سكريبت الاختفاء الغامض بقلم لمياء الكاتب كامل وحصري
حكاية صعبة جداً.. مش بس من عمق مشاعر الحزن والوجع لأصحابها.. ولكن من خلال ما تحتويه من اسئلة ليست لها إجابات حتى الآن.
ج١..
في شهر اغسطس سنة "2014".. رجع اخويا "عبدالله" من سفر دام ل 6 شهور في قلب البحر، وده بسبب شغله "كشيف" على مركب كبيرة في دولة من الدول العربية، استقبلناه بأحضان اشتياق ولهفة غياب الابن والاخ لفترة طويلة، وفي وقت ما كان بيسلم، كان في ايد بتخبط على رجله من تحت، لف وشه وبص لتحت كان ابنه "خالد".. ابن اخويا اللي يادوب طوله جايب ركبة ابوه وعمره 3 سنين ونص، ميل عليه وشده من على الارضه وحضنه وفضل يبوس فيه، ضحك خالد وهو بيقول :
ـ كفايه يا بابا نزلني وشيل "رودينا" شوية.
"رودينا" تبقى اخته الصغيرة واللي عمرها 4 شهور، ضحك "عبدالله" من براءة ابنه ومحبته لأخته لدرجة انه فضلها على نفسه، عدا وقت حكينا في عن رحلته وشغله لدرجة ما حسناش بالوقت، او زي ما بيقولوا "الوقت الجميل ما بيتحسبش من العمر".
جه وقت النوم وحل التعب على الكل، ولسه "عبدالله" هيستأذن عشان ياخد مراته وولاده ويطلعوا شقتهم، اتكلم "خالد" بلهفة طفل خطرت على باله فكرة ولازم تتنفذ، قال لأبوه:
ـ انا عاوز بكرة اروح البحر يا بابا.
ابتسم ابوه وقاله:
ـ بكرة ان شاء الله هنخرج ونتفسح، بس بلاش البحر يا "خالد".. انا معظم وقتي جوه البحر بسبب الشغل، لما خلاص زهقت منه.
ببراءته المعتاده اتعدل الولد وهو بيمثل الزعل وقال:
ـ بس انا عاوز انزل البحر بقالي فترة ماروحتش الشط.
الولد برغم سنه الصغير كان ذكي جدا، عارف ازاي ينهي اي حوار لصالحه ويضغط على نقطة ضعف ابوه، وهي بكل بساطة حبه الشديد له.. وده اللي حصل، رد عليه ابوه وهو بيبتسم بالموافقة:
ـ حاضر ياحبيبي، نروح ننام دلوقتي وبكرة ان شاء الله بعد الغدا نروح سوا البحر.
وانتهى الحوار ما بينهم على الرضا بين الطرفين، بعدها قام اخويا مع اولاده وطلعوا شقتهم اللي في الدور فوق شقتنا.. وقامت ماما وبابا وانا كمان روحنا عشان ننام، تاني يوم الصبح صحيت على صوت دوشة وعياط بنت اخويا، عرفت ان "عبدالله" نزل مع اولاده عشان يفطر معانا، فقومت وخرجت من اوضتي عشان اجهز مع امي الفطار، بعد ما خلصنا وقعدنا مع بعض، قطع اخويا الصمت اللي كنا فيه وقال:
ـ بكرة باذن الله هاخد الولاد ونروح النادي، وعدتك خالد ان هوديه البحر.
طبعا حصل مناقشة واعتراض من امي وابويا على اساس انه لسه راجع من البحر، بس كان الرد والمبرر القوي بالنسبة له، ان ابنه عاوز ده ومايقدرش يرفض له طلب، وانتهى بينهم الكلام في الموضوع ده لحد هنا، خلصنا الفطار وقعد "عبدالله" يتكلم مع مراته ويرتبوا للخروجه، وكان اول ترتيب عمله اتصال لأقرب صاحب له، اتفق معاه انهم يتقابلوا على قرب العصر قصاد نادي معروف عندنا في المحافظة.. وفي الميعاد اللي حددوه كان واقف صاحب اخويا ومراته قصاد بوابة النادي، مستنيين "عبدالله" واولاده عشان يدخلوا.
بعد السلامات ما بينهم دخلوا من بوابة النادي، اللي كان بالمناسبة نادي كبير ومش اي حد بيدخله بسبب اسعار اشتراكه، بعد ما ظبطوا قعدتهم على ترابيزة قصاد البحر على طول، ولسه يادوب بيرتبوا حاجتهم قال "خالد":
ـ عاوز انزل البحر يا بابا.
رد عليه اخويا وهو بيحاول يفهمه انهم لسه واصلين:
ـ احنا لسه واصلين، استنى شوية وبعدين هنزلك البحر.
على حس طلب "خالد" واصراره الغريب انه ينزل البحر، اشتغلوا ولاد صاحبه زن عشان هم كمان ينزلوا البحر، بس قابلت امهم طلبهم بالرفض على اساس انهم لسه واصلين، وده مش وقته.. كل ده عادي شد وجذب بين الاطفال واهاليهم بسبب طلباتهم اللي مش في وقتها، بس في وقت ما كانوا بيتجادلوا على نزول البحر صرخت "رودينا" بنت اخويا، ماكنش عياطها المعتاد اللي امها متعودة عليه، البنت كانت بتصرخ بشكل هيستيري مش طبيعي، لدرجة ان اخويا ومراته اتوتروا وقاموا من مكانهم عشان يسكتوها، وقفت امها وجنب منها اخويا وهم مش فاهمين سبب صراخها، ماعداش لحظات وهم واقفين مديين ضهرهم للبحر، وقتها انتبه اخويا ان ابنه "خالد" مش موجود، اتلفت شمال ويمين ناحية ما كانوا قاعدين وقال بقلق:
ـ خالد راح فين؟
وقبل ما حد يتكلم ومع صدمتهم من سؤاله، لف "عبدالله" وشه ناحية البحر لما افتكر زن ابنه على انه يروح عند الشط، جري بسرعة ناحية الشط وفضل يبص في كل الاتجاهات على امل انه يكون واقف، "خالد" كان اخره انه يقف على الشط لكن يدخل المايه ماكنش يقدر يعمل كده، فضل اخويا ومعاه صاحبه يجروا هنا وهنا ومافيش اثر للولد، مراته وقفت مصدومة على اختفاء ابنها وعلى ايدها بنتها لسه بتصرخ، صراخها كان عامل زي جرس تنبيه ان في كارثة هتحصل، بس هم مافهموش ده.
جري اخويا ناحية سقالات الامان اللي على الشط، واللي كان عددهم تلاته صرخ على غطاس من اللي كانوا موجودين فوق السقاله وقال:
ـ ابني اختفى من على الشط.
قام مراقب الشط وضرب صفارة الانذار، الصفارة اللي بتنبه باقي الغطاسين ان في حد بيغرق او غرق جوه البحر، وعلى اثر صفارته الدنيا اتقلبت، نزلوا الغطاسين من على السقالات وجريوا ناحية المكان اللي شاور عليه اخويا، بالتحديد قصاد الترابيزة اللي كانوا قاعدين عليها، لحظات عدت عليهم انتظار وترقب وقلق مالوش وصف على الابن اللي مش عارفين راح فين، وخرجوا الغطاسين بدون نتيجة ترضيهم سواء كان معاهم الولد لسه في الروح، او حتى جثته.
مع تأكيد الغطاسين ان الولد مالوش اثر ومش لاقيينه، فضلت مرات اخويا تصرخ ووصلت لحد الانهيار، اتكلم صاحب اخويا وهو بيوجه له الكلام:
ـ مراتك ماينفعش تستنى هنا، لازم ترجع البيت حالا عشان نعرف نتصرف في حوار "خالد".
وفعلا، طلب منها اخويا انها ترجع البيت ولو في جديد هيكلمها، مع الحالة اللي كانت فيها ماكنش عندها طاقة للرفض، فوافقت وخرجت من النادي على امل ان جوزها يلاقي ابنها، من بعد خروجها ادارة النادي بدأوا يتحركوا عشان يشوفوا الولد راح فين، واول قرار عمله مدير النادي نده على افراد الامن وقالهم:
ـ احنا مش عاوزين شوشرة دي سمعة مكان، اخلوا النادي من الناس خالص، مش عاوز اي عضو موجود على الشط لما نشوف الحوار ده هيرسى على ايه.
امتثلوا افراد الامن لكلام المدير وضربوا صفارات التنبيه، اللي بيها هيتم اخلاء النادي والشط خالص من المصيفين واعضاء النادي، ومن بعد الاخلاء استمر البحث على "خالد" لاكتر من 4 ساعات، تقريبا من 4 لحد 8 بالليل لما السما ضلمت.. في الوقت ده جم الغطاسين اللي اتكلفوا بمهمة التدوير عن "خالد"، وقفوا مع اخويا وصاحبة وكام واحد من المسئولين عن ادارة النادي، اتكلم واحد من الغطاسين:
ـ احنا مشطنا المايه على مسافة كبيرة في العمق، ابعد من مسافة ممكن طفل في سن الولد يروحها بس مالوش اثر.
كان واقف اخويا بيسمع لكلامهم وهو في حالة ذهول، مستني اي حد منهم يقول جملة تطمنه او تديه اي امل حتى لو ضعيف انهم هيلاقوه، وقبل ما يرد على كلام الغطاس، اتكلم واحد تاني من مراقبين الشط واللي كان بيدور على ابنه في البحر وقال:
ـ حضرتك يا استاذ "عبدالله" قولت ان ابنك سنك 3 سنين ونص مش كده؟
هز اخويا راسه وهو بيأكد على كلامه، فكمل الغطاس وقال:
ـ سن الولد الصغير مع طوله في العمر ده، هيخلوا جثته تطفو على المايه في حالة غرقه بالكتير خلال 6 ساعات مش اكتر.
الجملة اللي قالها الغطاس كانت قاتلة بالنسبة لمشاعر اب قلبه محروق على ابنه، اللي هو كان مستني حد بطمنه فجه الغطاس واكدله انه هياخد ابنه جثة.. قطع كلام الغطاس واحد من ادارة النادي قاله:
ـ اتفضلوا دلوقتي راقبوا الشط ووجهوا اضاءة كفايه ناحيته، اي حاجة تحصل بلغونا بيها.
مشيوا الغطاسين ورجعوا مكانهم في مراقبة الشط، بعدها اتكلم المسئول مع "عبد الله" وطلب منه طلب:
ـ بعد اذنك يا استاذ "عبدالله" عاوزين بطاقتك الشخصية.
استغرب اخويا من طلب المسئول، ماكنش فاهم سبب طلبه الغريب في الوقت ده، ولما سأله عن السبب قاله المسئول:
ـ شوية اجراءات هنعملها وهنديهالك على طول.
فهم "عبدالله" انهم اكيد عاوزينها عشان يحرروا محضر بأختفاء ابنه، بس بعد اكتر من ساعة اكتشف انه فهم غلط، وده لما راح للمسئول في ادارة النادي وحاب يتأكد من انهم عملوا محضر، فقاله:
ـ حضرتك خدت مني البطاقة عشان تعمل محضر بأختفاء ابني؟
بصله المسئول وقاله:
ـ اختفاء ايه ومحضر ايه اللي بتتكلم عنهم حضرتك؟!
استغرب اخويا من الرد وبص لصاحبه اللي هو كمان مندهش من رد المسئول، وقبل ما حد منهم يرد على اللي بيقوله، كمل كلامه:
ـ حضرتك بتحاول اختفاء وانت في الاساس مش عارف اذا كان دخل البحر او حتى راح فين.
رد اخويا:
ـ مش فاهم تقصد ايه بكلامك.
رد المسئول:
ـ اقصد ان ادارة النادي بترفض نهائيا عمل اي محاضر تعمل شوشرة على النادي، احنا مش مسئولين عن الاهمال اللي حصل من ناحيتكم.
رده كان صادم، اللي بسببه قال اخويا:
ـ معنى كلامك انك خدت بطاقتي عشان ماتخلنيش اخد اجراء قانوني ضد النادي، مش ما كنت فاهم.
رد وقاله:
ـ وتاخد ضدنا اجراء قانوني على اي اساس، احنا تعليماتنا واضحة لأي عضو في النادي او حتى زائر عادي، لو حضرتك انتبهت وانت داخل النادي على اليافطة اللي كانت متعلقة، كنت هتعرف قصدي.. الكلام على اليافطة واضح جدا ان اي طفل دخل النادي مسئول عنه اهله مسئولية كاملة، وادارة النادي بتخلي مسئوليتها عن اي طفل موجود على الشط.. وده معناه ان الاهمال منكم مش مننا، ف الغلطة غلطتك وانت اللي مسئول على اللي جرا لأبنك.
اتعصب "عبدالله" من عدم اللامبالاة اللي بيتكلم بيها مسئول عن نادي كبير زي ده، وحاول بكل الطرق انه ياخد منه البطاقة، وبعد محاولات لاكتر من ساعة انه ياخدها وهم طبعا بيرفضوا عشان ماياخدهاش ويطلع بيها ع القسم، وافقوا انهم يدوهاله بس مع تحذيرات وشبه تهديد انه ما يعملش قلق لاسم النادي، والا هيكون ردهم مش هيعجبه.
مااهتمش اخويا باللي قالوه وخرج من النادي على قسم الشرطة، دخل القسم وقدم طلب لعمل محضر عاجل، بس للأسف لما اتعرف ان ابنه مختفي من ساعات، كان الرد بأنه صعب عمل محضر باختفاء الولد قبل مرور 24 ساعة عن اختفائه.. اضطر اخويا يرجع البيت وهو مش عارف يعمل ايه او يتصرف ازاي، عدا باقي الليل ماحدش فينا غمض عينه من التفكير في اللي حصل، ويادوب النهار طلع.. وبدأ اخويا يتحرك ويدور هو بنفسه، رجع للنادي عشان يشوف لو وصلوا لحاجة، بس للأسف ماكنش في جديد وتقريبا وقفوا البحث عن الولد، والولد ما ظهرش حتى لو جثة طافيه ع المايه، بس هناك اتكلم معاه واحد من الامن او المسئوليه وقاله:
ـ امبارح كان في على الشط رحلتين واحده تابعة لدار مسنين جوه المحافظة، ورحلة تانية كانت جاية من القاهرة، ما يمكن ابنك مشي على الشط وتاه وسط الزحمه وهم لقيوه وخدوه معاهم.
كلام الراجل كان عامل زي القشاية اللي بيتعلق فيها غريق، بالنسبة لأخويا ضوء امل بيظهرله اللي بيه يمكن يلاقي ابنه، فطلب منه يجيبله نمر تليفونات الرحلات دي وهو بعد كده هيتصرف، بعد ما خد منه نمر الرحلات اتصل عليهم وسألهم اذا كان شافوا ولد صغير تايه على الشط وخدوه معاهم، وقالهم على مواصفاته بالكامل شكله وحجمه وحتى لون اللبس اللي كانت عليه وقت ما اختفى، بس كان ردهم ان مافيش اولاد جت معاهم او حتى شافوا ولد صغير بالمواصفات اللي قالها.
كان عندنا امل ان حد ييجي ومعاه الولد بعد ما يعرفهم اسمه، خاصة ان "خالد" كان ذكي جدا، برغم عمره الصغير بس كان نبيه حافظ اسمه بالكامل ونمرة تليفون ابوه، وده كان من ضمن الحاجات اللي كنا معلقين عليه امالنا اننا نلاقيه، بس لما عدا اليوم التاني بدون اي نتيجة، خد اخويا خطوة جديده في التدوير على ابنه، راح للجامع اللي جنب النادي وقعد مع شيخ الجامع والمسئول عنه، وقاله:
ـ ابني اختفى من امبارح واحنا في النادي اللي جنب الجامع، استسمحك يا شيخ لو تنده عليه في الميكرفون بمواصفاته، ولو حد لقاه يجيبوا الجامع.
وافق شيخ الجامع على طلب اخويا وبعد كل اذان كان بيقول باختفاء الولد، في الوقت ده بعتت ادارة النادي لأخويا انهم عاوزينه، لما راح لهم على امل ان عندهم اخبار جديدة، بس اتفاجأ باللي اتقال..
ج٢ والأخير.. #الإختفاء_الغامض
#لمياءالكاتب
وافق شيخ الجامع على طلب اخويا وبعد كل اذان كان بيقول باختفاء الولد، في الوقت ده بعتت ادارة النادي لأخويا انهم عاوزينه، لما راح لهم على امل ان عندهم اخبار جديدة، اتفاجأ باللي اتقال، لما واحد من الادارة قاله:
ـ اللي بتعمله هيعملك مشاكل، كفاية لحد كده.
رد اخويا وهو مش فاهم معنى كلامه، فقاله:
ـ يعني اقفل بوقك والبروباجندا اللي انت عاملها بحوار اختفاء ابنك جوه النادي، مش هتجبلك غير مشاكل انت مش قدها، لو فضلت في اللي بتعمله احنا هنرفع عليك بدل القضية تلاته، قضية تشهير بسمعة نادي محترم له اسمه، وقضية تعويض بمبلغ يخرب بيتك، وقضية رد شرف.
كلام المسئول كان تهديد صريح لاخويا عشان يسكت، بس يسكت عن ايه ولا عن مين، عن ضياع ابنه وهو مش عارف راح فين، ده غير ان معنى الكلام واضح.. ان الولد ماكونش اصلا غرق جوه البحر وحد خطفه، او في حاجة تانية اهم خطرت على بال اخويا وبسببها قال اخويا للمسئول:
ـ تهديدك فهمني حاجة واحدة بس، ان حضراتكم خايفين على سمعة النادي لايتقفل بعد حوار غرق ابني وهو جواه، وده معناه او اللي وصلي انكم عترتوا على جثته ولو فعلا الولد مات ولقيتوه، كل اللي اطلبه انك تديني جثته عشان ادفنه جنب اخوه وناري انا وامه تبرد، اهو نبقى عرفنا مصيره ومكانه ونستعوض ربنا فيه، لكن احنا لحد دلوقتي مش عارفين اذا كان غرق ولاتاه او اذا كان حد خطفه.
رد عليه مسئول ادارة النادي:
ـ الحوار ده كله ما يخصنيش، اللي عنده قولته واتمنى تعقله كويس وتفهمه.
خرج اخويا من مكتب المسئول ودماغه عماله تودي وتجيب، خدته رجله للجامع عشان يسأل الشيخ اذا كان حد جاله اهو حاجة تطمنه، بس كان رد الشيخ غير ما كان عاوز او بيتمنى، عدا يومين على كلام "عبدالله" مع شيخ الجامع وادارة النادي، وفي اليوم التالت اتفاجأ اخويا ان الشيخ وقف اعلانه عن اختفاء ابنه، راح وسأله عن السبب فجاوبه الشيخ:
ـ جالي واحد بعد الاذان وقالي ان وقف الاعلان عن اختفاء ابنك، ولما سألته عن السبب قالي ان الولد مات ولقيوا جثته، وبلغوك بموته ونك استلمت جثته ودفنته.
اتفاجأ "عبدالله" بكلام الشيخ وانكر كل ده، انه لا استلم جثة ولا حد بلغه بأي حاجة، وطبعا اللي قاله الشيخ ماكنش محتاج توضيح، الحوار كله خارج من ادارة النادي واكيد اللي بلغ الشيخ بالكلام ده بأمر منهم، خرج اخويا من الجامع بعد ما عجز رده على اللي بيحصل، ماكنش فاهم اسباب اللي بيحصل من ادارة النادي، فكانت الخطوة التالتة انه يوسع دايرة بحثه عن "خالد" مهما كلفه الامر، ولو حتى وصله مليون تهديد.. ف اتجه للسوشيال ميديا وبدأنا ننشر على صفحات التواصل الاجتماعي بوستات بأختفاء الولد، حطينا فيها صورته وكتبنا الوقت والمكان اللي اختفى فيه، ووسعنا نطاق البحث فطبعنا صوره وعلقناه في اماكن قريبة من النادي.. واعلن فيها "عبدالله" عن مكافأة مادية كبيرة لأي حد هيلاقيه او حتى يدلنا عن مكانه
ومن هنا حكاية اختفاء "خالد" خدت منحنى تاني خالص، بس للأسف ماكنتش بالايجاب زي ماكنا بنتمنى دي كانت بالعكس تماما، حرفيا الدنيا اتقلبت علينا.. بعد ما انتشرت بوستاتنا على الفيس وخدت نطاق واسع، ناس كتير شيرتها على صفحات كبيرة معروفة، والكلام والتعليقات بدأت تكتر وكلها بتدور حوالين حاجة واحدة اساسية "اهمال النادي المعروف".. ازاي نادي زي ده بالعاملين اللي جواه ومراقبين الشط المحترفين، ماينتبهوش لطفل بالسن ده وسابوه لحد ما غرق او حتى اتخطف من جواه، غرق الطفل او حتى خطفه الحاجتين اسوء من بعض وهم مشاركين فيه.
وصل طبعا الاشاعات والكلام اللي كتر على صفحات الفيس بخصوص النادي، وزي ما توقعتوا ما سكتوش.. دول بقوا بيدخلوا على الصفحات ويردوا على التعليقات اللي بتتكتب عنهم، وكان ردهم كاذب صادم بالنسبة لناس كتير، انعكس علينا وعلى موقفنا بالسلب لما قالوا "ان الولد فعلا مات بالغرق، بس هم سلموا جثته لاهله ودفنوه، وانهم مستغربين ليه حنا بنطلع اشاعاات على النادي، بعد ما عملوا الاجراءات الكاملة لاستلام جثة الولد.. وده طبعا زي ما قولت كلام مالوش اساس من الصحة، ما هو بالعقل كده ايه هيخلينا نعمل كل ده واحنا عارفين مكان "خالد"!
ولقينا تعليقات غريبة بدأت تتكتب على البوستات، كان معظمها هجوم حاد علينا، اللي هو انتوا عمالين تنشروا بوستات وتتكلموا عن ابنكم اللي اتخطف ولا غرق، وانتوا اصلا استلمتوا جثته ودفنتوه كمان، طيب ليه بتعملوا كده وتشهروا بنادي كبير زي النادي بتتكلموا عنه في البوستات، ومع الكلام ظهرنا قصاد الناس بشكل مش تمام، واسئلة كتير كانت بتدور عن سبب استمرارنا في نشر البوستات بعد ما استلمنا الولد.
فكان لازم ندخل ونرد على الكلام والاشاعات اللي نشروها ضدنا، وان احنا ما استلمناش الولد زي ما بيتقال، وان "خالد" لسه مختفي لحد اللحظة اللي اتنشر فيها الكلام ده، ومن وقت الاشاعات دي اتمنع اخويا من دخول النادي نهائيا، اتفاجئ برفض امن النادي من انه يدخل او حتى يسأل عن اي اخبار تخص ابنه، وده كان متوقع منهم واجراء هياخدوه ضدنا.. حتى القسم اللي بلغنا فيه عن اختفاء "خالد" ماعملش اي اجراء يحسسنا باهتمامه بالموضوع، ده على النقيض وعكس توقعاتنا، كانوا بيتصلوا على اخويا ويسألوه هل في جديد؟.. او حد اتصل علينا وبلغنا بأي خبر عن مكان "خالد" كنا مستغربين من كلامهم هو مين اللي المفروض يسأل، احنا ولا هم!
بس اخويا ما يأسش استمر في التدوير على ابنه، راح لغطاسين محترفين واتفق معاهم ماديا عشان يغطسوا ويدوروا على الولد، وعشان كان ممنوع من دخول النادي اختار اقرب مكان جنب النادي نزلوا فيه الغطاسين، وماكنش في قصاده وقصادنا غير الانتظار.. قعدنا على الشط فترة نزول الغطاسين وفضلنا مستنيين خروجهم، لكن خروجهم كالمعتاد الايام اللي فاتت بدون اي نتيجة، مافيش اي حاجة لقيوها تدلنا على غرق "خالد".
في الوقت ده عرفنا من حد بدون ذكر اسمه او وظيفته، سبب من الاسباب اللي بيعمله معانا النادي .. لما قال لعبدالله:
ـ ما توجعش راسك مع ادارة النادي، مش هتقدر تاخد منهم حق ولا باطل دول واصلين.
سأله طبعا وهو مستغرب من كلامه، يقصد ايه؟.. فقاله:
ـ هو انت مش من اهل البلد ولا ايه؟!.. مش شايف الهيلمان اللي في النادي وده ما بيقلش لعقلك اي حاجة، النادي يعتبر اهم مرسى خصوصي لحد مهم جدا في الدولة.
وذكر له طبعا الجهة دي واسمها، وكمل كلامه:
ـ للسبب ده مستحيل يضحوا بسمعة النادي عشان ابنك او غيره، يعني حتى لو غرق ومات، لا يمكن يطلعوا قصاد الناس انهم ادارة مهملة مش بينتبهوا لأرواح الناس اللي جوه النادي.. وده اللي خلاهم يكتموا على خبر موت ابنك او اختفائه بكل الطرق، واهو منعوك من الدخول وأي منفذ بتفتحه بيجروا ويسدوه عليك بكل الطرق.
بعد ما عرفت مرات اخويا بالكلام ده تعبت نفسيا جدا، وتعبها النفسي أثر عليها جسديا ضغطها علي ونقلناها المستشفى، وبسبب الضغط الغالي حصل اختلال في وظائف الكلى، وحصل فشل في كليه من الكليتين وماكنش في حل غير انها تعمل جلسات غسيل كلى، وفي الوقت ده كان سنها تقريبا 28 سنة.
ده غير اخويا اللي اتعرض للخداع من ناس كتير، من خلال تليفونات كانت بتجيله من ناس يطلبوا منه المكافأة المادية وهم هيوصلوه لأبنه، مكالمة من المكالمات واحد اتصل بيه وقاله:
ـ ابنك معايا وعمال يعيط ويقول عاوز بابا "عبدالله".. خد العنوان وتعالى عشان تاخده ومعاك الفلوس.
اخويا حس في كلامه ملعوب فرماله جمله يكشف بيها كدبه، سأله:
ـ ابني بيعيط وطلبني بالاسم، ماقلكش عاوز عمو محمد او عمو حسن، ما هم كمان بيحبهم ومتعود عليهم.
وطبعا مافيش في العيلة حد بالاسامي دي، رد عليه المتصل زي ما كان متوقع "عبدالله":
ـ ايوه اومال ايه، بيعيط وبيقول هاتلي عمي "حسن".
بهدله اخويا لما كشف كدبه وقفل في وشه المكالمة، وواحد تاني كلمه وقاله ان ابنك لقيوه مدبوح في العنوان الفلاني، وراح فعلا اخويا المكان بس ماكنش في حد او حاجة من اللي اتقالت.. لحد ما عدا ايام على اختفاء "خالد" تقريبا 7 او 8 ايام، لقينا مراته نازله من فوق وهي منهاره من العياط، سألناه حصل ايه، قالت:
ـ عبدالله عمال يصرخ، مش عارف يعمل ايه ولا عارف مصير ابنه، اذا كان مات وغرق، او خدوه تجار اعضاء وهنلاقيه جثة مرمية زي ما بنشوف في الاخبار وبنسمع، ولا راح فين.. اخر ما خلص صراخ شدني وخرجني بره الشقة وقالي اسيبه لوحده وانزل عندكم، فضلت اخبط عليه بس مارضيش يفتح.
لحظة ماكانت مرات اخويا بتتكلم، سمعنا صوت خبط شديد على السقف وحاجات بتقع وتتكسر في شقة اخويا، خدت نسخة مفتاح شقته اللي كانت معايا وجريت بره الشقة عشان اطلع اشوف اخويا، بمجرد ما فتحت الشقة المنظر فزعني، "عبدالله" كان نازل تكسير في اي حاجة تطولها ايده.. واللي على لسانه جملة واحدة:
ـ صاحبي عنده حق، كل اللي قاله حصل.
قربت منه عشان اهديه وافهم معنى كلامه، بس استمر في اللي بيقوله وهو مش مدرك للي بيعمله، لحد ما سكت لوحده وبص ناحيتي وقال:
ـ ماكنتش مصدقه ولا اقتنعت بكلامه بس اهو بيتحقق زي ماحكاه، الحوار حصل قبل حتى ما اتجوز من 2008.. كنت في سفرية طويلة بمدن ايطاليا، كنا بعد ما نخلص شغل اسهر مع اصحابي نتسامر ونحكي، وفي يوم قعد جنبي واحد من اصحابي وقالي:
ـ ماتجيب اقرالك الكف.
ضحكت واتريقت على كلامه فقال:
ـ يا عم هات بس كف اقرهولك.
شد ايدي فسحبتها منه وانا بقول:
ـ مابقتنعش بالكلام ده، انا واحد حاجج بيت ربنا ما توقعنيش في حرمانية.
رجع يضحك وخد الحوار هزار، ومن باب الهزار والتسلية وافقت اهو نضحك شوية، واديته كف ايده.. مسكه وفضل يبص فيه شويه بعدها قال:
ـ هترجع مصر قريب وهتتجوز.
اتريقت على كلامه:
ـ قول غيرها ما ده حوار انت عارفه.
بصلي بنظرات غريبة وقال كلام اغرب:
ـ بعد جوازك هتخلف، بس كل ما هتخلف عيل العيل اللي قبله هيموت.
قلبي اتقبض وحاولت استفسر منه على معنى كلامه، رد عليا:
ـ كلامي واضح، هتخلف طفل، بس اول ما هتقرر انك تجيب طفل تاني وييجي للدنيا، اخوه الاولاني هيموت.
خلص الكلام بيني انا وصاحبي بدون اي تعليق على اللي قاله، كل كلامنا ماكنش اكتر من هزار اصحاب وقت السهر، بس كلامه كله صح واتحقق.. والدليل ابني الكبير اللي خلفته بعد جوازي بسنة، شوفته قصادي بيكبر لحد ما تعب بحساسية ماعرفناش سببها، كان وقتها مراتي حامل في "خالد".. لفينا بيه على الدكاترة لحد ما ربنا استلم امانته ومات ابني، بعد موته اتولد "خالد" وربنا عوضني عن موت اخوه، واهو شوفتيه بعينك وكبر على ايدك، واتولدت اخته رودينا.. وبوجودها في الدنيا راح "خالد".
بقينا واقفين منهارين من العياط على كلام اخويا والحالة اللي وصلها، بسببها اضطرينا نخبط على باب جديد "باب المشايخ" والناس اللي لهم اتصال بالجن والعالم ده، واحد منهم بعد ما روحناله وحكى اخويا اللي حصل معاه بما فيهم حوار صاحبه، بعد ما سمع كلامه قاله:
ـ انت في جنيه من جنيات البحر عشقاك، وده بسبب قعادك في البحر وقصاده طول الليل فترات طويلة، هي اللي بتعمل معاك ومع اهل بيتك كل ده، عوزاك ليها لوحدها ماحدش يشاركها فيك، لا زوجة ولا عيل من صلبك.
طيب ايه العمل وايه الحل، كان رده:
ـ مافيش حل ولا عمل هتفضل معاك ووراك.
مشينا من عنده وروحنا لواحد تاني، اللي قال كلام مختلف عن اول شيخ:
ـ ابنك محبوس حد خده بس مش باين قصادي يبقى مين، هيمر الزمن وتعدي سنين، وهيلف يلف ويرجعلك بس وهو شاب كبير.
خلصنا من المشايخ وكلامهم اللي ماوصلناش منه لحاجة، وكان اخر حل قصاد اخويا انه يسافر لكل البلاد اللي حوالينا، يدور فيها على ابنه بنفسه وده مع اتصالات ناس كتير بعنواين اماكن جواها اطفال، بيت من البيوت راحها اخويا واتفاجئ باللي شافه، صاحبة البيت كانت ست كبيرة في السن وجوه بيتها اطفال كتير، لما سألها اخويا عن سبب وجود الاطفال دي في بيتها قالتله:
ـ انا فاتحه بيتي مأوى للاطفال المشردين في الشوارع، اهو مكان يأويهم بدل قعدة الحيطان.
حس اخويا بشعور مش مريح ناحية الست دي، بعد ما دور بين الاطفال عن ابنه ومالقهوش، خرج من بيتها وهو مقرر يبلغ عنها، والشرطة بقى تتأكد من كلامها اذا كان صح او هي بتسرح العيال دي، بس على ما وصل مع الشرطة اكتشف ان كلامها غلط وكذبت في كل اللي قالته، وده لما لقيوا البيت مفتوح وفاضي نهائي، لا هي موجوده ولا حتى العيال اللي كانوا في بيتها.
وروحنا لمكان تاني عرفنا انهم لقيوا فيه جثة عيل صغير، بس لما وصلنا لقيناها جثة طفل يادوب لسه مولود رمته امه في مقلب الزبالة، الله اعلم ايه السبب.
ماخلناش مكان غير لما روحناله، حتى برامج التلفزيون اتكلمنا فيها عن "خالد" بس مافيش اخبار عنه، مرت سنين حاولنا مع اخويا انه يخلف اخ او اخت لبنته "رودينا" بس كان رده:
ـ كفاية اللي راحوا منه، اروح اخلف تاني عشان بنتي تموت وتحصل اخواتها.
ولحد دلوقتي مانعرفش "خالد" راح فين، هل مات وخبوه عننا، هل اتخطف، هل اتباع لتجار الاعضاء؟.. بس مهما لفت سنين عمرنا ما هنقدر ننسى "خالد".
"نهاية الحكاية"
انتهت القصة علي وعد بقصةاخري .فظلآ فلا تقراوترحل ضع بصمتك بلايك و10ملصقات تشجيع للاستمرار ومتابعه ليصلك كل جديد زور صفحتي الشخصيه يمكن تستفد منها وشارك حتي
يستفيد غيرك .. وشكرآ ♥
تعليقات
إرسال تعليق