رواية "ورقة جواز عرفى"
الحلقه الخامسه :
شرين وليلى بيتكلموا فى الكافتريا لقت شرين تليفونها بيرن ولقت رقم غريب
شرين : السلام عليكم
وفجأه شرين بقت متنحه ومش عارفه ترد
ليلى اتخضت على منظرها : شرين فى إيه؟
أخدت التليفون منها
ليلى : ألو السلام عليكم .. إيه عمو فؤاد؟ طب هو فى مستشفى إيه؟ طيب احنا هنيجى حالا ...مع السلامه
شرين بدأت تعيط جامد وليلى بتحاول تهديها
ليلى : متقلقيش يا شرين إن شاء الله خير .....قومى يلا نروح المستشفى ونكلم طنط وشهد يحصلونا....يلا قومى معايا
...................................................................................
هشام كان واقف مع نرمين فى الكليه
هشام : بصى انتى بس شاوريلى عليها وأنا هتعامل
نرمين : بس أنا عاوزه أعرف هتقولها إيه وهتعمل إيه؟
هشام :مابلاش غلاسه بقى ...لما أقابلها هقولك
نرمين بنرفزه : طيب
وبتبص حواليها عشان تشوف شرين فين وأول ما شافتها
نرمين بغيظ : أهى الزفته قاعده هناك أهيه
هشام وهو بيبص فنفس الاتجاه : أنهى واحده؟
نرمين : شايف البنتين اللى قاعدين لوحدهم دول
هشام : أه
نرمين : هى بقى اللى لبسه طرحه بنى
هشام بفرحه : بجد؟؟
نرمين : ومالك فرحان كده ليه؟
هشام : أصلها حلوه أوى
نرمين : وحيات خالتك !!! وإيه اللى يفرحك فى كده؟
هشام باستعباط : مش مراتى ؟
نرمين : انت هتستهبل انت صدقت نفسك ولا إيه؟؟ لا فوق كده دى تمثليه ومش هتزيد عن الورقه دى انت فاهم ؟
ونرمين وهى بتكمل ردح لقت معالم وش هشام اتغيرت وهو بيبص ناحية شرين
نرمين : فيه إيه ؟؟
هشام وهو بيشاور ناحيتهم : مش عارف بس فى حاجه حصلت
نرمين باستغراب : إيه ده هم قامو جريو كده ليه
هشام : شوفتى آخر الرغى بتاعك أدينى مش هعرف أكلمها... ده انتى فقريه والله
نرمين : أنا اللى فقريه ولا انت اللى ريلت على البت من ساعة ما شوفتها
هشام : والله انتى مقرفه .......بس الصراحه البت صاروخ
نرمين : طيب احترم نفسك بقى عشان مقلبشى عليك
هشام : لا خلاص يا معلم ده انت قلبتك وحشه وأنا مش قدك
نرمين : أيوه كده اتعدل
.....................................................................................
شرين وليلى واقفين على أعصابهم قدام أوضه الكشف فى المستشفى وشويه وجات عليهم شريفه وشهد وهما بيعيطو
شريفه بعياط : أبوكى فين يا شرين؟ جراله إيه؟
ليلى : اهدى يا طنط إن شاء الله خير
شريفه : أنا كنت حاسه إنه تعبان...أنا كنت عارفه
شويه وخرج الدكتور والكل جرى عليه
شرين : خير يا دكتور ؟؟
الدكتور : للاسف عنده زبحه صدريه .......وهندخله العنايه المركزه
الكل فى نفس واحد : إيـــــــــــــــــــــــــه؟
وبدأوا يعيطو جامد وهم مش عارفين يعملو إيه وبعد شويه خرج فؤاد من الأوضه على سرير متحرك وهو فى شبه غيبوبه
...................................................................................
بعد أسبوع
هشام قاعد مع نرمين فى الكليه
هشام : إيه يابنتى بقالى أسبوع بجيلك والهانم مبتجيش ....هتفضلى مشحتطانى معاكى كده كتير
نرمين : انت هتعملى فيها عم المشغول وراك إيه يعنى ؟
هشام : على الأقل هنام براحتى ..
نرمين : أنا مش عارفه فيه إيه؟؟ دى مبتفوتشى محاضره
هشام : أكيد فى حاجه انتى مشوفتيش منظرها آخر مره؟؟ بقولك إيه يا نرمين متكبرى دماغك بقى والبنت شكلها فى مصيبه يعنى مش ناقصه
نرمين : يا عم الحنين .....وده من امتى بقى؟
هشام بدلع : يابنتى طول عمرى ..ده أنا قلبى كبير
نرمين : بقولك إيه هات الورقه وأنا هتصرف وفكك انت من الموضوع ده
هشام : بصى بكره آخر يوم بعد كده هدهالك انتى تتصرفى
نرمين : أوكى
...............................................................................
فى المستشفى ليلى قاعده مع شرين فى الكافتريا بتاع المستشفى
ليلى : انتى يا بنتى مش هتيجى الكليه ؟
شرين بتعب : ما انتى شايفه يا لولو
ليلى : بس عمو بدأ يتحسن الحمد لله....وطنط هتبقى معاه الصبح بس انتى وشهد لازم تحضرو الإمتحانات على الابواب
شرين : مش عارفه يا لولو طب سبينى يومين كمان
ليلى : لا يا شرى أنا هاجى بكره ونروح مع بعض نحضر ونروح على طول .....بكره عندنا محاضره مهمه والدكتور قال هتيجى فى الإمتحان
شرين : أوكى يا ليلى بس متتأخريش بالله عليكى عشان ماما تعبانه أوى
ليلى : خلاص ماشى .....حتى احضرى المحاضره دى وأنا هبقى أجيبلك باقى المحاضرات اللى فاتتك
شرين : شكرا أوى يا ليلى انتى صاحبه جدعه بجد
ليلى : عيب عليكى احنا اخوات يا بت
شرين : ربنا يخليكى يا لولو بجد
............................................................................
تانى يوم ليلى فاتت على شرين وراحو الجامعه مع بعض وحضرو المحاضره وخلصو
شرين : يلا بقى يالولو عشان أروح لبابا
ليلى : ماشى يا شرى .....يلا بينا
ولسه البنات ماشين لقو ولد واقف قدامهم ومبتسم ابتسامه عريضه
وهو بيبص لشرين
..............: صباح الفل يا جميل
شرين : افندم
هشام : كنت عاوزك فى موضوع
شرين باستغراب : عاوزنى انا .................خير
هشام : مش هينفع واحنا وقفين كده ....ممكن نقعد فالكافتريا شويه
شرين : لا معلشى مش هينفع انا مستعجله وكمان متعودتش اقعد مع حد غريب
هشان بابتسام : مهو انا مش غريب
شرين : نعم ....ازاى يعنى
ليلى : تعالى يا شرى نقعد ونشوف اخرة الاستظراف ده ايه
هشام : لا انا عاوز الانسه لوحدها
شرين وبدأت تتنرفز : ليه يعنى ..........وانت مين اصلا .........يا احنا الاتنين يا هامشى وهسيبك
هشام : خلاص انتى حره انا بقول كده لمصلحتك
وسابهم هشام وسبقهم عن الكافتريا وهما واقفين يبصو لبعض ومستغربين اوى من هشام وكلامه معاهم
هشام راح اقعد ووراه شرين وليلى
شرين وهى بتقعد : ادينا قعدنا انجز بقى عشان انا مستعجله
هشام بفضول : ليه وراكى ايه
شرين بنرفزه : وانت مالك اصلا ...........متقول عاوز ايه ولا اسيبك وامشى
هشام : خلاص خلاص
وطلع ورقه من جيبه
هشام : اقرى الورقه دى وبعدين نتكلم
شرين شدة الورقه من ايده وفتحاتها وليلى بتبص معاها
شرين : دى ورقة جواز عرفى........ انا مالـــــــــــ
ولسه بتكمل شافت اسم الزوجه " شرين فؤاد اسماعيل "
شرين بضحكه عدم تصديق : ايه الهبل ده .............. ومين هشام عبد الرحمن ده اصلا
هشام بغرور : انا وبكل تواضع
شرين : انت اهبل ولا بتستهبل
هشام : ليه
شرين : يعنى ايه ليه ............... انا اول مره اشوفك ابقى اتجوزتك امتى ..........روح يا شاطر العب بعيد وشوف وحده تانيه تضحك عليها
وشرين بتقوم من مكانهم هشام مساكه من ايدها وبصلها وهو على وشه ابتسامه
هشام : اثبتـــــــــــــــــــــى
شرين وهى بتزوق ايده بعيد عنها : اثبت ايه ؟؟
هشام : يعنى انا عندى اثباتى اسمك ورقم البطاقه شهود على الورقه وكلامى وكمان ممكن اجيب شهود يقولو انهم شفوكى معايا كتير ...........انتى بقى ايه اثباتك انك مش مراتى
شرين : مرات مين انت شارب حاجه ..........انا اول مره اشوف خلقتك
هشام : على فكره عيب تشتمى جوزك كده
شرين بتحاول تتحكم فى اعصابها عشان متفرجشى عليها الناس : انت واحد نصاب وانا هوديك فى داهيه
هشام : اثبتى برده
شرين : انت مستفز على فكره اوى
ليلى : اهدى يا شرين كده ................ انت عاوز ايه ؟؟
هشام بابتسامه : عاوز مراتى
شرين : متقولشى مراتك
ليلى : احنا هنبلغ عنك بتهمت التزوير
هشام وهو بيضحك : عادى افضحى صاحبتك عشان كل الناس تعرف انها مش محترمه ومتجوزه عرفى من وراء اهلها
شرين اول ما سمعت الكلام ده بداءت تعيط
شرين بعياط : انت بتعمل كده ليه .............انا عملتلك ايه ؟؟
هشام : النقاش مش هينفع دلوقتى ........ده الكارت بتاعى لما تفوقى من الصدمه كده نبقى نتكلم ................ وعلى فكره الورقه اللى معاكى دى صوره والاصل معايا .....سلام
ليلى وشرين فضلو متناحين شويه من غير كلام ولا اى حركه
شرين : ده حلم ................صح ده حلم وهصحى منه دلوقتى
ليلى : اهدى يا شرين
شرين بصوت كله عياط : اهدى ازاى يعنى ...........انتى شايفه المصيبه اللى انا فيها
ليلى : طب قومى معايا نمشى دلوقتى عشان الناس بتبص علينا
شرين بعياط : انا مش هقدر اروح المستشفى دلوقتى
ليلى : طب قومى انا هكلم طنط واقولها انك تعبانه ونروح على البيت
وفعلا ليلى كلمة شريفه وطمنتها عليها وروحو على البيت
...................................................................................
هشام لما مشى من عند شرين وليلى كان سرحان وعدى من قدام نرمين من غير حتى ما يشوفها
نرمين : هشام يا هشام
هشام وهو بيفوق من سرحانه : نعم
نرمين : ايه مالك ......... عملت ايه ؟؟
هشام : هعمل ايه يعنى ورتلها الورقه وسبتها تفكر شويه وبعد كده هشوف هعمل ايه
نرمين : انا مبقتشى فهماك ...........طب ليه كل الحوار ده مكنا صورنا الورقه ووزعناها فالكليه وخلاص وبكده ابقى عملت اللى عاوزاه
هشام بضيق : بقولك ايه انا همشى دلوقتى هبقى اكلمك بعدين
ومشى وساب نرمين قبل حتى ما تتكلم وفضلت بصه عليه وهى متنحه ومش فاهمه هو ماله
هشام كان ماشى بيكلم نفسه
" هى ليه صعبت عليه كده .............انا اول مره ازعل عشان حد "
" هى اللعبه هتقلب جد ولا ايه ...........انا ايه اللى عملته فى نفسى ده "
" منك لله يا نرمين .............ياريتنى ما سمعت كلامك "
" هو ايه اللى انا بقوله ده ........هو عشان دمعتين هتعمل فيه كده ......... عادى يعنى مانا ياما عملت مصايب "
" انا مش عارف انا ليه بفكر كتير كده ........انا هتجنن من كتر التفكير "
وهو ماشى سرحان شاف ................................
ونكمل الحلقه اللى جايه عرض أقل
تعليقات
إرسال تعليق