جميع الروايات كامله

قاع الشياطين

.☆بارت الاول ☆

بين اصوات الغريبه ، واصوات صديقه واصوات مالوفه ، ورائحه زكيه  ، ورائحه الجاي الاخضر ، و رائحه البيت المميزه الي ادل على نظافه اصحابه و اهتمامهم الدقيق بكلشي ..

واكفه بنت ، بطول متوسط بقوام رشيق ، بشعر منسدل على ظهرها بطريقه جميله ، ببجامه نوم ناعمه مصنوع من القطن   ..

تتلمس ميز المرايه بفوضى ، مو عارفه مشاطه الشعر وين ارضها ..

تتحظر حتى تنزل عند اهلها ، واذا بصوت امها  طلع من طابق الاول ، هي تصيح ، ميرال الريوك ماماا يله ..

توترت بالزايد و هيه تحاول تلكه المشاطه ، فجاءه و كعت القراصه بالارض و هيه ممنتبهه ..

تلمست الميز للمره العاشره ماكو لا قراصه و لا مشط ..

دردمت ، وين خلتهم تالا كم مره كتلها ترجعين كلشي لمكانه و ين الكاها هسه ، 

طخت رجلها بالقراصه من الصوت عرفت شنو بالارض ..

نزلت تتلمس الارض بهدوء ، اثناء انحناها و نزول راسها ردمت كصتها بحافه الميز ..

ااااي ، تلمس الضربه برقه اصابعها ، شالت قراصه رفعت اديها و لفت شعرها بلا تمشيط ..

حاولت تبعد شعرها الناعم على وجها بحركه طفوليه ، مشت بخطوات حذره ، و ماده ايدها امهامها بحذر ، تحسبا لاي اصتدام مفاجى ، تحركت و هيه تردد هذه النظام او هذه التعليمات ..

الي قضت ١٠ سنه و هيه ترددهم كل يوم كل صباح ، 

-خطوتين من ميز المرايه ويصير الحايط كبالي ، بس وصلت  وتلمست الحايط  ، كملت الباقي ، ست خطوات و الباب تصير على اليمنه ..

وصلت للباب و تلمست الخشب ، وصلت لليده فتحتها وطلعت ، و هيه تكمل ..

اميل على اليسره بعد الغرفه اربع خطوات و اكون مقابل الدرج مباشرتا ، اتلمس المحجر بحذر وقوه حتى لا اوكع ، وبعدها انزل ..

نزلت درجه واثنين ، وهيه لازمه المحجر ، رغم حفظها لتفاصيل البيت بدقه ، بس هذا روتين يومي ، احد الشغلات الي تونسني وهيه حفظ البيت بكل خطواته و اشباره  ..

كملت الدرج الي متكون من ١٥ بايه ، وعرضه متر ونص ، واذا اجي احسبه على خطواتي عرض الدرج يعني خمس خطوات ..

ابتسمت واني اشم ريحه توست ، اجاني صوت نانه ، 

-هاا نزلتي تعاي شلون مربا و توست يجنن ، توجهت للمطبخ الي يصير بعد عن درج ..

عشر خطوات للامام ، حجت ماما شعرج ليش ممسرح ياامي ..

رديت تالا كالعاده شايله غراضي من مكانهم ماندليته ..

ردت تالا والله جذب مو اني ..

حسيت بخطوات تقدمت اتجاها و لفحتني ريحه عطر بابا ، ابتسمت بابا حبيبي ..

ضحك عيون بابا ، لزمني من جتفي يساعدني اكعد على كرسي ، صباح الخير جميعا ..

ردو صباح النور …

كعدت امي تخلي بالاطباق جدامي و ستكان الجاي ، واصوات الخواشيك و المواعين كزاز ادل على هالشي …

ريحه دخلت لخشمي ، من خلال حواسي نبه ، و سمعي الجيد اكدر اعرف المحيط بيه شنو وشكد ومنو ..

حاليا امي واختي تالا ، على اليمنه كاعدين ، صوت امي اقرب شي معناها هيه بالكرسي الاقرب الي ، وتالا دتلعب بالاكل بخاشوكه ، وهاي عادتها ، وبابا كاعد على يسره ، واصوات ورق جريده يدل على انو ديقره بجريده ..

صوت جره نفس ادل على انو ضايج واكو اخبار مو حلوه ، 

نانه واكفه مقابل الكاونتر ، طخه ادكمه مال جاكيت مالتها ، بالكاونتر ادل على انو دتحرك قريب الكاونتر ..

رفعت اصابعي اتلمس طرف الميز..

فارشين الميز اليوم بسفره من قماش ، رفعت طرف اصابعي اتلمس ، القماش خشن ، وبي ورود ، هذا اشترته نانه من سوك الكاظميه قبل فتره هيه كالت ..

امي حجت اكلي ماما ، بسرعه وراي طلعه اني وابوج ..

جريت ماعون قريب مني ، و تلمست الاستكان و خليته على جهه اليمنه ، من عندي .

توست بمربا الجزر ، و شوي قشطه ، وجاي ، من اطيب انواع الريوك عندي ..

امي وابويا خلصو ، بابا باسني من كصتي ، لامست شفته الحاره من اثر الجاي ، جبهتي غمضت عيوني بهدوء ..

حجه طالع بشغل اني وامج تردون شي ..

رفعت ايدي تلمست ايده سلامتك حبيبي ،  اجت اصابعي على ساعته ، لزمت معصمه مديت اصابعي ، 

تحسيت ظاهر ساعه ،  رولاكس ، الخشنه ، الي مرصعه بكم قطعه الماس ، الي تحيطها ، نتوئات ناعمه ، حسيت شي اسطواني تحرك جوه اصابعي عرفت بيها بوصله ..

بابا ضحك وحجه هاا كملتي استكشاف بيها ..

ضحكت باين عليها غاليه ..

تخبل سعرها ٥٥ الف دولار ، قطعه جميله جدا مميزه والحلو بيها صنعها قديم و كلاسيكي بحت   ، رمشت بهدوء حجيت بيها الماس مو ..

فعلا شمدريج ..

من صقل مالته  ، ماكو حجر او جوهره تنسقل بهل نعومه غير الالماس ..

بنت ابوج بعد بنت الصايغ راكان ، مايخفي عليج شي ، تلمس راسي بحنيه ، رد اربع قطع الماس ، وداخل الساعه ١٢ قطعه ناعمه ، ذهب ٢١ رقم الختم *** 

برطمت ثكيييل ..

ضحك باسني و مشه ..

دنجت اكل و نانه اجت تعدل بشعري من وره ، وتعاركت ويه تالا تكللها شغلات اختج ترجعيهم بمكانهم مو تضل ادور عليهن ، عندج عيون و دوري على حاجاتج بيدج .

-اما حاجات اختج ممنوع تمدين ايدج عليهم ..

-حجت بعدم مبالاه اووو ، كله مشط شصار يمعودين ، 

كملت اكل و عفتهن يتناكراً ، نانه من حالها فلت شعري و مشطته بهدوء، و سوته ظفيره ، شوي و سمعت صوت كعب امي ..

وصوت مفاتيح بابا ، كالو لنانه طالعين ام ساري ، للظهر ونرجع ،  دكو علينه اذا احتاجيتو شي ..

خلصت اكل وكمت ، حجيت لنانه اطلع بالحديقه اني ..

صاحت بتالا اختج تطلع بره ساعديها .. ، كمت لحيلي توجهت للسنك اغسل اديه ، كملت و لزمت معصمي تالا ، اصغر مني ب٥ سنوات ، عمرها حاليا ١٣ رغم صغر عمرها بس احسها امي ..

صح شوي عنيده متمرده ، بس حنينه عليه ، تقوم باغلب احتياجاتي بدون ماطلب منها ، و نانه كذلك .

المراه الي ربتنه اثناء غياب امي لو تكون بالشغل او بسبب السفر ..

نانه تولت التربيه و عنايه والبيت ، نزلت من بايه المطبخ بحذر ، تالا لازم ايدي و صاحت سااري ولك تعال هنا جيب طوبه ..

-صاح ساري جماعتي دزو علي بالملعب ماكدر اتاخر ..

-لا عليك الله تعال ، ضايجين والله وماما و باباوطلعو تعال اني وياك نلعب ، 

-اووو ، ادري ابتليت خما ابتليت بيجن ..

ابتسمت اني و تالا ردت اكول لنانه و الله احجي عدل شبيك ولك ..

-بلا ولك لا اجي ارفسج والله تادربي ، خلي اسامه يلعب وياج  ..

ضحكت اني و تالا ضلت تسوي ننننه ننننه ، هم عوزه العب ويه جهال ..

- حجيت وياه ساري تعال صار يومين ما سامعه صوتك ..

اسمع خطواته ودوسه حذائه على الثيل ، وصوت نفس الي اقترب علينه ..

حجه هو لو ماانتي اني ولا اجي هنا والله ، حتى لو امي دزني ، شوفه وجه هاي السعلوه عندي نذر سيى ..

-يطلعلك تشوف مثل وجهي انته احمد ربك اصلا احجي وياك ..

-تسوين فضل اذا متحجين وياج ..

-اكول انجب ..

فز هو ياهو نجب ولج ادب سزز ..

-هاا يمعودين شهل غلط 

-مو تشوفين اختج لو لا

ردت تالا بتعجرف ، لاا ماتشوووف 

-ماتشووف بس عدها احساس احسن منج ، انتي نظر بلا احساس والسانج اطول منج ..

-دكاافي كاافي لا تتفلسف ..

راح اكوم واعوفكم طلعت داغير جوو شبيكم حتى حترام ماكو ..

حجه ساري ضايجه تردين اصعدج وياي بالبايسكل . .

ردت تالاا اي و تكلبها مثل ذاك اليوم على وجها موو صاحت بعلو صوتها ناناااااا ترى ابنج يكول لميرال تعاي اصعدج بالبايسكل ..

-همس وجع كون بكلبج شكد منافقه .

- وربي اذا غلطت انوب اكول لامي ، لاتتجاوز ..

شال طوبه و ضربها بيها وهيه عاطت ، اسمع بس الهف ماطوبه هو يصيح ولج لااا و هيه تعيط بنانه تعااي ساري ضربني ..

احسهم توم وجيري ، ساري شخص لطيف هاي سنه هو رابع اعدادي ، بس ويه تالا احسهم اعداء ..

دائما يستخدم اسلوب عنف وياها وهيه ماتسكت اله ..

طلعت نانه تصيح عليهم بثناء الكلام و عركتهم سوه  ، سمعت تالا عاطت يااا ولك ...

اجت الطوبه ترس بوجهي على عيوني ، من قوه ضربه وكعت اني وكرسي. رجعت ليوره على ظهري عطت لازمه عيوني ابجي ..

مدده بالثيل ابجي احس عيوني نار ، نانه ضلت تعيط الله لايفقكم راحت بت صخاام صخمك سااري ..

تالا تعيط ياااا نانه عيونها دم عيونها تجري دم …

ساري شالني من وره يسندني ..

اني صدك حسيت شي حار نزل على خدودي ، وريحه دم بيه ..

نانه ركضت تعيط على حارس تكله دك على استاذ راكان كله ميرال تاذت بسرعه و عيونها تنزف ..

اني الالم موتني انحنيت لازمه وجهي واديه بيها رطوبه ماميزت دم من دمع ، جابت نانه شي و ضغطت بي عيوني و تالا تبجي والله ماقصد ماقصد حظنت جتفي تبجي مااقصد جنت ناويه اضربها بساري والله مادري بيج ..

همست ميخاللف ميخالف ..

نص ساعه و اسمع صوت بابا وماما يصيحون ..

دخل بابا مفزوع من صوته يعيط ويلعث هااا بابااتي هااا شوو لزم وجهي يرفع ، شهك .. انعل ابوكم شبيهاا شبيج بابا ..

امي من شافتني ضلت تعيط عزاا العزاكم شلون صار هيج ..

شالني بابا وركض للسياره وراه ماما تعد وتصف على نانه وين انتي عنها مو كتلج خلي بالج وين انتي شنو واجبج ..

صعدني بابا بسياره ويحجي هاا شتحسين خما تتوجعين وين الالم .

-مابيه بابا ماابيه والله ..

-صاح ولج يارا يله يمعوده يله بعدين مو وكتها ..

صوت كعب امي عالي دتركض باتجاهي ، صعدت وحظنت راسي لصدرها ، 

بين ماوصلنه المستشفى دخلوني طوارى كبل ، الالم خف هواي بس نزف بعده ..

بابا اتصل بدكتور العيون خاص بيه ، ساعه و يله اجه اني عيوني بوقتها خدرت ..

ماكمت احس بشي بعد ، اجه دكتور و كعد يفحص بيه ، احس شي يحرك بعيوني بس مو شايفته ابد وادين دكتور تفتح بجفني وتضغط على البؤبو ..

رد بضوجه وحجه ويه بابا ليش هيج استاذ راكان شكلت اني مو كتلك شبكيه عدها ممتحمل هاك استلم صار عدها نزف بعين اليسره معناها منا لبعد سنتين تتاجل عملياها ..

.رد بابا مفزوع على بختك دكتور ليش ، احنه ماصدكنه اكو امل ترجع تشوف لو واحد بالميه ..

كعد يتافف ومجاهل كلام بابا حجت امي ، اليمنه شوف العين اليمنه فدوه مامجاي تنزف ..

نفسه لفح وجهي ، وحجه بهدوء ، اليمنه سليمه بس اليسره نزيف داخلي ، اصلا هيه مسبقا عدها الاوعيه دمويه ضعيفه ومجاي تغذي شبكيه هيه اليسره فقدنه الامل بيها منا لمده سنتين عسى ولعل ترجع تشفى نفسها بنفسها ..

نترت امي شلوون يعني خماا تضل هيج احنه ماصدكنه نطيتنه امل تكدر تشوف مره ثانيه ..

قابل هو بيدي ياست ، الحادث  القديم دمر اوعيتها ومصادر غذاء العين ، شبكيه مجاي تتغذه ، واي تدخل جراحي ممكن يقتل الامل نهائي الوقت هو لوحده قادر على شفائها صح بطريقه بطيئه بس اكو امل ..

رد بابا بعجز شلون يعني هم نرجع ننتظر عشر سنوات ثانيه ..

سكت دكتور حجه خلي اكمل فحوصات والله كريم ..

ساعتين  بالمستشفى وفحوصات مستمره ، نمت وكعدت وامي وابويا فوكي يحجون ..

امي مستمره تبجي وتكله خلي ناخذها لالمانيا ، بنت مثل الورد عميه ليش ، حتى لو عشره بالميه ميخالف ..

رد بابا بهدوء يهدء بيها ، عشره بالميه شنو هاي مخاطره يارا ، عيون بنتج متتحمل عمليات اي تدخل جراحي ممكن يقضى على نظرها نهائي ، الامل احسن من كطعان العمل ..

اكو امل انو يطور الطب ونسويلها عمليه ويرجع نظرها كامل ،  او بلاها للعمليه اذا ترجع نظرها بشكل مايساعدها تكمل حياتها طبيعي ..

سكتت تبجي ، مااصدرت صوت سويت نفسي نايمه ، حقهم عذبتهم حيل اني ، نفسيا دمرتهم ، خاصه بعد ماصار الحادث و جابولهم خبر فقداني للنظر ..

جنت صغيره ماتاثرت هواي بس صوت عياط امي بالردهه من كالولها وشلون ماتقبلت امر الواقع اذاني حيل ..

.لو بابا جان ناوي يتبرع الي بعين من عيونه ، صح ماشوف بس والله عادي ممتأثره اشوف بكلبي اني ..

اعرف ناس شنو وشنو يحسون وشنو قصدهم قبل لا يحجون ..

الله اخذ نظر بس نطاني احساس قوي ، لدرجه من ريحه عطر اميز البشر منو هذا ، من الاصوات اعرف حواليه شنو ..

من نبره الصوت اعرف المقابل شنو شعوره اتجاهي ، يمكن احنه منشوف بعيونه بس انشوف بكلوبنه وهذا ابلغ من نظر ..

طلعت من المستشفى بتقرير انو اني حتى لو اجريت عمليه بارقى مستشفيات العالم فنظر ممكن يرجع ٣٠ بالميه كحد اقصى واذا حالفني الحظ ..

بس النسبه الاكبر محد يشجع عليها ، جملتهم دائما انتظرو العين هيه جاي تشفى من داخل وجاي تعيد بناء نفسها وخلايها مالتها ، اي تدخل جراحي ممكن يقضى على العين نهائي ..

انتظرو احسن من ماتستعجلون ، رجعت للبيت عادي ، بس امي وابويا عكسي محطمين ..

امي بس  رجعت تعاركت ويه نانا وحملتها مسؤليه وشلون مهمله لو ما اهمالهاا ماجان صار الي صار ..

ساري من حركه دمه على امه تدخل ، حجت تالا اني ضربتها واني طلعتها بالحديقه نانا مالها شغل ..

عاطت بيها امي انتي انجبي ولا كلمه حسابج بعدين ….نانه ساكته ..

وساري يرد امي مالها شغل ست ، اني سبب اني جبت طوبه ..

بابا ساكت وامي تولت تانيبهم و ترزل بيها ، رجعت تدخل تالا ،  وردت اني كتلج طلعتهااا وساري ونانه مالهم شغل …

دتحجي واسمع صوت راشدي وشهكه تالا ، كمت لحيلي بتعب صحت ،  ماماااا ..

ثواني وسمعت صوت بجي تالا ردت بعجرفه مادامج هالكد حابتها ، كابليها واكعدي يله ، امي بهل الاثناء نزلت عليها ضرب وذيج تبجي وترادد ..

تدخل بابا يحجي ويكللها كاافي وانتي عيب تراددين لا اكص السانج ..

حجه ويه نانه تفضلي للملحق بعدين نحجي وانته ساري ممنوع تدخل الحديقه بعد ….

تالا ماتسكت صعدت للغرفه وتصيح ، 

مد ايده بابا لزمني ، مشيت وياه ، صعدني لغرفتي ، دخلني للحمام و جاب الي ملابس ، دخلت لبست لوحدي هو واكف بالباب ، لمن طلعت ..

اخذني للغرفه خلاني امدد بفراشي باسني من راسي قبل لايطلع جلبت بايده بابا ..

رد هاا عيوني ..

لا ترجعون على تالا ترى مالها دخل والله حتى ساري جانو ديشاقون مو قصدهم ..

رد لابابا اختج تالا متمرده وعنيده رغم صار ما اعترفت بغلطها ونوب ترادد اعتقد دلال اله نتائج سلبيه ..

سكتت ..

عافني وطلع ، ثاني يوم ماداومت معهد ، دكو من المعهد الفنون الجميله يسالون ليش ماداومت ميرال خما مريضه..

امي ردت اي والله تعبانه ، ياريت تبعثون الها محاظراتها للبيت ...

اخذت اجازه فتره لحد ما خف الالم مال عيوني ..

نور صديقتي دزت كل محاظرات ، اليمنه ماببها شي بس اليسره نوبات تصل عليه ، اليمنه احيانا اشوف بيها ضباب او لون اصفر ، اما يسره لا عدم ماشوف شي ..

مو ظلمه لااا عدم ماكو لون ماكو صوره ماكو ملامح وكأنو مموجوده ..

من شوي هدات عيوني كدرت اداوم بالمعهد اخذني بابا وصلني ، نزلت من سياره و جريت عصاتي فتحتها ..

مشيت بهدوء والعصا بيدي تضرب على الارض اتاكد ماكو اي عثره او حفره او بايه ..

حافظه خطوات بس الحذر واجب ، وصلت للقاعه مالت المعهد و بابا رجع كال وره دوام امر عليج ..

ابتسمت باسني وطلع ، بهل الاثناء اكو ايد لمست حتفي وحجت هلا سلامات سمعت مريضه ..

نور هلاوو شلونج  ..

جتفها طخ بجتفي كعدت لزك ، صوتها عالي وتحجي امج كالت مو زينه  وعيونج توجعج خير ..

-مابيه انضربت عليهم بس ..

-شوو اشوف انزعي نظاره دشوفها ..

-لاا عوفيهن عفيه ..

-بس اشوف وين ضربه داطمن ،جرت النظارات بسرعه ولمست جفن عيوني باصابعها البارده ..

غمضت ورجعت فتحت بهدوء ..

ضحكت ياافدوه للعيون ولوون مالتهم مابيج غير العافيه بس اليسره بياض متاذي باين بي نزف ..

همست اي ، بسبب ضربه تاجلت عمليتي سنيتن لخ ابتسمت اخفي زعلي ..

-حجت لاااا عليج الله ..

-اي والله ..

سكتت متحسفه لزمت جف ايدي الخيره في ماختار الله لازعلين ، 

عادي اصلا ..

دكومي دنشرب شي كومي ، جرتني للسنتر ، كعدنه ناكل ، خلصت عصير ..

التمن بنات ويانه بنات مرحلتي كلهن ..

يمكن بتعاطفون وياي او يمكن طمعا بابويا ، لان يعرفو من الاثرياء ، 

بكل الاحوال اني اغلب الناس كريمين وياي ولطيفين ، كملت دوام واجه بابا اخذني  ، بالدرب اسمعه يحجي بالجهاز ويتفاهم على موعد البضاعه ..

كمل وسد الاتصال حاجيته هاا بضاعه جديده ..

اي الا فد شي ممتازه من حيث صياغه وجوده الذهب ..

بس ذهب ..

لا مجوهرات والماس..

شكد هالمره وزنها ..

خير من الله ، ٤٦ كيلو انشالله ، 

ابتسمت ، راح اطك حجي راكان ، بس شدعوه هالكد وزن البضاعه هالمره .. 

ضحك بصوت عالي راح افتح فرع ثاني ، بالبصره انشالله ، 

بالتوفيق حبيبي ..

يسلم روحج بس عندي هديه اني ..

ابتسمت ، وهي شنوو .

عينه من البضاعه جديده ، ونصاغت خصيصا الج ..

الي وحدي و تالا شلون ..

تالا و ام تالا مانسيت احد من ذيجنه نسرات يخوفن غير اذا ماذكرتهم ..

ضحكت ، وينها ..

شنو …

العينه الي تكول عليها ..

وره بالكشن الوره بس ننزل انطيها الج ..

تحمست حيل ، بابا ذوقه راقي بشكل ، لمن وصلت خله بيدي غلاف مال محل الصياغه مالته ..

دخلت هو وراي ، صعدت ابدل امشي بحذر ، والغلاف بيدي يخرخش ..

مشيت خليته على ميز المرايه و رحت للكنتور اطلع ملابس ..

ملابسي مقسمه ، وكل شي بمكانه ، تراكات بيت بخانه وسط ، و فساتين بيت خانه فوكها ، خانه جوه ملابس النوم وبجايم قطنيه ..

اما باب الثانيه ملابس طلعه ، فساتين وبعدهم بناطير ويه كل تعلاكه بنطرون وقميصه ، ملابس داخليه بجرار جواهم مباشره   .

بدلت وكملت واتجهت للميز ، وصلت تلمس الغلاف …

غلاف ورقي ، ناعم ، بكتابه بارزه ، اسم المحل الصياغ ابو ميرال …

وعنوان و رقم الهاتف ..

فتحت الغلاف و مديت ايدي اجت علبه بيدي ، بكد جف الايد ، مربعه، علبه مغلفه بقديفه ناعمه …

تلمستها ادور شلون تنفتح لكيت سن الحديد مالتها و ضغطت علي فتحت …

مديت اصابعي اتلمس ، ترجيه  ؟؟!!

اي والله ترجيه ، تراجي اثنين ، وياهم محبس ..

شلت وحده منهم بحذر ، بيها شي مدبب ، خليتها على جف ايدي ومديت اصبعي اتحسسها  ..

شكلها شكل شمس ، وبطنها جوهره ناعمه ، قربت الترجيه من حلكي اعضها اشوق قوه الجوهره داميزها الماس لو شنو ..

ماعرفت شنو رغم ماعضيتها ، رجعتهم لمكانهم ، بس لبست المحبس ، جان عباره عن شمس صغيره ، ضميتهم بالجرار و طلعت اريد انزل ..

لزمت المحجر ونزلت خطوه خطوه ، اسمع صوتهم بصاله ، وصوت غسل خواشيك بالمطبخ ..

توجهت للصاله بهدوء ، التفتت وراي على مطبخ حجيت نانه ام ساري ..

ماكو صوت ..

رديت نانه ..حجت بتعب هاا يمه محتاجه شي ..

سلامتج زعلانه انتي ..

لايمه ليش ..

ابتسمت لاضوجين من امي ..

لايمه ماضوج ..

نطيتها ظهري وكملت للصاله ، دفعت الباب ودخلت ..

لكيت بابا يحجي وياهن وصوت الغلاف مال العلب طالع ، عرفت نطاهم هداياهم ، امي حجت هاا لبستيهم ..

تلمست محبس ، :- سيت  لاا بس المحبس ..

-جيبيهم اضمهم بالخزنه لايضيعن ..

-رد بابا .  شيضيعن ام ميرال قابل جاهل هيه ..

-مو سالفه جاهل بس يوكعن منها ماتندل بعد وين خلتهم ..

هزيت راسي تمام ، 

تغدينه وراها دزيت تالا  تصعد تجيب العلبه الي اشتراها الي بابا ..

خلتهم امي وكالت لبابا ضمهم عندك ، حقهم كوم فلوس لايضيعن عود من تصير مناسبه ، تريدهم ميرال اطلعهم الها ..

ضل بس المحبس بيدي اما تراجي لا اخذهم بابا ..

كمت وياه للمكتب مالته ، لازمته من معصمه ، بس دخلت المكتب حاجيته مبتسمه شلون شكلهم ..

منو ..

التراجي ..

ماتلمستيهم ..

تلمستهم ، بس ماميزت لون ، شكلهم شمس و بيهم شي بارز مثل الجوهره بس ماعرف الون ولا شنو نوع ..

الشمس من ذهب  ايطالي ، والجوهره لونها اخضر زمرد ، لويت بوزي ممتاز ..

كعدت على التخم الي مخصصي لمكتب بابا و لاصدقائه من يجون هنا يمه ..

هو توجهه للخزنه الي صايره وره مكتبه للكتب ، سمعت جر الرف مال الكتب ، رمشت بهدوء ..

حجه بابا ميرال ..

نعم ..

تعاي هنا ..

تقدمت علي بحذر ، لمن وصلت اله لزم ايدي هو وخلاها على دكم مال الخزنه ..

لزم اصبع الابهام ، وحجه يوم الي يعجبج تاخذين حاجاتج من خزنه تعاي بنفسج اخذيهم ولاتحسين نفسج اقل من اختج ..

لا انتي البجر و فرحه عمري ، اما ضغط امج ومحاوطتج من كل جهات مو عدم ثقه بيج بس خوف زايد عليج يوم تاخذ مجوهراتج و تضمهم يمنه مو لان ماتامن ، بس حتى ما يضيعن منج وهنه غاليات على كلبج ..

- ابتسمت اعرف حبيبي لا تبرر ..

لزم اصبعي وداس الدكم ..رقم  ، ٧٨٩٥١٢٣ ..

ثواني وطلع صوت الخزنه تنفتح ، خليتهم بالخزنه رف ثاني ، وابتعدت سدها ..

بعدها بايام ، راجعت على عيوني ، نزف بعيوني الحمدلله متوقف ، وبلش يخف ، بس نفس الوضع ونفس الكلام ..

ماكو امل ، اني جنت ابتسم من يكولون هيج ، وهز راسي عادي ، بس ، بداخلي انمرد ، صعب حيل انو تفقد النظر للابد ، صعب حيل ..

داومت بالمعهد الي هو الوسيله الوحيده الي اكدر انفهه بيها ، احلى شي عندي من الزم طين واكعد اشتغل عليه بالساعات ، شاطره بالرسم ونحت ، شاطره بالوصف ، شاطره بتخيل المقابل ..

خبره عشر سنوات مو قليله ، متعمده على حاسه السمع والشم والمس ، لدرجه حتى شعري ماشده ابقي على طوله ..

حتى اعرف النفس الي يمي شنو ، مجرد ماتتحرك خلصه من شعري اكدر اميز بعد البشر شكد عني ..

ريحه العطر ، البشره مره اشم عطره اميزه بين ميه ، وحتى لو اكثر من يشر خال نفس العطر هم اعرفهم واحد واحد ..

لان ريحه الجسم تطغى على العطر وتمتزج وياه وتنطي عطر مميز بهذا الانسان ، 

بابا بعدها مشه يشوف البضائعه وصلت لو لاا ، جنت متحمسه حيل دالمسها ،  سمع انو وصلت للمطار ، اجه شريك بابا العم تحسين ..

هو صائع تركماني ، صارله ويه بابا بالصياغه عشرين سنه تقريبا  محلاتهم بالكراده وبزيونه ..

امي تصير بنت عم العم تحسين ، تعشه يمنا و حاجه بابا كله باجر باذن الله ندز احد للمطار يجيبهم ، وافضل تكون وياهم سيارات ناس عرف خاف كلشي يصير بالدرب ..

رد بابا ماكو شي انشالله ، مثل كل مره نجيلهم احنه ليش ندخل احد هو يجيبهم  .

اتقف هو وياه ، هم بنفسهم يجيبوهم ، ثاني يوم وصلني بابا هو وامي للمعهد وراحو على العم تحسين ، حتى يرحون للمطار ..

دخلت للمعهد اصوات الطلاب واصوت شحطه الاحذيه ، وضحك ، تبمست الحايط مشيت بموازه الحايط ..

كعدت على مسطبه انتظر نور ، ثواني وسمعت صوت شباب بصفي كعدو ويضحكون ..

من صوتهم عرفت التفتو علي وصار صوت قريب حاجاني واحد ميرال ليش لابسه نضاره ..

ابتسمت عيوني تاذيني ..

ضحك شنو بلشتي تشوفين ، ذاك الي بصفه ،ضحك ورد لاياحيوان كالو عيونها تالفه شتشوف شكد غبي انته ..

بلعت ريك ، اديه لازمه عصا رجفت …

حاجاني كل هاي الفلوس الي عند ابوج وماخذج للخارج  لاي دوله باوربا ، امريكا مثلا ، يسويهن الج حرامات والله …

لزمت العصا حيل كوه لازمه نفسي ، همست بهدوء مدمعه ، على فكره اميركا مو دوله اوربيه .. 

ذاك الثاني ضحك وكله طاح حظك هيج احسن الك ..

رد لا و تتفلس عليه العميه فوكاها ..

كلبي قبضني حيل ، جريت نفس كوه  ، حاجاه صاحبه هيوو مو هيج شبيك جره ويكله يله نمشي .

خطواتهم ابتعدت مديت ايدي امسح دموعي من جوه  نظارات ، وكفت اجر نفس الزم نفسي ، مشيت للقاعه مالتي …

تلكتني نور حجت شبيهم ، رديت ماكو ، خلصت دوام وكفت انتظر بابا ، متعوده عليه هو يجيني ، والكاه واكف ينتظرني ..

بس اضن انو اكو ازدحام او فات الوكت وماحس ..

وكفت بصفي نور حجت هاا ابوج مااجه ..

حجيت لاا ..

انتظر وياج لعد بين مايجي ..

خاف زحمه ..

لا ولج صديقات احنه جرتني وكعدنه على سندانه مال زرع ، نص ساعه وهم ماكو ..

حاجيتها طلعي جهاز من جنطتي ودكي عليه ..

مدت ايدها لجنطتي ، وطلعت جهاز ، دكت ماكو رد ..

حاجيتها هاا ..

ماكو رد حتصل على امج ..

ثواني وكتلها هاا ..

ماترد ..

ضاك نفس عندي شنو معقوله نسوني ، ساعه واحنه مصلوبات اني وياها ، لحد ماجيت ابجي ، حجت نور اني ارجعج ، دكومي خاف عدهم ضرف وماكدرو ..

ممسويها قبل بيه والله ، مادري خاف اكو شي ..

قابل شكو ولج ، دمشي جاهل انتي ..

اخذنه تكسي ورجعنه درب كله نور تتصل عليهم ، سحبت جهاز اني اتصل ، جهاز جان مفعل بي نظام ناطق للكفيفين ، مجرد ماتضغط يبلش يحجي ويوجهك ..

دكيت على نانه حجيت لا ماكو هسه اتصل الج عليهم ..

وصلت للبيت ودخلت نور وصلتني خطيه ورجعت لبيتهم ، تلكتني نانه بس حاجتني بجيت مااجوني نسووني شنو  ..

-لايماا شهل حجي ، جوز تاخرو بالمطار شجاج كولي يالله مو جابتج نور ..

دخلت عصبيه ومقهوره حيل ، حتى تالا مارجعت بعدها ، نانه دزت ساري يجيب تاالا ..

دكينه عليهم ماكو نوب قلقنه ، دكينه على العم تحسين جهازه يدك ..

مره واثنين واجانه صوت ، ونانه حاجته العفو حجي تحسين موجود ..

من حظرتج وشنو تقربين اله ..

اني كرايبه بس حبيت اساله ..

رد عليها ، اني اشتغل بالنجده اختي ؛ والرجال صاحب جهاز سوه حادث على طريق مطار ،هو ورجال وياهم مره …

اني كعدت بالارض هابط حيلي و نانه صاحت شنووو …

‏إِنْ يَظْلِموكَ فعينُ اللهِ ناظرةٌ

‏أو يَخْذلوكَ فَتِلْكَ العينُ تَرعَاك

يتبع ....

بقلم_أسماء_ديمير

حبيت انوه ان القصه جريئه في فكرتها ومحتواها والي ماحب لا يتابع حتى لا نشوف معارك بالتعليقات ..

تعديل المقال