رواية حب بدون كلام الفصل الاول والثاني بقلم هناء رياض حصريه وجديده على مدونة النجم المتوهج

 رواية حب بدون كلام الفصل الاول والثاني بقلم هناء رياض حصريه وجديده على مدونة النجم المتوهج 

"الحقيقة إن الحياة ضحكت علينا.. لا الفُراق ولا اللقا كانوا بإيدينا" 

كُنت قاعدة على الشط بسمع أغنية بكل هُدوء.. أنا والكتاب والأغنية وبس.. رغم ان احنا في الشتا بس أنا بحب أجي اقعد هنا على الشط.. ممكن تقول عليّا متخلفة او مجنونة بس دي الحقيقة.. 

ابتسمت وأنا بشوف في واحد قاعد على بعد كام متر مني.. شكله بيحب يعمل كده زيي.. فقت من سرحاني فيه لما اتلقيته بيبتسم وبيبص في نفس الاتجاه اللي أنا قاعده فيه..بصيت حوليا وبالفعل مكنش فيه غيري.. 

بصيتله مرة تانية اتلقيته ضحك بصوت عالي أنا من مكاني وسمعته.. بالفعل ابتسامته قمر وضحكته قمرين.. سرحت شوية ومن غير ما أقصد ابتسمت.. 

قاطع اللحظة الجميلة اللي كنت عايشاها معاه صوت اختي وهي جاية بتقول

=ياسمين.. ياسمين.. يلا عشان الغدا جاهز.. 

دي أختي رنا وبالمناسبة بيتنا والبحر قريبين من بعض خالص يمكن الفرق بينا وبينه عشر دقايق.. بصيتله بصة أخيرة قبل أما امسك الكتاب والفرشة اللى كنت قاعدة عليها وامشي.. 

وهو بس كان بيبصلي بصات غريبة وابتسامة جميلة مقدرش أقول غير انها  خطفت قلبي.. فعلًا كان جميل بشكل جميل.. كان لابس قميص أبيض وبنطلون اسود كان شكلهم رائع عليه

=سرحتي فين يا ست ياسمين؟ 

-مفيش حاجة يا رنا وخليكِ في حالك.. 

كان سؤال استفسار من رنا اختي واللى عندها تمن سنين.. وصلت البيت ودخلت اوضتي غيرت هدومي عشان الغدا.. افتكرت انه عمل حركات بايده كده.. 

قعدت شوية أفكر في الحركات دي وقلت بصدمة

-معقولة يكون أخرس! 

ماما من برة بتزعق بصوت عالي

=يا ست ياسمين يلا استنيناكي كتير.. 

-حاضر يا ماما جاية أهو.. 

خرجت وقعدت اتغدا.. وكنت سرحانة بشكل غريب.. ده حتى ماما خدت بالها اني سرحانة.. لحد أما سألتني

=في ايه يا ياسمين؟ مالك؟ 

فقت على صوتها 

-مفيش يا ماما.. سرحت شوية بس.. 

=سرحتي في ايه؟ 

-مفيش الجامعة قربت ولازم انزل اشتري شوية حاجات.. 

=تمام هسيبلك الفلوس وتنزلي انهاردة.. 

-شكرًا.. 

خلصت الحوار اللى دار بيني وبين ماما في ثواني.. طول عمري هادية ومش بحب النقاش ولا الكلام الكتير.. وأظن ان دي نقطة لصالحي.. 

بعد المغرب بشوية.. 

كنت صليت المغرب ولبست هدومي وأخدت الفلوس من ماما ومسكت ايد رنا ونازلين نشتري حاجات الجامعة بتاعتي.. وشوية حاجات للمدرسة بتاعتها.. 

وقفت قدام المحل اللى على طول بشتري منه ودخلت.. وأنا بشتري كام كشكول كده اتلقيته واقف جنبي وبيبص لنفس الكشكول اللى انا ببص ليه.. 

مد ايده عشان ياخد بس لاحظ وجودي.. ابتسم ومد ايده اخد الكشكول ادهولي

-لا شكرا انت اخدته الأول.. 

ومفيش رد.. ساب العربية بتاعت المحل وهو بيعمل حركات بايده مفهمتهاش.. رفعت حاجبي باستغراب ففهم اني مفهمتش الحركات.. طلّع تلفونه ومن تطبيق بيكتب فيه كتب.. 

-أنا مش بتكلم فبعتذر عن الازعاج.. عموما الكشكول مكانش عاجبني اوي فخديه.. 

بصيتله بتوتر قبل أما امد ايدي واخده وقلتيله 

-شكرا.. 

وخدته وجريت حتى من غير ما يكتب الرد.. حاسبت على الكشكول بسرعة وأنا على باب المحل بصيتله بصة أخيرة كأني بودعه.. 

لقيته هو كمان بيبصلي قبل أما يرفع ايده ويعملي باي.. 

#حب_بدون_كلام_2

لقيته هو كمان بيبصلي قبل أما يرفع ايده ويعملي باي.. 

اتوترت جدًا ومعرفتش أعمل ايه.. والحمد لله أول مرة رنا تعمل حاجة صح.. جت وقالتلي

=يلا يا أبلة ياسمين عشان نروّح.. 

رديت عليها وانا لسه ببصيله

-ايوة يلا يا حبيبتي.. 

مسكت ايديها وروحنا وانا في احساس غريب جوايا.. مش عارفة اذا كان فرح او احساس اني اول مرة أعيش حاجة زي دي.. بس اللى انا اعرفه.. اني فرحانة.. فرحانة بسببه.. 

وصلت البيت وطلعنا وكان في حاجة غريبة في العمارة.. كان تقريبًا حد هيسكن هِنا مش عارفة مين اللى ممكن يجي يسكن هنا وخصوصًا ان مفيش حد جديد دخل المنطقة دي من زمان اوي.. 

دخلت البيت وبنادي على ماما أسألها على الدوشة اللى في العمارة

-ماما هو في ايه؟ العمارة مالها؟ 

=مفيش بس في حد جديد هينقل هنا.. 

هزيت راسي وانا بمشي من المطبخ راحة اوضتي مش مهتمة باللى اتقال.. مالي ومال السُكان الجداد؟ 

قلعت الطرحة وغيرت هدومي واستلقيت على السرير ببص للسقف بتاع الأوضة وابتسامة على شفتي.. افتكرته.. 

كان جميل بشكل جميل.. هادي جدًا.. أقدر أقول ببساطة انه سرق قلبي.. 

نمت من غير ما اقصد وأنا على شفايفي ابتسامة اترسمت من غير قصد.. 

______ 

=ياسمين.. يا ياسمين.. اصحي.. 

صحيت على صوت رنا اختي وهي بتحاول تصحيني.. بصوت كله نعاس قلت 

-أيوة يا رنا.. 

=الجيران الجداد جم.. 

-وأنا أعمل ايه يعني؟ 

=الراجل اللى شوفناه امبارح في البحر معاهم.. 

اول اما سمعت كلام رنا اختي.. اتنفضت من مكاني ووقفت بدور على طرحة وكنت هحري اخرج برة عشان اشوفه بس وقفت مكاني كاني صنم لما سمعت ربنا بتقول 

_اهدي شوية يا ست ياسمين.. ده انتي واقعة على شوشتك خالص.. 

اتصدمت من كلامها وانها اخدت بالها اني متلهفة اني اشوفه.. بلعت ريقي ولفيت أبصلها وببرر موقفي 

-انتِ فهمتي غلط يا رنا.. 

ابتسمت بسماجة وقالت:

_خلاص فهميني انتِ.. ولا أجيب ابن الجيران يفهمنا احنا الاتنين؟ 

فتحت عيني بصدمة من كلامها وقلت بتوتر 

-ر..رنا ايه اللى بتقوليه ده! 

_ولا اقول ولا مقولش انا رايحة اعمل واجب الدرس.. 

راقبتها وهي بتمشي برة الأوضة وأول اما سمعت صوت الباب بيتقفل ابتسمت بشدة لدرجة اني حسيت ان وشي هيتشق.. 

فجأة سمعت خبط على الباب بس كان براحة فاستنتجت ان دي ماما.. 

=ياسمين.. اجهزي عشان هنسلّم على الحيران الجُداد.. 

-الحيران الجُداد!! 

=اه واعملي حساب عندهم ابن كبير فخلي بالك.. 

خرجت من الأوضة وسابتني لوحدي وانا مش بفكر غير في حاجة واحدة بس.. هي ان كمان دقايق هتعامل معاه تاني..! 

_يتبع_

🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

ادخلوا بسرعه حملوه وخلوه علي موبيلاتكم من هنا 👇👇👇

من غير ماتدورو ولاتحتارو جبتلكم أحدث الروايات حملوا تطبيق النجم المتوهج للروايات الكامله والحصريه مجاناً من هنا

وكمان اروع الروايات هنا 👇

روايات كامله وحصريه من هنا

انضموا معنا على تليجرام ليصلكم اشعار بالروايات فور نزولها من هنااااااااا

🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺