expr:class='data:blog.languageDirection' expr:data-id='data:blog.blogId'>

رواية روح ملاكي عصابةالحي الفصل الاول بقلم رحمه نبيل حصريه وجديده علي مدونة النجم المتوهج للروايات والمعلومات

رواية روح ملاكي عصابةالحي الفصل الاول بقلم رحمه نبيل حصريه وجديده علي مدونة النجم المتوهج للروايات والمعلومات


بدايةالجنون

‏"اللهم اجبر خاطري جبرًا أنت وليّه.. فإنه لايعجزك شيئًا في الأرض ولا في السماء، ربي اشرح صدري وأرح قلبي وأزح من قلبي كل خوف يسكنني وكل ضعف يكسرني وكل أمر يبكيني، ولا تفجعني في مستقبلي ولا في نفسي ولا في باقي أهلي ولا تُعسر أمري وافتح لي أبوابي المغلقة."


صلوا علي رسول المحبة من بكي شوقا لرؤيتكم

اللهم صل وسلم على نبينا محمد وعلى آله وصحبه أجمعين ❤️❤️🌏🌴


كان يسير في ممرات تلك المشفي التي تكون أقرب ما يكون لانقاض مبني ما حيث تحد الجدران متشققه والغرف تمتلئ بأكثر من مريض واحد وكأنه أتوبيس عام وليس غرفه عناية بالمرضي ورغم ذلك تجد الارضيات اكثر من نظيفه علي عكس مثيلتها من المستشفيات الحكومية 

كان يحمل هاتفه وهو يتحدث ببسمة خبيثه / الله عليك يا شادي ايوة كده عايزك تدلعني قولي هي عامله ازاي حلوه ولا لا

صمت يستمع للجهه الاخري ثم ضحك بصخب وهو يقول باستمتاع / لا ده احنا ليلتنا صباحي بقي ده انا مش هسيبها طول الليل في حالها ده انا


توقف عن الحديث وهو يري نظرات السيده بجانبه وقد انهت كل ما تحفظه من ادعية الاستغفار

نظر ادهم لها بحاجب مرفوع ثم تحدث في الهاتف / طب يا شادي هكلمك بعدين

ثم نظر لتلك الممرضه / ايه يا اسعاد يا حبيبتي مالك قرفانه من نفسك كده علي الصبح ده احنا لسه بنقول يا هادي

اسعاد بقرف وهي تتمتم بصوت منخفض / ربنا يسترها علي شبابنا يارب

ادهم ببسمة وقد سمعها ثم رفع يده وهو يقول / اللهم امين يارب

زمت شفتيها وهي تقول / هو إنت ربنا مش هيهديك أبدا هتفضل طول عمرك كده يابني الحياه مش مضمونه توب لربنا بدل القرف ده استغفر الله العظيم يارب توب علينا يارب

ثم تركته وهي تضرب كف بالاخر بينما هو تحدث لنفسه بتعجب / هي قصدها ايه دي

كاد يذهب لولا رؤيته لاحدى السيدات التي تقف علي مقربه منه فاشار بيده ببسمه / تعالي يا هناء

نظرت هناء له بصدمه لقد كشفها فابتسم هو وهو يشير لها / تعالي يا هناء يا حبيبتي

اقتربت هناء وهي سيده في منتصف عمرها وهي تقول / نعم يا دكتور ادهم أتفضل

ادهم وهو يغمض عينه بتاثر / الله دكتور ادهم ايه الرضا ده بس يا هناء

ثم قال بسخريه / ها يا نونا يا قلبي سمعتي ايه بقي

هنا وهي تضرب علي صدرها بفزع / يالهوي سمعت؟؟ سمعت ايه يا سي الدكتور هو أنا بتنصت ولا إيه

ادهم بسخريه / لا استغفر الله ده هو حيالله كام خبر علي كام اشاعه كده جابو اجلي

ثم تحدث بحده / عارفة يا هناء لو نقلتي كلام محصلش تاني هعمل فيكي ايه

هناء وهي تبتلع ريقها /ايه

ادهم وهو يقترب منها ويهمس في اذنها بنبره خطيره / هخليهم يحرموكي من الفراخ لمده اسبوع

فتحت هناء عينها بفزع وهي تهمس / لا لا خلاص خلاص والله انا مش هقول كلمه خالص

 ادهم ببسمة مش هتقولي ايه بالضبط 

 ‏هناء بخوف / مش  هقول انك مترتبش وجايب نسوان بليل وان شادي صاحبك الصايع شغال قواد وهو اللي بيجبلك النسوان وان الدكتور سليم اللي في قسم الحميات بيقضي معاكم سهرات من اياها وصاحبك كريم يا عيني متاخد في الرجلين معاكم وان السهرات كلها في شقتك النجسه

ادهم وهو يتعجب لكم المعلومات تلك / متعرفيش مقاس جذمتي كام بالمره يا هناء

كادت هناء تجيب لولا انه امسك ثيابها وتحدث وهو يجز علي أسنانه / اسمعك بس بتلوكي بالهبل ده تاني هولع فيكي ومش هحرمك من الفراخ بس لا ده انا هحرمك من سندوتشات الحلاوه بالقشطه بتاعت كل خميس يا معفنه وهجوعك يا هناء فاهمه

هناء بتذمر / يا دي العيبه يا دكتور ادهم هو أنا يا خويا عمري فتحت بقي بكلمه اخص عليك والله ماينفع كلامك ده

ادهم بسخريه / يا هناء مش عليا ده انتي عامله اجنده اخبار للمستشفي وواحده للحارة

ثم تحدث بتهديد / لو سمعتك بترطي بكلام عني هعلقك سمعتي

ثم تركها ورحل وهو ينفخ بضيق بينما نظرت له هناء بتذمر وفجأه وجدت احدي زميلاتها تعبر من امامها فامسكتها وهي تتحدث ببسمه / بت يا فردوس اسكتي مش هتصدقي سمعت ايه الدكتور ادهم كان بيتكلم مع واحد في التليفون وو.........


اكمل ادهم طريقه وهو ينظر في هاتفه ولكن فجأه توقف وهو يري سليم يمسك احدالاشخاص وينظر له بغضب شديد كعادته هز رأسه بيأس علي عادة صديقه دائم الغضب ثم تقدم منه وهو يحاول جذب الرجل من تحت يده بينما سليم يتمسك في الرجل بشده وهو يصرخ / قول يا حيلتها مين ده اللي دكتور حمير تآني يا جحش انت

نظر الرجل له برعب وهو يقول / انت مفكرني هخاف من عضلاتك دي ولا ايه

ضرب ادهم الرجل علي رقبته من الخلف وهو يقول / يا أخي بطل تستفزه بقي هيفرمك في ايده

ثم نظر لسليم وهو يقول ببسمه / سيبه يا سليم يا حبيبي كخ يا بابا كخ يا قلبي

سليم بغضب وهو ينظر لادهم / اسكت انت الكلب ده داخل يتهجم علي مكتبي ويزعق فيا عشان والدته تعبت

صرخ به الرجل / تعبت بعد ما كشفت عندك انت اللي عطتها دوا غلط يا دكتور البهايم انت

صرخ به سليم بغضب / طب تعالي بقي وانا هوريك مين فينا دكتور البهايم ومين فينا البهايم نفسها

ثم سحبه بعنف وكاد يضربه فوقف ادهم في المنتصف وهو يقول / معلش يا سليم امسحها فيا بعدين يا أخي مش تاخد بالك وانت بتكشف بعد كده

نظر له سليم وابتسم بسمه غاضبة وهو يقول / والدته تعبت بعد ما كشفت عندي بتلات اسابيع

نظر ادهم للرجل بغباء / ده بجد

هز الرجل رأسه / آيوه بس هو السبب احنا مكشفناش عند حد غيره دكتور الحمير ده اذا كنت مش عارف تشخص صح سيبوا الطب انا عارف اتخرجتم إزاي يا شويه حمير انتم 

ابتعد ادهم من طريق سليم وهو يقول / تصدق انك قليل الادب خده ياض يا سليم روقه وانا هغطي عليك 

ابتسم سليم بتسليه وهو يجذب الرجل لمكتبه ويغلق المكتب ووقتها علا صراخ الرجل فنظر ادهم للغرفه ببسمه وهو يصفر وينظر في ساعته ببرود 

ولكن قاطع لحظاته تلك صوت صراخ يأتي من آخر الممر /يا دكتور ادهم يا دكتور ادهم ههههههههههههه يا دكتور ادهم ههههههههههه

نظر ادهم لذلك الذي ينادي وقال بخفوت / استرها يا ستار

اقترب ذلك الممرض والذي يدعي سامي وقال بضحكه عاليه غبيه  / يا دكتور ادهم كويس اني لحقتك هههههههههههه

نظر له ادهم وهو يغمض عينه ويستعد للكارثة القادمة 

سامي بضحكه غبيه / أصل مدير المستشفي قالب عليك الدنيا ههههههههههههه وفيه فضيحه كبيره اوي ههههههههههه واحتمال تنطرد هههههههههههه 

ادهم /وانت مالك فرحان كده يا سامي ولا كأني رايح اتكرم عن مجمل أعمالي

ضحك سامي بصخب / فرحان ايه بس يا دكتور فين ده ههههههههههه ده انا حتي زعلان عليك ههههههههههه

ادهم وهو يربت علي  كتفه / صادق يا خويا باين الحزن اهو بس بلاش تبالغ في الحزن ليجيلك جلطة ونخلص منك بفشتك العايمة دي 

سامي / يوووه ههههههههه خليك واقف كده لحد ما الفضيحه تكبر ههههههههه وسمعتك تبقي علي كل لسان ههههههههه وتتفصل من النقابه كلها مش المستشفي 

ادهم وهو يقترب منه ويتحدث / هو أنا جوز امك ولا مرات ابوك يا سامي ايه كمية الانشكاح دي كأنك بتبلغني اني تم ترشيحي لنوبل 

ثم دفعه بغيظ / اوعي من خلقتي يا وش السعد انت 

واتجه لمكتب المدير وهو يفكر اي مصيبه فعلها هذه المره فاخذ يراجع كل مصائبه حتي يجهز رد مناسب 

اقترب من مكتب المدير فوجد طاقم التمريض وبعض الأطباء يقفون في الخارج ويستمعون لصراخ المدير الذي هز أركان المشفي 

نظر له الجميع وهم يكتمون ضحكتهم فتحدث وهو يصفق بيده / جرا ايه يا كبدي منك ليه هي اول مره ولا إيه يا حبيبي يلا كل واحد يروح علي شغله منك ليه يا ضنايا وتفاصيل الخناقه هتلاقوها بأذن الله حصري مع هناء يلا يا خويا فضينا المولد يلا نقفلها بقي ونقعد كل يوم نشوف ادهم بيتجازي علي إيه 

ثم زفر بضيق وطرق الباب فسمع صياح مدير المشفي وهو يصرخ / ادخل يا عملي الأسود 

تنفس بعمق ثم فتح الباب ودخل ببسمه وهو يقول / يا اعدل الناس الا في مخاصمتي 


انهى شادي المكالمة مع ادهم وهو يبتسم ثم اتجه لغرفته وبمجرد دخوله حتي وجد الباب يغلق بقوه وخلفه احد يلتحي بالسواد صرخ شادي برعب وهو يلقي الهاتف ويسقط علي الفراش / عفريت

ابتسمت تلك التي تقف خلف الباب وتقدمت منه وهي تنظر له بشر ثم أمسكت اذنه بشده وهي تقول / العفريت ده هطلعه علي جتتك ان شاء الله 

نظر شادي بتذمر لها وهو يحاول نزع يدها / ايه يا شاديه الغباء ده كنتي هتقطعيلي الخلف يا شيخه 

شادية وهي تضربه علي كتفه / احسن علي الاقل نمنع تكاثر سلالتك الزبالة دي وتنقرض ونستريح منك 

ابعد شادي يدها بتذمر / ده بدل ما تقولي ربنا يطول في عمري واشوف عيالك يا شادي يا حبيبي انتي جده انتي... مش عايزه تشوفي عيال حفيدك 

ابتسمت شادية بسخريه وهي تقول / ده لما يكون الحفيد عدل الأول عشان اشوف عياله بدل ما العالم يتبلي بيك وتبقي نكبة في تاريخ البشرية 

شادي بحنق / كل ده عشان هزمتك امبارح في الجيم ايه يا شوشو بس خلي روحك رياضيه كده 

تحدثت شادية بتذمر / مين دي ياض اللي خسرت امبارح ده انا سبتك تفوز عشان صعبت عليا 

شادي بسخريه / آيوه مصدقك 

ثم نظر لها جيدا وهو يقول /قوليلي بقي يا حلوه كنتي مستخبية ورا الباب عشان تقطعي ليا الخلف بس ولا عشان ايه 

انتبهت شاديه له وقالت وهي تضربه مجددا / فكرتني يا معفن بقي انت ياض تضحك عليا وتنيمني ننا ننا وجايب نسوان وعامل ليلة  انت والتيران التانين من غير شادية اخص عليك قليل اصل ياض ده من صغرك وانا كنت دايما بدلعك كنت  وانت صغير تقولي بصي يا تيته البنت دي قمر إزاي كنت اقولك روح يا حبيب تيته بوسها عمري حرمتك من حاجه 

ثم ضربته مجددا / وانتم رايحين تجيبوا نسوان وعاملين ليله في شقه الكلب ادهم من غيري وأكيد بقي جايبين بيرة ما هي الليله خمرة ونساء، ياض ده اللي ملوش خير في شادية ملوش خير في حد 

كان شادي يفتح عينه وفمه ببلاهه / خمرة ونساء ايه بس يا شادية جو الجاهلية ده 

شاديه وهي تمسك اذنه / علي شادية يا معفن انا سمعتك بودني دي وانت بتقول لادهم انك جبتها وحطتها في شقته وانكم هتسهروا عليها للصبح وانك قولت للباقين وهتبقي سهره صباحي يا شويه خمورجية 

شادي وهو يبعد يدها / آه آه ودني يا شاديه حرام عليكي بعدين ايه الدماغ دي بس ونسوان ايه وخمره ايه ده انا كنت بكلمه علي جيم مصارعه أحدث اصدار كنا بندور عليه من زمان ولقيته بالصدفه وقولنا هنسهر نلعب عليه للصبح احنا الاربعه جبتي بقي منين النسوان والخمرة وجو حريم السلطان ده وايه خمورجية دي احنا حتي عمرنا ماشربنا سجارة حتي 

نظرت له شادية بشك / انت بتضحك عليا عشان مجيش اتفرج صح 

شادي وهو يضرب كف علي كف / لا حول ولا قوة الا بالله ياستي هو احنا عمرنا حتي بصينا لبنت 

رفعت شاديه حاجبه فاكمل شادي / احم ما عدا انا 

ضربته شاديه / اصلك قليل ربايه ومش محترم انا عارفه طلعت قليل الادب لمين 

شادي وهو يلاعب حاجبه لها / عليا الكلام ده يا سهنه انتي ده كل جيناتي متاخده منك ده حتي اسمي علي اسمك 

ضحكت شادية بتذكر / آيوه انا اللي خليت ابوك يسيمك علي اسمي غصب عن عين امك 

ضحك شادي بشده / ربنا يديمك لينا يا حبيبتي يارب هو فيه غيرك بيحامي عننا كل مره قدام عوض لما نكسرله القهوه 

وعلي ذكر اسم والده سمع شادي صوت والده وهو يقول / يا آخرة صبري هتنزل القهوة ولا هتقضيها مع شادية كده 

نظرت له شادية وهي تضحك بشده / خلص انت الفطار بره جاهز 

ثم تركته وغادرت فابتسم لجدته بل والدته فمنذ وفاة والدته بذلك المرض الخبيث الذي اخذ يأكل في جسدها وهي دائما كانت له خير والده 

نهض ليغير ثيابه ولكن قاطعه رنين هاتفه فامسكه وابتسم بخبث وهو يجيب / تفيدة القلب والروح كده اهون عليكي يا قلبي 


صرخ المدير بمجرد رؤيته / اهلا باللي هيقفلي المستشفي ويخليني اسرح بجرجير قدام النقابه

ادهم باستفزاز وهو يدعي الصدمه / وهو بيع الجرجير عيب ولا حرام دي شغله شريفه علي الاقل تتحرك من علي مكتبك بدل ما انت هيجيلك التصاق فخدين كده 

تنفس للمدير بعنف وهو يبحث في الدرج الخاص به وأخرج بخاخ للتنفس وهو يتحدث بتعب / نهايتي علي ايدك يا أدهم 

ثم أشار للكنبة الجانبيه وهو يقول / عايز افهم ايه اللي عملته مع الاستاذه امبارح ده 

نظر ادهم للسيده بحده وهو يبتسم بشر فاخفت السيده وجهها برعب 

تحدث ادهم ببراءه / عملت ايه انا معملتش حاجه خالص ده حتي المدام هي اللي قلت ادبها عليا امبارح وانا لاني چركن مان 

المدير وهو يكاد يسقط أرضا / جنتل مان؟؟ 

ادهم بعدم اهتمام / سيان مش هتفرق المهم اني عشان راجل ابن بلد وعارف الأصول مردتش ارد عليها

تحدثت السيده بعنف / ده انت طردتني من اوضه ابني عشان بقولك اديله مسكن يريحه يا عديم القلب انت 

رفع ادهم حاجبه وتحدث وهو يشير علي المدير / شايفه لولا الراجل الكركوب ده كنت رديت بس انا هحترم وجوده  

المدير بسخريه /ايه الاحترام ده  كتر خيرك والله 

ابتسم ادهم وهو يربت علي صدره / متقولش كده ده انت استاذي وانا متعلم علي ايديك 

صرخ المدير / يا أخي كانت انقطعت ايدي قبل ما تتعلم عليها 

ادهم بفزع مصطنع / لا متقولش كده ان شاء الله اللي يكرهك يا راجل 

ثم تقدم منه وهو يجلسه مجددا ويحضر له المهدأ الخاص به ثم نظر للسيده / هاتي المايه اللي جنبك دي 

تحدثت السيده بحده / انت ا

قاطعها ادهم بحزم / نسيب بقي الراجل يروح فطيس ويتخنق عشان نقول انت وانا هاتي يا ستي المايه 

احضرت السيده الماء واعطتها لادهم فمدها للمدير وهو يربت علي ظهره / بالعافيه يا غالي 

ثم تحدث بهدوء/ أنا مش فاهم انت بتتعب نفسك ليه والله ما مستحقه كل زعلك ده يا جدع 

نظر له المدير وتحدث براحة قليلا / هتعمل فيا آكتر من كده ايه 

ادهم بحزن / أنا يادكتور الله يسامحك طب ده حتي انا اللي عامل حس للمقبره دي 

سمع الجميع صوت صراخ  في الخارج لاحد الرجال وهو يسب في المشفي ومن يعمل بها 

فابتسم ادهم وهو يقول / وسليم برضو عامل حس معايا 

ضرب المدير غلي مكتبه بغضب / انت ايه يا أخي قولي انت ليه تتخانق مع الست دي 

نظر ادهم للسيده وتحدث بجديه / ابن الاستاذه امبارح تعب بعد العمليه تداركنا الأمر وعطيناه مسكن وبمجرد ما مفعوله راح ابنها قعد يصرخ وهي بتزعق اني اديله تآني وانا حاولت افهمها ان كده خطر عليه وان المسكن ده هيسبب تهييج للجهاز العصبي عنده وكتره ممكن يسبب إدمان ويكون خطر علي صحته بس هي مبصتش علي المدي البعيد وكانت عايزه بس تريحه دلوقتي ومشافتش انه بعدين هيتعب آكتر وانا عذرتها عشان ام وحاولت افهمها باكتر من طريقه قامت دعت عليا وتقولي ربنا يتعب قلبك عشان تحس بيا ده جزاتي يعني بعد كل ده 

نظر المدير له ثم تحدث / ايه هو نوع المسكن ده 

ادهم /......... 

نظر المدير للسيده وتحدث / هو فعلا عنده حق المسكن ده مش بنديه للمريض لأكثر من مره بسبب خطورته الشديده وأكيد الدكتور ادهم ميقصدش واعرفي ان لو اي دكتور غيره وقولتي ليه كلامك ده كان ممكن يأذيكي ويمد ايده عليكي بس عشان ادهم رغم كل اللي فيه الا انه عمره ما رفع ايده ولا رد علي ست المفروض تشكريه عشان بيحاول يساعد ابنك مش تدعي عليه هو هنا مش بيلعب الدكاتره فيها من الضغط اللي يخليها تقتل حد يعصبها بس سبحان من عطاهم الصبر انهم رغم الضغط والعمليات واللي بيشوفوه بيردوا علي الناس بهدوء وعملية 

نظرت السيده أرضا بحرج / مش قصدي حاجه بس هو اللي 

قاطعها المدير / خلاص يا مدام خلصنا انا جبته وزعقت وانا مفكر انه هو اللي غلطان زي ما وصلني منك دلوقتي حضرتك تقدري تروحي وتفضلي جنب ابنك 

خرجت السيده وهي تنظر أرضا بحرج بينما نظر المدير لادهم وهو يقول بغضب مصطنع / غور انت التاني شوف شغلك 

ضحك ادهم وهو يخرج / من ورا قلبك يا عزومي 

ضحك عزمي (مدير المشفي)وهو يهمس/ ربنا يسعدك دايما يابني 

خرج ادهم وجد سامي يقف امام الباب وهو يقول / هههههه انطردت صح 

ضربه ادهم في وجهه وهو يدفعه للخلف / لسه يا وش السعد 

ثم تركه واتجه لغرفته وجلس حتي ينهي الحالات التي لديه ويعود للمنزل 

دخل عليه سليم فضحك ادهم وهو يقول / تعالي يا ناصرني عملت ايه في الراجل ده 

سليم وهو يهز كتفه ببراءه / اتكلمنا بكل هدوء وتحضر 

ادهم وهو يضحك بشده / آيوه ما صوت التحضر وصلنا المكتب 

سليم / آه صحيح هو عزمي كان عايز منك ايه 

ادهم بعدم اهتمام / كالعاده مشكله بسيطه كده 

ضحك سليم /طب ايه شادي كلمك وقالك 

ادهم بتحمس / آه ده انا النهارده هفرمكم في اللعبة 

ابتسم سليم وهو ينهض / طب هخلص عشان نمشي بسرعه يلا سلام 

ابتسم له ادهم وهز رأسه ثم نادي /يا اسعاد دخلي الحالات ياختي خليا نخلص 

ثم امسك هاتفه ليحدث الرفيق الرابع لهم 


عدل نظارته للمرة المئه وهو يتأفف / يا باشمهندسه انا بقالي ساعتين قاعد كده و ورايا شغل مش هينفع كده 

نظرت له المهندسة ببسمة اغراء / فيه إيه بس يا باشمهندس انا بس عايزاك تصلح الكومبيوتر بتاعي بعدين انا هنا المديره فبراحتك خايف من ايه بعدين دي أوامر يا كريم 

نهض كريم بعصبيه وهو يقول / حضرتك بنت المدير هنا واوامري باخدها من والدك ثانيا انا جيت هنا عشان مفكر المدير هو اللي طلبني ثالثا قولت لحضرتك الكومبيوتر مش فيه اي عطل ده فيرس وانا عملته رابعا ياريت حضرتك متشليش الالقاب بينا خامسا بقي وده الأهم ياريت تحلي عن دماغي 

ثم تركها وخرج وهو يغلق الباب بعنف ويتمتم بغيظ بينما هي تمتمت بغيظ /ماشي يا كريم والله لاوريك 

بينما سار كريم في طريق مكتبه وهو ينفخ بضيق ولكن سمع صوت هاتفه يصدح في الأجواء أخرجه فوجده ادهم فابتسم بشده وهو يجيب ويعدل من نظارته / البوص 

ادهم / متتأخرش يا كريم انهارده عشان هنتجمع عندي 

كريم ببسمة / شادي قالي وانا بلغت الحاج والحاجة وقولت لشادي هو هيطلب الاكل لأحسن مكلتش حاجه من الصبح وهموت من الجوع 

ضحك ادهم / اشطا طب خلص بقي وحصلنا انا وسليم علي وشك نخلص النبطشيه 

كريم وهو يدخل لمكتبه / اشطا هخلص بس الشغل وهتلاقوني في وشكم

ادهم / طب تمام 


كان شادي يجلس في قهوة والده ينهي الحسابات التي طلبها منه الحاج عوض والده ولكن فجأه سمع صوت ضوضاء عالية في الخارج وصوت نساء زفر بضيق وهو يعود لعمله فهذا شئ معتاد في مثل هذه الحواري التي تتشاكس بها النساء دائما علي اقل شئ نظر للورق امامه وهو يحاول إنهاء كل شئ قبل سهرة المساء لولا دخول صبي القهوة دقدق الفتي صاحب ال ١٥ عاما وهو يصرخ / يا معلمي الست محاسن ماسكة الآنسة مريم وبتضربها بره

نهض شادي بفزع وخرج بسرعه وهو يهتف في نفسه / والله لاقتلك يا محاسن الكلب 

اقترب شادي من التجمع وهو يدفعهم بعنف ثم تقدم للمنتصف وجد سيدة سمينة بشده تمسك فتاه تبدو في هيئة مزريه بملامح عاديه جدا وترتدي نظاره كبيرة جدا تكاد تلتهم وجهها ومقوم أسنان 

بكت الفتاه وهي تصرخ برعب / والله ما عملت حاجه اوعي سيبي ايدي

ضربتها السيده محاسن وهي تصرخ / بس يا خطافه الرجاله انا شوفتك وانتي بتبصي لجوزي بعينك العورة دي 

تدخل شادي وهو يجذب مريم بشده ويخفيها خلفه ثم دفع محاسن بعنف وهو يصرخ بغضب جحيمي نادرا ما يخرج منه / ايدك لو اتمدت تآني عليها هقطعها سامعه ولا لا 

السيده بصراخ / انت ااااا

قاطعها صوت شادي الجهوري وقد برزت عروق وجهه / سامععععععععه 

تقدمت احدي النساء وهي تهتف بغيظ / جرا ايه يا شادي يا خويا ده بدل ما تضربها كفين تعدلها جاي تدافع عن قليلة الربايه دي 

تمسكت مريم في شادي برعب وهي تنتفض بينما نظر شادي للسيده وقال بغضب /قسما بربي لولا انكم حريم لكنت خليتكم متساوين بالاسفلت 

ثم نظر لرجل يرتدي فلنه بيضاء وشورت ابيض ونحيل الجسد / وانت يا *** قسما بربي لو عينك بس جات عليها لاكون دافنك مكانك 

الرجل بتوتر / الله الله يعني انا ذنبي ايه دلوقتي يا استاذ شادي 

شادي وهو يقترب منه ويصرخ بغضب / هتستهبل يا روح امك ما كل اللي في الحاره عارفين انك عينك زايغه 

تحدث احد الصبيه الذين كانوا يلعبون في الشارع وهو يقول / يا عمي شادي انا شوفت ابله مريم وهي داخله الشارع والراجل ده قعد يرخم عليها لحد ما الست دي طلعت وقعدت تزعق في ابلة مريم 

نظر لهم شادي بشر وتحدث / احمدوا ربكم انها جات فيا لان لو سليم عرف كان سود عيشتكم 

ثم نظر حوله وهو يصرخ / مريم العربي خط أحمر منك ليه اللي هيقرب منها يبقي كتب نهايته 

ثم نظر لمريم التي تمسح نظارتها بثيايها وهي تبكي بخوف وتحدث / امشي يا ريمو يلا 

نظرت مريم اليه وهي تغمض عينها قليلا ثم تحدثت / هنروح فين 

ضحك شادي وهو يمسك طرف ثوبها ويجذبها / تعالي يا صغننه هنروح عند شاديه تلاقيها عملت شويه ملوخيه إنما ايه عجب 

مريم بفرحه كبيره / بجد 

شادي وهو ينظر لها بحب وحنان / بجد يا ريمو يلا 

ذهبت مريم خلفه وهي تحاول أن تتبين الطريق فهي من أصحاب النظر الضعيف 

بينما نظرت السيده محاسن لزوجها وهي تتحدث بحده / وانت مش هتبطل عينك الزايغه ملقتش غير اخت سليم العامية دي عشان تقل أدبك عليها يااخي احترم سنك شويه ده لو كان سليم هو اللي شافك كان نزل البيت ده علي دماغك يلا انكشح قدامي جاتك البلا في عيشتك 

نظر لها الرجل بخوف ودخل وهو يحاول تفادي غضبها وتفرق الاشخاص وذهب كل شخص ليري عمله 


كان شادي يصعد خلف مريم وهو يخفض نظره أرضا ولكن رفعه وهو يسمع تأوه مريم التي اصطدمت في الحائط بالخطأ ضحك شادي بشده وهو يصعد قبلها وينظر لها بسخريه / جرا اي يا ريمو انت ربنا مش هيتوب عليكي بقي 

مريم وهي تنهض وتتحدث بتذمر بمقوم أسنانها الذي يزعجها هذا / الله وانا اعمل ايه الحيطه هي اللي جات في وشي 

شادي وهو ينظر للجدار بتعجب / هو اللي جه في وشك يعني مش انتي اللي خبطتي فيه 

مريم ببسمه / تؤتؤ هو اللي جه في وشي 

ضحك شادي وهو يقول / يابنتي ما تعملي عمليه في عينك دي وريحينا بقي 

مريم وهي تعدل نظارتها وتتحدث بخوف / لا أخاف اعملها اتعمي خالص 

ضحك شادي وهو يفتح باب شقته / علي أساس أن نظرك سته علي سته 

مريم بتذمر / انت متنمر علي فكره 

شادي وهو يدخل قبلها ويلقي المفاتيح / مت.. ايه يا ختي متنمر مين يا ام اربع عيون 

رفعت مريم نظرها له وهي تقول / شوف التنمر الكلام اللي بتقوله ده هيجري وراك يوم القيامة 

ضحك شادي في نفس الوقت التي خرجت به شادية من المطبخ وهي تتحدث بتعجب / بتكلم نفسك ولا إيه يا مجنون انت 

ولكن ابتسمت وهي تري تلك الصغيره مريم وهي تفتح ذراعها وتقول / قلب شاديه تعالي يا ريمو وحشتيني 

ركضت مريم لشاديه التي تعد قلب وروح تلك العمارة ومن بها ولكن تخطتها مريم وهي تتجه للستاره التي بجانب شاديه وتضمها فسقط شادي أرضا بضحك / عيني عليك يا سليم يا خويا 

ضحكت شاديه وهي تنظر لمريم التي نظرت بتعجب لشادي ثم خلعت نظارتها ومسحتها كالعاده ثم وضعتها مجددا وهي تنظر لهم بحرج / كنت قاصده اعمل كده علي فكره 

ضحك شادي وهو يمسك بطنه / صادقة

ضربت شادية شادي بالمغرفة التي تحملها وهي تقول / بطل ترخم عليها دايما مفيش غيرك دايما يناكشها زي العيال الصغيره طب والله لجوزها ليك عشان تحرم تضحك كده 

نظر لها شادي قليلا ثم ابتسم بحنان / هو أنا أطول اتجوز أميرة الحاره كلها 

نظرت له مريم ببسمه /بجد يا شادي انا اميرة 

شادي بحنان شديد / وست الاميرات كمان يابخته اللي انتي من بخته بقولك ايه تتجوزيني وتكسبي فيا ثواب 

ابتسمت اميره وهي تتحدث بمزاح / لا عشان انت قليل الادب 

ضحك شادي بشده / يابنتي ده انا هدلعك ومتخافيش هبطل قلة أدب واتوب علي ايدك ها بقي اكسبي فيا ثواب ووافقي عايزين ننول الرضا 

ابتسمت مريم ولم تكد تجيب حتي سمع الجميع صوت صبي يصرخ أسفل شباك شادي وهو يقول / الشرقاوي ماسك الاستاذ كريم علي اول الحاره ولامم بلطجية عليه 

جز شادي علي أسنانه بغضب شديد وهو يخرج بسرعه ويتحدث بغضب / ليله امه سوده ابن ال***

بينما ركضت مريم جهه المطبخ وهي تصرخ / كريم فين ده 

امسكتها شاديه وهي تجذبها جهه الشباك الذي في غرفه شادي ويطل علي اول الشارع / تعالي يا ختي من هنا لأحسن تتقلبي في حلة الملوخيه 


قبل ذلك بعشر دقائق 

دخل كلا من سليم وادهم الحاره فتحدث سليم / هروح القهوة اشوف شادي وأطل علي عم عوض لو عايز اي مساعده 

ابتسم ادهم وذهب هو تجاه عمارتهم حيث تشغل عائلة شادي الدور الثاني وهو الدور الثالث وسليم وعائلتة الدور الرابع وكريم وعائلته الدور الخامس والدور السادس فارغ والدور الأول ( الأرضي) تعيش به سيده في منتصف عمرها تدعي ام احمد 

اقترب ادهم من محل يقع أسفل عمارتهم ودخل واشتري بعض الأشياء  التي يحتاجها و اتجه للعمارة فوجد السيدة ام احمد تجلس في نافذتها كالعاده منذ سنوات طويله وهي تنظر للحاره بأمل ان تجد من تبحث عنه وسط الوجوه ابتسم ادهم وهو يتحدث كعادته بمشاكسه / ام احمد يا ساكنه القلب اخبارك يا غاليه 

نظرت له ام احمد بحزن ولهفه / هو أحمد مكلمكش يا أدهم أصله وحشني اوي 

ابتسم ادهم بحزن ثم قال / جرا ايه يا ام احمد هو أنا زعلتك في حاجه ياست انتي ده انا حتي بتعب عشان اجبلك حلويات من ورا الزفت سليم رغم انه منعها عنك 

ام احمد بدموع لم تجف ولم تتوقف منذ سفر ابنها الوحيد الذي حصلت عليه بعد سنين من الحرمان / ربنا يديمك يا ابني يارب ويسعدك بس انا 

علت شهقاتها وهي تقول / وحشني اوي وعايزه اضمه لصدري والله ما عايزه غير كده قلبي واكلني عليه آوي يابني 

حاول ادهم ان يمنع دموعه فقال وعيونه تلمع من كتم الدموع /متقلقيش يا ستي هو كلمني امبارح وقالي اوصلك سلامه بس وقتها انا كنت في الشغل ومقدرتش اخليكي تكلميه  حقك عليا انا يا ست الكل وبيقولك انه كويس بس مش بيقدر يتصل كتير عشان مشغول وبعتلك فلوس كعادته ووصاني عليكي واتفضلي يا ستي ده اكل بفلوس احمد يا ام احمد هيصي بقي وعلي فكره مخنصرتش فلوس 

ثم رفع يده ووضع الحقائب علي النافذه / اهي دي الحجات احمد قالي انك بتحبيها وقالي اشتريها ليكي من فلوسه وتعبه وقالي اقولك انك انتي كمان وحشتيه آوي ووحشه الاكل بتاعك آوي 

نظرت ام احمد للحقائب بدموع تهبط بشده وهي تجد كل ما تحب في الحقيبه كما قال ادهم ثم قالت / والله بجد احمد اللي بعت الحجات دي ليا يعني هو اللي قالك هاتها لأمي 

ادهم بضحكه / أمال يعني من فلوسي انا، ياستي صلي علي النبي ده انا كل يوم بيتخصم مني واللي بيبقي من المرتب يا دوبك اجيب بيه علبه جبنه ورغيف عيش وبكمل عشايا نوم

ضحكت ام احمد وهي تضم الحقيبه لصدرها وتبكي من بين دموعها / ربنا يوسع رزقك يا بني يارب انت وأحمد ويرزقك ببنت الحلال وهو يرجعلي بالسلامه وأنا اجبله عروسه قمر

ادهم بضحك / ده مش بعيد يرجعلك بعروسه في ايده ده بنات ايطاليا ايه مقولكيش ملبن بقي وعود فرنساوي 

ام احمد بتذمر كالاطفال / لا يا خويا هجوزه من هنا عشان يبقي جنبي دايما وميسبنيش ويمشي 

ضحك ادهم وهو يقترب ويقبل رأسها / ربنا يسعدك ويريح قلبك يا ام احمد عن اذنك بقي اطلع اريح شويه عشان جاي هلكان 

ابتسمت ام احمد / ربنا يريحك يابني يارب ويرزقك دايما 

ابتسم لها ادهم وهو يقول / امين يارب سلام عليكم 

وصعد ادهم لشقته وهو يبتسم بدموع وينظر للحقيبه بيده  وهتف وهو يدخل للشقه / يابختك يا احمد عندك ام تستناك لو غبت العمر كله 


بعد مرور الوقت 

ركض ادهم علي الدرج وهو يرتدي تيشرته الخاص ويصرخ / ليلة ابوك سودة يا شرقاوي يا ابن ال *****

ثم ركض في الشارع وهو يبحث عن المشاجره وفي نفس الوقت خرج احد الشباب من قهوه وهو يحمل سكين كبير ويصرخ بغضب جحيمي وشاب اخر يقفز من نافذه احدي البيوت ويركض بسرعه كبيره

وصل الثلاث الشباب حيث يوجد المدعو شرقاوي وهو يمسك شاب اخر  ويضربه

صرخ احد الشباب الثلاثه وكان سليم  وقال بغضب  / موتك علي ايدي يا ابن ال****

ثم امسك سكينة / والله القطعه واعلقه علي باب الحاره

امسكه الشاب الاخر والذي كان شادي وهو يقول بخبث / عيب عليك يا سولي الحشرات دي هتظفر السكينة دي آخرها رشة بيرسول

ادهم بتفكير / تصدق ياض يا شادي عندي سم فران معفن مش خسارة في شرقاوي

صرخ الشاب الذي يُضرب /الله يحرقكم انتم بتعملوا ايه انا بخلص يا ابن الكلب منك ليه

تحدث شادي ببسمة / ايه ده كريم الكيوت بقي بيشتم الحقوا يا عيال

ادهم وهو يخرج هاتفه / كمان مره يا كريم بالله عليك  بس بالسلو موشن عشان اسجل اللحظه التاريخيه دي 

نظر كريم لشرقاوس وتحدث / بقولك ايه خلص،، ابوس ايدك تقتلني

صرخ الشرقاوي وهو يقول / جرا ايه يا حليتها منك ليه داخلين عليا وفاردين صدركم كده ليه يلا يابابا غور من هنا مشكلتي مع صاحبكم ده

تحدث سليم بغضب وهو يقترب ويضربه لكمة عنيفه / وانتي بقي يا قطة محدش قالك ان اللي يلعب مع واحد من عصابه الحي بنفرمه ولا إيه

نظر الشرقاوي لهم وهو يمسح الدماء من علي وجهه ولم يكد يتحدث حتي سحبه شادي وهو يلكمه بعنف اكثر ويسبه بشتائم قذرة كثيرة بينما ادهم نظر لهم ببسمة وبرود فتحدثت سيدة من النافذة / دكتور ادهم يا دكتور كويس انك جيت يا خويا كان عندي اشتشاره كده

ادهم / اشتشاره؟؟ طب قولي اشتشتارتك يا ام علي

ام علي / اصلي يا خويا لا مؤاخذه كل ما اجي اشهق علي الملوخيه مش بعرف

ادهم / اجي اشهقلك انا طيب ولا إيه 

ام علي / تعيش يا خويا بس قصدي ان الشهقة مش بتخرج وبتعب في النفس

ادهم بتفكير / طب سمعيني الشهقه كده وااااا

قاطع حديثه ضرب احد رجال الشرقاوي له ففرك فكه بغضب وقال / طب يا أم علي ابعتيلي الشهقه في ريكورد بقي عشان فيه شويه ****  عايز اسمع شهقتهم

ثم انقض عليهم بغضب هو وسليم والذي يبدو أنه يستمتع كثيرا بما يفعل بينما كان كريم يجلس أرضا ببرود وهو يشاهدهم ويمسح نظارته ويقول / صحيح الشلة اللي مفيهاش صايع حقها ضايع،، شوية متشردين 

ام علي من البلكونه / يا دكتور ادهم مقولتليش رقمك كام يا خويا عشان ابعتلك علي الواطس 

نظر لها ادهم بغباء ففوجئ بلكمه تلقيه أرضا فنهض وهو يجز علي أسنانه ثم اقترب من الشاب الذي ضربه وصفعه بشده/ الا الوش يا حيوان انت 

ام علي من الأعلي / خلاص يا دكتور بعتلك فيس يا خويا اقبل بقي طلب الصداقه هتلاقيه باسم (عايشة فلة وبحب قُلة) 

ادهم وهو يجذب شخص من رقبته ثم ينظر لها للاعلي / طب وابو علي عارف 

ام علي بتعجب / عارف ايه 

ادهم بضحك وهو يضرب الرجل برأسه / انه قُلة 

ام علي بجدية / اكيد يا خويا مش بخبي عليه حاجه حتي هتلاقيه في الأصدقاء عندي اسمه (شارب كُولا ومتجوز حوله) 

ضحك شادي بشده / انتم عاملين الفيس تلقحوا علي بعض ولا إيه 

سليم وهو يلقي الشرقاوي أرضا بعدما انتهي منه / شوف كده يا شرقاوي ظفرت ايدي وانا لسه متعقم قبل ما اجي 

نظر ادهم للأعلي / عنيا يا ام علي هقبل الادد 

ام علي بتعجب / يطلع ايه الباد (الادد) ده يا خويا 

كريم وهو يجلس أرضا بضحك / الباد ده هو اللي علمك تمسكي تليفون يا ام علي ربنا يسامحه 

ضحكت ام علي / بس ياواد منك ليه انتم بتتريقوا طب ده انا بقي عندي انستغرام 

شادي وهو يغمز لها ويشير بيده بعلامه المكالمه / ابعتلي باد علي الانستا يا ام علي خلينا نشوف حوار القُلة

ادهم وهو يضرب شادي علي رقبته / حتي ام علي يا جاحد 

شادي وهو يفرج رقبته ويغمز له / ومالها ان علي بس دي حتى فلة

ضحك كريم بشدة /وفي رواية اخري حوله 

جذب ادهم كريم  وهو يلكمه في وجهه / امشي ياض قدامي يا جايبلنا المشاكل 

كريم وهي يضع يده علي فكه بألم / يا خي يلعن 

ثم صمت وهو يقول / بدأت أخلاقي تبوظ بسببكم 

ثم سار بحنق وخلفه باقي العصابه تاركين الشرقاوي ورجاله مسطحون أرضا بطريقه تجعل اي شخص يفكر قبل الاحتكاك بعصابه الحى 

ضحك شادي وهو يضرب سليم في كتفه / عاش ياوحش 

سليم بضحك وهو يجذب رأسه أسفل ذراعه / ما شاء الله عليك بلطجي صغنن 

ضحك شادي ركاد يجيب لولا مرور احدي الفتيات امامه فصفر باستمتاع وهو يقول / يا أرض انهدي ما عليكي قدي العب يا باشا 

نظرت له الفتاة وضحكت بصوت عالي  بوقاحه فقال / الله ما احنا جامدين اهو أمال فيه إيه بس ليه التقل ده انتي زيرو كام طيب 

جذبه سليم بعنف اكثر وهو يقول / يا أخي ارحم نفسك شويه ده تليفونك لو يعرف كان تف علي 

نظر لهم ادهم وضحك عليهم ولكن فجأه توقف وهو ينظر حوله بشك فنظر الجميع له بتعجب فاشار لهم وهو يتحدث بنبره مخيفه / اخدتوا بالكم

كريم وهو يمسح فمه بتأوه / من ايه! ؟؟

ادهم وهو يتحرك بخفه وضيق عينه بشك ثم وقف امام احدي نوافذ المنازل المتلاصقة وتحدث بشر / ام أشرقت بتعمل ام علي

شادي بصدمه / وأم أشرقت مالها بأم على تكونش عينها علي القُلة بتاعتها 

ضربه سليم الي رقبته من الخلف / قصده ام علي الحلويات يا غبي

ابتسم شادي بغباء / منا عارف

كريم بتذمر / من ورانا يا ام أشرقت مكنش العشم

ضرب ادهم علي النافذه وهو يصيح / افتحي يا ام أشرقت خلاص اتقفشتي وسرك بان افتحي بقولك وإياكي تخبي الام علي الشباك كله محاصر 

فتحت ام أشرقت النافذه بتوتر وهي تقول ببسمه / دكتور ادهم

ادهم وهو ينظر لها بدقة / آه يا ختي دكتور ادهم اللي بتخبي عنه ام علي فين يا ولية انتي نصيبي من ام علي

ضحكت ام أشرقت وهي تقول ببشاشه / كنت هبعتلك البت أشرقت بنصيبك انت والشباب لما اخلص

ضحك شادي وهو يجذب كريم / تعالي يابني اشوف وشك ده لحد ما ادهم يجيب ام علي

سليم / هروح اشوف ام احمد لحد ما تخلص ومتنساش نصيبي يا أدهم 

ثم غادر وتركوا ادهم وهو يتخصر امام النافذه ويقول / هاتي يلا الضرايب ومرة تانيه تعملي من غير ما نعرف هخليها صينيه مش بس طبق امين عشان انا مش نايم غلي عيني وشوفت البت نوسه الصغيره رايحه تجيب الطلبات من المحل اللي تحت بيتي 

ام أشرقت وهي تنادي علي أشرثت / لا يا خويا علي إيه الطيب احسن.... بت يا أشرقت اجري يابت هاتي طبق ام علي اللي مجهزاه علي الرخامة يابت

ثم نظرت لادهم وهي تقول ببسمة / هو أنا ممكن انساكم يا ضنايا ده انتم من وقت ما كنتم عيال وانا دايما كنت بعملكم ام علي بأيدي

ثم ناولته الطبق فأخذه وهو يتذقه باستمتاع شديد وهو يقول / ام علي بتاعتك ده رهيييبة والله

ابتسمت ام أشرقت بفخر / عيب عليك دي بقت صنعة من كتر ما عملتها

ابتسم ادهم بانتصار وهو يقول بحاجب مرفوع / متتكررش تآني يا ام اشرقت

ثم كاد يرحل ولكن عاد مجددا وهو يقول بتذكر / صحيح جبتي للبت اشرقت الجذم ولا لسه

تحدثت ام أشرقت بخجل / آه يا بني  تعيش يارب

نظر لها ادهم وهو يضيق عينه / انتي بتكدبي يا ام أشرقت

توترت ام أشرقت من نظراته / لا مهو انا فعلا جبتلها جذمتين

ابتسم ادهم وهو يخرج بعض الاموال من جيبه ويضعهم في يدها / امسكي يا ختي  ومش عايزين كدب تآني ماشي خلي البنت تتجوز ونخلص عشان ناكل نصيبها في ام علي

نظرت ام اشرقت الأموال بخجل وهي تتحدث بحزن / ملوش داعي يا أدهم يابني كل شهر كده تيجيب نص مرتبك يابني هتعيش إزاي

ادهم وهو يأكل من ام علي بعدم اهتمام / ياستي سيبيها علي ربك بتعزم شويه عند الواد شادي وشويه عند كريم وشوية عند سليم ربك بيدبرها وهما مش بيرضو يخلوني اكل لوحدي فكل يوم باكل عند حد ولو صدفت يوم واكلت في شقتي باكل اي حاجه موجوده يعني الفلوس مش بعمل بيها حاجه يبقي ليه نركنها واختي بتجهز ولما اتجوز بقي هتحمل المسئولية واخدها ونتعزم برضو عند أي حد 

دمعت عين ام اشرقت وقالت من بين ضحكتها/ وقتها هزود حساب فرد في ام علي

ادهم وهو يقترب منها ويهمس / طب متزودي حساب فرد واعتبريني اتجوزت

ضربتخ ام أشرقت علي كتفه / مش هتبطل طفاسه

ادهم وهو يسير ومازال يأكل في طبق ام علي / لا مش هبطل

ثم اتجه للعماره وصعد وأثناء طريقه للأعلي وجد باب شقه شادي مفتوح طرق الباب فسمع صوت شادي دخل الشقه وهو يحمل الطبق فهجم عليه الثلاثه ليأخذوا نصيبهم ولكن وجدوا الطبق فارغ تماما فنظروا له بتعجب / فين ام علي

نظر ادهم للطبق بتعجب وبراءه / الله كانت في الطبق هنا والله راحت فين 

نظر له الثلاثه بغيظ وغضب فقال ادهم / مش مصدقين طب والله كانت هنا

كاد سليم يجيبه لولا سماعهم لصوت صراخ يأتي من داخل المنزل

ركض شادي برعب وهو يصرخ / شاديه ولعت في البيت

ركض الثلاثه وراءه ولكن وقفوا امام المطبخ وهم ينظرون بتعجب لما يحدث فنحدث كريم وهو يخلع نظارته ويمسحها ثم وضعها مجددا وهو يقول بصدمه / ايه ده..... 


دي بقي بداية قصه جديده شوفنا انهارده بعض الشخصيات اللي هنتعامل معاها وشوفنا بعض العلاقات اللي هنعيشها مش عارفه إذا كان البارت عجبكم او لا 


بس إللي انكم لسه مشوفتوش حاجة خالص واللي جاي مش حمادة لا اللي جاي عيلة حماده كلها 

مستني رأيكم في أول بارت وهل عجبكم ولا لا 

ورايكم في كل شخصيه 

دمتم سالمين  ❤️



الفصل الثاني من هنا



🌺🌹🌺🌹🌺🌹🌺🌹🌺🌺🌹🌺🌹🌺🌹🌺🌹🌺

الصفحه الرئيسيه للمدونه من هنا

🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹



اللي عاوز باقي الروايه يعمل متابعه لصفحتي من هنا 👇👇


ملك الروايات



لعيونكم متابعيني ادخلوا بسرعه


👇👇👇👇👇


جميع الروايات الكامله من هنا





تعليقات



CLOSE ADS
CLOSE ADS
close