رواية حبي الوحيد
البارت الخامس والسادس
جريت عليه وهي بتعيط وخايفه جداا
كانت الارض مليانه دم وبنطلونه كمان
بصت علي علامات الضرب علي صدره و كمان الثقب الي ف رجله (مكان الرصاصه)
بعياط -اي الي حصلك ؟!
سندته و ركبته التاكسي و راحت البيت لان المستشفي كانت بعيده جدا (مسافه نص ساعه) وهو اصلا كان فقد دم كتير
نزلت من التاكسي و اخدت مفتاح الشقه من جيبه و فتحت الباب
سندته لغايه الاوضه و نيمته عالسرير
بعدها فضلت تلف فالاوضه زي المجنونه ومش عارفه تعمل ايه
ربطت مكان الرصاصه ب قماشه عشان النزيف يقف بس مع ذلك موقفش
قررت انها هتستعين بمساعده بسمه .. حياه كريم اهم بالنسبالها حتي لو هتضطر تطلب مساعده من واحده مش بتطيقها
طلعت فوق عند شقه بسمه وخبطت جامد
بسمه اتخضت لان متوقعتش حد يخبط فالوقت دا ( كانت ٥ الفجر )
فتحت الباب
€ بتخبطي ليه عليا !! عايزه تباتي عندي كمان !!
بعياط -كريم ..
بسمه اتخضت
€ ماله !!
-حد ضاربه جامد وفيه رصاصه فرجله ومش عارفه اوقف النزيف ..
بسمه بسرعه راحت وراها بعد لما جابت بيتادين
اول لما بسمه شافته اتخضت و مسكت دموعها بالعافيه
€ مين الي عمل فيه كدا !!!
-معرفش .. هو اتصل بيا و قالي علي شارع و لما رحت هناك كان مغمي عليه فنص الطريق
بسمه بصت علي مكان الرصاصه
وبعدها راحت للمطبخ .. جابت سكينه وسخنتها عالنار و راحت للاوضه الي فيها كريم
بخوف - انتي هتعملي ايه !!!
€ هطلعله الرصاصه
-نعم !!! نوقف النزيف بعدها ناخده المستشفي وهما هيخرجوها
€ وانا دكتوره علي فكره يعني وهعرف اطلعها بس فعلا عندك حق المفروض نوقف النزيف و نعوض الدم الي فقده الاول
بسمه اتصلت علي زميلها متخصص فنقل الدم و قالتله يجي ويجيب معاه اكياس دم فصيله O negative
و فعلا كان عندهم فظرف ربع ساعه ونقل لكريم الدم و وقف النزيف
٪ هو كدا بقا كويس بس لازم يعمل اشعه عشان يشوف عنده كسور ولا لا و كمان الرصاصه لازم تطلع .. هتاخدوه المستشفي صح
€ لا انا الي هعالجه
٪ تمام انا كدا دوري خلص اشوفك بعدين يا بسمه
بعد لما الدكتور مشي ليل بصت ل بسمه بغضب
-انا مش هخليكي تجربي فيه يا بسمه !!! هيروح المستشفي احسن
€ عموما انا هستناه يفوق وهو يقرر بقا ولعلمك انا مصره اني انا الي اعالجه
ليل مكنش قدامها تعمل حاجه غير انها تستناه يفوق
*بعد ساعتين*
كريم بدأ يفوق
بخوف -انت كويس ؟!
حاول يقوم من مكانه بس حس ب الم فكل جسمه ومقدرش
-متحاولش تقوم انت فيك جروح كتير ولسا مطلعناش الرصاصه …
وقتها بسمه دخلت الاوضه
€ كويس انك فقت .. البت الي جايبها من الشارع دي بتقول اني هجرب فيك ومتعرفش اني دكتوره شاطره يا كريم
ليل بصت لبسمه بقرف بعد لما سمعت ' البت الي جايبها من الشارع' بس مرضيتش تكبر الموضوع فوضعهم دا
& انا واثق ف بسمه يا ليل ..
€ شفتي قلتلك !! انا هروح اسخن السكينه تاني عشان بردت و جايه
-متأكد انك مش عايز تروح المستشفي ؟
& اه .. اساسا مش عايز اتقل عليكم انا مش قادر اتحرك وانتو لسا هتسندوني
-مين عمل فيك كدا !!
& موضوع طويل ..
€ يلا يا كيمو جاهز ؟
&اه بس ياريت تخلصي الموضوع بسرعه
€ اه طبعا هخلص بسرعه .. ليل ثبتيه فمكانه عشان ميتحركش لان الموضوع هيكون مؤلم شويه من غير مخدر
ليل قعدت جمبه و حطت ايدها علي دراعه و ايدها التانيه علي صدره
€ انتي كدا بتثبتيه مكانه ولا بتتحرشي بيه !!!
-هثبته ازاي مثلا ؟! لو عندك طريقه تاني قولي
€ ما علينا كدا كدا هخلص الموضوع بسرعه
فكت القماشه و بدأت تدخل السكينه فمكان الرصاصه عشان تطلعها ( هي اساسا غلطت المفروض تحدد مكان الرصاصه ب اشعه بعدها تدخل السكينه فالمكان لكن دي كانت بتدخلها وهي مش عارفه عمقها اد ايه )
كريم وقتها كان بيصرخ من الالم
& يا بسمه يلا خلصي بسرعه انا مش قادر
ليل كانت بتعيط عليه لان واضح ان الالم شديد
اما بسمه فكانت مركزه فالي بتعمله
عشر دقايق و هي بتدور عالرصاصه بالسكينه
بعياط -يبنتي ناخده للمستشفي احسن حرام عليكي انتي لسا حتي ملقتيش الرصاصه
بسمه وقفت و بصت علي كريم
€ وجعتك جامد ؟!
-اومال انتي فاكره اي يعني ؟! بتحطي سكينه جوا جرح هو اساسا واجعه و كمان سكينه متسخنه علي نار و عايزاه ميحسش ؟!
€ انا بسأل كريم علي فكره
& بسمه .. انا هروح المستشفي انا فعلا مش هقدر استحمل تدخليها تاني انا عمري متألمت بالشكل دا حتي لما كانو بيضربوني
بغضب € انت مش واثق فيا يا كريم !!!
& واثق بس انا فعلا مش قادر .. لازم اتخدر
€ انت بقيت ضعيف علي فكره يا كريم انا عمري مشفتك بتصرخ من الالم قبل كدا
& انا انسان واكيد هتألم
-اديكي اهو بتقولي يا بسمه انك عمرك مشفتيه بيصرخ من الالم ف دا معناه ان الالم شديد اوي اوي ومفيش حد يستحمله
€ وانا قلت مش هناخده المستشفي وانا موجوده
كانت بسمه مصره علي رأيها
راحت تسخن السكينه تاني
اول لما خرجت من الاوضه ليل قامت بسرعه وقفلت باب الاوضه بالمفتاح
-بنت خالتك دي مجنونه والله ! عايزه تثبت انها دكتوره شاطره علي حساب المك يعني !!
& هي طيبه والله
-اه واضح انها طيبه
-استني لما تمشي من الشقه هاخدك المستشفي .. دلوقتي هستغل الوقت ف اني اطهرلك الجروح الي ف صدرك
& تمام ..
-متقلقش انا مش مجنونه زي بنت خالتك .. مش هوجعك يعني وبعدين انت بتعرق ليه كتير ؟
قربت منه وبدأت تطهرله الجروح ب البيتادين
كانت قريبه منه جدا جدا يمكن كانت المسافه بينهم سم واحد او اتنين
كريم كان باصص علي وشها اما هي مركزه ف تطهير الجروح
بعدها بصتله واتوترت لما شافته باصصلها واستوعبت وقتها ان المسافه بينهم صغيره جداا
-بتوجعك؟
& لا ايدك خفيفه
-تمام
كملت تطهير للجروح وهي خجوله
& علي فكره مازن جالي امبارح
-عادي اكيد هيجيلك مش هو صاحبك ؟
& قالي انه هيفسخ الخطوبه مع امنيه
بصتله
بفرحه -بجد ؟!
& اه .. وكمان عرف انك بتحبيه من زمان ..
فجأه وقفت عن تطهير الجروح
-بس انا مش بحبه
& لا بتحبيه .. وباين كمان من فرحتك دلوقتي
-طيب هو عرف ازاي
& حد بعتله شاتات بينك وبين واحده تانيه وانتي كنتي بتتكلمي عنه فالشاتات
-دي اكيد آيه
& هو قال انه معجب بيكي ..
ركز علي رده فعلها اكتر فالوقت دا
بفرحه شديده - بجد !!
&ايوه ..
قامت من مكانها وهي فرحانه وحضنت كريم
-شكرا بجد
وبعدها اتراجعت بسرعه
-انا .. انا اسفه اكيد الجروح وجعتك لما حضنتك صح
& لا ..
-ياريت كان عندي اخ زيك كدا
& اخ ؟!
-ايوه .. هو ينفع اعتبرك اخويا
كريم كان قلبه بيتخلع من مكانه وهما بيتكلمو بدايه من اللحظه الي بدأ يتكلم فيها عن مازن
& اه طبعا ينفع ..
-طيب كدا انا خلصت تطهير الجروح و سمعت صوت الباب من شويه ف شكل بسمه مشيت .. هطلع الصاله بس اكلم آيه وهاجي اخدك و نروح المستشفي
& تمام ..
اول لما خرجت الصاله هو قام من السرير وبدأ يمشي رغم الم رجله الشديد بس هو كان وقتها مش حاسس بحاجه .. كل الي حاسس بيه ان قلبه اتكسر
فضل يمشي لغايه المستشفي مع انها بعيده
ومحسش ب اي الم
وصل المستشفي و دخل الاستقبال
و الدكتور اخده للاوضه عشان يطلعله الرصاصه
وقتها ليل دخلت الاوضه
-قلقتني عليك ليه مشيت وحدك !! اكيد اتعذبت لغايه لما قدرت توقف تاكسي
& انا مشيت .. مركبتش تاكسي
بذهول - نعم !!!
£ هات دراعك عشان اخدرك
& مفيش داعي للتخدير
الممرض بص للدكتور ب استغراب
£ الالم هيكون شديد ومش هتستحمله
& وانا قولت مش عايز اتخدر
-يا كريم مش انت قلت بنفسك فالبيت انك هتروح المستشفي عشان يخدروك ؟! انت بنفسك قلت انك اتألمت الم محستهوش قبل كدا
كريم كان باصص قدامه ومش بيتكلم
£ طب خلاص احنا هنحترم رغبه المريض
ليل مسكت ايد كريم
-اضغط علي ايدي لما تحس ب الم
بس هو مردش عليها
الدكتور بدأ يطلعله الرصاصه بعد لما الاشعه طلعت و عرف مكان الرصاصه بالظبط
بس كريم مكنش بيحس ب اي حاجه .. مكنش بيبدي اي رده فعل ولو حتي بسيطه
كان باصص قدامه وخلاص
حتي الدكتور والمريض استغربو جامد لان تقريبا اول مره يشوفو حد بالثبات الانفعالي دا ومن غير تخدير كمان
و ليل كانت مستغربه اكتر منهم لانها شافت حالته فالبيت لما كانت بسمه بتطلعله الرصاصه
الدكتور طلع الرصاصه و ربطله مكان الرصاصه
£ بس كدا تقدر تمشي بعد شويه تكون استريحت شويه
& لا انا همشي دلوقتي
وقام من مكانه و بدأ يمشي بسرعه
ليل جريت وراه
-انت فيك حاجه غريبه بجد
بس كريم مكنش بيرد عليها
راح للبيت مشي و ليل كانت بتمشي وراه
-طيب مش بتكلمني ليه انت زعلت مني فحاجه؟!
وصل للبيت وفتح الباب و دخل الصاله
& عايز انام ف ياريت تسيبيني فحالي
-طيب تعالا انت نام فالاوضه وانا هنام فالصاله
& لا هنام عالكنبه
و راح نام عالكنبه و غطي وشه بالبطانيه
راحت الاوضه وحاولت تنام بس معرفتش
قامت تحضر الغدا لانه محتاج يتغذي كويس
بس اتفاجأت بعد ساعتين ان حد بيفتح باب الشقه
جريت وهي مخضوضه احسن يكون حرامي
بس اتفاجأت ان كريم خارج
-انت خارج ؟!
& انتي شايفه ايه ؟
-متستريح النهارده حتي ..
& ورايا شغل كتير
-طيب انت عارف تمشي كويس ؟
& انتي شايفه ايه ؟!!
بعياط -بتتكلم معايا كدا ليه
& وانتي بتعيطي ليه !
-عشان بتعاملني وحش
طنش كلامها وخرج من الشقه وقفل الباب جامد وراه
فضل عالحال دا يومين مش بيتكلم و بيروح بس الشغل ويرجع منه .. حتي باباه حاول يتواصل معاه كتير بس مكنش بيرد عليه
ليل حست ان فيه حاجه غريبه و اضطرت تكلم بسمه
€ عايزه ايه ..
-كريم متغير جامد الايام دي .. حتي باباه بيتصل طول اليوم علي موبايله بس مش بيرد عليه انا رديت عشان اطمنه .. هو ماله ؟
€ بصراحه انا كمان شايفاه غريب هو انسان فرفوش ولطيف مش عارفه ليه بقا انسان جدي كدا
-بصي يا بسمه انا عارفه انك مش بتحبيني عشان بتغيري علي كريم بس انا فعلا بعتبره اخويا
€ مش بتحبيه ؟
-لا انا بحب واحد تاني اساسا
€ الحمدلله طمنتيني انا اسفه عالطريقه الي كنت بعاملك بيها
ليل حضنت بسمه
-انا زي مبعتبره اخويا هعتبرك انتي كمان اختي
ب ابتسامه € اتفقنا
بسمه نزلت تقعد مع ليل فالشقه ويتكلمو
*بعد ١٠ ساعات *
كانو قاعدين مع بعض و بيهزرو و كريم رجع من الشغل وقتها
-يا كريم انا و بسمه عملنالك عشا تحفه
& اكلت فالشغل
€ يا سلام يا كريم انت دايما بتقولي ان اكل الشغل وحش ومستحيل تاكله مهما حصل
& انا عايز انام ف ادخلو الاوضه
€ انت ليه بتعمل معانا كدا يا كريم !!
بزعيق & عايز انام بقول
€ انت كمان بتزعقلنا!!
بسمه قربت منه عشان تحضنه لانه لما بيكون متضايق او متعصب بتحضنه و بيهدي
هو بعد عنها
& بتعملي ايه !!
€ يبني انا بعمل كدا دايما كل لما تكون متضايق !!
& وانا بقولك عايز انام ومش طايق اشوف حد قدامي
€ لحظه كدا اي الريحه دي .. انت شارب ؟!
بزعيق & انتي مالك بيا !!
-خلاص يا بسمه متضغطيش عليه ..
€ لا استني بس
بسمه قربت من كريم و ضربته قلم
€ متفوق بقا اي الي بتعمله دا !! بتعاملنا وحش و كمان جاي وانت سكران .. من امتي بتشرب اصلا ؟!
كريم سابهم وخرج من الشقه
-مكنش لازم تضربيه يا بسمه !! الامور مش بتتحل كدا
€ هو الي عصبني يا ليل .. من امتي وهو بيشرب اصلا المفروض كل لما بتكون حاجه مضايقاه بيجي يحكيلي
-بس مكنش لازم تضربيه بردو وكمان قدامي
€ مش عارفه بقا يا ليل الي حصل حصل
-انا هروح ادور عليه
€ يبنتي الوقت متأخر احنا فنص الليل
-طيب تعالي معايا لو عايزه
€ مش هقدر اخرج بلبس البيت
-تمام انا رايحه و هطمنك عالموبايل
€ تمام يلا روحي بسرعه قبل ميبعد
فعلا خرجت من الشقه و راحت ورا كريم
-استني انت بتمشي بسرعه كدا ليه !!
اضطرت تجري جري و وصلتله
ومسكته من دراعه جامد
-بتعمل معانا كدا ليه !!
فلت دراعه من ايدها ومشي
-انت بتتجاهلني !!
وقفت قدامه
& عايزه ايه ؟
-عايزه اعرف مالك
& وانا بقول مفيش
-لا انت مش كريم الي انا اعرفه .. كريم الي اعرفه اختفي و اتحول لشخص غريب
& انا عايز امشي ف ابعدي من قدامي
-وانا مش هتحرك غير لما تقولي ايه الي غيرك
ليل قربت من كريم جامد وهو بيبعد ل ورا
-بتبعد ليه
& وانتي بتقربي ليه !!
-لو عايزني ابعد يبقا تقول مالك
كريم بدل م كان بيبعد بدأ يقرب وهي الي بترجع ل ورا
لغايه لما بقت لازقه فالحيطه
-كريم انت بتقرب اوي كدا ليه ؟!
قرب منها اكتر واكتر لدرجه ان نفسهم بقا ف وش بعض
فجأه كريم باسها بعمق
& انا بحبك ..
يتبع
حبي_الوحيد
تفاعل ومتابعة لصفحتي
البارت السادس
كريم قرب منها اكتر واكتر لغايه لما نفسهم بقا ف وش بعض
وفجأه باسها بعمق
& بحبك ..
ليل زقته جامد و ضربته بالقلم
-ايه الي بتعمله دا !!! انا بقولك بعتبرك اخويا وكان نفسي يكون عندي اخ زيك وانت تعمل كدا !!!
بعياط & انا تعبت بقا تعبت .. تعبت من اني اشوف فرحتك كل لما تيجي سيره مازن .. انتي ليه محبتنيش ؟ انا وحش للدرجادي ؟
-افهم بقا انا بعتبرك اخويا .. انا محبتش ومش هحب غير مازن وبعدين انا وبسمه بقينا اصحاب و اعتبرتها اختي … عايزني اخون اختي و اتجوزك ؟! هيكون ايه الفرق بيني وبين امنيه وقتها
كريم مسح دموعه وقرب منها مره تانيه
-كريم اقسم بالله لو مبعدتش لاصوت والم عليك الناس .. انت مش الشخص الي عرفته ابدا يا كريم انت اتغيرت
كريم بعد عنها و مسك عصايه مرميه فالشارع و بدأ يضرب علي رجله فنفس مكان الرصاصه
ليل جريت عليه ومسكت ايده الي فيها العصايه
بخوف -انت بتعمل اي ؟!! لسا اساسا جرحك مخفش بشكل كامل
ببرود & سيبيني انا لما هتألم الم جسدي هنسي الم قلبي..
ليل معرفتش تقوله ايه
-انا رايحه البيت .. هاخد حاجتي وماشيه يا كريم
وفعلا سابته ومشيت بس وقفت فنص الشارع
الالم رجع مره تانيه و كان قوي جدا
راحت البيت بالعافيه و اخدت حاجتها
€ مالك يا ليل هو قالك حاجه ضايقتك ؟!
-اه يا بسمه قالي امشي من الشقه عشان مش قادر ياخد راحته
€ طب تعالي عندي واقعدي معايا فالاوضه احنا خلاص بقينا اخوات
-لا مش هفضل اعيش لاجئه عند الناس يا بسمه
€ بجد انا هزعل لو مقعدتيش معايا
-تمام هقعد معاكي بس يومين بس و انا هقدم شغل فكل حته تاني يمكن يقبلوني المره دي .. عن اذنك هدخل الحمام بسرعه
دخلت الحمام وهي بتنهار .. كانت سانده طولها بالعافيه .. غسلت وشها كذا مره و خرجت
-معلش يا بسمه ينفع تطلعيلي شنطتي حاسه بدوخه شويه
€ اه طبعا تعالي اسندك
بسمه وصلت ليل ل اوضتها و فتحت الدولاب رتبتلها هدومها
-انتي طيبه اوي يا بسمه
€ بحاول اكفر عن الي عملته فيكي .. اصل انتي متعرفيش كريم بالنسبالي ايه … وكنت غيرانه منك عشان كنت شايفه اهتمام منه ناحيتك
ليل ابتسمت و نامت عالسرير
*١٠ الصبح*
كريم صحي وهو دايخ جداا
&اوف انا شكلي تقلت فالشرب امبارح
بدأ يحاول يفتكر الي حصل امبارح و نجح ف انه يفتكر
قام من مكانه بسرعه و بدأ يدور علي ليل ف كل انحاء الشقه بس مكنتش موجوده
خرج الشارع يدور عليها وهو بيشتم نفسه علي الي عمله امبارح
كان راجع البيت وهو يائس انه يلاقيها بس اتفاجئ ب بسمه خارجه من شقتها و بتقوله ان ليل عندها
& الحمدلله انا افتكرتها مشيت خالص
€ ليه افتكرت كدا
كريم اتكسف يقولها انه باسها بالعافيه امبارح
& لا لا مفيش حاجه حلمت كابوس بس
€ تمام بص انا رايحه الشغل و هاخد ماما لجلسه العلاج الطبيعي بتاعتها
& تمام
دخل الشقه وهو بيفكر يطلع يكلم ليل ولا لا
*بعد ساعتين *
ليل كانت لسا نايمه بس صحيت من النوم علي وجع فجسمها كله .. المره دي كان اكتر من اي مره اتوجعت فيها من سعت م اكتشفت انها عندها سرطان دم
قامت بالعافيه من السرير وكانت بتعيط
دورت علي بسمه بس مكنتش موجوده
ضغطت علي نفسها ومشيت لغايه الباب و فتحته
بعياط جامد و صريخ - حد يلحقني انا مش قادره استحمل
كريم سمع الصوت و خرج بسرعه
و جري ناحيتها
بخوف شديد & مالك يا ليل
بعياط جامد - مش قادره استحمل المره دي اقوي من اي مره ارجوك ساعدني انا بموت
بخوف شديد & انا مش فاهم حاجه اهدي بس وقوليلي حاسه ب ايه
ليل بعدها بصت ل كريم كأنها عايزه تتكلم بس مش قادره وبعدها اغمي عليها وهو مسكها قبل لما تقع عالسلم
اخدها بسرعه للمستشفي الي بتشتغل فيها بسمه
بخوف شديد & يا دكتور هي كانت بتعيط جامد و بعدها اغمي عليها ..
£ تمام انت استني هنا واحنا هنشوف مالها ونبلغك
اتصل ببسمه بسرعه وهي نزلتله فالاستقبال
€ مالك يكريم !!
& ليل .. كانت بتتألم جامد و بعدها اغمي عليها
€ انا هدخل للدكتور اشوفها و اقولك
& تمام ..
كريم كان قاعد فالاستقبال وهو يكاد يموت من القلق
بسمه خرجت من الاوضه الي فيها ليل وملامحها متطمنش
كريم جري عليها
& طمنيني مالها
بحزن شديد € ليل عندها سرطان دم و المفروض كانت تبدأ علاج من شهرين بس الدكتور قال انها جت المستشفي هنا من شهرين و رفضت تتعالج لما عرفت ان عندها سرطان دم
بصدمه & سرطان دم !!
كريم حاول يمسك دموعه بس مقدرش
€ اهدي يكريم هتبقا كويسه
بعياط & هي فمرحله تقدر تتعالج فيها صح
€ دلوقتي هي فمرحله نسبه الشفاء فيها ٥٠ ونسبه انها متستجبش للعلاج و تموت بعد ٣ او ٤ شهور ٥٠ بردو .. لو كانت بدأت علاج وقت م اكتشفت المرض كانت فرصه الشفاء وقتها اكتر بكتير بس اهم حاجه فالفتره دي حالتها النفسيه .. لازم تتمسك بالحياه و لازم يكون عندها اراده انها تعيش
كريم سابها وهو منهار و اتصل علي آيه ( اخد رقمها قبل كدا من ليل عشان لو حصل ظرف طارئ )
& الو يا آيه انا كريم اكيد ليل حكتلك عني
~ اهلا وسهلا بيك
& هي ليل مرضيتش تتعالج ليه لما عرفت انها عندها المرض دا
بحزن ~ وقتها كان مازن خطب امنيه وهي انهارت لانه كان الحاجه الوحيده الي مصبراها علي حياتها .. ليل تعبت اوي فحياتها و خسرت الناس الي بتحبهم ومحدش رضي يقف جمبها
كريم كان حاسس ان قلبه اتكسر اكتر من الاول ..
& هي بتحب مازن للدرجه دي ؟
~ ايوه دي بتعشقه مش بتحبه وبس
& طب تمام شكرااا
بعد لما خلص المكالمه قرر انه هيدوس علي قلبه بستين جزمه المهم انها تخف وتعيش
اتصل بمازن
= الو يصاحبي
& الو يا مازن
= مال صوتك
& لا مفيش .. بقولك .. انت قلتلي ان ليل عاجباك صح
= اه
& لسا حاسس ناحيتها بحاجه ؟
كان وقتها كريم مستني الرد علي احر من الجمر .. كان نفسه يقول لا عشان يتراجع عن الي هيقوله و هيعمله
= اه انا اكتشفت اني حبيتها .. بفكر فيها يوميا بس كنت مستني اتقدملها بعد شهرين عشان اهلي سافرو
& تقدر تيجي تتقدملها بكرا ؟؟ هي عايشه مع بنت خالتي حاليا و ياريت مثلا تعملو كتب كتاب مش خطوبه بس
بفرحه= فكره حلوه والله يصاحبي بس تفتكر هتوافق عليا ؟!
& هي قالت لبسمه انها بتحبك جدا ف اكيد هتوافق
بفرحه= والله يصاحبي مش عارف اشكرك ازاي
& لا ولا يهمك .. باي
قفل معاه المكالمه و فضل يضرب ب ايده فالحيطه لغايه لما ايده بقت كلها دم
بعدها رجع لبسمه
€ مال ايدك يا كريم !!
& سيبك مني دلوقتي .. حالتها عامله ايه دلوقتي
€ الدكتور ادالها مسكن قوي و المفروض تبدأ جلسات بكرا و هتعيش عالمسكنات لمده شهرين
& تمام .. علي فكره فيه حد جاي يتقدملها بكرا و عايز يكتب الكتاب مع الخطوبه ف ياريت تقوليلها لما تفوق
€ اه هي قالتلي انها بتحب حد .. دا الي بتحبه ؟!
& ايوه .. انا هروح الشغل
راح الشغل و كان سرحان اغلب الوقت وبيفكر فيوم بكرا و ازاي هيقدر يشوفها مع واحد غيره
اليوم عدا و ليل روحت مع بسمه
-هو كريم فين
€ راح شغله .. هو الي اخدك للمستشفي علي فكره
-انا اخر حاجه فكراها اني كنت بتوجع جامد
€ ليه مقولتليش يا ليل انتي عارفه ان العلاج فالسرطان بيفرق فيه اليوم الواحد يعني لو بدري اسبوع كانت هتكون نسب الشفاء اعلي
-انا مكنتش عايزه اعيش وقتها ..
€ بالمناسبه الي بتحبيه جاي بكرا يتقدملك و عايز يكتب الكتاب مع الخطوبه
بفرحه - بجد ؟!
€ ايوه
بعدها ليل افتكرت كريم
-كريم هيكون موجود ؟
€ ايوه طبعا
-تمام ..
-بس صدفه غريبه انه يطلب ايدي ف وقت زي دا
€ اه فعلا و دا دليل انك محظوظه
-طيب انا هلبس ايه بكرا
€ انا عندي فساتين كتير متقلقيش من الموضوع دا
-ربنا يخليكي ليا يا بسمه مش عارفه من غيرك كنت هعمل ايه
بسمه حضنت ليل
€ عيب عليكي احنا اخواات
اما كريم فكان لسا قاعد فالشغل وقرر يبات هناك
بس اتفاجئ بحد بيصحيه جامد
~ ازاي متتصلش ولا تسأل عليا كل الوقت دا
& معلش كدا انت مين اصل نسيتك
~ يا ابني انا اعتذرتلك خمسين مره اعمل ايه تاني
& متعملش .. سيبي فحالي
~ مامتك هي الي ..
كان لسا هيكمل كلامه بس كريم قاطعه
بزعيق & متجبش سيره ماما علي لسانك !!!
~ انت فاكر انها لو كانت بتحبك و بتفضلك عن اي حاجه فالدنيا كانت انتحرت ؟!
& هي انتحرت بسببك متحاولش تحور فالموضوع .. اول لما عرفت انك بتخونها واجهتك وانت وقتها ضربتها علقه موت و قلتلها تقعد زي الكلبه و انها خدامه عندك و هي بعدها بيومين انتحرت .. انا كنت طفل وقتها بس فاكر كل كلمه .. المشهد دا بيتعاد قدامي كل يوم
~ وانا اتعاقبت بعدها ببعدك عني طول السنين دي .. انا ابوك ولازم تسامحني
& مش هسامحك ابدا ابدا انت حرمت طفل من امه بس عشان خاطر شهواتك
~ انا كنت بحبها و امك مكنتش راضيه اني اتجوزها مع ان الشرع محلل اربعه
كريم اتعصب
& امشي من قدامي انا فيا الي مكفيني
~ مالك اي حاصل معاك
& ولا حاجه لو سمحت امشي انا بتكلم بهدوء لغايه دلوقتي
~ انت حبيت ؟؟؟!
كريم قام من مكانه و سابله المكان و مشي
كان بيتمشي عالبحر و هو زعلان جداا
فتح اكونت مازن عالانستا
& هو احسن مني ف ايه عشان تختاره هو وتحبه هو …
بعدها راح لعمارتهم
اول لما فتح باب الشقه ليل فتحت باب شقه بسمه و نزلتله
-كنت مستنياك
& اه معلش اضطريت امشي عشان كان عندي شغل مهم
-احنا لسا متكلمناش فاللي حصل يومها ..
& مفيش حاجه نتكلم فيها اصلا .. انا كنت سكران و … مكنتش عارف بقول ايه …ولا بعمل ايه
-يعني انت مش بتحبني صح ؟
& ايوه انا عمري محبيت اساسا
ليل اتنهدت بفرح
-الحمدلله طمنتني كنت خايفه جدا انك تكون بتحبني
& بسمه قالتلي ان مازن جاي يطلب ايدك بكرا .. مستعده ؟
بفرحه - انت مش متخيل انا فرحانه اد ايه .. اوعدكم التزم بالعلاج و اروح كل الجلسات
& طب حلو انا هروح انام عشان بكرا اكون موجود لما مازن يطلب ايدك .. انا الراجل الوحيد فالبيت دا ف هو هيجي يطلب ايدك مني
-ماشيي شكرا يا احلي اخ
وحضنته وبعدها طلعت لشقه بسمه
كريم دخل الشقه و كسر كل حاجه تيجي ف وشه ..
وبعدها دخل ياخد شاور
اختلطت مياه الشاور ب دموعه
خرج من الشاور و مسك برجل و بدأ يجرح نفسه ف دراعه .. هو مقتنع بمبدأ ان الالم الجسدي بيخليك تنسي الم قلبك
فضل يجرح فنفسه وهو مش حاسس ب اي الم لمده ربع ساعه وبعدها دخل نام
صحي العصر قبل لما مازن يجي بساعه
لبس وخبط علي بسمه
& العروسه مستعده ولا لسا انا هقعد فالصالون استني مازن
€ بتتجهز من الصبح ومتوتره موت😂
كريم ابتسم ( من جواه بيموت بس لازم ميبينش حاجه)
مازن وصل هو و خاله ( باباه ومامته مسافرين )
& اتفضلو
وقعدو فالصالون
و بعدها بشويه ليل خرجت عشان تقدملهم العصير
كانت مكسوفه جدا و بتبص لمازن وتبتسم
اما كريم ف فضل باصص عليها ونسي الدنيا حواليه
كانت لابسه فستان احمر و حاطه ميكب سيمبل و فارده شعرها ..
بسمه هزت ايده
بصوت واطي € يا كريم انت سرحت ولا ايه
& هاه ! اه معلش سرحت
¥ كنا بنقول اننا جايين النهارده ايد الانسه ليل ل ابن اختي مازن
كريم كان ساكت ومش بيتكلم
بسمه هزت ايده مره تانيه و قالتله ف ودانه
€ كريم الراجل بيتكلم مترد عليه !!
ليل كانت باصه لكريم الي مكنش راضي ينطق بكلمه
= كريم .. خالي بيكلمك
كريم قام من مكانه
& معندناش بنات للجواز
الكل بصوله بصدمه واستغراب
-كريم انت بتقول ايه !!!
& شرفتونا بس انا مش موافق علي الموضوع دا
= اذا كنت انت بنفسك كلمتني و شجعتني اني اجي !!!
كريم مشي وسابهم
و ليل راحت وراه
مسكته من دراعه (كانو واقفين عالسلم )
-ايه الي عملته دا ؟! وانت الي كلمت مازن !!
& انا مش هقدر اشوفك لحد غيري … مش هقدر انا حاولت ومعرفتش .. اتصلت بيه عشان ترضي تتعالجي وتكون نفسيتك كويسه وتخفي لما تعرفي انه بيحبك وكمان لما تكتبو الكتاب بس انا كدا بنقذك وبقتل نفسي ..
-يعني انت كنت بتكدب عليا وقت مقولتلي ان الي حصل كان بسبب انك سكران !!
& ايوه كدبت عليكي … انا فعلا كنت سكران بس كل كلمه قولتها كانت حقيقه .. حتي البوسه كانت حقيقه ..
بسمه ومازن وخال مازن كانو سامعين كلامهم لان صوت ليل وكريم كان عالي
مازن اتحرك ناحيه كريم و ضربه بالقلم
= انت ازاي تعمل فيا كدا !! انت عارف اني بحبها ومع ذلك رحت قلتلها انك بتحبها و كمان .. بوستها !!! اكيد طبعا اتصلت بيا وقلتلي اجي اتقدملها بس عشان تحرجني انا وخالي
بعد لما خلص كلامه بسمه اتحركت ناحيه كريم بردو و ضربته قلمين
بعياط € انت انسان زباله يا كريم زباله …
و بعدها راحت ناحيه ليل وكانت هتضربها بالقلم بس كريم مسك ايدها
بعياط € انت كمان بتدافع عنها !! انا غلطانه اني اعتبرتك اختي .. انا حكيتلك اد اي انا بحب كريم و انه كل حياتي بس انتي عملتي اي ؟! خدعتيني وقولتيلي مش بتحبيه وبتعتبريه اخوكي بس … اومال البوسه كانت ايه ؟!
ليل واقفه مكانها ومصدومه من الي بيحصل .. حتي اليوم الي كانت معتبراه اسعد يوم فحياتها اتحول لكابوس
مازن قرب من ليل
=ليل تعالي معانا .. هنروح للمأذون ونتجوز كدا كدا اصلا دول مش اهلك وانتي موافقه عليا ف خلاص كدا نروح للمأذون ونتجوز و نعمل فرح بعد شهرين لما اهلي يرجعو .. انا بحبك يا ليل
كريم ضرب مازن بوكس ف وشه
& هي مش رايحه معاك ف مكان ..
مازن وكريم مسكو فبعض و بيتخانقو
ليل فجأه صرخت فيهم
-بس بقا كفايه اي الي بتعملوه دا حرام عليكم
وقفو ضرب
& اختاري واحد مننا … يا انا يا مازن
يتبع
تفتكرو هتختار مين ؟
انا مش بعرف اعمل منشن لكل الناس ف اي حد هيجاوب عالسؤال ف كومنت هعمله منشن البارت الجاي ❤️
تفاعل ب10 كومنت
حبي الوحيد
تعليقات
إرسال تعليق