سكريبت
-بتحبني صح!؟
-تاني!
-تاني وتالت اللاااه حقي يلا قول هاا هتحبني إمتىٰ
-الصبر يارب
-لا لا متقولش بتحبني ومخبي؟
-إنتِ مجنونة!؟
-تشرب ميكس.
-المحاضرة فاتتنا، هنعمل إيه
-يلا يولا نفطر محاضرات إيه وكلام فارغ إيه
-أومال داخلة الكُليه ليه
-مُجبرة بعيد عنك
-عارف إنك هترفعيلي الضغط يلا نروح
جاري وحبيبي وعمري، لو هشحت كده ماأحبش إلا هو، إحساس غريب لما يكون جارِك هو نفسه صاحبك، هو نفسه زميلك في الكلية، في نفس السنه، نفس السكشن، وبتحبية من صغركم.
-ياإبني سوق بهداوة هنعمل حادثة يخربيتك
-فرفوره أوي
-ولا بنخااااف سوق زي ماتحب
"زود السرعة أوي"
-وحيات أمك نزلني كان يوم أبيض يوم ماركبت معاك اتفوووووو
بضحك-مش قادر من منظرك
-ولااااااا وربنا ننهي الصحوبية الزفت دي حالًا
-لا مينفعش
-وبدام مينفعش ماتحبني ونخلي زيتنا في دقيقنا ونشغل آدي الزين وآدي الزينه
-مفيش فايدة فيكِ
-أول مرة تعرف
-للأسف لا
-يبقىٰ كمل يلا وسوق علىٰ مهلك سوق
-زيين وقف بسرعة وحيات امك
فرمل بسرعة
-فية اية أنتِ كويسة!؟
-شايف عمو ده، إديني خمس دقايق أنزل أجيب آيس كريم.
-قبل ماأتعصب بس،إنتِ بتتكلمي جد!؟
-أها والله
-يلعن أبو تلقائيتك،انجزي عاوزاها إيه؟
-مانجا وشيكولاتة وفراولة
-بني آدمة برا الكوكب والله بالتلت أطعمة دول.
-بحبهم يولا.
-الصبر يارب.
-طعمها يجنن بجد،تسلم يازنزون.
-اتعدلي بقا وناديني عدل!
-اتفو عليك،أنا طالعة.
-هية دي مع السلامة بتاعتك؟
-أها،إذا كان عاجبك.
-بس ماأقولكش بقا يازين ياإبني عاملة حتة كيكة شيكولاته عجب.
-إقفلي ياموج لو تكرمتِ
-تصدق إنك قليل الحيا،ومش بتحترمني.
-يعني مش إنتِ إللي لطعتيني تلت ساعات عقبال ماتخلصي لبس!
-إيه الإفترا ده أعوذ بالله يعم،تؤتؤ مش أنا.
-قولي والله!
-ألوو ألووو باين الشبكة بتقطع يازين طب سس سلاااام.
ناقر،ونقير،حَرب،وسلام،لُقا،حُب،نظرة،همسة،كِلمة،رعشة قلب وإيد،مشاعر حلوه ومُختلفة،مُختلفة بس تجنن.
-هو لسة حد بيروح يصيف في رأس البر!؟
-سبنالك إنت دهب ياأخويا،ثم إنت إيش فهمك متعرفش إنت رأس البر دي بتسعدني إزاي.
-هترجعي إمتىٰ؟
-إبسط ياعم هترتاح من خلقتي أسبوعين بحالهم،أوبشن مخصوص ده خد بالك.
-مش هتعمليلي كيكة برتقال قبل ماتمشي؟
بصتله وكنت هعيط-أنا عنيا ليك والله
واقفة في المطبخ،كُل المقادير قصادي،دقيق،ڤانيليا،بيض،بيكينج بودر،وبرتقال،وباقي المكونات،بضيف المقادير حبه حبه،بكُل حُب،وصوت مالي المطبخ بكُل أسىٰ:
"ودَعني من غيير مااتسلم،وكفاية قلبي أنا مِسَلِم
دي عنيا دموعها،دموعها بتتكلم"
دخلتها الفرن وفي وسط ماأنا مستنياها تتخبز،سندت علىٰ الرُخامة بكُل قوتي،دماغي شاغلها التفكير،التفكير فيه بالتحديد،من يوم ماوعيت ع الدنيا واحنا جيران وأنا بحبه،23سنه بحبه بيني وبين نفسي،عيني وقلبي فضحوني،إحساس حلو،غريب،مخيف،فكرة إنه ممكن يحب غيري بتقتلني بسكينه تلمة،التعلق بحد ذاته مخيف مبالك الحُب.
وقتها صوت السِت جه بكُل قوة:
"وهاتلي قلب لاداب ولاحب،ولا إنجرح ولاشاف حِرمان"
جريت علىٰ الفرن لقيتها إنخبزت،إستنيت عليها حبة،وغلفتهاله وروحت أديهاله.
-إتفضل يازين الكيكة أهي.
-لحقتي تعمليها!
-ياإبني فوووق إنت بتكلم شيف مووووج.
-بس بس لأحسن التواضع بيتدلدق منك
-حوش يولا عليك يعني إنت مش مغرور،تؤتؤ متوااااضع.
بصلي بحنين-متتأخريش،هستناكِ.
-ده إنت شكلك عاوز ترمي ورايا زير بس مكسوف صح.
-بتكلم جد
-مش هتأخر.
كنت قاعدة في العربية إللي مسافرين بيها،ساندة راسي علي الشباك،الهوا بيلمس وشي بكُل قوته،التفكير محتل راسي،هو أنا كده بهرب! بحاول أتخطاة مثلًا؟! طب بحاول ليه ماأنا عارفة إني هفشل،جازفت بقلبي من زمان،ليه بحاول أهرب دلوقتي؟
زهقت من كُتر الأسئلة فقررت أبطل تفكير وأسيب نفسي علىٰ الأقل حاليًا.
وصلنا رأس البر وروحنا علىٰ الشالية بتاعنا قصاد البحر،دخلت غيرت هدومي وطلعت أقعد في البرندة،شايفة الموج حواليا،شايفة حركته علىٰ الشط،قطع تفكيري صوت الموبايل كان زين بيرن.
-لا لا متقولش العمارة وحشة من غيرنا صح.
-بصراحة فية هدوء هنا غريب
-قصدك إني بعمل دوشة؟
-أها
-فدايا يولا
-قولي بقا هترجعي إمتىٰ؟
-إسكت يازين مش انا تعبت أها وكشفت الدكتور قالهم لازمها راحة تامة وقعدة قصاد البحر علشان نفسيتها تتحسن.
-يابت قولي والله!
-اها يعيني عليا،فمحتاجة سنة،تلاتة،عشرة،كده يعني.
-والله ياموج لو ماجيتي بعد أسبوعين هاجي أجيبك من شعرك
بضحك-قول بصراحة وحشتك الكيكة بتاعتي؟!
-إقفلي ياموج إقفلي وخلي بالك من نفسك
-يلا سلام يولا.
قفلت معاه،وإستسلمت للجو وتفكيري ونمت.
تاني يوم قضيت اليوم مع عيلتي وفي سهرة بليل إنسحبت بكُل هدوء وخرجت قعدت علىٰ الرمل قصاد البحر، صوت موجه قادر يريحني، قادر يخليني أحكي كُل حاجه بإرتياح وبدون خوف من اللي جاي، ولأول مرة من سنين أبدأ أغني:
"ياوردة قولي متخافيش متخااافيش
بيحبني بيحبني مايحبنيش
بيحبني مايحبنيش
بيحبني مايحبنييش
بيحبني
حبيته بين روحي وقلبي
ياريته يبادلني حبي
ساعة ماجت عيني في عنيه
حسيت بقلبي مال إليه"
-أول مره أعرف إن صوتك حلو!
وقفت غنا ولفيت بخضه وأنا مصدومه وهعيط من الخضه
-إنت! إنت إزاي جيت هنا؟!
-الجو عندنا حر أوي فجيت أصيف
-يااازيين.
-زين وقع ومحدش سَمىٰ عليه
-نعم؟!
-أصل أنا بحب بنت وهيه بعدت عني فعرفت إني بحبها لما بعدت.
حسيت بقلبي بيعيط وإتكلمت-طب، طب إنت سيبتها تبعد ليه؟!
-كانت مسألة وقت بس ماقدرتش أستحمل بُعدها، ولا الكيكة اللي بتعملها تجنن.
-إنت كمان بتحب الكيكة بتاعتها، إشبع بيها
-أها ونسيت أقولك إنها غبيه.
-إيه اللي جابرك؟!
-بحبها.
قومت وقفت وكنت همشي لقيته مسك إيدي ووقفني
-مش بقولك غبية، أنا بحبك إنتِ يموووج، إنتِ إللي مش بقدر أبعد عنها، إنتِ إللي بحبها من صغرنا، كنت فاكره تعود، بس مع أول يومين سافرتي فيهم ماقدرتش ووقتها عرفت إني بحب.
وقتها قلبي إتنفض، شعور إتغرس جوايا، سعادة غريبة إتضافت ليا، عارفين إحساس الخطفه.
-يعني أنا إللي إنت بتحبها؟!
-بالظبط.
-وأنا إللي الكيكة بتاعتها مميزه؟!
-مدوقتش أطعم منها.
-ينهار أسوح يعني أنا دلوقتي بتحب؟!
-بيقولوا..
-وها قد حان وقت الإنسحاب، سعيدة يااا.. ياازنزوون.
سيبته وجريت علىٰ الشالية وقلبي بيرقص بسعادة كبيرة، إحساس غريب إنك بين يوم وليلة، حبة ساعات، تتحول من إنسان بيحب من طرف واحد، شعور من طرف واحد، وجع من طرف واحد، لِحُب من الطرفين، شعور متبادل، حُب وأمان، تفاهم وإحترام، لهفة ولُقا، إحساس جديد بس يخبل.
فهمت من عيلتي إنه طلب منهم إنه عاوز يتجوزني، جه ورايا، أخد الشالية إللي جمبنا، وياريتها جت علىٰ كده لا ده كمان البرندة بتاعته جمب بتاعتي.
-بتشربي إيه؟
لفيت بخضة-بسم الله الرحمٰن الرحيم، فيه إيه ياإبني حد يخض حد كده؟
-أها أنا
-ده إنت غتت.
-مقولتليش بردوا بتشربي إيه!
-كابيتشينو يازين كابيتشينو.
-طب ماتجيبي أشرب منه علشان أجري وراكي.
-زيين أقسم بالله كلمة كمان وهحدف المج في وشك.
-عنيفة أوي
-عاااوز إيه، تعالىٰ هنا إنت مرجعتش ليه؟
-يعني أنا مسافرلك مخصوص وتقوليلي مارجعتش ليه!
-متدخلنيش في تفاصيل دلوقتي إنت مرجعتش لييه؟
-ملكيش فيه!
-بني آدم مستفز بجد أوووووف.
-هتحبيني إمتىٰ؟
-أوباا ع الزمن.
-بتحبيني ومخبيه
-ولاااا أنا مصدعه.
-باين إنك بتحبيني، ولا تبيني أكتر؟
-مبحبكش أصلًا.
-هسوق بهداوة
-فعلًا!
-هجيبلك آيس كريم مانجا وشيكولاته وفراولة.
-فعلًا!
-هتعمليلي كيكة برتقال علطول؟
-عنيا
-فعلًا؟
-أهااا فعلًا.
-بحبك.
-أنا لازم أنسحب حالًا.
-مووج يامدوخاني إستني
-مدوخاك بس بحبك.
-قولتي إيه؟
-تشرب شاي بنعناع؟
-مع نسمة الهوا.
-قصاد البحر
-وهحكيلك أد إيه بحبك.
-يبقىٰ نشرب شاي بنعناع.
صوت ليلي مراد علىٰ في المكان بكُل حُب:
"أنا قلبي دليييلي قااالي هتحبي
داايمًا يحكيلي وبصدق قلبي
اناااا قلبي دلييييلي.. قلبي دليلي".
ولاء_طارق
رايكو يا حلوين يهمني في الكومنتات 👉👈
تعليقات
إرسال تعليق