيو بس ناجي والريس عبود وجمال ورفيقو باسل
كانت عيون الرجال كلن عليها وهي بتمشي باتجاههن قرب الريس عبود وهو بيتمعنها وبيسأل جمال: هلق هاي شو بتقربك
جمال: أبوها وصاني عليها قبل ما يموت
الريس عبود: شو عمرها؟
جمال: بنص العشرين ماني متأكد شقد
الريس عبود: أأأأأأم
رجع يلف شواربو وهو بيتمعنها من راسها حتى أجريها … أما جمال كان بيتطلع لعند صاحبو وبيغمزلو
قربت منن نرجس وهي بتقول: ناجي بيك أنا رح روح إذا مافي عليي شغل
ناجي: لأ أبدا الله معك ويعطيكي العافيه كانت حفلة كتيير منظمة والحمد لله على سلامتك
نرجس: الله يسلمك يلا عن إذنكن
كانت بدها تمشي بس سمعت صوت الريس عبود بقول: وقفي لوصلك بطريقي انا ماشي
التفتت مصدومة وهي بتلتفت لجهة جمال وكأنها بتسألة وهو هزلها راسو
ناجي: لسا سهرانين
الريس عبود: لأ خلص أنا عنجد تعبت
قرب منو وهمسلو: بكرى لا تتأخر الشحنة بتوصل بكير
ناجي: لا تاكل هم
همست نرجس: والله يابيك مالو لزوم أنا عندي سيارتي
الريس وهو ماشي باتجاهها: ما مشكلة هلق الشباب بوصلوها لباب بيتك … ما بتقدري تسوقي بعد يلي صار معك
مدلها ايدو لتمشي معو بلعت ريقها ومسكتلو ايدوا مشيوا سوا
ماكانت مصدقة أبداً انو الريس عبود بقدرو وقيمتو عم يعمل معها هالحركة … بس للأسف أكيد من وراه شي … بس يلي فاجأها ردة فعل جمال أكيد في من وراه شي ومهم كتير
وصلو لحرف اليخت حاول يساعدها لينزلو من اليخت بهدوء وهو بيضحكلها وهي بيبتسملوا قدام عيون مراد المصعوقة … بس هي فرحت كتير انها رح تحسسوا بقيمتوا ليعرف انها أكبر منو بكتير وهو بالفعل مجرد باديغارد قدامها
الريس عبود: مراد جهزولنا السيارة وخلي الشوفير يسوق سيارة نرجس وأنت سوق سيارتي
هزلو راسو ومشي بسرعة وهو بحاول يفهم شو عم يصير قدامو
خلال لحظات كان عبود بالسيارة ومراد فاتح الباب لنرجس وهي بتركب بالسيارة وبتطلع عليه نظرة استعلاء لتحسسوا بقيمتوا
عطتوا سترتو وهي بتقول: هاد بس مشان اكدلك صدق كلامي … امسك صارت مي خليك تمرض بتستاهل
كتم غيظو منها وهو بكز على سنانو
ركبت بقرب الريس عبود ورا كرسي مراد وهي بتبستملو وهو بيسألن: أنتو بتعرفو بعض ؟
كانت بدها تحكي نرجس بس قطعلها مراد كلامها وقلو: كانت بس عم تشكرني لان ساعدتها
الريس عبود: أي مراد مافي منو
لف لعندها وحط أيدو على ظهر الكرسي ليقرب منها أكتر وهو بكمل: مراد من لما كان شب شغلتو عندي ولهلق ولا يوم خيبلي ظني شهم وابضاي
ابتسمت وهي بتلتفت لعند مراد وهو بادلها بنظرة فخر
حاول الريس يحط أيدو على كتفها بس هي انسحبت شوي رتبت شعرا بتوتر واضح
الريس عبود: شقد الك بتشتغلي عند ناجي
نرجس: صارو 4 سنين
الريس عبود: ايه ياريت لو جمال مشغلك عندي من زمان كنت اتصبحت بهالوجه الحلو كل يوم
رجعت ابتسمت بخجل: هاد من زوقك
شردت شوي وهي بتفكر انو هالزلمي من زمان بشوفها مع ناجي والأوراق بين ايديها شو يلي غيرو بهاليوم
انتبهت لعيون مراد عم تقدح شرار وهو براقبها من مراية السيارة
رفعت حاجب ونزلت حاجب ورجعت التفتت لعند الريس وهي بتحاول قدر المستطاع تغيظ مراد
بعد وقت صفت السيارة عند باب بيتها وسيارتها وراهن جابها الشوفير
التفتت نرجس لجهة الريس وهي بتقلو: شكرا كتير ع التوصيلة ما رح انسالك هالمعروف بحياتي
الريس: ولو لسا في كتير لقائات رح تكون بيناتنا
هزتلو راسها وهي بتنزل وبتهمس: تصبحوا على خير
مشيت أخدت مفتاح سيارتها من الشوفير وطلعت لبيتها من دون ما تلتفت قدام العيون الستة يلي بتراقبها....
الريس عبود: يلا ع البيت مراد لا تتأخر بكرا مشان تكون بالمينا اول الواصلين
رجع مراد شغل السيارة واتوجه للبيت وفي بركان فاير جواتو وبيتمنى فورا يقدر يهديه
سكرت باب بيتها وهي بتركي جسمها عليه بتعب وبتحاول ما تطالع ولا دمعة … معقول هيك نهايتها عشيقة لرجال متل عبود
شلحت كندرتها بتعب ورمت كل اغراضها على الأرض واتحممت لبست بجامتها وطالعت السشوار نشفت شعرها ع السريع واتمددت على السرير بتتذكر أيامها كيف وعيت وكبرت تحت أنظمة وقوانين مافيها تخلف فيها … اتعلمت كتير شغلات لتنفيذ مهماتها وحتى لتحمي حالها من أي مشاكل أو أي شي بعرض حياتها للخطر بس توصل فيها المواصيل تصير عشيقة وتنزل لهالمستوى هاد !!
ليش حرام تعيش متلها متل هالبنات تحب شب ويحبها وتعيش حياة سعيدة بعيدة عن الخطر
*****
وصل الريس عبود لبيتو لقى مرتو باستقبالو
سعاد وهي بتشلّح جوزها جاكيتو: اهلين حبيبي … جوعان جهزلك شي
الريس عبود: لا اتعشيت وتعبان بدي نام
اتوجه لغرفتو وفكرو شارد بهديك الحورية يلي لفتتلوا نظروا اليوم لأول مرة … معقول شو بتشبهها نفس العيون والشبه شو ذكرتو فيها وهي من سنين اختفت وماعاد عرف عنها أي شي !!
معقول هاي يلي عندو مرأة ولا هالبنت يلي بتطير العقل
بس هو نسي إنو هالمرأة يلي ما عاجبتو بيوم من الأيام كانت صبية متل الوردة وعندو بلشت تدبل
هالرجال عندو حياة كاملة بيت نظيف ومرتب ومرة كبيرة ومقدّرة بعمرو تقريبا وتفكيرها من تفكيرو … عندو ولاد وأملاك ليش هيك شخص محتاج لوحدة بعمر نرجس؟؟
معقول بدو يجدد شبابو ولا متل ما بقولو هاي جهلة الخمسين ؟؟
أما مراد أخد سيارتو الصغيرة المصفوفة بكراج هالفيلا واتوجه لبيتو الصغير الموجود قريب من منطقة الفيلات … بيت اشتراه من تعبو وعرق جبينو ورتبو وجهزو على كيفو
رما مفاتيحوا مع جوالو على الطاولة كالعادة وشلح كندرتو وتيابو وهو بطريقوا للحمام
شغل المي السخنة ووقف تحتها وهو بيهمس: غبي ورح تبقى طول عمرك غبي … معقول تفكّر انو بهالحياة في وحدة منيحة لك رخاص كلن رخاص
*****
بمكان تاني بعيد قعدوا مقابيل بعض على كراسي خشبية قدام طاولة ازاز وبايديهم مشروبات كحولية
جمال: ما عم صدق معقول حلمنا عم يتحقق قدام عيوننا والصفقة رح تم قريباً
باسل: لك وافتتاح الشركة كمان رح يكون قريب
جمال: واخيرا رح تغمز السنارة ويلي بدنا اياه رح يتحقق
باسل: أنت متأكد من البنت لا تكون غبية وتخرب علينا كل شي
جمال: لا مستحيل هالبنت أنا ربيتها على أيديي ومستحيل تخيب ظني
باسل: يمكن إذا شافت عندو العز ما تقبل
جمال: بكسرلها راسها … بس في شي مخوفني قربها من هاد مراد
باسل: مابعتقد مراد يتطلع على هيك وحدة اصلا هو معقد من البنات بس ساعدها اليوم
جمال: لاتنسى انن اتعرفو عى بعض من قبل بس أنا نبهتها ما تشوفو … والله إذا ماكانت عم تسمع الكلمة بدي ربيها من أول وجديد … المهم يلي بدي إياه يصير
باسل: لا تاكل هم مراد مابفكر بالبنات
جمال: بتصدق شقد الي بحلم بهاليوم
اتمعن ملامحوا السعيدة وهو بجاوبو: نفس حلمي تماما
هيك جاوبو باسل بس بداخلو كان خيفان من أي شي ممكن يخربلو مخططو ويخليه يخسر رفيق عمرو
*****
#مروةآغا
تاني يوم وصلت نرجس على الشركة كالعادة شافت ناجي بيك موجود ومعو بالغرفة وليد
نرجس بتعجب: خير صاير شي جايين بكير
ناجي: لا بس في شغل مهم جيبيلنا اثنين قهوة
نرجس: حاضر
طلعت وهي مستغربة من اجتماعهن السري … بتعرف انو في شحنة بس لشو كل هالسرية !!
بعدما طلعت نرجس قال ناجي لوليد: أول الشي بتطلع على المينا بتشوف الشغل هونيك وبتاخد اوراق الشحنة وبتتجه للمطار في شحنة تانية رح توصل بتتأكد منها
وليد: ماشي … بس أنا خايف إذا الشرطة شكّت بشي
ناجي: لا تاكل هم أنت ما دخلك بشي وبالنسبة لشغل المينا رجال الريس رح يشوفوه … ونرجس أبداً ما بتاخدها معك رح اشغلها هون منخاف يصير شي ما بالحسبان
وليد: لا واكل هم هاي ما أول مرة بتصير
ناجي: اكيد بس الوضع هو السيئ
هز راسو وهو بفكر بقلق وقف بدو يمشي بس دخلت نرجس بالقهوة
نرجس: ما بدك تشرب؟
وليد ببرود: لا عندي شغل عن إذنكن
من دون ما يرفع عينو لجهتها ولا يضيف شي تاني طلع برا المكتب وبرا الشركة كلها باتجاه المينا
قدمت القهوة لناجي بيك وهي بتقول: راح مشان الشحنة
ناجي: أي في شغل مهم هلق جيبيلي المصنف لوقع الأوراق لأن بدي اطلع اليوم ما رح ارجع
طلعت برا المكتب وهي بتفكر بوليد وطريقة تعامله معها … معقول بدر منها شي زعجو ولا خلص فقد الأمل منها ومل وبدو يدور على وحدة غيرها لأن هي ما بتناسبو !!
*****
بنفس الوقت كان مراد واصل على الشركة واتجه لمكتب الريس عبود يلي على غير عادتو كان موجود بكير
الريس عبود: اتأخرت كتير يامراد
مراد: أسف بس الطريق زحمة … امرني شو الخطة
الريس عبود: أول الشي بتروح على المينا بتراقب الشحنة لتنزل … فورا بتحملها بالشاحنة السودة وبتبعتها لعندي مكان ما قلتلك وباقي الشحنة بتحطها بالشاحنة الحمرا وبتمشي الأمور كالعادة مع رجال ناجي … بدنا نكون حذرين هالمرة لان العيون كترانة حوالينا خصوصاً بعد اخر حادثة
مراد: حاضر يابيك
الريس عبود: بدي تنتبه كتير بعد يلي صار قبل صرنا نخاف من أي غلط
مراد: لا تاكل هم
نزل ركب بسيارتو وطلع باتجاه المينا
بعد ساعة كانو مراد ووليد عند المينا عم يتفقوا مع العمال كرمال الشحنة يلي بدها توصل كل واحد واقف مع رجالو عم يؤمروهن كيف بنفذو المهمة
مراد: اهلا والله من زمان ماشفناك
سلم عليه وليد ببرود وهو بقول: نحنا منجتمع وقت الشغل الدسم
ضحك مراد وهو بقلو: ثقة ناجي بيك صايرة قوية فيك
وليد: كلو بتعبي وعرق جبيني
مراد: بيعجبني تفكيرك بس اوعك تعلا كتير بعدين بتنكسر رقبتك
قطعلن حديثهن صوت انثوي بيعرفوه اثنيناتن كتير منيح
نرجس بصدمة: انتو رفقات !؟
لفو اتنيناتن لجهتها ليشوفو قدام عيونن نرجس متل مابشوفوها كل مرة جميلة وناعمة بلباسها الكلاسيكي بنطلون جلد اسود مع بلوزة زهر وشعرها الاسود مفرود على ظهرها وحابسة قسم منو ببكلة سودة وغرتها مرتبة فوق جبهتها عاطيتها تدويرة خاصة لوجهها
نرجس: شبكن ردو !!
كانو اتنيناتن بيتمعنوا ملامحها منيح تحت بريق أشعة الشمس
اتنحنح مراد وقال: مارفقات بس فيكي تقولي هيك شي
وليد بحدة: أنتِ شو جابك لهون
نرجس بصوت عالي: جاي اتطمن على الشحنة ولا لا يكون هاد شغلك لحالك بس
وليد: لا بس انت مادخلك بشغل المينا ولا عاجبتك الجية لهون
نرجس بعصبية: وليد ليش هيك عم تحكي معي !!
مراد: شبكن ليش عم تتخانقو
جاوبو وليد بحدة: انت ما تدخل !!
التفت لعند نرجس وهو بيتذكر قبل بليلة شو صار باليخت وكيف مراد ساعدها بمرضها ياترى كيف بيعرف !!؟؟
قرب وليد منها وهو بحاول يكون لطيف بكلامو: ما هيك قصدي بس انو لو بقيتي بالشركة خصوصاً انو ناجي بيك مانو بالشركة مشان اذا صار شي اضطراري
نرجس: أي لان مانو بالشركة مافي شغل قلت بجي بساعدك
وليد: خلص ارجعي انا بكمل مع رجال الريس
قاطعو مراد وهو بقول: على فكرة انا الي اسم
التفت لعندو وهو بقول بعصبية: بيعني سكوتك هلق
كمل بقلبو(ماني طايقك)
مراد: نرجس عنجد لازم تروحي هالشغل مانو شغلك
نرجس: وانت التاني شو دخلك اوعك تفكرني نسيت يلي صار
وليد: هلق أنتو منين بتعرفو بعض !؟
نرجس: لا شو بدي بهالمعرفة بس صدفة زبالة
اتدايق مراد من جملتها بعد عنن وهو بيهمس: صح زبالة
كانت عم تراقبو وهو بيبعد بنصر خصوصاً انها قدرت تغيظو من بعد يلي عملو قبل بليلة معها
شافها وليد كيف التفتت لجهة مراد وانغاظ كتير قلها بحزن: نرجس
التفتت لعندو وهي بتهمس: ايه!؟
وليد: منين بتعرفي مراد
نرجس: قلتلك صدفة
وليد: كيف بيعرف انك مريضة ربو !
بلعت ريقها من دون ماتجاوبو
اتغيرت نبرة صوتو وهو بقول: خلص نرجس روحي ارتاحي انت ما لازم تنزلي ع المينا الشغل هون للرجال
ماعرفت شو تجاوبو فعصبت عليه وهي بتقول: وأنت شو دخلك فيي … لا تكون ناوي تاخد كل الشغل الك وتطالعني برا
وليد: أنت شو بتحكي مافي هيك شي بس هاي أوامر البيك
نرجس: أي لا تاكل هم بشوف الشغل وبروح
نفخت وهي بتحاول تبعد عنو وتتجه لكورنيش البحر
وليد: انا اسف بس كرمال مصلحتك
نرجس: خلص اتركني بحالي هلق بروح
كانت معصبة منو ومن برودو وتقلباته المستمرة بالتعامل معها بتكره الرجال الضعيف والبارد ويوم عن يوم عم تكتشف انو وليد من النوع يلي مابتفضلو يكون بحياتها … بس عم تخبي هالشي ع حالها وتغمض عيونها عن عيوبو عل وعسى يقدر يخلصها من الوحل يلي واقعة فيه
اتطلع وليد على ساعتو ومشي مستعجل وهو بيلعن الساعة يلي خلتو يتعلق فيها … بعد عنها معصب وهي انزعجت من كلامو كتير حست بدو ياخد مكانها ويتريس عليها … مشيت بين الرجال وهي عم تدور عن حدا معين بس كانت عم تبعد اسمو وصورة
شكلو عن بالها خصوصاً إنها معصبة كتير منو
كانت عم تدور بعيونها عليه لما سمعت صوت تصفيرة وراها
التفتت لتشوفو قدام عيونها وهو بقول: ماقلك رفيقك روحي خلص روحي شقدك عنيدة الشغل صار جاهز والشحنة رح توصل
اختصرت الحديث وهي بتقول: عن إذنك عندي شغل
وقف لثواني وهو بيتأمل سحر جمالها … سحر الشرق بيتجلى بصورة وجهها … عيون بتتحول من العسلي الصافي للاخضر احياناً عم تشع منهن تعويذات السحر والجمال … شفايف مليانة لحد الاغراء … شعر بنافس الليل بسواده … وفوق كل هاد جسم بيتنافس عليه اكبر الشعراء لوصف فتنته الطاغية
(بكفي تطلع عليها بهالطريقة الوقحة ياولد)
هيك كان بيهمس لحالو ورجع يستفزها وهو بقول: بس أنا يلي بعرفو انو مالك شغل هون اليوم
نرجس: وأنت شو دخلك لسا كل واحد بقلعني من جهة
مراد: هيك الأوامر ما لازم تكون ولا بنت موجودة هون
نرجس: أنا هاد شغلي لازم نظم الشحنات واعرف إذا كاملة أو لأ
مراد: لك من كل عقلك يلا روحي احسن ما احكي مع الريس عبود
نرجس: ونسيت تعتذر مني على يلي عملتو امبارح
حط ايديه بجيبتو ورفع كتافو وهو بقول: بس انا ما بعتذر
انصدمت وهي بتقول: نعم !!
مراد: متل ما سمعتي انا مابعتذر من حدا
نرجس: شايف حالك وكتييير كمان
فجأة اجاهن صوت ناعم من بعيد: هلووو
التفتو اتنيناتن لمكان الصوت ليشوفو قدام عيونن هديك الشوفة
بنت صبية بعمر نرجس تقريبا بيضة بياض القطن طويلة بشعر أشقر لابسة تنورة حمرا ديقة واصلة لحد ركبتها وفوقها قميص أبيض مفصل كل جسمها وفاتحة منو أول زرين
مراد ببسمة: اليزابيت كنت ناطرك
نرجس بلؤم: ما على اساس مافي بنات
مراد بحاول يغيظها: ماكل البنات
اليزابيت: وااااو مراد … أيييي ميس يوووو سووو ماتش
مراد: وانا كمان اشتقتلك … who are you ؟؟
اليزابيت: نو نو اهكي أربي أنا أحب أربي كثيراً
نرجس بتحاول تقلدها: لتكوني بتعرفي تحكي أربي بالأول
اليزابيت لنرجس: !!sorry
مراد: نسيت عرفك اسمها نرجس
اليزابيت: واااو اسم جميل
رفعت كتافها بشخامة وهي بتقول: اكيد جميل متل صاحبتو
رفع حواجبو وهو بقول: مغرورة
حطت ايدها على خاصرتها وهي بتقول: واثقة من حالي
قربت اليزابيت وهي بتقول: What do you say
(شو عم تقول)
التفت مراد وهو بقول: Nothing … The shipment arrived
(ولا شي … الشحنة وصلت !؟)
حطت ايدها على كتفوا وهي بتهمس: اوكيييي
لفتلو راسو لعندها وهي بتهمس: انا روح … بكرا اجي نشوف بلاد عربية جمييييلة
مراد: اوكي Another time (وقت تاني)
اليزابيت: ارشووووك ارشوووك
ابتسملا وسلم عليها باستو من خدو ومشيت وهي بتلوحلو بايدها وبتطلع بالسفينة
بعدما راحت قالت نرجس بلؤم: ارجوك اسمها ارجوك … حنك اعوج
مراد: اجنبية متعلمة عربي شو بدك يطلع منها يلا انت روحي على مكتبك
نرجس: انت مادخلك ما تتحكم فيي
مشي خطوتين وهو بقول: مغرورة
بعدت عنو وهي بتقول: متعجرف
بقيت واقفة مكانها بتطلع لأثره بعدما مشي بسرعة وهو بيتأكد من الشحنة متل ما امرو الريس عبود وبعت الشاحنة المهمة للمكان المناسب وبقي ناطر باقي الشحنات لتجي
*****
وصل وليد على المطار متل ما قلو رئيسه وهو ناطر الشحنة المتفق عليها توصل كان واقف عند مكتب الاستيراد وهو بيتعرق
الشرطي بشك: خير فيك شي
وليد: لا ابداً بس يمكن بدي امرض
حسو الشرطة فيه شي وقررو يفتشو الشحنة يلي وصلت لهالشخص تفتيش شامل
على صورة الكاميرا واضح شوفي داخل هالصناديق
وهو زاد من توترو
امر بفتح جميع الصناديق الموجودة وبلش التفتيش ووليد بلش قلبو يدق جوا ضلوعو من الخوف
الشرطي لرفيقو: في سلاح وقفوه
فتح عيونو مصدوم وهو بقول: سلاح شو يابيك مافي شي من هاد !!
لفولو ايدو ورا ظهرو وهو بفكر بقهر: عملتا فيي يا ناجي حطيتها بظهري !!!!!
*****
فتحو الريس عبود وناجي أول حاوية وصلت للمكان ومسكو بايديهن اول سلاح وهني بيتمعنو منيح
الريس عبود: سلاح نظيف
ناجي: لكن هدول بعرفهن من زمان شغلهن كلو نظيف
الريس عبود: وشو بدو يصير بالمطار: لعبة قوية وحياتك
ضربو على كتفو وهو بقول: وححححش العاب
ضحكو اتنيناتن سوا وهني بشوفو البضاعة يلي بتسوا ملايين قدامهم
*****
بقيت نرجس واقفة بعيد بس خلتو تحت عيونها وبقيت ناطرة الشحنة لتوصل أو بالأحرة بقيت لتراقبو لحتى وصلت الشحنة الخاصة بشركة ناجي بيك
قربت باتجاه الحاويات لتتأكد من كل شي بس فجأة طلع صوت رصاص خلا الدنيا تصير ساحة حرب
ومن بعده صوت سيارات شرطة عبت المكان
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق