جميع الروايات كامله

اعلان اعلى المواضيع

 رواية الليلة_الحمراء مروة_آغا الجزء_الثاني حصريه وجديده على مدونة النجم المتوهج 

رواية الليلة_الحمراء مروة_آغا الجزء_الثاني حصريه وجديده على مدونة النجم المتوهج 

ركضت من غرفتها وهي مرعوبة لتشوفن واقفين مقابيل بعض

همس جمال: مراد شو بتعمل هون؟؟

جاوبو مراد: لا أنا بس … بس

ركضت نرجس وسكرت الباب حتى الجيران مايسمعوا شي من هالمشهد العظيم

جمال: نرجس شو عم يعمل هاد هون لا تكونيييي !!

وقفت بيناتن وهي بتبرر لجمال: لا لا تفهم الوضوع غلط هو بس كان أمبارح تعبان وأنا ساعدتو

التفت وهو بقلها: وأنت من ايمات فاتحة بيتك جمعية للمساعدة

مراد: بكفي اتروك البنت بحالها شافتني متصاوب ومرمي وحبت تساعدني لا تكبرها

جمال: كيف يعني متصاوب مين عمل فيك هيك

مراد: قصة طويلة

جمال: يعني بالشغل !؟

مراد: بعدين بحكيلك … أنتو منين بتعرفو بعض؟

هلق نرجس صار قلبها بين أجريها

جاوبو جمال: بتقربني

نرجس: وأنتو منين بتعرفو بعض؟

مراد: من الشغل

التفتت نرجس لعند جمال وهي فاتحة عيونها وكانت بدها تحكي ع الشغل المشترك بيناتن بس جمال رفع حواجبو حتى ماتحكي شي

شاف مراد التوتر بيناتن بس قطع الجمود وهو بقول: جمال ساعدني لأطلع من هون هلق بكون البيك عم يدور عليي

التفت جمال لعند نرجس وهو بقلو: يلا بس عندي كلمتين لهالبنت

بكل قوتو سحبها من ايدها وجرها وراه ودخلوا لجوا الغرفة وسكر الباب وراه

رفع ايدو مراد وهو بسرح شعروا وبيهمس: اي واضح بس يتقربو !! … وسكروا الباب كمان … الله يسترنا

وبعدين بلش يسمع صوت صريخ جمال عليها

جمال: أنت ما بتفهمي بتعرفي أنو شغلنا حساس ودخلتي هالشب الغريب لعندك شو عرفك مين هو وشو بدو منك يمكن يكون حدا شافك أمبارح وعملوها كلها لعبة عليكي لحتى يوقعونا

كانت واقفة قدامو وهي مكتفة ايديها وبترجف

بلعت ريقها مرعوبة والفكرة ما خطرت على بالها ابدا

نرجس: والله ما بعرف بس كنت متدايقة من يلي صار امبارح ولقيتوا قدامي مرمي وانا بعرف عالج جرحى خفت يموت واتحمل ذنبو مشان هيك بس

جمال: نرجس هالشي مابدي ينعاد فهمانة

هزت راسها بتعب وهي بتقلو: يعني هو بيشتغل معنا

فتح الباب وهو بيطلع وبقول: لا

كمل جملتو باتجاه مراد: أنا رح جيب السيارة لتحت الباب لأخدك جهز حالك

حاول يوقف شوي شوي وهو موجوع … ونرجس واقفة بقرب الباب بتستجمع نفسها

طلعت لعندوا بعدما روقت وحاولت تساعدوا ليلبس قميصوا المقطع من دون ما تطلع عليه وهو كانت عيونو عليها وزعل كتير لان عيونها صار لونن احمر وواضح انو جمال زعلها بكلامو

واخر الشي لبستو جاكيتو الجلد الأسود وهو بيتمعن شكل وجها وجمالها الفاتن

مراد بهمس: أنا أسف سببتلك مشكلة

نرجس ببسمة مصطنعة: متعودة

مراد: ليش لتسمحيلو !! مين هو !؟

ماجاوبته وحاولت تغير الموضوع … قربت من أذنو وهمست: يعني أنت ما اسمك ميدو

مراد: حاولت قلك الأسم يلي بحبو ماكان الي خبر انك بتشتغلي بالمجتمع يلي بشتغل فيه

نرجس بصدمة: بتشتغل مع جمال ؟؟

مراد: لأ ابداً شغلنا مع جمال مجرد صفقات مع بعض

كمل لبسوا وهو لسا بيتمعنا ولاحظ انتفاخ عيونها العسلية المالية للخضار وصار لونهن أحمر

همسلها: لا تبكي

بتحدي واجهته: أنا ماببكي

ابتسم مراد وهو بواجه هالبنت العنيدة وكمل: متل ما بدك بس أنا مارح أأذيكي ولا رح جيب أسمك ابدا

نرجس: ليش أنت كنت جاي تأذيني !!

حرك راسو يمين وشمال وهو بيسألها: ليش أنت شو بتشتغلي؟

ماجاوبته بس قالتلو: دير بالك على جرحك اكيد رح ينتفخ اليوم بدو تنظيف ولازمك دوا التهاب

ابتسم وهو بقلها: شكرا عذبتك معي

بقي واقف يراقبها وهي بتراقبو من دون ما تجاوبوا لحتى سمعوا صوت جمال عند الباب

جمال بحدة: يلا أمشي

خلا مراد يتكي عليه والتفت ليزور نرجس وهي ماتت بأرضها من رعبتها

وقبل ما يطلع جمال قلها: خلال ساعة بدك تكوني بالشغل فهمانة

وطلعوا برا البيت وراقبتهن من الشباك وهني بيطلعوا برا الحارة كلها

بعد ساعة كانت طالعة باتجاه مكتبها حاكت جمال وهي بتطلع على الدرج: ما بقدر شوفك هلق ناجي بيك طالبني

جمال: ماشي بس النا حكي طويل

سكرت الخط وهي بتتنهد … شو عملت بحالها هلق حتى فعل الخير بهالحياة صار فيه ضرر !!

*****

وصّل جمال مراد لشركة الريس وهو بقلو: يلي صار ببيت نرجس مابدنا حدا يعرفو بتبقى البنت وحيدة وساكنة لحالها مابدنا يصير حكي بسمعتها

مراد: لا تاكل هم شكرا لمساعدتكن

نزل مراد واتوجه لباب الشركة استقبلوه رفقاته وهن بيتطمنوا عليه

لما وصل لمكتب مديره استقبلتوا السكرتيره وهي بتقلوا: مراد يااااخ فتل راسنا عليك

مراد: مضيت على خير

السكرتيرة: الحمد لله على سلامتك

دق الباب وفتحو وهو بقلو: مرحبا ياريس

وقف وهو بقلو بصدمة: مراااد وين كنت

قرب منو وضمو وهو بقلو: والله خفت عليك

مراد: حصل خير

الريس عبود: شو صار معك

مراد: رموني بقرب حاوية زبالة وهونيك بنفس المنطقة كان بيت رفيقي ممرض رحت لعندو وساعدني

الريس عبود: لازم نحكي مع الشرطة واحكيلن كل شي صار معك وامشي معي تروح ع المشفى افحصلك جرحك

*****

وصلت لمكتبها بشركة ناجي بيك الكبيرة … حطت أغراضها مكانن واتجهت لمكتب المدير رتبتو متل ما بحب وحطتلو الوروة متل ما بيطلب كل يوم وخلال لحظات كان واصل وهي بتحطلوا فنجان قهوتو على طاولتو

ناجي وهو بشيل السيجار من تمو: يعطيكي العافية … دقيقة بمواعيدك كعادتك

نرجس: طلباتك يابيك

ناجي: جهزيلي الشغل والأوراق

نرجس: لبين ماتشرب قهوتك بكونو صارو عندك … بس بدي اسألك عن الحفلة يلي بتجهزها حضرتك هالأسبوع

ناجي: أي صحيح ذكرتيني … أجلتها شهر زمان لأن الريس عبود اتعرض لحادثة ومارح يقدر يحضر وخصوصا أنو ايدوا اليمين مارح يكون معو لهيك يمكن لبعد شهر أو أكتر متل ما بيطلب … هلق خليكي مركزة على أوراق الشركة الجديدة

هزت راسها وهي بتهمس: أوامرك يابيك

طلعت قعدت على مكتبها وهي بترتب أوراق الملف الخاص بالشركة الجديدة وأول مشروع كيف رح يتنظم وكيف رح يتسلم الشغل للموظفين

رفعت سماعتها وهي بتحكي مع مكتب الإدارة الخاص بتنفيذ المهمات يلي بتوكلن اياها نرجس

نرجس: صباحوووو تعالي لعندي

خلال ثواني كانت سارة موجودة عند المكتب

سارة: صباحو ياحلو

قعدت على المكتب وهي بتمسك فنجان قهوتها وبتشف منو

نرجس: مابتبطلي عادتك

سارة: مابقدر بحب غيظك وبعدين هاي قهوتك غير شكل بكرا بدي جيب كاسة حرارية خاصة فيي مشان تحسبي حسابي معك

ضحكت وهي بتاخد منها الكاسة وبتشف منها

سارة: وين كنتي امبارح حاكيتك مارديتي

اتنهدت نرجس وهي بتفكر قبل بيوم كيف كان معجوق بالشغل والمصايب

رفعت كتافها وهي بتهمس: ولا شي نمت بكير

سارة بشك: في حدا بنام الساعة 8

نرجس: يعني مانمت بسرعة بس قعدت اقرأ وسكرت تلفوني مشان ماحدا يقطعلي سلسلة افكاري بتعرفي القراءة بتاخد معي ساعاااات وبعدين ونمت وأنا بقرأ

سارة: أنت غريبة يابنت خايفة بيوم من الايام يصير معك توحّد

نرجس: بكون أحسن ليش في احلى من الوحدة

وقفت وقربت منها وضربتها على كتفها وهي بتهمس: شو هالحكي هاد بعد الشغل منطلع سوا بتتغدي عنا من زمان ما اجيتي ماما اشتاقتلك

نرجس وهي بتكتب على كمبيوترها: مابدي

سارة: والله بزعل منك بعدين طابخين محاشي ع كيف كيفك

ابتسمت نرجس وهي بتحس بحنية هالبنت وهزتلا راسها بخجل وهي بتهمس: طيب بشوف اذا ماعندي شغل

سارة: اي دخيلك الشغل ما بيخلص انا اخدتك غصب عنك … صحيح ليش ناديلي؟؟

نرجس: والله نسيتيني بكلامك يلي ما بيخلص بدنا نتقلع من وراكي هههههه

ضحكت سارة وهي بتاخد الملف من ايد نرجس وبتتصفحو

سارة: والله هالشركة الجديدة رح تكون فانتاستك جاي ع بالي انتقل عليها بكون فيها شباب جديدة يمكن لاقيلي شي حليوة

نرجس: من طول عمرك عينك زايغة

سارة: وأنت من طول عمرك معقدة

قالت جملتا وطلعت ونرجس بقيت قاعدة مكانها صدومة … سارة ماقصدها شي بجملتها بس نرجس اتدايقت كتير … يمكن ما بكيفها صارت معقدة بس هي ما بتعرف انو بكيفها ما قادرة تطلع من العقد يلي عاشت فيها !!!

بعد ساعة خلصت شغلا وراحت لمكتب جمال يلي بيشتغل بنفس الشركة تحت أيد ناجي بيك وهو مستلم عنو كل الشغل تقريبا

نرجس: مرحبا

جمال: اهلين والله بست الحسن والجمال

نرجس: شوفي هلق قلتلك شفتو تعبان وساعدتو خلص هاي اخر مرة

جمال: شباب حواليكي مابدي شوف فهمانة هلق في شي أهم شغلنا أهم وبعدين لما نخلص اعملي يلي بدك اياه

ابتسمت نرجس وهي بتهمس: شباب شو أنت برأيك في واحد رح يكون الو علاقة بوحدة متلي

جمال: وأنا هيك عم قول

جرحها جرح كبير ماردت أبداً وماعرفت شو ترد بدا تقلو معك حق ولا تصرخ وتطالبو بشي مابيقدر يعطيه !!

*****

داخل غرفة مكتب ناجي كان حامل تلفونو وبيحكي فيه مع الريس عبود

ناجي: متل ما قلتلك امبارح انقتل جوا بيتو

الريس عبود: ومين يلي قتلو

ناجي: قالو دخل لعندو شب من الشباك وقتلو بس يلي بفكر فيه كيف ماقاوم ولا صرخ

الريس عبود: مافي كمرات مراقبة بعرفته؟

ناجي: لا ابداً هاي الفيلا كان يستخدمها لامورو الشخصية وماحط بالغرف كمرات حتى ما يتصور بأوضاع مشبوهة وسمعت من الحراس كان في بنت عندو بس سكرو على الموضوع حتى ما بنفضح

الريس عبود: هاي ما أول حادثة بتصير من هالنوع برأيك الدور جاي علينا ما؟

ناجي: وهاد يلي بفكر فيه الهيئة يلي فوق خلصو شغلن معو … لازم ناخد احتياطاتنا

الريس عبود: أي أكيد لازم وخوصاً بعد الكمين يلي صار معي امبارح لولا ستر الله كنت رحت فيها

ناجي: هالفترة لازم نوقف كل الشغل المشبوه

الريس عبود: وأنا هيك بقول

ناجي: لازم تحكي مع البرنس وتحكيلو شو صار

الريس عبود: البرنس بكون عرف أول واحد نسيت انو كل شي بيمشي من تحت امرو

سكر الخط وبقي عم يراقب الشارع من شباك مكتبو العالي وهو حامل فنجان قهوتو وبفكر بتركيز بالأيام الجاية

*****

لما انتهى الدوام اجت سارة لعند نرجس ليطلعوا سوا متل ما اتفقو

سارة واقفة عند الباب: يلا ماخلصتي

نرجس: عندي شوية شغل روحي أنت

كانت قاعدة هي ووليد شب بيشتغل بالشركة وشغلو نفس شغل نرجس تنظيم العمل وتجهيز الشحنات والإشراف على وصول الحاويات على المينا

وليد: روحي أنت أنا بكمل شغل

نرجس: لا شو هالحكي حرام بتتعب

عدل نظاراتو وهو بقلها: تعبك راحة

ابتسمتلوا بخجل وهي بتراقب تصرفاتو وكيف بيتلبك لما بيحكي وبيخجل لما تلتقا عيونن ببعض … كان شب بأول الثلاثين أبيض بملامح هادية وشعر أسود ناعم ومسرح بطريقة مرتبة ولابس طقم كحلي تحتو قميص سماوي فاتح وكرافة كحلية كان واضح عليه انو رجل أعمال بامتياز

اتنحنحت سارة وهي بتحاول تخبي ضحتها: هووو ياجماعة

التفتو اتنيناتن لعندها وهي كملت كلامها: شو قررتو

نرجس: روحي غير يوم بجي او بلحقك بعدين

وليد: قلتلك روحي انا ماعندي شي بكمل شغلي وبكرا منطلع سوا ع المينا

هزت راسها وهي بتسحب اغراضها من على مكتبها وبتهمس: شكرا كتير الك

سحبتها سارة من ايدها وشنكلتها ونزلو سوا باتجاه السيارة وسارة بتهمس بصوت خفيف وغريب لتحاول تقلد صوت وليد: تعبك راحة

نرجس: خرسي لا يسمعك

سارة: لك الزلمي دااايب عالاخر

نرجس: أنا بحياتي ما شفت شب متلو شهم وخلوق وحباب

سارة: أيه أيه كملي وشو كمان

نرجس: خلص سارة سكري ع الموضوع بيني وبينو مافي شي ولا رح يصير

سارة: ليش هيك بتحكي

نرجس: لان وليد مجرد زميل ما اكتر

سكرت ع الموضوع وهي بتركب بسيارتها وبتركب سارة بقربها

كل الطريق كانت سارة بتقلب بالاغاني وتغني معهن ونرجس عم تفكر بشي تاني معقول تقدر تكون انسانة طبيعية … انثى متل هالبنات وتقدر تتجوز وتبني عيلة مع شخص تحبو ويحبها … ولا جمال رح يضل واقفلها متل الحاجز بحياتها ومانعها من أي شعور انها تكون انسانة طبيعية !!

وصلت لبيت أهل سارة بيت رائع بمنطقة شعبية صغير على قدهن أمها وأبوها وأختها وأخواتها الصبيان الاثنين الاصغر منها … عيلة كلها حب وبيت دافي … أكل طيب وحنية

كل ما بتروح لبيت سارة بتطير من الفرح وما بتحس بالوقت وهي بتاكل وبتساعد سارة واختها وامها بشغل المطبخ وبعدين كاسة الشاي مع ابوها لسارة وحديثه المثقف رائع جدا وختامها فلم حلو مع صحن بوشار واكلة حلو من تحت ايدين ام سارة بتسوا الدنيا

بس كمان كل ما بتطلع من بيت سارة بتحس بالفراغ … الفراغ التام يلي عايشة فيه رغم انو حياتها احسن من كتير بنات عاشو حياة نفس حياتها الا انها مانا سعيدة

#بقلم_مروةآغا

أي مانها سعيدة بتتمنى لو كان عندها متل هالعيلة ولو ماعندها مصاري وسيارة وبيت المهم تكون سعيدة وتحس بالأمان وماتفكر لبكرا كيف رح تقضي حياتها وباقي أيامها الاخيرة وحيدة

رجعت لبيتها بعد أخر الليل وكانت مقررة تنام من سعادتها بس للأسف مانامت بقيت لطلع الضو وهي بتراقب شروق الشمس من سطح بيتها وبتشرب قهوتها وقبل ما تروح للشغل اتوجهت لمكان تاني مهم عندها كتير

وبراسها عم يدور شو صار قبل بيوم وما قدرت تعرف عن مراد مين هو ولا حتى تستفهم إذا ارتاح وطاب بعد التخبيص يلي عملتو بجرحو … وقررت تبقى بشغلها يلي الها سنين بتحاول توصلو ووصلتلو بفضل جمال طبعاً وكل يلي حوليها بيحسدوها عليه !!

قبل موعد شغلها قررت تروح مشوار مهم … مشوار بتعملوا كل أسبوع تقريبا بايام العطلة بس هلق كانت تعبانة نفسيتها واذا راحت هالمشوار رح ترتاح كتير

وقفت قدام المراية وهي بتعدل شعرها الأسود الناعم وبترتبو ورا ظهرها بربطة سودة صغيرة ومشطت غرتها يلي طولت شوي وبلشت تخبي حواجبها … ورتبت طقمها الأبيض بنطلون أبيض موديل كلاسيكي وجاكيت أبيض قصير لعند الخصر وتحتو قميص زهر فاتح

وكندرتها سودة كلاسيكية انيقة وهيك كان اغلب لبسها المخصص للشغل

ركبت سيارتها واتجهت للمكان يلي بترتاح فيه ومانسيت تجيب معها علبة حلو من النوع يلي بتحبو

وصلت لبيت كبير من عدة طوابق واول طابق عبارة عن حديقة كبيرة نصها مغلق والنص التاني مفتوح على حديقة خضرا كلها ورد وأشجار والقسم التاني عبارة عن قسم استقبال وغرف مكاتب

نرجس: مرحبا كيفكن

الموظفة بترحيب: اهلين انسة نرجس جاي بغير موعدك

مشيوا سوا باتجاه الغرفة وهي بتجاوبها: اي والله لقيت وقت فراغ قلت بطل عليها … كيفها منيحة؟؟

_ متل ماهي مافيها شي

وصلت لغرفة النوم كانت وقتها فايقة وعم تشرب قهوتها

قربت نرجس راسها وهي بتهمس: في فنجان ولا جيب معي

التفتت لعندها وعيونها كلن دموع

ركضت نرجس وضمتها

نرجس: شو كأن الي زمان ما اجيت

مسحت دموعها وهي بتقول: لا بس هيك الصدفة حلوة أحياناً

نرجس: صحيح لما بجي لعندك بايام العطلة صار شي روتيني

سحبتها من ايدها وقعدتها بقربها على الكنبة وعبتلها فنجان قهوة جابتو من خزانة جانبية ونرجس فتحت علبة الحلو

نرجس: ياسلام على قهوتك ماما

مسكتلها ايدها وهي بتقول: من زمان ما قلتيلي ماما

هلق دمعو عيونها أحيانا بتخجل تقول هالكلمة بس هلق هي بحاجة يكون عندها حدا بخصها

قربت منها وحضنتها وهي بتحاول تكتم دموعها

مسحتلها على شعرها وهي بتهمس: ليش زعلانة

نرجس: مافي شي مانمت الليل عندي شغل كتير فتعبت

رفعتلها راسها ودققت بعيونها وهي بتقلها: امي مافي شي تاني

وهلق بلشت تبكي غمرت راسها بحضنها وهي بتكي بشكل هستيري وكأن كل شي حابستو من شهور طلع هلق

وهديك بقيت تمسحلها على شعرها من دون ما تحكي وحتى من دون ما تسأل شبها تركتها على راحتها وخصوصا انها بتعرف هالبنت شقد عنيدة ومابتبكي بسهولة

بعد ساعة طلعت واتوجهت للمينا متل ما اتفقت هي ووليد وصلت كان وليد كالعادة مقسم المهام وواقف عم يشرف

نرجس بعجل: أنا اسفة طولت

وليد: لا عادي أنا اجيت بكير وجهزت كل شي

نرجس: عنجد مابعرف كيف بدي اشكرك … أنت كتير لطيف

وليد بخجل: ولو مستحيل كون موجود وخليكي تتعبي.

ابتسمت وهي بتحاول ترتب نظارتها الشمسية لتخفي اثار البكي

وليد وهو بركز نظارتو بتلبك: كأن وجهك أحمر كتير اذا تعبتي من الشمس ادخلي ارتاحي

نرجس: لا مافيني شي رايحة شوف الشباب جوا

مشيت قدامو وبعدت عنو حتى ما ينتبه انها بكيانة … غبية هلق كيف بدك تخلصي من لسان سارة وناجي لما يشوفو وجهك كيف منفوخ !!!

وهو بقي يتابع اثرها بأسى لأن حس انها عم تحط حدود بيناتن كل ما يحاول يقرب بتبعد وفضّل انو يفرجيها اهتمامو يمكن هيك تتغيير … رغم انو حاسس انو داخل بحرب خصوصاً مع اهلو اذا عرفو كيف وضع هالبنت يلي حابب يرتبط فيها !!

*****

فتح الخط الريس عبود وهو بشوف مكتوب رقم خاص وقف وهو بسلم عليه: أهلاً برنس

بصوتو الغريب سأله: شو صار عرفتو مين قتل ممدوح

الريس عبود: لهلق لسا بس عم حاول اعرف مين هي البنت يلي كانت عندو حاسسني قلبي انو الها ايد بالموضوع

البرنس: عرفتو شكلها

الريس عبود: يلي حكوه رجال ممدوح انو شعرا بني طويل كانت لابسة عباية طويلة عيونها كلهن كحل ومافيها شي مميز بوجهها لحتى تنعرف

البرنس: اذا لقيتو صورة كمرة ابعتوها مع غسان لشوفها ومنتساعد لنعرفها ونعرف شوفي وراها

الريس عبود: حاضر

البرنس: وعرفت مين اتعرضلك بيوم موت ممدوح

الريس عبود: لا أبداً كانوا ملثمين نزلو من سيارة ووجهو السلاح علينا بس يلي بيشتغل عندي ساعدني كتير وصد ضرباتهن

البرنس: صرلو شي!؟

الريس عبود: لا بعدين قدرو يخطفوه وفتل راسي عليه لحتى تاني يوم اجا وكان منيح بس ضربوه بصدره طعنة خفيفة وفي مين ساعده

البرنس: عرفتو مين ساعده !؟

الريس عبود: حكالي صديق قديم

البرنس: اتأكد من الموضوع وشو صار بالشحنة الجديدة

الريس عبود: جاهز كل شي بس خيفان اخطي أي خصوة بعد موت ممدوح

البرنس: وانا هيك بقول وقفو كل شي لحتى يتسكر على الموضوع نهائياً فهمان

*****

____ #بعد_مرور_شهر ____

بهاليوم كانت الحفلة الموعودة يلي برتبولها من شهور … والمنظمة من قبل شركة ناجي بيك للحديث عن مشروع الصفقة الجديدة يلي مشترك فيها مع الريس عبود والتحضير لافتتاح الشركة الجديدة … كانت نرجس عم تدور بالطابق الفوقاني لليخت وبتابع تنظيم الحفلة من ترتيب المكان وتجيز المشروبات والأكل … تعبت وهلكت الها شهور بتجهز لهالإحتفال

بعدما خلصت أخدت استراحة صغيرة وقعدت على جنب تشرب فنجان قهوتها على رواق وهي بتراقب غروب الشمس وبتتذكر شو صار معها خلال هالكام شهر

فجأة قعد بقربها وليد وهو حامل فنجان قهوة … بلعت ريقها وهي حاسة انو خلص رح يحكي الها شهر بتحاول تبعد عنو أو بالأحرى تهرب منو لأن دائما عم يلحقها وواضح انو بتمو حكي بدو يحكيه بس مانو متجرأ

وليد: حلو الغروب

نرجس: صح ولسا الشروق أحلى

التفتت لعندو وهي بتهمس: شي مرة شفتو

انصدم لما شاف شكل وجهها مع لون الشمس بشرتها الحنطية صارت تلمع وعيونها الخضر الكحيلة صارت تبرق برق

اتلبك وهو بحاول يبعد نظرو عنها وبيهمس: أحيانا ما كتير

وهي بعدت نظرها عنو حست بهاللحظة شقد هو ضعيف ماعم يقدر يعبرلا عن مشاعرو ويحكي الحقيقة مهما كان بتبقى هي بنت وبتخجل ورح تبقى تهرب منو وخصوصاً إذا جمال عرف بموضوعو والله ليخرب الدنيا

انتبهت على صوت حواليها التفتت لتلاقي ناجي بيك وراها

وقف وليد واستأذن ليروح

قرب ناجي وسألها: لاتكوني تعبتي

نرجس: لا عادي ماكتير بس كنت برتاح

ناجي: يعطيكي العافية تعبتي معنا بس ماباقي كتير ليجو الرجال بدنا تكوني بالاستقبال

نرجس: يلا دقايق وبكون جاهزة

رجعت شيكت على كل شي بنظرة أخيرة ودخلت على الحمامات بدلت تيابها لفستان أبيض قصير لحد الركبة بكمام قصيرة مغطية كتافها وفي الو حزام ذهبي ناعم محددلها خصرها بطريقة جذابة … وسحبت شعرها كلو على جنب وتركتو يرتاح على كتفها … وحطت لمسات خفيفة من المكياج على وجهها يناسب هاي الحفلة الهادية والرايقة

شغلت اغاني رومنسية ووقفت بقرب الشب يلي بيضيف المشروبات لتستقبل الضوف يلي وصلوا بعد غروب الشمس بدقايق لحد ما وصل جمال … ناجي بيعرف انو بتقربو من بعيد لان هو يلي وظفها عندو بس أبداً ما بيعرفو نوع الشغل السري يلي بيناتن على أساس قرايب وبس.

ابتسمتلو وهي بتسلم عليه بسمة طالعة من برا قلبها خصوصاً من أخر شغل بيناتن واخر كلام ومن بعدها من شهر تقريباً ماحاولت تشوفو ابداً إلا ضمن حدود الشغل

بعد العشا كانت خلصت مهمتها بالترتيب والتنظيم لحتى فرطت حاولت تبعد عن كل شي وترتاح

وقفها الشب يلي بضيف مشروب وبدو يضيفها

رفعتلو ايدها وهمست: لا مابشرب

شلحت كندرتها بكعبها العالي وقعدت بزاوية اليخت بين الظلام لترتاح شوي لبين ما يكملوا عشاهن الرجال

رتبت شعرا وهي بتهمس بينها وبين حالها بهمس يادوب مسموع: ناس بطرانين الله لا يشبعكن مال وشغل وشركات … قال افتتاح شركة جديدة

وفجأة إجاها صوت رجولي بقربها بقول: له له ماعيب تحكي هيك على رؤسائك

ارتعبت وهي بتحاول تلتفت لتتأكد مين هوي مع هالضو الخافت واتفاجأت لما شافتو قدامها

سألتو بحدة: أنت شو بتعمل هون ؟؟

مراد: طلعنا منشتغل قريب من بعض

كان واقف وهو حاطط ايدو بجيبتو وراكي ظهروا على حرف اليخت لابس طقم اسود مع قميص اسود مسرح شعرو كلو لورا

نرجس: كيف يعني؟

مراد: أنا بشتغل عند الريس عبود

نرجس: بس الريس عندو سكرتيرة بنت وبعرفها شو بتشتغل عندو حضرتك

مراد: أيدو اليمين

ابتسمت وهي بتقول: أأأأأه قصدك باديغارد

مراد بانزعاج: لا قلتلك ايدو اليمين ولو كنت باديغارد كنتي لاقيتيني واقف تحت بس انا المسؤؤل عن حمايته

نرجس: كلو نفس بعضوا بيبقى اسمك باديغارد

مراد: وانت بتبقي سكرتيرة لا رحتي ولا اجيتي

راقبتو بلؤم وهو ابتسم لان نجح بإغاظتها

مراد: غريب مابتشربي

نرجس: اي وين الغريب

مراد: انو بتشتغلي بهالمجتمع وبعيدة عن هالمواضيع

نرجس: عادي جدا هاد شغل ماحياتي الخاصة … ماقلتلي كيف صار جرحك؟

مراد: كتير منيح

نرجس: يعني ماخبّصت بالخياطة

مراد: هلق هني سالوني مين هالدكتور الأهبل يلي خيطلك هالخياطة هاي بس أنا ما قلتلو اسمك حتى ما تتشوه سمعتك ولا تخافي مدحت فيكي كتير

فتحت عيونها مصدومة من كلامو بس ضحكت من أخر جملة حكاها

نرجس: ياسيدي يكتر خيرك … وعرفتو مين عمل هيك فيك

مراد: شباب زعران

نرجس: بس هني كانو رح يقتلوا الريس

مراد: فاشلين ما بيطلعلن معي

نرجس: واضح انك مغرور

ابتسم مراد رفع حاجب ونزل حاجب وهو بقول: واثق من قدراتي

نرجس: بس بيبقى غرور

مراد: ع القليلة انا بحكي ع المكشوف ما متلك كنتي بتحكي من شوي ع مدرائك بصراحة عيب عليكي قاعدي بحضنن وبتنتفي بدقنن

نرجس: انت ارتاح ما دخلك

مراد: مع انو ناجي بيك كان كريم معك غريب تحكي عنو هالحكي

نرجس: ليش عم تدخل حالك بشي مالك فيه وبعدين ليش جاي وناوي تعمل مشكلة فوق ماتشكرني لان ساعدتك

مراد: بعتقد اني شكرتك ببيتك ولا نسيتي وبعدين عم حاول ساعدك لأن إذا وصل هالكلام للكبار رح تتقلعي من شغلك وبتبقي بلا بيت وبلا سيارة لان كلو للشغل

نرجس: والله سائل عني منيح؟

مراد: لكن مابدي اعرف مين انت

ضيق عيونو وهو بكمل: ومابدي أعرف شو بتشتغلي مع جمال

اتلبكت وهي بتقول: ملفات للشركة

مراد: بس ملفات الشركة خاصة بعتقد وخصوصا اذا انت المسؤولة وهيك رح تصير محط شك

نرجس بتحدي: أنت شو بفهمك بهالشغل مفكرلي حالك فهمان أنت يمكن سادس مامعك

عصب من كلمتها مسكها من ايدها قريب من كتفها وشد عليها ومشيوا لوصلو لحاجز اليخت … لفت نرجس راسها لتشوف البحر الاسود المظلم وراها بالظبط خافت من الفكرة وبلشت تتوتر

همستلو: شو صرلك رح اووقع

مراد: فيني احكيلو لمديرك انك بتخونيه وبتعطي المناقصات لقرايبك

نرجس: لا هالحكي ما صحيح

مراد: أنا شهدت كل هالموقف نسيتي كنت ببيتك وحتى فيني قول لناجي شو بتشتغلي حضرتك

فتحت عيونها مصدومة وهي بتسأله: ليش أنت شو عرفك شو بشتغل؟؟

مراد: الشي واضح بتشغلي عند ناجي لصالح جمال

نرجس بلؤم: هالشي ما صحيح ناجي شغلو لحال وكمان جمال شغلو لحال أنا انسانة تعبت على حالي لوصلت لهالشغل

مراد لسا شادد على ايدها وحاول يرجعها لورا شوي شوي وهي بلشت تخاف من فكرة يوقعها بالبحر بوسط هاد الظلام

قرب أكتر من وجهها وهمسلها: بس بتبقي خاينة

نرجس: لك بس بدي افهم انت شو فهمك بهالشغل كلك على بعضك باديغارد لا رحت ولا إجيت واحد جاهل شو الك بشغل الأوراق

من غيظوا ما قدر يتحمل رخا ايدو شوي شوي لحتى تركها وهي بتصرخ فيه: ياغبي شو بتعمل أنت … لك رح اووقع … مراد لا … مرااااااااااااد

وخلال لحظة وحدة بس كانت بالمي وهو حط ايدو بجيبتو ومشي كام خطوة بعيد عنها بدون حتى ما يلتفت وراه……

الفصل الثالث من هنا

بداية الروايه من هنا

🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

ادخلوا بسرعه حملوه وخلوه علي موبيلاتكم من هنا 👇👇👇

من غير ماتدورو ولاتحتارو جبتلكم أحدث الروايات حملوا تطبيق النجم المتوهج للروايات الكامله والحصريه مجاناً من هنا

وكمان اروع الروايات هنا 👇

روايات كامله وحصريه من هنا

انضموا معنا على تليجرام ليصلكم اشعار بالروايات فور نزولها من هنااااااااا

🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺

ادسنس وسط المقال