زهور من مجهول البارت الاول بقلم رومانتيكا حصريه وجديده على مدونة النجم المتوهج
 |
أزهار. ورد؟؟!!
ما عم بعرفك
ريما. يا ترى من مين
قربتون من أنفي شميتون وابتسمت. شبك ليه هيك عم تطلعي فيني..معقول يكونو من العاشق المجهول بس لفتة لطيفة منو عفكرة
سكتت شوي وطلعت فيني كانت متكتفة وحابسة ضحكتها...لك شبك؟!!
أزهار. هههههه قصدك من العاشق ،راحت ايام المجهول يا قلبي ولا نسيتي
قاطعتا بسرعة ...لا لا لا مو متل ما عم تفكري
حطت ايدا عتما وصارت تضحك بمكر أزهار. ههههههه ماشي...ماشي متل ما بدك
عبيت المزهرية مي وحطيت الوردات فيها عالشباك ،كان منظرهون كتير حلو وهنن عم يلمعو عالشمس قعدت جمب الشباك وصرت أتأملهون...
شريط حياتي عم بمر قدامي متل لمح البصر ذكرياتي أيامي ورفقاتي ...
كل مرحلة بحياتي الو بصمة فيها
____________________________________
____________________________________
بالبداية كانت حياتي رمادية وبلا لون ...
شوي ..شوي رسمت عالمي الخاص وبلشت أعرف انو الحياة حلوة وألوانها أحلا ، بس من يوم الي بلشت تجيني الأزهار تخربطت الألوان بنظري وتشوشت الرؤيا.
طول عمري كنت عايشة مع أبي ..الشخص الوحيد الي كنت بقدر أوثق في بعد ما ماتت ماما بعيوني وبعيونا كلاياتنا ،كانت بدا تشتريلنا أواعي العيد بس هربت وسرقت معها العيد .. هيي الي غلطت وانا الي عم بتحمل ذنبها كل يوم..وكل دقيقة..وكل ثانية.
كانت كل الدنيي كانت عليي إلا بابا كان بصفي عكل الدنيي وضل واقف جنبي لكبرت ووعيت بعدا ضحكتلي الحياة لما هدتني ايمن ليكون سندي التاني بهالدنيا والملجأ الوحيد الي بقدر اهرب في، ما كنت حابة اترك بابا بس لما تحولت حياتي لجحيم كان خلاصي الوحيد انو أهرب برا البلد وكمل دراستي انا وايمن وحياتي الجديدة ...
وهيك بلشت حياة جديدة وهدف جديد رح ضل مستمرة لأوصلو ،بتذكر اول مرة اجوني هالأزهار لما كنا طالعين من البيت انا ورفيقتي أزهار كان عندي امتحان صعب ومتوترة كتير اول ما طلعت من الباب لقيتون بوجهي وكرت مكتوب عليه
"ريما( أمل، ثقة ونقاء كزهور الغارينيا أنتِ) وموقع بمجهول شميت ريحتهون وابتسمت ويومها قدمت الامتحان كتير منيح.
طبعاً أول شي خطر عبالي انون من خطيبي ايمن بس الي صار انو ما طولت هالأبتسامة كتير مع الأسف لأنو بنفس اليوم تركنا انا وخطيبي او بالأصح هو الي تركني وحتى من دون سبب ،وبهيك بكون تأكدت انو مستحيل يكونو منو .
رفعت شعري لفوق حبست دمعتي وتطلعت بالمراية
ريما. تركني
سكتت شوي شهقت. طيب ليش؟!!
قوليلي انا شو عملتلو
سحبتني لحضنا وصارت تطبطبلي أزهار. يا روحي خلص حاج تبكي
سحبت حالي منها ومسحت دمعتي ريما. يا ترى معقول كل هالفترة عم يضحك عليي معقول ما كان بيحبني
هزت راسا بحركة سريعة أزهار. لا..لا مو معقول ابداً متأكدة انو بيحبك .. هيك عيونو كانت تحكي
لما تذكرت نظرة عيونو صار قلبي يدق بسرعة ودموعي يشرو اكتر حبست وجهي بين ايديي وما طلعت من تمي غير كلمة "ليش"...
تاني نهار طلعت الصبح بكير من بيتي من دون ما فيق أزهار واستغربت لما لقيت نفس باقة الورد الي لقيتا مبارح طنشتا وكملت مشيي .
اوقات كتير منحلم يكون كل شي عشنا كابوس ونصحى على حقيقة تانية بس دائماً بيخذلنا الواقع وهيك كانت حياتي كل ما بحلم اكتر بنخذل من الواقع أكتر بكتييرر...
بس يا ترى شو مستنيني اليوم دخلت عالجامعة مكتئبة كنت عم دور على أيمن بعيوني كنت حابة يكون كل شي صار كزب لما شفتو ارتسمت أبتسامة عوشي ودقات قلبي صارت تتسارع كان عم يضحك مع رفقاتو فراس وعبد وعم يخبرون انو في بنت حاببها ورح يخطب قريباً غابت الابتسامة عن وشي وقربت لعندون وانا عم أرجف
سلمت عليهون تطلعت عأيمن بعيوني وسألتون عن خطبة ايمن
ريما. خير ان شاء الله ليش عم تضحكو كأني سمعت انو رح يخطب
مسك ايدي ايمن. ريما!!
صرخت بأعلى صوتي وشديت ايدي منو...خراس انت ما عم بسألك ألك
عليت صوتي اكتر ودموعي صارو يشرو..جاوبوني خبروني صحيح هالحكي؟؟
تطلعو فيني وهزو راسون
ريما. بكرهك...بكرهك أيمن لأنك جبان حتى ما خبرتني شو السبب...بكرهكون كلاياتكون
سحبت حالي من بيناتون شوي شوي وحررت دموعي صرت أمشي شوي شوي كنت عم بستنا يلحقني ويجي يعتذر مني ...يخبرني انو كل شي كان كذب ...كنت عم بستنا يناديلي ويقلي مو صحيح هالحكي بس ما صار هالشي أبداً.
كل الدوام وانا منعزلة مع حالي ما حضرت ولا محاضرة حتى أحلامي عم تطاير واحد ورا التاني عالمي الخاص الي قضيت حياتي عم خطط كيف أرسمو عم ينمحا حتى حلمي بالدراسة رح يطير مع الهوا لأنو كان شرط بابا الوحيد ليسمحلي سافر وكمل تعليمي برا انو كون مخطوبة ليطمن عليي
وانا عم فكر بكل شي صار حسيت حدا عم يقعد جمبي رفعت راسي وتطلعت في وبأبتسامتو
فراس. ريما
ريما. اهلين فراس
فراس. كيفك؟
ركزت بعيونو وصرت أضحك ...بربك هاد سؤال بينسأل مو شايفني شو مبسوطة ومكيفة
فراس. أسف...
ضغط كف ايدو بقوة وتطلع فيي نظرة شفقة...كنت بتمنى تكوني اقوى
ريما. ههههه بربك
كنت بتمنى اعرف من الأول انو ما بيحبني ليش ضل معي لهلق ليه علقني بوهم وخلاني أتعلق في عالفاضي فراس خبرني ليش؟!!
فراس. ريما انتِ لازم تميزي بين الي بيحبك وبتهمو مصلحتك وبين الي ما بتهمو غير مصلحتو هو
تنهد بعمق ورجع تطلع بعيوني...ما بدي زعلك اكتر بس في شي غريب بأيمن خايف يكون متورط بشي قصة
تطلعت بعيونو وسألتو بخوف...شوو؟!...شو قصدك ما فهمت مين بيهمو مصلحتي ومين الي لاء وقصة شووو؟!!
تجاهل نظراتي وصار يحكي بسرعة فراس. لا لا ولا شي ...بالنهاية كلا شكوك انا تأخرت عالمحاضرة يالله عن اذنك
ضليت ناديلو وما يرد عليي وضلت كلماتو مترسخة بذاكرتي يا ترى شو قصدو؟!
ضليت عم فكر بكلماتو حتى حسيت راسي صار يوجعني ضبيت غراضي ورجعت عالبيت
كانت باقة الورد لساتا عالباب شلتا وفوتا لجوا وبهالمرة كان مكتوب عالكرت" ان وجدت النور داخلك من جديد فحتماً لن تضل الطريق"
وكمان موقعة بمجهول بس ما عرفت شو قصدو فيها
حاسة حالي ضايعة بنص المعركة ،ما عم بفهم شي من شي ،بتمنى لاقي بصيص أمل جواتي لأسحبو وكمل من جديد وبصيص هالأمل كان ردة فعل بابا الي ما تخيلتها ابداً لما خبرتو عن فسخ خطبتي...
احتواني بحب وخبرني انو اكيد رح يسمحلي كمل دراستي بهالبلد ،لأنو بيوثق فيني وخصوصي انو ما خرج يرجعني عالبلد لانو الوضع لسا غير مستتب، فرحت شوي وحسيت بالأمان بعد ما سكرت مع بابا
_______________________________
_______________________________
فتت عالمطبخ لما شميت ريحة طيبة كتير فتحت غطا الطنجرة وتطلعت بأزهار...ورق عنب كتيير بحبو
أزهار. لأنك بتحبي عملتلك ياه
اخدت قطعة وحطيتا بتمي...أزهار عنجد أنتي فنانة
أزهار. صحتين...كأني حاستك صرتي أحسن
ريما. يعني فيكي تقولي هيك شي ...يعني لأنو بابا سمحلي كمل دراستي هون فيكي تقولي صار الوضع أحسن بالنسبة لألي
أزهار. حلو كتير هي أول بصيص أمل لازم تتمسكي في وثقي فيني ريما كل شي رح يصير أحسن
غسلت أيديي وقعدت عطاولة المطبخ تطلعت فيها بأستهزاء وضحكت ضحكة مسخرة...هههه بطلت أوثق بحدا
أزهار. ريماا!!
ليش هيك عم تحكي؟
ريما. ما قصدي انتي او غيرك بس بتصدقي هيك أحسن لانو كل ما أوثق بحدا بيخذلني
قعدت جمبي وحطت ايدا عكتفي وعقدت حواجبها أزهار. ريما أحياناً بحسك غامضة كتيير ...وأحياناً بشوفك غير هيك تماماً بتضحكي وبتبكي بنفس الوقت ما عم بقدر أكتشف شخصيتك كل يوم بوش جديد وبشخصية جديدة
ريما. انا اول مرة انخذلت من أقرب الناس لألي مسحت شخصيتي وخلتني أكره الكل حتى خلتني أكره حالي تخيليي أزهار يكون عمرك سبع سنين فرحانة بالعيد كتيير وقاعدة جمب الباب عم تنتظري أمك لتشوفي شو اشترتلك تياب للعيد وعم تتخيلي كيف رح يكون شكلون عليكي
تنتظري جمب الباب ساعة تنتين وتلاتة وماتجي تخيلي أزهار...يجي العيد ويروح وانتي عم تنتظري أمك ومعها أواعي العيد عنفس الباب.
يجي العيد الي بعدو والي بعدو ولساتك عم تنتظري
مسحت الدمعة العالقة عطرف عينها وهزتلي براسها لكمل...أزهار. وبعدين شو صار؟؟
ريما. شو متخيلة يكون صار رح اكبر على اني بنت امها على ذل وقهر ومسبات من عيلتي كل يوم بتعرفي ليش؟؟
بس لانو امي هربت مع عشيقها وتركتني هي الي غلطت وانا الي نزلت راسي انطويت عنفسي ..صرت أكره الكل لانو الكل بدو يتحكم فيني هاد الي بدو يجوزني لأبنو وهاد الي بدو يبطلني من المدرسة وهاد الي بدو يسترني ...لك كلون حقرا
حبست دمعتها ومسكت ايدي أزهار. و أبوكي!
ضحكت من بين الدموع ...ابي ابي هو الشخص الوحيد الي وقف جمبي بوسط هالمعركة كرس حياتو كلا ألي او يمكن كره النسوان من بعد أمي بتعرفي مرة لقاني عم ببكي ليش ما عندي ام وعيلة ضمني لحضنو وقلي انو هو ابي وامي وكل عيلتي وبهدل عيلتو كلون كرمالي وكرمال معاملتون السيئة
أزهار. والله بعرف الي مريتي في صعب بس مو كل العالم متل بعضا
ريما. أزهار انا انكسرت 3 مرات اول مرة ماما بعدين عيلتي وهلق ايمن قلبي معد يستحمل
قربتني منها وضمتني ضلينا تنيناتنا ساكتين بس حسيت حالي ارتحت كتير بعد ما فضفضت نصحتني أزهار انو اقعد مع حالي وعيد حساباتي من أول وجديد وعتني عحالي من جديد وعطتني أمل
فعلاً عملت متل ما قالتلي قعدت مع حالي رتبت حساباتي من جديد واخدت قراراتي متأكدة بهالطريقة أفضل رح تكون حياتي
صحيح متل ما بيقولو لما بيشتغل القلب العقل بيوقف عن العمل وهاد الي كان عم يصير معي
بعترف ايمن ابداً ما كان شخص عادي بحياتي وفي حلقة مفقودة بالنص بس لو كانت رح تخرب النص بمسحو كلو وبعيد من أول وجديد
صرت شوفو من بعيد راقب تطلعيتو وحركاتو من دون ما يحس عليي، رفقاتو فراس وعبد دائماً يسلمو عليي ويطمنو بس هو ما يقرب ابداً معقول الأنسان بيقدر ينسى بهالسهولة !!
كل يوم أرجع من الجامعة منهارة بس باقات الورد الي عم لاقيها عالباب عم تجدد عزيمتي و عم تشغل تفكيري وتخليني بحيرة كبيرة اليوم قررت فيق بكير لشوف مين رح يحطا ضليت واقفة ورا الباب ومية حدا براسي يا ترى مين ممكن يكون ايمن ؟!!
بس لا مستحيل
معقول أزهار هي الي عم بتحطون او فراس رفيق ايمن او يمكن حدا غيرون ضليت عم فكر لحسيت بخربشة فتحت الباب وانا متشوقة كتير لأعرف مين هاد الي عم يحط الورد رفعت راسي من عالأرض وتطلعت في وانا مصدومة؟!!...#يتبع
أن وجدت النور داخلك فحتى في الظلام لن تظل الطريق.
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق