النصاب البارت الثالث بقلم جمانه السعيدي حصريه وجديده
بان.....مااكدر اوصف حجم الفراغ الي تركته ساره بحياتي
رغم اني وياها على تواصل دائما
بس جاي افتقد وجودها
طبعا زوجها خلاها تشتغل ويااا بشركته
وأمورها تغيرت حيل
بس بقت ساره نفسها ما تغيرت عليه
اذا تلكا اتصال مني راسا اجاوبني حتلو مشغوله
اول مااشترت سياره
صورتها ودزت صورتها اليه قبل اهلها
شكد فرحانه علمودها
وعلى هذا التطور الي حققته بحياتها
ام اني ماتغير شي بحياتي نفس الروتين الملل اليوم
المشكله مااعرف شلون اصادق
اني وساره عبالك مولودين اصدقاء
اني مااعرف شلون صرنا صديقات لان من فتحت عيني هيه كبالي
بعد هذا العمر مراح اكدر اصادق وحده غيرها
مااعرف اصادق
بلدائره الي اداوم بيها
البنات تتعيين منا تخطب منا
حتى المنفصلات نفس الشي بس تطلك تزوج
اله اني بمكاني ماتغير اي شي بحياتي
محد يقرب عليه ومحد يفكر يرتبط بيه
بلاخير اني بنيه واريد ازوج وتصير عندي عائله حالي حال باقي البنات
جمانه السعيدي
عشت حياتي بدون اب وبدون خوان او خوات
حياتي فارغه
لو مو ساره جان صار بيه توحد
لان محد تقبل تلعب وياي
وهسه رجعت اعيش الوحده مره ثانيه
الوحده بهذا العمر حيل صعبه
ااكو وحده تشتغل خطبه تقريبا عمرها ٤٠ سنه
دائما تجي للدائره
الي توصيها على عريس تشوفلها عريس طبعا بفلوس
شكله حلوه ولسانها يخبل حجيها مسفط ومرتب ويجذب
محد يكدر عليها لابسه كومه ذهب
تلمع من راسها الرجليها
ااكو واحد ويانا يشتغل عمره ٥٥ أرمل وصاها على عروس
ااقل الأسبوع وحصلته عروسه
من تدخل للدائره كلها تفرح بيها وكلها تعرفه
اسمها ام زيدون
هواي تجي الدائرتنا
مو بس هاي الدائره تعرف هواي بنات موضفات
بغير دوائر تعرف معلمات ومدرسات
تعرف كل الطبقات وكل المستويات
وحده وصتها على عروس إلخالها عمره ٦٢ سنه
اربع ايام وجابتله وحده عمرها ٤٠ منفصله
خلتهم يلتقون عجبته وعجبها وزوجها
الموضفه دائما تكلها خالي بس يترحملج دائما
على زوجته يكول على الطلب كلش
بان......من اشوفها تدخل وتسلم على الكل وسولف وتضحك
والموظفات بس يسولفن بيها
شلون زوجت هذا
وشلون لكت رجل الهاي وشلون تنسق بين كل ثنيين
طالبين زواج
مرات عقلي يكولي ليش مااكوللها
ادورلي على عريس حالي حال باقي البنات
ارجع وااكول لا شنو ااكول هيج مو عيب
بعدين اني مو كدامها وتعرف اني مامزوجه
اذا اكو واحد يريد عروس ليش ما تحجي وياي
ااكيد محد يريد يزوج وحده سمينه وسمره
ايجوز من احجي وياها اتفشل
ااكيد راح اتفشل منو يقبل يزوجني
يمكن تضحك عليه لو تروح تحجي للبنات بدائرة
عليه
تكول هاي السمينه تريد رجل
وتخليهن يضحكن عليه
زين اني هم اريد ازوج واعيش حالي حال باقي البنات
قابل راح ابقى وحدي طول العمر
اريد اكون اسره ويصير عندي اطفال
الله حلم يصير عندي اطفال اربعه خمسه
يملون عليه حياتي
بان....رغم ام زيدون الخطبه تجي هواي للدائره
بس بعمري ما ااتجرءت وحجيت وياها بهذا الموضوع
الخجل يمنعني
رغم اشوف الموظفات وياي عادي عدهن الموضوع
ووحده ويانا عمرها ٤٥ سنه منفصله مرتين
وكلما تجي ام زيدون تطلب منها تشوفلها عريس
خاف يفوت العمر واكبر وما يتغير شي بحياتي
لو باقيه ساره وياي مجان حسيت بهذا الفراغ ابد
خطيه ساره الحد الان ماعدها اطفال تكول زوجي يراجع ومجاي يصير عدنا طفل
بعمر ٢٧ سنه بيبي توفت وتركتني اني امي وحدنا
بهذا البيت الجبير
خالي بس ايام الفاتحه موجود وبعد ما شفنا ابد
حتى بالاربعين امي الي حضرت كلشي على حسابها
عشى بثواب بيبي وزعته بلشارع
وااجر سياره الاقاربنا راحن وياها للنجف
اما خالي عماد راح ثاني يوم للاربعين هو وزوجته وجهاله
بسيارته راح البيي وطلعو للزياره ورجعو الببتهم
وهنا انقطعت علاقة خالي عماد بينا للابد
مرن ٣ اشهر بعد وفاة بيبي وماشفنا خالي ابد ولا اجا مره سئل عنا
امي...اريد اروح لو اتصل على عماد
بان...شكووو
امي....مهما يكون احنا نسوان وحدنا وماعدنا غيره
اريد اروح اسولف علي بلكت ترجع العلاقه
مثل قبل عاد يدخل علينا كدام الناس
الناس من تشوفنا وحدنا تطمع بينا بس اذا هو يجي يسئل
عنا الناس تحترمنا اكثر
بان...مااعتقد ترجع العلاقه مادام زوجته الحيه ورا
امي...اني اروحله واحجي ويااا
بلكت يحن علينا بعدين هاي الدنيا مو امان
كلشي يصير عاد هو ويانا مو وحدنا
بان...راح تعبين بلاش وكولي بان كالت
جمانه السعيدي
راحت امي البيت خالي تكول الجهال فتحولي الباب
وزوجته بس شافتني كلبت وجها
كلت ميخالف مالي شغل بيها اني جايه على اخوي
دخلت كعدت بلمرجوحه الي بلحديقه
طلع عليه بلشورت وشعره مخربط يمكن جان نايم
وكعدووو
وزوجته دخلت للبيت وما طلعت بعد
حتى كلاص ماي ما جابتلي
عماد....هااا خير شكووو
ام بان....خير الي بوجهك اجيت اسئل عليك
دام انت ما تسئل
عماد....وبعد شكوووو اطلعي بلمفيد لان توني اجيت من الدوام واريد ارجع انام
ام بان.....اني مااريد تبقى زعلان مني اريد العلاقه بينا ترجع مثل قبل واحسن
بلاخير اني مالي احد غيرك
انت اخوي الوحيد ليش هذا الزعل وعلمود شنووو
عماد....بدون كلام هواي ولف ودوران
تردين ارجع اخوج اخوج من صدك ومااعوفج
ولا اتخلى عنج
ترجعين كلشي اخذتي من عندي
ام بان....اني مااخذت شي منك
عماد...لا اخذتي رجعي حلال ابوي كله باسمي
كلشي حتى البيت الي كاعده بي
الي مااعرف شلون قشمرتي ابوي حتى يكتبه باسمج
وتعالي اني ابنيلج بيت زغير هنا بصفي
تكعدين انتي وبتج واسوكلج حالج حال جهالي
وابقى اخوج للموت وما اعوفج
ام بان....شنو من خوه هاي الخوه الي الها ثمن
مااريدها
عماد.... انتي تاخذين نص الاملاك حالج حالي
شلون هاي السالفه
تقنعيها انتي باجر ميته وبتج هاي اذا ازوجت
ولو مااضن اكو واحد ياخذها اله علمود فلوسها
وهيج حلال ابوي ياخذه رجال غريب
تقبلين حلال ابوي ياخذه واحد غريب ياخذه زوج بان
رجعيلي كلشي وخلي باسمي
واني اخوج وما اعرفج للموت
ام بان... الخوه مالها ثمن الخوه غيره ومسؤوليه
المفروض انت وحدك تكول
همزين ابوي خله شي باسمج
حتى تعيشين انتي وبتج اني لا موضفه ولا بيدي صنعه
شلون اعيش اذا مو ابوي يأمن مستقبلي
بعدين انت عندك خير من الله وموضف
المن تربد الخير هذا كله
ايجوز انت تموت قبلي ويبقى كلشي الزوجتك وجهالك
اذا اتنازلك عن حصتي
زوجتك ترحمني اني وبتي
من الصبح تشمرنا بلشارع
من تصلي ودنك الرب العالمين وتكول سبحان لله
اذكر عندك اخت تخليت عنها
وعفتها علمود الفلوس
الله لا يعوزني الك ربي ارحم بحالي وحال بتي
اني هم هيج خوه مااريدها
ااكو رب العالمين هو اهلي وناسي
وهو الي يتولاني برحمته الواسعه
شكرا خويه ماقصرت انت تريد حصتي
وانتم كلاص ماي ما جبتولي اشرب
في امان الله
انتظرونا......