في _الفندق
البارت الأول حتي البارت الخامس والأخير
بقلم أميره أسامه
كامله على مدونة النجم المتوهج للروايات
((محاوله إقناع))
بسم الله الرحمن الرحيم..❣️
هناء...ياااه أخيرا خلصنا اول أمتحان بقول ايه يلا يابنات نخرج ناكل أي حاجه انا جعانه اوي وحاسه اني صدعت هتجنن وانام.
أماني...يابنتي أعتقى شويه أنتي علي طول جعانه كده وبعدين نوم ايه بس انتي تلت ارباع المحاضره كنتي نايمه.
مني..متوجعيش قلبك معاها يا اماني دي مش وراها غير الاكل والنوم.
مي...احلي حاجه ان انهارده خلصنا من ارخم ماده عقبال الباقي يارب ونخلص باقي الامتحانات علي خير .
احلام....اه الحمد لله احسن الواحد تعب بجد علي قد ما السنه دي كانت بتجري بس انا حاسه ان هي كانت مليانه تفاصيل.
مني....ياختي بلا تفاصيل بلا تفصيل اهي خلاص هتخلص الحمد لله وعشناها بالطول والعرض خلينا بقي في المهم
اماني...وايه هو بقي المهم؟
مني...الرحله انتوا مش شوفتوا الورق اللي متعلق عليها ماتيجي نروح والنبي انا علي أخري ونفسي أغير جو واسافر
مي...انتي اتهبلتي سفر ايه هو انتي فاكره ان ماما وبابا ممكن يوافقوا ولو فرضنا انهم وافقوا تفتكري خالد هيوافق.
مني...بعصبيه بت انتي خالد ايه و بتاع ايه هو انا كل ما هقولك حاجه هتقوليلى سي خالد هيعترض هنقنع ماما وبابا يا مى وهنطلع الرحله أما سى خالد ده بقي تفكك منه خالص ولو عالدبله ارميها في وشه.😡😡
أماني....بضحك مالك يابت يابت انتي ايه مبتتهديش هو مش خطيبها وبعدين مالك مش طيقاه كده ليه أيش حال أن ماكانش ابن خالتك.😂😂😂
مي...بضحك قوليلها والنبي احسن دي مجنونه الله يهديها.
أحلام...بضحك انا بجد مش فاهمه ازاي انتوا أخوات🙈
مني...مالنا يا اختي ان شاء الله؟
أحلام...انتي مجنونه وهبله ومي عاقله كده وراسيه.
مني...وايه كمان يا ست لوما🤔
أماني...نسيت أهم حاجه انك بتغيرى على مى من خالد😂😂
مى..والنبى ما تجيبى سيره الغيره أحسن تتحول علينا اكتر ماهي متحوله😂
مني...بزعل بقي كده😔
باستها مي من خدها يالهوي مقدرش انا علي زعل التوينز بتاعي😍
هناء....والنبي انتي وهي خلصوا يلا نطفح جعانه يابشر😭
أحلام...😂😂😂طب يلا يا بنات نروح ناكل و نكمل كلامنا هناك قبل ما نخرج نشتري الملازم عشان هناء صعبت عليا.
هناء...بضحك ان شالله يخليكي😂
وصلوا البنات الكاڤيتريا وبدأوا ياكلوا.
مني...ها يا بنات قولتوا ايه.
مي...انا قولتلك يا مني مش هينفع
ميتهيأليش بابا وماما هيوافقوا ده احنا عمرنا ما عملناها.
أماني...بضحك كملي سكتي ليه ياخوافه وخالد😂😂
مي...بضحك يابت انا مصدقت سكتت بتفكريها ليها بس.
مني...طيب بصي ماما وبابا سيبيهم عليا وانا هقنعهم انتي بقي اقنعي خالد اللي مايتسمي ده ولو مقتنعش هعصر علي نفسي لمونه واكلمه انا وخلاص😒
مي....هنشوف مع اني واثقه من رد التلاته🙄
مني...😏بومه.
ضحكوا البنات كلهم علي مني.
هناء..انا بصراحه مش عارفه ماما وبابا هيوافقوا ولا لا ولو وافقوا انتوا عارفين حنان اختي لسه متجوزه من كام شهر وسافرت مع جوزها وماما من وقتها وهي متأثره وحزينه هسيبها انا كمان.
مني...يا اختي ما خالتك ساكنه فوقيكم هي وعيالها يعني مش هيسيبوها انتي بتتلككي يا هناء صح😒
هناء...بضحك بصراحه اه😂😂 انا اسمع ان مرسي مطروح دي بعيده وانتي عارفه انا ركبي وضهري مايقدروش علي تعب السفر وقاعده الباص.
مني...يابت مالك عامله فيها زي الست المسنه كده ليه ضهري ركبي عضمي .
امامي...بضحك بت يامني اراهنك لو فتحتا شنطتها الوقت هنلاقي فيها فكس او ڤولتارين😂😂
هناء...بضحك والنبي ما بمشي من غيرهم😂😂
اماني...ماكدبتش انا؟؟😂😂
مني...ابو شكلك يا شيخه بت بقولك ايه طلعتي نزلتي هتطلعي يعني هتطلعي انا قررت خلاص.
هناء...خلاص هقول لماما وبابا انهارده.
مني...معاكي وقت لسه الرحله هتبقي بعد الامتحان علي طول تقريبا تاني يوم ما نخلص.
اماني...لا تالت يوم.
مني...😒مش هتفرق ياست الدقيقه المهم انها بعد الامتحان علي طول. هتنيلى ايه انتي كمان
انتي والبت احلام.
اماني...والله انا نفسي وبصراحه عايزه اطلع انتي عرفاني بحب الجنان زيك عموما هفاتحهم انهارده واشوف كده هيقولوا ايه.
مني...اشطا اهي دي الصحاب اللي بجد.
احلام...بأرتباك طيب ما تخلونا هنا ونخرج مع بعض في الاجازه احسن ابه اللي يخلينا نسافر بعيد
مني...يابت انتي علي طول خوافه كده ومتوتره هيحصل ايه يعني دي رحله تبع الجامعه معسكر للبنات وبس يعني محدش هيضايقنا وهيكون لينا شاطئ خاص ولو حبينا نخرج بليل هيكون معانا مشرفين اكيد.
احلام...انا بت تر من اي مكان بعيد بصراحه وبردوا مش عارفه ماما هتوافق ولا لأ ولو وافقت نعرفش اخويا علاء هبوافق ولا لا
مني....وهيرفض ليه ان شاء الله ده كمان🤔
احلام...انتي عارفه ان هند مراته سوسه ومش بطيقني ولا بطيقها ولو قال قدامها علي حوار الرحله ده مش هتسكت وهتفضل تحقنه عليا وهيرفض.
اماني...متزعليش مني يا احلام اخوكي ده ماشي ورا مراته بطريقه رخمه.
احلام...فعلا هند هي اللي ممشياه وبتقويه عليا مع اني والله بحاول أتجنبها خالص ومليش معاها كلام اوي بس هي بتغير مني اوي وبتفرح لما بيعترض علي اي حاجه تخصني.
مي...بس المفروض انك اخته يا احلام وعارفك وعارف طباعك والمفروض ميمشيش ورا كلام مراته.
أحلام...بحزن علاء اخويا عمره ما كان كده والله با مي طول عمره حنين وطيب اوي ومازال علي فكره بس هي اللي بتأثر عليه من وقت ما بابا اتوفي من سنتين وعلاء قرب مني اكتر بكتير عن الاول وكان بيحاول يعوض وجود بابا عشان هو عارف انا كنت متعلقه بيه قد ايه هي بقي غارت من العلاقه دي ومابتصدق اي حاجه تحصل تحشر مناخيرها فيها.
مي....ربنا يهديها
احلام...يارب..عموما انا هحاول برضوا يا مني وان شاء الله يوافقوا.
مني..طيب ياريت ننجز اخر معاد لدفع الفلوس بعد اربع ايام
البنات...ان شاء الله.
مي...طب يلا بينا بقي نشتري الورق بتاع الماده الجايه.
البنات...يلا بينا.
.............
وصلت مي ومني لمنزلهم وكالعاده دخلت مني بالجنان بتاعها.
مني...السلام عليكم يا أهل الدار احنا جينا انتوا فين.
مي...يابنتي وطي صوتك شويه بقي.
مني...ياشيخه اوعي كده يا سمعه يا حاج إسماعيل يا نودي.
ناديه...خرجت من المطبخ انتي يابت علي طول عامله دوشه كده
مي....ازيك يا ست الكل
ناديه...الحمد لله يا حبيبتي
إسماعيل...شقى عمري وصلوا ♥️
مي...بأبتسامه هاديه عامل ايه يابابا.
إسماعيل....في نعمه ادام انتي واختك بخير.
قربت منه مني وحطت ايدها علي كتفه كنت بتعمل ايه في المطبخ يا سمعه🤨
ناديه...يابت أحترمي نفسك شويه.
إسماعيل...بضحك كنت بساعد ناديه في الغدا عشان تيجوا تاكلوا
مي...هروح اغسل ايدي واجي اساعد حضرتك.
إسماعيل استني هنا طمنوني الاول حليتوا كويس.
مني...في ايه يا سمعه هي نودي طيرت عقلك ولا ايه مش كلمناكم طمناكم علينا.
ضربها اسماعيل بضحك علي راسها يابت بطلي لماضه عايز اطمن تاني انا حر 😂
مي....اطمن الحمد لله حلينا كويس جدا ادعولنا بس بس الايام اللي جايه تكون حلوه كده ونخلص علي خير
ناديه...يارب ينجحكم واشوفكم احسن الناس.
إسماعيل...ان شاء الله هترفعوا راسي انا وامكم وربنا هيكرمكم علي قد تعبكم.
مني...طيب يلا بقي نخلص عشان عايزنكم في موضوع كده بعد الاكل🙄
ناديه...استر يارب🙈
إسماعيل...موضوع ايه
مني...الله مش قولنا بعد الاكل يا سمعه لا انت حالتك كده ميتسكتش عليها.
إسماعيل...بضحك طب امشي بقي يابت يارخمه.😂😂
جريت مني من قدامه ودخلت مي تغسل ايدها عشان تساعد ناديه.
......
بعد ما خلصوا الاكل وعملوا الشاي.
ناديه...ها ايه الموضوع اللي كنتوا عايزنا فيه.
مني....صلوا علي النبي.
ناديه...انتي هتحكي حدوته.
إسماعيل...بضحك عليه أفضل الصلاه والسلام.
مني...ضحكت ضحكه هبله وبصت لمي اصل مي كانت عايزه تقولكم علي حاجه.
مي...😳😳انا والله ما حصل دي هي.
مني...من اول قلم كده بتعترفي😒.
إسماعيل....يابت اخلصي بدل ما اتعصب عليكي في ايه.
مني...طيب بص انا هقول الكلام دفعه واحده ومتقاطعونيش هخلص وهقوم اجري بسرعه🙄
ناديه...انا قولت فيها مصيبه.
إسماعيل...😂😂😂تقومي تجري يا جبانه بدل ما تواجهي
مني...الامر ما يسلمش برضوا يا حاج وبعدين نودي ايدها ماشاء الله فيها صحه تهد جبال.
ناديه...😳انتي يابت بتحسديني اخلصي انطقي بدل ما اوريكي ايدي بصحيح.
مني...خلاص هتكلم...احممم بصراحه بقي كده الجامعه عندنا بعد الامتحان علي طول عامله رحله لمرسي مطروح معسكر للبنات بس وهيكون في شاطئ خاص ومعانا مشرفين بنات وهيطلعوا معانا امن من الجامعه
وانتوا عارفين اننا تعبنا جدا في السنه دي و نفسنا نروح الرحله دي
احنا بقالنا اكتر من ست سنين مروحناش اخر مره روحنا مصيف كنا في اعدادي وبجد نفسنا اوي نجرب رحلات المعسكر دي اوي
المفروض اخر معاد للدفع بعد اربع ايام والرحله مدتها اسبوع انا قولت كل اللي عندي يلا سلام عليكم.
إسماعيل...تعالي يابت اقعدي هنا
مني...بترقب 🙄مين فيكم هيضرب الاول.
ضحك إسماعيل ومي غصب عنهم😂😂😂
ناديه....انت بتضحك علي ايه يا اسماعيل بدل ما تلطشها قلمين علي وشها.
مني...ليه بس يا ماما.
ناديه....هو ايه اللي ليه رحله ولوحدكم يا مني انتي اكيد بتستعبطي.
مني...ياماما دي مش اول رحله الجامعه تعملها وكل اللي راحها اتبسط جدا فيها وقالوا انها امان والمشرفين مش بيسيبوهم وبعدين احنا مش اطفال وانتوا بتثقوا فينا.
ناديه...مش موضوع ثقه يا مني اكيد بنثق فيكم يا حبيبتي بس انا اخاف عليكم.
إسماعيل....انتي عارفه يامني احنا بنثق فيكم ازاي بس زي ما ماما قالت احنا نخاف عليكم حتي لو كبرتوا وبقي غندكم ميت سنه برضوا هنفصل نخاف عليكم وهتفضلوا في عيننا لسه صغيريين.
مني...ميت سنه وهنفضل في عينكم صغيرين وهو انت ياحاج عايز تعيش انت ونودي لحد ما يبقي عندنا ميت سنه🙄
كتمت مي ضحكتها علي خفه دم مني🙈🙈
ناديه...شوف الجزمه دي اللي علي طول قلباها هزار😡
مني...بضحك طيب اعمل ايه بس يا نودي ماهو سمعه اللي بيضحكني.
إسماعيل...وانتي أيه رأيك يا مي ساكته ليه؟
مي....بهدوء وعقل والله يا بابا انا قولتلها من الاول ان انت وماما مش هتوافقوا.
مني...😒استني عليا ندخل بس اوضتنا
مي...🙄🙄
إسماعيل....طيب وخالد يا مي هيوافق.
مني....وهو ماله سي خالد اللي طلعلنا في البخت ده هو ملهوش كلمه عليها اصلا😡
ناديه...يابت انتي علي طول قارشه ملحه ابن اختي كده ليه وبعدين مالك يا إسماعيل بتتكلم علي اساس أننا وافقنا ليه.
إسماعيل...استني بس يا ناديه.
مي...انا بصراحه يا بابا قولتلها برضوا ان خالد ممكن يرفض.
مني...ويرفض ليه هو ماله😡
إسماعيل....مني نتكلم بجد شويه بقي خالد اه خطيبها وملهوش لسه حكم عليها لانها لسه في بيت ابوها بس كمان يا بنتي هو خطيبها وإن شاء الله هيجي يوم ويبقي جوزها واي وقت مي هتعمل اي حاجه من غير رضاه لما تتجوز هيفضل فاكرهلها وممكن يعند معاها عشان يعوض النقص اللي هي حسسته بيه في فتره الخطوبه.
كل حاجه يا بنتي بالرضا بتبقي حلوه لازم يكون في بينهم حوار ومناقشه تقنعه باللي هي عيزاه وهو يوافق بحب انا قادر اخليها تعمل كل حاجه هو يرفضها بس خالد شاب محترم ومتدين وبيحب اختك والاهم من كل ده انه راجل بجد والراجل يابنتي لما بيتجبر علي حاجه بيفضل شايلها جواه.اه مينفعش يحكم رأيه علي زياره عائليه مثلا او مشوار يخصني انا او امك لكن حاجه تخص صحابها خروجها لازم تديه البرستيج بتاعه بمعني اصح تحسسه برجولته تعرفه انها عايزه تعمل كده بس مستنيه انه يكون راضي.لتنه لو مش راضي لاهو هيكون مبسوط ولا هي هتكون مبسوطه ومش هتعرف تتبسط فهمتي حاجه.
مني...باقتناع رغم ان غيرتها واضحه ايوه فهمت بس كمان.
قاطعها إسماعيل...مني انا عارف ان بتحبي اختك اوي ويمكن حبك ليها اكتر بكتير من اي علاقه بين اتنين اخوات لان انتوا توأم بس انا بلاحظ انك علي طول مضايقه منه رغم انكم كنتوا صحاب جدا لحد قبل ما يخطب مي شيلي من دماغك فكره انه هياخد اختك منك انتوا اخوات ومفيش اي حد ممكن يفرقكم عن بعض مهما حصل وانتي عارفه ان خالد محترم وبيحبنا جدا وكفايه ان اختك بتحبه ومبسوطه معاه.
مني...والله يا بابا انا بحب خالد جدا وبعتبره اخويا بس فعلا بغير منه علي مي نزلت دموعها غصب عنها...مش قادره اتخيل ان ممكن حد يشاركني فيها.
حضنتها مي...انتي عبيطه يا مني اللي بيني وبينك اقوي بكتير من اللي بيني وبين خالد انتي اختي وبنتي وصحبتي وتوأمي.
ناديه....لكره انتي كمان تتخطبي وتعرفي ان حبك للشخص اللي هتكملي معاه حياتك ملهوش علاقه خالص بحب الاخوات.
إسماعيل....طيب نرجع بقي لموضوعنا الاساسي بصي يا مي عرفي خالد ولو وافق انا معنديش اي اعتراض.
ناديه....انت بتتكلم جد.
إسماعيل....اه يا ناديه البنات مش بيخرجوا خالص وتعبوا جدا في المذاكره والحمد لله كل سنه بيطلعوا بتقدير كويس وزي ما مني قالت بقالهم كتير اوي مسافروش.
قامت مني باسته من خده بحب ربنا يخليك لينا يا احلي واحن اب في الدنيا.
ناديه...لا ياشيخه🤔
مني....ويخليكي لينا يا احن نودي في الدنيا متخافيش بقي كل شويه هنكلمكم ونطمنكم علينا والله العظيم ولو علي البحر انتي عارفه اننا مش بنعرف نعوم يعني كبيرنا جردلين ونقعد نحفر علي الرمل😂😂.
إسماعيل....سبيهم بقي يا مني خليهم يتبسطوا .
ناديه....ايوه بس انت عارف الظروف يا إسماعيل عامله أزاي.
مني...لو علي الفلوس متحمليش هم يا ماما الرحله بألف و200 جنيه واحنا محوشين فلوس ومش هنكلفكم اي حاجه.
إسماعيل...بس يا عبيطه الفلوس بتاعتكم خلوها معاكم مي بس تقول لخالد ولو وافق بكره ان شاء الله هجيبلكم الفلوس تدفعوها وان شاء الله من هنا لحد ما الامتحانات تخلص هكسرلكم مبلغ كده علي جنب تخلوه معاكم مع فلوسكم.
مي....ربنا يخليك لينا يا بابا
مني...انت احسن اب في الدنيا بحبك اوي والله العظيم🥺
ناديه...بأبتسامه وقله حيله.هقول ايه بعد كلامك ربنا يخليك ليهم وميحرمكوش من بعض.
إسماعيل...بحب يارب...يلا قوموا علي اوضتكم عشان تذاكروا.
مني...لا نذاكر ايه نكلم سي خالد الاول🙄🤔
إسماعيل بضحك...مفيش فايده😂
.......
دخلت مني ومي اوضتهم ونطت مني جمب مي وهي بتكلم خالد
وفضلت قاعده جمبها بعد ما مي سلمت عليه وبعد كلام الحب مني كانت قاعده جمبها عايزه تولع فيهم وتقولها اخلصى😡
فتحت مي الكلام مع خالد وطلبت منه انها تروح الرحله.
مي....ها قولت ايه يا خالد🙄
بص لو مش موافق انا مش هزعل والله انت عارف اني مش هعمل كده غير لما تكون راضي
مني...😡😡🙄
خالد...بهدوء انتي عارفه طبعا اني بخاف عليكي وبغير عليكي وعارفه كمان اني مقدرش ارفض طلب ممكن يخليكي مبسوطه.
مي...ايوه بس مش عشان اكون مبسوطه انت تكون مضايق.
خالد...لا يا حبيبي انا عمري ما هكون مضايق وانتي مبسوطه كل الحكايه هو خوف عليكي مش اكتر.
مي....متقلقش ده معسكر للبنات بس والله وشاطئ خاص بينا هيكون قريب من الفندق اللي هنبقي فيه ومعانا مشرفين بنات
خالد.....امممم يعني من الاخر عايزه تروحي.
ابتسمت مي بأحراج بصراحه اه يمكن انا قولت لمني بابا وماما وخالد مش هيوافقوا بس لما بابا وماما وافقوا بابا كان شرطه الوحيد انك توافق وانا بصراحه قولت انك مش هتوافق مع اني من جوايا كان نفسي توافق بصراحه انا محتاجه اغير جو جدا بس زي ما قولتلك والله ما هضايق لو رفضت وعارفه كمان انك هتعوضني ❣️
مني...😏😏بصوت واطي طبليله اوي والنبي نفسي اطبق في زماره رقبتكم انتوا الاتنين.
كتمت مي ضحكها غصب عنها وفضلت تتحايل عليها تسكت🙏🏻🙏🏻🙈
خالد..بحب وانا موافق يا مي روحي يا قلبي واتبسطي بس بشرط.
مي...بفرحه ايه هو.
خالد....تخلي بالك من نفسك وكل شويه تكلميني
مي....حاضر والله ربنا يخليك ليا يا حبيبي.
مني...بصوت عالي وبفرحه وافق.
هزت مي راسها بسعاده.
مني...ابن خالتي حبيبي سبب سعادتي في الدنيا روح إلهي يسعدك يارب😂😂😂
خالد....بضحك افتحي الاسبيكر
فتحت مي الاسبيكر...اتكلم
خالد....علي الله يا استاذه مني تكوني راضيه عليا.
مني...بضحك راضيه بس طب تصدق انا طول عمري اقول عليك انك جدع وديما اوصي مي عليك حتي أسألها.
خالد...بضحك من غير ما أسألها يا غاليه عارف شعورك من ناحيتي كويس اوي😂😂🙈
مني...🙄🙄هو مش مصدقني.
مي...بضحك لا ولا انا ولا حتي انتي مصدقه نفسك😂😂
مني...طب وربنا انا بعزه وهو عارف بس اعمل ايه بغير عليكي من اي حد 😭
خالد....وانا ياستي مش زعلان وعارف كمان انك بتعزيني المهم تخلوا بالكم من بعض
مني...ده انا هحطهالك في عنيا😍.اجري انا بقي ابلغ سمعه
مني...يا سمعه يا سمعه.
ضحكت مي وخالد عليها وكملوا كلام.
............
محاولات الاقناع كانت لسه مستمره بين البنات وأهاليهم.
عند اماني..
هدي...بس يا بنتي انا هفضل قلقانه عليكي.
اماني...والله يا ماما ما تخافي هكلمكم كل شويه وهديكي ارقام صحابي كلهم عشان لو اي وقت مسمعتش الموبايل تكلميني علي حد فيهم وتبقي متطمنه.
اشرف....طيب مبدأياً كده انا موافق بس بشرط.
اماني...بفرحه انا موافقه علي اي حاجه.
اشرف...تاخدي ياسمين معاكي.
ياسمين...بفرحه بجد خديني والنبي يا اماني.
اماني...ايوه بس كده هتبقي مصاريف اكتر علي حضرتك
اشرف...ملكيش دعوه بالفلوس مستوره الحمد لله اهو منها ابقي مطمن ان معاكي اختك ومنها ياسمينا تغير جو انتي عارفه هي متعلقه بيكي قد ايه ومش هاقدر علي غيابك اسبوع.
هدي...يعني ياسمينا يا اشرف اللي عندها عشر سنين اللي هتاخد بالها من أماني.
اشرف...اكيد لا بس عالاقل هتبقي امانب هتبقي مشغوله بيها وخايفه عليها لا هتقدر تسيبها وتدخل في البحر من جوه ولا هتقدر تتجنن.
اماني...بضحك اه يعني من الاخر عايزها تلخمني.
اشرف...بضحك هو ده ذكيه زي ابوكي.
اماني...بفرحه عموما انا موافقه ربنا يخليكوا ليا يارب وميحرمنيش منكم أبدا وبخصوص الفلوس حضرتك ادفعلنا بس تمن اشتراك الرحله لكن اي فلوس تانيه انا معايا وعازمه ياسمينا كمان.
اشرف....بأبتسامه خليها علي الله يلا قومي ذاكري ويوم الامتحان التاني بتاع بعد بكره خدي الفاوس ادفعيها.
قامت اماني باسته وباست والدتها ودخلت اوضتها وهي طايره من السعاده عشان تذاكر وتستني مكالمه من صحابها وتعرف وصلوا لأيه.
.......
عند هناء.
هناء...احلي فنجان قهوه في الدنيا والحمد لله طلع بوش.
عبد الرحيم...بضحك طبعا فضلتي واقفه جمبه عشان الفنجان يظبط عشان ليكي مصلحه.
هناء...بضحك طب يه قولت ايه بقي يا عبدو.
وفاء....وافق بقي ياعبده متذلش البت اكتر من كده.
عبد الرحيم....خليني أذلها براحتي مره من نفسي.
هناء....بقي كده يا عبدو طب ده انا قولت انت اللي هتوافق وماما لا.
وفاء....ادام صحابك هيطلعوا معاكي هبقي مطمنه عليكي دول بنات محترمه وكويسين.
هناء...يعني مش هتزعلي يا ماما لو روحت وسبتك
وفاء....لا مش هزعل وبعدين حوشي النشاط والمساعده اللي هتحرميني منهم يابت ده انتي نص حياتك نوم والنص تاني اكل😒
هناء....يرضيك الكلام ده ياعبدو.
عبد الرحيم...يرضيني طبعا عندها حق عموما روحي ياستي اهو عالاقل نقضي اسبوع كده من غيرك
هناء....اااه قول كده بقي جوزتوا حنان وعايزين تخلصوا مني اسبوع بحاله.🤨
عبد الرحيم....لو معترضه نلغي الموافقه
هناء...لا وعلي ايه الطيب احسن
عبد الرحيم....بأبتسامه تخلي بالك من نفسك وكل شويه تطمنينا عليكي.
هناء...بفرحه حاضر وقامت باستهم وجريت عشان تبلغ صحابها.
.......
عند احلام كانت هي اخر واحده فاضله في مهمه الاقناع المستمره.
احلام....ها يا ماما قولتي ايه
سميره...قولت لا إله إلا الله يابنتي انا معنديش اعتراض بس اخوكي زمانه جاي الوقت هيعدي علينا قبل ما يطلع لمراته عرفيه وشوفي هيقولك ايه بس بصراحه انا قلقانه انتي عمرك ما خرجتي لوحدك يا احلام ده لو عوزتي طرحه بتاخديني معاكي وبتخافي تروحي لوحدك ومش بتعرفي هتقدري تسافري لوحدك
احلام....يا ماما صحابي هيبقوا معايا وبعدين متقلقيش يعني انا مش خوافه اوي كده كل الحكايه اني مش بعرف امشي لوحدي ببقي متوتره لكن انا عادي يعني اعرف اتعامل.
سميره....ماشي يا احلام عموما انا قولتلك اني موافقه بس انا مش هقدر اديكي فلوس كتير يادوب فلوس الاشتراك وهديكي مبلغ صغير تخليه معاكي عشان لو احتاجتي حاجه
احلام....لا يا ستي انتي عارفه اني شايله 5 الاف جنيه من الجمعيه اللي عملتها انا وصحابي وشيلاهم من ساعتها مصرفتش منهم اي حاجه هدفع منهم فلوس الاشتراك والباقي هخليه معايا.
سميره...يجي بس علاء ويوافق ويحلها الحلال.
فضلت احلام مستنيه علاء لحد ما جه وبدأت احلام تقوله طلبها وهي خايفه ومتوتره احسن يرفض.
علاء....بس يا احلام مرسي مطروح بعيده وانتي عمرك ما خرجتي لوحدك.
احلام...متخافش والله ياعلاء صحابي معايا وهي رحله بنات بس يعني ومعانا مشرفين وامن متخافش والله عشان خاطري وافق وانا معايا مبلغ شيلاه علي جنب يعني مش هغرمكم اي حاجه.
علاء....هو انا بتكلم علي الفلوس الوقت انتي عارفه اني عمري ما اعز عليكي اي حاجه.
احلام...عارفه والله يا علاء
علاء..عموما ياستي خلاص موافق
وأمري لله.
احلام بفرحه قامت حضنته بجد يا علاء.
سميره....بأبتسامه ربنا يجبر بخاطرك يا ابني ويفرحك.
علاء...ويخليكم ليا يارب وعموما ياستي انا بكره او بعده بالكتير هجبلك مبلغ كده تدفعي منه الاشتراك وتخلي الباقي معاكي.
احلام....بفرحه لا انا معايا والله كفايه بس انك وافقت.
علاء....وانا مش هوافق غير لما تاخدي الفلوس عشان تبقي عارفه
احلام...ياحبيبي انت فاتح بيت وعندك مراتك وابنك
علاء....وانتي عارفه انك بنتي الكبيره يا لوما يعني ليكي حق عليا
احلام....بحب ربنا ما يحرمني منك ابدا .بس انا ليا طلب كده عندك ومتفهمنيش غلط
علاء....قولي يا لوما
أحلام....ممكن متقولش لهند خالص علي حوار السفر ده
علاء.....تمام بس اشمعني.
أحلام....بصراحه بقي انت عارف ان انا وهند مش صحاب وعارف كمان ان هي مش هتسكت وهتفضل تكلمك وتعترض وتخليك ترفض
علاء....قصدك ايه يابت هسمع كلامها🤨
احلام...بإحراج لا والله مقصدش كده بس.
قاطعها علاء بأبتسامه متقلقيش يا ستي انا فاهم كويس اوي اللي انتي عايزه تقوليه وشايف كويس اللي بيحصل بس انا بحب اكبر دماغي ومبحبش المشاكل وادام قولتلك هتطلعي متقلقيش مش هغير كلامي حتي لو قالت ايه اتفقنا.
احلام بأبتسامه اتفقنا يا حبيبي.
.........
بلغوا البنات بعض وكانوا مش مصدقين ان الموافقه هتيجي بالسهوله دي كانوا طايرين من السعاده.
عدي يومين ويوم الامتحان راحوا دفعوا الاشتراك وهما مبسوطين جدا.
وعدي حوالي 3 اسابيع لحد ما اخيرا الامتحانات خلصت علي خير وكان فاضل يومين علي الرحله بدأوا يجهزوا نفسهم ويشتروا اللي ناقصهم.
واخيرا جه يوم الرحله البنات كانوا كلهم نشاط وحيويه سمعوا وصايا أهاليهم ودعاويهم ان ربنا يحفظهم وفعلا سافروا البنات مع بعض.. كان طالع المعسكر ده حوالي عشرين بنت.
في الباص اتعرفوا علي المشرفه اللي هتلازمهم طول فتره الرحله.
كان أسمها شيماء شخصيه هاديه وعاقله تدخل القلب بسهوله.
واخيرا بعد تعب السفر وصلوا البنات مرسي مطروح وقعدوا في فندق كان عباره عن ست طوابق 3 نجوم في مكان بعيد عن الدوشه ..مكانش في اي حد ساكن فيه وكانت لسه الدنيا هاديه تماماً
من المصيفين.
طلعوا علي الغرف بتاعتهم كانوا مرهقين جدا من السفر.
مي ومني كانوا مع بعض في غرفه
اماني وياسمين أختها في غرفه
أحلام وهناء كانوا مع بعض.
وبدأت رحلتهم الجميله😍
البارت الثاني.❣️
((انتي مين)) ؟؟
........
طلعوا البنات علي الغرف بتاعتهم
كانوا طايرين من الفرحه وعاملين زي الاطفال اللي طالعين رحله مدرسيه دخلوا علي الغرف بتاعتهم عشان يناموا ويرتاحوا شويه من مشوار السفر .
سابوا شنطهم زي ماهي من غير ما يفضوها وناموا نوم عميق.
بعد حوالي اربع ساعات صحيت مني وبدأت تصحي فيهم كلهم وتخبط علي باب كل غرفه لحد ما اخيرا أستسلموا وصحيوا.
.........
اتجمعوا كلهم في اوضه أحلام وهناء.
فضلت هناء قاعده علي السرير متنحه ومش قادره تقوم .
مني....يابت قومي بقي يخربيت الكسل اللي انتي فيه.
هناء...يابنتي ما انا قومت اهو أسكتي شويه بقي
مني...طيب انا راضيه ذمتكم لو اني عارفه ان الذمه عندكم في ذمه الله🥴
ضربتها اماني علي راسها...يابت اتلمي بقي يعني بنسمعك وبتقلي ادبك.
مني....بضحك حقك عليا يا كبير بس بجد دي منظر واحده قامت وفاقت.
اماني....ده منظر واحده لسه والده ومش قادره تقوم من علي السرير😂😂😂
مني...اهووو قولتش حاجه انا🤔
هناء....وربنا انتوا رخمين يلا يابت انتي وهي بره وبالعند فيكو بقي انا هنام.سحبت الغطاء ونزلت في السرير وغطت وشها.
فجأه مني نطت فوقيها...وانا مش هسيبك قومي يابت لا اجيب شعرك في ايدي😡
هناء....بضحك اااااه خلاص يخربيتك بقره نطت عليا قومت قومت خلاص يا مفتريه.
احلام...بضحك ما كان من الاول😂.
مني...هي كده تحب تتروق😒🔪
اماني....خلاص قلبك طيب يا معلم.
ياسمين....يلا بقي يا اماني ننزل البحر .
اماني....والله يا ياسمينا انا مستنياهم يقوموا
مني...يابت قومي اتحركي يا بروطه.
هناء...ياستي قمت خلاص بس بقول ايه احنا هننزل كده علي لحم بطننا انا جعانه اوي.
مني....يخربيتك مبتفكرش غير في الاكل والنوم.
هناء....الله جعانه ومكلتش حاجه جينا نمنا علي طول من التعب ناكل حاجه قبل ما ننزل
مني...طيب قوموا يلا ألبسوا بسرعه وننزل تحت في المطعم ناكل اي حاجه ونروح البحر وأعملوا حسابكم وشاور بصباعها علي هناء وانتي بالذات تعملي حسابك😒🔪 أحنا جايين أسبوع بس يعني ننسي النوم وننسي الكسل خالص لازم نستغل كل ثانيه بتعدي ولما يا اختي انتي وهي تروحوا بيوتكم أبقوا ناموا براحتكم😡
مي...طيب مش هنفضي شنطنا
مني....لا لما نطلع بليل نبقي نفضيها يلا بقي الوقت متضيعوش وقت.
سمعوا خبط علي باب الاوضه قامت ياسمينا جري فتحت.
شيماء...بأبتسامه صحيتوا يابنات
مني....اه خلاص صحيتهم كلهم.
شيماء...طيب يلا قوموا ألبسوا بسرعه عشر دقايق تكونوا جاهزين عشان هننزل كلنا علبطي البحر.
اماني...تمام يا شيماء.
خرجت شيماء ودقايق بسيطه نزلوا كلهم فطروا في المطعم وطلعوا علي البحر.
وبمجرد ما شافوا البحر جريت ياسمين وهي بتتنطت من الفرح
اما باقي البنات كانوا مش مصدقين من جمال لون المايه وريحه البحر .
احلام...الله المايه شكلها حلو اوي
مي....اوي بصراحه جميله جدا سبحان الله علي الجمال.
مني...طب يلا والنبي البحر بيناديني
هناء...أتنيلي اللي يشوفك كده يقول سباحه عالميه 😒
مني...😒😒انا مش هرد عليكي بس هسيب السمكه البلطي اللي جوايا تثبتلك.
مي...بضحك اتنيلي 😂😂
جريوا البنات علي البحر وأتحولوا من آنسات كبار لأطفال فضلوا يلعبوا في المايه ويلعبوا علي الرمل مع ياسمين بالجردل
مني....بت يا ياسمينا تعالي نعمل حفره كبيره في الرمل وندفن فيها نفسنا
ياسمين...بحماس يلا 😍
بدأوا يحفروا مع بعض وهما بيضحكوا وكل جسمهم مليان رمل
عملت مني وياسمين واحلام حفره كبيره وحطوا فيها رجلهم وبدأوا يغطوا رجلهم تاني بالرمل وهما ميتين من الضحك عشان مش عارفين يخرجوا رجلهم
اماني...عاجبك كده ياللي تنشكي اهو البت شعرها غرق رمل هقعد سنه انا بقي انضف في شعرها😒
مني....علي اساس يعني انها بتلعب في الملاهي ماهو بحر ورمل وبعدين يا اختي متنضفيش ليه مش انتي اللي جبتيها معاكي
اماني....ما انتي عارفه ان ده كان شرط بابا الوحيد والله اخدها وارجع 😒
مني...لا وعلي ايه الطيب احسن 😂😂😂بصت علي هناء وهي بتضحك.بصي هناء مهيسه ازاي
اماني...بضحك عامله دماغ😂😂
مني....هي علي طول عامله دماغ اصلا عندها أستعداد تبيع أهلها بس تنام😂😂
اماني...بقولك ايه هاتي الجردل بتاع يا سمين ده نملاه مايه ونروح نغرقها بيه.
مني....بضحك سبيلي انا الطالعه دي هي بنت حلال وتستاهل😂
مي....حتي انتي يا اماني وانا اللي بقول عليكي عاقله.
اماني....واجيب العقل منين 😂😂 ده كفايه اني اعرف اختك
جريت مني جابت مايه في الجردل واتسحبت براحه ولفت ورا هناء وفجأه قلبت الجردل علي دماغها
صرخت هناء وقامت مفزوعه.
هناء...والله يا مني انتي رخمه
مني...بضحك هي والبنات عشان تفوقي شويه من الغيبوبه اللي انتي فيها دي 😂😂😂
جريت هناء وراها علي الشاطئ وفضلوا يضحكوا وقضوا وقت
جميل مع بعض رغم انهم ملحقوش يناموا كويس ويرتاحوا من تعب السفر لكن قرروا انهم ميضيعوش اول يوم في النوم وينزلوا البحر.
فضلوا قاعدين لحد وقت الغروب
وبعد كده جمعتهم شيماء عشان يطلعوا مكانوش قادرين يخرجوا بليل فا قرروا انهم يطلعوا ياكلوا وياخدوا شاور وينامو .
طلعوا علي الفندق خدوا الشاور بتاعهم وخرجوا نزلوا كلوا في المطعم وبعد شويه طلعوا تاني وهما مش شايفين لعبوا كتير في المايه لحد ما جسمهم اتكسر.
مي...بقول ايه يا بنات انا مش عاجبني بصراحه اكل الفندق.
مني...ولا انا.
اماني...بصراحه وانا كمان وياسمين مش بتاكل كويس
مي...طيب ايه رأيكم بكره ان شاء الله لما نروح السوق بليل نجيب حجات نحطها في التلاجه تنفعنا للفطار والعشاء ونبقي نتغدي بره.
احلام...احسن برضوا فعلا انا محبتش الاكل هنا خالص كمان عشان الفندق 3 نجوم فا طبعا الاكل هيبقي علي قد الفلوس
مني...واهم حاجه المايه والنبي احسن بصراحه المايه طعمها وحش ومتغير مش عارفه دي مايه خزانات ولا مايه ايه
مي...هو معروف ان مطروح المايه بتاعتها مالحه كل اللي بيجي هنا بيشتري مايه.
اماني...لا علي فكره في هنا مايه حلوه برضوا بس مش في كل الاماكن والمايه اللي نازله هي مش مالحه بس فعلا طمعها متغير.
مني....لا احنا نشتري مايه افضل
انا من الصبح مش عارفه اشرب كويس.
مي...خلاص بكره ان شاء الله نكتب اللي هنحتاجه ونجيب اللي ناقصنا.
مني...بقولكم ايه هو ليه الفندق فاضي كده.
مي....يابنتي احنا يعتبر اول رحله تيجي ده لسه الامتحانات خلصانه من بدايه شهر سته البلد بتبدأ تتزحم والناس بتيجي تصيف.
مني...لا ما انا فاهمه انا أقصد علي الناس اللي شغاله في الفندق يعني مشوفناش غير الاتنين الامن اللي علي بوابه الفندق وموظف اللستقبال اللي سلمنا المفاتيح
وعامل النظافه .
اماني....ممكن برضوا عشان لسه الموسم مبدأش وهتبقي عماله زايده علي الفاضي اصحاب الفنادق والناس دي مش بيخسروا ابدا يا بنتي.
احلام....فعلا وفي حاجه اسمها عماله موسميه يعني الموظفين مبيبقوش متثبتين بيشتغلوا بس في المواسم وضغط الموسم.
مني....ممكن عموما يلا بقي انا مش قادره وانتي نيمى البت دي عدل نامت حرام.
اماني ماشي..
مي...يلا بينا عشان نكلم ماما وبابا وخالد نطمنهم قبل ما ننام.
مني....يلا بينا.
قاموا البنات خرجوا من اوضه أماني وراحوا علي اوضهم
طمنوا أهاليهم وفضوا شنطهم بسرعه. وبعد كده أستسلموا للنوم.
...............
صحيوا تاني يوم فطروا وراحوا علي البحر قضوا وقت جميل
وكانوا فايقين أكتر من اول يوم
استغلوا وقتهم في اللعب عاموا كتير ولعبوا اكتر وفضلوا يتصوروا مع بعض ووقت الغروب
طلعوا عشان يجهزوا بسرعه ويروحوا السوق ويتمشوا علي الكورنيش.
طلعوا مع بعض في الاسانسير وهما مبهدلين من المايه والرمل.
مني...بقول ايه تنجزوا تستحموا بسرعه عشان نلبس ونستني شيماء.
اماني...هطلع استحمي واحمي ياسمينا واجيلكم.
ياسمينا....انا اللي هستحمي الاول
اماني...لا انا 🤨
ياسمين....خلاص نشوف مين اللي هيسبق الاول.
اماني...أتفقنا.
اول ما الباب بتاع الاسانسير أتفتح جريت ياسمينا وهي بتصوت واماني وراها بتضحك
مني....البت واختها اتجننوا😂😂
جريت ياسمينا وسبقت اماني دخلت علي الحمام بسرعه
ياسمين....بضحك انا البي سبقتك
اماني....بقي كده شوفي مين بقي اللي هيديكي اللبس.
ياسمين...بضحك طيب تعالي متزعليش ادخلي.
اماني...بحب انا مش زعلانه يا عبيطه انا بهزر معاكي وبعدين يعني انا هدخل واسيبك انتي واقفه غرقانه كده يلا ادخلي لحد ما اجهز لبسنا بس أياكي تتأخري.
ياسمين....حاضر مش هتأخر😍
دخلت ياسمين وقفلت الباب وقلعت هدومها وبدأت تاخد الشاور بتاعها.وتنضف بالشامبو الرمل اللي في شعرها نزل الصابون علي عينها فضلت تغسل وشها بسرعه وفجأه صرخت
اماني....كانت بره بتحضر لبسها هي وياسمين واول ما سمعتها اتخضت وجريت عليها فتحت الباب.لقتها بتصرخ والصابون نغرق وشها.
اماني...في ايه خضتيني
ياسمين...مسكت فيها وهي مش شايفه وبتعيط الحقيني يا اماني
اماني...بس براحه متعيطيش الصابون دخل في عنيكي ولا ايه
فضلت تغسلها في وشها بسرعه.
اماني...ايه كده احسن كل الصريخ ده يا شيخه عشان الصابون دخل في عينك رعبتيني انا قولت اتكرهبتي ولا شوفتي صرصار
ياسمين....بدموع لا انا شوفت حد عدي من جنبي يا اماني😭😭
اماني...🙄 حد مين يا بت انتي بتخوفيني ليه مفيش حاجه يا حبيبتي.
ياسمين....ولله كنت بغسل وشي حسيت ان في حد شوفته😭😭
أماني...يا حبيبتي أهدي مفيش حاجه انتي اكيد لما غمضتي عينك اوي عشان الصابون حسيتي بخيال عادي وبعدين يلا بقي اخلصي اقولك تعالي يلا انا هكملك وتخرجي تلبسي علي طول لحد ما اخلص ماشي.
ياسمين....ماشي بس متبصيش عليا
اماني...بضحك اتنيلي انتي لسه فاكره ما انا شوفت كل حاجه خلاص وبعدين تعالي بقي انا هموتك بتدخلي قبلي فضلت اماني تزغزها وياسيمن تضحك
والاتنين غرفوا تحت المايه ونسيت ياسمين تماما خوفها.
.........
بعد وقت بسيط خرجوا وأتجمعوا كلهم قدام الكوريدور اللي فيه الاوض بتاعتهم. ووقفوا يستنوا بعض ينزلوا مجموعه مجموعه في الاسانسير
اماني...شيماء انتي جيتي مطروح قبل كده.
شيماء...اه جيت مرتين او تلاته بلد جميله اوي وناسها طيبين جدا ومحترمين والاسواق اللي فيها جميله.
اماني...بس ليه هاديه اوي كده.
شيماء...بالعكس مطروح الاول كانت هاديه لكن الوقت الناس بدأت تيجي فيها واتعرفت خلاص يمكن بس عشان الموسم مبتداش.
وكمان احنا بعيد شويه عن الكورنيش وقلب البلد نفسها الفندق هنا متطرف.
اماني...ممكن فعلا بس هي بصراحه جميله والبحر بتاعها يجنن.
شيماء...فعلا كل شاطئ هنا ليه شكل وحاله خاصه بيه البلد كلها تجنن انا هوديكم اماكن كتير ان شاء الله هتتبسطوا.
مني...عارفين ايه احلي حاجه في السفريه دي.
اماني...ايه.
مني...اننا لوحدنا في الفندق خالص الغرف كلها تبعنا يعني نعمل دوشه براحتنا 😂😂
اماني...تموتي في الدوشه انتي
مي... يلا بينا الاسانسير جه.
ركبوا كلهم ونزلوا تحت ولسه هيخرجوا من الباب.
مي...ايه ده انا نسيت تليفوني.
مني....كان في ايدك واحنا في الاوضه.
مي...ايوه انا كلمت خالد وعرفتوا اننا نازلين وسبتوا بعد كده
مني....احسن عشان تبقي تكلميه كويس😒
اماني....بضحك ياساتر البت دي تليق تبقي حماه.
هناء....بضحك وتمشي برضوا مرات اب😂😂
مني...نعم يا ظريفه منك ليها🤨🤨
مي...طيب بقول ايه اخرجوا استنوني بره وهطلع اجيبه بسرعه واجي
مني...لسه هتطلعي ما انا موبايلي معايا خلاص مش مهم
مي...لا عشان لو خالد اتصل.
مني...ياستي ما لو مردتيش هيكلمك عليا او خدي قوليلو.
مي...لا معلش عشان ميزعلش انا وعدته اني اطمنه علينا كل شويه.
احلام....بيعجبني في مي انها بتحترم خالد بجد😍
حدفتلها مي بوسه في الهوا قلبي انتي.
مني...طيب يا اختي انتي وهي اخلصي يلا متتأخريش.
شيماء...بسرعه يا مي.
مي....هوااااا🏃🏃
جريت مي طلعت تاني في الأسانسير.
وطلعت فتحت الاوضه وقفلت الباب وبصت بعينها علي موبايلها
لقيته علي السرير راحت خدته حطيته في الشنطه وبصت في المرايا ظبطت الحجاب وراحت مسكت أوكره الباب عشان تفتح
لقيته مش بيفتح فضلت تشد فيه اتفتح حاجه بسيطه لكن كانت بتحاول تشده اكتر مش بيتشد وكأن في حد ماسكه من بره وبيشده عكس الاتجاه.
فكرت مي ان ده مقلب من مني
مي...سيبي الباب يا جزمه😂
شدت مي جامد الباب اتفتح عادي بصت مي بره لقت المكان فاضي والدنيا هاديه خالص ومفيش اي حد.
استغربت وحست انها خايفه خرجت بسرعه وقفلت الباب وجريت علي الاسانسير فضلت واقفه مستنيه لحد ما ينزل من الدور الاخير اللي متسجل رقمه قدامها.
فضلت تظبط في حجابها بتوتر بتحاول تلهي نفسها من الموقف والهدوء الفظيع اللي في الدور وفجأه وهي بتبص حواليها لمحت في أخر الكوريدور بنت واقفه
مدياها ضهرها وباصه في الحيطه
وكل هدومها بتنقط مايه وشعرها كله بينقط وفستانها فيه قطع من الضهر .
بصت مي بصدمه وتسمرت مكانها لثواني .وبدأت تسمع البنت بتعيط بصوت واطي.استجمعت مي شجاعتها وبدات تنادي عليها من بعيد.
مي...لو سمحت ...لو سمحت..
انتي كويسه؟!
يا انسه..طيب انتي مالك فيكي ايه؟؟ طيب محتاجه مساعده؟؟
طيب (((انتي مين))) ؟؟؟؟؟؟؟
وفجأه سمعت مي محمد عامل النظافه..في حاجه يا انسه محتاجه مساعده؟؟
لفت مي برعب وهي ماسكه قلبها من الخضه.
محمد...حضرتك كويسه.
مي....هاااا لا اه اه في بنت ولفت بوشها ناحيه البنت وهي بتشاور لمحمد
لاقيها مش موجوده 😳
حست مي انها هتتشل في مكانها من الخوف والصدمه.
راحت عين البنت كانت لسه واقفه واختفت ازاي المكان اللي هي واقفه فيه مفيش فيه اي مخرج.
غير اوضتين جمب بعض ومسمعتش حد دخل فيهم.
بعد تفكير ولغبطه بصتله مي تاني.
مي...خلاص مفيش حاجه شكراً
نزل الاسانسير في اللحظه دي وشكرته مي وركبت بسرعه وهي حاسه أنها مش قادره تتلم علي اعصابها حاولت تهدي واقنعت نفسها ان كل ده تهيأت من تعب السفر ونزول البحر والخروج.
نزلت مي قابلتهم بره الفندق من غير ما تقول اي حاجه خافت تخوفهم علي الفاضي و يطلع بيتهيألها.
خرجوا مع بعض أتمشوا علي الكورنيش اتغدوا وكل ا ايس كريم وشويه وراحوا السوق اشتروا الحاجه اللي محتاجنها وجابوا مايه وبعد لف كتير رجلهم وجعتهم وحسوا انهم عايزين يناموا
رجعوا علي الفندق . شالوا الحاجه اللي جابوها وناموا.
في صباح ثالث يوم.
البارت الثالث..❣️
#في_الفندق
((تهيؤات))
صحيت هناء الساعه 8 الصبح وهي بتصرخ كانت بتحلم بكابوس مخيف.
قامت أحلام بسرعه من نومها وهي مخضوضه
احلام...بسم الله الرحمن الرحيم في ايه انتي بتحلمي ولا ايه.
فضلت هناء ساكته وشها كله عرق وجسمها متلج وبتتنفض ونفسها سريع كأنها كانت بتجري
احلام...يابنتي في ايه مالك انتي شكلك حلمتي ولا كابوس ده ولا ايه خدي اشربي
شربت هناء المايه وفضلت تقرأ قرآن
احلام...بضحك احسن تستاهلي مقضيه حياتك كلها نوم عشان كده جالك كابوس..يابت انطقي انتي كويسه😂😂
هناء...الحمد لله كويسه
احلام..طيب اقراي قرآن ونامي شويه قبل ما مني المزعجه تيجي تقولنا يلا.
هناء....حاضر.
نامت احلام. ورجعت هناء علي السرير وهي ضامه رجلها لصدرها وباصه قدامها برعب.
هناء مرضيتش تخوف احلام عشان عارفه انها جبانه جدا لكن هي مكانتش بتحلم كانت حاسه ان في حد واقف قدام السرير جمب رجلها فضلت هناء صاحيه وخايفه ومش عارفه تنام لحد الضهر .
صحيوا كلهم وبدأوا بجهزوا عشان ينزلوا يفطروا ويروحوا البحر.
دخلت أحلام تغسل وشها حطت الصابون علي وشهاوغمضت عينها
وهي بتمشي ايدها علي وشها حست بحركه وراها
فتحت عينها عينها بسرعه ولفت تبص وراها ملاقتش حاجه
عينها حرقتها من الصابون لفت تاني للحوض تغسل وشها بالمايه
بعد ما خلصت رفعت وشها للمرايه فجأه لقت بنت واقفه واقفه وراها.
صرخت وبصت وراها تاني بسرعه ملاقتش حد طلعت تجري من الحمام خرجت بره لقت هناء مش في الاوضه عرفت انها راحت للبنات مسكت اللبس بتاعها ووقفت تلبس بسرعه وهي عينها علي الحمام وبسرعه جريت من الاوضه وهي باين عليها الرعب.
دخلت بسرعه علي اوضه مني ومي لقت البنات كلهم موجودين.
وقفت وهي في دنيا تانيه وبتفتكر اللي شافته من دقايق
مني...بضحك مالك يابت في ايه شكلك مخضوضه كده ليه.
احلام...بتوتر ابدا بس لما خرجت ملاقتش هناء اتخضيت
هناء...مانا قولتلك راحه للبنات وتعالي ورايا.
احلام...مانا مسمعتكيش بقي
مني واماني فضلوا يضحكوا عليها.
اماني...هتعيش وتموت خوافه😂😂
ابتسمت احلام من غير ما تعلق.
وقررت انها تعمل زي ماعملوا كل واحده فيهم شافت حاجه قررت انها متقولش للباقي عشان ميخافوش واقنعوا نفسهم انهم بيتهيألهم.
نزلوا مع بعض علي البحر بعد ما فطروا قضوا وقت حلو علي البحر
لعبوا واتبسطوا ونسيت هناء اللي شافته واحلام كمان اندمجت رغم خوفها اللي كان واضح عليها.
اما شيماء...فكانت ديما معاهم مش بتسيبهم خصوصا المجوعه بتاعتهم حبوها جدا واعتبروها اختهم الكبيره.
بعد وقت طويل من اللعب في المايه خلصوا ولموا حاجتهم عشان يطلعوا يغيروا
شيماء...بقولكم ايه خلصوا بسرعه ومتتأخروش عشان نروح نقعد علي الكورنيش في مكان حلو اوي روحت فيه قبل كده هوديكم فيه.
مني ..شطا اهو كده يلا بينا
طلعوا كلهم عشان ياخدوا شاور
ياسمين.....انا اللي هسبقك
اماني...تاني ماشي ياستي اطلعي من غير جري احسن تتعوري.
دخل البنات كل واحد فيهم الاوضه بتاعته عشان يجهزوا
ودخلت ياسمين الحمام تاخد دش
طلعتلها اماني لبسها وخبطت عليها علقتهولها وخرجت.
مسكت موبايلها عشان تطمن مامتها عليهم.
أماني....وحشتيني يا ست الكل
هدي...انتي اكتر عامله ايه وياسمينا عامله ايه
اماني....بخير الحمد لله دخلت تستحمي عشان هننزل نتمشي علي الكورنيش
هدي....ايوه اخرجوا انتوا وأتفسحوا و سيبوني كده لوحدي.
اماني...ياريتك معانا والله كانت هتبقي احلي رحله
هدي...سيبك مني انا تتعوض ان شاء الله المهم اتبسطي انتي واختك
اماني...مبسوطين والله يا ست الكل قوليلي مش عايزه حاجه أجبهالك معايا
هدي....جيبيلنا زيتون
اماني...بضحك زيتون😂😂
هدي...يابت بيقولوا ان مرسي مطروح مشهوره بالزيتون
اماني...وانتي تموتي في الشهره😂😂😂 حاضر يا ستي هجبلك احلي زيتون كمان.
وفجأه وهي بتكلم والدتها وبتضحك لمح ياسمينا خرجت من الحمام ولسه زي ماهي لابسه المايوه بتاعها وماشيه ناحيه باب الاوضه.
اماني....😳
هدي...خلي بالك من اختك وحطيها في عينك يا اماني.
وقفت اماني تشاورلها عشان متخلبهاش تخرج وخايفه تعلب صوتها مامتها تفكر ان في حاجه وتقلق.
هدي...انتي معايا
اماني...اه اه بقولك متخافيش عليها لقولك يا ماما اقفلي اشوف مني عايزه ايه واكلمك
هدي...ماشي يا حبيبتي سلام
اماني...سلام..
قفلت بسرعه وجريت ورا ياسمينا اللي فتحت الباب وخرجت ومرضيتش ترد عليها او تقف.
اماني...بت يا ياسمينا انتي يابت
فتحت الباب وبصت غليها ملقتهاش
اماني...ياسمينا بت يا ياسمين
بصت في الكوريدور ملاقتش اي حد واقف جريت تبص علي الاسانسير وهي لسه بتنادي عليها
وبتبص علي الرقم اللي الاسانسير مسجله يمكن تعرف هي فين.
ياسمين....بتعملي ايه يا اماني.
لفت اماني بسرعه وهي مصدومه وتبص علي الصوت
وفجأه لمحت ياسمين واقفه قدام باب الاوضه لابسه الفستان اللي طلعتوهلها اماني وبتسرح شعرها😳😳
حست اماني انها اتجمدت في مكانها من الخوف مش مصدقه اللي بيحصل قدام عينها ازاي دي لسه شيفاها خارجه حالا بالمايوه
اماني....انتي جيتي ازاي وكنتي فين؟😳
ياسمين...جيت أزاي يعني ايه وبعدين ما انتي عارفه اني كنت بستحمي. بس خرجت لاقيت الباب مفتوح وانتي مش جوه خرجت اشوفك فين لاقيتك واقفه.
اماني...بخوف حاولت تخفيه هو انتي مخرجتيش من الاوضه يا باسمينا.
ياسيمن...يعني هخرج ازاي وانا بستحمي يلا تعالي بقي استحمي عشان ننزل.
ابتسمت امانب بخوف وفضلت تبص حواليها شويه وراحت علي ياسمين وقفلت الاوضه ودخلت شغلت قرآن علي موبايلها ودخلت أستحمت وهب مرعوبه ومش قادره تتكلم عشان أختها متخافش.
بعد وقت بسيط الكل كان جهز
نزلوا مع بعض وشافيت ياسمينا العاب كتير راحوا يلعبوها ويلعبوا معاها حاولت اماني تنسي اللي حصل وتقنع نفسها زيهم أن مفيش حاجه.
خلصوا لعب وراحوا كلوا ايس كريم وركبوا عجل وهما فطسانين من الضحك مفيش واحده فيهم عارفه تسوق غير ياسمين الصغيره.
سابوا العجل ودخلوا زي معرض كده للتوك والاكسسوارات واللعب
وقفوا يشتروا اكسسوارات ويختاروا حجات كتير كانوا مبسوطين جدا.
بعد ما خلصوا راحوا السوق عشان يشتروا الزيتون اللي هدي عيزاه
رجعوا تاني قعدوا مع بعض في كافيه علي البحر ومعاهم شيماء وباقي البنات اللي طالعين معاهم الرحله.
اول ما دخلوا الكافيه كانوا سامعين الاغاني ورقص الشباب
وقفت ياسمين ترقص قدامهم
وهما فضلوا يصقفولها واماني وقفت صورتها.
اماني...بضحك شوفي بنتك يا ست هدي بصي المواهب المدفونه.
مي...بضحك انتي هتشردي البت ليه😂😂
اماني....همسكها عليها ذله😂😂
قضوا وقت جميل مع بعض وشويه ورجعوا تاني علي الفندق.
بمجرد ما رجعوا حست اماني ان الخوف رجعلها من تاني
اماني...بقولكم ايه ماتيجوا نسهر شويه عندي في الاوضه.
مني...اشطا هغير واجيلك
دخلوا غيروا وشويه ورجعولها فضلوا يهزروا ويضحكوا ويتكلموا
حست مني انها تعبانه ومعدتها وجعاها وخلاص فصلت وعايزه تنام.
مني...بقولكم ايه انا راحه انام
مي ..خليكي شويه ونروح مع بعض
مني...لا مش قادره معدتي وجعاني اوي
مي...لسه برضوا ما احنا اشترينا مايه
مني...معرفش بقي انا شكلي واخده برد
اماني...بخصوص المايه صحيح المايه هنا غاليه اوي احنا لسه فاضلنا 3 ايام كده الفلوس هتخلص
مي...فعلا غاليه اوي انا بفكر نشرب تاني من المايه هنا لما المايه اللي معانا تخلص يعني حساهم كلهم واحد
احلام....ماشي
مني...طيب انا راحه بقي انام تصبحوا علي خير
البنات...وانتي من اهل الخير
مي...شويه وهحصلك
مني..براحتك.
مشيت مني ودخلت علي اوضتها
خدت مسكن وطلعت علي السرير غمضت عينها بأرهاق عدي حوالي دقيقه وهي مغمضه عينها وقبل ما تروح في النوم حست بحاجه دافيه علي السرير
قامت بسرعه فتحت النور وبصت لقت الملايه غرفانه مايه هي وهدومها.
مني...😳😳احيه انا عملتها علي روحي ولا ايه يا نهار اسود
قامت بسرعه جريت علي الدولاب طلعت غيار وجريت علي الحمام غيرت قبل ما مي ترجع وخرجت علي الدولاب طلعت ملايه عشان تغير السرير.
وقفت مني وهي مصدومه ومستغربه لما شافت الملايه ناشفه قربت ايدها براحه تجس الملايه ملاقتش اي حاجه.
دخلت تاني بسرعه علي الحمام تشوف الهدوم اللي لسه قلعاها.
لاقتها هي كمان ناشفه أتصدمت وفكرت ان عينها غفلت وحلمت انها عملتها علي نفسها وربطت ده طبعا بتعبها وبالمجهود اللي بيعملوه
وقفت مني تضحك علي نفسها😂
خرجت من الحمام تاني وقفلت النور ورجعت نامت علي السرير مسكت الغطاء بايدها ولسه هترجع عشان تنام أتفاجئت بحد مسكها من ايدها بصت بسرعه بفزع لمحت بنت شعرها وهدومها غرقانين بتعيط وبتقولها.
👇👇
ساعديني🥺
صرخت مني ومره واحده لقت نفسها بتقوم من علي السرير بصت حواليها بسرعه وكانت الصدمه انها اكتشفت ان كل ده كان حلم بصت علي نفسها لقت نفسها لسه بهدومها الاولي اللي فكرت انها غيرتها يعني هي كانت بتحلم ومغيرتش اصلا
فضلت تاخد نفسها بسرعه وقرأت قران كتير ولما حست انها هديت شربت مايه وفضلت تستغفر ورجع نامت تاني. لكن وهي خايفه.
.......
قضوا البنات الوقت في رغي وضحك في اوضه اماني
اماني...بضحك بصوا هناء
هناء كانت قاعده حاطه أيدها تحت دقنها وقاعده تنام علي نفسها
مي...بضحك بت يا احلام حرام صحيها ورحوا ناموا يلا انا كمان عايزه انام
شيماء...وانتي يا اماني غطي ياسمينا ونيميها عدل انا قايمه انام مش قادره فصلت خلاص
تصبحوا علي خير
مي...خديني معاكي.
احلام...بت يا هناء يلا ننام تعالي
هناء...وهي بتتاوب مش هتسهروا شويه
اماني...بضحك لا يابت وانتي جامده في السهر اوي😂😂
هناء...ماشي يا جزمه افوق بس الصبح وهروقك
اماني...بضحك هستناكي 😂😂
خرجوا كلهم راحوا علي أوضهم
ناموا وعدي اليوم بهدوء علي الجميع من غير اي حاجه غريبه.
...........
في صباح اليوم الخامس.
نزلوا البنات راحوا البحر لعبوا واتبسطوا مع بعض وشويه وطلعوا يغيروا عشان يروحوا السوق
يشتروا زيتون تاني لباقي أمهاتهم
ويجيلوا لب.
عشان كانوا مقررين ان اليوم السادس يقضوه في لعب وخروج
واليوم السابع هيرجعوا فيه فقرروا يجيبوا كل اللي ناقصهم
عشان ميروحوش السوق تاني.
غيروا ونزلوا راحوا السوق اشتروا حجات كتير
مي....بقول ايه ما تيجوا نودي الحاجه دي علي الفندق وبعدين نخرج عشان الشنط كتير وكده هنتلخم مش هنعرف نخرج
اماني...لسه هنرجع كل ده🥴
احلام...انا كمان رأيي كده مش هنعرف نتبسط الشنط كتير
شيماء...خلاص يلا بينا عشان منضيعش وقت.
مني...شيلي معانا يا بروطه انا مش قادره
هناء...مكانش العشم المفاصل ربنا يكفيكي شرها
مني...يابت انتي علي طول قايمه بدور ستي كده ليه انتي ناقصلك عكاز وربنا😡
ضحكوا كلهم علي مني و رجعوا تاني علي الفندق.
مني....وربنا ما انا طالعه روحوا طلعوا انتوا الحاجه ايدي وجعتني
اماني...وانا كمان مش قادره طلعوا البروطه دي شويه
هناء...كان علي عيني
مني...طلاق تلاته لا انتي طالعه
شيماء...بضحك طب تعالي يلا يا هناء وانا كمان هطلع معاكي
مي...وانا كمان يلا عدوا الجمايل
احلام...طول عمرك مغرقانه بجمايلك يا عاقله.
هناء...طب كملي جميلك وطلعي انتي وشيماء🥴
مي...قدامي با بت 🤨🤨 الحاجه كتير
هناء....حيث كده بقي امري لله
شالوا الحاجه وطلعوا مع بعض
اماني...بصوت عالي بسرعه متتأخروش.
مي....حاضر.
.............
طلعوا مع بعض حطوا الحاجه في الاوض
خرجت شيماء وهناء في الكوريدور وقفوا أستنوا مي.
ثواني وخرجت مي بصتلهم من الباب.
مي...بقولكم ايه أسبقوني هكلم خالد واجي وراكم هجيلكم علي البحر
نزلت شيماء وهناء وعرفوا البنات ان مي جايه وراهم راحوا كلهم علي البحر وقعدوا سوا يتكلموا ويضحكوا.
............
خرجت مي وراهم علي طول ملاقتش اي حد واقف خبطت علي اوضه شيماء وعلي اوضه هناء محدش فتح
مي...راحوا فين دول.ركبت الاسانسير ونزلت تبص عليهم تحت ملاقتهمش عرفت انهم سبقوها علي البحر
فضلت تمشي لحد ما وصلت عندهم لاقتهم فاتحين الاكل وبياكلوا.
مي...بضحك كمان بتاكلوا من غيري ايه النداله دي مش كفايه مشيتوا وسبتوني🤨🤨
هناء...بضحك خلي يا اختي سي خالد ينفعك😂😂
مي...😂😂😂 خالد طب وخالد ماله الوقت انتي هتعملي زي مني المجنونه دي وتغيري زيها مش كفايه مكلمتوش من الصبح.
بصوا كلهم لبعض.
شيماء....امال انتي كنتي بتعملي ايه فوق الوقت مش انتي اللي قولتلنا روحوا عشان هكلم خالد واجي وراكم.
بصتلهم مي بأستغراب...انا؟
انا قولتلكم كده انتوا كمان بتتبلوا عليا🤨🤨
هناء وشيماء بصوا لبعض بقلق.
شيماء...ايوه يا بنتي انتي مش خرجتي من الاوضه واحنا واقفين مستنيك قولتي اسبقوني هكلم خالد واجي وراكم
بصوا كلهم علي مي بترقب.
مي...بصدمه سكتت ثواني وبصتلهم والله ماحصل.
قاطعتهم احلام بخوف.
بقولكم ايه انا سكت كتير وخلاص مش قادره اسكت
الفندق ده شكله مسكون🥺
بصوا كلهم لبعض بصدمه😳
وللحديث بقيه..
#في_الفندق
#أميره_أسامه
البارت الرابع..❣️
((إعتراف))
أحلام...بخوف بقولكم أيه انا سكت كتير وخلاص مش قادره أسكت أكتر من كده الفندق ده شكله مسكون.🥺
كلهم بصوا لبعض بصدمه وخوف.
اماني...بصوت واطي خافت ياسمين تسمع كانت مشغوله باللعب في الرمل.
وطي صوتك ياسمينا هتسمعك.
احلام...بصوت مرعوب والله الفندق مسكون انا حصلي حاجه وخوفت أقولكم عشان متخافوش وقولت يمكن بيتهيألي
انا كنت في الحمام حسيت ان حد ورايا وشي كان كله صابون بصيت
ورايا بسرعه ملاقتش حد غسلت وشي بسرعه ورفعت عيني للمرايا لقيت بنت واقفه ورايا طلعت جري وجيتلكم لما قولتيلي يا مني فيكي ايه.
كانوا ساكتين بيسمعوا ومرعوبين
مي..بصوت مهزوز البنت دي كانت لابسه فستان لونه أحمر🥺
احلام بصدمه ايوه.
ردت مني بسرعه والخوف باين علي ملامحها يبقي انا كمان مكنتش بحلم.
بصوا كلهم ناحيه مني.
مني...بخوف امبارح لما قولتلكم اني هنام عشان تعبانه وسبتكم .حسيت ان السرير تحتيا غرقان دافيه كملت بإحراج كنت فاكره اني عملتها علي نفسي بصيت علي الملايه وهدومي لقيتهم غرقانين جريت علي الحمام غيرت وقولت أرجع بسرعه اغير الملايه اتفاجئت ان الملايه ناشفه روحت تاني ابص علب هدومي لاقيتهم هنا كمان ناشفين
ضحكت علي نفسي وقولت اكيد عيني غفلت وده كان حلم سريع. ورجع عشان انام تاني لقيت البنت اللي لابسه فستان احمر هدومها غرقانه مايه وشعرها بينقط مسكت ايدي وبتقولي ساعديني.
صرخت لكن الصدمه اللي بجد اني لاقيت نفسي لسه بهدومي اللي انا المفروض غيرتها ولاقيت نفسي عالسرير وكنت نايمه قولت ده اكيد كابوس قرات قرأن ورجعت نمت.
مي....البنت دي فعلا انا شوفتها من ضهرها تاني يوم جينا لما نسيت الموبايل كانت واقفه في اخر الكوريدور وفستانها مقطوع
فضلت انادي عليها مردتش لقيت عامل النظافه جاي من ورايا بيقولي محتاجه حاجه لسه هقوله
علي البنت انها محتاجه مساعده لقتها أختفت.
الصدمه كانت ظاهره علي ملامح الكل والرعب اتملك منهم قربوا كلهم من بعض.
شيماء...انتوا هتخوفوني ليه
هو انتو بتتكلموا بجد
هناء...بصوت واطي واضح عليه الخوف.انا كمان علي فكره حسيت🥺
بصولها كلهم وهما عينهم هتخرج من مكانها من الصدمه مش قادرين يتحملوا سيل الإعترافات ده كله.
هناء...فاكره يا با أحلام اول أمبارح لما قومت مفزوعه من النوم قولتيلي اكيد بتحلمي.
هزت احلام راسها بخوف.
هناء...مكنتش بحلم🥺🥺
انا لقيت حد بيمسك رجلي فتحت عيني لمحت بنت موطيه وشعرها مغطي وشها حققت فيها كنت فكراها انتي قولتلها بتدوري علي ايه يا احلام .
رفعت راسها وبصتلي لاقيت نفسي بصرخ وانتي صحيتي خوفت اقولك عشان انا عارفه انك بتخافي.
احلام...بدموع انا عايزه اروح والنبي🥺.
أماني....بخوف ودموع متحجره في عينها طيب انا كمان عايزه اقولكم علي حاجه.
احلام...بصوت واطي وهي بتعيط ايه انتي كمان شوفتي حاجه ماهي كملت.
اماني...مش انا بس ياسمينا كمان
تاني يوم بعد ما طلعنا من البحر دخلت تستحمي شويه ولاقيتها بتصرخ جريت عليها لقتها بتقولي انا شافت حد بيمشي من جمبها.
هدتها وقولتلها اكيد اتخيلتي وعدينا اليوم وفعلا فكرتها اتخايلت لحد ما انا كمان شوفت بس لما لاقيتكم ساكتين مرضتش اقولكم عشان مخوفكوش.
مني...شوفتي ايه🥺
اماني...امبارح بردوا بعد ما طلعنا من البحر جريت ياسمينا تستحمي قلبي حضرتلها اللبس وخرجت اتصلت بماما وقعدت ارغي معاها شويه .لاقيت ياسمينا خارجه من الحمام ولسه بالمايوه فتحت باب الاوضه وخرجت فضلت اشاورلها متخرجش لوحدها لكن موقفتش ولا بصتلي قفلت مع ماما وجريت اشوفها وانادي عليها كانت اختفت
جريت عالاسانسير اشوفها لاقيت الاسانسير تحت وطبيعي ملحقتش تنزل كل ده حصل في ثواني ..
وفجأه اتصدمت لما لقيت ياسمين بتنادي عليا وهي واقفه علي باب الاوضه ولابسه فستانها وبتسالني بعمل ايه قولتلها كنتي فين قالتلي كنت بستحمي وخرجت لقيت الباب مفتوح ولقيتك واقفه.
وقتها حسيت ان كده في حاجه غلط انا لا شوفت خيال ولا كنت نايمه انا كنت بكلم ماما وصاحيه وشوفت ياسمين ماشيه قدامي بجسمها وشكلها.لكن خوفت اقولكم عشان مخوفكوش وابوظ عليكم الرحله.
مي...كده فعلا في حاجه غلط.
شيماء...بس مفيش حد من باقي البنات اشتكي او قال اي حاجه.
مي...ويمكن شافوا ومرضيوش يخوفوا بعض زي ما احنا عملنا.
مني...طيب اروح اسألهم.
شيماء...لا استني يا مني بلاش مش عايزين نعمل قلق عالفاضي لو فعلا محدش شاف حاجه هتخوفوهم و هنعمل قلق علي الفاضي.واحنا كل اللي فاضل بكره هنقضيه طول اليوم بره.
وبليل علي الفجر هنبدأ نتحرك فا بلاش نيجي علي اخر يوم ونرعب الكل.
احلام يعني ايه هنطلع ننام كده عادي في الفندق بعد كل ده.
ده علي جثتي اطلع فوق تاني بعد الكلام ده كله.
شيماء...اسمعي بس يا احلام احنا منعرفش ايه اللي بيحصل ولا ايه اللي شوفتوه ده.بس كل اللي أعرفه من كلامكم ان مفيش اي حاجه تأذي في الموضوع.كل اللي أتشاف مجرد خيالات
احلام...وده مش كفايه انا مش هقدر صدقيني ده انا بخاف من خيالي.
وبعدين الفندق ده اصلا غريب
محدش ساكن فيه غيرنا قولنا مش مهم احنا جايين شهر خمسه ولسه الناس مبدأتش تيجي تصيف. بس انتوا مش ملاحظين ان مفيش موظفين كتير فيه يعني كل اللي موجودين شابين من الامن علي باب الفندق وموظف في الأستقبال وعامل نظافه واحد مشوفناش غيره من وقت ما وصلنا بذمتكم في فندق حتي لو 3 نجوم يبقي فيه عامل نظافه واحد.
شيماء...يمكن عشان الفندق متكرف ومش معروف وبعيد شويه عن زحمه وسط البلد والكورنيش فا هيجيبوا موظفين كتير ليه ولمين.
هناء...بصراحه انا كمان مرعوبه.
مني...طيب ايه رأيكم نسأل مهران بتاع الامن اللي جاي معانا.
شيماء...مهران انا كنت واقفه معاه الصبح بيسألنى لو محتاجين حاجه ولو كان في اي حاجه حس بيها هو او السواق ولا المساعد اللي مع السواق كان قالي بس واضح ان محدش حس باي حاجه.
مني...طيب وبعدين هنعمل ايه.
اماني...انا خايفه علي ياسمينا.
شيماء...انا من رأيي اننا نحاول نعدي اليوم ده ممكن نقسم نفسنا وننام مع بعض يعني عشان منحسش بخوف .بصراحه مع اني مش بخاف بس بعد كلامكم ده مش هقدر انام لوحدي.
مي...انا كنان بقول كده ممكن انتي يا شيماء تنامي مع هناء واحلام.
وانا ومني واماني ننام مع بعض.
اماني...اه والنبي ياريت.
شيماء...خلاص يبقي اتفقنا واهم حاجه منسبش بعض خلي الوقت اللي باقيلنا هنا يعدي علي خير.
مي...طب ايه يلا نطلع انا مش قادره والجو برد.
اماني...ماشي يلا ياسمينا كنان لابسه خفيف.والجو فعلا برد اوي.
شيماء...يلا بينا...وقالت بصوت عالي. يلا يابنات.لباقي المجموعه اللي معاهم.
..........
طلعوا كلهم مع بعض كانوا ماشيين ماسكين في بعض وبيتلفتوا كتير.
شيماء...أستنوني بس اجيب هدوم عشان أغير
مي...ماشي احنا هنا تحبي اجي معاكي.
شيماء...بابتسامه ياريت حتي خليكي واقفه عالباب.
ضحكت مي...ووقفتلها هي والبنات ومسكت الباب.
دخلت شيماء فتحت دولابها وهي خايفه لكن مطمنه انها شايفه البنات جابت بچامه
وراحت فتحت الدرج بتاع الكومدينو تاخد منه الشاحن بتاع الموبايل كان جمب الشباك خدته وقفلت نور الاباچوره وأول ما قفلت النور ظهر علي الشباك نور القمر من بره ولفت عشان تخرج
شيماء...انا جايه اهو يا بنات بترفع وشها تاني للشباك وهي بتبص بصه سريعه علي الاوضه
لمحت خبال نفس البنت اللي حكوا عنها منعكس علي الشباك.
اتصدمت ووقفت متسمره في مكانها ثواني فاقت علي صوت مني.
مني...يلا بقي خلصي عايزه ادخل الحمام مش قادره.
شيماء...بصوت مهزوز جايه جايه اهو يلا خرجت بسرعه وقفلت الاوضه.ومرضيتش تعرفهم وتخوفهم اكتر.
..........
دخلوا اوضتهم وكل واحده فيهم مرعوبه فضلوا يقفوا لبعض وهما بيغيروا
اماني نيمت يا سمين علي سريرها ومني كانت في الحمام بترجع جامد ومي معاها.
خرجوا من الحمام وهي بتنشف وشها بتعب
اماني...شكلك خدتي برد يا مني
مني...لا مش برد بس انا قولتلكم المايه دي وحشه وطعمها متغير
وانتوا اللي قولتوا المايه اللي في المحلات غاليه ونشتري ليه ونشرب عادي.
اماني....والله انا كنان حاسه بوجع في معدتي.
وياسمينا من امبارح طول الوقت مقضيه اليوم في الحمام.
مني...يبقي ممكن من المايه او الحنفيات ولا دي خزنات ولا ايه.
مي...ممكن مع اننا بلغنا محمود يقول لموظف الاستقبال ويسأل عامل النظافه
مني...ماهو قال لشيماء ان الخزانات دي جديده بقالها حوالي اربع شهور والمايه اللي فيها صالحه للشرب دي من ابار عذبه.
مي...يلا اهو بكره اخر يوم الحمد لله.
مني..طب يلا انا عايزه انام.
اماني...ولنا كنان دماغي هتنفجر .
طلعت اماني علي السرير حضنت يا سمين .
ومني ومي ناموا مع بعض .
شغلت مي قرآن علي موبايلها و قفلوا النور عشان يناموا
...........
في اوضه أحلام وهناء وشيماء.
شيماء...ايه احسن الوقت يالوما.
احلام...معدتي هتموتني مش قادره. باين كده ان المايه فيها حاجه مش تمام
هناء....طيب أعملك يانسون يهدي معدتك شويه. في إزازه مايه معدنيه فيها شويه.
احلام...لا مش قادره احط اي حاجه في معدتي انا هنام يمكن ارتاح شويه.
شيماء...طيب يلا نامو شويه بقي عشان نصحي ننزل
هناء...تصبحوا علي خير
نامت احلام وهناء جمب بعض وشيماء علي السرير التاني.
الدقايق بالنسبالهم كانت بتمر كانها ساعات كل واحده فيهم خايفه حتي تغمض عينهم فضلوا يقاوموا في النوم كتير لحد ما عدت ساعه ومقدروش اكتر من كده والدنيا بقت هاديه والكل نام.
................
في نص الليل.. صحيت يا سمين فتحت عينها مره واحده وفجأه قامت براحه خرجت من الاوضه بهدوء تام ومن غير ما اب حد يحس بيها
بمجرد ما الباب أتقفل عمل صوت وصحيت اماني فتحت عينها بفزع
وبسرعه حطيت ايدها علي النور
وفضلت تبص حواليها.
لقت مني ومي نايمين حاضنين بعض وفجأه ملاقتش ياسمين قامت جري من علي السرير بصت في الحمام ملقتهاش خرجت بسرعه تصحي مي.
اماني...بصوت مرعوب...مي ..مي قومي
مي...بفزع في ايه يا اماني.
اماني...الحقيني يا مي سمعت صوت قومت لقيت ياسمين مش فب الاوضه.
مي...اييييه😳 راحت فين
اماني...معرفش ...معرفش.
مي...تعالي نشوفها يمكن خرجت بره.
قامت مي بسرعه حطت حجابها هي واماني وخرجوا بسرعه يدورا عليها.
اماني .....يا سمين ياسمينا انتي فين.
مي...ياسمييين .ياسمييييين.
اماني...بدموع راحت فين راحت فين يا مي
مي...اهدي يا اماني اجري بسرعه
شوفيها علي السلالم وانا هبص في الاسانسير.
جريت اماني طلعت كام سلمه توديها علي الدور اللي فوق وهي بتنادي بصوت مهزوز..
ياسمييين
اما مي...جريت تشوف اخر الكوريدور من الناحيتين وهي ماشيه مرعوبه من المكان اللي شافت فيه البنت .رجعت بسرعه تشوف مع اماني.
مي...اماني لاقتيها
سمعت اماني بتقول بصوت عالي ياسمييين.
جريت بسرعه مي علي الدور اللي فوق تشوفهم.
وجريت اماني بسرعه علي ياسمين اللي كانت واقفه بضهرها
اماني...بخوف كانت حاسه انها بتعيش تجربه فيلم رعب خايفه تلف ياسمين ليها وتلاقيها متحوله
مي....وهي بتتحرك براحه ياسمين حبيبتي ايه اللب جابك هنا
اماني...برعشه في جسمها ياسمين يا سمين انتي كويسه قربت ايدها براحه عشان تلفها ليها.لقتها كويسه بس واضح انها مش فايقه او مش صاحيه اصلا.بدات اماني تهز فيها وتخبطها براحه علي خدها عشان تفوقها.
أتفزعت ياسمين وبصتلها بخوف.
في ايه يا اماني بتضربيني ليه.
اماني...انتي ايه اللي صحاكي.
من جمبي وخرجك
ياسمين....مش انتي اللي قولتيلي
يا اماني تعالي معايا.
بصت اماني برعب لمي.
وقبل ما ينطقوا من صدمتهم فاقوا علي صرخه هزت ارجاء الفندق كله.
مسكت اماني ياسمين وجريت هي ومي علي تحت وهما بياخدوا سلمتين في سلمه ومش متمالكين اعصابهم
نزلوا الدور بتاعهم لقوا باقي البنات خارجين. من اوضهم علي الصوت
مني..في ايه وانتوا كنتوا فين
شيماء..في ايه يا اماني مين اللي صرخ كده
مي...مش عارفين بس شكل الصوت من اوضه سهيله.
بدأ باقي البنات يخرجوا ويشوفوا الصوت جاي منين.
حتي محمود وواحد من السواقين جم علي الصوت.
دخلت شيماء علي الاوضه والبنات وراها لقوا سهيله في حضن صاحبتها وبتترعش جامد وبتعيط وكلامها مش مفهوم .
قربت شيماء منها
شيماء....سهيله حبيبتي مالك في ايه مالها يا بنات.
مسكت سهيله في ايد شيماء بسرعه.
سهيله...ارجوكي يا شيماء انا عايزه أمشي من هنا
شيماء....طيب طيب اهدي قوليلي بس في ايه
واحده من زمايلهم..بصراحه بقي الفندق ده بيحصل في حجات مش مظبوطه الفندق ده مسكون كنا فاكرين نفسنا بيتهيألنا لكن مستحيل كلنا نشوف ونحس بكل الحجات الغريبه دي
بصوا كلهم لبعض مسكت ياسمين في هدوم أماني بخوف ومني مسكت في مي.
سهيله....بدموع صدقيني دي تاني مره اشوف حاجه اول مره كان اول يوم جينا فيه هنا بعد ما طلعنا شنطنا في الاوض دورت علي شنطتي الصغيره ملقتهاش افتكرت اني كنت حطاها جمبي علي الكرسي تحت لما كنا قاعدين مستنينهم يطلعونا ويجيبوا مفاتيح الاوض.
سبت البنات وقولت انزل أجيبها ركبت الاسانسير ودوست علي اول دور لقيت الاسانسير بيتسحب لفوق فضلت ادوس كان الاسانسير طلع.
قولت اكيد حد كان ساحبه لفوق وقف في الدور الاخير والباب اتفتح بس محدش كان واقف ولا كان في صوت خرجت راسي اشوف مين واقف بصيت شمال ويمين ملاقتش حد رجعت تاني ولسه بدوس علي الزرار عشان انزل..فجأه لقيت بنت جات جري من الخضه صرخت البنت اصلا منظرها كان غريب هدومها كلها غرقانه شعرها بينقط كأنها كانت بتستحمي بهدومها.
المل اتصدم وبصوا لبعض.
كملت سهيله..بصتلها وانا مش قادره اتلم علي أعصابي كانت بتترعش جامد اوي كان جسمها ماسك فيه كهربا وبتتنفس بصوت عالي جدا وباين من صوتها انها بتعيط حاول أهدأ من الخضه واتلم علي اعصابي سالتها وانا مرعوبه انتي كويسه مردتش حاول اقرب منها بعدت ولزقت نفسها من الباب وانكمشت كده في نفسها.
قولتلها متخافيش قوليلي مالك في الوقت ده الاسانسير وصل تاني الدور اللي احنا فيه.
والباب اتفتح لقيت امل وندي شاور علي اصحابها اللي واقفين.
لقتهم بيقولولي تعالي لقينا الشنطه
بصتلهم بذهول وبصيت علي البنت لقيتها خرجت من الاسانسير عادي جدا وطلعت علي السلم من تاني للدور اللي فوق.
بصتلهم وقولتلهك البنت دي فيها حاجه شكلها كده خايفه من حاجه
اتصدمت لما قالولي بنت مين
قولتلهم اللي كانت جمبي اللي خرجت قدامكم الوقت قالولي مكانش في غيرك في الاسانسير
حسيت ان حد جاب مايه متلجه ودلقها علي دماغي وجسمي تلج فضلت اقاوح فيهم قالولي انتي مرهقه من تعب السفر يمكن بيتهيألك.مشيت معاهم وانا مش مقتنعه انا مصدقه اللي عيني شافته .بس عديت كل ده لما الايلم اللي فاتت عدت بخير ومحصلش اي حاجه.لكن كنت قلقانه من كلام البنات كل شويه حد فيهم يقول انه حس لحد بيعدي جنبه حد شاف خيال ده غير الكوابيس .لحد من شويه وكملت عياط وهما بيهدوها
شيماء...اهدي با سهيله احنا معاكي حصل ايه من شويه.
سهيله...اللنات كلهم كانوا نايمين قلقت ودخلت الحمام وخرجت سمعت في الاوضه صوت عياط مكتوم اتخضيت فكرت حد من البنات في حاجه او تعبان.مشيت ورا الصوت اترعبت لما لقيته بيزيد والبنات علي سرايرهم نايمين.
فجأه طلعت نفس البنت من جمب السرير بتاعي كانت مش باينه اتصدمت لما لقتها ماسكه كوبايه مايه بتشرب منها وبترجع ومره واحده لقتها قامت فتحت الباب وخرجت .وقتها انا صرخت والله مكنتش بحلم انا كنت صاحيه والله مكانش بيتهيألي.
شيماء...طيب اهدي يا سهيله وبطلي عياط احنا كلنا معاكي متخافيش.
ياسمين بعياط...وديني لماما يا اماني انا خايفه انا قولتلك ان الفندق ده في عفاريت مصدقتنيش
اماني...متخافيش يا ياسمين متخافيش يا حبيبتي.
شيماء....محمود حاول تشوفلنا اي حد صاحي من الناس اللي بتشتغل هنا يفهمونا في ايه.
محمود...حاضر يا استاذه شيماء خليكو بس هنا مع بعض وانا هروح اشوف اي حد و....
وقبل ما يكمل كلامه النور قطع
في الفندق كله.
البنات كلهم صرخوا وكل واحده فيهم مسكت في التانيه وبقوا يدورا بأيدهم علي موبايلاتهم
فتح محمود الكشاف بتاع الموبايل.
وكل بنت طالت موبايلها فتحت الكشاف.
شيماء...بصوت عالي اهدوا يابنات ارجوكم اهدوا.
سهيله...بدموع ورعب البنت هتيجي والله هتيجي .
ياسمين...😭😭😭روحيني من هنا يا اماني انا عايزه ماما
اماني...متخافيش ياحبيبتي هنروح والله.
مني...مي انا خايفه.
مي...متخافيش يا منب احنا كلنا مع بعض اقرئي قرآن
هناء...بصوت عالي الحقوني يا بنات احلام بتقع من ايدي.
جريت عليها شيماء ومني ومي سندوها ونيموها علي السرير
شيماء...حد فيكم يجيب برفيوم بسرعه او مايه.
بدأوا يفوقوا فيها وهي بتتنفض بين ايدهم وبتعيط.
احلام....مشوني من هنا مش عايزه اموت مشوني من هنا والنبي😭😭😭
شيماء...احلام متخافيش احنا كلنا جمبك يا حبيبتي.
محمود....انا هحاول اشوف اي حد من الفندق يساعدنا.
هناء...لا والنبي خليك معانا
محمود...متخافيش اسطي سعيد معاكم.
اسطي سعيد خليك معاهم هنا
سعيد...هتروح لوحدك.
محمود....متقلقش خليك معاهم انت بس.
مشي محمود براحه وهو ماسك الكشاف رغم انه كان بيحاول يتحلي بالشجاعه عشان البنات اللي مرعوبين.لكن هو كمان كان مرعوب اكتر منهم بكتير خصوصا بعد ما سمع كلام البنات واتأكد ان اللي هو كمان كان بيشوفه ويسمعه مش تهيؤات🥴🙄
ومرضيش يتكلم عشان ميخافوش اكتر.
نزل محمود تحت خالص وفجأه🏃🏃🏃🏃🏃
وللحديث بقيه.
#في_الفندق
#أميره_أسامه
البارت الخامس..❣️الأخير
((حل اللغز))
نزل محمود براحه وهو بيقرأ قرآن
لحد ما وصل تحت خالص وجهه
الكشاف علي المكان اللي فيه موظف الاستقبال ملقاش اي حد
خرج بره علي البوابه لقاه واقف مع الاتنين بتوع الامن وعامل النظافه.
خرج عليهم بغضب😡
محمود...أنا مش فاهم أنتوا أزاي
واقفين هنا وسايبين الناس فوق لوحدهم والدنيا مقلوبه.
واحد من الامن..خير بس يا أستاذ محمود في حاجه.
محمود...عايز تقنعني أنكم مش سامعين كل الصريخ و القلبان اللي فوق ده.
الامن...لا والله في حاجه ولا ايه احنا في مكاننا هنا مينفعش نتحرك خصوصا زي ما انت شايف النور قاطع والمكان هنا يعتبر بعيد
عن العمار. وطبعا منقدرش نسمع اللي فوق.
موظف الأستقبال...وانا خرجت لما النور قطع ومسمعتش أي حاجه.
محمود...طيب انا عايز اعرف ايه اللي بيحصل هنا في الفندق بالظبط.
الامن...مش فاهم!!
محمود...لا انت فاهم كويس عايز تقنعني ان مفيش اي حد اشتكي ولا مره وقال أن في حاجه غريبه بتحصل في الفندق.
محمد المسؤول عن النظافه...يمكن ده حصل مره او اتنين قبل ما تيجوا بأسبوع
بصله موظف الاستقبال بغضب هو والاتنين بتوع الامن
محمد...ايه بتبصولى كده ليه مش دب الحقيقه.دي شهادة حق ولازم
نتكلم صاحب الفندق كلمناه كذا مره وهو مكبر دماغه.
موظف الاستقبال....ليه ماهو اتحرك كذا مره.
محمود....انا مش فاهم اى حاجه.
موظف الأستقبال...بصراحه يا أستاذ محمود الشكوي اللي قدمتوها بخصوص المايه قبل كده
مكانتش اول شكوي دي كانت تقريبا تالت او رابع شكوي.
من حوالي عشر ايام قبل ما تيجوا جالنا معسكر شباب من شركه
وقعدوا يومين بس أشتكوا فيهم من المايه وتاني يوم الصبح أتفاجئنا انهم لغوا الحجز وراحوا مكان تاني ..في نفس اليوم بليل جه حوالي عيلتين هنا وبرضوا كانت نفس الشكوي وزاد علي كده انهم اشتكوا انهم شافوا حجات غريبه تاني يوم بليل مشيوا هما كمان.
وقبل ما تيجوا بيومين برضوا جه
ناس سكنوا قعدوا حوالي يوم ونص وكانت نفس الشكاوي وطبعا
قبل كده مكانش في اي شكوي خالص لان أخر حد سكن المكان ده كان من حوالي شهرين كنا لسه في شتاء شويه
جم هنا مجموعه شباب مع بعض من عرب مطروح
وكان معاهم بنات بس واضح انهم مش من البلد.
تاني يوم من بعد ما جم مشيوا بسرعه جداً وسابوا مبلغ اكبر من اللي المفروض يسيبوه ومن بعدها محدش سكن غير اللي قولتلك عليهم.
محمود.. ايوه يعني ايه مش فاهم
حاجه برضوا الفندق بيحصل في حجات غريبه البنات كلهم منهارين فوق كلهم بيشوفوا حجات غريبه
من اول ما جينا ومش واحده ولا اتنين اللي شافوا ده الكل بما فيهم انا و الاتنين السواقين اللي معانا
شوفنا و مرضيناش نقول عشان محدش يخاف لكن كده كتير.
ومش معقول انتوا متبقوش شوفتوا اي حاجه كل ده.
محمد....وهو بيبصلهم لا شوفنا يا أستاذ محمود وزي ما أستاذ عماد قالك احنا بلغنا صاحب الفندق وكل اللي عمله انه بعت كذا حد من رجالته لقوا في الفندق كذا مره يحاولوا يشوفوا في ايه ويدورا علي اي حاجه
لكن ملاقوش حاجه خالص وطبعا بعدها مقدرناش نتكلم لان ده أكل عيشنا.يمكن كان معانا كذا موضف تاني بس هما مستحملوش ومشيوا هتقولي أشمعني انتوا هنقولك اننا كلنا ظروفنا مش اوي وحضرتك عارف لقمه العيش مره.
الامن....زي ما محمد قالك كده لما أشتكينا وقولنا اننا بنشوف حجات غريبه .
قالنا باللفظ انا بعت ناس قلبت الفندق وفيش اي حاجه واللي مش عاجبه يمشي انا مش عايز اي حاجه تأثر علي سمعه المكان .
وطبعا احنا سكتنا
موظف الامن الاخر...علي فكره أحنا اشتكينا كذا مره كل مره كان حد بيشتكي كنا بنعرفه ولما احنا بدأنا نقول اننا بنشوف حجات غريبه بدأ يتحرك خصوصا لما....
سكت ثواني.
محمود....لما ايه؟
الامن....يعني الشباب اللي جم هنا من شهرين كان عددهم ست اشخاص ولما مشيوا كانوا خمسه و في واحد فيهم كان بيحاسب وبيعمل مغادره للكل.
ولما عماد قاله في واحده كانت معاكم تاني...قاله انها خرجت الصبح ومشيت عشان حصل خلاف وزعلت مع واحده من صحابها.
طبعا الموضوع هدي وسكتنا عادي وقولتا وارد فعلا لكن الغريب ان كل حاجه بتحصل غريبه في الفندق صوره البنت دي هي اللي بتظهر للكل.احنا نفسنا شوفنا نفس البنت كذا مره وفي ثانيه بتختفي.
محمود ...وايه اللي عرفكم ان البنت اللي بتظهر دي هي نفس البنت اللي كانت معاهم .
عماد موظف الاستقبال...البنت دي ملامحها لايمكن تتنسي يا استاذ محمود كانت جميله جمال مش طبيعي.ملامحها هاديه وبريئه جدا
عيونها شبه لون البحر الرايق
وفعلا هي دي البنت اللي بتظهر وعشان كده انا خدت بالي وقتها لما خرجوا اصحابها من غيرها
بس قولت يمكن خرجت فعلا زي ما قال وانا مشوفتهاش والامن كمان قولت يمكن كانوا مشغولين.
محمود...تقصد تقول ان ممكن تكون البنت دي اتقلت هنا في الفندق 🙄.
عماد....احنا فعلا كلنا شكينا في كده بس فعلاً صاحب الفندق مكانش ساكت وقلب الفندق كل الاوض شافها وفتش فيها وتحت وفوق وقلب الدنيا لكن ملقاش اي حاجه يعني حتي لو اتقتلت هي مش هنا بس الاكيد ان لو هي اتقتلت واللي بتظهر دي روحها
فا لازم تعرف ان هي مش بتاذي اي حد.
محمود...يعني عشان مش بتأذي مطلوب من الناس انها تسكت وتتأقلم علي الرعب ده.
وفجأه النور رجع تاني.
محمد....الحمد لله النور رجع.
دخلوا جوه من علي البوابه.
محمود...الحمد لله عموما لازم تبلغوا صاحب الفندق تاني لازم يبلغ الشرطه تيجي بنفسها تشوف المكان عشان سمعه المكان مش اهم من روح محبوسه وعايزه ترتاح ده لو فعلاً زي ما بتقول البنت أتقتلت.
عماد...ان شاء الله يا استاذ محم...
وفجأه سمعوا صوت صريخ جامد في الفندق هز اركان المكان كله.
جري محمود علي فوق وجريوا كلهم وراه علي فوق.
طلعوا بسرعه فوق لقوا البنات بتصرخ والكل بينادي علي مي.
محمود...بفزع في ايه
مني بانهيار أختي يا محمود مش لاقينها مش لاقين مي.
محمود...يعني ايه مش لاقينها
الامن...حد يفهمنا اللي حصل براحه.
شيماء...بخوف اول ما النور رجع ثواني ومني قالت مي فين.وفضلنا ننادي عليها لا لقيناها ولا بترد.
الامن...متاكدين ان هي كانت معاكم.
مني...بانهيار مي كانت واقفه جمبي وايدي في ايدها اول ما النور جه ملقتهاش معرفش راحت فين ولا سابت ايدي ازاي شوفولي اختي فين ومشونا من هنا😭😭
......
النهار طلع وبدأ اليوم الجديد يعلن عن مفجأه جديده.
الامن ومحمود والسواقين وعامل النظافه حتي موظف الاستقبال ساب مكانه وبداوا يدوروا علي مي في كل مكان فتحوا كل الاوض و في نفس الوقت بلغوا الشرطه اول ما حسوا الموظفين ان الدنيا بدات تولع في الفندق بسبب اختفاء مي. مرت حوالي ربع ساعه من بعد ما رجع النور واكتشفوا اختفاء مي كانوا بيفتحوا في الاوض والحمامات
حتي البنات تمالكوا اعصابهم وبدأوا يدوروا معاهم علي مي وطبعا بلغوا صاحب الفندق اللي جه بأقصي سرعه هو واخوه .
وشريكه في الفندق.
..........
جات الشرطه ونزلوا باقي البنات تحت في الأستقبال لكن مني واصحابها صمموا يفضلوا فوق وبدأوا يدوروا علي مي.
لكن مكانش ليها اي آثر في كل الغرف.
طلعوا الدور اللي فوق مكانتش موجوده واخر مكان قرروا يدوروا فيه كان سطح الفندق طلعوا فوق كان الباب مفتوح دخلوا مع بعض افراد الشرطه ووراهم البنات واصحاب الفندق.
لكن فجأه الصدمه وقفتهم كلهم مكانهم لما لمحوا مي قاعده في الارض منكمشه علي نفسها في ركن في السطح وحاضنه رجلها ودموعها نازله بتجري من غير اي صوت.
جريوا عليها كلهم وجريت مني وهي بتصرخ بأسمها حضنتها كان جسمها عباره عن كتله من التلج
وبتترعش جداً ووشها ابيض
مني...🥺 فيكي ايه وجيتي هنا ازاي .
كانوا كلهم واقفين قدامها.
رفعت مي وشها ليهم بذهول وهي دموعها نازله.وبصوت مهزوز نطقت كلامها اللي صدم الجميع🙄
مي...حاولت ...حاولت ..بس معرفتش حاولت اوقف كل حاجه وانقذهامنه بس معرفتش.صوتي مكانش طالع كنت سمعاكم بتنادوا عليا ومش عارفه اتكلم.
هي جات خدتني ومشيت وراها طلعتني لحد هنا وفجأه. لمحت واحد من ضهره ماسكها من شعرها وبيجرها وراه وبيشدها وهي واقعه في الارض بتصرخ صوتها كان بيرن في ودني حاولت اوقفه حاولت اصرخ وانادي علي اي حد يلحقها معرفتش صوتي اختفي.. ضربها علي راسها في الحيطه وقعت بين ايده بس كانت فايقه مش فاقده الوعي.
شاورتلي بايدها عشان الحقها شالها علي كتفه وطلع بيها السلم الحديد ده.
شاورت مي علي سلم في قلب السطح بيوصل لخزان المايه.
مي...بانهيار فتح الخزان ورماها جوه مكانتش عارفه تقاومه قفل عليها الغطا ونزل بسرعه وقفل وراه كنت حاسه انها بتخبط و بتعيط وتصرخ كنت حاسه بصراخها المكتوم وهي بتغرق جوه الخزان لحد ما الصوت اختفي..كملت بانهيار😭😭😭
مقدرتش أنقذها ولا قدرت أطلعها بعد ما سابها حاجه كتفتني في مكاني .هي كانت محتاجه حد يلحقها مكانتش تقصد تخوف حد فينا او تأذيه هي بس كانت عايزه حد يحرر روحها عشان ترتاح.💔
.....
الصدمه كانت مرسومه علي ملامح الجميع لدرجه ان رجال الشرطه مكانوش قادرين يتحركوا لحد ما الظابط امرهم يطلعوا بسرعه يفتحوا الخزان ويتحققوا من صحه كلام مي.
طلعوا العساكر علي السلم وبداوا يحاولوا يفتحوا الخزان الكل كان واقف مترقب كل خطوه ومستنبن يشوفوا حقيقه كلام مي.
وفجأه نظرات العساكر ظهر عليها الصدمه لما فتحوا ولقوا جثه البنت صاحبه الفستان ((الأحمر))
غرقانه جوه الخزان.
ساعات بسيطه عدت..
الشرطه ملأت المكان كله
طلعوا اخيرا جثه البنت من البير وسط رعب ودموع الكل .
بنات أغم عليها لما شافوا جثتها وبنات تانيه بمجرد ما شافوها طالعه من الخزان جالهم نوبه
ترجيع غير طبيعيه لما اتاكدوا ان طعم المايه الغريب كان نتيجه وجود الجثه في الخزان..وكان اولهم مني واحلام اللي تقريبا مكانش في نقطه مايه في جسمهم من كتر الترجيع.
أتحولوا اغلبهم للمستشفي بسرعه
اتعملهم غسيل معده عشان ميحصلهمش تسمم وفضلوا كلهم حوالي ساعتين تحت الملاحظه.
رغم ان ملامح البنت أتغيرت تماما نتيجه وجودها في المايه طول الفتره دي.
جسم منتفخ ومشقق ومفتح لكن قدروا الموظفين يعرفوها من لون عينها المميز ويأكدوا انها هي البنت فعلا اللي جات مع الشباب من شهرين.
قضوا البنات والموظفين يومهم السادس في تحقيق ومستشفيات
سمعوا اقوال الكل.
وعدي ثلاث ايام وهما موجودين بعد ما اهاليهم عرفوا وقدروا أبهاتهم يسافرولهم ويبقوا معاهم
حتي خالد سافر مع والد مي ومني.
قدرت المباحث في خلال ست ايام من التحقيقات تجيب المشتبه فيهم اللي كانوا مع البنت يوم الحادثه وبعد تحقيقات كتير عرفوا ان البنت دي اسمها
(( آلاء)) 🙄
من القاهره اهلها بلغوا عن أختفائها من حوالي شهرين تقريبا نفس المده اللي سافرت فيها
وقال أخوها الكبير ان الاء كانت بتشتغل في قريه سياحيه في الساحل الشمال من حوالي 3 سنين لكن قبل اختفائها بكام شهر كانت كل تصرفاتها غريبه ديما خايفه وقافله علي نفسها وعلب طول بتعيط. وبعد التحقيقات وصلوا لصديقه الاء المقربه واعترفت ان الاء قبل اختفاءها بكام شهر قالتلها ان في شاب اتعرف عليها لما جه أجازه هو واصحابه في نفس الفندق اللي هي بتشتغل فيه وطلب منها عنوانها عشان يطلب ايدها..وفي يوم آلاء حكتلها انه طلب منها انه يقعد معاها في مكان عام يتعرف عليها اكتر ويعرفها علي نفسه قبل ما يطلب ايدها.وافقت آلاء وراحت قابلته.تاني يوم من المقابله دي كلمتها الاء وهي منهاره قالتلها انها اتفاجئت انها صحيت لقت نفسها في شاليه وهو نايم جمبها وعرفت انه أعتدي عليها.
قولتلها تفضحه وتعرف أهلها بس الاء كانت بتخاف جدا وخوفها ده اللي خلاه أستغلها. وبقي يهددها انه هيسيبها لو مراحتلوش الشاليه
وطبعا هي راحتله تاني وعدها انه هيتجوزها وبعدها سافر وبقي كل كام اسبوع يرجعلها ويطلب انها تروحله وهي طبعا مكانتش قادره ترفض عشان خايفه انه يسيبها رغم اني قولتلها كتير ان ده غلط بس هي خالتها كانت وحشه جدا وبتعمل ده وهي مجبره كانت خايفه علي اخوها ووالدتها ووالدها من الفضيحه.
طبعا هو كان معرفها مكانه في مرسي مطروح وكان بيتعامل معاها علي انها خلاص حد يخصه
وفي يوم طلب منها انها تروح تقصي معاه كام يوم في مطروح وهي كالعاده مقدرتش ترفض وفعلا راحتله كانت بتسمع كلامه
وبتطاوعه في كل اللي يطلبه وعشان يطمنها كتب لها ورقه عرفي نسخه معاه ونسخه معاها.
الاء كانت طيبه اوي ويضحك عليها بسهوله اطمنت شويه وقدر يقنعها انه بيحبها و حسيت من كلام آلاء انها هي كمان بدأت تحبه
وتتعلق بيه جدا كانت شايفه رغم اللي عمله ده انه بيحبها وان اللي حصل منه غلطه هو هيصلحها كان شكله من كلام آلاء انه ابن عيله كبيره من عرب مطروح.وكان بيصرف عليها كتير كانت بتكلمني
تحكيلي عن الهدايا اللي بيجبهالها كل ما تروحله او يروحلها وكانت بتقولي عن الفلوس الكتير اللي كان بيديهالها.
وفي يوم أكتشفت آلاء انها حامل
اتصلت بيا وهي منهاره قولتلها لازم تعرفه وتقوله انها حامل وادام بيحبها يبقي يتحرك ويطلب ايدها بسرعه قبل ما حد يكتشف حملها. وفعلا سمعت كلامي لاول مره وياريتها ما سمعت كلامي.
قالتله وعرف قالها لازم تنزل اللي في بطنها لان في مشاكل بينه وبين والده كبيره جداً ومش هينفع خالص يفتاحهم في اي حاجه خصوصا ان فكره جوازه من حد براهم في حد ذاته كارثه لان العرب بيتجوزوا من بعض.
وبعتلها مبلغ تعمل بيه العمليه وتنزل اللي في بطنها
آلاء كانت مرعوبه لكن مكانش قدامها بديل وقررت تعمل العمليه
نصحتها كتير متعملش كده خصوصا انها في الوقت ده كانت بعيد عننا كانت في الساحل الشمالي لكن مسمعتش كلامي وراحت وبعد ما اتفقت علي العمليه ..وبمجرد ما شافت شكل المكان خافت ووقعت من طولها.
وطبعا الدكتور لما فاقت رفض يعملها العمليه احسن يجرالها حاجه ويروح في داهيه.
ومشاها.رجعت حكتلي كل ده وهي منهاره قولتلها تعرفه وهو يتصرف هو السبب في كل اللي هي فيه ده.
كلمته فعلا وطلب منها تروحله وهو يحاول يتكلم مع اهله ويشوفها ويتعرفوا عليها وأقنعها انهم لو شافوها هيحبوها وهيواققوا....حسيت انه ممكن يغدر بيها قولتلها متروحش ونصحتها لكن مسمعتش كلامي كانت زي اللي متعلق بقشايه.سافرتله واليوم اللي راحت فيه قالتلي انها هتبات معاه في الفندق عشان كانت راحه متأخر وان هو وعدها ان تاني يوم هياخدها ويعرفها علي اهله.
انهارت صاحبتها من العياط وهي بتحكي...وكملت من وسط دموعها
مكانتش تعرف انه هيغدر بيها ويقتلها ومن بعد اتصالها ده أختفت آلاء وموبايلها أتقفل ولما بلغوا اهلها بأختفائها الشرطه مقدرتش تحدد مكانها وقالوا انه عشان يوصلولها عن طريق الموبايل لازم عالاقل يكون الموبايل مقفول من كام ساعه وطبعا اول بلاغ اتعمل عن أختفاء آلاء كان بعد أسبوع ..وانا مقدرتش اتكلم وقتها مكنتش متخيله ان دي هتكون النهايه والاء تتقتل وقولت هتظهر وخوفت ابقي بعملها مشكله علي الفاضي وفي نفس الوقت كل اللي كنت اعرفه عن الولد ده هو اسمه لكن معرفش مكانه ولا اي حاجه عنه.
............
خلصت التحقيقات وبعد أعتراف صاحبه آلاء وشهاده الموظفين في الفندق والتعرف علي الشاب اللي كان معاها. تم القبض علي المتهم
واعترف بكل حاجه ومثل جريمته زي ما قالت مي بالظبط.
واخيراً خلصت حكايه صاحبه الفستان ألاحمر وأتحل اللغز اللي
((في الفندق )))
واتحررت روحها.💔
رجعوا البنات علي الفندق عشان ياخدوا حاجتهم ويرجعوا
بعد وقت بسيط كانوا لموا كل حاجه ملامح الصدمه والصمت كانت مرسومه علي وشوشهم محدش فيهم بينطق بكلمه قدروا يتحرروا من خوفهم اللي كان مسيطر عليهم لكن اتبدل الخوف بحزن علي ألاء ضحيه الغدر
خرجوا كلهم ركبوا مع بعض واهاليهم كانوا معاهم
وقبل ما العربيه تتحرك بيهم بصت مي بصه اخيره علي الفندق ورفعت عينها علي اخر دور المكان اللي شهد علي الحادثه وفجأه لمحت ظل ألاء من فوق واقفه مبتسمه وبتشاورلها 💔
نزلت دموع مي ورفعت بهدوء كف ايدها علي شباك العربيه وابتسمت وهي بتودعها🥺💔
........
رجعوا البنات مع اهاليهم نفسيتهم كانت تعبانه جداً ومش قادرين ياكلوا ولا يشربوا بسبب تعب معدتهم ومعرفتهم بسر المايه الغريب. وفضلوا علي حالتهم دي لمده شهرين لحد ما قدروا يتعافوا
شويه بشويه🙏🏻
وأخيراً حلقت روح آلاء في السما
واتحررت من سجنها داخل البير
ورجعت الحياه طبيعيه عند البنات لكن سابت فيهم آثر ودرس عمرهم ما هينسوا في حياتهم
وهو ان مهما كانت عواقب الكارثه اللي ممكن يقعوا فيها ميخلوش الخوف يسيطر عليهم ولا يستسلموا لأي شخص ويسيبوه يجبرهم علي حاجه او يستغلهم
اتعلموا انهم يتكلموا وان مهما كان خوفهم من عقاب الاهل مينسوش ابدا انهم ديما هيكونوا السند والستر والامان 🙏🏻❣️
تمت 🙏🏻❣️
#في_الفندق
#أميره_أسامه
