رواية مارد وكنزي الفصل التاسع عشر والعشرين والحادي والعشرون بقلم الكاتبه نور محمد حصريه وجديده على مدونة النجم المتوهج

رواية مارد وكنزي الفصل التاسع عشر والعشرين والحادي والعشرون بقلم الكاتبه نور محمد حصريه وجديده على مدونة النجم المتوهج 

رواية مارد وكنزي الفصل التاسع عشر والعشرين والحادي والعشرون بقلم الكاتبه نور محمد حصريه وجديده 

"بصوت مميت" ... انتي بترفعي إيدك عليا 

"صرخت فيه" ... أيوة، عشان قليل أدب 

«عينه طقت شرار ومسك شعرها بقوة وجرها لتحت وهو مش شايف قدامه»

... أوعى بقا، ااااه 

... أنا هعرفك ازاي تمدي إيدك ع المارد 

«نازل ع السلم وهو ضاغط ع شعرها وهي ماسكة ايده لأنها موجوعة من الشد .. الكل خرج بفزع من صوت صراخه وشافوه بيجرها لبرة»

نرجس ... هو واخدها ع فين يا كمال 

كمال ... انزلوا بسرعة نلحقه أحسن يعمل فيها حاجة 

___

«خدها قدام قفص النمرة روزي»

"صرخ ف الحارس" ... افتح الباب 

"الحارس نفذ الأمر بخوف، ورماها جوة القفص بعنـ ـف"

كمال ... انت هتعمل ايه يابني!

"التفت لهم بغضب" ... مش عايز اسمع نفس ... خرج روزي ليها

"الحارس ابتلع ريقه، وكلهم بصوله بذهول"

نرجس ... لا يا مارد، دي روزي بقالها يومين مكالتش وفيه خطر عليها 

بتذمر ... لو سمحتو!! ... نفذ الأمر بقولك 

"راح يرفع الباب وخرجت منه روزي والكل حبس أنفاسه بخوف"

"تمتمت بملامح باكية" ... آخر ليلة ف حياتك يا كنزي، يا خسارة شبابك، روزي هتتعشى بيكي وانتي مكلتيش حاجة من الصبح 

«كنزي واقعة ع الأرض وبتزحف ببطء لورا وروزي بتقرب منها وهي بتترقب حركات جسدها استعداد لهجوم»

«وقف بالراحة وفضلت تجري بدايرة عشان تتفادى روزي اللي طارت ناحيتها»

... عااااااا ، يا بنت النمر دة انا بربيلك ابنك يا واطية

كمال ... حرام عليك يا مارد، روزي هتاكلها 

"المارد قافل دماغه ومش عايز يسمع حاجة ، وبيبص بترقب عليها، اللي كانت اتصلقت القضبان الحديدية بسرعة"

"صرخت بعياط" ... والنبي خلاص، حرمت اعمل كدة تاني .. مش عايزة ابقى وجبة يا مارد عاااااا

"باصصلها من غير وعي بعيونه الثاقبة .. لغاية ما فاق ع رجلها اللي بتنزلق ووقعت بعدها ع الأرض"

"خبت وشها بسرعة من الخوف لما روزي بدأت بالهجوم"

... اااااااه

"لكن ف لحظة كان المارد جوة القفص ووقف بينها وبين روزي اللي غرزت اسنانه ف دراعه هو بدالها"

"نرجس صرخت" ... ابني!.

«دخل المدرب بسرعة يبعد روزي اللي كانت صدمتها أقوى ، والحرس وأهله دخلوا عشان يلحقوه»

______

«خدوه بسرعة كلهم ع المستشفى، وأسعفوه قبل ما الجرح يسببله تسمم»

«فضل الليل بطوله ف المستشفى وتاني يوم الصبح خرج ورجع القصر»

"نرجس بدموع" ... سلامتك يا حبيبي 

بتعب ... الله يسلمك يا نرجس هانم

كمال ... نسيبك ترتاح شوية 

_____

"خرجوا وريم دخلت مع بنت جميلة جداً"

... الممرضة لورا يا مارد باشا، هتفضل معاك لغاية ما تخف 

«اتقدمت لورا ناحيته وهو قاعد ع السرير بابتسامة»

"حطت المخدة وراه" ... تسمح تتكي ع ضهرك وتسترخي

«كنزي حطت ايديها ع وسطها وبتهز رجلها بحنق»

... عشان الجرح يلم بسرعة، يا ريت تسمع كلامي وتسيب نفسك ليا

"عقد حواجبه بتذمر" ... أنا محدش يديني أوامر أنفذها

بدلع ورقة ... ما عاش اللي يديك أوامر، دة انت اللي تؤمر واحنا ننفذ

"شهقت باعتراض" ... هو ايه أصله دة، انتي جاية تغيريله ع الجرح ولا تتمايصي عليه 

"بصت لها بخبث" ... من واجبي اني اريح المريض، وخصوصاً لو كان المريض دة هو المارد باشا

"اتقدمت عليها بغيظ" ... طب يلا يختي طرقينا، مش عايزين ممرضات احنا 

«قعدت جنب مارد وحطت ايدها ع كتفه وهو اتوجع»

... اااه، بالراحة 

"لورا بتأفف" ... اللي بتعمليه دة غلط، لو سمحتي قومي 

«رفعت أيدها عن كتفه وقومتها»

... ارتاح حضرتك يا باشا لغاية ما أجبلك الفطار 

"ابتسمت له، وبعدين وهي خارجة رمقت كنزي بنظرة لعوب"

"بزمجرة" ... مبسوط حضرتك باللي بيحصل دة!

"مغمض عينيه ومردش عليها، سابته وخرجت بحنق وزمجرة"

_______

لورا ... لو سمحتي يا مدام عنايات، حضري الأكل للمارد من القايمة اللي ادتهالك

 ... الساعة 11 بالظبط هيكون جاهز 

... تمام 

"شافت ميان وأركان" ... انتو رايحين فين؟

ميان ... طالعين لمارد

... لالا مش دلوقتي بعد ما يصحى أنا مصدقت جسمه يسترخي، واضح ان بقاله فترة عنده أرق

"أركان وميان بعد ما كانوا طالعين السلم رجعوا تاني"

"أركان رفع كتفه" ... اللي تشوفيه

______

«كنزي ف الجنينة وشايلة الشبل»

... شوفت يا كنز اللي حصل، كنت هبقى وجبة كنتاكي لأمك يابن النمرة 

«سمعت من وراها صوت اتنين عمال»

_ برضو مش عايزة تاكل!

= للأسف لأ، ولو فضلت بالوضع دة ممكن تموت 

"راحت عندهم" ... ف ايه!! 

_ روزي رافضة الأكل، من ساعة ما هاجمت المارد

"ف نفسها" ... حتى النمرة زعلانة عليك وبتحبك، يا آسر القلوب 

_______

"دخلت لورا مع الشغالة"

... حطي الأكل واخرجي 

"مارد كان بيتقلب ببطء لغاية ما بدأ يفتح عينه"

بابتسامة ... يا صباح الفل ع الفل 

"حاول يعدل نفسه وهي ساعدته، وف اللحظة دي دخلت كنزي"

... انتوا بتعملوا ايه!

"من غير اهتمام" ... هتكون بنعمل ايه يعني! بأكله

"مسكتها وشدتها بعيد وقعدت هي مكانها"

... اطلعي برة، انا اللي هأكله

... لا، انا اللي هعمل كل حاجة

... شوفي يا حربوءة لو ملمتيش نفسك هديكي باللي ف رجلي 

"وتابعت بزمجرة لمارد" ... وانت بطل شغل الدلع بتاعك دة 

"رفع حواجبه بتعجب لأنه متكلمش، وهي رفعت المعلقة ع شفايفه"

"بعد وشه الناحية التانية" ... أنا مش جعان 

... أهو شوفتي مش قابل منك، سيبيني انا أتصرف

"بزعيق" ... ملكيش دعوة ... هتاكل مني أنا غصب عنك

"بتقرب اللقمة منه وهو بيحرك راسه يمين وشمال ومش عايز يفتح بوقه ودة ضايقها أكتر"

"لورا وهي بتاخد منها الأكل" ... لو سمحتي!

«بصت له بيأس وحست بكسرة انه حتى مش عايز يبص ف وشها أو يرد عليها»

"خرجت برة وهي بتعيط بزعل منه، ومن نفسها ع اللي عملته فيه"

________

... العواف عليكم 

"كانت ف الصالون لما سمعت صوت والدتها وجريت عليها"

... أماااا 

... بتعيطي ليه؟

بزعل ... مبعيطش

ديما ... أمال اللي ف عيونك دول مية النيل!

... عاااا

... لا دة شكل الموضوع المرة دي بجد، عملتي ايه يا منيلة!!

"خدتهم وقعدوا"

بعياط ... أمان يا ماما

"ضربت ع صدرها" ... يا نصيبتي حصله إيه!!

... النمرة هاجمته واتعور

ديما ... يا لهوي! ازاي وليه

"صرخت بعياط" ... باسني عاااااا

سعاد ... وعشان باسك تقومي تقتليه يا مفترية حرام عليكي 

... لا مش أنا، دي روزي 

"سعاد بنفاذ صبر" ... مهو أكيد انتي السبب منا عارفاكي 

... عاااااا 

______

... وازاي يا أركان متقوليش!!

... مهو يا مارد انت كنت تعبان، وكمان فكرت كنزي قالتلك

"وهو بيزيح الغطا عنه" ... وهي من امتى بتقوللي حاجة! كان لازم انت اللي تيجي وتقول

... طب اهدى، الدكتور قال متعملش مجهود

... روزي مش هتاكل غير لما تشوفني كويس قدامها 

_____

... انتي مش هترتاحي إلا لما يطلقك وتيجي تقعدي ف قرابيزي 

... وانا اعمل ايه يعني، مهو اللي فاجئني

... وف واحدة يا بنت الهبلة تعمل اللي عملتيه دة! خليه يبوسك امال هو متجوزك ليه مش عشان يبوس ببلاش 

"بزمجرة" ... أهو اللي حصل بقا 

"وانتبهوا عليه نازل من فوق"

لورا ... ايه اللي نزلك يا باشا

... نازل أشوف روزي

... بس انت لسة تعبان، والحركة الكتير غلط عليك

... مش مهم!

"سعاد بتمتمة" ... مين الأسد دي !! 

"عقدت حواجبها بتأفف" ... يا ماما بقا يوووه

سعاد ... سلامتك يا مارد باشا، ربنا يجازي اللي كان السبب

"كنزي شهقت وتابعت سعاد بخفوت" ... قصدي روزي مش انتي

... متشكر

لورا بدلع ... خليني أساعدك يا مارد 

... تساعدي مين يا بنت الكلوبين، وربنا أجيبك من شعرك يا عقربة 

"مارد نفخ بقوة وسابهم وخرج، وكنزي ضربت لورا ف وشها وخرجت وراه"

... احجزي الحربوءة دي عندك يمااا

«لورا كانت خارجة ووقفت قصادها ديما وسعاد»

"سعاد بطريقة ريا" ... رايحة فين يا شااابة

بخوف ... انتوا عايزين مني ايه!

ديما ... دة احنا هنروقوكي ع الآخر

"سعاد وهي بتقلب عينيها وقالت بصوت غليظ"

 ... كبدي عليها يا كبدي عليها 

"ديما بنفس طريقتها" ... ما جات رجليها ما جات رجليها!!

"لورا خافت وجريت وهي بتصرخ، وكلهم فضلوا يضحكوا عليها"

_________

... روزي، وحشتيني

"مارد قاعد نص جلسة وبيدلك فروتها بلطف، وروزي بتستجيب له بعد ما كانت مبتتحركش"

... هات الأكل يا سيد 

«مارد فضل يأكلها وهي بتقبل منه، وبعد ما خلصت أكل حضنته»

بضحك ... أجمل روزي ف الدنيا 

"سمع صوتها من وراه" ... يا حنين 

«التفت لها ولقاها واقفة بعيد ومربعة ايدها»

"مدهاش اهتمام وخرج والحارس قفل القفص وراه"

... أمان! عايزة اتكلم معاك

... وانا مش عايز 

"والتفت لها بضيق" ... وبعد كدة لما تعرفي ان روزي تعبانة تيجي تقوليلي 

... انا كنت هقولك، بس انت مدتنيش فرصة!

"بصلها بسخرية وسابها ومشي"

... استني هنا أنا بكلمك!. 

وقف وبصلها ... عايزة ايه

بتلعثم ... أنا... انا

... انا مش فاضي للتأتأة 

"بزمجرة" ... بس فاضي للمياصة وقلة الأدب مش كدة؟

"زم شفايفة وكمل ف طريقه، وهي جري وراه وقفته"

... خلاص خلاص، متزعلش والله أنا كنت جاية أعتذرلك عن اللي عملته

... شكراً مش عايز 

... دة انت عيل رخم أوي ياخي

... نعم!!

... اطرد البت المايصة اللي اسمها لورا دي 

... لأ، بصراحة كدة مريحاني وبتعاملني بحنية، بفكر كمان أخليها الممرضة الخصوصي بتاعتي 

«بصتله بغيظ وتذمر وبضهر أيدها ضربته ف إصابته»

بألم ... يا بنت الـ... امشي يا بت من هنا 

"طلعتله لسانها بغيظ، وهو حاول يخفي ابتسامته"

_______

... متقلقش أنا هنفذ النهاردة

_لازم تخرجي قبل ما حد يكتشف حاجة وإلا هتروحي ف داهية 

... انا مش تلميذة، استنى مني ماسدج بالتمام .. باي

"دي كانت لورا وهي بتتكلم ف التليفون بصوت واطي"

______

كنزي ... العصير دة لأمان!

... أيوة يا مدام 

... طب هاتي أنا هطلعهوله 

"خدته منها وطلعت فوق، ولورا ابتسمت بخبث وخرجت برة القصر" ................

#البارت_العشرووووون 😂😂😂💜

بابتسامة ... أنا جبتلك عصير يروق دمك 

"كان خارج من الحمام صدره عريان ودراعه مربوط بالشاش الطبي"

... يا ترى حطالي فيه ايه المرة دي!!

بزعل ... اخص عليك، بقا انا جاية وجايباهولك بنفسي وانت بتشك فيا! 

... خبيثة أوي انتي يا كنزي 

... والله أنا طيبة، انت بس اللي نيتك مش صافية 

"رفع حواجبه باستنكار، وبعدين سألها بمداعبة"

... صحيح فين لورا!

بزمجرة ... وانت بتسأل عنها ليه! ولا لازم تستأذنها عشان تشرب العصير من مراتك 

"سأل بهمس" ... مراتي!!

"بلعت ريقها بتوتر" ... بقولك ايه عاوز تشرب اتفضل مش عاوز انت حر

... اهدي طيب، انتي زعلتي ليه!

«خد منها العصير ولسة هيشرب الباب خبط»

"دخل أركان وهو شايل الكلب بتاعه"

... معلش يا جماعة اني دخلت فجأة، بس الزنخ باشا وماسة تحت 

"تمتمت بحنق" ... وقته ماسة وأبوها دلوقتي أوف 

«سند الكباية ع الطرابيزة »

... أنا نازلهم 

"لبس التيشيرت بتاعه وخرج"

... بقولك ايه ياض يا أركان، هي البت ماسة عرفت باللي حصل لـ أمان!

... الظاهر كدة، عشان سألت عليه بلهفة

"زمت شفايفها بحنق وهي بتفكر ازاي تتخلص منها وتبعدها عن طريقها، وفاقت ع صوت أركان وهو بينادي ع الكلب بتاعه"

... جاكي! رايح فين 

"الكلب جري من أركان ف الأوضة ووقع كباية العصير"

_______

... أهلاً يا زيدان باشا، ازيك يا ماسة

ماسة بقلق ... سلامتك يا مارد، ايه اللي حصلك 

... مفيش حاجه انا كويس 

الزنخ ... كان لازم تدينا خبر باللي حصلك

... مكانش فيه داعي

"ماسة بحنق" ... ومين السبب في الجرح دة، هي برضو 

... محدش، ومش كل مرة هحذرك!

"عقدت ايديها بضيق من دفاعه عنها"

_____

... الحق يا عم البتاع دة بهدل الأرض عصير 

... خلاص يا جاكي بقا، منت لسة واكل

"الكلب بدأ يلحس العصير اللي واقع ع الأرض"

________

«بعد شوية خرج ف الجنينة وجات ماسة قعدت معاه»

"مارد بتذكر" ... صحيح انتي قولتي لـ كنزي ف حفلة عيد الميلاد انه كان المفروض اتجوزك انتي مش هي ووصفتيها بالجربوعة؟

"ماسة بلعت ريقها بارتباك" 

... أنـا... قولتلها كدة لإنها استفزتني بكلامها 

بهدوء ... طب يا ماسة انا مش عايزك تحتكي خالص بيها، وملكيش دعوة بعلاقتنا ماشية ازاي، مفهوم!!

"اضايقت من كلامه لكن اكتفت بهز راسها بموافقة"

______

"أركان صرخ بصدمة وخوف" ... جاكي!!

"نزل أركان ع الأرض ومسك الكلب اللي جاله زي حالة تشنج وكإنه بيطلع ف الروح"

"كنزي بقلق" ... يا لهوي هو حصله ايه!

"بوش باكي وخوف" ... مش عارف يا كنزي

«خرج يجري بسرعة ونزل تحت ووراه كنزي»

... استنى بس يا أركان 

"أركان بيصرخ بصوت مبحوح" ... ماااارد، الحق جاكي 

"مارد وقف بسرعة" ... ف ايه! ماله!

... معرفش فجأة داخ واغمى عليه

"مارد بيشوف نبضه ومفيش ، وقال بصوت عالي"

... دكتور بسرررعة

_____

«بعد شوية الدكتور المتخصص كشف عليه واكتشف أنه ميت»

"كنزي شهقت بصدمة" ... مات!

أركان بتأثر ... ازاي دة كان لسة بيلعب وكويس!

الدكتور ... هو أكل حاجة! يمكن اتسمم

"أركان بصدمة" ... اتسمم!! دة وقع العصير بتاع مارد ولحسه من الأرض 

"مارد بدهشة" ... العصير!! 

"وبص ع كنزي بنظرة مش مفهومة، ترجمتها ع انها شك وخلتها تتصدم"

الدكتور بصرامة ... لازم العصير دة يتحلل فوراً

________

"لورا رجعت من برة، واتصنعت القلق"

... مارد باشا، ايه اللي انا سمعته دة، صحيح ف حد حاول يسمك

... وانتي عرفتي منين! وكنتي فين أصلاً 

... خرجت عشان كان ف دوا خلص والدكتور طلب مني أكرره ليك، ولما رجعت الحراس فتشوني برة وقالولي،

«المارد مهتمش بالأمر ومستني نتيجة التحاليل، ومية سيناريو ف دماغه»

"بعد كام ساعة الدكتور وصل بنتيجة المعمل"

... مارد باشا

"كلهم وقفوا بانتباه وترقب وتابع الدكتور"

... النتيجة طلعت إيجابي ، والعصير طلعت فيه مادة سامة، ولو كنت شربته...

"الدكتور قطع كلامه وحرك راسه بأسى ، ف لحظة إن باقي العيلة واقفين مصدومين وغير مصدقين...

أما عن كنزي فهي أكتر واحدة مش مستوعبة، ودماغها لفت خصوصاً ان هي اللي طلعتله العصير بإيدها، وكمان المارد هيشك فيها أول واحدة...

بصت له وكان ساكت وشارد، خايفة يكون شاكك فيها ويصدق انها ممكن تقدر تقتله، وف نفس الوقت خافت للحظة عليه لو كان شرب العصير كان زمانه مكان جاكي

نفضت بسرعة الفكرة من دماغها"

ماسة بعصبية ... مين اللي عمل الزفت العصير دة 

عنايات بخوف ... أنا قولت لـ باسل يحضره وبعدين يديه لـ جينا

"جينا بارتباك وتلعثم" ... أنا كـ.. كنت طـالعة بيه، و.. وقفتني مـ.. مدام كنزي وخدته مني

«كلهم بصولها بنظرات ما بين الشك والحيرة.. لكن فجأة مارد سابهم وطلع أوضته»

______

«بيتنفس بغضب الأفكار بتنهش ف دماغه وبتلعب بيه، مش عارف يستوعب ولا عارف يفكر ، لكن ف اللحظة دي محتاج يهدا ويفصل قلبه عن دماغه عشان يعرف الحقيقة»

"دخلت كنزي وكان مديلها ضهره"

... أمان انا عايزة أقولك حاجة ، أكيد دلوقتي انت بتفكر اني انا اللي حطيتلك السم ف العصير مش كدة!

"التفت لها وبصلها بدون ردة فعل" 

تابعت ... أهو أنا بقا كنت خايفة من النظرة دي 

"بصلها باستنكار وكملت كلامها" ... مهو مش معنى اني كنت بعمل فيك مقالب وأبلغ البوليس عنك، وأحطلك حباية اسهال، وأهزأك ليل نهار، وكمان أضربك ع خلقتك بالقلم، يبقى افكر أسِمك! 

"هزت راسها ببلاهة" ... ابسليوتلي، انا مش من النوع دة من البنات 

... دة انتي سهونة يا بت، انا أتوقع منك أي حاجة

"ضربته بزعل ع دراعه" ... لا أخص عليك أخص، مش منك دي

وكملت بتأثر ... دة أنا ولية مكسورة الجناح، بجري ع أمي وأبويا، بعد ما خلاص ركبي اخشنت

"رفع حواجبه وبعدين ضيق عينه بخبث"

... وانا ايه اللي يخليني أصدقك وانتي جايبالي العصير بنفسك

"اتعدلت وردحت له" 

... لا يا حبيبي، أنا مش رئيسة عصابة زيك عشان تشك فيا، أو حتى عشان افكر أقتل، شوف مين عدوك الأول وبعدين تعالى كلمني...

 دة انت اعداءك أكتر من الهم ع القلب، مش الواد جاسم قالك لازم تاخد بالك من نفسك عشان المافيا بتراقبك!! انا سمعته بنفسي تلاقي بعتولك حد عشان يخلصوا منك ويلبسوها فيا

... منتي لبستيها فعلاً

... ان شالله يلبسك عفريت ما يطلع منك ولا بالزار حتى

_________

جاسم ... مش قولتلك تاخد بالك، كان هيجرى ايه لو كنت شربت العصير!!

"بلا مبالاة" ... ولا حاجة مكنتش هتلاقيني معاك دلوقتي وبكلمك!

بضيق ... انت ايه يا أخي مش خايف ع نفسك! 

... لا 

... مارد أرجوك.. العين دلوقتي بقت عليك والخطر حواليك من كل حتة، وموتك... 

"سكت شوية واتنهد" ... انا خايف عليك بجد

... انت مالك قلبك بقا خفيف كدة ليه!. متقلقش عليا قولتلك 

... طب فهمني ليه مش مهتم تعرف مين اللي فكر يأذيك ف بيتك!

... مهو معروف هو مين!

... والله! يعني عايز تقنعني انك مصدق ان هي اللي كانت عايزة تسمك؟ 

... أنا مالي هو انا اللي قولت! 

«بيبصله بغرابة وعدم فهم من اللا مبالاة اللي هو فيها.. عارف أنه مبيحبش يكشف عن اللي بيدور ف دماغه لأي حد، وبيحتفظ بآخر كارت لنفسه عشان يكش هو ف الآخر، لكن خوفه عليه مخلي عنده فضول يعرف هو ناوي يتصرف ازاي!.»

________

... أه يا ناري منك يابن النمرة، بقا بتشك فيا! ليه يخويا كنت شريكتك ف صفقاتك المشبوهة ولا عاوزة آخد مكانك...

"قاعدة ع السرير بتهري ف نفسها"

... وحياة أمك لكنس عليك أولياء الله الصالحين .. قال مارد قال، دة انا هسخر عليك ملك الجان بذات نفسه يخليك تلف حوالين نفسك كدة اهو 

"وقفت وخرجت برة الأوضة وماشية ف الطرقة، ولاحظت لورا بتتسحب وهي داخلة أوضتها"

"تمتمت لنفسها" ... البت دي أنا مش مرتحالها، أكيد وراها سر 

«مسيت بسرعة عند الباب اللي فتحته بالراحة ووقفت تسمع كلامها ف التليفون»

... أيوة يا باشا، محصلوش حاجة وكمان معرفش مين اللي حطله السم ... لالا دة شك ف مراته! ولو مكنتش رجعت تاني أكيد كان هيعرف ... منا لما خرجت فضلت مراقبة القصر من بعيد ولما ملقتش حد داخل أو خارج منه عرفت انه مشربهوش فرجعت تاني وتقريباً دلوقتي مراته اللي لبست الليلة 

"دخلت ف اللحظة دي كنزي ومسكتها من شعرها" 

... لبسك عفريت أحمر بيكره صنف النسوان يا واطية .. بقا عايزة تقتلي جوزي يا معفنة 

بصراخ ... ااااه ابعدي عني 

...  وحياة أمك منا سايباكي، انا كنت شاكة فيكي من الأول أصلاً 

"بتشيل أيدها عن شعرها" ... اوعي بقا 

«جريت منها ع برة ووراها كنزي»

... وراكي برضو ... الحقوووني يا أهل البيت يا نااااس 

"كانت بتجري ع السلم ع برة بس كان مارد داخل من الباب ووقفها"

... ايه اللي بيحصل هنا 

... امسك البت دي يا مارد، هي اللي كانت عايزة تموتك

... ايه!!!

"لورا بتتنفس بسرعة" ... دي بتكدب، عاوزة تشيل التهمة عنها وتجيبها فيا

... شالك حانوتي ع المقبرة يا بت .. امال مين اللي كان بيكلم واحد ف التليفون دلوقتي وبيقوله ان المارد لسة عايش ومحصلوش حاجة 

"المارد بص لـ لورا بغضب خلاها تبلع ريقها بارتباك"

... صـ.. صدقني محصلش! 

... حصل، والرقم أكيد متسجل ع تليفونها 

"سكت شوية وبعدين بصلها وقال بأسلوب ساخر" 

... وهي هتحاول تقتلني ليه! انا مبدخلش بيتي هنا الا اللي بكون متأكد من ولاءه، ما عدا حد كدة غلطت لما اعتبرته فرد من عيلتي 

"لورا اتنفست براحة بعد كلامه ع عكس كنزي اللي وسعت عيونها بذهول"

... قصدك ايه! انت بتشك فيا!!

بجمود ... انا مش بشك أنا متأكد 

"سكتت شوية وبعدين ردت"

... تمام، يبقى يا نن عين أمك طالما متأكد كدة أنا هروح عند بيت أهلي الناس المحترمة اللي ملهمش ف الغلط، واسيبك بقا لأنثى الأسد اللي جنبك دي لغاية ما تخلص عليك وتموت مفضوح

«قالت كلامها ودخلت أوضتها تلم هدومها، وهو بعد شوية دخل عندها»

... انتي بتعملي ايه!

"مدتهوش اهتمام وهو كرر كلامه بحدة"

... أنا بسألك ردي عليا!! 

... غور يالا من وشي، انت ملكش دعوه بيا نهائي .. أنا همشي من القصر الملعون دة قبل ما أغرق معاكم

... مفيش خروج من هنا، غير بمزاجي 

"التفتت له بحنق" ... وانت بقا هتعوز من واحدة مجرمة حاولت تقتلك ايه! 

"بهمس" ... حقي 

"بصتله بقرف وزقته" ... انت ملكش أي حق عندي، سيبني أمشي قبل ما فعلاً أموتك بإيدي 

"قرب منها وضمها لحضنه" ... وأنا نفسي أموت ع إيدك 

"زقته بغيظ" ... انت عبيط يابني! ولا شكلك كدة

"بصلها بازدراء" ... هو انتي عايزة ايه أنا مش فاهم!!

... انا مش عايزة منك حاجة

بضيق ... يكون أحسن برضو، وكويس أن حضرتك حضرتي الشنط عشان بكرة بالليل مسافرين إسبانيا 

بصوت عالي ... هأو، انا مش مسافرة مع حد

... أه فعلاً انتي مسافرة مع جوزك 

كشرت بعياط ... انت عايز تتاويني صح ! 

... هههه لأ هفسحك

... عادي ما دي لغتكم أصلاً ومعناها تخلص عليا 

... مقدرش 

"أداها ضهره وبيقلع جاكتته وهي تمتمت بخفوت"

... يابن الكلب 

_______

«تاني يوم بالليل جهزوا عشان يسافروا، وجات سعاد وأبوها يسلموا عليها»

سعاد ... خدي بالك من نفسك يا كنزي 

... فعلاً أنا لازم أحرس منه

... يختي دة هو اللي يخاف منك 

نرجس ... ابقي طمنيني عليكم لما توصلوا، وخدوا بالك من مارد كويس 

... متخافيش عليه هرجعلكم بيه ف كياس 

"وكزتها بخفة وضحكت"

«خرج المارد مع كنزي ووقفته لورا»

"بدلع وهي بترمق كنزي" ... كان نفسي ابقى معاك يا مارد باشا عشان أتأكد من سلامتك 

كنزي بحنق ... يا عقربة يام وش مسلوخ

"لبس نضارته وركب عربيته مع الحراس ومشيوا ع المطار"

________

"لورا خرجت من القصر وركبت تاكسي وراحت مكان ف صحراوي"

«ظهر راجل عمره ما يعديش الخمسين سنة»

بمرح ... لوراااا ، برافو عليكي 

... يا ترى لو كان المارد اتقتل كنت هتبقى مبسوط زي دلوقتي!

ضحك بصوت عالي ... بصراحة لأ، انا اللي يهمني السلاح لورا، عاوز ما يخرجش برة غير من عندي أنا، تعرفي السلاح دة هيبقى من تاني أخطر آلي ف العالم، مارد دة عبقري ههههه

"كلامه كله عربي مكسر، وشكله من برة مصر"

... أهو سافر، وأكد ان الشحنة هتطلع من اسبانيا واعتقد هتقدروا بسهولة تستولوا عليها

_لا يا حلوة مش هيحصل 

«الاتنين انتبهوا للصوت وكان جاسم، ولارا ابتلعت ريقها بارتباك»

الشخص ... انت مين! وازاي قدرت تدخل هنا!

جاسم ... رجالتنا محاصرة المنطقة كلها، فلو عملت أي حركة، هتبقى بالسلامة 

«الاجنبي بص لـ لورا بغضب وبعدين طلع الفون من تحت هدومه وبعت رسالة من غير ما حد ينتبه له».......

#البارت_الواحد_والعشريييييين 😂😂😂😂💔

"بزمجرة" ... هو احنا جايين أسبانيا نعمل ايه!

"وهو بيخرج هدومه من الشنط" ... منا قولتلك هفسحك!

... اسمع يا حيلة أمك، عليا النعمة لو فكرت بس تقربلي لكون مصوتة ولامة عليك أمة الكفار اللي احنا ف بلدهم دول 

"ضحك" ... هو انتي معندكيش غير الصويت!

... أه أصل أنا بحب اللمة والفضايح. 

... لا منا عارفك متتوصيش .. غيري هدومك عشان هننزل نتغدى برة 

... لا، انا عاوزة أنام بقالي كذا يوم ما بنامش بسببكم يا ولاد النمور، طول الوقت معيشني ف خطط ومؤامرات وشك وحاجة ف منتهى أفلام الأكشن والدراما

"بخبث" ... لسة الأكشن مجاش، دة انتي هتاكلي ضر... ضوما وآيس كريم وكدة 

«بصتله بشك وخوف وبعد كدة دخل الحمام»

"لطمت ع خدها" ... يا نصيبتي، شكله ناوي يعملني كفتة

_________

"بينادي عليها" ... ديمااااا

«كانت خارجة من الجامعة وشافته»

... ايه اللي جابك يا شقوطة هنا!

... جاي أطمن ع البرسيم الأخضر اللي ف عيونك... قصدي جاي عشانك

... بقولك ايه يالا انت، جو العيال الهلافيت بتوع اللوع دول ماليش فيه، عايزني يابن الحلال باب أهلي مفتوح غير كدة معنديش كلام

"بدهشة" ... يخربيتك دة انتي واقعة أوي، طب حتى سبيها تيجي مني أنا الأول 

... منا بجيلك دوغري عشان متفكرش اني رامية نفسي

... لا وانتي الشهادة لله تقيلة ف نفسك .. دة انتي ناقص تاخديني من ايدي ع المأذون

... وآخدك ليه هو انت نوغة! ولا عندك عمى 

... لا بس موضوع الجواز دة عندي عقدة منه من وانا صغير

... مش فاهمة

... أصل انا أبويا وأمي اتجوزوا بعض!.

... فين الإفيه عشان أضحك يعني!

... دة مش إفيه! دي قصة مؤثرة 

"بتأثر مصطنع" ... لا حول ولا قوة إلا بالله، ابوك وأمك كانوا متجوزين بعض، دي معلومة ف غاية الصدمة ، I am shocked "صعقت" يا جدعان 

"بابتسامة بلهاء" ... يعني موافقة تعطفي عليا ونتصاحب وتاخديني لدنيا تانية 

... طبعاً يا راجل، دة انت هتاخد أحلى عطف 

«بصلها بابتسامة عريضة، وفجأة خلعت الجزمة اللي ف رجلها وأدلته ع دماغه»

... اااااه يا بنت المجانين، فتحتيلي دماغي

... خد حنان كمان 

"نزلت عليه مرة تانية وسابته ومشيت بسرعة"

______

«بالليل، كنزي لسة نايمة وكان المارد خارج من الحمام بيمسح شعره المبلول»

... كنزي!. قومي يا بنتي كفاية نوم 

"لا حياة لمن تنادي نايمة وكإنها بقالها سنة مغفلتش.. قرب منها بالراحة ورفع خصلة من شعرها عن وشها"

... يا سلام لو تبقي هادية كدة وانتي صاحية، الحياة تبقى جميلة 

... جميلة دي تبقى الداية اللي سحبتك من بطن أمك 

"فجأة لقاها فاتحة عينيها وبترد عليه"

«بصلها بغضب، وبعدين خد سكينة من جنب السرير وحطها ع رقبتها»

... ايه رأيك أسحبلك أنا شريان الحياة عشان أرتاح من لسان اللي خلفتك

"اتعدلت باندفاع" ... انت بتغلط ف أمي يابن النمرة 

... واشمعنى انتي بتغلطي يعني، ولا هي أمك ملكة مصر الحديثة 

... اللاه دة انت حلو أهو وبتألش

... وبعرف أقول نكت كمان، تحبي تسمعي!

... ومالو سمعني

... بيقولك مرة واحدة غلطت ف جوزها قام اغتصبها!.

"شهقت بصدمة وهي بتبعد نفسها عن السرير، وهو حاول يكتم ضحكته ع منظرها وتوترها الغريب"

"بزمجرة" ... هي دي النكتة يا قليل الأدب

... لا دي حكمة غير أدبية 

... طبعاً مهو دة تخصصك 

... ماشي يا بتاعة الأداب انتي 

"طلعت له لسانها وراحت ناحية الحمام"

... اجهزي عشان هننزل تحت 

... طيب

________

بحنق ... أنا مش فاهمة كان لزومه ايه ياخدها معاه اسبانيا

الزنخ ... مهي مراته

... اللي كانت عايزة تقتله!!.

... مارد مش غبي للدرجة دي عشان ميعرفش مين اللي حاول يقتله يا ماسة

... تقصد ايه يا بابي، ان حد تاني هو اللي كان عايز يسمه!

... باينة أوي

"وقفت بسرعة" ... يبقى أنا لازم أسافرله بسرعة، أكيد الخطر لسة محاوطه

________

... إيه دة هي چيچي جات معانا! 

... طبعاً، هي مهمتها مراقبتك

"شوحتله بإديها بزمجرة" ... ليه يخويا كنت بخطط عشان أسرقك! ولا لسة شاكك فيا

... اقعدي وبطلي كلام أهبل

«قعدت بحنق ع طرابيزة»

... انا مش فاهمة جايبنا المكان اللي كله منكر دة ليه، انت مش هترتاح إلا لما تدخلني وياك الدرك الأسفل من النار

«ضحك عليها وبعد شوية طلب أكل والجرسون بيحطه لهم»

جرسون _ Buenas tardes señor

"سهرة سعيدة سيدي"

مارد ... gracias "شكراً"

"باندفاع خلت الجرسون يتفزع" ... استنى يا عم الحاج انت!

جرسون _ Que es señora؟

"ف ايه مدام"

بضيق ... الجدع دة بيقول ايه! خليه يشيل الزفت الخمرة دي من هنا، ولا حضرتك ناوي تاخد السهرة ع الرقاصة!!!

"ضحك بقوة وشاور للجرسون يمشي" 

"غمز بمداعبة" ... واسهر ع الرقاصة ليه ومراتي جنبي ومعايا

"بلا مبالاة" ... يحنن يا حبيبي 

"بهمس" ... انت اللي حبيبي 

" وشها بقا أحمر وبعدين شربت مية بتوتر" 

"ابتسم من ارتباكها وقال بمداعبة" ... منفسكيش تجربي العناب مرة تانية !!

... نفسي أجرب ابو زنوبة عليك عشان تبطل سفالتك دي 

"انفجر في الضحك، وبعدين حرك راسه ناحية المسرح وكانت الرقاصة ابتدى عرضها"

... مالك يا ضنايا مركز أوي معاها كدة ليه؟

"بصلها وهمس بخبث" ... ارقصيلي ومش هركز مع حد غيرك!.

«لسة هترد ولقت الرقاصة فوق دماغهم»

الرقاصة بدلع ... Cómo está, Sr. Mard?

"ازيك يا مارد باشا"

بابتسامة ... هاي نيتا

"بلهجة عربي لبناني مكسر" ... بقالنا كتير ما بنشوفك 

... وأديني جيت

"بدلع وهي بتحرك صوايعها ع جاكتته" ... مكان كله نور بهالطلّة الـ ما في متلها

... انتي كمان منورة 

... بدي تيجي لعندي اليوم، راح قوم بواجبي معك 

«كنزي متابعه حركاتها وقامت باندفاع وزقت ايدها عنه»

"بصوت عالي" ... جرى ايه بروحمك، هو انا مش مالية عين بلدك ولا إي .. عمالة تتمايصي وتتمرقعي ع الواد ولا كإني موجودة  .. أجبلك صاجات واقف وراكي عشان تترقصيله كويس يا بت

... انتي مين! 

... أنا اللي مسكت الهوا بعد العندليب يا بت 

«مسكت قزازة الويسكي وضربتها ع دماغها، وقعت ع الأرض ف لحظتها»

"المارد بدهشة" ... عملتي ايه يا مجنونة

... ابقى خلي السنيورة تدلعك يا بتاع النسوان العطلانة

«وسابته وجريت ع برة النايت ووراها چيچي طبعاً»

_______

... استني هنا انتي ازاي تعملي كدة؟

"سحبت ايدها بزمجرة" ... اوعى ايدك ياض، بدل ما أخليك فرجة وسط الناس 

"بصوت غليظ وعالي" ... نــعــم!!!!!!

... أنا مش فاهمة البنات لازقين لك ع ايه! ايه يعني موز حبتين! اكيد عمليات تجميل .. وايه يعني عندك عضلات! طبعاً كلها كيرتزون ونفخ ع الفاضي .. وايه يعني عيونك تسحر وبتلمع زي اللؤلؤ هه معروفة يعني لينسيز

... ودة مدح ولا ذم بقا

بحنق ... دة قرف .. اقولك ع حاجة طز فيك وفيهم 

«كانت ماشية وشدها من دراعها بقوة ودخلت ف حضنه»

... اوعى ايدك متلمسنيش 

... انتي بتغيري عليا!

"بتلعثم وهي بتحاول تفك نفسها منه" ... وأغير عليك ليه! احنا متجوزين مؤقت ولما نرجع مصر هتطلقني زي ما قولتلي

"قبض ع وسطها بلطف" ... بس أنا بقا مش عايز أطلق 

... لا هتطلقني، وارجع بقا للست ماسة والست لورا، وعليهم الرقاصة اللي أنا هبدتها ع نفوخها 

... ودول ييجوا فيك انت ايه بس

بفخر ... طبعاً يابني دة أنا الأصل والباقي كله شباشب

"همس وهو بيقربها أكتر" ... يا واد يا جامد انت

"ارتبكت من لمسته وقالت بتوتر"

... ع فكرة عيب اللي بتعمله احنا قدام الناس 

«خفف من لمسته وقال بابتسامة خبيثة»

... عندك حق يلا نطلع فوق عشان ناخد راحتنا

«لسة الاتنين طالعين وقابلهم شخص ف أواخر الاربعين»

_ازيك يا مارد باشا

«المارد أول لما شافه ملامح وشه اتغيرت»

... مين يا دة يا أمان؟

_ أحب أعرفك بنفسي، عقيد فاروق الجمال أمن وطني ..............

الفصل الثاني والعشرون حتى الفصل الحادي والثلاثون من هنا

بداية الرواية من هنا

لاتلهكم القراءه عن الصلاه وذكر الله والصلاة والسلام على رسول الله صلى الله عليه وسلم 

جميع الروايات كامله من هنا 👇 ❤️ 👇 

روايات كامله وحصريه

اعلموا متابعه لصفحتي عليها الروايات الجديده كامله بدون روابط ولينكات من هنا 👇 ❤️ 👇 

روايات كامله وحديثه

❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺💙🌹❤️🌺