 |
لعنة_الفراعنة
عشقت_فرعون
الفصل_الاول
بقلم رحمه نبيل
$قبل ما نبدأ حابه اوضح ان الروايه خياليه لاتمت للواقع بصله ممكن يكون فيه تشابهه في الاسماء عن غير قصد بس الروايه خياليه تماما وبيبقي فيه حجات علميه او تاريخيه هوضحها في نهايه كل بارت علي شكل معلومه خفيفه
وده بس مجرد البدايه 😂😂
🌸💦قال عمر بن عبدالعزيز -رحمه الله- في خطبة له :
*يا أيُّها الناس مَنْ ألمَّ بذنبٍ، فليستغفِر ِ اللهَ ولْيَتُب، فإن عاد فليستغفر الله وليتب، فإن عاد فليستغفر الله وليتب،فإنَّما هي خطايا مُطوَّقةٌ في أعناق الرجال، وإنَّ الهلاك كلَّ الهلاك في الإصرار عليها*
📮جامع العلوم والحكم لابن رجب
🌷🌷🌷🌷🌷🌷🌷🌷🌷🌷🌷
في صباح جديد في منزل يقع في حاره بسيطة جدا كانت تستلقي هذه الفتاه بكل كسل علي الفراش وهي تتسطح علي ظهرها ويدها ممده علي السرير بشكل يسير الضحك
فجأه دخلت زوبعه للغرفة
فكان طفل صغير قفز بجانبها علي الفراش
الطفل / طنط ميسره طنط ميسره اصحي يلا ماما بتقولك هتتأخري علي الجامعه طنط ميسره
ميسره وهي تحمل الطفل وتلقيه بعيدا / غور ياض انت وامك عايزه انام
صعد الطفل مجددا وهو يزيد في نبره صوته / يلا اصحي هتتأخري طنط ميسره طنط ميسره
استيقظت ميسره ونظرت له نظره ناريه ثم امسكته من ثيابه / هو انا ياض مش قولت غور يبقي تغور مغورتش ليه بقي
تحدث الطفل ويدعي حموكشه / الله بقي ده ذنبي يا ناس اني خايف علي مستقبلي
ميسره بسخريه / مستقبل مين يابا انا منعدمه المستقبل يلا غور واقفل باب الشقه وراك
ذهب الطفل مسرعا وأغلق باب الشقه بعنف
ميسره / اه يا طور انت هتكسر الباب الله يحرقك انت وامك في ساعه واحده
دخلت للحمام واستحمت وخرجت وارتدت ثيابها وأخذت حقيبتها وذهبت للمطبخ واخرجت خبز ومربي وهذا هو افطارها المعتاد خرجت من الشقه وهي تتمتم بغيظ /الواحد ميعرفش يتنيل ينام زي الناس
نظرت وجدت حنان (والده حموكشا وجارتها) امرأة تتدخل في اي شئ سواء لها علاقه به أو لا
نفخت ميسره بضيق / صباح الخير يا حنان خير
حنان / خير يا حبيبتي بس انا شوفتك امبارح رجعتي بليل متأخر خير كفي الله الشر
ميسره بضحكة مستفزه / اصل كان عندي نمره في الكباريه يا حنان استريحتي
حنان وهي تضرب علي صدرها بحركه شعبيه / كباريه كباريه ايه ياختي هو انتي بتشتغلي فيه
ميسره وهي ترحل / روحي يا حنان زغطي جوزك زي ما بتعملي مش نقصاكي علي الصبح
خرجت من العماره تحت استنكار حنان وتمتمتها وذهبت لموقف السيارات وكل سياره تأتي تكون محمله تماما نظرت في الساعه بضيق / مش بدأت بحنان يبقي اليوم ضرب بركاتك يا حنان
جاءت سياره اخري وكان بها مقعد واحد جاءت لتصعد ولكن دفعها شاب وركب هو
ميسره / ادخلي انتي يا ناديه
بعد ذهاب الباص نظرت ميسره بقرف / عبو مناظركم علي الصبح
جاء باص اخر وكان به مقعدان جلست هي في واحد وجاءت فتاه جلست في الثاني ونظرت لها وتحدثت بسماجه / معلش ممكن تنزلي وتركبي صاحبتي عشان احنا مع بعض
نظرت لها ميسرة بسخريه / يا ضنايا تصدقي قطعتي قلبي لا واتأثرت وهعيط اقولك انزلي مع صاحبتك يلا عشان متقفش لوحدها ياماما يلا يا حبيبتي قال صاحبتي معايا قال ناقصه هي علي الصبح اطلع يسطا دي عالم فاضيه انطلقت السياره تشق الطريق حتي وصلت للمحطة المطلوبه هبطت وركضت للباص الاخر وهو باص عام كبير لم تجد به مكان للجلوس نظرت في ساعتها هي متأخره بما فيه الكفايه ركبت الباص وانطلق هو طريقه تجاه الجامعه وفي الطريق كانت تحمل كتابا وتقرأ فيه فرغم انها تعتبر فاشلة في الحياه الا انها متفوقه في مجالها فهي طالبه كليه آثار الفرقه الرابعه وصل الي الجامعة هبطت ودخلت للجامعه وركضت تجاه المدرج بسرعه وهي تدعي الله أن يكون الدكتور تأخر دخلت المدرج ولم تجد الدكتور موجود ابتسمت وتحدثت بصوت مرتفع قليلا / الحمدلله دكتور بيومي فؤاد لسه مجاش
سمعت صوت حاد من خلفها / لا للاسف دكتور بيومي فؤاد جه
توقفت برعب شديد وهي تستدير ببطئ نظرت له وابتسمت بغباء / دكتور محي حبيب الطلبه
أشار بيده / بره يا ميسره
ميسره وهي تكاد تبكي / يا دكتور ده انا صحيت بدري عشان محاضره حضرتك وتأخرت في المواصلات والله
نظر لها الدكتور وتنفس بحده ثم أشار لها للدخول فمهما حدث هي طالبه مجتهدة جدا
دخلت وهي تصفق بيدها / الحمدلله الصحيان بدري ما طلعش علي الفاضي
جلست بجانب احدي الفتيات التي نظرت لها بقرف
ميسره / في ايه يا قلبي اجبلك مخلل تحدقي بيه بدل القرف اللي انتي فيه دة
نظرت لها الفتاه بغيظ ولم ترد فمن له القدره علي غلبها الكلام
تحدث الدكتور لينتبه اه الجميع / طبعا قبل ما الاستاذه ميسره تقاطعنا
رفعت ميسره يدها وكأنها تحي الجماهير
الدكتور /هطردك يا ميسره
ضحك الجميع عليها
الدكتور / احم كنت بقول ان المشروع الجاي مهم جدا وعايزه فردي يعني كل واحد لوحده عايز كل واحد هيتم ترشيح ليه أثر فرعوني يعمل عنه البحث وتكون معلوماته مبنية علي تجربه بمعني بنفسكم مش كوبي بيست من النت يعني تروح بنفسك الأثر اللي هنتكلم عنه وتصوره بنفسك من الزوايا اللي هتستخدمها واخر ميعاد لتسليم البحث هيكون يوم الخميس اظن كلامي واضح
علت الهمهمات في المدرج بسبب صعوبه هذه الشروط بينما ميسره لم تهتم بالامر كثيرا
انتهت المحاضره وخرجت ميسره من المدرج وهي تسير بلا ادني اهتمام لأي شخص
تحدثت فتاه ما للفتاه التي كانت تجلس بجانب ميسره / مين دي يا وعد
نظرت وعد بقرف لميسره / دي ميسره عبدالمنعم
ثم تحدثت بحقد وسخرية / يعني هو فيه حد ميعرفش ميسره عبدالمنعم
الفتاه بتعجب / انتي عارفه اني لسه منقوله السنه دي بس هي مشهوره اوي كده
وعد بكره / ميسره الاولي علي الدفعه بتعرف تتكلم اكتر من لغه من ضمنها اللغه المصريه القديمة مشهوره في الجامعه عند الدكاتره
الفتاه بتعجب / بتتكلم لغه مصريه قديمه مين اساسا بيتكلم اللغه دي لحد دلوقتي
وعد بسخريه / مفيش لان اللغه دي ميته اساسا بس لا استاذه ميسره حبت تكون مختلفه عن الكل وتتكلمها وبطلاقه كمان
الفتاه بتعجب / اللي يسمعك بتتكلمي عليها بالطريقه دي يقول انك معجبه بيها واوي كمان
الفتاه بغل / لا بس لازم تعرف عدوك كويس اوي عشان تقدر تهزمه يلا هنروح نفطر مش هنفضل طول النهار نحكي ونتحاكي في أمجاد ميسره هانم
سارت الفتاه خلفها بتعجب كبير منها
بينما ميسره كانت تجلس في الكافتيريا تتناول طعامها بشراهه ولا تهتم لاحد كالعاده
لاتملك ميسره اي صديق أو هي من حرصت علي ذلك تكره كثيرا تطفلهم علي حياتها فمنذ اختفاء والديها لم تتحدث مع احد نعم فوالديها اختفيا بطريقه غامضه عندما كانت في العاشره من عمرها فاخذها خالها وقام بتربيتها مع اولادة ولكن عندما اردا السفر للخليج قامت الحرباء زوجته بالطلب منه أن يتخلص منها حسنا هو مشكور انه استضافها كل هذا الوقت هي تقدر هذا كثيرا لذا لم تهتم عندما طلب منها الرحيل بل عادت لشقتهم القديمه وهناك تعرفت علي حنان امرأه متطفله كثيرا هي وزوجها ذاك البغيض الذي ينظر لها نظرات سيئه ووقحه ودائما ما يقول عنها اشياء سيئة هي ليست بحاجه لتبرير شئ لاحد لذا تعيش حياتها دون ادني اهتمام لشخص آخر انهت الساندويتش الخاص بها وكانت علي وشك الخروج
فاوقفها شاب ما يقف في طريقها
رفعت نظرها له بحاجب مرفوع /نعم يا عنيا
الفتي بسماجه وهو ينظر لها من اعلاها لاسفلها / انتي بقي ميسره
ميسره وهي تبتسم بخجل مصطنع / اه انا
الشاب بضحكة ظن انه سيجذبها بها / طلعتي زي ما بيقولوا عليكي
ميسره وهي تنظر له ببسمه بارده / وياتري بيقولوا ايه
الشاب وهو يقترب منها ببسمه ويضع كفه علي كتفها / بيقولوا انك صعب تخلي حد يكلمك وصعب حد يقرب منك بس علي مين
ميسره وهي تنزع كتفها من اسفل يده وامسكت يده بعنف والقتها بعيدا بقرف وصفعته صفعه دوي صداها في المكان / حسك عينك تقرب مني خطوه واحده انت فاهم وإياك سامع إياك شيطانك يوزك وتلمسني تاني فهمت ولا لا
ثم نظرت بغضب للتجمع حولها / خلاص الفرح خلص
ثم تركتهم ورحلت بهدوء وكأنها لم تخلف عاصفه كبيره خلفها
اقتربت وعد من هذا الشاب وابتسمت بطريقه مرعبه / اوووه ياسر باشا يتعمل فيه كدة تؤ تؤ ايه ياباشا انت عجزت ولا ايه بس
ياسر وهو ينظر لها بحده / بلاش انا يا وعد انتي فاهمه
ثم تركها ورحل بغضب شديد
بينما ضحكت وعد باستمتاع / اوووه يا راجل خوفت منك اوي
عادت ميسره للمنزل وهي متعبه وكانت تحمل الأشياء التي اشترتها للمنزل نظرت لهم بتعب فهذا اخر مال تملكه من تعبها نعم فهي كل سنه تقوم بصنع ملخصات لمختلف الكليات ومختلف الأقسام حتي تكسب المال وكان الجميع يطلب الملخصات الخاصه بها وذلك لبراعتها الكبيره
تنهدت بثقل ورمت نفسها على الفراش وذهبت في نوم عميق
في الجامعه كان هذا الشاب الذي قام بمضايقه ميسره امام مكتب الدكتور المسؤول عن المشاريع يقترب منه ببطء وهو ينوي شيء وهو ليس بالجيد ابدا
فجاه سمع صوت غريب خلفه نظر فوجد هذه الفتاه المزعجه ضحكت بسخريه وقالت /بتعمل ايه هنا يا باشا انت ناوي عليها ولا ايه
نظره لها ذلك الشاب غضب وقرف وتحدث قائلا /عايزه ايه انتي...... انتي بترقبيني ولا ايه
ضحكت بشده وقالت / لا مش براقبك يا باشا بس اللي جابني هنا هو هو اللي جابك هنا
نظر لها بتعجب
ابتسمت واقتربت منه وقالت بهمس / ميسره
ابتعدت عنه بكل بطئ وهي تراقب تعبير وجهه نظر اليها في خبث قائلا / امممم برده عندك مشكله مع ميسره
ضحكت بشده وهي تقول / امال ياباشا
تحدث الشاب والذي يدعي ياسر / وانتي بقي ناويه علي ايه
وعد بغضب / ناويه اعلمها الأدب اخليها متحاولش تتذاكي علي حد تاني
تحدث بتعجب / هتعملي ايه
نظرت له /انا ولا حاجه بس كنت بفكر اني العب في درجتها عشان تشرف كمان سنه هنا
ضحك الشاب بسخريه / وانتي مفكره هتعدي عليهم يعني الأولى علينا كلنا لمده تلات سنين بقدره قادر في السنه الرابعه تشيلها
نظر بخبث اكثر / احنا بس
عايزين قرصه ودن ليها
نظرت بتعجب له وهو يخرج المفتاح الخاص بمكتب دكتور يحي / هتعمل ايه وجبت المفتاح ده ازاي
أشار لها أن تصمت ودخلوا للمكتب واغلقوا خلفهم بسرعه كبيره وابتسم هو بشر وهو ينظر للمكتب /جبت المفتاح منين فبتاع الأمن حبيبي حليت بقه وهو جابه اما هعمل ايه فهلعب شويه كده
نظرت له بخوف قليلا علي ضحكته هذه وهي تري انه تقريبا جن
استيقظت ميسره وهي تنظر حولها كان الظلام منتشر في الرجاء لابد انها نامت من التعب بعد عودتها من الجامعه
نهضت وذهبت للحمام واستحمت ثم خرجت للمطبخ ونظرت للاشياء التي اشترتها ثم بدأت تعد لها شئ خفيف لتأكله قبل أن تذهب وتري المكان الذي ستقوم بعمل بحث عنه انتهت من الطعام وغسلت الأواني ثم كادت تدخل لغرفتها ولكن سمعت صوت طرق علي الباب نظرت بتعجب من يمكن أن يسأل عنها الان ذهبت تجاه الباب وهي تزفر بضيق / جايه جايه والله لاطلع اقطعلك صباعك ياللي فرحان بالجرس انت
فتحت الباب بعنف وجدتة ذلك السمج زوج حنان (علي)
ميسره بصراخ / فيه ايه فرح اهلك هو عمال ترن ترن ترن ايه
علي وهو يمسح علي كرشه بقرف / الله فيه اي يا ست البنات اصل قولت تلاقيكي نايمة ولا حاجه ف
قاطعته بسخريه / فقولت اما اقرف اللي خلفوها ها اخلص يا اسطا علي عايز ايه
علي بسماجه / لا اصل مشوفتكيش وانتي راجعه فقولت اطمن عليكي
ميسره وهي تسبل اعينها بخجل مصطنع / ياراجل بقي
ثم غيرت نظرتها للحده / وانت مالك انت وعايز تشوفني لما ارجع بتاع ايه مش عارفه انا اتكل علي الله انت متجوز وخلف خليك في عيلتك هما أحق بيك
علي وهو ينظر لها بحده / طب مادام كدة يبقي هاتي الإيجار اللي متأخر عليكي ولا هتاكليه عليا
نظرت له ميسره بقرف وذهبت للداخل ثم عادت وهي تحمل بعض الأموال التي تبقت من أموال الملخصات ووضعتها في يده بحده / اتفضل هوينا
نظر للاموال /ايوه بس دول شويه انا عايز 400
ميسره بقرف / 400 عفريت لما يلبسوك يا معفن انت هما 200 جنية وتبوس ايدك وش وضهر مش كفايه الكهربا اللي بتترعش ولا السباكة اللي عندها تبول لا إرادي لا وكمان عايز تاخد 400 جنيه
علي وهو يتحدث بحده / ده اللي عندي ولو م......
قاطع كلامه إغلاق الباب في وجهه
نظر له بغيظ هذه الفتاه الغريبه منذ سكنت هنا وحدها وهي تتصنع الثقل عليه ولكن لن يكون علي صاحب اكبر ورشه لتصليح السيارات ان لم تأتي اليه راكعه
بينما هي زفرت بشدة من الداخل / يا اخي ابو ام منظرك ده علي المسا قفلت ام اليوم
دخلت للغرفة و جلست علي الفراش وفتحت اللاب ثم فتحت ايميل الكليه للخاص بها وكتبت الكود الخاص بها والرقم السري وانتظرت قليلا حتي ظهر لها موضوع البحث الخاص بها فتحت اعينها بصدمه وتحدثت قائله / ياولاد كوم شكاير اليهود انتم ايه الجنان اللي فيكم دة
نظرت أمامها بصدمه /هعمل بحث في منطقه kv 62 اكيد هما اتجننوا
نظرت وعد لياسر بصدمه مما فعل حيث كانت تجلس معه في سيارته / ايوه بس المنطقه دي من أكبر المناطق اللي عليها كلام انه انه............
نظر لها ياسر وهو يدخن سجارته بقذاره / عارفه عليها لعنه بس يلا خليها تتربي وغير اللعنه كمان محتاجه سفر طويل
هزت رأسها بايجاب / اها للاقصر بس انت متأكد انها هتروح يعني ممكن تعترض او تبلغ اي حد من.....
ياسر بضحك / اللي زي ميسره دي مش مهتم بحاجه هتروح وهي مش في دماغها ولا الهوا دي واحدة ضاربه الدنيا ميت جذمه ومش هيهمها اي حاجه
ضحكت وعد بخبث / صدق صعبانه عليا اوي
نظر لها ياسر بحاجب مرفوع / صدقتك ههههههههه
وعد وهي تنظر أمامها بشر كبير/ يلا خليها ترجع من الرحله دي ملبوسه ولا مترجعش احسن عشان تعرف مين وعد المسيري
نظر لها ياسر وابتسم بسخريه عليها ثم اكمل سجارته بشرود وهو يفكر فيما فعله ونتيجته
نظرت ميسره للاب الخاص بها واغلقته بعنف / ابو اشكالكم يا جدع ده لو عايزين تخلصوا مني مش هتعملوا كدة
نظر أمامها قليلا ثم تنهدت بثقل / اهدي يا ابو المياسر كدة آخرها ايه هتصيبك لعنه وده كله كلام فشنك وحتي لو حقيقي هو انتي يعني ليكي حاجه تزعلي عليها ولا تفتقديها كله محصل بعض
نظرت للساعه وجدتها تشير العاشرة مساء / ياتري مكتوب ايه ليا حياتي هتستمر كده ولا هتتغير يارب
نظرت للخزانه الخاصه بها وذهبت واخرجت صندوق يبدو عليه القدم اخرجته ونظرت له بحزن وامتلئت عينها بالدموع فهذا اخر ما تبقي لها من والديها فتحته ونظرت له ومسكت الرساله التي تقرأها للمره التي لاتعرف عددها هذه الرساله المليئه بالالغاز (وحينما تشرق شمس العين تظهر المخلصة وتنير الكون من عتمه الطاغيه فقط ننتظر شعاع الخلاص حتي يشرق وتتعامد علي العين وفي ذلك الوقت نعلن ان الحرب بدأت)
نظرت لها وهي تتنهد بجهل وتحدثت بسخريه / العجل في بطن أمه ايه ام الهري ده هو بابا وماما كانوا مشعوذين ولا اية الله يسامحك يا حج يعني يوم ما تسيبلي حاجه تسيبلي تعويذه مش كنت سيبتلي خمسه جنيه تنفعني حتي
وضعت الورقه في الصندوق مجددا وهي تضحك / خلينا كدة يا ابو المياسر لحد ما هتموتي بسبب خفه دمك دي في مره
نظرت للمراه وهي تضحك / اي نعم محدش يعرف ده بس انتي دمك عسل يابت هههههههههه
يلا غوري بقا اتخمدي عشان بكره في لعنه مستنيه ياباشا هههههههههه
ذهبت للنوم وهي تفكر فيما سيحدث مستقبلا ولكنها ابتسمت ونامت
نعم فميسره هي أكبر مثال للتفاهه وخفه الدم ولكن مع نفسها فقط هي لاتظهر ذلك لاحد بل تظهر الجانب (البلطجي) بداخلها ميسره لغز كبير حير الكثيرين من قبل وسيظل لغز دائما ولكن هل هناك من يستطيع فك شفرات هذا اللغز......
&معلومه خفيفه &
مقبرة توت عنخ آمون أو مقبرة 62 حسب الترميز العلمي وتعرف عالميا باسم KV 62، وهي المقبرة الخاصة بالفرعون توت عنخ أمون وتقع بوادي الملوك بمصر، على ضفة النيل الغربية المقابلة لمدينة الأقصر اليوم. وقد نالت هذه المقبرة شهرة عالمية واسعة لما احتوته من ثروات وكنوز عند اكتشافها، إذ تعتبر المقبرة الوحيدة لملوك مصر القدماء التي وجدت بكامل محتوياتها ولم يسرقها اللصوص لا في العصور القديمة ولا الحديثة. [1] عام 1922 على يد هوارد كارتر تحت أنقاض أكواخ العمال المبنية منذ عصر الرعامسة مما يدل على بقاء المقبرة على حالتها الجيدة، ولم تطلها يد العبث أو السرقة مثلما حدث في باقي مقابر المنطقة في فترة تدهور عهد الرعامسة وقيام دولة الكهنة بطيبة.
مقبرة 62
خلص اول الفصول في حكايتنا طبعا لسه الجاي اكثر تشويق وحماس وكوميدي ده بس مجرد تمهيد للي جاي اتمني يكون عجبكم مستنيه رأيكم في الفصل وكمان شخصيه ميسره
ومن الفصل الجاي اقدر اقول الاثاره والتشويق هيبدأ
مستنيه رأيكم
دمتم سالمين
رحمة نبيل
تعليقات
إرسال تعليق