رواية روح ملاكي عصابة الحي الفصل الثاني بقلم رحمه نبيل حصريه وجديده علي مدونة النجم المتوهج للروايات والمعلومات

"ونحن نعرفُ يا الله بأننا لم نكن عبادًا صالحين، نعرفُ أن هناك صلوات كثيرة فاتتنا في وقتها، نمنا في كثيرٍ من الأيام دون أن نقرأ وِردنا، عاهدنا أنفسنا وعاهدناك ألا نعود وعُدنا، قررنا مئات المرات ألا نضعف وضعفنا حاولنا ألا تغيرنا هذه الحياة يا الله لكنها غيرتنا، لم يكن بمقدورنا أن نقاوم هذا كله بروحٍ واحدة لكننا يا الله لا زلنا نبكي حين نسمعُ آية ونشعر بأنها تخاطبنا نحاسب أنفسنا ونجلدها وتشهدُ قلوبنا علينا أننا نحبك كثيرًا ونحاول أن نكون عبادًا صالحين يستحقون جنتك ونعترف بأننا نبكي في بدايات النهايات كثيرًا لأننا نجهل حكمتك ونعرف أخيرًا أنك ما آلمتنا إلا كي نُدرك، لا نحفظ الأدعية المأثورة كٌلها ؛ لكننا نبكي حين نسجد."

صلوا علي رسول الرحمة

نظر الجميع بصدمه أمامهم بينما سقط شادي ضاحكا وهو يقول / معلش يا شاديه معلش يا حبيبتي

بينما كانت مريم تنظر بجهل حولها وهي تقول / هو فيه ايه

نظر الجميع لشاديه التي أصبح وجهها اسود بشده بسبب الدخان الأسود

كريم بخوف / هو انتم اتحرقتوا ولا إيه مالها شاديه مش بتنطق

تحدثت شاديه بغيظ / بقولها تيجي تغرف شوربه علي الملوخيه قامت طشتها في طاسه الزيت المولعه فالنار طلعت علي المطبخ الخشب وولع وهبب الدنيا

نظرت مريم أرضا بحزن / مكنش قصدي يا شادية والله

اقترب سليم من اخته وضمها بحنان شديد وهو يقبل رأسها ثم نظر لشاديه / حقك عليا يا شاديه انتي عارفة مريم مش قصدها

زفرت شادية لتهدأ ثم اقتربت منها وجذبتها من حضن سليم وهي تهمس بحنان / فداكي يا قلب شاديه فداكي ميت مطبخ هخلي عوض يجيب غيره

ضحك شادي بشده / والله أنا خايف ابويا يقعد بعد كده قدام الجامع يشحت بسببنا

ضحك كريم ثم نظر لشاديه وقال بحنان / تعالي يا شوشو هحطلك مرهم

ابتسمت شاديه وهي تبعد مريم / لا لا مفيش حرق خالص هو مجرد هباب اسود وخلاص هغسل وشي وانتم جهزوا السفره اتصل يا شادي بابوك وانتم محدش يمشي هنتغدي سوا

ثم خرجت بينما نظر ادهم لمريم وتحدث / ريمو حبيبتي انتي كويسه

نظرت له مريم ببسمه خجوله من تلقيبه بحبيبتي رغم أنها ليست اول مره / آيوه يا ابيه بخير

ادهم بضحك / شايفين يا شويه عرر الاحترام والحنية شايفين ابيه العسل اللي من بقها

سليم وهو يدفعه / جرا ايه يا ابيه خف شويه يا خويا

ضحك ادهم وهو يخرج / طب يلا يا زفت منك ليه جهزوا الاكل لحد ما اغسل ايدي

نظر الثلاثه لبعضهم فتحدص شادي بحنق / هو ماله ده عشان الكبير دايما يتأمر

ادهم من الخارج / آه يا كلب عشان كبير بتأمر ومتزودش عشان مدخلش اعملك كزرونة اخلص هموت من الجوع

زفر شادي بملل بينما ضحك كريم بشده وهو يحمل الأطباق ليخرجها بينما سليم كان مايزال يضم مريم بحنان وحب وخرج بها لينضم لهم

خرجت شاديه وهي تنشف وجهها وجلست علي الطاوله بجانب ادهم وهي تهمس له / بسسس بسس

رفع ادهم نظره من الهاتف وهو يقترب منها ويقول / ايه

شاديه وهي تنظر حولها وتهمس بصوت منخفض / أنا عملت فيس

فتح ادهم عينه بصدمه فاشارت له / اششش اوعي حد يعرف

ادهم بصدمه / انتي يا شادية وياتري سمتيه ايه... شادية شخلعه ولا إيه

شادية ببسمه وهي تخرج هاتفها وتتحدث ببسمه / لا سميته (الحبّ إخلاص مش تعب وخلاص)

مصمص ادهم شفتيه بتأثر / يااااه علي العمق وانتي بقي يا حبيبتي تعبتي من الحب فين ياختي

ضربته شاديه علي كتفه / وانا لو كنت حبيت كنت عملت الفيس أساسا، انا عملته عشان احب من عليه واشقط ناس حلوة

لم يكد يجيب ادهم وهو يري الجميع ينضم ويجلس لتناول الغداء فكتم ضحكته بصعوبه ثم نظر للطعام وبدأ يأكل ولكن فجأه لم يتحمل اكثر من ذلك وهو يري نظرات شاديه له المحذره فبصق الطعام واخذ يضحك بشده / مش قادر والله اسف مش قادر هموووت الحب إخلاص مش تعب وخلاص

كريم بتعجب / حب ايه انت بتحب

ادهم بضحك / لا بس عندي فيس

كتمت شاديه ضحكتها ثم وضعت امامه بعض اللحم وهي تقول / كل يا أدهم كل شكلك هفتان

سليم بتعجب وهو يصب الطعام لمريم ويضعها في فمها مثل الطفله / وايه علاقه الفيس بالحب

ضحك ادهم بشده وقال من بين أنفاسه / بنحب من عليه

ضحكت شاديه بشده معه وهي تضرب علي الطاوله بينما الاربعه ينظرون لهم بغباء

ولكن تحدث شادي / بمناسبه الحب بقولك يا كريم يا حبيبي عايزك في خدمه

كريم وهو يأكل بكل هدوء ثم نظر له / انسي مش ههكر اكونت بنت ليك

شادي / لا يا ذكي انا عمري ما اعمل كده انا بس عايز اكونت مش بيتبلك يعني اي حد يعملي بلوك يلاقيني لسه في خلقته تآني

ضحك كريم ثم ترك معلقته وقال بتعجب / وده ليه

سليم بسخريه / وده سؤال ياراجل تلاقيه بيتبلك لما يقل أدبه ده بيستخدم الفيس عشان الحب والكلام ده وتعب القلب

ضحك ادهم بشده وهو يقول / لا يا سليم متقولش كده ده الحب إخلاص مش تعب وخلاص ههههههههههههههههه

ثم نظر لشاديه وهو يقول / دي طلعت جينات يا تري بقي عمي عوض عامل فيس برضو

شاديه بضحك صاخب / آه عامل

ضحك ادهم بشده هو وشاديه بينما الجميع لا يفهم مابهم

تحدثت مريم وهي تنظر لشادي / مش ناوي تتوب بقي

شادي وهو يحرك حاجبه لها بمشاغبه / لما ترضي عني وتتجوز هتوب لأجلك يا ريمو

ضحك سليم بشده ثك توقف وتحدث له / ومين قال اني هوافق

شادي بتذمر / شوفتي يا ريمو اخوكي القاسي عايز يحرم قلبين من بعض

دخل في نفس الوقت المعلم عوض وهو يتنحنح ويقول / السلام عليكم ورحمة الله وبركاته

رد الجميع السلام فنظر لهم ببسمة وجلس بجانبهم وهو يقول / صبيلي يا ام عوض شويه ملوخية عشان سايب القهوه لوحدها

سليم بتذكر / آه صحيح نسيت ده انا كنت بنقل معاك حجات وانشغلت في خناقه كريم

عوض ببسمة / مفيش مشكله هجيب اي حد ينقلهم متتعبش نفسك المهم كريم بخير

ابتسم كريم له/ وليه تكلف نفسك يا عمي احنا هنخلص اكل وننزل معاك احنا الاربعه وهننجز

ضربه شادي من أسفل الطاوله / متجمعش ياض

ادهم بتحدي / احنا الاربعه يا حاج عوض

نظر عوض لشادي وهو يضحك / تعيش يا ابني ربنا يديكم الصحه يارب

اكمل الجميع الغداء في جو اسري هادئ ومبهج

في منزل ام اشرقت كانت تجلس وهي تنظر بخجل للارض بينما تلك التي تدعي حماة ابنتها تتأمر عليهم وتتشرط وتُغالي في طلب الجهاز الخاص باشرقت بحجه ان زوجة ابنها الاكبر قد احضرت واحضرت وأخذت تعدد لهم بينما ام أشرقت نظرت لها بكسرة وحزن / بس مش كتير يا ام رأفت

ام رأفت وهي تلوي شفتيها / كتير مين يا حبيبتي بس ده يا دوبك انتي مبتشوفيش البنات بتجيب ايه ولا ايه دول بيجيبوا شئ وشويات

ام اشرقت / آيوه دول ناس مقتدره وكل واحد وعلي قد جيبه وانتم يا ختي عارفين البير وغطاه ابو أشرقت مات من زمان وسابني من غير حاجه حتي انه كان شغال باليومية يعني مفيش اي حاجه من بعده وانا ربنا يعلم انا بجهزها إزاي

ام رأفت بحده / جرا ايه يا ام أشرقت دي العادات يا ختي اللي كلنا اتجوزنا بيها

ام أشرقت / بس مكنش بالشكل ده

ام رأفت وهي تشيح بيدها / الزمن بيتغير يا حبيبتي

ثم نظرت لابنها الذي ينظر أرضا بخجل من والدته فهو اختار أشرقت من كل قلبه فهو عاشق لها ولكن والدته دائما ما تحرجه رغم انه تحدث معها كثيرا / وانا ابني يا ختي ميتعايبش ميت بنت تتمناه بس هو اللي اختار المحروسة بنتك

نظرت ام أشرقت لرأفت بسخريه / آيوه فعلا ميتعايبش

بينما من الداخل كانت تقف أشرقت وهي تبكي بكسره علي حالة والدتها تلك فكرت اكثر مره ان تدخل وتطرده هو وأمه ولكن ماذا تفعل فهذا الوحيد الذي قبل بها رغم سنها الكبير ( كما يزعم البعض) فهي أصبحت في السابعه والعشرين وفي وجهه نظر البعض قد فاتها ما يدعي بقطر الزواج، مثير للسخريه ان تكون علاقة مقدسه كالزواج مثل القطر يلحق به من يلحق ويفقده من يفقده ليبقى في عار طوال العمر تحت ما يسمي بالعنوسة أليس هذا الزواج هو نصيب وقدر من الله اي ان الله هو من يقدر الوقت الذي سوف نتزوج به اذا كيف يقولون انه قطر لا والله بل هو نصيب وقدر من الله سبحانه وتعالي.

كان الشباب يستمرون بنقل الصناديق من السياره لمخزن القهوة وأثناء ذلك وجدوا مجموعه من الرجال تقترب منهم وهم يبدو عليهم الشر وفجأه سمعوا صوت مألوف يصرخ

الشرقاوي / اهم هما دول

نظر ادهم لاصدقائة وهو يقول / واد ياشادي ابوك معاه فلوس ولا هيشحت

شادي وهو ينظر لاجسام الرجال / اممم يعني بس ممكن يتسلف مبلغ كده علي اللي معاه عشان التجديدات

الشرقاوي بغضب / بقي انا الشرقاوي تبلطجوا عليا وتضربوني ده انا هوريكم النجوم في عز الضهر

ثم أشار للرجال وصرخ / علموهم الأدب وهاتلوي الواد ده

انهي حديثه وهو يشير علي كريم

كريم وهو يدخل القهوه / معلش يا شرقاوي بقي اصلي طلبت سحلب وخايف يبرد هروح اشربه واجي علي طول

ادهم وهو يهتف بصوت جهوري/ ليه انت فاكرنا مين يعني والله نكسر قهوة عم عوض علي دماغك

عوض من الداخل وهو يلطم / وقهوة عم عوض اي دخلها في الموضوع

شادي / متقلقش يا ابو شادي هنستلف خمسة الالاف بس

علي تحويشة عمرك وترجع احسن من الاول يا خويا

لطم عوض وهو يدخل للقهوة ليحتمي بها كالعاده

بينما تحدث سليم ببسمة / ده ايه اليوم العسل ده بس

مرتين في اليوم لا ياراجل كده هتعود علي الدلع ده

ثم تقدم وسحب الشرقاوي من بين رجاله واخذه بعيدا وهو يبتسم بشر بينما تقدم شادي وادهم من الرجال وهجموا عليهم وكريم احضر كرسي من الداخل ووضعه ثم تحدث وهو يراقبهم بهدوء وسلام نفسي يحسد عليه / ربنا يعينكم يا حبايبي

أثناء ذلك لمح كريم أشرقت تبكي في الشارع فضيق بين حاجييه بتعجب وهو يفكر ماذا بها أشرقت لتبكي هكذا

تحدث شادي وهو يضرب أحدهم وينظر خلفه لاحد الرجال الذي يكسر مقاعد القهوة / انت يا *** انت دي عليها أقساط ياروح امك

ثم القى من بيده وانطلق له يجذبه بينما نظر ادهم للمقعد الذي كسره الرجل واقترب منه وصفعه / مش كخ كده ها ده مالك عام يابابا مش خايف تتحاسب

عوض من الداخل / وانتم مش خايفين تتحاسبوا برضو

شادي بصدمه / بابا ده ادهم يعني يعمل اللي هو عايزه انت مش بتعتبره ابنك زيي ولا إيه

عوض بحنق / أنا مش بعتبرك ابني أساسا

شادي وهو يعود للقتال / اذا كان كده ماشي

بينما كريم كل ذلك وهو يراقب باهتمام حتي تدخل بعض شباب الحي لمساعده ادهم ورفاقه

وطردوا رجال الشرقاوي بعدما القي لهم سليم الشرقاوي أرضا وهو يقول بفرق / خدوا زبالتكم معاكم مش ناقصين قرف في الحاره

ثم تقدم وجلس بجانب كريم وسحب كوب السحلب وقال تعب / الواحد ضرب لأسبوع قدام

جاء الاثنان الآخرين وجلسوا بتعب ثم سحب ادهم كوب السحلب من سليم وهو يشربه /فقال سليم فيه إيه أنا اللي خدته الأول

ادهم وهو يشربه كله / وانا اخدته التاني

ثم نظر لكريم وهو يقول / ها يا كريم يا حبيبي مش ناوي تقول الزفت شرقاوي ده مستقصدك ليه

كريم ببساطة / الموضوع باختصار انه عرف بطريقه ما انه يسرق اكونت بنت من الحارة هنا رفضت انها تتجوزه وقعد يكلم الناس اللي عندها بطريقه وحشه وقذره فالبنت جات وطلبت اساعدها فرجعت الاكونت تآني وقفلته خالص وعملت واحد جديد متأمن كويس

سليم بغضب وقرف / عيل معفن

خرج عوض وهو ينظر حوله فوجد فقط مقعدين محطمين / في إيه يا شباب مش ضربتكم دي والله

ادهم / معلش والله مش هنقدر اصلنا ضربنا شويه كده قبل الغدا فمش حابين نتقل انهارده

وردت مكالمه لادهم فاجاب بترقب /آيوه يا سامي خير سامي من الجهه الاخري / الحق يا دكتور ادهم هههههههههه في ناس وصلت في حادثه هنا ههههههه ومفيش ولا دكتور هنا جراحه هههههههههه المستشفي مقلوبه خالص ههههههههههههه والمدير قالي اتصل بيك عشان تيجي وتاخد نبطشيه دلوقتي زياده ههههههههههه

أغلق ادهم الهاتف وبصق عليه وهو يقول / وانا هتوقع ايه لما تتصل بيا اكيد بلوه

ثم نهض وقال بتذمر / حتي ملحقتش انام دقيقه

سليم بتعجب / فيه إيه

ادهم / فيه حادثه حصلت ومحتاجين حد جراحه في الطوارئ يلا سلام

ثم ركض بسرعه وخرج من الحاره وهو يقول / أنا إيه اللي خلاني ادخل طب أساسا يعني لا منظر ولا أخلاق دكتور اللهم لا اعتراض يارب

ثم وقف ينتظر اي سياره ولكن لم تقف له أي سيارة أبدا زفر بضيق ووجد تاكسي يقترب فقال وهو يشير له / يلا نصرف اخر المرتب

ولكن لم يتوقف التاكسي فصاح ادهم / يوما ما هشتري عربية وادوسكم بيها يا شويه فقرا

فجأة وجد سيارة نقل عامة فركض لها ولكن كان آخر مقعد قد جلس به سيدة فقال بارهاق ورجاء / يا جماعه لو سمحتم عندي طوارئ في المستشفي والناس بتموت ولازم اكون موجود ارجوكم كل ثانيه بتعدي خطر علي حياتهم ومفيش دكتور جراحه غيري في المستشفي

لم يبدو احد مهتم فابتسم ادهم بسخريه ونظر أرضا وهو يتحدث / دول اللي بنتعب عشان نعالجهم

ولكن سمع صوت سيده مسنه وهي تضرب علي كتف من امامها برفق / عديني يا بني خليني انزل وانت اطلع يابني ربنا معاك

نظر لها الجميع في السياره وكأنها تفعل شئ عجيب وليس مجرد فعل بديهي لأي شخص يهتم بغيرة

فقالت السيده بتوبيخ / ايه بتبصوا كده ليه عملت حاجه غريبه يعني طالما مفيش راجل اقوم انا واستني بره وهو يركب

ثم كادت تهبط ولكن هبط طفل المراهق وقال ببسمه / أتفضل انت مكاني لسه باقي وقت علي ميعاد الدرس علي فكره انا عايز اكون دكتور زيك

ابتسم ادهم بشده وربت علي شعره بحنان ثم قال وهو يشير لقلبه /بقلبك ده هتكون احلي دكتور بالتوفيق يابطل

ثم صعد للسياره وانطلق بها بينما كانت السيده المسنه تتمتم بغيظ بقصد ان يسمعها الجميع فابتسم عليها ادهم حتي وصل للمشفي ثم هبط بسرعه وركض في الممرات دخولا للطوارئ وقد ركضت له اسعاد لتعلمه بآخر التطورات

دخل سليم مع مريم لشقتهم فوجدوا والدتهم كالعاده تجلس امام التلفاز تشاهد مسلسلات هندية كما هو الحال لدى نصف الشعب المصري

تحرك سليم لها وخلفه مريم ابتسم سليم وهو ينظر لوالدته التي حتي لم تلاحظ دخولهم فضحك ونظر لمريم / امك شويه وتلاقيها بتتمشي بالساري في الشقه

ضحكت مريم وقالت وهي تتجه للغرفه الخاصه بها / سيبها تسلي نفسها يا سولي دي علي طول لوحدها محدش مننا بيكون معاها

ابتسم سليم بحنان / ما هي بتقعد تحت مع شادية وأم كريم

ابتسمت مريم وكادت تجيب وهي تنظر له ولكن اصطدمت بالحائط الذي يجاور غرفتها في نفس اللحظه التي كان يعرض فيها المسلسل لقطة ضرب البطلة برصاصه ولكنها نهضت مجددا بغضب وهي تصرخ بينما لم تنهض مريم بعدما اصطدمت في الجدار

فتح سليم عينه وهو ينظر للتلفاز ولاخته بينما تحدثت والدته / والله البت دي جدعه شوفت انضربت رصاصة وقامت إزاي زي الاسد واختك اتخبطت في نفس المكان اللي بتتخبط فيه كل يوم ولسه مرمية

نهضت مريم وهي تعدل من وضع نظارتها وتتحسس رأسها بألم بينما اقترب منها سليم وحملها فنظرت له بتعجب فابتسم لها / بس انا اميرتي يا ماما زي البسكوت النواعم رقيقه آوي وهشه إنما الناس البلاستيك اللي بتتفرجي عليهم دول مش بيموتوا غير لما تولعي فيهم تقريبا

ضحكت اميره بشده ثم اقتربت من وجهه وقبلت وجهه وهي تقول له بحب / ربنا يديمك ليا يارب يا سليم

ابتسم سليم ودخل بها للغرفه ثم تسطح علي الفراش وضمها لاحضانه وهو يقول بحماس / تحبي اقرألك قصه

نهضت اميره وهي تنظر له بحماس ولهفة / سندريلا

ضحك سليم وهو يجذبها لاحضانه / عنيا لاميرتي بصي يا ستي كان يا مكان يا سعد يا إكرام ولا يحلي الكلام غير بالصلاة على النبي العدنان

دخل كريم لشقته فوجد الهدوء يعم المكان فتعجب بشده ولم يكد ينادي علي والديه الا وسمع صراخ يأتي من المطبخ قلب عينه بملل وهو يقول / كده معقول آكتر

ثم اتجه للمطبخ بهدوء فوجد والدته تصرخ بوالده الذي يأكل من الكيكة التي تعدها بكل برود وهدوء

تحدث وهو يدخل للمطبخ / فيه إيه بس يا ام كريم ليه صوتك عالي كده

نظرت له والدته بحنق / ابوك ده كل ما اعمل حاجه يبوظها

شاكر المصري والد كريم / هو أنا عملت حاجه انا يابني داخل اشوف حاجه أكلها لقيت امك واقفه تكلم نفسها وكأنها في برنامج طبخ واول ماقربت منها لقيتها بتبصلي بصة وحشه وبتجز علي سنانها وهي بتقول بعدين بنحط الكريمة وهي عماله تحول بعينها لدرجه خلتني أشك أن فيه كاميرات في المطبخ وقعدت ابص حواليا ملقتش حاجه قمت مقرب عشان اخد حتة كيكة لقتها بتقول نخرج فاصل أعزائي المتابعين ونرجع ليكم ونكمل عمايل كيكتنا

ثم تخصر شاكر وهو يمد يده للأمام ليقلد حركة زوجته وهو يقول / مع مطبخ ام كريم انسي الرجيم

ضحك كريم بشده علي والديه فدائما ما يأتي ليري انهم يتشاجرون في المطبخ علي أي شئ

اقترب كريم من والدته وهو يقول / حقك عليا يا ام كريم انا هشد ودان الواد شاكر النوتي ده

نظر له والده والذي لا يظهر علي شكله اي مظهر لتقدم العمر بعضلاته البارزه وغمزاته التي تتوسط خده ومظهره الشبابي بامتياز

شاكر ببرود وهو يأكل الكيكة / ماشي يا كريم انا نوتي بس لما تعمل بلوة انت وعصابتك متجيش للنوتي عشان يلحقكم

ابتسم كريم فدائما ما ينقذهم والده اذا ما تورطوا في شئ بسبب عمله في الشركة اقترب كريم من والده وهو يعانقه / كده يا شاكر ده انتي قلبي ياراجل

ثم همس في اذنه / يا عم هو احنا خسرانين حاجه اديها بتعمل للجمهور واحنا اللي بناكل

ابتسم شاكر وهو يتحدث بخبث / عندك حق يا كريم يابني انا زعلت امك مني اوعي كده عشان اصالحها

ثم اقترب منها فعادت للخلف وهي تهدده / شاكر الولد واقف بلاش قلة أدبك

ضحك كريم وغمز لهم / لا الولد داخل يستريح عن اذنكم

ثم تركهم وهو يتمتم / احيانا بشك ان شادي ابنكم بس بعدين ارجع افتكر شاديه فاعرف ان سفالة شادي متوقعه

نظر شاكر لزوجته بحب واقترب وهو يضمها / أنا بس بعمل كده عشان اغيظك والله لو بيزعلك يابنت الحلال مش هعمل كده تاني

ابتسمت زوجته وهي تضمه بحنان فهو مثل الطفل الصغير معها / براحتك ياقلبي اعمل اللي تحبه

دخل مكتبه وهو يزفر بتعب من هذا العمل ولكن للحق هو سعيد جدا لهذا عمله في هذه المشفي الحكومية المزدحمه والمكتظة بالعديد والعديد ممن لا يتحملون تكلفة المشفي الخاص سعيد لمساعدته لهذه الطائفة من الناس التي تشبهه فهم الاحق بكل تعبه وليس هؤلاء الذين يجلسون في مشفي اشبه بالفنادق مع خدمه خمس نجوم و رفاهيه تشبه رفاهيه المنتجعات

جلس علي كرسيه وهو يريح رأسه قليلا ويغمض عينه حتي يرتاح قبل بدأ تزاحم المرضى مجددا مرت دقائق وهو علي هذه الحالة حتي سمع صوت صفير مزعج جدا

فتح عينه بانزعاج ولكن وجد الصفير اختفي فاغمض عينه مجددا ولكن عاد ذلك الصفير المزعج فتح عينه بغضب شديد وهو يسب من يزعجه في وقت راحته الثمين هذا

فنظر حوله في الغرفه ولم يجد احد ضيق عينه بتعجب حتي سمع صوت صفير يأتي من جهه النافذه فنظر وفتح عينه بصدمه وهو يري فتاه تجلس علي حافه النافذه وتحرك قدمها كأنها تجلس علي الشاطئ واصفر بطريقه مزعجه فنهض وتحدث بغضب / جرا ايه يا بجره يا حلوب أنتي،،، إزاي دخلتي هنا وقاعده كده ليه وعماله تصفري زي براد الشاي كده ليه

توقف الفتاه واستدارت ونظرت له بعدم اهتمام ثم عادت ونظرت امامها وأخذت تكمل ما كانت تفعله فغصب هو بشده واتجه لها وهو يصرخ بها / جرا ايه يا ختي انتي مش بتكلم ولا إيه

نظرت له الفتاه وملامح الصدمه تتضح علي وجهها وهتفت بتلعثم / أنا بتكلمني انا

نظر لها ادهم واقترب منها ثم امسك ذقنها بحده واقترب من فمها وهو يحاول ان يشم اي شئ غريب ثم نظر لها بحاجب مرفوع / انتي ضاربه استروكس يابت ولا إيه هو فيه غيرك هنا؟؟

بينما هي فقط كانت تنظر له وهي متصنمه بشكل مخيف ثم تحدثت بصدمه / هو إنت شايفني وبتلمسني كده عادي

تركها ادهم وعاد للخلف ونظر لها بشك وهو يتحدث ثم غمز لها / ده صنف جديد صح

فتحت فمها وابتسمت بسمه وهي تحدثه / واد انت شايفني صح يا واد

ادهم / اقطع دراعي اما كنتي ضاربه صنف فاسد انزلي يابت انتي واطلعي بره وحسابي مع الترمجي اللي بره ده عشان يبقي يدخل الشمامين لاوضه الكشف تآني

قفزت الفتاه بفرح امامه وهي تقفز / انت شايفني صح آه والله مش انت بتكلمني انا ها؟؟؟ طب انت سامعني دلوقتي

تشنج ادهم وصرخ بحده / يا عبدالعاطي

دخل الترمجي الذي يدعي عبدالعاطي وهو ينظر للطبيب ادهم سبب نصف مشاكل المشفي / نعم يا دكتور اؤمرني

تحدث ادهم بحده / مين اللي دخل البت دي هنا هو حمام عام ولا إيه

نظر عبدالعاطي في أنحاء الغرفه بتعجب وهو يتحدث / بت مين يا دكتور مفيش حد وانا مش بدخل حد

نظر لها ادهم بحاجب مرفوع ثم نظر للفتاه التي كانت تنظر لعبدالعاطي بسخريه وهي تتحدث / اعمي البصر والبصيرة مش شايف القمر ده المعفن

نظر لها ادهم بسخريه / قمر مين يا مقشقه انتي ده انتي شنبك أطول مني اسكتي

صدمت الفتاه ووضعت يدها علي فمها بسرعه وهي تنظر له بغضب

ثم نظر لعبدالعاطي الذي نظر له بتوجس لتحدثه مع الهواء كما يظن / وانت ايه اتعميت ولا إيه اهي متلقحه قدامك

نظر عبدالعاطي مجددا / يادكتور انا مش فاهم مفيش حد والله

نظر ادهم بتعجب للفتاه التي ضحكت وهي تقول له / متتعبش نفسك محدش بيشوفني

ابتلع الطبيب ريقه بتوجس وهو يهمس / أعوذ بكلمات الله التامات من شر ما خلق

نظرت له الفتاه بتذمر / هو أنت بتصرف عفريت ولا إيه يا عم ايه مش شايف القمر ده، ده انت المفروض تسمي الله مش تستعيذ الله

كاد يتحدث فاشارت بيده وهي تتحدث / اصرف عبدالعاطي الأول عشان بيبصلك بصات مش لطيفه وخليه يجبلنا فطار

نظر لها بصدمه ثم نظر لعبدالعاطي مجددا برعب / انت بجد مش شايف حد هنا

ضرب عبدالعاطي بيده بحزن عليه / لا حول ولا قوة الا بالله شكلك تعبت بسبب الورديه المسائيه وبقيت تخترف بحجات غريبه يا دكتور والله مفيش غيري وغيرك هنا ارتاح انت بس تلاقيك تعبان وانا هطلبلك لمون

ثم ترك الغرفة وخرج وهو يضرب كف علي كف

بينما نظرت الفتاه له ببسمه ثم اقتربت منه بسرعه وهي تتحدث بلهفه / انت شايفني صح

نظر لها ادهم وهو يفرك عينه بشده / انتي مش حقيقه انا بخرف صح انتي مش حقيقه صح

ابتسمت له الفتاه وهي تصرخ بفرح / انت شايفني انا في حد شايفني

ثم اخذت ترقص بحركات مجنونه وهي تصرخ من الفرحه بينما نظر لها ادهم وهو يكاد يغشي عليه من الصدمه ثم رفع حاجبه ولوي شفتيه بتعجب ثم صرخ بها / بس يابت انتي يعني مش كفايه عفريته لا ورقصك خرا علي دماغ اللي خلفوكي بطلي تنطيط

نظرت له الفتاه بتذمر ثم اقتربت منه وتحدثت بتحذير / ولا انت مش بتشوفني هسكتلك لا ده انا ممكن افرمك واولع فيك وانت واقف خاف مني بعدين ماله رقصي يا معفن يا بتاع الغوازي انت

نظر لها ادهم بعدما تماسك قليلا ودقق بها النظر وهو يتحدث باستخفاف ويدفع وجهها بيده / غوري يابت العبي بعيد قال تحرقني قال مفكره نفسها تنين

ثم غمز بوقاحه / علي الاقل الغوازي بيعرفوا يرقصوا مش زيك عامله زي الصرصار اللي مقلوب علي ضهره وبيحرك في ايده ورجله وخلاص ولا أكن عندك مغص كده

نظرت له الفتاه بتذمر وكادت تتحدث لولا الباب الذي فتح بعنف ودخول فتاه اقل ما يقل عنها فتنه متحركه بعباءه سمراء ضيقه جدا وهي تأكل لبان بطريقه مقززه

وهي تتحدث / دكتور ادهم

سمع ادهم صفير خلفه وصوت تلك الفتاه وهي تقول / العب ايه النسوان دي،،،، ابعت هات خمره بسرعه دي هتكون ليله عنب يا زميل

ثم ضربت كتفها يكتفه وهي تتحدث بحماس

همس ادهم لنفسه / ده انا هشوف ايام.......

قاطعته الفتاه وهي تصفق / بيضه وبعبايه سودة

نظر لها ادهم ثم أعاد نظره للفتاه وتحدث / اتفضلي يا لوجي اي خدمه

لوجي وهي تقترب منه بدلع /هو مش انت برضو دكتور قلب يا دكتور

نظرت الفتاه الاخري لها ببسمة حالمة / ايه الرقه دي

ادهم وهو ينظر لها بقرف / يعني يوم ما يطلعلي عفريت يبقي بنت لا وكمان شاذه

صدمت الفتاه وصرخت / شاذه مين يا عم انت انا بس بقدر الجمال والبت فرسه لا مؤاخذه

نظر لها ادهم جيدا ثم قال باستفزاز / مهو اي حد هيكون فرسة بالنسبه ليكي

فتحت عينها بصدمه وهي تقول / مين بيتكلم حسين فهمي حاسب بس الشعر الأشقر بيهفهف علي عينك ولا عيونك الزرقه دي يا مقشف

ادهم وقد نسي وجود لوجي تماما وقال بصوت عالي / لا يا ختي مش انا، لو مفكراني جنتل ومحترم ومش هرد علي كلامك عشان بنت وكده لا يا ماما ده انا متربي تحت الكباري ده انا متربتش اصلا يا ختي

نظرت له لوجي بخوف وهي تقول / هو أنا قولت ايه غلط

الفتاه بصراخ / وانت لو فاكرني اني متربيه يبقي غلطان ده انا مشوفتش بتعريفة تربيه يا معفن

ادهم وهو يضع يده في جيبه بثقه / المفعن اللي مش عاجبك ده نص تركي يا فردة الجذمة انتي

نظرت له الفتاه جيدا وهي تقول بسخريه / ده التركي بتاع وسط البلد ولا إيه

ادهم بصراخ وهو يقترب ويرفعها من ثيابها من الخلف / لا يا ضنايا ده انا متشرد واسألي اي حد عني لا ليا قريب ولا حبيب ده انا ممكن اقعد اهزقك كده يومين ولا بتعب

لم تجب عليه ولكن اخذت تشير له بعينها علي شئ ما

ادهم بسخريه / ايه مالك بتتحولي ليه

أشارت له مجددا وهي تصدر أصوات منخفضة وهو فقط ينظر لها بغباء / مالك يابت انتي اخرسيتي

صرخت به وهي تشير لرأسه / انت غبي ياض بقالي ساعه بشاورلك علي البت اللي فكرتك اهبل دي

ادهم وهو يغمض عينه بغضب ثم قربها منه بشده وقال بغضب / وانا اللي غبي برضو يا متخلفه يعني انتي لو اتكلمتي وقولتي الكلمتين دول كانت هتسمعك يعني

نظرت له الفتاه بغباء / تصدق صح

ابتسم بسخريه ثم ألقاها بعنف وهو ينظر للوجي التي كانت تنظر له برعب وهي تسمي الله فقال ببسمة بسيطة / هتصدقيني لو قولتلك ان فيه عفريته معانا هنا في الاوضه

ابتعدت لوجي للخلف برعب وهي تقول / يا ستير يارب

ثم اخذت تنفخ في عبائتها

وهي تقول برعب / طيب يا دكتور ادهم شكلك تعبان اجيلك في وقت تاني

ثم ركضت للخارج برعب وكأن الشياطين تلحق بها وأغلقت الباب خلفها بجده

نظرت الفتاه له بحنق / مش وش نعمة انت افضل أرفس النعمة كده لحد ما تزول من وشك يا بجرة

ضربها ادهم علي رقبتها من الخلف مع كل كلمة ينطقها وهو يقول / أنا مش بجرة يا جلوس الطين انتي

كادت تجيب ولكن أشار لها بسرعه ان تصمت وهو يضع أصبعه أمام فمه فنظرت له بتعجب وقالت / انت عبيط يالا هو فيه حد هيسمعني حتي لو اتكلمت

نظر لها بغضب ثم تقدم من الباب ببطئ وفتحه بسرعه فوجد جسد يقع أرضا بحده

صرخت هناء بوجع / آه ياني ياما كسرت ضهري منك لله

ابتسم ادهم وهو يربع يده امام صدره ثم انحني قليلا لها / ايه يا هناء يا حبيبتي مش كفاية خبر النسوان الصبح وكمان خبر تهزيقي ايه مش مكفيكي دول لانهارده

نظرت هناء له ببسمه غبيه وهي تنهض وتعدل ثيابها / ههههههههه ياه علي هزارك يا شيخ ده انا كنت جاية بس اقولك تحب تشرب حاجة

نظر لها ادهم ببسمة / بجد وكنت لازقه في الباب ليه

هناء بتوتر / أنا يقطعني يا دكتور أبدا يا خويا ده انا كنت لسه هفتح الباب لقيتك بتشده مره واحده فوقعت بس كده

ابتسم ادهم وقال بغموض/ سمعتي ايه

هناء بحزن / اخص عليك وانا يعني هركز في اللي بيتقال

ثم اقتربت منه وقالت بهمس / بس اسمعني يا دكتور العفاريت دول يا خويا مؤذيين آه والله اللهم اجعل كلامنا خفيف عليهم انت بس شغل قرآن وبخر الشقة وهما هيمشوا والبنية اللي كانت هنا من شويه وكانت جاية تكشف علي قلبها شكلها بتحبك آه والله

ادهم ببسمة / قولتيلي بقي كنت جاية تشوفي عايز اشرب ايه

هناء بسرعه / آه وحياتك يا دكتور

كان مبتسم أثناء نومه ففرد يده بجانبه علي الفراش ولكن فجأه وجد يده تصطدم بشئ صلب اخذ يحرك يده علي ذلك الشئ وقد انكمشت ملامحه بتعجب وفتح عين واحده فوجد شخص ينام بجواره نهض بعنف وهو يصرخ وأضاء الاضواء بسرعه بينما استيقظ من بجانبه وهو يصرخ برعب أيضا

تدارك شادي الأمر وهو يضع يده علي صدره برعب / جرا ايه يا ببلاوي مالك شوفت عفريت ايه ده

تحدث كريم وهو يتنفس بعنف ويضربه / يا أخي بقي كنت هتموتني انت ايه اللي جابك هنا

شادي وهو يتثائب / أصل شاديه النظافه حلت عليها مرة واحده وطردتني من الشقة فطبعا سليم عنده مريم ومينفعش ازعجها في بيتها وادهم مش هنا

كريم بسخريه /فملقتش غيري تقطعله الخلف

شادي وهو ينام مجددا / قال يعني هتخلف احمد زويل نام يا خويا نام شويه عشان تعرف تسهر بليل

ضربه كريم بغيظ وهو يدفعه / اوعي كده شويه يا عجل انت واخد السرير كله

شادي بانزعاح / يعني ده ذنبي انك عامل سرير علي القد وبس

كاد كريم يجيب لولا سماع صوت والدته تنادي عليه

فنظر بغضب لشادي وخرج فوجد والدته تجلس مع ام علي التي كانت ترتعش خوفا علي ما يبدو

تحدثت والدته وهي تنظر له / تعالي يا حبيبي شوف ام علي عايزاك في خدمة

خرج في ذلك الوقت شادي وهو يقول ببسمة / فلة انتي هنا علي فكره انا زعلان بعتلك باد علي الانستا وانتي مقبلتيش لحد دلوقتي

لوحت ام علي بيدها وهي تبكي / أنا في إيه ولا إيه يا استاذ شادي انا في مصيبه

نظر لها شادي وكريم بقلق فقال كريم / مصيبه ايه بس يا ام علي خير

ام علي وهي تخرج هاتفها / أنا يا خويا بقلب في الفيس كالعاده اكمن انهارده عقبال عندك عيد ميلاد ابن اختي فقولت ادخل اكتبله تهنئة بقي وابعتله صورة التورتة ام تلات أدوار دي

شادي باهتمام / متقوليش انك ملقتيش تورتة تلات ادوار

ام علي / لا يا خويا لقيت بس وانا بعمل التهنئة بقي لقيت صوره راجل عندي علي الفيس وانا مرعوبه ابو علي يدخل صفحتي يشوفها يقوم مطلقني فيها

شادي بهمس / أمال لو فتح الانستا وشاف صورتي بالمايوه هيعمل ايه هيغسل عاره

نظر كريم لها بتعجب / وانتي متعرفيش الراجل ده يعني

ام علي بفزع / وانا اعرفه منين يا خويا أبدا والله

كريم / تمام اهدي مفيش حاجه يمكن يكون حد مهكر تليفونك ولا حاجه بسيطه يعني

ام علي وهي تفتح هاتفها وتقلب فيه / الست ام حنان جارتنا قالتلي اعمله حاجه اسمها بلوك باين وانا من الصبح عماله اعمل بلوك وهو برضو لسه عندي حتي بص كام مرة عملت بلوك

شادي بهمس / حد سرق فكرتي

امسك كريم الهاتف وهو ينظر لوالدته / هاتي النضاره من جانبك يا ماما

مدت والداته يدها بنظارتها وهي تعطيها له فامسكها وارتداها ونظر لشاشه الهاتف ثم خلع نظارته ونفخ فيها ومسحها في ثيابة ثم ارتداها مجددا وهو ينظر للهاتف ويكرمش ملامحه بغباء وهو يهتف / هو فعلا طلع باد اللي علمك في التليفون

مد يده وهو يميل علي ام علي وهو يشير للهاتف / ايه ده يا ام علي معلش

ام علي وهي تنظر للهاتف ومازالت تبكي بخوف / يووه يا دكتور ده البلوك بقولك من الصبح عماله اعمل بلوك ليه مش راضي يمشي

شادي بضحك / اطلبي ليه البوليس

نظرت له ام علي بتذمر / والله ما هي ناقصه يا شادي هزارك

لوي شادي فمه بتذمر ثم نظر لكريم الذي ينظر للهاتف بحسرة فاقترب منه ليري ماذا يحدث فوجد الهاتف مفتوح علي احدى المحادثات مع رجل ما ومكتوب بها كلمة بلوك اكثر من مره

نظر شادي بغباء لام علي / هو انتي بتعملي البلوك إزاي يا ام علي

ام علي / ام حنان قالتلي بدخل عند الشخص اللي عايزه اعمله بلوك وبعمل البلوك

شادي وهو يكتم ضحكته / آيوه مش تدخلي عنده خاص وتفضلي تكتبي كلمة بلوك في الشات

ام علي بعدم فهم / ها مش فاهمه

ضحك شادي بشده وهو ينظر لكريم الذي يفرك رأسه وهو يقول لام علي /خدي يا ام علي هاتي كده الصوره اللي الراجل ده حطها عندك علي صفحتك

ام علي وهي تاخذ الهاتف وتبحث له كثيرا حتي قالت بسرعه / اهي يا خويا اهي

نظر شادي للهاتف وللصوره التي قلبت حال ام علي الفلة وفجأه سقط أرضا وهو يضحك بشده / والله اسف يا ام علي بس غصب عني والله

كريم وهو يفرك عينيه / هو اللي عملك الفيس ده مقالكيش يا ام علي إزاي تستخدميه صح

ام علي بقلق / لا هو عمله ووراني إزاي اعمل البتاع اللي اسمه لايك ده وازاي احط صوت

شادي بضحك / حرام عليه والله هيروح من ربنا فين

كريم وهو يضع الهاتف امام عين ان علي ويشير للصوره التي كانت تتحدث عنها / دي اسمها طلبات مقترحة يا ام علي ودي مش صوره شخص لا دي صورة الاكونت الي مقترح لان فيه أصدقاء مشتركه بينكم فظهرلك في المقترحات

ثم فتح الصفحة الخاصه بذلك للشخص وأشار علي جزء معين وقال / بصي ده صديق مشترك بينكم

نظرت ام علي ثم قالت بتركيز / دي البت انعام جارتي من البلد تكونش هي اللي بعتته عندي الواطية عايزاني اطلق من ابو علي الحقودة

شادي بهدوء / هي مش بعتته يا ام علي هي بس صديقة عنده يعني مبعتتش حاجه

ام علي بعدم فهم / يعني إيه يا خويا هو كده مش عندي علي الصفحه

كريم وهو يزفر بتعب / لا يا ام علي مش عندك علي الصفحه ممكن تشيليه كده بصي

ثم حذف لها الاقتراح واعطاها الهاتف وهو يقول / بس كده الحوار خلص

شادي بضحك / يا عيني علي صدمة الراجل لما يفتح ال other ويلاقي كمية البلوك اللي اتبعتت ليه

ضحك كريم بشدة وهو يقول / هيقفل صفحته ويعتزل السوشيال كلها

تحرك ادهم لخارج المشفي فشعر بأحد يمشي خلفه فتوقف بضيق وهو ينظر لها ويقول / خير رايحه فين

تحدثت الفتاه / جايه معاك منا معرفش حد غيرك

ادهم بسخريه / وانا مالي هو أنا خلفتك ونسيتك ولا إيه

الفتاه بتذمر / فيه إيه منا مش بحب ابقي لوحدي ومحدش بيرد عليا غيرك هاجي معاك ومش هعمل صوت خالص والله

ابتسم ادهم بسخريه ثم تركها ورحل ولكن توقف حينما سمع صوتها وهي تقول بحزن / طبعا ما انت اكيد عندك عيله وعايش عادي ومش حاسس بيا اني وحيده وياريت وحيده وبس لا ومجهولة الهوية ومفيش حد بيحس بيا لاني هوا حرفيا

توقف ادهم وابتسم بسخريه ثم قال / آه فعلا انا عايش في نعيم مع عيلتي ومبسوط آوي معاهم

ثم استدار وقال لها ببسمه يظهر بها حزن / تعرفي ايه اكتر حاجه بحبها في عيلتي

لم تجيب فاكمل هو / ولا حاجه

ثم ضحك بوجع / لاني ببساطه معنديش عيلة

ثم استدار ورحل وهو يقول / ورايا

نظرت له الفتاه بحزن شديد وقد المها قلبها عليه ولكن لحقت به سريعا توقف ادهم في فجأه فاصدمت به وهي تصرخ / يا نافووووخ امي

نظر لها ادهم ببسمه حاول اخفائها / استني لما العربية توصل

دقائق ووصلت السياره ولحسن الحظ فهذة السيارة تكون فارغه في هذا الوقت يوميا

صعد ادهم فنظر وجدها مازالت تقف امام السياره فاشار المقعد بجانبه فصعدت وجلست وهي تنظر له بتعجب وفي ذات الوقت وصل احد الرجال للسيارة وكاد يصعد بجانب ازهم فقزع ادهم ووضع يده / معلش انا واخد الكرسي ده برضو

الراجل / فيه حد معاك

ادهم بنفى / لا

الرجل بسخريه / أمال واخده ليه

ادهم بسخريه اكبر / معلش اصل بحب امدد في العربية واستجم عند حضرتك مانع، بعدين العربية كلها فاضيه أتفضل اقعد في أي مكان

نظر له الرجل بغضب ثم عاد للمقعد خلف ادهم

بينما اخرج ادهم هاتفه ليحدث اصدقائة وبعث لهم رسالة بأن ينتظروه في شقته لأمر طارئ

ثم نظر بجانبه لتلك الفتاه الغريبة بهذه الملامح النقية والبريئة واخذ يفكر ما هي قصتها يا ترى

نظرت له الفتاه فابعد عينه عنها بسرعه وهو يتظاهر بانشغاله بالهاتف حتي انطلقت السيارة وهبط منها وسار في الشوارع التي تؤدي للحارة الخاصه به ولكن بمجرد دخوله للحاره حتي وجد تجمع كبير من الأشخاص والصراخ يعلو في المكان فركض بسرعة وقلبه ينبض بخوف وهو يتسائل عن سبب هذا التجمع ولكن تجمدت قدمه في الأرض حينما رأي حالة سليم وو.............

تكملة الرواية من هنا

بداية الروايه من هنا

رواية تربية حواري ورواية معذبي من هنا

🌺🌹🌺🌹🌺🌹🌺🌹🌺🌺🌹🌺🌹🌺🌹🌺🌹🌺

الصفحه الرئيسيه للمدونه من هنا

🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹

اللي عاوز باقي الروايه يعمل متابعه لصفحتي من هنا 👇👇

ملك الروايات

لعيونكم متابعيني ادخلوا بسرعه

👇👇👇👇👇

جميع الروايات الكامله من هنا