جميع الروايات كامله

اعلان اعلى المواضيع

رواية كيد النسا وقهر الرجال بقلم الكاتبة منى محمود الفصل الاول والتاني والتالت والرابع والخامس حصريه وجديده 

المقدمة

مقدمة عن العمل ...

بسم الله الرحمن الرحيم كيد النساء وقهر الرجال ....

معظمنا بيشوف أن الزواج نهايه لحاجات كتير اوي حلوة

نهايه لمرحله جنان الحب مثلا .. نهايه ل لهفه البدايات .. نهايه للخروج والفسح والسفر .. نهايه للكلام الحلو والرومانسية .. نهايه للاهتمام بنفسنا .. وغيره كتير

وعشان نكون واقعيين الزواج نهايه لحاجات وبدايه لحاجات تانيه كتير

الزواج مسؤوليه والمسؤوليه ليها ضغوط كتير غصب عننا بتقيدنا وبتخلينا نعيد ترتيب أولوياتنا ونتخلي عن حاجات كانت بتسعدنا

الزواج ممكن يكون نهايه ل سفر أو خروجات فعلا لكن مش هو ابدا السبب في نهايه الكلام الحلو بين الزوجين ولا هو السبب في إهمال طرف أو كلاهما لنفسه أو لشريك حياته

دي سلبيات مننا احنا وبنعلقها علي الزواج

اختيارك الخاطئ لشريك حياتك مش معناه أن الزواج السبب بالعكس

الزواج بدايه زي ما قلت ل حاجات كتير

بدايه للاستقلال والاستقرار .. بدايه لبناء أسرة وتربيه اطفال .. بدايه لسعادة الحب والأمومة والأبوة .. بدايه لحياة كامله بتبدؤها سوا لو كنتم مناسبين فعلا ل بعض

الزواج المثالي هو العلاقه الصحيه اللي فيها حب ومشاكل وخناق وصلح تفاهم ومشاركه

قهر الرجال روايتنا المرة دي ولأول مرة في تاريخ رواياتي هيكون الدفاع فيها عن الراجل المقهور مش عن الست

هذا دعاء ثابت عن النبي ﷺ كان يدعو بهذا يقول: اللهم إني أعوذ بك من الهم والحزن، والعجز والكسل، والجبن والبخل، وأعوذ بك من غلبة الدين، وقهر الرجال ثابت عنه ﷺ وهذا من دعواته العظيمة، التي رواها مسلم، وغيره.

الفصل الأول

الحياة مليئة بالمفاجأت منها اللي تخليك حاسس بكل سعادة الدنيا ومنها اللي يخليك حاسس بحزن العالم كله في قلبك

في احدي المناطق السكنيه الراقيه والحديثه كان شقه ابطالنا اللي احداث الروايه كلها بتدور حواليهم جلال موزع موسيقي موهوب جدا متجوز جودي حب عمره بتعمل حلويات من البيت عندها صفحة ع فيس بوك عدد متابعينها معدي ال ٢٠ الف ليها فيديوهات مشهورة جدا في صنع الحلويات بتعدي ال مليون مشاهدة

شقتهم ذات اثاث بسيط لكنة مبهج ألوانه فاتحة وتنظيمة رائع

صحي جلال من نومة علي صوت اذان الظهر اللي واصل ل شقته بوضوح من المسجد المجاور ل عمارتهم . ملاقش جودي جمبه قام من مكانة وراح للمكان اللي كان واثق هتكون فيه (( المطبخ ))

جلال بصوت نايم:

_صباح الخير يا جوجو ايه يا بنتي الدربكة دي كلها علي الصبح

جودي ببتسامة:

_صباح الفل حبيبي .. عندي تلت اوردارت اعياد ميلاد انهاردة بس متقلقش قربت اخلص واصلا علي ما انت تاخد شور سريع كدة هكون حضرتلك احلي فطار واحلي قهوة كمان

جلال:

_دا ايه الدلع دا كله ماشي هاخد شور وبعد الفطار هاجي اساعدك في التقفيل .. هو التسليم علي الساعة كام اصلا

جودي:

_لسه بدري قدامي حوالي تلت ساعات كمان وانا خلصت فاضل اروق بس مكان ما عملت واقفل

جلال :

_تمام وانا انهاردة مش نازل معنديش استديو نريح كدة بعد الفطار وننزل نتغدي برة انهاردة ايه رايك؟

جودي:

_اوكي يا حبيبي زي ما تحب

جلال وهو بيقرب منها:

_زي ما نحب يا جوجو نحب مش احب

جودي ابتسمت:

_حاضر نسيت نون المشاركة المقدسة عندك يلا بقا هتاخرني كدة ومش هلحق اخلص يلا

جلال حدفلها بوسه في الهواء وخرج من المطبخ وهي رجعت كملت اللي بتعمله تاني بس فكرها لسه مشغول بالقرار اللي مفروض تبلغه بيه واللي هي عارفه كويس أنه هيرفضه لكنها المرة دي هتصر علي رأيها واللي يحصل يحصل

❈-❈-❈

علي الفطار كانو ساكتين جلال حاسس بيها متغيره وعايزة تقول حاجة ومش عارفه وهي كانت بتجمع الكلام ومش عارفه تبتدي ازاي ولكن قاطع كل دا صوت تلفون جودي

جودي :

_صباح الفل يا ست الكل عامله اي يا حبيبتي انهاردة ؟

نوال:

_صباح الورد يا جوجو انا الحمد لله يا بنتي زي الفل انتي عامله ايه وجلال عامل ايه ؟

جودي :

_احنا تمام يا حبيبتي المهم طمنيني فطرتي وخدتي الدوا ؟

نوال :

_اه يا حبيبتي متقلقيش المهم قبل ما انسي اكدتي علي جلال يوم وقفه عرفه تفطرو معانا ولا نسيتي

جودي :

_لا والله منستش بس مش هيقدر يجي يا ماما معلش بس انا أن شاء الله هكون عندك يومها من الصبح بدري عشان نحضر كل حاجة أن عارفه أن مراتت ولادك علي أيديهم نقش الحنه مبيعملوش حاجة ولا حتي بيشيلو كوبايه من مكانها

نوال كشرت:

_ام محمد هتطلع تساعدني كبري دماغك منهم ربنا يهديلهم حالهم المهم جلال مش جاي ليه هزعل كدة

جودي :

_استني هو عايز يصبح عليكي بنفسه وهيقولك هو اهو

جلال :

_يا صباح الجمال علي احلي نوال

نوال ضحكت:

_صباح الفل يا حبيبي ايه بقا البت دي بتقولي انك مش جاي ليه أن شاء الله ؟

جلال :

_والله يا نونو غصب عني أبيه محمود جوز اختي نازل من الامارات اخيرا بعد غياب تلت سنين منزلش فيهم وهناء عزماني انا وياسين علي الفطار عشان نتجمع مع بعض انا قلت ل جودي هي تبقي معاكي عشان دي عادة عندكم ربنا ما يقطعها ابدا وانا اكون مع هناء عشان هي كمان متزعلش

نوال :

_اذا كان كدة مش هزعل خلاص ويوصل بالسلامة يارب محمود يا حبيبي

جلال :

_اللهم امين يارب خلاص كدة براءة يا نونو

نوال ببتسامة:

_براءة يا حبيبي بس بشرط تعالو اتغدو معايا انهاردة هعملك ورق عنب وبطايه ايه تستاهل بؤك

جلال :

_اووووباااا بطايه و ورق عنب لا لا مقدرش اقاوم بقولك اي احنا بنفطر اهو و جوجو عندها تسليم اوردارت نخلصه ونجيلك علي طوووول

نوال :

_تنور يا حبيبي استني هات جودي اقولها حاجة قبل ما اقفل

جلال :

_حاضر اهي

جودي :

_ايوة يا حبيبتي

نوال :

_معلش يا جودي هطلب منك طلب ومتكسفنيش ممكن

جودي كشرت :

_ماما الله يخليكي اوعي تقوليلي اكلم شريف ولا امير انتي عارفه انا مش بطيق لا مرات دا ولا مرات دا كفايه عليا يوم الواقفه اللي مش عارفه هيعدي عليا ازاي والله

نوال بزعل:

_كل دا يا جودي عشان قلتلك عايز اطلب منك طلب كتر خيرك يا بنتي شكرا مش عايزة حاجة

جودي :

_استني بس يا ماما حقك عليا والله ما اقصد طب حضرتك اامريني عايزة ايه

نوال :

_لا وعلي ايه خلاص مش عايزة حاجة انا هتصل بيهم

جودي :

_عايزاهم يتغدو معانا انهاردة ؟ مع انك واثقه أنهم هيقولو ما احنا خلاص هنتقابل يوم الوقفه ومش هيرضو

نوال :

_بطلي تقطيم فيا وروحي شوفي جوزك و التسليم اللي وراكي يلا مع السلامة

جلال بعتاب:

_ينفع اللي حصل دا ؟ من امتي بتتكلمي كدة مع مامتك

جودي بصوت مخنوق:

_والله غصب عني ماما مش بتزهق من المحاوله معاهم مصرة العلاقه بينها وبين منار واحلام تبقي كويسه واوي كمان وهما لا مصرين يبعدو خصوصا احلام مصرة تاخد شريف بعيد عننا الود ودها يقاطعنا خالص وانا تعبت يا جلال من قله زوقهم في الرد والمعاملة تعبت والله

جلال وهو بيحضنها:

_طيب ممكن تهدي ... معلش يا جوجو ماماتك مرتبطة بيكم اوي وملهاش غيركم .. قومي يلا نخلص ونروحلها وانا هكلم امير و شريف بنفسي بحجة اني مش هكون موجود يوم الوقفه وعايز اشوفهم يلا قومي بقا متبوظيش اليوم ال هقضيه معاكي

جودي قامت وهي بتمسح دموعها وجلال اتصل فعلا علي امير وشريف وبعدين دخلها المطبخ كانت خلاص خلصت كل حاجة

جلال :

_امير قالي أن منار انهاردة عند والدتها وهيجي يتغدي معانا لكن شريف اعتذر أنه مش هيقدر عشان مواعد احلام يتغدو برة

جودي:

_هما كل يوم بيتغدو برة اصلا

جلال :

_ما علينا بقا المهم أن أمير جاي اهو وانا بعت فويس نوت ل نوال وقلتلها عشان تعمل حسابها انتي خلصتي ولا في حاجة ناقصه ؟ اساعدك فيها

جودي :

_لا انا خلصت لما المندوب يوصل سلمة انت علي ما اخد شور واجهز عشان نروح ل ماما ولو حابب بالليل نبقي نخرج سوا بدل خروجة الغدا ال طارت دي انا معنديش مشكلة

جلال :

_لا حابب بالليل نرجع ونسهر في البيت سوا

جودي ابتسمت :

_اوكي يا حبيبي

❈-❈-❈

نروح ل مكان تاني في فيلا صغيرة علي الطريق الصحراوي كان ساكن ياسين اخو جلال الكبير دكتور في الجامعه كليه اقتصاد وعلوم سياسيه ومراته ياسمينا عضوة نشطة في منظمة حقوق الإنسان

علي سفرة كان قاعد ياسين بيفطر لوحدة ك العادة تلفونة رن فيديو كول كشر ورد

ياسمينا :

_صباح الخير يا بيبي

ياسين مكشر:

_صباح النور

ياسمينا :

_ياساتر عليك ايه التكشيرة دي ؟

ياسين :

_مفيش حاجة انتي كويسه ؟

ياسمينا :

_لا مش كويسه و وحشتيني اوي وغصب عني ع فكرة مش بمزاجي أن أفضل هنا كل المدة دي

ياسين بانفعال بسيط :

_اومال ب مزاج مين ؟ جيسي انتي اتفقتي معايا ع اسبوع عشر ايام بالكتير سفر بقالك شهر دلوقتي وكل يوم نفس الكلام انا زهقت انا طول الوقت بكلمك فيديو كول دي مش عيشه

ياسمينا :

_ممكن تهدي طيب انا عارفه كل دا والله ومقدرة انك مستحملني بس فعلا مش بايدي حاجة دي ظروف شغلي يا ياسين

ياسين بانفعال:

_وشغلك دا مبقاش مناسبني يا جيسي

ياسمينا :

_بس انا بحبه ومش هعرف اشتغل حاجة غيره لو قعدت منه هزهق خصوصا واحنا معندناش اطفال و

ياسين بغضب مكتوم:

_كملي سكتي ليه كملي زي كل مرة اشتكي من شغلك لازم تفكريني اني مش بخلف والعيب مني وانك معايا رغم دا ف انا اتكتم واسكت واستحمل سفرك الدايم مش كدة ؟

ياسمينا قاطعته :

_لا مش كدا يا ياسين ممكن تهدي دا مش اسلوب نقاش دا

ياسين :

_ولا دا جواز يا جيسي ولا دي حياة انا لازم اقفل عندي محاضرات ومش هينفع اتاخر لكن لما ترجعي أن شاء الله في بينا كلام كتير سلام

قفل السكة ومداهاش فرصه لاي رد وقام من علي الفطار وهو متعصب كان محتاج يهدي شويه قبل ما يروح الجامعه ساق عربيته وطلع علي بيت أخته الكبيرة اللي مش بيرتاح غير معاها يمكن تخفف عنه شويه

❈-❈-❈

هناء الاخت الكبري ل ياسين وجلال متجوزة مهندس محمود اللي بيشتغل في الامارات وعندها بنتين تؤام مش متماثل الاء وهند في تانيه كليه تجارة انجليزي

ياسين وصل الفيلا اللي فيها هناء أخته واللي كانت قريبه منه جدا خبط واستقبلتة هند

هند :

_مش معقول خالو اهلا اهلا ايه المفاجأة الحلوة دي

ياسين :

_صباح الخير يا نودا

هند :

_صباح الخير يا حبيبي

هناء من اوضة السفرة:

_مين يا هند ؟

ياسين وهو بيدخل الاوضه:

_ انا يا نونا صباح الخير حبيبتي

هناء :

_صباح الفل يا حبيبي تعالي يلا أفطر معانا

ياسين :

_بالهنا والشفا انا سبقتكم قبل ما اجي ... اومال فين لولو ؟

هناء:

_لولو هه لولو هانم مش بتصحي دلوقتي خالص هند بس اللي بتصحي معايا بدري وتفطر معايا وتروح كليتها

ياسين :

_والاء مش بتحضر مع هند ولا ايه

هند:

_لا يا خالو مش بتحضر غير المواد اللي الحضور عليه فيها درجات غير كدة بتعتمد عليا بقا احضر انا واسجل والخص وهي تذاكر ع الجاهز

ياسين بدهشه:

_غريبه يعني وانتي سيباها كدة يا نونا مش مصدق دا انتي لو جلال كان غاب يوم واحد عن جامعته كنتي ب

قاطعته هناء وهي بتبصله بتحذير :

_كنت بعاقبه اه عارفه وفاكرة وبعاقب الاء بردة لو قصرت في درجاتها لكن الحضور يوميا دا مبقاش مهم زي زمان يا ياسين

ياسين ابتسم :

_ايوة أيوة فعلا

هند ضحكت :

_طول عمرك مسيطرة يا مامي .. عن ازنكم بقا الحق انا محاضراتي .. باي يا خالو

ياسين :

_باي يا حبيبتي

هناء :

_مالك بقا ؟ انا استنيت لما هند مشيت عشان نتكلم براحتنا

ياسين :

_تعبان يا هناء تعبان اوي ومش عارف اعمل ايه

هناء بحزن:

_ من ايه بس يا حبيبي ؟

ياسين :

_من حياتي كلها يا هناء ... انا عايش لوحدي معظم الوقت الوحدة بتاكل فيا تعبت والله

هناء :

_قلتلك اتكلم مع جيسي بصراحة واطلب منها تشوف شغل غير دا اللي كله سفر

ياسين ضحك بسخريه :

_اتكلمت يا هناء اتكلمت كتير وكل مرة تعايريني بطريقه غير مباشرة اني مش بخلف وان دا شغلها اللي بتحبه وبيشغل وقتها عشان موضوع الخلفة ميأثرش علي حياتنا كل مرة تلمحلي بكدة وبسكت بس خلاص تعبت والله انا تقريبا بشوفها كل كام شهر مرة يا هناء دي مش حياة ابدا

هناء بغضب:

_بقولك اي يا ياسين اللي اعرفه انك تواجهه الهروب والتلميحات مش جايبة نتيجة انتم اتنين متجوزين وبقالكم كزا سنة اقعد معاها ومهما كان الكلام هيوجع بس هيريح يا حبيبي فهمني ؟

ياسين اتنهد بوجع:

_فاهم يا هناء أن شاء الله لما ترجع المرة دي هتكلم معاها واوصل ل حل (ابتسم ) معلش مليش غيرك افضفضله كل شويه واتعبه بمشاكلي

هناء وهي بتطبطب عليه:

_بطل كلامك اللي بيضايقني دا ... احنا ملناش الا بعض وبعدين طول عمري وانا حسه اني ام ليك انت وجلال وديما تعبين قلبي معاكم كدة

ياسين :

_طب انا ومشاكلي كتير عارف دا إنما جلال تاعب قلبك ليه بقا

هناء بحزن:

_جلال دا تاعب قلبي اكتر منك ... في حاجة هو مخبيها عليا ... ميغركش الضحك والهزار دا لو ركزت في عينيه هتشوف وجع وحزن ونفسي اعرف سببه ايه يا ياسين نفسي اطمن عليكم بقا

ياسين:

_انتي اللي قلوقه زيادة عن اللزوم طول عمرك ... يلا انا يادوب الحق الجامعه مش عايز اتاخر علي أول محاضرة عندي

هناء :

_طب خلص وتعالي علي هنا نتغدي سوا

ياسين :

_لا مش هينفع انهاردة هبدء متأخر وهخلص متأخر خليها يوم تاني

هناء :

_ماشي يا حبيبي ربنا معاك

ياسين :

_سلام يا نونا

هناء ببتسامة:

_في رعايه الله وحفظه يارب سلام

❈-❈-❈

في شركة المعمار للمقاولات كان قاعد امير اخو جودي في مكتبه نائب مدير قسم الحسابات متجوز من منار ربه منزل

امير مكنش مركز في الشغل اللي قدامة وسرحان في طلبات منار اللي مبتخلصش نفخ بضيق وافتكر أنه متصلش لسه بلغها أنة هيتغدي عند ماماتة

مسك تلفونة واتصل عليها وانتظر الرد

منار :

_الو

امير:

_ايوة يا ميمو وصلتي عند ولدتك ولا لسه ؟

منار:

_اه يا بيبي وصلت من نص ساعه كدة ويادوب دخلنا وبنتك نامت علي طول

امير ابتسم :

_هي خم نوم الشقيه دي .. المهم انا متصل اقولك اني هتغدي عند ماما انهاردة

منار باستغراب:

_انهاردة ! اشمعني يعني ما كلها كام يوم وهنروح يوم الوقفه

امير بتوضيح:

_جلال كلمني وهيروح انهاردة بدل يوم الوقفه عشان يوم الوقفه جوز اختة راجع من السفر وهيكون معاهم مش هيجي

منار :

_اها تمام اوك انجوي يا بيبي ومتنساش وانت راجع تجيب طلبات البيت اللي بعتهالك واتس الصبح

امير كشر :

_حاضر يا حبيبتي مش هنسي انتي هترجعي امتي

منار :

_بكرة هفطر واتحرك علي طول

امير:

_ان شاء الله اوك اشوفك بكرة بقا

منار :

_اوك يا حبيبي باي

امير قفل وحاول يفوق ويرجع يكمل شغله أما عند منار ف بعد ما قفلت رجعت للمكالمة اللي كانت معاها واللي قطعتها عشان ترد علي امير

منار :

_الو معاك يا بيبي سوري اتاخرت عليك ...

🌺🌹🌺🌹🌺🌹🌺🌹🌺🌹🌺🌹🌺

رواية كيد النسا قهر الرجال

الكاتبة منى محمود

الفصل الثاني

الحياة ديما بتحطنا في اختبارات صعبه ويا ننجح ونوصل ل بر الأمان يا نفشل ونعيش حياتنا كلها يندفع تمن الفشل دا

امير قفل وحاول يفوق ويرجع يكمل شغله أما عند منار ف بعد ما قفلت رجعت للمكالمة اللي كانت معاها واللي قطعتها عشان ترد علي امير

منار بدلع :

_الو معاك يا بيبي سوري اتاخرت عليك معلش امير كان معايا علي الويتنج وكان لازم ارد ...

.........

منار كشرت :

_وبعدين بقا مش هنخلص انا قلت لا و مينفعش كدة دي مخاطرة كبيرة وانا مش قدها

.........

منار بانفعال :

_متضغطش عليا كل شويه احنا من يوم ما اتكلمنا وانا عرفتك حدودي كويس اوي وعرفتك ايه مسموح وايه مش مسموح وانت وافقت مش بعد كل الوقت اللي عدي بينا دا جاي دلوقتي تطلب مني كدة يا اما كل واحد يروح ل حاله انا مبتهددش يا حازم تمام

...........

منار كشرت :

_براحتك يا حازم انا كلامي مش هغيره وطريقتك دي غلط ومش هتجيب نتيجة معايا نهائي بالعكس انت كدة بتخسرني علي فكرة

...........

منار :

_ تمام يا حازم انا هقفل دلوقتي عشان محدش يحس بحاجة وبالليل نكمل كلامنا ... سلام

❈-❈-❈

في شقه كبيرة ومريحة ذات اثاث قديم في حي الدرب الاحمر كانو متجمعين علي السفرة

نوال وجودي وجلال وامير

جلال :

_الله الله تسلم ايديك يا نونا الاكل يجنن

نوال ببتسامة:

_تسلم يا حبيبي

امير:

_تسلم ايديك يا ست الكل

نوال :

_تسلم يا نور عيني

جودي كشرت :

_جلال حبيبك وامير نور عينك وانا ايه بقا يا ست ماما

نوال بحب :

_انتي حته من قلبي يا جودي

جودي بحب :

_ربنا يخليكي لينا يا ست الكل وميحرمناش منك ابدا

جلال :

_حقودة اوي البت دي يا أمير

امير ببتسامة:

_اوي يا جلال شوف بتبصلنا ازاي هتاكلنا بعينيها

جودي :

_واكلكم انتم ليه ما اكل من البطة الحلوة اللي قدامي دي

جلال كشر :

_دمك خفيف اوي يا روحي

جودي :

_نينينيني نينينيني

نوال بحزن :

_مش كان شريف جة اتغدي معانا وكانت لمتنا تكمل

جودي :

_معلش يا حبيبتي تتعوض يوم الوقفه أن شاء الله وبعدين متنسيش أن العزومة دي مكنش معمول حسابها خالص وجت فجأة كدة ف اكيد معرفش يظبط ويجي وبعدين احنا مش كفايه ولا ايه بقا يا ست نوال

نوال بحزن :

_لا طبعا ربنا يخليكم ليا بس .. بس شريف بيوحشني اوي انا مش بشوفه الا كل فين وفين .. ما امير اهو مشغول وعندة بيته وبنته بس بيعدي عليا كل كام يوم وبيكلمني ديما يطمن عليا لكن شريف لا دا انا وحشني حتي صوته

محدش فيهم كان عارف يرد عليها يقول لها ايه .. كل الكلام اللي ينفع يواسوها بيه قالوة مرة واتنين وتلاته لما خلاص مبقاش له أي لازمة ... هي كمان سكتت وكملت اكلها بهدوء بس احساس الحسرة و الحزن بياكل في قلبها كل يوم اكتر من اللي قبله

❈-❈-❈

بعد الغدا امير استأذن منهم ومشي عشان يلحق يجيب طلبات منار ويلحق يروح بدري عشان ينام

وجودي وجلال رجعو بيتهم تاني وقبل ما جودي ترجع ل حيرتها من تاني في طريقه تدخل بيها ل جلال في الكلام عشان تقوله علي قرارها سبقها هو واتكلم

جلال:

_بتفكري ف اي يا جوجو وبعدك عني بالشكل دا ؟

جودي بتوتر:

_احم بصراحة كدة في موضوع عايزة اكلمك فيه

جلال بصرامة:

_ تمام نتكلم بس قبل ما تنطقي حرف واحد لو هتتكلمي في حوار الخلفه والولاد يبقي اقوم انام احسن لاني معنديش اي استعداد اتكلم في الموضوع دا تاني يا جودي

جودي كشرت واتكلمت بانفعال :

_لا هنتكلم يا جلال انا بصراحة مش موافقه علي حوار أننا نكرر عمليه الحقن ل تالت مرة حرام عليك فلوسك اللي بتتعب علي ما بتجبها وتحوشها دي حرام لما تعب سنه واتنين يترمو في الأرض كدة ومن غير اي فايدة انت بفلوس عمليه واحدة منهم كان ممكن تتجوز و

قاطعها جلال بعصبيه وصوت عالي:

_كفايه بقا .. بطلي الاسطوانة دي ... كل كام يوم تقولي نفس الكلمتين وارد عليكي نفس الرد واقولك مش عايز عيال لو مش منك ... كل مرة اقولك انا بحبك اد ايه ومش شايف غيرك ولا عايز غيرك ... وانتي مفيش فايدة لازم تعكنني علينا ... كفايه كدا يا جودي بجد كفايه

سابها وخرج من البيت كله وهي فضلت مكانها بتعيط هي بتحبه بتحبه اكتر من نفسها وعشان كدة نفسها تسعدة باي شكل ... حتي لو هيتجوز عليها هي راضيه راحته عندها اهم من اي حاجة تاني

عدي ساعتين وهو مجاش بدأت تقلق عليه حاولت تتصل بيه كتير تلفونة مقفول كانت متوترة وخايفة ودموعها نازلة مش بتقف .. بعد تفكير كتير قررت تتصل علي هناء يمكن يكون راح عندها

بس قبل ما تدوس اتصال سمعت صوت الباب بيتفتح ويتقفل طلعت تجري ناحيته واول ما شافتة قدامها جريت عليه ودخلت في حضنة من غير اي كلام صوت عياطها بس اللي طالع

أما جلال رغم أنه دخل وهو مكشر وكان ناوي المرة دي يزعل منها جدا عشان متكررش كلامها دا تاني إلا أنه مقدرش غير أنه يضمها ويطبطب عليها لما اترمت في حضنه بالشكل دا

بعد مدة كانت هديت وصوت عياطها سكت طلعها جلال من حضنه ورفع وشها عشان تواجهه

جلال بهدوء :

_هديتي شويه ... ينفع نتكلم ؟

جودي هزت دماغها من غير كلام

جلال بحب:

_اولا حقك عليا اني اتعصبت عليكي وصوتي علي بالشكل دا ... ثانيا هقولك للمرة المليون انا بحبك يا جوجو بحبك ومقدرش اكمل حياتي من غيرك .. وراضي والله بكل اللي ربنا يكتبهولنا راضي ومقتنع أن اللي لينا نصيب فيه هنشوفه لينا نصيب في الولاد يبقي ربنا هيرزقنا دلوقتي أو بعد سنين قدام ملناش نصيب يبقي له حكمة في كدة والحمد لله علي كل حال ... نفسي انتي كمان ترضي يا حبيبتي ارضي عشان ربنا يراضينا ويجبر بخاطرنا ... لكن اني ابعد عنك أو أن يكون في ايدي حاجة اعملها ومعملهاش دا مش هيحصل .. تمام ولا دماغك الجزمة دي لسه مش بتفهم وعايزة تتعدل ؟

جودي ابتسمت :

_ انت كدة مفروض بتقول كلام رومانسي ولا بتهزقني انا مش فاهمه !

جلال خدها في حضنه:

_كدة انا بحبك يا حمارة بحبك ومقدرش اكمل من غيرك يارب تفهمي بقا

جودي شددت من حضنه من غير اي كلام حست أن اي حاجة هتقولها مش هتعبر عن اللي حساه ف ضمته اوي ليها وابتسامه جميلة اترسمت علي وشها

❈-❈-❈

نروح لمكان اول مرة نروحة فيلا صغيرة في كومبوند حديث بمنطقه راقيه

عايش فيها شريف ابن نوال (مهندس برمجيات) هو و احلام مراته (محاسبه)

دخل شريف واحلام من الباب

شريف بارهاق:

_الله يسامحك يا لوما كان لازم يعني نقبل العزومة دي ادينا رجعنا متاخر جدا هلحق انام امتي واصحي امتي عشان شغلي

احلام بدلال:

_بزمتك يا شيكو متبسطتش انهاردة ؟

شريف :

_ لا بصراحة هما ناس لطيفه جدا ودمهم خفيف

احلام :

_ طيب خلاص بقا انسي النوم والشغل والمسؤوليات واستمتع باللحظة الحلوة يا قلبي

شريف بتعب:

_ما انا استمتعت يا حبيبتي والله بس هلكان وعايز انام مش قادر ومش عارف هصحي ازاي بكرة بدري

احلام :

_انا هحضرلك الحمام تاخد شور دافئ كدة يفك جسمك وهتنام مرتاح اوي وهتدعيلي كمان

شريف :

_ماشي يا ستي خليني ماشي وراكي كدة لما اشوف اخرتها

احلام :

_اخرتها خير أن شاء الله يا بيبي

❈-❈-❈

الايام اللي بعد كدة عدت من غير اي جديد

ياسمينا مسافرة وكل يوم بحجة شغل ،،،

شريف مشغول في الفسح والخروجات مع احلام وبعيد تماما عن أهله ،،،

منار وامير العلاقه بينهم فاترة باردة مفهاش جديد ،،،

جودي وجلال الحياة بينهم هاديه ومستقرة ،،،

أما هناء ف مشغوله بترتيبات لاستقبال محمود جوزها اللي غايب بقاله سنين ،،،

ونوال بتجهز لعزومة يوم الوقفه اللي بيتجمعو فيها كلهم من السنه ل السنه

وفي يوم الوقفه الصبح البيت كله عند هناء كان مشغول بالتحضيرات ل استقبال محمود الا الاء كانت نايمة زي عادتها

هناء بغضب :

_انتي يا باردة .. اصحي حرام عليكي هتموتيني من برودك دا ... الاء .. قومي بقا

الاء بنوم :

_حرام عليكي يا ماما حد يصحي حد كدة بردو

هناء بغيظ :

_بزمتك انا واختك دخلنا نصحيكي كام مره والبعيدة معندهاش دم وسيباني انا واختك لايصين من الصبح لوحدنا يا باردة

الاء ببتسامة هاديه:

_واديني صحيت يا ماما صباح الخير يا قمر انتي

هناء كشرت :

_باردة زي ابوكي بصحيح يلا عشر دقائق والاقيكي تحت معانا سمعاني

الاء هزت راسها :

_حاضر يا ماما انا اصلا صحيت خلاص

هناء نزلت والاء قامت خدت شاور ونزلتلهم تحت كانو في المطبخ

الاء :

_اديني صحيت وفوقت اهو ها بقا اساعدكم في ايه ؟

هند بسخريه:

_لا كتر خيرك والله عموما احنا خلصنا خلاص كل حاجة متشكرين ل خدماتك الجليله

الاء بترقب:

_ماما هو حقيقي انتم خلصتم كل حاجة

هناء :

_اه خلصنا خلاص وهنطلع ناخد شاور ونجهز زمانهم جايين خلاص

الاء بغضب مكتوم:

_ولما هو خلصتم كل حاجة حضرتك صحتيني بالطريقة دي ليه مش فاهمه انا

هناء برفعه حاجب:

_انتي كنتي عايزة تفضلي نايمة كل دا ولا ايه ؟ وبعدين احنا خلصنا وهنطلع نجهز علي ما حضرتك تجهزي السفرة لو معندكيش مانع يعني لأن باباكي علي وصول ( بصت ل هند ) يلا يا نودا عشان نلحق نجهز والاء هتكمل هي

هناء و هند خرجوا من المطبخ والاء بتدات تجهز السفرة وهي عماله تغني ورايقه علي الاخر تلفونها رن ب صوت فويس علي وتساب طلعته وشغلتها

_ هاي لولو اخبارك .. احنا كلنا بكرة هنكون في كافيه ستارز عشان عيد ميلادي هنستناكي اوعي متجيش هزعل اوي

الاء ابتسمت وردت بغرور بفويس :

_هاي وليد انا تمام انت ايه الاخبار ... بصراحة مش عارفه بكرة هيكون مناسب ليا أو لا خليني اشوف وبالليل هاكد عليكي ... باي

قفلت الفون ورجعت تكمل اللي بتعمله وهي بتغني ...

❈-❈-❈

أما عند نوال كانت هي وجودي بيجهزو الفطار ومعاهم مرات البواب ام محمد ومحدش من ولادها جه لسه

جودي :

_كدة تقريبا كل حاجة جهزت انا هقوم اخد شاور واجهز بقا محتاجة حاجة يا ماما قبل ما اقوم ؟

نوال :

_لا يا حبيبتي تسلم ايديك معلش تعبتك معايا انهاردة

جودي ابتسمت بحب :

_انا مش عايزة اسمع كلمه معلش دي خالص ماشي يلا انتي كمان قومي اجهزي

نوال :

_هقوم اهو ( بصت ل ام محمد ) خلاص كدة يا ام محمد تسلم ايديك يا حبيبتي انزلي بقا الحقي حضري فطاركم انتم كمان تعبناكي معانا

ام محمد بحب :

_ولا تعب ولا حاجة يا ست نوال تعبك اصلا راحة بقولك ايه متخليش حد يعمل حاجة في المواعين انا هطلعلك بالليل واشطبلك المطبخ كله متقلقيش

نوال ابتسمت :

_ تسلملي يا غاليه

ام محمد :

_انا قفلت علي البط والفراخ والمكرونة البشاميل في الفرن بتاخد وش بس والملوخيه ناقصه علي الطشه والسلطة اهي حيقتها كمان والعصاير في التلاجة والحلتين دول فيهم الشوربه و التورلي والجلاش فاضله وش بس قبل الاذان عشان يبقي سخن محتاجة مني حاجة تاني قبل ما انزل

نوال :

_لا كدة كله تمام الحمد لله

ام محمد :

_طيب هنزل انا بقا سلام عليكم

نوال :

_وعليكم السلام حبيبتي

ام محمد نزلت ونوال قامت تجهز هي كمان وطول الوقت بتدعي ربنا أن اليوم يعدي علي خير من غير اي مشاكل

❈-❈-❈

ياسين كان في المطار مع جلال مستنين طيارة محمود توصل اتفاجاو بصوت من وراهم

ياسمينا:

_وحشتيني اوي يا ياسو

ياسين بصدمة:

_جيسي !!! انتي بتعملي ايه هنا اا اقصد انتي جيتي امتي ومقلتليش ليه و

قاطعته ياسمينا :

_براحة طيب حبيبي وهقولك كل حاجة (بصت ل جلال ) ازيك يا جلال عامل ايه

جلال ببتسامة :

_انا تمام حمد لله علي السلامة مفاجأة حلوة فعلا

ياسمينا ابتسمت :

_الله يسلمك

ياسين :

_انا مش فاهم حاجة

ياسمينا :

_انا عرفت من هناء المعاد بتاع طيارة محمود والحمد لله لاقيت طيارة في نفس المعاد من عندي وحبيت اعملك مفاجأة واكون معاكم انهاردة ها بقا ايه رايك ؟

ياسين ابتسم بفرحة :

_مفاجاة حلوة يا قلبي انا بس اتخضيت لما لاقيتك قدامي وحشتيني اوي

ياسمينا بحب:

_وانت كمان وحشتني اوي حبيبي

جلال :

_طب ايه اروح اتهوي في اي مكان ولا ايه بدل ما انا واقف عزول كدة وشكلي وحش

ياسمينا:

_لا طبعا عزول ايه بس

قاطعهم صوت محمود اللي وصل

محمود :

_السلام عليكم يا قوم

الجميع :

_وعليكم السلام ورحمه الله وبركاته

ياسين وهو بيحضنو:

_حبيبي حمد لله على السلامه نورت مصر والدنيا كلها

محمود :

_ تسلم يا ياسين وحشتني والله

جلال وهو بيشد ياسين ويحضنو هو :

_يا عم كفايه بقا سبني اسلم انا كمان ... وحشتني اوي يا أبيه كل دي غيبه

محمود بحب :

_انت كمان وحشتني اوي يا جلجل .... اخبارك ايه يا حبيبي

جلال ببتسامة:

_كله تمام يا أبيه

محمود بعد ما خد باله من ياسمينا:

_ياسمينا معلش مخدتش بالي ازيك عامله ايه

ياسمينا :

_الحمد لله حمد لله علي السلامة نورت مصر

محمود ابتسم وخرجوا كلهم من المطار في طريقهم للفيلا

محمود كان متحمس جدا ... بقاله تلت سنين منزلش بسبب ضغط الشغل اللي عندة

تلت سنين عدو عليه وهو وحيد من غير عيلتة تلت سنين ميعرفش عنهم حاجة نفسه يقعد معاهم ويعرف كل اخبارهم بالتفاصيل الممله عايز يشاركهم كل حاجة والأهم حاليا أنه عايز يشوف رياكشن وشهم لما يعرفو أنه رجع نهائي ومش مسافر تاني

ابتسم بحب وحنين وهو بيفكر في مليون حاجة وازاي هيستقبلوة وازاي هيتعامل معاهم ويا تري كبرو وبقوو عرايس زي الصور والفيديو ويا تري هناء هو وحشها زي ما هي وحشته اسئله كتير اوي كانت في دماغه طول الطريق ....

ونفسه يخلص بسرعه عشان يشوفهم ويملي عينيه منهم

الوقت اللي وصل فيه محمود الفيلا وهو كله حماس وشوق لمراته وبناته هو نفس الوقت اللي وصل فيه امير ومراتة وشريف ومراته البيت عند نوال

مقابلات هتقلب الموازين وتغير مجري الأحداث رأسا على عقب

🌺🌹🌺🌹🌺🌹🌺🌹🌺🌹🌺🌹🌺

3=رواية كيد النسا قهر الرجال

رواية جديدة قيد النشر

من قصص و روايات

الكاتبة منى محمود

الفصل الثالث

وصل محمود الفيلا كانت هناء والبنات في انتظارة قدام الباب جري عليهم وحضنهم بلفهه وشوق سنين بعاد وهما كمان بادلوة الحضن بنفس اللهفه والشوق

بعد مدة من السلامات كانو قاعدين مع بعض وبيتكلمو محمود كان قاعد علي الكنبه وحاضن الاء وهند من الناحيتين وهناء قاعدة جمبهم

جلال بمرح :

_ بس صغرت انت يا حوده ما شاء الله يعني ايه السر بقا عرفنا

هناء كشرت :

_ قصدك ايه بقا اني انا اللي كبرت ولا ايه ؟

جلال :

_مين دي اللي كبرت يا نونا انتي لما بتمشي مع بناتك الناس بتفتكرك اختهم مش امهم قال كبرت قال

محمود برفعه حاجب :

_انت بتعاكس مراتي قدامي يا جلجل

جلال وهو بيقعد جمب هناء ويحضنها:

_ اعاكسها واحضنها كمان دي حبيبتي دي

هناء ضحكت وهي بتبص ل محمود اللي باين عليه الغيرة

محمود كشر :

_طب لم نفسك بدل ما اقوملك الواحد صايم وجاي من سفر وعلي آخرة

جلال وهو بيبعد عن هناء:

_ لا وعلي ايه الطيب احسن ( بص علي ياسين لاقاه محاوط ياسمينا بدراعه وبيتكلمو بصوت واطي وهما مبتسمين ) عم الحبيب احنا هنا معاك هه مش في بيتكم انت

ياسين بضحك :

_عارف ان احنا مش في بيتنا يا رخم انت اللي مركز معانا ليه هه ؟

هناء :

_ غيران عشان حبيبه القلب مش معاه يا سيدي تقريبا دا اكتر وقت قضوة بعيد عن بعض

الاء :

_ عارف يا خالو نفسي اتجوز واحد رومانسي زيك كدة حاجة واو اوي يعني

جلال كشر :

_بت انتي انا كام مرة اقولك متقوليش خالو دي دا انا فرق بيني وبينكم كام سنه عمي

هند بضحك :

_ قوليلو زي يا جلجل

جلال بغمزة :

_شايفه الناس اللي بتفهم

هناء كشرت :

_بس مش صح علي فكرة المفروض يحترموك ويقولو خالو

جلال بدهشه:

_ وهو لما يقولولي يا جلجل يبقي قللو من احترامي أو مش بيحترموني خالص ؟ انا فعلا فرق السن بيني وبينهم قليل وبحسهم صحابي اكتر من أنهم بنات اختي وبعدين اذا كان انا بقولك يا نونا يب

قاطعته هناء :

_خلاص خلاص هو انت حد بيعرف ياخد معاك حق ولا باطل .. يلا يا بنات نحضر السفرة يادوب نجهز الاذان فضلة نص ساعه بس

ياسمينا :

_استني يا نونا هاجي معاكي

هناء :

_اوكي يلا حبييتي

❈-❈-❈

في بيت نوال الوضع كان مختلف تماما كانو متجمعين في الصاله الكبيرة كل واحد جمب مراتة وعلي الكنبه قاعدة نوال وعلي يمينها جودي وشمالها تيا بنت امير

نوال ببتسامة :

_ يا سلام اهو انهاردة بس الواحد هياكل بنفس عشان اللمة الحلوة دي

جودي ابتسمت:

_ ربنا يخليكي لينا حبيبتي وديما مجمعانا كدة

أمير :

_ امين يارب ... وانت عامل ايه يا شريف بقالنا كتير اوي متقابلناش

شريف :

_ انا تمام الحمد لله ماشي الحال انت اخبارك ايه ؟

امير :

_تمام الحمد لله

شريف :

_وانتي يا جوجو اخبارك ايه وازي جلال وحشني والله

جودي :

_ الحمد لله تمام يا حبيبي

منار :

_ ماشاء الله يا جوجو الصفحة بتاعتك كل يوم بتكبر عن اليوم ال قبله

احلام :

_بس في الاول والاخر شغل اون لاين ملوش مستقبل ما تفكري يا جوجو وتفتحي مكان خاص بيكي اشيك واحسن

جودي :

_ بصي انا مساله اشيك دي مش شغلاني بصراحة لكن هو اكيد في المستقبل هيكون ليا مكان خاص بيا بس اكون عملت عملاء اكتر شويه عشان اضمن نجاح المشروع

شريف :

_ بس انتي عدد الفلورز عندك كبير ما شاء الله ايه المانع تبدئي دلوقتي في مشروعك الخاص اصلا مشروع زي دا مش هيتم في يوم وليله هياخد وقت اكيد

امير :

_ انا كمان دا راي عموما ابدئي دوري انتي علي المكان وانا هعملك دراسه جدوي مبدئيه كدة ونشوف الدنيا هتتكلف ايه وعلي مهلنا خالص كدة كدة شغلك شغال زي ما هو احنا مش مستعجلين بس نبقي اخدنا خطوة

جودي بتفكير :

_ مممم اوك هقول ل جلال لما اروح وأكد عليك بكرة أن شاء الله

منار :

_ وجلال ماله بحاجة زي كدة دا مشروعك انتي وقرارك انتي

نوال :

_ ازاي بقا دا جوزها ولازم تشورة وبعدين هو مش المشروع دا هياخد من وقت بيتها وجوزها يبقي لازم موافقته

امير :

_ اكيد يا ماما وانا واثق أن جلال هيشجعك اصلا وهيكون متحمس يمكن اكتر منك

منار :

_ اه اكيد اهو حاجة تشغلك شويه علي ما ربنا ييسر وتجيبو اطفال عايزة اقولك يا جوجو بعد الخلفة الحياة كلها بتختلف ومبتلاقيش وقت لاي حاجة طول اليوم بتلفي كدة حوالين نفسك

نوال بضيق :

_ ولما انتي مش بتلاقي وقت للدرجة دي ازاي كل يوم والتاني عند اهلك او خارجة مع اخواتك كل يوم والتاني في مكان شكل ؟ خلي بالك من كلامك يا منار

امير بحرج :

_ احم منار متقصدش يا ماما هي بتتكلم عادي مع جودي

منار بضيق :

_ لا ثواني انت يا أمير ... ومالها بقا خروجاتي مع اخواتي أو مرواحي لاهلي طالما مش مقصرة في بيتي ولا مع جوزي ايه المشكلة مش فاهمه يا طنط

شريف :

_ خلاص يا جماعه حصل خير هو اختلاف في وجهات النظر مش اكتر

احلام حبت تغير الموضوع :

_ احم شريف انت قولت ل طنط ولا لسه ؟

نوال :

_ قالي علي ايه ؟

شريف بحرج :

_ اصل يعني يا ماما احم بصراحة يعني

احلام كملت هي بقوة :

_ مفيش يا طنط كل الموضوع أننا مسافرين انهاردة بالليل مع جماعه صحابنا عزمنا نقضي معاهم اجازة العيد في الغردقة وهو كان محرج يقولك يعني عشان متعودين تتجمعو تاني يوم العيد سوا بس الظروف بقا معلش تتعوض اكيد مرة تانيه مش كدة يا حبيبي

قالت جملتها الأخيرة ببتسامة دلع وشريف هز رأسه بموافقه وكان باين عليه الحرج

امير بص ل ماماتة بأسف وجودي نزلت وشها ل تحت عشان محدش يلاحظ عينيها اللي دمعت علي حالها وحال امها أما منار فكانت بتبص ل احلام وشريف بغل وغيره

نوال بصت ل شريف واتكلمت بحزن وعتاب :

_ يعني حتي اليومين اللي بحاول اشبع فيك فيهم عايز تحرمني منهم يا شريف

شريف :

_ والله يا حبيبتي اتعزمنا وكان صعب نرفض علي العموم احنا هنقعد اربع ايام هناك ليكي عليا هقدم اجازتي يومين كمان واجيلك اقضي معاكي يوم كامل قبل ما انزل الشغل ايه رايك مرضيه كدة يا نونو

نوال حاولت تبتسم :

_ مع اني عارفه أنه مش هيحصل بس ماشي يا شريف المهم انك بخير وكويس يا ابني ... يلا يا جودي نحضر السفرة الاذان قرب خلاص يا بنتي

اول ما نوال قالت هتحضر السفرة منار خدت تيا وقالت هتدخلها الحمام واحلام مسكت الفون وقالت هتعمل مكالمة مهمة

شريف مهتمش ومسك موبايله وفضل يلعب فيه وأما امير ف اتحرج جدا من تصرف منار وقام هو ورا ماماته وجودي عشان يساعدهم في تحضير السفرة ودخلهم المطبخ

امير بمرح :

_ قوليلي بقا يا ست الكل اعمل معاكم ايه ؟

نوال ابتسمت :

_ ولا حاجة يا حبيبي روح اقعد انت مع اخوك وانا وجودي هنحضر كل حاجة

امير :

_ والله ابدا هحضر معاكم يعني هحضر معاكم .. بصي انا هاخد الاطباق والشوك ارصهم علي السفرة واجي أصب العصاير دي في الكوبايات و

قاطعته جودي :

_ وبس كدة يبقي شكرا جدا يعني يلا رص انت علي ما انا احضر الصواني والسرافيز اللي هتطلع

امير بدء يساعدهم وبعد وقت قليل كانو متجمعين كلهم علي السفرة وبيفطرو سوا وبيحاولو يرسمو ابتسامة علي وشوشهم رغم المشاعر ال المختلفه اللي كل واحد فيهم حاسس بيها

❈-❈-❈

نرجع عند هناء تاني بعد الفطار كانو متجمعين وقدامهم الحلويات والمشروبات وبيهزرو ويضحكو سوا وبعد حوالي نص ساعه

جلال :

_ طب هستاذن انا بقى يا جماعه والف حمد لله على السلامه يا ابيه

هناء :

_ايه هو ده اللي هستاذن انا بقى يا جماعه لسه بدري اقعد معانا شويه متبقاش رخم

ياسين :

_ لا شويه ايه انا كمان برده هستاذن يا دوبك كفايه كده اوي يعني الراجل لسه جاي من السفر بقى له ثلاث سنين مسافر يريح شويه ولا حاجه حلو اوي كده

جلال :

_ اه وبرده انت مراتك كان بقى لها كم شهر ولا بتاع مسافره مش عارف حلو اوي كده

ياسمينا اتحرجت وياسين خبطة في كتفه :

_يا عم انت مركز معانا كده ليه ما تقوم تروح لمراتك ما انت برده سايبها من الصبح لغايه دلوقتي مش بعادتك يعني

جلال :

_لا ما انا هقوم اروح اعدي عليها اجيبها من عند مامتها ونروح بقى ونقعد ثلاث اربع ايام كده ما نخرجش من البيت نعوض اليوم اللي انا خرجت فيه ده ومنشفش حد خالص

محمود بضحك :

_ احلى حاجه فيك يا جلال جراءتك دي

هناء :

_ لا وانت الصادق يا محمود قصدك بجاحته

جلال كشر :

_ انا بجح يا نونه

هند :

_ لا يا جلجل انت مش بجح انت بس مش بتتكسف تعبر عن حبك لمراتك ودي حاجه حلوه اوي فيك هما بس اللي مش فاهمين كده

الاء بسخريه :

_ يا حنينه سيبنا لك انتي الفهم

هند :

_ ومالك بتقوليها بتريقه كده ليه ؟

الاء :

_ لا ولا بتريق ولا حاجه

جلال :

_ اه ناقر ونقير هيبدوا مع بعض انا يا دوبك كده اقوم قبل ما الفقره دي تبدا يلا السلام عليكم والف حمد لله على سلامتك يا ابيه مره ثانيه وان شاء الله نبقى نتقابل كثير في الاجازه دي

محمود وهو بيسلم عليه :

_ الله يسلمك يا حبيبي اكيد ان شاء الله هنتقابل كثير شكرا تعبتكم النهارده معايا انت وياسين بس مش عارف سالم وابنه النهارده اختفوا كده وانا بصراحه كنت اعملها لهم مفاجاه فحاولت اوصل لهم بعد ما رجعت تليفوناتهم الاثنين مقفوله فمعلش تعبتكم انتم معايا

ياسين وهو بيسلم علي محمود :

_ عيب يا محمود ما تقولش كده احنا اخوات بردو يلا الف حمد لله على السلامه واكيد ان شاء الله هعدي عليكم مره ثانيه وهنجمع مع بعض الاجازه دي

محمود :

_ ان شاء الله يا حبيبي

ياسمينا برقه :

_ الف حمد لله على السلامه يا ابيه محمود وكل سنه وانتم طيبين عيد سعيد عليكم جميعا

محمود :

_ الله يسلمك يا ياسمينا وحمد لله على سلامتك انتي كمان

هناء :

_ حمد لله على سلامتك انتي كمان يا سمسم وعيد سعيد عليكي انتي كمان وسلامي لبابا وماما جدا وان شاء الله نتجمع في العيد كلنا مع بعض

ياسمينا :

_ يوصل يا نونه ان شاء الله واكيد ان شاء الله هنتجمع مع بعض يلا سلام عليكم

هناء :

_ سلام يا حبايبي

بعد ما الكل مشي

الاء :

_ يلا بقى يا سي بابي اهو كلهم مشيو ورينا بقى الحاجات اللي كنا طالبينها منك والهدايا يلا يلا فين

هناء :

_ يا بنتي اصبري متصربعه على ايه

محمود :

_ سيبيها براحتها يا هناء تعالي يا ستي يلا نفتح الشنط واطلع لكم الهدايا

هند :

_ بابي اوعى تكوني نسيت التابلت اللي انا طلبته منك

محمود :

_ لا يا نوده انا ما نسيتش اي حاجه اي حد فيكم طلبها مني كل حاجه جبتها لكم وزودت عليهم كمان

الاء بحماس :

_ ايوه بقى يا بابا يا جامد

محمود ضحك وضمهم تاني لحضنه والفرحة مش سيعاه

❈-❈-❈

جلال اول ما خرج من عند هناء اتصل علي جودي

جلال :

_ حبيب قلبي اللي وحشني وهتجنن علية

جودي بصوت مخنوق :

_ أيوة يا جلال .. خرجت خلاص من عند نونا ابدء اجهز ؟

جلال بلهفه :

_ مالك يا جودي صوتك مخنوق كده ليه في حاجه حصلت في حد ضايقك انتي كويسه ؟

جودي ابتسمت :

_ ما فيش حاجه يا حبيبي انا كويسه ما تقلقش قول لي بس ابدا اجهز ولا ايه ؟

جلال اتنهد:

_ انا كنت حاسس ان اليوم ده مش هيعدي على خير عموما يا جودي انا 10 دقائق وهتلاقيني عندك اجهزي واول ما هوصل هرن عليكي تنزلي لي بلاش اطلع

جودي بسخريه :

_ وانت بقى خايف تطلع لاحسن تقابل حد منهم على فكره يا جلال هم بعد الفطار على طول هم الاثنين استاذنوا ومشيوا وانا قاعده مع ماما لوحدنا

جلال :

_ معقول بسرعه كده هما لحقوا يقعدوا عشان يمشوا

جودي :

_ اصل شريف واحلام مسافرين النهارده بالليل الغردقه مع اصحابهم فقالوا يا دوب يلحقوا يجهزوا والاستاذه منار رايحه تبات النهارده عند اهلها عشان بتقضي معاهم اول يوم العيد فهي كمان قالت يا دوب تلحق تنزل واديني قاعده انا وامي اهو

جلال :

_ طب بقول لك ايه ما تجيبي ماما تبات معانا النهارده وتقضي معانا بكره اول يوم العيد بدل ما هي قاعده لوحدها

جودي :

_ قلت لها والله يا حبيبي وهي مش راضيه بتقولي انا مش هسيب بيتي اول يوم العيد ابدا

جلال بتفكير :

_ خلاص انا هعدي عليكي دلوقتي وبكره الصبح ان شاء الله ننزل نصلي العيد ونطلع نفطر معاها ونقضي احنا معاها اول يوم العيد ايه رايك ؟

جودي :

_ ماشي بس ما انا تاني يوم بردو المفروض اكون معاها علشان منار وامير هيجوا وانت عارف ان منار ما بتعملش اي حاجه

جلال :

_ ممممم خلاص احنا نصلي ونطلع نفطر معاها ونقعد معاها لغايه بعد الظهر كده وبعدين ننزل نقضي احنا اليوم في بيتنا وثاني يوم نبقى نروح لها ايه رايك انا ثاني يوم كمان هكون موجود معاكم

جودي بسعادة :

_ راي ان انت احن راجل في الدنيا وانا بحبك اوي اوي

جلال ابتسم :

_ انا اللي بموت فيكي يا روحي يلا بقى اقفلي واجهزي عشان خلاص قربت عليكي

جودي :

_ اوكي حبيبي تيجي بالسلامه باي

جلال :

_ باي

❈-❈-❈

في عربيه ياسين وياسمينا

ياسين بحب :

_ وحشتيني وحشتيني اوي اوي اوي وبجد احلى مفاجاه عملتها لي النهارده

ياسمينا:

_ وانت كمان يا حبيبي وحشتني اوي مع انك يعني بقالك فتره كده مكشر في وشي ومبوز ومش مديني اي ريق حلو بس انا ما قدرتش ان يعدي النهارده ما اكونش معاك

ياسين :

_ غصب عني يا ياسمينا انتي بتوحشيني وبزهق من القعده لوحدي انا بقيت على طول لوحدي هو لولا ان انا بحبك لولا أنك بتوحشيني اوي كدة ولا ايه ؟

ياسمينا :

_ عارفه والله يا حبيبي وانت كمان بتبقى واحشني جدا جدا وببقى هتجنن كده واكون معاك بس غصب عني ده شغلي ومن الاول كنت عارفه ان هيبقى في شويه رخامه في المواعيد بس انا فعلا بحبه

ياسين بتهرب :

_ عموما بلاش نتكلم في اي عتاب دلوقتي خلينا دلوقتي في اللحظه الحلوه دي عشان انتي وحشتيني اوي

ياسمينا :

_ انت اكتر يا بيبي

❈-❈-❈

بالليل بعد ما محمود وزع الهدايا علي بناته كل واحدة خدت شنطتها ودخلت اوضتها تتفرج عليهم براحتها وفضل محمود وهناء لوحدهم

محمود وهو بيضمها بحب وقوة :

_ وحشتيني اوي اوي يا هناء الايام هناك كانت صعبه وطويله وممله وانا بعيد عنكم

هناء بحب :

_ انت كمان يا حبيبي وحشتني اوي

محمود :

_ عندي ليكي خبر انتي اول واحده تعرفيه انا مبلغتوش لاي حد

هناء :

_ خير يا حبيبي خبر ايه ده ؟

محمود :

_ انا قدمت استقالتي هناك وسويت معاشي ومكافاتي وصفيت الدنيا كلها وقررت ان انا افضل هنا في مصر ومش هسافر تاني

هناء .....

❈-❈-❈

جلال وجودي وصلو شقتهم جودي قررت متحكيش ل جلال علي كلام منار اللي ضايقاها ولما جلال سألها صوتها كان ماله قالتله أن دماغها كانت مشغوله ب كلامهم عن المشروع بتاعها جلال كان بيسمعها بدون اي رد فعل ودا هي استغربته

جودي :

_ ايه يا جلال ساكت يعني ما قلتليش رايك في اللي اتقال ؟

جلال بجمود:

_ وانتي شايفه ان هو ده الوقت المناسب اللي تعملي فيه المشروع بتاعك

جودي باستغراب :

_ ايوه .. انا يعني فعلا على رايهم مش هعمله في يوم وليله اكيد هياخد وقت فليه مبداش من دلوقتي

جلال :

_ سوري يا جودي بس انا مش موافق

جودي بصدمة :

_ نعم مش موافق ليه يا جلال ما انت عارف ان ده حلم حياتي ان انا يبقى لي مشروع خاص بيا بدل شغل الاونلاين ده

جلال ......

❈-❈-❈

في عربيه شريف واحلام في طريقهم للمطار عشان يسافرو

شريف :

_ انا مش فاهم انا قلت ايه يضايقك اوي كده ومخليكي مكشره من ساعه ما نزلنا من عند ماما لغايه دلوقتي

احلام بضيق :

_ ما هي المشكله الاكبر ان انت مش عارف انت ضايقتني في ايه او قلت ايه

شريف :

_ طيب يا حبيبتي تعالي على نفسك فهميني انا عملت ايه ضايقك اوي كده

احلام :

_ اوكي يا شريف انا هقول لك عشان ما ترجعش تقول لي ان انتي بتزعلي وبتقلبي الدنيا وبتنكدي اوكي ... هو انا مش لما كنا بنتفق على الميعاد بتاع الاجازه والناس قالوا ان هم هيقعدوا هناك ست ايام قلت لك عايزين نقعد معاهم قلت لي لا هم اربع ايام بس عشان مش هعرف اخد اجازه اكثر من كده لشغلي ازاي بقى دلوقتي هتاخد اجازه يومين كمان عشان تروح تقضي اليوم مع مامتك

شريف :

_ اولا اربع ايام كويس جدا نقضيهم مع الناس مش لازم نقضي الستة كلهم ثانيا ماما فعلا كانت زعلانه وانا ما حبيتش اكسر بخاطرها وبكره العيد يعني ايه المشكله ايه ان انا اروح اقضي يوم معاها

احلام :

_ يعني انت عشان تروح تقضي يوم مع مامتك تكسر بخاطري انا وتنكد عليا في العيد وما تخلينيش اعمل حاجه نفسي اعملها

شريف بدهشه :

_ انا انا كسرت بخاطرك ونكدت عليكي فين ده وايه دي الحاجه اللي نفسك تعمليها وانا مش هخليكي تعمليها ما احنا مسافرين اهو يا احلام اعمل ايه ثاني

احلام بصوت مخنوق :

_ انت على طول بتكون مشغول طول اليوم في شغلك ولما بترجع ساعات بتجيب معاك شغل البيت يبقى لما تاخذ اجازه دي تبقى من حقي انا انا بس اللي من حقي تقعد وقتك كله معاها وبعدين مامتك عندها غيرك امير موجود وجودي كمان وجلال ومنار لكن انا ما عنديش حد يعني المفروض تقضي الاجازه كلها معايا انا بس

شريف :

_ يا حبيبه قلبي انتي روح قلبي من جوه بس اكيد مش كام الساعه اللي هروح ابص فيهم على امي هما دول اللي هيضايقوكي اوي كدة يعني يا لوما

احلام بتصميم :

_ بص من الاخر كده انت خلاص خليتهم ست ايام اجازه بدل اربعه هنقعد خمس ايام هناك واليوم السادس ابقى اروح بص فيه على مامتك بس تعمل حسابك انهم هيكونو ساعتين ثلاثه بس مش اليوم كله اوكي ولا مش اوكي

شريف ....

❈-❈-❈

منار وصلت بيت اهلها وقعدت معاهم شويه وبعدين دخلت تنيم تيا وكانت ماسكة الفون وبتشات مع حازم

منار :

_ كنت هزعل منك اوي يا بيبي لو فضلت منكد علينا وبكره العيد

حازم :

_ وانا اقدر برده يا قلب البيبي يعني انت بتيجي مخصوص عند اهلك يوم الوقفه عشان نعرف نسهر مع بعض ونقضي وقت لطيف هروح انا منكد علينا فيه ده كلام برده

منار :

_ بس انا لسه قدامي ساعتين كده ولا حاجه على ما اكون معاك عشان بابا وماما لسه صاحيين

حازم :

_ ساعتين كتير يا منار انا مشتاق لك اوي

منار :

_ معلش يا حبيبي هعوضك وهسهر معاك للصبح

حازم :

_ اذا كان فيها سهر للصبح يبقى تمام هستناكي يا جميل بس المره دي مش هتنازل عن الفيديو كول انا موضوع الصور ده ما بقاش يريحني ابدا لازم اشوفك قدامي واحس بيكي معايا

منار .....

🌺🌹🌺🌹🌺🌹🌺🌹🌺🌹🌺🌹🌺

رواية كيد النسا قهر الرجال

رواية جديدة قيد النشر

من قصص و روايات

الكاتبة منى محمود

الفصل الرابع

الخذلان

الخذلان شعور قاسي تحس أنه بياكل في روحك بيخنقك كل يوم اكتر من اليوم اللي قبله ... كل ما بتحاول تتعافي منه بتلاقي نفسك قلبك وجعك اكتر من الاول ... بتفضل كتير واقف مكانك وبتسال نفسك كل لحظة

انا غلطت في ايه !

محمود كان متحمس وهو بيقول الخبر ل هناء كان طول الوقت بيتخيل رد فعلها مرة يتخيل أنها فضلت تتنطط من الفرحة ومرة يتخيل أنها هتحضنه وتصرخ من السعادة ومرة يتخيل أن دموعها هتنزل من الصدمة وعيونها هتنطق بالعشق

((( وكل ما ذاد العشم كل ما قتلك الخذلان )))

محمود بحماس :

_ انا قدمت استقالتي هناك وسويت معاشي ومكافاتي وصفيت الدنيا كلها وقررت ان انا افضل هنا في مصر ومش هسافر تاني مش هسيبكم تاني يا حبيبتي

هناء بدهشه :

_ نعم ! عملت ايه ؟

محمود :

_ ايه مش مصدقه من الفرحة صح .. هههههههههههههههه بقولك خلاص انا مش هسافر واسيبكم تاني

هناء كشرت :

_ انت ازاي تاخد قرار في حاجة زي كدة لوحدك يا محمود هه ازاي متشركنيش معاك خلاص لاغتني للدرجة دي من حساباتك

محمود بصدمة :

_ حساباتي !!! هناء انا بقولك مش هسيبكم تاني وانتي كل اللي فارق معاكي ازاي فجاءتك بخبر زي دا من غير ما اخد رايك ؟ دا بجد يا هناء ؟

هناء :

_ أيوة بجد يا محمود ... المفروض كنت تشركني معاك في قرار زي دا ... ( ربعت ايديها وكملت كلام بهدوء ) تقدر تقولي حضرتك لما خدت قرار زي دا فكرت في كمية الأقساط اللي علينا ... ( بدأت تعد علي ايديها ) قسط الفيلا دي اللي لسه قدامة خمس شهر قسط شاليه السخنة اللي لسه قدامة سنة كامله مصاريف جامعه البنات واخيرا بقا اقساط العربيات ال قدامها مدة مش متذكراها اوي دلوقتي بس مش اقل من سنة ابدا ... ها يا محمود تقدر تقولي لما قدمت استقالتك فكرت في كل دا ؟ ولا شويه حنين للبلد ول لمة العيلة خلوك تنسي تفكر بعقلك ؟

محمود رد بحزن :

_ يااا بقا كل دا اهم من اني اكون وسطكم ؟ حبه حنين بالنسبالك سبب تافه عشان أقرر اني ارجع .. هه علي العموم يا هناء اه انا فكرت في كل دا وعارف كل الالتزامات اللي عليا وعارف هسدها ازاي اكيد بعد العمر دا كله في الغربه والشغل بقيت اعرف افكر كويس مش مراهق بيمشي ورا حبه حنين وخلاص ... ولو عايزة تعرفي التفاصيل بعد ازنك خليها يوم تاني لاني تعبان ومحتاج انام تصبحي علي خير

سابها ودخل اوضتهم ورمي نفسه علي السرير ونام كانو بيهرب من اي كلام ممكن يقولو لنفسه بيهرب من شعور الخذلان اللي حاسس بيه بيهرب من نغزة جامدة حاسس بيها في قلبه ومش عارف يعمل ايه عشان تروح

أما هناء فتنهدت بتعب وقعدت علي الكرسي اللي وراها وهي بتفكر يا تري رد فعلها كان قاسي ولا دا الرد فعل الطبيعي بعد ما فجاءها من غير ما ياخد رأيها

❈-❈-❈

عند جلال وجودي

جلال :

_ سوري يا جودي بس انا مش موافق

جودي بصدمة :

_ نعم مش موافق ليه يا جلال ما انت عارف ان ده حلم حياتي ان انا يبقى لي مشروع خاص بيا بدل شغل الاونلاين ده

جلال :

_ عشان انتي في وسط كل دا نسيتي أن مفروض نبدء تحضير العمليه في خلال اسبوعين تقريبا ف ازاي بقا هتبقي فاضيه ل اللف والدوران والاتفاقات وكل الكلام دا ؟ دا انتي المفروض حتي شغل الاون لاين توقفيه مدة زي ما الدكتور قال

جودي بتردد :

_ _ بصراحة يا جلال انا مش مستعدة دلوقتي للعمليه م مش حسه اني قادرة والله دلوقتي يمكن المشروع دا يحسن نفسيتي شويه ويخليني مستعدة اعيد كل دا من تاني

جلال :

_ انتي عارفه مشروع زي دا هيحتاج وقت اد ايه علي ما يتم ... طيب هخليني معاكي للاخر فرضا استنينا والمشروع تم علي خير ما وقتها هيحتاج كل وقتك عشان ينجح هيحتاج كل دقيقه عشان يكبر وتفرحي بيه والوقت هيجر وقت ومش هنخلص

جودي :

_ لو هنفكر زي ما انت بتقول كدة يبقي بردو عشان استني بعد العمليه يبقا بتتكلم في مدة كبيرة جدا لو لا قدر الله العمليه منجحتش بنتكلم في ست شهور و لو يارب يعني نجحت يبقي هيتاجل لأجل غير مسمى

جلال :

_ يبقي تحددي أولوياتك يا جودي ايه المهم دلوقتي ايه اللي ينفع يتأجل وايه لا دا اللي محتاجة تعمليه دلوقتي ... انا مصدع ومحتاج انام تصبحي علي خير

سابها ودخل ينام مكنش عايز يتعصب عليها أو يضايقها بأي كلمة تطلع منه من غير ما يحس اكتفي بأنه يرمي الكرة في ملعبها ويسيبها هي تقرر

أما جودي ففضلت مكانها تفكر في كلام جلال ... هي حسه انها مش مستعدة دلوقتي للعمليه وفي نفس الوقت كلام جلال صح لازم تحدد اولولاياتها ايه الأهم حاليا عشان تعمله

❈-❈-❈

في عربيه شريف كان الحوار بينه وبين احلام لسه شغال هو بيحاول يراضيها وهي مصممة علي كلامها

احلام بتصميم :

_ بص من الاخر كده انت خلاص خليتهم ست ايام اجازه بدل اربعه هنقعد خمس ايام هناك واليوم السادس ابقى اروح بص فيه على مامتك بس تعمل حسابك انهم هيكونو ساعتين ثلاثه بس مش اليوم كله اوكي ولا مش اوكي

شريف برفعه حاجب :

_ انتي بتأمريني يعني ولا ايه مش فاهم .. مالك يا احلام ما تاخدي بالك من كلامك شويه

احلام بصوت مخنوق :

_ هو دا كل اللي فهمته من كلامي اني بأمرك .. يعني أنك بتوحشني واني عايزة اقضي اكبر وقت جمبك ومعاك دا مش فارق معاك يا شريف

شريف اتنهد ورد :

_ يا حبيبتي وهو انا لو قضيت يوم واحد مع امي دا يجي علي حقك فيا في ايه ؟

احلام :

_ انا مش بمنعك علي فكرة من زيارة ماماتك انا مقدرش اصلا اعمل كدة دي امك وليها حق عليك انا عارفه دا كويس ومقداره بس بقول لو تروح مثلا تتغدي معاها وترجع نسهر سوا للصبح هيحصل ايه دا انا حتة لسه طلبه حتة اوردر جديد ( وغمزتله ) انما ايه جنان وكنت هخليك تقضي ليله تحلف بيها سنين قدام

شريف بقله حيلة :

_ ماشي يا لوما انا مبقدرش ازعلك وانتي عارفه .. حاضر يا ستي هتغدي بس مع ماما وباقي اليوم هيكون معاكي حلو كدة

احلام ابتسمت :

_ حلو اوي اوي يا بيبي بحبك اوي

احلام شغلت اغاني وهي مبتسمة وبدأت تندمج وتغني معاها بدلع وشريف مبتسم ومبسوط بمراتة الدلوعه اللي بتحبه بجنون وحاسس أنه مالك الدنيا ومش محتاج لاي حاجة تاني

❈-❈-❈

الحوار في التلفون بين حازم ومنار كان لسه مستمر

حازم :

_ اذا كان فيها سهر للصبح يبقى تمام هستناكي يا جميل بس المره دي مش هتنازل عن الفيديو كول انا موضوع الصور ده ما بقاش يريحني ابدا لازم اشوفك قدامي واحس بيكي معايا

منار بنرفزة :

_ وبعدين معاك يا حازم هو انت كل شويه هتطلعلي بحاجة جديدة وتنكد علينا انا كدة هبدء ازهق وانت عارفني مجنونة واسهل حاجة عندي البلوك

حازم :

_ خلاص خلاص يا ساتر عليكي الواحد ميعرفش ياخد منك حق ولا باطل ابدا

منار :

_ اهدي كدة يا حازم وخلينا حلوين مع بعض احنا اتنين كبار وناضجين وعارفين كويس اوي احنا عايزين ايه من بعض وحدودنا ايه ف بلاش نضايق بعض هه

حازم :

_ عارفه يا منار اكتر حاجة شدتني ليكي ايه ؟

منار :

_ احب اعرف يا بيبي

حازم :

_ جرئتك معايا في الرفض انا عرفت ستات كتير اوي وبنات كمان وكلهم عند مرحله معينه بيخافو افضحهم وبيبدؤ يوافقو علي اي طلبات ليا لحد ما انا اللي بزهق منهم وبشوف غيرهم الا انتي جرئتك في الرفض بتجذبني ليكي اكتر واكتر

منار بهدوء :

_ دي ستات ضعيفه اي كلمتين يخوفهم

حازم بخبث :

_ يعني انتي مش خايفه افضحك ؟

منار ضحكت جامد :

_ ت ايه هههههههههههههههه تفضحني هههههههههههههههه يا حبيبي أنا أقدر من مكاني كدة افضحك وافضح عشرة زيك من غير ما يمسني اي خدش ولا كلمة واحدة هههههههههههههههه ضحكتني اوي اوي يا بيبي

حازم استغرب :

_ نعم ! ازاي يعني ؟ انا ممكن بالفويسات و تسجيلات المكالمات والصور افضحك انتي بقا تفضحيني ازاي ؟ احب اعرف

منار بغموض وثقه :

_ لا يا قلبي خلينا حلوين سوا بلاش لا انا افكر ازاي انت تقدر تاذيني ولا انت تفكر ازاي انا أقدر ائذيك انهاردة عيد بلاش ننكد علي بعض اوكي ؟

حازم بخوف حاول يخفيه :

_ اوكي يا بيبي

كلمو كلام سوا لحد بعد الفجر بعدها منار نامت بعمق وهي علي وشها ابتسامة نصر وقوة كانت حسه انها متحكمة في كل حاجة دا كان بيخليها سعيدة جدا ومكملة في كل اللي بتعمله

❈-❈-❈

صباح أول يوم العيد صحي ياسين علي صوت ياسمينا الرقيق وهي بتندة عليه

ياسمينا :

_ ياسو حبيبي .. ياسو يلا اصحي بقا كل دا نوم يا كسلان انت

ياسين فتح عينيه وابتسم:

_ صباح الجمال حبيبي

ياسمينا :

_ صباح الفل يا قلبي يلا بقا انا جهزتلك الحمام و الفطار كمان عايزة اقضي اليوم من أوله معاك وحشتيني اوي مش هنقضيها نوم اليوم كله بقا

ياسين بحب :

_ برنسس ياسمينا تؤمر واحنا ننفذ حاضر يا حبيبي علي ما تعمليلي القهوة بتاعتي هاكون خدت شاور ونفطر وشوفي حبه نعمل ايه انهاردة وانا تحت امرك

ياسمينا رمتله بوسه في الهوا وخرجت تعمله القهوة وهو قام عشان يجهز ويحاول يعوض الفترة اللي قضوها بعيد عن بعض هو بيعشقها مش بس بيحبها وهيحاول عشان علاقتهم مرة واتنين وعشرة

أما ياسمينا ف مجرد ما دخلت المطبخ وبقت لوحدها عينيها دمعت واحساسها بالذنب رجعلها تاني كل مرة تحس بالذنب ناحيه ياسين بتهرب وتسافر وتفضل فترة بعيدة عنه ولما تحس انها قويت وسكتت صوت ضميرها بترجع تاني بس المرة دي لا صوت ضميرها سكت ولا البعاد قواها عليه ومبقتش عارفه تعمل ايه ...

كانت بتعمل القهوة وهي سرحانة خلصت ولفت لقت ياسين واقف علي باب المطبخ ومبتسم اوي

ياسمينا :

_ خضتني يا ياسين

ياسين وهو بيحضنها :

_ سلامة قلبي من الخضه ... مالك سرحانة في ايه ؟

ياسمينا بتوتر :

_ ا ابدا مفيش ب بفكر ممكن نقضي انهاردة ازاي مع بعض

ياسين :

_ سهله يا هنخرج نتفسح في اي مكان يا هنفضل في البيت نشبع من بعض ( وغمزلها ) وانا بصراحة نفسي نفضل في البيت اوي اوي

ياسمينا وهي بتحاول تطلع من حضنة :

_ بطل قله ادب بقا انا عايزة اتفسح واتغدي برة و مممم واعمل شوبينج و اكل ايس كريم واروح الملاهي كمان

ياسين برفعه حاجب :

_ م ايه يا حبيبتي سمعيني تاني كدة

ياسمينا بدلع :

_ م لا هي نفسي اروح الملاهي يا ياسو عشان خاطري

ياسين بحب :

_ مبقدرش ازعلك ولا اشوف التكشيرة دي حتي لو بدلع علي وشك أوامر برنسيسه ياسمينا لازم تتنفذ نعمل شوبينج ونتغدي برة وناكل ايس كريم ونروح الملاهي المهم اشوفك مبسوطة وتكوني جمبي

ياسمينا حضنته بقوة ووجع في قلبها ذاد ومش عارفه ازاي توقفه وليه دلوقتي مش عارفه تسكت صوت ضميرها ما كان ديما في كل السنين اللي فاتت ساكت ليه دلوقتي معذبها اوي كدة

❈-❈-❈

جلال صحي بص جمبه لاقي جودي مش معاه قام يدور عليها لاقها نايمة علي كرسي الانتريه في الصاله قرب منها بلهفه

جلال :

_ جودي حبيبتي اصحي حبيبتي ايه منيمك كدة رقبتك توجعك... جوجو

جودي بنوم :

_ عشان خاطري سيبني شويه صغننين مش قادرة اقوم

جلال بحنيه :

_طيب قومي نامي في سريرك يا حبيبتي عشان خاطري انتي كدة مش مرتاحة وهتتعبي

جودي فتحت عينيها وابتسمت :

_ صباح الخير .. كل سنة وانت طيب يا حبيبي

جلال بحب :

_ وانتي طيبه يا قلبي يلا نامي شويه جوة علي ما افوق واخد شاور واحضرلك احلي رقاق باللبن زي ما بتحبيه وهاجي اصحيكي

جودي هزت دماغها بموافقة ودخلت تنام شويه كمان وجلال دخل الحمام وهو مقالم نفسه أن اي كلام بينهم هيتاجل ل بعد العيد عشان مينكدوش علي بعض

❈-❈-❈

أما عند محمود صحي من النوم لاقي هناء نايمة جمبه وحضناه جامد ابتسم بحزن وشال ايديها من حواليه وقام بهدوء ودخل الحمام وبمجرد ما قفل الباب عليه هي فتحت عينيها واتنهدت بحزن علي حالهم وقررت أنه أول ما يخرج لازم تتكلم معاه لازم تفهمة قصدها عشان ميحصلش شرخ في علاقتهم

عدي وقت بسيط وخرج محمود من الحمام وقفت هناء قصادة واتكلمت بهدوء

هناء :

_ صباح الخير

محمود من غير ما يبصلها :

_ صباح النور

هناء ابتسمت :

_ رغم انك شكلك حلو اوي وانت مقموص بس انا عايزة اشوف ابتسامتك ... كل سنة وانت طيب يا حبيبى وحقك عليا عشان زعلتك امبارح انا والله اتفاجاءت ورد فعلي دا بسبب المفاجأة معلش انت عارف اني طول عمري دبش ومش بفكر ف الكلام قبل ما بقولو سامحني بقا

محمود بصلها واتكلم بنبرة كلها حزن وعتاب :

_ اسامحك علي ايه يا هناء علي كسرك ل فرحتي اني هبقي وسطكم ولا تريقتك علي احساسي وكلامك بسخريه ولا حساباتك والالتزامات اللي اهم مني ؟

هناء كشرت :

_ ميبقاش قلبك اسود بقا يا محمود والله انا ما قصدت اكسر فرحتك يا حبيبي كل الموضوع اني اتفاجات بس .. حقك عليا بقا انا اسفة يا حبيبي ( حضنته) نورت بيتك يا قلب هناء

محمود فضل متردد شويه يبادلها الحضن ولا يفضل زعلان هي دقيقه اللي أتردد فيها وبعدها رفع ايديه وحضنها بشوق وحب وقرر أنه يحاول ينسي اللي حصل امبارح ويكمل وميكسرش فرحة بناته بالعيد وبوجودة وسطهم

❈-❈-❈

احلام كانت قدام الشاليه بتكلم اسماء اختها وشريف كان نايم من التعب والسواقه طول الليل

احلام :

_ بقولك ايه شوفيلي حل شريف بدء يرد ويحن لأهله وأنا مش هسمح بدة يحصل ابدا

اسماء :

_ وانا اعملك ايه يا بنتي كل اللي اعرفه قلتهولك

احلام كشرت :

_ لا اكيد في حاجة شيلاها ل نفسك يا سوسه انتي اشمعني جوزك زي الخاتم في صباعك لحد دلوقتي وانتي متجوزة قبلي ب تلت سنين كمان

اسماء :

_ والله العظيم ما خبيت عليكي حاجة والشيخ مندوه قالك أن العمل ال معاكي هو نفسه اللي معايا عموما لما ترجعي من السفريه دي خلينا نروحله ونقوله ونشوف هيقول ايه

احلام بغل :

_ ايوة لازم اروحله لو مكنش عشان شريف و ردوده اللي بقت تقلقني يبقي عشان أمه العقربه اللي لسه زي ماهي محصلهاش اي حاجة لا تعبت ولا ماتت ...

🌺🌹🌺🌹🌺🌹🌺🌹🌺🌹🌺🌹🌺

رواية كيد النسا قهر الرجال

رواية جديدة قيد النشر

من قصص و روايات

الكاتبة منى محمود

الفصل الخامس

احلام كانت قدام الشاليه بتكلم اسماء اختها وشريف كان نايم من التعب والسواقه طول الليل

احلام :

_ بقولك ايه شوفيلي حل شريف بدء يرد ويحن لأهله وأنا مش هسمح بدة يحصل ابدا

اسماء :

_ وانا اعملك ايه يا بنتي كل اللي اعرفه قلتهولك

احلام كشرت :

_ لا اكيد في حاجة شيلاها ل نفسك يا سوسه انتي اشمعني جوزك زي الخاتم في صباعك لحد دلوقتي وانتي متجوزة قبلي ب تلت سنين كمان

اسماء :

_ والله العظيم ما خبيت عليكي حاجة والشيخ مندوه قالك أن العمل ال معاكي هو نفسه اللي معايا عموما لما ترجعي من السفريه دي خلينا نروحله ونقوله ونشوف هيقول ايه

احلام بغل :

_ ايوة لازم اروحله لو مكنش عشان شريف و ردوده اللي بقت تقلقني يبقي عشان أمه العقربه اللي لسه زي ماهي محصلهاش اي حاجة لا تعبت ولا ماتت

اسماء :

_ انا مش فاهمه الست عملالك ايه عشان تعمليلها عمل زي دا لا ومعرفتنيش الا بعد ما عملتيه ورشتيه في شقتها كمان لية كدة يا احلام طنط نوال بجد مش زي الحموات اللي بنسمع عنهم وفي حالها وعمرها ما عملت مع حد فيكم مشكلة سواء انتي أو منار

احلام كشرت :

_ جرا ايه يا اسماء ايشحال اما كنا دافنينه سوا ما انتي كمان يا حبيبتي عامله لجوزك ولحماتك ولا هي جت لغايه عندي انا وبقيت عيب وحرام

اسماء بضيق :

_ انتي عارفه كويس اوي انا عامله ليه لجوزي ولحماتي انا وضعي غيرك يا احلام انا كنت خايفه اي وقت حسن امه تقدر تخليه يتجوز عليا بعد ما جبنا سليم وسلمى وعرف ان عندهم مشاكل ومحتاجين جلسات وعلاج واحتمال كبير ما يخفوش ويفضلو عمرهم كله كده خفت لانهم صعايده واكيد امه هتزن عليه ان يحاول يتجوز تاني ويجيب عيال سليمه تاني خصوصا ان انا حاولت اخلف تاني وربنا ما اردش كنت خايفه ابص الاقي جوزي سابني بعيلين محتاجين رعايه لوحدي اروح بيهم فين واجي منين خصوصا لما بدات اروح جلسات علاج طبيعي ورياضه شفت ستات هناك كتير اوي اجوازهم سابوهم مجرد ما خلفوا عيال عندهم مشاكل خوفي هو اللي خلاني اروح اعمل له هو وامه انهم يفضلوا تحت طوعي وينفذوا اوامري انا ما كنتش عايزه اي حاجه غير ان هو يفضلوا معايا ومع عياله انما انتي بقى عملتي ليه ده اللي انا مش قادره افهمه وليه لغايه دلوقتي ما حاولتيش تشوفي تاخير الخلفه منين وليه ؟

احلام :

_ وانا بقى كنت هستنى لما امه تاخده مني وافضل كل شويه يقول لي اصل امي اصل اختي زي ما بسمع من صحابي و من كل الناس اللي حوالينا انا كمان سبقت كل اللي عايزاه ان هو يبقى معايا وحواليا انتي عارفه ان احنا ما بقاش لنا حد من بعد ما ابونا وامنا ماتوا وما لناش اي حد بيسال فينا من بعدهم خفت وانا كمان خوفي على فكره هو اللي حركني وهو اللي خلاني اعمل كدة

اسماء :

_ يخرب بيت الخوف اللي مدمرنا احنا الاتنين ده عموما انا هقول لك نصيحه لوجه الله انا عارفه ان انا مش ملاك وعارفه ان انا عملت حاجه كبيره اوي بس والله العظيم كان غصب عني بس انتي لسه في ايدك على الاقل ما تكرريش العمل بتاع حماتك الست بجد في حالها وما جتش جنبك سيبيها في حالها انت كمان وما تاذيهاش

احلام بتفكير :

_ ماشي من هنا لغايه لما ارجع لو فضلت الدنيا مستقره هروح للشيخ واخليه يشوف بس العمل بتاع شريف ومش هعمل حاجه تاني لحماتي

اسماء :

_ ماشي يا حبيبتي ربنا يهدينا يا رب انا هقفل دلوقتي بقى عشان ميعاد الجلسه بتاعت سليم وسلمى قرب يلا خلي بالك من نفسك سلام

احلام :

_ سلام

قفلت احلام مع اختها وفضلت واقفه برة تفكر في كلام اسماء لحد ما سمعت شريف بينده عليها رسمت ابتسامة علي وشها ودخلت وهي مقررة مش هتعيد العمل ل نوال بس الاكيد انها هتجدد عمل شريف

❈-❈-❈

الاء كانت في اوضتها قاعده زهقانه مستنيه ابوها وامها يصحوا تليفونها رن برقم اميره صاحبتها ردت عليها بلهفه

الاء :

_ ميرو يا ميرو وحشيتني

اميرة :

_ وانتي كمان يا لولو كل سنة وانتي طيبه يا قلبي

الاء :

_ وانتي طيبه يا روحي ... شفت اللي حصل امبارح انا نسيت احكي لك انشغلت شويه بمجيت بابا والهدايا اللي جابها لي وكده وما عرفتش اقول لك

اميرة بفضول :

_ ايه اللي حصل خير وخلي بالك بعد ما تقولي لي اللي حصل هتحكي لي باباك جاب لك ايه بالتفصيل اه وتصوريهم لي كمان

الاء :

_ ده اكيد طبعا من غير ما تقولي المهم يا ستي امبارح وانا بحضر السفره على ما بابا يجي وكده لقيت مين باعت لي فويس

اميرة :

_ مين !!

الاء :

_ وليد بتاع هندسه لقيته باعت لي فويس ان النهارده عيد ميلاده وعامله في كافي ستارز وعايزني اكون موجوده

اميرة :

_ وقوليتله ايه بقا ؟

الاء :

_ طبعا رديت عليه بغرور وقلتله هشوف واقولك

اميرة :

_ جدعه يا لولو تربيتي ... هتروحي طبعا

الاء :

_ مش عارفه يا ميرو هو معزمكيش ؟

اميرة بحرج :

_ ا لا بس بس اكيد عزمك انتي عشان يتعرف عليكي اكتر هو معجب بيكي من بدري وكلنا لاحظنا

الاء كشرت :

_ لا انا مش هروح من غيرك دا اولا ثانيا بقا بابا لسه راجع من السفر امبارح مش لطيفه خالص لو قلتله اني رايحة عيد ميلاد انهاردة

اميرة بتفكير :

_ ممممم بس هي فرصه بردو وليد جان واي بنت بتتمني نظرة منه ... بصي انتي هتقولي أنه عيد ميلاد واحدة صحبتك وهتزعل اوي لو محضرتيش ولو علي لوحدك دي انا هوصلك واستناكي برة ادخلي سلمي عليه واقعدي ربع ساعه بالظبط واخرجي نمشي

الاء :

_ يعني هعمل كل دا عشان اروح اقعد ربع ساعه بس ؟

اميرة :

_ لا بقولك ايه صحصحي معايا كدة اللي وقع وليد فيكي هو تقلك وأنك لا اهتميتي لما كلمك ولا بينتي اي اعجاب بيه ف اثبتي بقا علي الأسلوب دا عشان هو ال هيجيب معاه شوق ولا تدوق يا لولو هفضل أعلمك لحد امتي مش عارفه

الاء ضحكت :

_ تعيشي وتعلميني يا ميرو انتي البيست بتاعتي يعني تعلميني طول الوقت براحتي

أميرة :

_ ماشي يا ستي يلا بقا كلميني فيديو كول وفرجيني عمو جبلك ايه معاه

الاء بحماس :

_ اوك يلا بينا

❈-❈-❈

جودي صحيت بكسل بصت حواليها لاقت نفسها في اوضتها قفلت عينيها وفتحتها تاني وهي بتفتكر جت هنا امتي وهي كانت نايمة ف الصاله ابتسمت لما افتكرت لهفه جلال وقلقه عليها وإصراره أنها تدخل تكمل نوم في اوضتها قامت وخرجت تدور عليه كان في البلكونة واقف سرحان وفي ايديه مج نسكافيه بتاعه شدته من أيديه جامد لدرجة أنه اتخض

جلال :

_ بسم الله ... ايه يا بنتي حرام عليكي خضتيني

جودي كشرت :

_ فطرت انت علي النسكافيه البلاك دا يا استاذ ؟

جلال ابتسم :

_ لا طبعا مستنيكي نفطر سوا بس كنت مصدع جدا قلت اشربه ع ما تكوني نمتي شويه كمان شكلك كان مجهد جدا

جودي :

_ ينفع كدة ؟ احنا مش اتفقنا أن محدش فينا هيشرب كافيين من غير فطار تاني ؟ بتخلف وعدك معايا ليه دلوقتي ؟

جلال :

_ مخلفتش والله يا حبيبي بس بجد كنت مصدع ومبعرفش اكل من غيرك

جودي :

_ يبقي تصحيني نفطر وانا بعدها لو عايزة اكمل نوم هكمل إنما تشرب كافيين من غير اكل لاء يا جلال

جلال ابتسم :

_ خلاص يا ستي اخر مرة نهارك ابيض بقا انهاردة عيد خليكي ست مسامحة

جودي :

_ ماشي خلاص سماح المرة دي بس عشان العيد

جلال :

_ شاكرين افضالك والله

جودي :

_ يلا بقا عشان تعملي الرقاق بلبن دي عادة يا استاذ ولا ناوي ترجع فيها ؟

جلال بحب :

_ ابدا يا روحي يلا بينا

جلال دخل المطبخ وجودي وراه بدء يحضرلها الرقاق وهي بصاله ومبتسمة اوي

جلال :

_ هتفضلي تبصيلي كدة كتير ولا ايه لا خلي بالك انا بتكسف وهقول لامك علي فكرة

جودي ضحكت :

_ هتقولها ايه بقا احب اعرف

جلال :

_ هقولها اني كل ما اقف اعمل حاجة في المطبخ تقعدي تسبليلي بعينيكي وانا اتلخبط والأكل يبوظ مني واشوف يرضيها كدة ولا ميرضهاش

جودي :

_ مممممم بس يا جلجل انا لازم ابصلك ف إجازة العيد كتير كتير كتير واشبع منك كتير كتير كتير عشان لما ابدء الحقن هنبقي بعاد عن بعض فترة كبيرة وانت بتوحشني اوي بصراحة

جلال ساب اللي بيعمله وبصلها بستفهام

جلال :

_ مش فاهم ؟

جودي :

_ مش فاهم ايه بالظبط هو مش انت امبارح قلتلي حددي أولوياتك ؟

جلال :

،_ اه قلت

جودي :

_ وانا مش قلت دلوقتي اني بعد إجازة العيد هعمل الحقن

جلال :

_ اه قلتي

جودي ضحكت :

_ مالك يا حبيبي استيعابك راح فين ؟ ولا عشان خدت منك النسكافيه ومكملتوش لسه مش مفوق

جلال قرب عليها ومسك أيدها :

_ جودي مش عايزاك تتسرعي في قرارك انا معاكي في اي حاجة المهم تكوني مرتاحة

جودي بحب :

_ انا كل راحتي تتلخص في وجودك جمبي يا جلال سعادتي وأماني معاك واكيد الأهم من مشروعي أن ربنا يكرمني ويرزقني طفل منك يكمل قصه حبنا العمر كله انا بحبك يا جلال والبيبي اكيد بالنسبالي اهم من المشروع انا بس كنت هستني عشان يعني

جلال :

_ عشان ايه كملي ؟

جودي ببراءه:

_ بصراحة بصراحة يعني كان نفسي بدل ما نعمل الحقن دلوقتي تكبر الاستديو بتاعك زي ما بتحلم ف قلت لو قلتلك اني هبدء في مشروعي دلوقتي هتلاقيها انت فرصه مناسبه عشان تبدء في مشروعك محبتش اكون انانيه

جلال بحب :

_ انتي ابعد ما يكون عن الانانيه يا حبيبتي يا روحي مش اتفقنا اني مش بفهم التلميحات وان لما يكون جواكي حاجة تقوليها علي طول بلاش تلميحات وتخمينات ابوس ايديك يا قلبي انا استويت ممكن

جودي كشرت :

_ علي فكرة انت اوفر اوي انا عادي يعني كل الناس كدة

جلال :

_ يا شيخة انتي عادي وانا اوفر ؟ طب اديني فهمت حاجة تانيه غير اللي في بالك نهائي تقدري تقوليلي لو مكنتش اتعاملت مع الموقف بهدوء وسبتلك حريه الاختيار وشوفت انك انانيه كان هيكون الوضع ايه ؟

جودي ابتسمت:

_ لا ما انا واثقه فيك عارفه اني مندفعه وانك الفرامل بتاعتي انا اخمن غلط وانت تصلحلي انا اعك الدنيا وانت تفهمني براحة غلطي

جلال ضحك :

_ حلوة الفرامل بتاعتك دي مصطلح في الحب اول مرة اسمعه بصراحة

جودي :

_ نحن نختلف عن الاخرون

جلال قرب منها وباسها برقه وبعد مدة واتكلم وهو لسه شفايفه لامسه شفايفها :

_ انتي احلي حاجة في حياتي يا جودي بموت فيكي يا روحي

❈-❈-❈

علي السفرة كان محمود وهناء وبناتهم متجمعين وبيفطرو سوا

هند :

_ ماما احنا هنعزم جلال وجودي امتي ؟

هناء :

_ بعد بكرة عشان بكرة جودي بتكون عند ماماتها

محمود :

_ وقولي ل ياسين وياسمينا كمان

هناء :

_ اكيد طبعا أن شاء الله نتجمع كلنا علي خير

الاء :

_ ماما انا هنزل شويه بالليل ومش هتاخر

محمود باستغراب :

_ هتنزلي فين ؟ !

الاء بهدوء :

_ عيد ميلاد زميلتي في الكليه يا بابا وماكدة عليا احضر خصوصا انها جت عيد ميلادي وجبتلي هديه كمان مينفعش محضرش

محمود كشر :

_ بس انا لسه جاي امبارح يا الاء ملحقتش اشبع منكم

الاء بدلع :

_ يا حبيبي والله مش هتاخر هي ساعه واحدة بس هروح اقولها كل سنة وانتي طيبة واديها هديتها وامشي علي طول

هناء بعفويه :

_ تمام يا لولو بس ساعه واحدة بس ساعه ودقيقه هيكون في عقاب وتبعتيلي لوكيشن للمكان اوك

الاء ابتسمت :

_ اوك حاضر

محمود بهدوء :

_ الحمد لله عن ازنكم هطلع ارتاح شويه

هند بعد ما محمود طلع :

_ ماما بابا شكله زعل

هناء بعدم فهم :

_ من ايه ؟

هند :

_ حضرتك اديتي الاء موافقتك وهو قاعد من غير ما تستني لما يقول رايه حسيته اتحرج وعشان كدة قام

الاء بلا مبالاة:

_ لا طبعا هو قام عادي انتي اللي اوفر في كل حاجة

هناء بتفكير :

_ لا يا لولو شكلها معاها حق بس انا والله مقصدش دا بحكم التعود والله اتكلمت بعفوية مش اكتر

هند ابتسمت :

_ خلاص اطلعي وراه وفهميه كدة واشرحيلو أن الموضوع هياخد وقت عشان احنا بقالنا مدة كبيرة بنتعامل بطريقه معينه اكيد كلنا مش هناخد بالنا من كل تصرفاتنا ف بلاش كل حاجة ياخدها بحساسيه كدة فكيه شويه يا نونا انا اللي هقولك يعني ولا ايه

هناء ضحكت :

_ ماشي يا ست هند منك نستفيد هطلعلو

الاء :

_ اوفر وربنا انا هقوم اكلم اميرة اشوف هلبس ايه بالليل بدل الحوارات دي

هند كشرت :

_ قومي يا بتاعت اميرة قومي دا اللي فالحة فيه

الاء ابتسمتلها باستفزاز وطلعت علي اوضتها

وفي اوضه هناء و محمود هناء دخلت كان محمود قاعد في البلكونة مكشر وسرحان قربت هناء منه وخبطت علي كتفه

هناء :

_ سرحان ف ايه يا حبيبي

محمود انتبه ليها :

_ لا عادي ولا حاجة

هناء :

_ محمود اللي حصل دا مش مقصود ومقدرش اوعدك أنه مش هيتكرر بس لازم تعرف أنه عفوي بحكم التعود والله واكيد فترة وكل حاجة هتتظبط والكل هنا هيمشي بازنك وبعلمك بس بلاش تزعل مني أو من البنات والله ما نقصد يا حبيبي ادينا بس شويه وقت ممكن ؟

محمود فضل باصصلها شويه من غير كلام كان جواة صراع كبير بين أنه من اول يوم له معاهم وهو حاسس أنه غريب عنهم مجرد ضيف وبين أن هناء معاها حق هو بقاله سنين غايب وهي كانت الراجل والست ولازم وقت عشان الوضع يتغير

بعد صمت حوالي دقيقتين محمود ابتسم

محمود :

_ حاضر يا نونا معاكي كل الوقت اللي عايزاه هكون متفهم وهقدر أن الكلام بيتقال بعفويه بس حاولو انتم كمان تراعو وجودي ممكن

هناء وهي بتدخل في حضنه :

_ حاضر يا حبيبي اوعدك المهم متكشرش ابدا ضحكتك وحشتني يا حوده

محمود وهو بيشدد من حضنها :

_ قلب حوده انتي والله

❈-❈-❈

مر النهار والليل جه بسرعه الاء كانت جهزت لبست بنطلون جينز فاتح وضيق جدا وعليه بدي اسود بنص كوم وضيق بردو وفيه لمعه بسيطة .. وجابت شعرها كله علي جمب واحد وحطت ميكب بسيط ونزلت

عدت علي اميرة وخدتها وأميرة أصرت أن الاء تفضل في العربيه شويه ومتدخلش من اول عيد الميلاد وبعد تلت ساعه انتظار في العربيه سمحتلها اميرة انها تنزل من العربيه

نزلت الاء ودخلت بكل غرور وفضلت واقفه قدام الباب كانت واثقه أن وليد عينه علي الباب ومستني دخولها وفعلا يادوب دخلت لاقت وليد جري عليها

وليد بلهفه :

_ لولو اخيرا جيتي كل دا تأخير انا مستنيكي من بدري

الاء بهدوء وابتسامة خفيفه :

_ سوري يا وليد ( مدت ايديها بالهديه ) كل سنة وانت طيب عقبال مليون سنة

وليد ببتسامة اعجاب :

_ وانتي طيبه يا لولو تعالي يلا انا كنت مستنيكي عشان نطفي الشمع

الاء :

_ اوك يلا

اتحركت الاء معاه و أصر وليد أنها تقف جمبه بعد لحظات كانت إضاءة المكان اطفت و الكل بيردد ل وليد اغنيه عيد الميلاد واول ما النور نور الاء اتفاجاءت بلي واقف قدامها والغضب باين علي وشه وقبل ما تلحق تتصرف وليد كان ماسك ايديها واتكلم

وليد :

_ احلي عيد ميلاد عشان انتي معايا يا لولي

الاء تنحت و

❈-❈-❈

هند كانت قاعدة في اوضتها زهقانة ومن غير تفكير كتير فتحت تلفونها علي اكتر حاجة بتحبها وبتاخد كل وقتها صفحة الفيس بوك بتاعت المعيد بتاعها استاذ فارس فضلت تقلب في الصور والبوستات للمرة اللي نسيت عددها تتأمل في ملامحه اللي حفظاها كويس اوي وتتنهد علي حالها بقالها سنة ومن وقت ما شافته وهي بتحبه بتحبه بصمت وهدوء ومفيش مخلوق يعرف مشاعرها دي غصب عنها عينيها دمعت ورفعت وشها ودعت ربنا من قلبها أنه يحس بيها ومن غير ما تحس بعتت طلب صداقه جت تلغيه بسرعه الفون فصل شحن

هند بصدمة :

_ نعم ! ايه اللي حصل دا ؟ يالهوي عليكي يا هند هيقول عليا ايه دلوقتي وانت دا وقت تفصل فيه اعمل ايه اعمل ايه ... اه اه انا انا اشحنه وافتحة والغيه وابعتله مسج أن الادد جتله بالغلط اه صح كدة خربيت غباءك وتسرعك يا شيخه

حطت الفون علي الشاحن واستنت خمس دقائق علي أعصابها وبعدين فتحته ودخلت علي صفحة فارس وقبل ما تعمل اي حاجة اتفاجاءت ب مسج منه

هند :

_ احلوت اوي يا زفتة اتصرف ازاي دلوقتي

❈-❈-❈

امير كان في بيت حماه معزوم عندهم زي كل سنة قاعد مع اخواتها وهي جوة مع امها في المطبخ

محسن اخوها الكبير :

_ منور يا ميرو ليك وحشه والله

امير بود :

_ دا نورك يا محسن تسلم

مصطفي اخوها الصغير :

_ يعني لازم يكون عيد أو مناسبه عشان نشوفك يا عم انت

امير :

_ والله غصب عني يا مصطفي الشغل بياخد اليوم كله بروح مهدود يا دوب اتغدي واقعد معاهم شويه وانام

صلاح ابوها :

_ ربنا يقويك يا حبيبي انت بس بتوحشنا

امير بحب :

_ وانتم والله يا حج صلاح ربنا يعلم معزتكم في قلبي

دخلت حماتة ومنار وهما شايلين اطباق حلويات كتير

زينب حماتة:

_ مكنش له لزوم تكلف نفسك كدة يا أمير ايه اللي جايبه دا كله بس

امير :

_ متقوليش كدة يا حبيبتي دا من بعد خيركم والله

منار :

_ اومال فين نسمة ومروة ؟

محسن :

_ دخلو ينيمو العيال في الاوضه وجايين

منار :

_ هينامو من بدري كدة ؟ هيتعبكو بالليل كدة علي فكرة

نسمة من وراها :

_ لا متقلقيش مش هيتعبونا ولا حاجة هما متعودين علي نظام نوم معين بينامو بدري وبيصحو بدري

مروة :

_ والله يا نسمة بدعيلك علي طول من وقت ما عودت مالك علي العادة دي ريحيني كتير اوي

منار كشرت :

_ ادعيلها يختي ادعي

امير بحرج :

_ احم اومال تيا فين يا منار ؟

منار :

_ بتتفرج علي التلفزيون في الصاله اهي

مصطفي :

_ ما تباتو معانا يا أمير انهاردة وانا اغلبك بولتين استيشن انما ايه هتحلف بيهم

امير :

_ مش هينفع والله يا درش بكرة هروح ل ماما وماكدة عليا اكون عندها من بدري عشان اقضي اليوم معاها

زينب بحب :

_ وماله يا حبيبي ربنا يجعلك ديما بار بيها ويتردلك في تيا يارب

امير :

_ اللهم امين يا حبيبتي تسلميلي

منار بصوت واطي ل امير :

_ ما كنا نبات معاهم يا أمير يعني يبقي كلهم متجمعين كدة وانا اللي دا بيت ابويا انزل وامشي

امير بصوت واطي :

_ منار انتي عارفه اني لو سهرت مش هعرف اقوم الا العصر وماما كدة هتزعل وبعدين هو انا مبحشكيش ولا ايه ؟ للدرجة دي مش فارق معاكي نقعد سوا يوم واحد حتي

منار بدلع :

_ من دا اللي محشنيش طب دا انت وحشتني اوي يا ميرو

امير :

_ ماهو باين بإمارة انك عايزانا نبات هنا اهو

منار :

خلاص يا حبيبي متزعلش انا ربع ساعه كدة وهقوم اجهز انا وتيا ونروح بدري نكمل سهرتنا في البيت انا عندي كام ميرو يعني

امير ابتسم لها بحب ورجع كمل كلام مع اهلها

ومنار بعد ربع ساعه قامت عشان تجهز وتكلم حازم تعرفه أنها مروحه عشان ميتصلش ولا يبعت حاجة

منار :

_ حبيبي أنا اعرفك اني خلاص مروحة

منار لسه هتكمل كلام اتفاجات بلي دخل عليها الاوضه فجأة ...

يتبع

ادسنس وسط المقال