رواية حبي الحقيقي الفصل الاول والثاني بقلم نشوه عادل حصريه وجديده على مدونة النجم المتوهج
 |
- يا بنتى فيها ايه لما تيجى معايا عشان تختارى معايا الستاير انتى زوقك حلو وكمان معنديش اخوات بنات عشان يجوا معايا
+ يا نهلة والله غصب عنى اصل عماد منبه عليا مخرجش من البيت الا لما اعرفه وانا كلمته من شويه وقالى مفيش خروج
نهلة بزعيق: انتى هبلة يا تالين ولا شاربة حاجة عماد مين ده اللى هتاخدى برأيه هو جوزك ولا خطيبك عشان يتحكم فيكى انتى دماغك دى متركبة ازاى ده انا يونس خطيبى اللى كلها كام شهر ويكون جوزى بابا اشترط عليه ميتحكمش فيا من ناحية الخروج والرجوع طالما ابويا لسه بيصرف عليا ولسه ف بيته ويونس احترم ده
تالين: اعمل ايه بس يا نهلة انتى عارفة انى بحبه اوى ومبحبش ازعله
نهلة: بقولك ايه انا اعرف ان اللى بيحب بجد بيدخل البيت من بابه انما الجو ده معناه حاجة واحدة بس انه بيلعب بيكى
تالين: بطلى كلامك اللى يزعل ده انتى عارفة ظروفه كويس وهو اكيد مش هيتقدم وهو مش معاه حق الشبكة حتى
نهلة: طول ما انتى مقتنعة بالمبررات الفارغة دى هيفضل كده ع طول يا بنتى فوقى بقى انا اللى اسمه عماد ده اصلا مبينزليش من زور
تالين: ايوة ايوة قولى بقى انك بتغيرى عليا منه يا نونو
نهلة: الحقيقة اه بس ده ميمنعش ان كلامى صح ها قولتى ايه هتيجى ولا لا
تالين: خايفة يشوفنى!
نهلة: انتى مش قولتى انك لما بتقوليله انك هتنامى مش بيرن عليكى عشان ميزعجكيش لحد ما انتى تكلميه
تالين: ايوة ولسه قبل ما تكلمينى قولتله انى هنام
نهلة: حلو اوى احنا نروح ع المول نشترى الستاير فى ساعتين زمن وترجعى ولا كأن حاجة حصلت ماهو اكيد يعنى مش هيجى المول اللى احنا رايحين عليه ها قولتى ايه؟!
تالين: خلاص اشطا مش هزعلك يا حب هقوم استأذن بابا وماما والبس واجيلك بقولك ايه ما تكلمى البت ميادة تيجى معانا
نهلة: كلمتها وقالتلى انها ف مشوار مع مامتها بينى وبينك أنا مكنتش عاوزاها تيجى اصلا
تالين: ليه كده يا بنتى؟!
نهلة: معرفش بس انا من يوم ما عرفتينى عليها وانا مش برتاحلها بحسها صفرا ومش صافية
تالين: يااانى ع سوء الظن اللى جواكى من الناس كلها ده
نهلة: ع فكرة انا عمر احساسى ما كان غلط اتجاه حد وانتى عارفة كده كويس
تالين: خلاص فكك قومى البسى ع اما اجيلك
قفلت نهلة معاها وهى بتقول: سامحينى يا صاحبتى بس انتى لازم تفوقى بقى وتبطلى طيبة زيادة
بعد ربع ساعة وصلت تالين عند نهلة واخدتها وراحت ع المول ...تالين: اشمعنا المول ده بالذات ده بعيد اوى وشكله غالى
نهلة: المفروض ان الستاير ع يونس ع حسب الاتفاق بس هو قالى اجيبها انا ع زوقى وعطانى الفلوس وقالى اجى اجيبها من هنا
تالين: ربنا يديمكم لبعض تعرفى انا اول مرة احس ان جواز الصالونات ده مش وحش اوى زى ما انا كنت فاكرة بعد ما شوفت علاقتك مع يونس
نهلة: بصراحة ولا انا طول عمرى بقول مش هتجوز الا عن حب ولما يونس اتقدملى قولت مش عاوزة ومعرفش ايه بس بعد ما قابلته ارتاحت ليه اوى وكان عندى فضول اعرفه اكتر ولما اتخطبنا عرفته اكتر وحسيت ان هو ده الشخص الصح اللى ينفع اكمل معاه حياتى ويكون اب افتخر بيه قصاد ولادى
تالين بضحك: عينى يا عينى بقينا نقول شعر الله يرحم لما كلمتينى اول مرة لما عرفتى ان جايلك عريس وكنتى بتعيطى وتقولى مستحيل اوافق مستحيل اتجوزه وهوب وقعتى ع بوزك
نهلة: اللى قاصد الحلال دايما الحب والامان معاه بيكون احلى
تالين: طب انا عاوزة افهم انتى رايحة ع فين المفروض ان الستاير والاجهزة ف الدور التانى مش هنا
نهلة: يا بنتى انا مأكلتش من الصبح وهموت من الجوع وعارفة انك لسه متغدتيش ناكل الاول وبعدين نشترى براحتنا
تالين: ربنا يصبرنى عليكى ماشى يا مفجوعة ادامى
وصلوا عند المطعم ولمحت نهلة عماد قاعد مع ميادة وماسك ايدها فحبت تلفت انتباه تالين وتخليها تشوفهم فقالت: بقولك ايه ثوانى بس هكلم يونس لانه كان رن ومسمعتوش ادخلى انتى شوفى مكان حلو نقعد واطلبى الاوردر ع اما اجى
بعدت نهلة وتابعت تالين عن بعد اللى اول ما وجهت وشها للمطعم شافتهم قاعدين وهما ماسكين ايد بعض وهو بيبوس ايدها وبيأكلها ف بوقها للحظة كذبت عيونها وبقت تدعك فيها عشان تتأكد من اللى شايفاه وقتها جات نهلة وقالت: مالك ف ايه؟!
شاورت تالين بايدها ناحية عماد وميادة ...نهلة: شوفتى بعينك يعنى انا كنت صح لما حذرتك منهم الاثنين
تالين بدموع: لا اكيد فيه حاجة غلط هما مستحيل يخونونى كده
نهلة بعصبية: ما تفوقى لنفسك بقى ده انتى شايفاهم بعينك اهو
طلعت تالين فونها ورنت ع عماد اللى لما شاف رقمها اتوتر وقال: استنى عشان تالين بترن
ميادة: اوف بقى انا مش فاهمة انت هتفضل تكلمها لامتى انت عارف انى بغيير وصبرى ليه حدود
عماد: يا روحى انا مستنى الوقت المناسب اللى اعرف اسيبها فيه وتكونى بعيد عن الصورة زى ما انتى قولتى
ميادة: ماشى رد عليها خلينا نخلص ومتطولش
فتح عماد ع تالين وقال: ايه يا روحى صحيتى
تالين بخنقة: ايوة لسه حالا اومال انت فين؟!
عماد: انا ف الكافيه مع ناس صحابى انتى اللى فين فيه صوت دوشة حواليكى انتى نزلتى من غير اذنى ولا ايه؟!
تالين: اكيد لا انا ف البلكونة
عماد: امممم وطالعة بشعرك برضه...خبطته ميادة فى كتفه وهمست جنب اذنه: انجز
تالين: لا بالطرحة انا بس كنت بعرفك انى صحيت
عماد: ماشى يا قلبى انا لازم اقفل عشان بس قاعد مع الرجالة هخلص واكلمك
قفل معاها وضربته ميادة وهو بيضحك وبيضمها ويهديها وقتها رنت تالين ع ميادة بصت لعماد بقلق وقالت: الحق دى بترن عليا ووووو....
الفصل الثاني
- الحق دى بترن عليا هتكون عاوزة منى ايه؟!
عماد: مش عارف ردى عليها عادى
ميادة: الو يا روحى عاملة ايه؟!
تالين: الحمدلله اومال انتى فين كده؟!
ميادة: انا برة بشترى حاجات فيه حاجة ولا ايه؟!
تالين: لا اصل نهلة كانت عاوزانى اروح معاها المول تشترى ستاير وانا اتحججت وكنت هقولك تروحى مكانى
ميادة: معليش مش هينفع لانى مشغولة
تالين: عادى ولا يهمك
قفلت معاها وشافتهم بيتكلموا بقلق وكانت تالين رايحة ناحيتهم
نهلة: تالين لا ميستاهلوش حتى العتاب عشان خاطرى اسمعى الكلام وخلينا نمشى
تالين: اهدى انا مش هعمل حاجة انا عاوزاهم يشوفونى بس مش اكتر
دخلت ع المطعم وطلبت اوردر وراحت ناحيتهم وقعدت ....عماد بتوتر: تا..تالين انتى هنا بتعملى ايه وازاى تخرجى من غير اذنى
تالين بضحك: يا اخى انا بجد بيعجبنى امثالك اللى بيقتلوا القتيل ويمشوا بجنازته
عماد: انتى بتقولى ايه ده ...ده ميادة كانت هنا واتقابلتا صدفة
تالين: صدفة! ده انا لسه شايفاك وانت بتأكلها فى بوقها وبتبوس ايدها ولما كلمتك قولتلى انا ف الكافيه مع الرجالة اللى انت اخرك تسمع عنهم لكن متعرفش معنى الرجولة
عماد: تالين اهدى وخلينى افهمك
تالين بزعيق: تفهمنى ايييييه انك واحد حقير وخاين سيبت الدنيا كلها وجاى تخونى مع صاحبتى قصدى اللى كنت مفكرة انها صاحبتى ليييييه
عماد: انتى السبب ايوة انتى السبب كل كلامك كان عنها ميادة عملت ميادة سوت ميادة تعبت ميادة حزينة كانت سيرتها ف بوقك زى اللبانة وخليتى عندى الفضول انى اتعرف عليها وغصب عنى اتقربت منها وهى مكنش عندها اى مانع
ميادة بعياط: انا ي كداب انت اللى كنت بتحاول تكلمنى وتتقرب ليا مرة بحجة انكم متخانقين ومرة بحجة انها قافلة فونها وواحدة واحدة قعدت تتسرب ع حياتى وعلقتنى بيك
عماد: ليه انتى مفكرانى زبالة زيك ولا ايه؟!
تالين: عاجبنى اوى الجو ده كل واحد بيحط الحق واللوم ع التانى ع ايه بقى هل مثلا هسامح طرف ع خيانته انتم عارفين انا ندمانة من قلبى بجد انى عرفتكم ودخلتكم ع حياتى
قامت عشان تمشى وقالت: اه نسيت انا طلبت الاكل ده ليكم حاجة تليق بيكم وزيكم ساندوتشات بيض سلام
مشيت تالين وسابتهم بيتخانقوا واخدت نهلة ومشيت واول ما ركبوا التاكسى ....نهلة: انتى كويسة ؟!
انهارت تالين من العياط وهى مش عارفة تاخد نفسها ... تالين: ليه حصل معايا كده يا نهلة انا عملت ايه عشان ربنا يوقع ف طريقى ناس زى دول واتجرح منهم وهما اقرب ناس ليا ؟!
نهلة: عشان ربنا اراد انك تتعلمى درس من الناس دى لانهم شبه بعض لكن انتى مش شبههم فبدل ما انتى بتقولى ليه وزعلانة احمدى ربنا انه كشفهم ع حقيقتهم وفوقى لنفسك بقى
تعدى الايام وتالين بتحاول تتعافى من الصدمة ونهلة جنبها بتحاول تهون عليها لحد ما اخدت قرار انها تنزل تشوف شغل ف شركة قرأت عنها ع النت وراحت قدمت السى فى
حاتم نائب رئيس الشركة: مبروك يا انسة تالين من النهاردة انتى جزء من التيم بتاعنا
تالين: شكرا وان شاء الله اكون عند حسن ظنك
حاتم: ان شاء الله ع فكرة انا حاسس انى شوفتك قبل كده
تالين: معتقدش يا فندم لانى مش بنسى وش حد انا اتعاملت معاه قبل كده
حاتم: ممكن اكون شوفتك بس متعاملتش معاكى عادى
تالين: ممكن ع العموم اتشرفت بمعرفة حضرتك
حاتم: انا اكتر وبكرة ان شاء الله بدايتك معانا
خرجت تالين من المكتب وخبطت فى شخص ...تالين: مش تفتح يا بنى ادم انت
........: انا برضه ولا انتى اللى ماشية مش باصة ادامك
تالين بصت ليه من تحت لفوق ومشيت دخل الشخص ع حاتم مكتبه ....حاتم: انا عاوز افهم مين فينا رئيس المخروبة دى يعنى انت تقضيها سهر وخروجات وتسيب الشغل ع دماغى انا
.......: اه عادى
حاتم بعصبية: يا فهد افهم عشان خاطرى المال السايب بيعلم السرقة
فهد: اى حد الا انت يا صاحبى
حاتم: افرض مت هتعمل ايه ان شاء الله ؟!
فهد: بعيد الشر عنك اللى يكرهك مينفعش تموت وتسيبنى هتسيب الشركة لمين
حاتم: اه قول كده انت زعلان عشان الشركة مش عشانى
فهد: طبعا يا ابنى إنما ماقولتليش مين المزة اللى كانت خارجة من هنا دى؟!
حاتم: ي جدع احترم نفسك دى هتكون موظفة عندك
فهد: ايه ده بجد هى الشركة فيها مزز كده لو ع كده انا هاجى ع طول بقى
حاتم: احترم نفسك عيب كده المهم انا حاسس انى شوفتها قبل كده بس مش عارف فين
فهد: ف المول الاسبوع اللى فات لما قفشت اثنين مع بعض وصوتهم كان عالى
حاتم: يا ابن الذين ده انت ذاكرتك من فولاذ
فهد: قل اعوذ برب الفلق امسك الخشب ياض
حاتم: ي اخى اتميل هحسدك ع هم ايه اومال لو كنت عدل شويه
فهد: بس وسيم ولطيف يا بيبى
حاتم: غور يا فهد ع مكتبك الله يصلح حالك خلينى اشوف شغلى يلا من هنا
دخل فهد ع مكتبه وشاف العقد بتاع تالين وهو بيبتسم ...عند تالين اللى وصلت ع البيت وقالت بفرحة: ي اهل البيت اجتمعوا هنا
نادين اختها: جيبتى شوكلت صح
تالين: انتى دايما كده همك ع بطنك استنى واسمعى
نادين: طب انجزى عشان عندى مذاكرة
تالين: انا قدمت ع شغل ف شركة استيراد وتصدير معروفة والحمدلله اتقبلت
حورية والدتهم: مبارك يا حبيبتى بس مقولتيش يعنى انك هتنزلى شغل
تالين: كنت حابة اعملها ليكى مفاجأة مش ده اللى كنت عاوزاه منى من اول ما اتخرجت
حورية: المهم يكون عن اقتناع
تالين: اطمنى عن اقتناع وشغف وحاجات كتير اوى
حورية: ربنا يصلح حالك يا حبيبتى
نادين: ايوة يعنى فين الشوكلت برضه انتى مش هتشتغلى ويكون ع قلبك اد كده
حورية: بنت عيب كده
تالين: سبيها تدلع براحتها...اتفضلى يا سيتى انزلى بنفسك هاتى الشوكليت اللى تحبيه
نادين: ايوة كده تعيش تالين
دخلت نادين اوضتها وفجأة رن جرس الباب ..تالين: خليكى انتى يا ماما انا هفتح
راحت تالين ناحية الباب وفتحته واتفاجئت انها ميادة ووووو....
تابعووووني للتكملة
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺
تعليقات
إرسال تعليق